Ano Ang Nagapahulag sa Imo nga Alagaron ang Dios?

“Higugmaa si Jehova nga imo Dios sa bug-os mong tagipusuon kag sa bug-os mong kalag kag sa bug-os mong hunahuna kag sa bug-os mong kusog.”​—⁠MARCOS 12:⁠30.

1, 2. Anong makalilipay nga mga butang ang ginahimo may kaangtanan sa pagbantala nga hilikuton?

ANG matuod nga balor sang isa ka awto indi mahibaluan paagi lamang sa hitsura sini. Ang pintura mahimo magapatahom sang guwa sini, kag ang elegante nga desinyo mahimo magaganyat sa bumalakal; apang ang labi pa ka importante amo ang mga butang nga indi dayon makita​—⁠ang makina nga nagapaandar sa salakyan, lakip ang iban pa nga mga kagamitan nga nagakontrol sini.

² Kaangay man ini sa pag-alagad sa Dios sang isa ka Cristiano. Ang mga Saksi ni Jehova bugana sa diosnon nga mga hilikuton. Kada tuig, kapin sa isa ka bilyon ka oras ang ginahinguyang sa pagbantala sang maayong balita sang Ginharian sang Dios. Dugang pa, minilyon ka pagtuon sa Biblia ang ginadumalahan, kag yadtong ginbawtismuhan nagadamo sing ginatos ka libo. Kon ikaw isa ka manugbantala sang maayong balita, may bahin ikaw​—⁠bisan kon daw ano man ka diutay⁠—​sa sining makakulunyag nga mga estadistika. Kag makasalig ka nga “ang Dios indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan.”​—⁠Hebreo 6:⁠10.

3. Luwas sa mga buhat, ano ang dapat nga kabalak-an gid sang mga Cristiano, kag ngaa?

³ Apang, ang matuod nga balor sang aton pag-alagad​—⁠sing tingob ukon sing indibiduwal⁠—​indi matakus sa kadamuon lamang. Subong sang ginsiling kay Samuel, “ang tawo nagatulok sa guwa nga dagway; apang si Jehova nagatulok sa tagipusuon.” (1 Samuel 16:⁠7) Huo, kon ano kita sa sulod amo ang importante sa Dios. Matuod, ang mga binuhatan kinahanglanon. Ang mga buhat sang diosnon nga debosyon nagapuni sang panudlo ni Jehova kag nagaganyat sa mahimo nga mga disipulo. (Mateo 5:​14-16; Tito 2:10; 2 Pedro 3:11) Apang, wala ginasugid sang aton mga binuhatan ang bug-os nga sugilanon. Ang ginbanhaw nga si Jesus may rason sa pagkabalaka nahanungod sa kongregasyon sang Efeso​—⁠walay sapayan sang ila rekord sang maayong mga binuhatan. “Nahibaluan ko ang imo mga buhat,” siling niya sa ila. “Apang, amo ini ang pamatok ko sa imo, nga ginbayaan mo ang imo nahaunang gugma.”​—⁠Bugna 2:​1-4.

4. (a) Sa anong paagi mangin kaangay sa isa ka katungdanan nga rito ang aton pag-alagad sa Dios? (b) Ngaa dapat usisaon ang kaugalingon?

