Sa Indi Na Lang Madugay, Wala Na sing Imol!
“DILI kamo mahadlok, kay, yari karon! ginapahayag ko sa inyo ang maayong balita sang dakung kalipay nga mangin sa bug-os nga katawhan.” (Lucas 2:10) Ining makalilipay nga mga pulong nabatian sang nakibot nga mga manugbantay malapit sa Betlehem sang gab-i nga natawo si Jesus. Nahisanto sa sadto nga kapahayagan, ginpadaku gid ni Jesus ang “maayong balita” sa tion sang iya dutan-on nga ministeryo. Sa karon, nga nagadepende gid kita sa kuwarta agod maatipan ang aton mga kinahanglanon, paano ang maayong balita tuhoy kay Jesus makabenepisyo sa aton?
Ginpahayag ni Jesucristo “ang maayong balita sa mga imol.” (Lucas 4:18) Suno sa Mateo 9:35, “Si Jesus naglibot sa tanan nga siudad kag mga minuro, nga nagapanudlo sa ila mga sinagoga kag nagawali sing maayong balita sang ginharian.” Makapalig-on gid ang iya mensahe sa mga imol. “Sang nakita ang mga kadam-an, nagbatyag sia sing kaluoy sa ila, kay ginpanitan sila kag ginpaaplaag subong sang mga karnero nga wala sing manugbantay.” (Mateo 9:36) Matuod, nagsiling si Jesus nga, “Ang mga imol kaupod ninyo pirme,” apang indi kita dapat maghinakop pasad sa sining mga pulong nga wala na sing paglaum ang mga imol. (Juan 12:8) Tubtob nagapabilin ining malauton nga sistema, indi madula ang mga imol, bisan ano man ang nangin kabangdanan sang ila kahimtangan. Wala ginasikway sang Pulong sang Dios ang katunayan sang kaimulon, apang wala ini nagapabilin sa negatibo nga mga butang. Sa baylo, nagahatag ini sa mga imol sing bulig sa paglandas sang nagapabalaka nga mga butang sa kabuhi.
Bulig Para sa mga Imol
Sing talalupangdon, ginsiling ini: “Wala sing mas mabug-at nga lulan para sa isa ka indibiduwal sangsa mahibaluan niya nga wala sing bisan sin-o nga nagaulikid ukon nagahangop sa iya.” Apang, walay sapayan sang kakulang sing kaawa sa bahin sang kadam-an, may yara gihapon maayong balita para sa mga imol—sa karon kag sa palaabuton.
Sing makapasubo, madamo ang wala sing interes sa pagbulig sa mga imol. Suno sa The World Book Encyclopedia, ang iban nagapati nga “ang mga tawo sa katilingban nagapaindisanay para sa kaluwasan kag . . . ang superyor nga mga indibiduwal amo ang nagagamhanan kag nagamanggaranon.” Ang mga nagapati sa sining teoriya, nga ginatawag social Darwinism, mahimo magatamod sa mga imol subong mga tawo nga tamaran lamang ukon palagasto. Apang, ang mga trabahador sa uma, pangayaw nga mga trabahador, kag iban pa, bisan pa ginaswelduhan sing manubo lamang, masami nga nagapangabudlay sing lakas agod mapakaon ang ila mga pamilya.
