Pagbenepisyo Gikan sa Adlaw-Adlaw nga Pagbasa sing Biblia

“Malipayon ang tawo . . . nga ang [iya] kawilihan yara sa kasuguan ni Jehova, kag sa iya kasuguan nagabasa sia sa mahinay nga tingog sa adlaw kag gab-i.” ​—⁠SALMO 1:​1, 2.

1. (a) Anong bantog nga karatula ang makita sa isa ka kiliran sang isa ka imprintahan nga tinukod sa bug-os kalibutan nga ulong talatapan sang Watch Tower Society? (b) Paano kita makabenepisyo sing personal kon sundon naton sing tinagipusuon ang laygay?

“BASAHA ANG BALAAN NGA BIBLIA NGA PULONG SANG DIOS SA ADLAW-ADLAW.” Sa dalagku nga mga letra sa Ingles, ina nga pinamulong makit-an sa isa ka kiliran sang isa ka tinukod nga imprintahan sang mga Biblia kag literatura sa Biblia sang Watch­tower Bi­ble and ­Tract So­ciety sa Brook­lyn, New York. Ina nga panugda wala lamang ginatuyo para sa mga tawo sa kalibutan nga makakita sini nga karatula. Nahibaluan sang mga Saksi ni Jehova nga dapat man nila ini tumanon. Ang mga nagabasa sang Biblia sing regular kag nagaaplikar sini sing personal makabenepisyo gikan sa mga panudlo, pagsabdong, pagsaway, kag pagdisiplina sa pagkamatarong nga ginaaman sini.​—⁠2 Timoteo 3:​16, 17.

2. Paano ginpadaku ni Utod Russel ang importansia sang pagbasa sing Biblia?

² Ginaapresyar sing daku sang mga Saksi ni Jehova ang ila mga bulig sa pagtuon sa Biblia, lakip Ang Lalantawan, kag ginagamit nila ini sing regular. Apang nahibaluan nila nga wala sing isa sini ang nagabulos mismo sa Biblia. Sadtong 1909, si ­Charles Taze Rus­sel, ang unang presidente sang Watch Tower Bible and Tract So­ciety, nagsulat sa mga bumalasa sang Lalantawan nga magasin: “Indi pagkalimti nga ang Biblia amo ang aton Talaksan kag bisan pa nga hatag-Dios ang aton mga bulig sa pagtuon sa Biblia ‘mga bulig’ ini kag wala nagabulos sa Biblia.”

3. (a) Ano ang epekto sang “pulong sang Dios” sa mga napadayag sa sini? (b) Daw ano kasunson ginbasa kag gintun-an sang mga taga-Berea ang Kasulatan?

³ Ang inspirado nga Kasulatan may kadalumon kag puwersa nga wala sa bisan anong libro. “Ang pulong sang Dios buhi kag gamhanan kag matalom pa sa bisan anong espada nga duha sing sulab kag nagalapos tubtob sa nautlan sang kalag kag espiritu, sang mga lutalutahan kag utok, kag nagahantop sang mga hunahuna kag mga tinutuyo sang tagipusuon.” (Hebreo 4:12) Mainit nga gindayaw sang disipulo nga si Lucas ang mga taga-Berea, nga nagatawag sa ila nga “labi ka dungganon.” Wala lamang nila ginbaton sing malangkagon ang pulong nga ginbantala ni apostol Pablo kag sang iya kaupod nga si Silas kundi ‘mahalungon nga gin-usisa ang mga Kasulatan sa adlaw-adlaw’ agod pat-uron ang Makasulatanhon nga sadsaran sang kon ano ang ginpanudlo sa ila.​—⁠Binuhatan 17:⁠11.