⁴ Isa ka katalagman ang nagaluntad. Sa sulod sang isa ka panag-on sang tion, ang aton pag-alagad sa Dios mahimo nga daw mangin isa ka katungdanan na lamang nga rito. Ang isa ka Cristiano nga babayi naglaragway sang iya kahimtangan sa sining paagi: “Nagaguwa ako sa latagon, nagatambong sa mga miting, nagatuon, nagapangamuyo​—⁠apang ginhimo ko ini tanan sing awtomatiko, nga wala gid sing balatyagon.” Sa pagkamatuod, ang mga alagad sang Dios dapat hatagan sing komendasyon kon nagapanikasog sila walay sapayan nga nagabatyag nga “ginalampusan” ukon “ginapanubo.” (2 Corinto 4:9; 7:⁠6) Walay sapayan, kon ang aton Cristianong rutina mangin amoamo na lamang, dapat naton lilion ang sulod sang makina, sa malaragwayon nga hambal. Bisan ang labing maayo nga mga awto nagakinahanglan sing pulupanag-on nga pagmentinar; sa kaanggid, ang tanan nga mga Cristiano dapat maghimo sing regular nga pag-usisa sa kaugalingon. (2 Corinto 13:⁠5) Makita sang iban ang aton mga binuhatan, apang indi nila mahantop kon ano ang nagapahulag sang aton mga buhat. Busa, ang tagsatagsa sa aton dapat mabalaka sa pamangkot: ‘Ano ang nagapahulag sa akon nga alagaron ang Dios?’

Mga Balagbag sa Nagakaigo nga Pangpahulag

5. Anong sugo ang ginsiling ni Jesus nga una sa tanan?

⁵ Sang ginpamangkot kon diin sa mga kasuguan nga ginhatag sa Israel ang una sa tanan, ginbalikwat ni Jesus ang isa ka sugo nga nasentro, indi sa naguwa nga dagway, kundi sa nasulod nga motibo: “Higugmaa si Jehova nga imo Dios sa bug-os mong tagipusuon kag sa bug-os mong kalag kag sa bug-os mong hunahuna kag sa bug-os mong kusog.” (Marcos 12:​28-30) Busa ginpakilala ni Jesus kon ano dapat ang nagapahulag nga puwersa sa likod sang aton pag-alagad sa Dios​—⁠ang gugma.

6, 7. (a) Sa anong paagi malalangon nga ginasalakay ni Satanas ang pamilya, kag ngaa? (2 Corinto 2:11) (b) Paano ang pagpadaku nagaapektar sa panimuot sang isa tuhoy sa awtoridad sang Dios?

⁶ Luyag ni Satanas balabagan ang aton ikasarang sa pagpalambo sang importante nga kinaiya sang gugma. Agod mahimo ini, ang isa ka metodo nga gingamit niya amo ang pagsalakay sa pamilya. Ngaa? Bangod diri ginadihon ang aton nahauna kag labing mapinadayunon nga mga impresyon nahanungod sa gugma. Nakahibalo gid si Satanas sang prinsipio sa Biblia nga kon ano ang natun-an sa pagkabata mahimo nga may kabilihanan sa pagkahamtong. (Hulubaton 22:⁠6) Malalangon niya nga ginatinguhaan nga patikuon ang aton panghunahuna nahanungod sa gugma sugod sa pagkabata. Subong “dios sining sistema sang mga butang,” makita ni Satanas nga ginahimo gid ang iya mga katuyuan kon ang madamo nagdaku sa mga puluy-an nga indi mga duog sang gugma kundi mga patag-awayan sang kaakig, kasingkal, kag malaw-ay nga mga hambal.​—⁠2 Corinto 4:4; Efeso 4:​31, 32; 6:​4, foot­note; Colosas 3:⁠21.

⁷ Ang libro nga Making Your Family Life Happy nagsiling nga kon paano ginahimo sang isa ka amay ang iya katungdanan subong isa ka ginikanan “mahimo nga may mapinadayunon nga impluwensia sa ulihi nga panimuot sang iya mga kabataan nahanungod sa awtoridad, sa tawo man ukon sa Dios.”⁠a Ang isa ka Cristianong lalaki nga ginpadaku sa mabug-at nga kamot sang mapintas nga amay nagabaton: “Para sa akon, ang pagtuman kay Jehova mahapos; ang paghigugma sa iya mas labi kabudlay.” Sa pagkamatuod, ang pagtuman kinahanglanon, kay sa mata sang Dios ang “pagtuman maayo pa sa halad.” (1 Samuel 15:22) Apang ano ang mahimo nga makabulig sa aton agod magpanghikot labaw sa pagtuman lamang kundi sa pagpalambo sing gugma kay Jehova subong ang nagapahulag nga kusog sa likod sang aton pagsimba?