Sa madamo nga kadutaan ang kaimulon kinaandan na lamang. Busa, ang mga imol—ang kadam-an—wala nagabatyag nga napaslawan sila. Walay sapayan, sa sina nga kadutaan may mga tawo nga nagakabuhi sa daku nga kaluhuan sa tunga sang kaimulon. Ang komportable, dalagku nga mga puluy-an nagatindog sa tupad sang magutok, mahigko nga mga payag-payag. Ang mataas sing sweldo nga mga tawo nagapadalagan sang ila malahalon nga mga awto sa mga kalye nga nagaginutok sa mga imol kag walay trabaho. Sa sina nga kadutaan nahibaluan gid sang mga imol ang ila kahimtangan. Sa pagkamatuod, “ang mga imol nagaantos indi lamang sa indi masustansia nga kalan-on, dinagakaigo nga mga puluy-an, kag dinagakaigo nga sistema sa pag-atipan sang panglawas, kundi sa masami man sa kabalaka sa ila kahimtangan,” siling sang The World Book Encyclopedia. “Bangod indi sila makakita kag makahupot sing permanente nga trabaho, nagakadulaan sila sing bug-os nga dignidad kag pagtahod sa kaugalingon.” Apang, paano ginalandas sang pila nga mga imol katama ang ila kahimtangan? Ano ang kaangtanan sang maayong balita tuhoy kay Jesus sa paglandas?
Una, dumduma nga ang kaimulon mahimo nga mapagrabe pa sang dimaalamon nga mga bisyo. Binagbinaga ang pila ka halimbawa. Si Valdecir nagabaton nga samtang ang iya asawa kag diutay nga kabataan may diutay nga makaon, nag-uyang sia sing kuwarta agod padayunon ang isa ka imoral nga estilo sang pagkabuhi. Sia nagsiling: “Bisan pa may trabaho ako, pirme lang ako wala sing kuwarta para sa akon pamilya apang pirme lang nagaunod sing lainlain nga tiket para sa loterya ang akon bulsa.” Si Milton, bangod sang lakas nga pag-inom kag pagpanigarilyo, nadulaan sing negosyo nga may 23 ka empleyado. Sia nagsiling: “Ginhinguyang ko ang mga gab-i sa kalye, indi makapauli, kag nag-antos sing daku ang akon pamilya bangod sa akon.”
Gin-uyangan man ni João ang iya sweldo sa mga bisyo. “Ginhinguyang ko ang mga gab-i sa guwa sang balay. Ang tanan ko nga sweldo indi makaigo para sa akon mga bisyo kag sa mga babayi. Indi na mabatas ang kahimtangan, kag luyag sang akon asawa magbulag.” Wala labot sa iya mga problema sa kuwarta kag sa iya asawa, may iban pa sia nga mga problema. Sia nagsiling: “Ginhatagan ko sing mga problema ang akon mga paryente kag mga kaingod, kag ilabi na ang akon trabaho. Subong resulta, pirme lang ako ginapahalin sa trabaho.” Si Júlio isa ka giyan sa droga. Apang, nagpaathag sia: “Sanglit kulang pirme ang akon sweldo para sa akon bisyo sa droga, nagsugod ako sa pagbaligya sing droga agod nga indi na ako kinahanglan magbakal sini.”
Ginpadaku sa isa ka imol nga pamilya nga may walo ka kabataan, may handum si José para sa iya kaugalingon. Sa paghunahuna nga indi na mag-uswag ang iya kahimtangan, upod sa iban pa nga mga pamatan-on nagsugod sia sa pagpangawat. Sa pagkadesperado, ang isa ka pamatan-on nangin katapo sang isa ka gang nga ginatawag Headbangers. Sia nagpaathag: “Sanglit kalabanan sa amon imol katama, nakasapo kami sing kaayawan sa pagpamuka sang mga butang kag pag-atake sa mga tawo.”
Apang, karon ini nga mga tawo kag ang ila mga pamilya wala na nagaantos sing daku nga kinawad-on ukon kaugot kag paghinakit. Indi na sila walay mahimo ukon walay paglaum. Ngaa indi na? Bangod gintun-an nila ang maayong balita nga ginbantala ni Jesus. Gin-aplikar nila ang laygay sang Biblia kag nakig-upod sa pareho nila sing panghunahuna nga mga indibiduwal sa mga kongregasyon sang mga Saksi ni Jehova. Kag nakatuon sila sing pila ka importante gid nga mga butang tuhoy sa manggad kag kaimulon.
