Sia ang Manughanda sang Dalan sang Mesias

ANG malapad nga panit nga paha nagapadaku sang iya sunog sa adlaw nga kaitumon sang panit. Napanaptan sang human sa balahibo sang kamelyo nga panapton, daw isa matuod sia ka manalagna tan-awon. Madamo ang nabuyok sa iya sa suba sang Jordan. Didto masidla nga ginsiling sining makawiwili nga tawo nga handa na sia sa pagbawtismo sa mahinulsulon nga mga makasasala.

Nakibot ang mga tawo! Sin-o ini nga tawo? Ano ang iya katuyuan?

Si Jesucristo nagsiling tuhoy sa sining tawo: “Ngaa bala nagguwa kamo? Sa pagtan-aw bala sa isa ka manalagna? Huo, nagasiling ako sa inyo, kag labi pa sa manalagna. . . . Sa mga nagkalatawo sa mga babayi wala sing naglutaw nga daku pa kay Juan Bautista.” (Mateo 11:​9-11) Ngaa amo sina ka tumalagsahon nga tawo si Juan? Bangod sia ang manughanda sang dalan sang Mesias.

Ang Iya Misyon Gintagna

Kapin sa 700 ka tuig antes matawo si Juan, ginpahibalo ni Jehova nga sia magapanawag sa kamingawan: “Amana ninyo ang dalan ni Jehova! Magtadlong sa desyerto sing dakung dalan tungod sa aton Dios.” (Isaias 40:3; Mateo 3:⁠3) Kapin sa 400 ka tuig antes matawo si Juan, ang Labing Gamhanan nga Dios nagsiling: “Yari karon! Ipadala ko sa inyo si Elias nga manalagna sa wala pa mag-abot ang daku kag makakulugmat nga adlaw ni Jehova.” (Malaquias 4:⁠5) Ang katunayan nga si Juan Bautista natawo mga anom ka bulan antes kay Jesus indi aksidente lamang, ukon natabo ini bangod lamang sang kinaugali nga mga proseso. Kaangay sang pagkatawo sang ginsaad nga bata nga si Isaac, ang pagkatawo ni Juan isa ka milagro, kay ang iya mga ginikanan, sanday Zacarias kag Elisabet, lunsay lampas na sa normal nga edad sa pag-anak.​—⁠Lucas 1:⁠18.

Bisan antes pa ginpanamkon si Juan, ang iya tulumanon, hilikuton, kag estilo sang pagkabuhi ginsugid ni anghel Gabriel. May kapagsik kag espiritu ni Elias, palisuon ni Juan ang mga dimatinumanon gikan sa dalan sang kamatayon kag magahanda sa ila nga batunon si Jesus subong ang Mesias. Kutob sa pagkatawo, si Juan mangin isa ka Nazarenhon, nga debotado sing bug-os sa Dios, kag indi magatandog sing alak ukon maisog nga ilimnon. Sa pagkamatuod, ang iya pagkaon sa disyerto naglakip sang “mga apan kag dugos nga talunon.” (Marcos 1:6; Numeros 6:​2, 3; Lucas 1:​13-17) Kaangay ni Samuel, kutob sa pagkabata si Juan pinasahi nga gintangdo para sa mahimayaon nga pag-alagad sang Labing Mataas nga Dios.​—⁠1 Samuel 1:​11, 24-28.

Bisan ang ngalan nga Juan ginpili sang Dios. Ang Hebreong ngalan nga ginbadbad nga “Juan” nagakahulugan sing “Si Jehova Nagpakita sing Kahamuot; si Jehova Nangin Mainayuhon.”