Pagbasa Sini sa Adlaw-adlaw

4. Ano ang ginapakita sang Kasulatan tuhoy sa kon daw ano kasunson dapat naton basahon ang Biblia?

⁴ Wala ginasiling sing espisipiko sang Biblia kon daw ano kasunson dapat naton basahon ini. Apang, narekord sini ang laygay ni Jehova kay Josue nga ‘basahon sa mahinay nga tingog ang tulun-an sang kasuguan sa adlaw kag gab-i’ agod manghikot sia sing maalamon kag mangin madinalag-on sa paghimo sang iya hatag-Dios nga katungdanan. (Josue 1:8) Ginasugiran kita sini nga ang bisan sin-o man nga naghari sa dumaan nga Israel dapat magbasa sang mga Kasulatan “sa tanan nga adlaw sang iya kabuhi.” (Deuteronomio 17:19) Dugang ini nga nagasiling: “Malipayon ang tawo nga wala nagalakat sa laygay sang mga malauton . . . Kundi ang iya kawilihan yara sa kasuguan ni Jehova, kag sa iya kasuguan nagabasa sia sa mahinay nga tingog sa adlaw kag gab-i.” (Salmo 1:​1, 2) Ginasugiran man kita sang Ebanghelyo nga ginrekord ni Mateo nga sang ginsikway ni Jesucristo ang mga pagtinguha ni Satanas nga sulayon Sia, nagkutlo Sia gikan sa inspiradong Hebreong Kasulatan, nga nagasiling: “Nasulat na, ‘Indi lamang sa tinapay mabuhi ang tawo, kundi sa tagsa ka pulong nga nagaguwa sa baba ni Jehova.’ ” (Mateo 4:4) Daw ano kasunson kita nagakinahanglan sing pisikal nga pagkaon? Sa adlaw-adlaw! Ang pagkaon sing espirituwal nga kalan-on sa adlaw-adlaw mas importante bangod nagaapektar ini sang aton palaabuton para sa kabuhi nga walay katapusan.​—⁠Deuteronomio 8:​3; Juan 17:⁠3.

5. Paano ang adlaw-adlaw nga pagbasa sang Biblia makabulig sa aton sa “paggawi sing takus kay Jehova” kon ginaatubang kita sing pagtilaw sa pagtuo?

⁵ Ang tagsa sa aton nagakinahanglan sing adlaw-adlaw nga pagpalig-on sang Pulong sang Dios. Sa adlaw-adlaw​—⁠sa puluy-an, sa trabaho, sa eskwelahan, sa mga dalanon, kon nagapamalaklon, sa aton ministeryo​—⁠madamo ang nagahangkat sang aton pagtuo. Paano naton atubangon ini? Madumduman bala naton gilayon ang mga kasuguan kag mga prinsipio sa Biblia? Sa baylo nga palig-unon ang pagsalig sa kaugalingon, ang Biblia nagapaandam: “Ang nagahunahuna nga nagatindog sia mag-andam basi kon mapukan sia.” (1 Corinto 10:12) Ang adlaw-adlaw nga pagbasa sing Biblia magabulig sa aton sa “paggawi sing takus kay Jehova sa bug-os nga pagpahamuot sa iya” sa baylo nga magpauyon sa sining kalibutan.​—⁠Colosas 1:​9, 10; Roma 12:⁠2.