Bulig sa Paglandas sang Kaimulon
Una, natun-an nila nga kon iaplikar ang mga prinsipio sang Biblia, sarang mapakanay ang malain nga mga epekto sang kaimulon. Ginapakamalaut sang Biblia ang imoralidad, pagpahubog, pagsugal, kag ang pag-abuso sa droga. (1 Corinto 6:9, 10) Magasto gid ina nga mga butang. Makapaimol ini sa isa ka manggaranon nga tawo, kag makapaimol pa gid sa isa ka tawo nga imol na nga daan. Daku ang mahimo sang pagbiya sa sining mga bisyo kag sa iban pa kaangay sini agod mapauswag ang pangabuhi sang isa ka pamilya.
Ikaduha, nasapwan nila nga may importante pa nga mga butang sa kabuhi sangsa manggad. Ang isa ka balanse nga pagtamod ginapabutyag sa sining inspirado nga mga pulong: “Ang kaalam pangapin subong nga ang kuwarta pangapin; apang ang bentaha sang ihibalo amo nga ang kaalam nagatipig sang kabuhi sang may iya sini.” (Manugwali 7:12) Huo, kinahanglanon ang kuwarta. Apang mas mapuslanon ang pasad-sa-Biblia nga kaalam kag ihibalo tuhoy sa mga katuyuan sang Dios. Sa pagkamatuod, para sa isa nga kulang sing kaalam, ang sobra nga kuwarta kag ang diutay nga kuwarta pareho lang nga isa ka lulan. Ang manunulat sang Biblia maalamon nga nangamuyo: “Dili ako paghatagi sing kaimulon ukon kamanggaran. Pakan-a ako sang kalan-on nga kinahanglanon ko, agod nga indi ako mabusog kag magpanghiwala gid sa imo kag magsiling: ‘Sin-o bala si Jehova?’ kag agod indi ako mag-imol kag mangawat gid kag magpasipala sa ngalan sang akon Dios.”—Hulubaton 30:8, 9.
Ikatlo, natukiban nila nga kon ang isa ka tawo magkabuhi suno sa maayong balita nga ginbantala ni Jesus, indi gid sia magbatyag nga biniyaan. Ang maayong balita nagadalahig sa Ginharian sang Dios. Ang mensahe ginatawag nga “maayong balita sang ginharian,” kag sa aton adlaw ginabantala ini sa bug-os napuy-an nga duta. (Mateo 24:14) Ginsilingan kita ni Jesus nga pagasakdagon kita kon ipahamtang naton ang aton paglaum sa sina nga Ginharian. Sia nagsiling: “Padayon, nian, nga pangitaa anay ang ginharian kag ang pagkamatarong [sang Dios], kag tanan ini nga butang idugang sa inyo.” (Mateo 6:33) Ang Dios wala nagapanaad sing matahom nga mga awto ukon maluho nga mga balay. Si Jesus nagpatuhoy sa mga kinahanglanon sang kabuhi, mga butang subong sang pagkaon kag panapton. (Mateo 6:31) Apang minilyon karon ang makapamatuod nga ang saad ni Jesus masaligan. Ang isa ka indibiduwal, bisan ang tuman ka imol nga indibiduwal, wala ginabiyaan sing bug-os kon unahon niya ang Ginharian.
Ikap-at, natukiban nila nga ang isa nga nagauna sa Ginharian sang Dios wala nagahinakit sa mabudlay nga pangabuhi. Huo, ang isa ka imol nga tawo dapat magtrabaho sing lakas. Apang kon nagaalagad sia sa Dios, may yara sia isa ka pribilehiyo nga kaangtanan sa iya Manunuga, nga tuhoy sa iya ang Biblia nagasiling: “Wala sia magtamay ukon magkangil-ad sang kapipit-an sang napiutan; kag wala sia magpalipod sang iya nawong gikan sa iya, kag sang nagtuaw sia sa iya nagpamati sia.” (Salmo 22:24) Dugang pa, ang isa ka imol nga tawo may bulig sa paglandas sang mga problema sang kabuhi. May yara sia mainit nga pagpakig-upod sa mga masigka-Cristiano kag may ihibalo kag pagsalig sa ginpahayag nga kabubut-on ni Jehova. Ang mga butang kasubong sini ‘halandumon sing labi pa sa bulawan, huo, sa madamo pa nga bulawan nga bus-og.’—Salmo 19:10.