“Ang Gugma nga Ginapahulag ni Cristo sa Aton”

8, 9. Paano dapat ang halad nga gawad ni Jesus nagapukaw sang aton gugma para kay Jehova?

⁸ Ang labing daku nga pangpapagsik sa pagpalambo sing bug-os tinagipusuon nga gugma kay Jehova amo ang pag-apresyar sa halad nga gawad ni Jesucristo. “Paagi sini ginpahayag sa aton ang gugma sang Dios, bangod ginpadala sang Dios sa kalibutan ang iya bugtong nga Anak agod nga magkabuhi kita paagi sa iya.” (1 Juan 4:⁠9) Sa tion nga mahangpan kag maapresyar naton ini, ining buhat sang gugma nagapahulag sing gugma. “Nagahigugma kita, kay [si Jehova] naghigugma sa aton sing una.”​—⁠1 Juan 4:⁠19.

⁹ Kinabubut-on nga ginbaton ni Jesus ang iya tulumanon nga mag-alagad subong Manluluwas sang tawo. “Sa sini nakilala ta ang gugma, kay ginhatag niya ang iya kalag tungod sa aton.” (1 Juan 3:16; Juan 15:13) Ang nagasakripisyo-sa-kaugalingon nga gugma ni Jesus nagakinahanglan sing mainapresyahon nga balus sa aton. Sa pag-ilustrar: Halimbawa ginluwas ka gikan sa pagkalumos. Magapauli ka lang bala, magapamala sang imo kaugalingon, kag kalimtan ini? Siempre indi! Magabatyag ka sing utang nga kabalaslan sa tawo nga nagluwas sa imo. Ti, utang mo sa sina nga tawo ang imo kabuhi. Indi bala may utang man kita kay Jehova nga Dios kag kay Jesucristo? Kon wala ang gawad, ang tagsatagsa sa aton mahimo nga nalumos, kon sa aton pa, sa sala kag kamatayon. Sa baylo, bangod sining daku nga buhat sang gugma, may paglaum kita nga magkabuhi sing dayon sa isa ka paraiso nga duta.​—⁠Roma 5:​12, 18; 1 Pedro 2:⁠24.

10. (a) Paano naton mahimo ang gawad nga butang nga personal? (b) Paano ang gugma ni Cristo nagatiklod sa aton?

¹⁰ Pamalandungi ang gawad. Iaplikar ini sing personal, subong sang ginhimo ni Pablo: “Sa pagkamatuod ang kabuhi nga ginakabuhi ko karon sa unod ginakabuhi ko sa pagtuo sa Anak sang Dios, nga naghigugma sa akon kag nagtugyan sang iya kaugalingon tungod sa akon.” (Galacia 2:20) Ina nga pagpamalandong nagapukaw sing tinagipusuon nga pangpahulag, kay si Pablo nagsulat sa mga taga-Corinto: “Ang gugma ni Cristo nagatiklod sa amon, bangod . . . napatay sia tungod sa tanan agod nga ang mga nagakabuhi indi na magkabuhi nga sa ila kaugalingon, kundi nga sa iya nga tungod sa ila napatay kag nabanhaw.” (2 Corinto 5:​14, 15) Ang The Jerusalem Bible nagasiling nga ang gugma ni Cristo “nagadaug sa aton.” Kon hunahunaon naton ang gugma ni Cristo, ginatiklod kita, ginapahulag sing tudok, ginadaug pa gani. Nagatandog ini sang aton tagipusuon kag nagapahulag sa aton sa pagpanghikot. Subong sang paglubad sini sa iban nga tinaga sang badbad ni J. B. Phillips, “ang ginhalinan gid sang aton pagpanghikot amo ang gugma kay Cristo.” Ang bisan ano nga sahi sang pangpahulag indi magapatubas sing mapinadayunon nga bunga sa aton, subong sang ginpakita sang halimbawa sang mga Fariseo.