Ang Kinahanglanon nga Basahon ang Biblia sing Sulit-sulit

6. Ngaa mapuslanon nga basahon ang Biblia sing sulit-sulit?

⁶ Ang pagbasa sang Biblia tuhay gid sangsa pagbasa sang isa ka libro sang dimatuod nga sugilanon. Ang bantog gid nga dimatuod nga sugilanon gindesinyo agod basahon sing makaisa; sa tion nga mahibaluan na sang isa ang istorya kag ang katapusan sini, wala na sing rason nga basahon pa ang amo nga libro. Sa kabaliskaran, walay sapayan kon pila na ka beses nga nabasa naton ang Biblia, makabenepisyo kita sing daku sa pagbasa sini liwat. (Hulubaton 9:9) Para sa mahinantupon nga tawo, ang mga Kasulatan pirme may bag-o nga kahulugan. Ang mga tagna tuhoy sa katapusan nga mga adlaw labi nga nangin makadalayaw sa iya bangod sang iya nakit-an, nabasahan, kag personal nga naeksperiensiahan sa nagligad nga mga binulan. (Daniel 12:4) Samtang ginapasangkad niya ang iya kaugalingon nga eksperiensia sa kabuhi kag ginalandas ang mga palaligban, labi nga ginaapresyar sing mahinantupon nga bumalasa sang Biblia ang laygay nga mahimo nga nabasahan na niya anay sing talagsa. (Hulubaton 4:18) Kon ginaatubang sia sing malubha nga balatian, ang mga saad sang Biblia tuhoy sa pagdula sang kasakit kag pagpasag-uli sang maayong panglawas labi nga nangin makahulugan sa iya sangsa nagligad. Kon mapatay ang suod nga mga abyan kag mga katapo sang pamilya, ang saad nga pagkabanhaw nangin labi ka hamili sa iya.

7. Ano ang makabulig sa aton kon nakatigayon kita sing bag-o nga responsabilidad sa kabuhi, kag ngaa?

⁷ Mahimo nga nabasa mo na sing personal ang Biblia kag naaplikar ang laygay sini sa sulod sang mga tinuig. Apang mahimo nga may bag-o ikaw nga mga salabton karon sa kabuhi. Nagaplano ka bala nga magminyo? Mangin isa ka na bala ka ginikanan? Gintugyanan ka bala sang responsabilidad sa kongregasyon subong isa ka gulang ukon ministeryal nga alagad? Nangin isa ka bala ka bug-os tion nga ebanghelisador, nga may dugang nga mga kahigayunan sa pagbantala kag sa pagpanudlo? Daw ano ka mapuslanon nga basahon liwat ang bug-os nga Biblia nga ginahunahuna ina nga mga responsabilidad!​—⁠Efeso 5:​24, 25; 6:​4; 2 Timoteo 4:​1, 2.

8. Paano ang nagbag-o nga mga kahimtangan mahimo nagapakita nga kinahanglan ang dugang pa nga pagtuon tuhoy sa mga butang nga sa banta naton aton na nahibaluan?

⁸ Mahimo nga napadayag nimo sing maayo ang mga bunga sang espiritu sang nagligad. (Galacia 5:​22, 23) Apang mahimo nga pangayuon sa imo sang bag-o nga mga kahimtangan ang kinahanglanon nga magtuon sing labi pa tuhoy sa sinang diosnon nga mga kinaiya. (Ipaanggid ang Hebreo 5:8.) Ang isa anay ka nagalakbay nga manugtatap nga nagkinahanglan nga magbiya sa iya pinasahi nga pag-alagad agod atipanon ang nagatigulang niya nga mga ginikanan nagsiling: “Ginhunahuna ko sadto nga napadayag ko sing maayo ang mga bunga sang espiritu. Karon nabatyagan ko nga daw nagasugod ako liwat.” Sing kaanggid, mahimo masapwan sang mga bana kag asawa nga ang ila tiayon nagaantos sing pisikal kag emosyonal nga balatian, nga sa paghatag sing personal nga pag-atipan, ang kahuol resulta kon kaisa sang mga reaksion nga nagapaluya sang ila buot. Ang regular nga pagbasa sing Biblia isa ka tuburan sing daku nga kapahuwayan kag bulig.

Kon San-o Himuon ang Pagbasa sing Biblia

9. (a) Ano ang makabulig sa masako gid nga tawo nga makatigayon sing tion sa pagbasa sing Biblia sa adlaw-adlaw? (b) Ngaa ang pagbasa sing Pulong sang Dios importante gid para sa mga gulang?