Sa Katapusan, Wala Na sing Kaimulon!
Bilang katapusan, ang mga indibiduwal nga namati sa maayong balita nakatuon nga si Jehova nga Dios nagtuyo sa paglubad sang problema sang kaimulon sing permanente paagi sa iya Ginharian. Ang Biblia nagasaad: “Ang may kinawad-on indi malimtan sing dalayon, ukon ang ginapaabot nga paglaum sang mga mahagop madula sing dayon.” (Salmo 9:18) Ang Ginharian isa ka matuod gid nga panguluhan, nga natukod na sa mga langit upod si Jesucristo subong Manuggahom sini. Sa indi madugay, ina nga Ginharian magabulos sa tawhanon nga mga panguluhan sa pagdumala sa mga hilikuton sang tawo. (Daniel 2:44) Nian, subong nagalingkod sa trono nga Hari, si Jesus ‘magakaawa sa imol kag sa nawad-an, kag luwason niya ang mga kalag sang nawad-an. Tubson niya ang ila kalag gikan sa pagpigos kag paglugos, kag ang ila dugo mangin bilidhon sa iya itululok.’—Salmo 72:13, 14.
Sa pagpaabot sina nga tion, ang Miqueas 4:3, 4 nagasiling: “Magalingkod sila ang tagsa ka tawo sa idalom sang iya ubas kag sa idalom sang iya higuera, kag wala na sing magapahadlok sa ila; kay ang baba ni Jehova sang kasuldadusan nagpamulong sini.” Sin-o ang ginahambalan diri? Ti, ang tanan nga nagapasakop sa Ginharian sang Dios. Ina nga Ginharian magalubad sang tanan nga problema nga nagapaantos sa katawhan—bisan ang problema nga balatian kag kamatayon. “Lamunon niya sing dayon ang kamatayon, kag ang Soberanong Ginuong Jehova magapahid gid sang mga luha gikan sa tanan nga nawong.” (Isaias 25:8; 33:24) Daw mangin ano ka tuhay ina nga kalibutan! Kag dumduma, mapatihan naton ining mga saad kay gin-inspirar ini sang Dios mismo. Sia nagasiling: “Ang akon katawhan magapabilin sa puluy-an nga mahidaiton kag sa mga puluy-an nga malig-on kag sa mga palahuwayan nga malinong.”—Isaias 32:18.
Ang pagsalig sa Ginharian sang Dios nagalandas sang kakulang sing pagtahod sa kaugalingon nga resulta masami sang kaimulon. Nahibaluan sang isa ka imol nga Cristiano nga importante man sia sa mga mata sang Dios subong sang isa ka Cristiano nga manggaranon. Lunsay sila ginahigugma sang Dios, kag lunsay sila may pareho nga paglaum. Lunsay sila malangkagon nga nagapaabot sang tion nga, sa idalom sang Ginharian sang Dios, ang kaimulon mangin isa ka butang sang nagligad. Daw mangin ano ina ka makalilipay nga tion! Sa katapusan, wala na sing imol!
[Retrato sa pahina 5]
Ngaa uyangan ang kuwarta sa sugal, pagpanigarilyo, pag-inom sing lakas, pag-abuso sa droga, ukon sa imoral nga estilo sang pagkabuhi?
[Retrato sa pahina 7]
Lubaron ni Jehova nga Dios ang problema nga kaimulon sang tawo paagi sa iya Ginharian