“Magbantay Batok sa Lebadura sang mga Fariseo”

11. Ilaragway ang panimuot sang mga Fariseo tuhoy sa relihiosong mga buhat.

¹¹ Ginhinguyang sang mga Fariseo ang bug-os nga kabuhi sa pagsimba sa Dios. Sa baylo nga padakuon ang gugma para sa Dios, ginpadaku nila ang mga binuhatan subong ang talaksan para sa espirituwalidad. Ang pagkamahunahunaon nila sing tuman sa detalyado nga mga pagsulundan naghimo sa ila nga daw matarong sa guwa, apang sa sulod sila “puno sang mga tul-an sang mga minatay kag sang tanan nga kahigkuan.”​—⁠Mateo 23:⁠27.

12. Sa tapos maayo ni Jesus ang isa ka tawo, paano ginpakita sang mga Fariseo ang ila kaugalingon subong matig-a sing tagipusuon?

¹² Sang isa ka okasyon mainawaon nga gin-ayo ni Jesus ang isa ka tawo nga ang iya kamot naitus. Malipayon gid ining tawo sang gilayon sia nga gin-ayo sa isa ka balatian nga sa walay duhaduha nagatuga sing daku nga pisikal kag emosyonal nga kalisod! Apang, ang mga Fariseo wala magkasadya upod sa iya. Sa baylo, ginpadaku nila ang teknikalidad​—⁠nga si Jesus naghatag sing bulig sa Inugpahuway. Mahunahunaon sing tuman sa ila tekniko nga pagpatpat sang Kasuguan, nawasi sing bug-os sang mga Fariseo ang tunay nga kahulugan sang Kasuguan. Indi katingalahan nga si Jesus “nasubuan bangod sa katig-a sang ila tagipusuon”! (Marcos 3:​1-5) Dugang pa, nagpaandam sia sa iya mga disipulo: “Magbantay batok sa lebadura sang mga Fariseo kag mga Saduceo.” (Mateo 16:⁠6) Ang ila mga buhat kag mga panimuot ginbuyagyag sa Biblia para sa aton kaayuhan.

13. Ano ang matun-an naton sa halimbawa sang mga Fariseo?

¹³ Ang halimbawa sang mga Fariseo nagatudlo sa aton nga dapat naton tigayunon ang rasonable nga pagtamod sa mga buhat. Sa pagkamatuod, ang mga buhat kinahanglanon gid, kay “ang pagtuo nga walay mga binuhatan patay.” (Santiago 2:26) Apang, ang dihimpit nga mga tawo may huyog sa paghukom sa iban paagi sa ginahimo nila sa baylo sang kon ano gid sila. Kon kaisa, mahimo gani naton hukman ang aton kaugalingon sa sining paagi. Mahimo kita mangin mahunahunaon sing tuman sa mga hinimuan, subong nga daw amo lamang ini ang talaksan sang aton espirituwalidad. Mahimo naton malipatan ang pagkaimportante sang pag-usisa sa aton mga motibo. (Ipaanggid ang 2 Corinto 5:12.) Mahimo kita mangin tuman kaid-id sa pagtuman sa mga pagsulundan nga “nagasala sang hamlok kag nagahalunhon sang kamelyo,” nagatuman sang letra sang kasuguan samtang nagalapas sang katuyuan sini.​—⁠Mateo 23:⁠24.

14. Paano ang mga Fariseo kaangay sang dimatinlo nga tagayan ukon pinggan?

¹⁴ Ang wala mahangpan sang mga Fariseo amo nga kon ginahigugma sing tunay sang isa ka tawo si Jehova, ang mga buhat sang diosnon nga debosyon kinaugali nga magasunod. Ang espirituwalidad nagailig halin sa sulod pakadto sa guwa. Matigdas nga ginpakamalaut ni Jesus ang mga Fariseo bangod sang ila sayop nga panghunahuna may kaangtanan sa sini, nga nagasiling: “Kailo kamo, mga escriba kag mga Fariseo, mga salimpapaw! kay ginatinluan ninyo ang guwa sang tagayan kag sang pinggan, apang sa sulod puno sila sang panglugos kag patuyang. Fariseo nga bulag, tinlui anay ang sulod sang tagayan kag pinggan, agod nga ang guwa nila magtinlo man.”​—⁠Mateo 23:​25, 26.