⁹ Sa pagkamatuod, para sa mga tawo nga tuman na kasako, isa ka hangkat ang pagtigayon sing tion sa paghimo sang dugang nga butang sing regular. Apang, makabenepisyo kita gikan sa halimbawa ni Jehova. Ginasugid sang Biblia nga ginahimo niya ang mga butang sa ‘pinat-od nga mga tion.’ (Genesis 21:2; Exodo 9:​5; Lucas 21:​24; Galacia 4:4) Ang pag-apresyar sa importansia sang pagbasa sing Pulong sang Dios sing regular makabulig sa aton sa pagtalana sang isa ka tion para sa sini sa aton adlaw-adlaw nga eskedyul. (Efeso 5:​15-17) Ang mga gulang amo ang labi nga nagakinahanglan nga magpain sing tion para sa regular nga pagbasa sang Biblia agod ang laygay nga ila igahatag pat-od gid nga napasad sa mga prinsipio sang Biblia agod nga ang espiritu nga ila ginapakita magapabanaag sang “kaalam nga nagikan sa ibabaw.”​—⁠Santiago 3:​17; Tito 1:⁠9.

10. Sa ano nga tion ang mga nagabasa sing Biblia sa adlaw-adlaw nakasapo sing tion sa pagbasa?

¹⁰ Madamo sang nagmadinalag-on sa isa ka programa sang personal nga pagbasa sing Biblia ang nagahimo sang ila pagbasa sa kaagahon antes nila ginasugdan ang pang-adlaw-adlaw nga mga hilikuton. Nasapwan sang iban nga mahimo nila ini sing regular sa lain nga tion. Ang mga audio­cassette sang Biblia (kon matigayon) makabulig sa mga nagalakbay nga mapanginpuslan ang tion sang paglakbay, kag ginapamatian ini sang iban nga mga Saksi samtang ginaatipan nila ang rutina nga mga hilikuton sa sulod sang balay. Ang mga programa nga nangin madinalag-on sa madamo nga Saksi sa Europa, Aprika, Aminhan nga Amerika, Bagatnan nga Amerika, kag sa Sidlangan makit-an sa mga pahina 20 kag 21, sa artikulo “Kon San-o Nila Ginabasa Ini kag Kon Paano Sila Nakabenepisyo.”

11. Paano mahimo ang adlaw-adlaw nga pagbasa sing Biblia bisan pa nga diutay lamang ang matigayon nga tion?

¹¹ Indi importante ang kalabaon sang tion nga ginhinguyang sa imo pagbasa sang Biblia sa isa ka tion kundi ang pagkaregular sang paghimo sini. Masapwan mo nga makapaladya ang pagbasa sa sulod sang isa ka oras ukon kapin pa kon nagapungko, nagahimo sing dugang nga pagpanalawsaw kag nawili sing lubos sa materyal. Apang ginatugot bala sang imo eskedyul ang paghimo sina sing regular? Sa baylo nga paligaron ang pila ka adlaw nga wala gid makabasa sing Biblia, indi bala mas maayo ang magbasa sing Biblia sa 15 minutos ukon bisan sa 5 minutos lamang kada adlaw? Himua nga tulumuron ang magbasa sing Biblia sa adlaw-adlaw. Nian dugangi ina nga pagbasa sing mas madalom nga pagpanalawsaw kon posible.

Lainlain nga Paagi sa Pagbasa sing Biblia

12. Ano ang programa sa pagbasa sing Biblia sang bag-o nga mga katapo sang pamilya Bethel kag mga estudyante sa Gilead?

¹² Madamo sing paagi sa pagbasa sing Biblia. Mapuslanon ang pagbasa sini halin sa Genesis tubtob sa Bugna. Ang tanan nga katapo sang pamilya Bethel sa bug-os kalibutan nga nagaalagad sa bug-os kalibutan nga ulong talatapan ukon sa isa sang mga sanga sang Sosiedad ginaobligar nga basahon ang bug-os nga Biblia sa tion sang una nga tuig sang ila pag-alagad sa Bethel. (Masami ina nagalakip sa pagbasa sing tatlo ukon lima ka kapitulo, depende sa ila kalawigon, ukon sing apat tubtob lima ka pahina, kada adlaw.) Kinahanglan man basahon sang mga estudyante sa Watch­tower Bi­ble ­School of Gil­ead ang bug-os nga Biblia antes sila makagradwar. Ginalauman nga makabulig ini sa ila sa paghimo sang adlaw-adlaw nga pagbasa sing Biblia nga isa ka bahin sang ila kabuhi.