Sang ang bata ginsirkunsidar sa ikawalo nga adlaw, ang iya amay, nga si Zacarias, gin-inspirar sang Dios sa pagsiling: “Tuhoy sa imo, diutay nga bata, tawgon ka nga manalagna sang Labing Mataas, kay magauna ka sa atubangan ni Jehova sa paghanda sang iya dalanon, sa paghatag sing ihibalo sang kaluwasan sa iya katawhan paagi sa kapatawaran sang ila mga sala, bangod sa malulo nga kaluoy sang aton Dios. Bangod sa sining kaluoy pagaduawon kita sang pamanagbanag gikan sa kahitaasan.” (Lucas 1:​76-78) Ang publiko nga ministeryo ni Juan mangin ang pangunang importante sa iya kabuhi. Kon ipaanggid sa sini, ang tanan iban pa nga butang indi importante. Hanti, ginatuptupan sang Kasulatan ang nahaunang 30 ka tuig sang kabuhi ni Juan sa isa lamang ka bersikulo: “Kag ang diutay nga bata padayon nga nagtubo kag nagbakod sa espiritu, kag nagpabilin sia sa mga disyerto tubtob sa adlaw sang hayag nga pagpakita sang iya kaugalingon sa Israel.”​—⁠Lucas 1:⁠80.

Tingog sa Kamingawan

Sa ika-15 nga tuig sang paggahom ni Tiberio Cesar, sang si Poncio Pilato amo ang gobernador sang Judea, si Juan Bautista nag-abot sa kamingawan lakip ining makakilibot nga mensahe: “Hinulsol kamo, kay ang ginharian sang langit malapit na.” (Mateo 3:2; Marcos 1:4; Lucas 3:​1, 2) Ang pumuluyo sang bug-os nga rehiyon ginpukaw. Yadtong masidla nga deklarasyon nagtandog sang tagipusuon sang mga tawo nga nalangkag sa pat-od nga paglaum. Ang pahibalo ni Juan nagtilaw man sa pagkamapainubuson sang isa ka tawo bangod nagkinahanglan ini sing tinagipusuon nga paghinulsol. Ang iya pagkahanuot kag malig-on nga pagtuo nagpahulag sa kadam-an sang bunayag kag sinsero nga mga tawo nga tamdon sia subong isa ka tawo nga ginpadala sang Dios.

Ang kabantugan ni Juan naglapnag kaangay sang pagpamanagbanag sang isa ka bag-ong adlaw. Subong manalagna ni Jehova, madali sia makilal-an paagi sa iya panapton kag debosyon. (Marcos 1:⁠6) Bisan ang mga saserdote kag mga Levinhon naglakbay halin sa Jerusalem agod hibaluon kon ano ang nagapukaw sining tanan nga interes. Maghinulsol? Ngaa, kag sa ano? Sin-o ini nga tawo? Luyag nila mahibaluan. Si Juan nagpaathag: “ ‘Indi ako ang Cristo.’ Kag nagpamangkot sila sa iya: ‘Nian, ano bala? Ikaw bala si Elias?’ Kag nagsiling sia: ‘Indi ako!’ Busa nagsiling sila: ‘Ikaw bala Ang Manalagna?’ Kag nagsabat sia: ‘Indi!’ Busa nagsiling sila sa iya: ‘Sin-o bala ikaw? agod makahatag kami sing sabat sa mga nagpadala sa amon. Ano bala ang ginasiling mo tuhoy sa imo kaugalingon?’ Sia nagsiling: ‘Ako amo ang tingog nga nagasinggit sa kamingawan, “Tadlunga ang dalanon ni Jehova,” subong sang ginsiling ni Isaias nga manalagna.’ Karon yadtong mga ginsugo naghalin sa mga Fariseo. Gani namangkot sila sa iya kag nagsiling sa iya: ‘Ngaa bala, nian, nagabawtismo ka kon ikaw indi ang Cristo ukon si Elias ukon Ang Manalagna?’ ”​—⁠Juan 1:​20-25.