15. Maghatag sing mga halimbawa nga nagapakita nga si Jesus wala nagatan-aw sang hitsura lamang.

¹⁵ Ang nagguwa nga dagway sang tagayan, pinggan, ukon bisan sang isa ka tinukod wala nagapakita sang tanan. Ang mga disipulo ni Jesus nahayanghag sa katahom sang templo sang Jerusalem, nga gintawag ni Jesus nga “lungib sang mga makawat” bangod sang nagakatabo sa sulod. (Marcos 11:17; 13:⁠1) Kon ano ang matuod sa templo matuod man sa minilyon nga nagapangangkon nga mga Cristiano, subong sang ginapakita sang rekord sang Cristiandad. Si Jesus nagsiling nga hukman niya ang iban nga nagahimo sing “mga buhat nga gamhanan” sa iya ngalan subong “mga manugbuhat sang kalautan.” (Mateo 7:​22, 23) Sa daku nga kabaliskaran, nagsiling sia tuhoy sa isa ka balo nga nag-amot sang diutay katama nga kantidad sang kuwarta sa templo: “Ining imol nga babaying balo nagbutang sing labi pa sa tanan nga amot sa bahandian . . . Sia, sa iya kinawad-on, nagbutang sang tanan niya, bisan sang tanan nga iya inugpangabuhi.” (Marcos 12:​41-44) Wala nagahisanto nga mga paghukom? Indi gid. Sa duha ka hitabo, ginpabanaag ni Jesus ang pagtamod ni Jehova. (Juan 8:16) Nakita niya ang mga motibo sa likod sang mga buhat kag naghukom sing nagakaigo.

“Sa Tagsatagsa Suno sa Iya Ikasarang”

16. Ngaa indi naton dapat ipaanggid pirme ang aton hinimuan sa iya sang iban nga Cristiano?

¹⁶ Kon husto ang aton mga motibo, indi kinahanglanon ang dalayon nga paghimo sing mga pagpaanggid. Halimbawa, diutay lamang nga kaayuhan ang matigayon paagi sa pagpanikasog nga parehuan ang oras nga ginahinguyang sang isa pa ka Cristiano sa ministeryo ukon tupungan ang iya hinimuan sa pagbantala. Si Jesus nagsiling nga higugmaon si Jehova upod ang bug-os mong tagipusuon, hunahuna, kalag, kag kusog​—⁠indi ang iya sang iban. Ang mga ikasarang, kusog, kag mga sirkunstansia sang tagsa ka tawo nanuhaytuhay. Kon ginatugot sang imo kahimtangan, ang gugma magapahulag sa imo sa paghinguyang sing madamo nga tion sa ministeryo​—⁠ayhan subong isa pa gani ka bug-os tion nga ministro. Apang, kon nagapakig-away ikaw sa isa ka balatian, ang tion nga ginahinguyang mo sa ministeryo mahimo nga mas diutay sangsa luyag mo. Indi maluyahan sing buot. Ang katutom sa Dios indi matakus sa mga oras. Bangod may putli nga motibo, may rason agod magkalipay ka. Si Pablo nagsulat: “Ang tagsatagsa magtilaw sang iya buhat, kag nian ang kabangdanan niya sa pagpabugal mangin sa iya kaugalingon lamang kag indi sa iya isigkatawo.”​—⁠Galacia 6:⁠4.