13. Anong tulumuron ang ginapanugda para sa bag-ong bawtismado nga mga Saksi?

¹³ Mapuslanon para sa bag-o nabawtismuhan nga mga Saksi ang magpahamtang sing tulumuron nga basahon ang bug-os nga Biblia. Sang 1975, sang tion nga nagahanda sia sa pagpabawtismo, isa ka pamatan-on nga lalaki sa Pransia ang ginpamangkot sang isa ka gulang kon bala may isa sia ka pat-od nga programa para sa pagbasa sing Biblia. Kutob sadto ginabasa niya ang bug-os nga Biblia tuig-tuig, nga masami ginahimo ang iya pagbasa sa aga antes sia magkadto sa trabaho. Kon tuhoy sa resulta, sia nagasiling: “Labi ako nga nagsuod kay Jehova. Nakit-an ko kon paano ang tanan niya nga hinimuan naangot sa iya katuyuan kag kon paano sia nagahulag kon mag-utwas ang mga balagbag. Nakit-an ko nga si Jehova matarong, kag subong man maayo sa tanan niya nga binuhatan.”

14. (a) Agod makasugod sing isa ka mapinadayunon nga programa sang personal nga pagbasa sing Biblia, ano ang kinahanglanon? (b) Ano ang makabulig sa aton nga madumduman ang kabilugan nga balayan sang tagsa ka tulun-an sa Biblia samtang ginabasa naton ini?

¹⁴ Nabasa na bala ninyo ang bug-os nga Biblia? Kon wala pa, karon na ang maayo nga tion sa pagsugod. Maghimo sing isa ka pat-od nga programa, kag nian sunda ini. Pat-ura kon daw ano kadamo nga mga pahina ukon mga kapitulo ang imo pagabasahon kada adlaw, ukon hibalua lamang kon daw ano nga tion ang imo mahinguyang kag kon san-o. Indi tanan ang makabasa sing bug-os nga Biblia sa isa ka tuig, apang ang importante amo ang pagbasa sang Pulong sang Dios sing regular, ginahimo ini sa adlaw-adlaw kon posible. Samtang ginabasa mo ang bug-os nga Biblia, mahimo masapwan mo nga mabuligon ang paggamit sing pila ka reperensia nga mga libro sa pagpatudok sa imo hunahuna sang kabug-usan nga balayan sang materyal. Kon matigayon ang Insight on the Scriptures sa inyo hambal, nian antes mo sugdan ang pagbasa sing isa ka tulun-an sa Biblia, repasuha ang malip-ot nga balayan sang daku nga mga punto sini nga makit-an sa Insight.* Talupangda labi na ang madukot nga mga tig-ulo sa balayan. Ukon iluga ang paggamit sing mas masangkad nga sumaryo nga yara sa libro nga “All Scripture Is Inspired of God and Beneficial.”⁠a

15. (a) Anong mga panugda ang ginhatag sa mga pahina 16 kag 17 nga makabulig agod mapauswag ang imo pagbasa sang Biblia? (b) Sa baylo nga maghimo sing isa ka rituwal sang pagbasa sang pila ka pahina, anong importante nga butang ang hatagan naton sing mas daku nga igtalupangod?

¹⁵ Ang paagisod nga pagbasa sing Biblia mapuslanon, apang indi mangin isa ka rituwal lamang nga bumalasa. Indi magbasa sing pila ka pahina kada adlaw agod lamang masiling mo nga ginabasa nimo ang bug-os nga Biblia kada tuig. Subong sang ginapakita sa kahon “Mga Panugda sa Pagpauswag sang Inyo Pagbasa sing Biblia” (pahina 16 kag 17), madamo sing paagi nga mabasa mo ang Biblia kag malipay sa sini. Walay sapayan sang paagi nga imo ginagamit, pat-ura nga ginapakaon mo ang imo hunahuna kag tagipusuon.