Ang paghinulsol kag bawtismo amo ang kinahanglanon nga mga tikang para sa mga magasulod sa Ginharian. Busa, si Juan nagsabat: ‘Nagabawtismo ako sa mga mahinulsulon nga makasasala sa tubig, apang sunod sa akon ang isa nga gamhanan pa magabawtismo sa inyo sa balaan nga espiritu kag sa kalayo. Aba, indi gani ako takus sa paghubad sang higot sang iya sandalyas. Kag mag-andam! Ang iya inugkandos sa pagpahangin yara sa iya kamot kag tipunon niya ang trigo sa iya tambubo apang sunugon niya kag dulaon ang labhang.’ (Lucas 3:​15-17; Binuhatan 1:⁠5) Sa pagkamatuod, ang balaan nga espiritu igapasagahay sa mga sumulunod sang Mesias, apang ang iya mga kaaway magaagom sing kalayo sang kalaglagan.

“Ang Tanan nga Sahi sang mga Tawo” Ginpaandaman

Madamong bunayag sing tagipusuon nga mga Judiyo ang natandog sing tudok sang mga pinamulong ni Juan kag hayag nga nagtu-ad sang ila mga sala sang paglapas sa Kasuguan nga katipan. Dayag nila nga ginpakita ang ila paghinulsol paagi sa pagtugot kay Juan nga bawtismuhan sila sa Suba sang Jordan. (Mateo 3:​5, 6) Subong resulta, ang ila tagipusuon yara sa nagakaigo nga kahimtangan agod batunon ang Mesias. Nagbulong sang ila kauhaw sa ihibalo sang matarong nga mga kinahanglanon sang Dios, malipayon sila nga gintudluan ni Juan subong mga disipulo niya, nagtudlo pa gani sa ila kon paano mangamuyo.​—⁠Lucas 11:⁠1.

Nahanungod sining manughanda sang dalan sang Mesias, si apostol Juan nagsulat: “Ini nga tawo nagkari ayon sa isa ka saksi, agod magpanaksi nahanungod sa kapawa, agod ang tanan nga sahi sang mga tawo magatuo paagi sa iya.” (Juan 1:⁠7) Gani amo gid ang natabo nga ang tanan nga sahi sang mga tawo nagpamati kay Juan Bautista samtang “nagbantala [sia] sing dayag sa bug-os nga katawhan sang Israel sang bawtismo bilang simbulo sang paghinulsol.” (Binuhatan 13:24) Ginpaandaman niya ang mga manugsukot sing buhis batok sa pagpangwarta. Ginpaandaman niya ang mga soldado batok sa pagsamok kay bisan sin-o ukon pagsumbong sing butig. Kag ginsilingan niya ang mainampuon kag salimpapaw nga mga Fariseo kag mga Saduceo: “Kamo nga kaliwat sang mga man-ug, sin-o bala ang nagpaandam sa inyo sa pagpalagyo sa kasingkal nga magaabot? Gani patubas kamo sing bunga nga takus sa paghinulsol; kag dili maghunahuna sa inyo kaugalingon sa pagsiling, ‘May ginapakaamay kami nga si Abraham.’ Kay nagasiling ako sa inyo nga ang Dios sarang makabangon sing mga anak kay Abraham sa sining mga bato.”​—⁠Mateo 3:​7-9; Lucas 3:​7-14.

Subong isa ka klase, ang relihiosong mga lider sang panahon ni Juan wala magtuo sa iya kag butig nga nagsumbong sa iya subong ginsudlan sing demonyo. Ginsikway nila ang dalan sang pagkamatarong nga nagadul-ong sa kabuhi nga dayon. Sa pihak nga bahin, ang makasasala nga mga manugsukot sing buhis kag ang mga makihilawason nga nagtuo sa pagpanaksi ni Juan naghinulsol kag ginbawtismuhan. Sang ulihi, ginbaton nila si Jesucristo subong ang Mesias.​—⁠Mateo 21:​25-32; Lucas 7:​31-33.