Hangpa ang Kahulugan sang Imo Ginabasa

16. Ngaa importante ang maghinguyang sing tion sa pagpamalandong sa kon ano ang aton ginabasa?

¹⁶ Sang nagatudlo sa iya mga disipulo, ginpadaku ni Jesus ang importansia sang ila paghangop sa kon ano ang iya ginasiling. Indi importante ang intelektuwal nga paghangop, kundi ang paghangop nila sing “kahulugan sini sa ila mga tagipusuon” agod maaplikar nila ini sa ila kabuhi. (Mateo 13:​14, 15, 19, 23) Ang importante sa Dios amo ang kon ano gid ang tawo sa sulod, kag amo ini ang ginarepresentar sang tagipusuon. (1 Samuel 16:​7; Hulubaton 4:23) Busa, dugang sa pagpat-od nga nahangpan naton ang ginasiling sang mga dinalan sang Biblia, dapat naton ini pamalandungan, ginabinagbinag ang mga kahulugan sini sa aton kabuhi.​—⁠Salmo 48:​9, 1 Timoteo 4:⁠15.

17. Ano ang pila ka angulo diin mahimo naton mapamalandungan ang aton nabasahan sa mga Kasulatan?

¹⁷ Tinguhai nga makilala ang sadsaran nga mga prinsipio sa mga hitabo sa Biblia agod maaplikar mo ini sa mga kahimtangan nga imo ginaatubang. (Ipaanggid ang Mateo 9:​13; 19:​3-6.) Samtang ginabasa mo kag ginapamalandungan ang makadalayaw nga mga kinaiya ni Jehova, gamita ina nga kahigayunan nga palig-unon ang imo personal nga kaangtanan sa iya, sa pagpalambo sa imo kaugalingon sing isa ka mabaskog nga diosnon nga debosyon. Kon ginabasa mo ang mga pinamulong tuhoy sa katuyuan ni Jehova, binagbinaga kon ano ang imo mahimo sa pagpanghikot nahisuno sa sini. Kon ginabasa mo ang isa ka talangkod nga laygay, sa baylo magsiling lamang sa imo kaugalingon nga ‘nahibaluan ko ina,’ mamangkot, ‘ginahimo ko bala ang ginasiling sini? Kon huo, pamangkuta ang imo kaugalingon, ‘Sa anong mga paagi nga mahimo ko ini sing “labi pa?” ’ (1 Tesalonica 4:1) Samtang ginatun-an mo ang mga ginapatuman sang Dios, talupangda man ang matuod-sa-kabuhi nga mga halimbawa sang Biblia sadtong nagkabuhi nahisuno sa sining mga kasuguan kag sadtong wala magtuman sini. Binagbinaga kon ngaa ginsunod nila ang amo nga dalanon kag ano ang nangin resulta. (Roma 15:​4; 1 Corinto 10:11) Kon ginabasa mo ang tuhoy sa kabuhi ni Jesucristo, dumduma nga si Jesus amo ang isa nga gintulinan ni Jehova nga maghari sa bug-os nga duta; gamita ang kahigayunan nga palig-unon sa imo kaugalingon ang paghandum sing bag-ong kalibutan sang Dios. Subong man, binagbinaga ang mga paagi diin mailog mo sing dugang pa ang anak sang Dios.​—⁠1 Pedro 2:⁠21.

18. Paano naton mabalanse ang pagbasa sang Biblia sa aton paggamit sang materyal sa pagtuon nga gin-aman paagi sa “matutom kag mainandamon nga ulipon”?

¹⁸ Sa pagkamatuod, ang pagbasa sing Biblia indi dapat magbulos sa imo paggamit sing ekselente nga materyal sa pagtuon nga gin-aman sang “matutom kag mainandamon nga ulipon.” Ina man bahin sang aman ni Jehova​—⁠isa nga hamili gid. (Mateo 24:​45-47) Pat-ura nga ang regular nga pagbasa sing Pulong sang Dios may daku nga duog sa imo kabuhi. Kon posible, “BASAHA ANG BALAAN NGA BIBLIA NGA PULONG SANG DIOS SA ADLAW-ADLAW.”

[Footnote]

Paano Mo Sabton?

◻ Ngaa mapuslanon ang magbasa sang Biblia sa adlaw-adlaw?

◻ Ngaa dapat naton basahon ang Biblia sing sulit-sulit?

◻ Sa imo kaugalingon nga iskedyul, ano ang maayo nga tion sa pagbasa sang Biblia sa adlaw-adlaw?

◻ Samtang ginabasa mo ang Biblia sing sulit-sulit, ano ang mahimo madugang sa imo programa?

◻ Ngaa importante gid nga pamalandungan ang aton nabasahan?

[Kahon sa pahina 16, 17]

Mga panugda sa pagpauswag sang inyo pagbasa sing Biblia

(1) Madamo nga tawo ang nagabasa sing mga tulun-an sang Biblia suno sa pasunod diin kinaandan ini nga naimprinta, halin sa Genesis tubtob sa Bugna. Sarang mo man ini mabasa sing pasunod suno sa ila orihinal nga pagkasulat. Dumduma nga ang Biblia isa ka koleksion sang 66 ka inspirado nga mga tulun-an, isa ka balaan nga librarya. Agod may pagkananuhaytuhay, ayhan luyag mo basahon ang pila ka tulun-an nga nagaunod sang maragtas, nian ang pila nga nagaunod sing kalabanan nga mga tagna, nga ginasundan sang pila ka mga sulat sang laygay, sa baylo nga sundon lamang sing pasunod ang pahina. Tandai ang imo ginabasa, kag pat-ura nga basahon ang bug-os nga Biblia.

(2) Sa tapos mo mabasa ang isa ka bahin sang Kasulatan, pamangkuta ang imo kaugalingon kon ano ang ginasugid sini tuhoy kay Jehova, sang iya katuyuan, sang iya paagi sa paghimo sang mga butang; kon ano dapat ang mangin epekto sini sa imo kaugalingon nga kabuhi; kon paano mo magamit ini sa pagbulig sa iban.

(3) Ginagamit subong giya ang tsart nga “Main Events of Jesus’ Earthly Life” nga ginbalhag sa ubos sang tig-ulo nga “Jesus Christ” sa Insight on the Scriptures (subong man sa “All Scripture Is Inspired of God and Beneficial”), basaha sing pasunod ang pareho nga hitabo sang tagsa ka bahin sang mga Ebanghelyo. Dugangi ini paagi sa pagtan-aw sa kaanggid nga mga seksion sa libro nga Ang Pinakabantog nga Tawo nga Nagkabuhi.

(4) Kon ginabasa mo sa Binuhatan sang mga Apostoles ang hitabo sa kabuhi kag ministeryo ni Pablo, basaha man ang may kaangtanan nga inspirado nga mga sulat. Busa, kon ginasambit ang nanuhaytuhay nga mga siudad kag mga duog nga ginbantalaan ni Pablo, magdulog kag basaha ang mga sulat nga iya ginsulat sang ulihi sa mga masigka-Cristiano sa amo nga mga duog. Mabuligon man nga sundan ang iya mga pagbiyahe sa isa ka mapa, subong sang isa nga yara sa likod nga panghapin sang New World Translation.

(5) Upod sa imo pagbasa sang Exodo tubtob sa Deuteronomio, basaha ang sulat sa mga taga-Hebreo agod matigayon ang mga paathag sing madamo nga tagna. Sa ubos sang “Law” sa Insight on the Scriptures, tan-awa ang tsart “Some Features of the Law Covenant.”