Ang Mesias Ginpakilala

Sa sulod sang anom ka bulan​—⁠halin sang tigpamulak tubtob sa tigragas sang 29 C.E.⁠—​ginpatuhoy sang matutom nga saksi sang Dios nga si Juan ang igtalupangod sang mga Judiyo sa nagapakari nga Mesias. Tion na para maglutaw ang Mesianikong Hari. Apang sang naglutaw sia, nagkadto sia sa amo man nga tubig sang Jordan kag nangabay nga magpabawtismo. Sang primero nagpamatok si Juan, apang sang ulihi nagpasugot sia. Handurawa ang iya kalipay sang ang balaan nga espiritu nagkunsad kay Jesus kag ang tingog ni Jehova nabatian nga nagpabutyag sang kahamuot sa Iya Anak.​—⁠Mateo 3:​13-17; Marcos 1:​9-11.

Si Juan amo ang una nga nagkilala kay Jesus subong ang Mesias, kag ginpakilala niya ang iya kaugalingon nga mga disipulo sa sining Isa nga Hinaplas. “Tan-awa ninyo,” siling ni Juan, “ang Kordero sang Dios nga nagakuha sang sala sang kalibutan!” Nagsiling man sia: “Ini amo ang isa nga nahanungod sa iya nagsiling ako, Sa likod ko may magaabot nga isa ka lalaki nga nauna na sa atubangan ko, bangod nagluntad sia antes sa akon. Bisan ako wala makakilala sa iya, apang ang rason kon ngaa nag-abot ako nga nagabawtismo sa tubig amo agod madayag sia sa Israel.”​—⁠Juan 1:​29-37.

Ang hilikuton ni Juan nagpadayon dungan sa pagministeryo ni Jesus sa mga anom ka bulan. Nahangpan sang kada isa sa ila ang hilikuton nga ginahimo sang isa. Ginkabig ni Juan ang iya kaugalingon subong abyan sang Nobyo kag nalipay nga makita nga nagauswag si Cristo samtang sia kag ang iya hilikuton nagabuhin.​—⁠Juan 3:​22-30.

Ginpakilala ni Jesus si Juan subong ang manughanda sang iya dalan, nga ginlaragway ni Elias. (Mateo 11:​12-15; 17:12) Sa isa ka okasyon, si Jesus nagsiling: “Ang Kasuguan kag ang mga Manalagna tubtob kay Juan. Kutob sadto ang ginharian sang Dios ginpahayag subong maayong balita, kag ang tagsa ka sahi sang tawo nagapanikasog sing abante padulong sa sini.”​—⁠Lucas 16:⁠16.

Matutom Tubtob sa Kamatayon

Si Juan gindakop kag ginbilanggo bangod ginpahayag niya sing masidla ang kamatuoran. Wala sia mag-isol sa iya responsabilidad nga ibuyagyag bisan ang sala ni Hari Herodes. Bilang pagsupak sa kasuguan sang Dios, yadto nga hari nanglahi upod sa asawa sang iya mismo utod, si Herodias. Si Juan masidla nga nagpabutyag sang iya kaugalingon agod maghinulsol si Hari Herodes kag makatigayon sing kaluoy sang Dios.

Isa gid ka maayong halimbawa si Juan sang pagtuo kag gugma! Bilang baylo sa iya personal nga kahilwayan, ginpamatud-an niya ang iya katutom kay Jehova nga Dios kag ang iya gugma para sa mga isigkatawo. Pagligad sang isa ka tuig nga pagkabilanggo, si Juan ginpugutan sing ulo subong resulta sang ginsugyot sang Yawa nga buko nga ginhimo sang malauton nga si Herodias, nga may “ginatago nga kalain sing buot” batok sa iya. (Marcos 6:​16-19; Mateo 14:​3-12) Apang ginhuptan sang manughanda sang dalan sang Mesias ang iya integridad kay Jehova kag sa indi na lang madugay pagabanhawon gikan sa minatay agod magkabuhi sa bag-ong kalibutan sang pagkamatarong sang Dios.​—⁠Juan 5:​28, 29; 2 Pedro 3:⁠13.