(6) Kon nagabasa sing mga tulun-an sang tagna, hatagi sang tion nga repasuhon sa Biblia ang may kaangtanan nga ginhalinan nga maragtas. Halimbawa, kon nagabasa sing tulun-an ni Isaias, repasuha ang ginasiling sini tuhoy kanday hari Ozias, Jotam, Acaz, kag Ezequias, nga ginsambit sa Isaias 1:⁠1. (2 Hari, kapitulo 15-20; 2 Cronica, kapitulo 26-32) Ukon kon nagabasa sing Hageo kag Zacarias, hatagi sing tion nga repasuhon kon ano ang makit-an sa tulun-an ni Esdras.

(7) Magpili sing isa ka tulun-an sa Biblia, basaha ang isa ka bahin sini (ayhan isa ka kapitulo), nian magpanalawsaw, nga nagagamit sing Watch Tower Publications Index ukon de-kompyuter nga Watchtower Library kon matigayon sa inyo hambal. Iaplikar ang materyal sa imo kaugalingon nga kabuhi. Gamita ini sa mga pamulongpulong kag sa ministeryo sa latagon. Nian magsaylo sa isa pa ka seksion.

(8) Kon may yara publikasyon sang Watch Tower nga may komentaryo sa isa ka tulun-an sang Biblia ukon sa isa ka bahin sini, tan-awa ini pirme samtang ginabasa mo ini nga bahin sang Biblia. (Halimbawa: sa Ambahanon ni Solomon, The Watchtower, Disiembre 1, 1957, pahina 720-34; sa Ezequiel, “The Nations Shall Know That I Am Jehovah”​—⁠How?; sa Daniel, “Your Will Be Done on Earth” ukon ang Our Incoming World Government​—⁠God’s Kingdom; sa Hageo kag Zacarias, Paradise Restored to Mankind​—⁠By Theocracy!; sa Bugna, Revelation​—⁠Its Grand Climax At Hand!)

(9) Samtang nagabasa ikaw, tan-awa ang pila ka mga cross-reference. Talupangda ang 320 ka dinalan halin sa Hebreong Kasulatan nga direkta nga ginkutlo sa Cristianong Griegong Kasulatan kag ang ginatos ka iban pa nga dinalan nga ginhimo nga reperensia, subong man ang ginhatag nga pag-aplikar. Ginatudlo sang cross-reference ang mga katumanan sang narekord nga tagna sa Biblia, sa biograpiko kag geograpiko nga mga detalye, kag sa kaanggid nga mga hunahuna nga mahimo magpaathag sang mga ekspresyon nga mahimo masapwan mo nga mabudlay hangpon.

(10) Ginagamit ang Reference Edition sang New World Translation, kon matigayon sa inyo hambal, tan-awa ang mga foot­note kag mga artikulo sa apendise nga may kaangtanan sa inyo ginabasa. Ginapakita sini ang basihan sang mga pagbadbad nga gingamit kag ang iban nga paagi diin sarang mabadbad ang importante nga mga tinaga. Mahimo nga luyag mo man ipaanggid ang pagbadbad sang pila ka mga bersikulo sa iban nga mga pagbadbad sang Biblia.

(11) Sa tapos mo mabasa ang tagsa ka kapitulo, magsulat sing tuman ka lip-ot nga sumaryo sang panguna nga ideya sa amo nga kapitulo. Gamita ini subong basihan para sa pagrepaso kag pagpamalandong sa ulihi.

(12) Samtang ginabasa mo ang Biblia, markahi ang pinili nga mga teksto nga luyag mo gid madumduman, ukon kopyaha ini sa mga kard kag ibutang ini sa lugar nga makita mo ini adlaw-adlaw. Sauluha ini; pamalandungi ini; panginpusli ini. Indi pagtinguhai nga magsaulo sing tuman kadamo sa isa ka tion, ayhan isa lamang ukon duha sa kada semana; nian magpili sing dugang pa sa masunod nga pagbasa mo sang bug-os nga Biblia.

[Mga retrato sa pahina 15]

Ginabasa mo bala ang Biblia ukon ginapamatian mo ang mga recording sini adlaw-adlaw?