17. Sa imo kaugalingon nga mga tinaga, isaysay sing malip-ot ang parabola sang mga talanton.

¹⁷ Binagbinaga ang parabola ni Jesus tuhoy sa mga talanton, subong sang narekord sa Mateo 25:​14-30. Ang isa ka tawo nga magapanlakatan sa luwas nagtawag sa iya mga ulipon kag nagtugyan sa ila sang iya pagkabutang. “Sa isa naghatag sia sing lima ka talanton, sa isa duha, sa isa isa, sa tagsatagsa suno sa iya ikasarang.” Sang nagbalik ang agalon agod makighusay sa iya mga ulipon, ano ang nasapwan niya? Ang ulipon nga ginhatagan sing lima ka talanton nakadaug sing lima pa ka talanton. Sa kaanggid, ang ulipon nga ginhatagan sing duha ka talanton nakadaug sing duha pa ka talanton. Ang ulipon nga ginhatagan sing isa naglubong sini sa duta kag wala sing ginhimo agod mapadamo ang manggad sang iya agalon. Ano ang paghukom sang agalon sa kahimtangan?

18, 19. (a) Ngaa wala ginpaanggid sang agalon ang ulipon nga ginhatagan sing duha ka talanton sa ulipon nga ginhatagan sing lima ka talanton? (b) Ano ang ginatudlo sa aton sang parabola sang mga talanton nahanungod sa komendasyon kag mga pagpaanggid? (c) Ngaa ang ikatlo nga ulipon ginhukman sing dimaayo?

¹⁸ Una, binagbinagon naton ang ulipon nga ginhatagan sing lima kag duha ka talanton. Sa tagsatagsa sining mga ulipon, ang agalon nagsiling: “Maayo gid, ulipon nga maayo kag matutom!” Masiling bala niya ini sa ulipon nga may lima ka talanton kon nakadaug lamang sia sing duha? Indi! Sa pihak nga bahin, wala sia magsiling sa ulipon nga nakadaug sing duha ka talanton: ‘Ngaa indi lima ang nadaug mo? Aba, tan-awa ang imo masigkaulipon kag kon pila ang nadaug niya para sa akon!’ Wala, ang mainawaon nga agalon, nga naglaragway kay Jesus, wala maghimo sing mga pagpaanggid. Ginhatag niya ang mga talanton “sa tagsatagsa suno sa iya ikasarang,” kag wala sia magpaabot sing labi pa bilang balos sangsa sarang mahatag sang kada isa. Ang duha ka ulipon nakatigayon sing pareho nga komendasyon, kay nangabudlay sila sing bug-os kalag para sa ila agalon. Makatuon kita tanan gikan sini.

¹⁹ Sa pagkamatuod, ang ikatlo nga ulipon wala ginhatagan sing komendasyon. Sa katunayan, ginpilak sia sa kadudulman sa guwa. Bangod nakabaton sing isa lamang ka talanton, mahimo nga wala ginpaabot nga magapatubas sia sing subong kadamo sa ulipon nga may lima ka talanton. Apang, wala sia magtinguha! Ginhukman sia sing dimaayo bangod gid sang iya “malaut kag matamad” nga panimuot sang tagipusuon, nga nagpakita sing kakulang sing gugma para sa agalon.

20. Paano ginatamod ni Jehova ang aton mga limitasyon?

²⁰ Si Jehova nagapaabot sa tagsatagsa sa aton nga higugmaon sia upod ang aton bug-os nga kusog, apang daw ano ka makalilipay nga “nakilala niya ang aton kahimtangan, nagadumdom sia nga kita yab-ok”! (Salmo 103:14) Ang Hulubaton 21:2 nagasiling nga “si Jehova nagatimbang sang mga tagipusuon”​—⁠indi sang mga estadistika. Nahangpan niya ang bisan anong limitasyon nga sa sini wala kita sing kontrol, ini man pinansial, pisikal, emosyonal, ukon iban pa. (Isaias 63:9) Sa amo man nga tion, nagapaabot sia nga himuon naton ang bug-os naton nga masarangan sa aton mga “pagkabutang.” Si Jehova himpit, apang sa pagpakig-angot sa iya dihimpit nga mga sumilimba, wala sia nagapatuman sing pagkahimpit. Makatarunganon man sia sa iya pagpakig-angot kag matinuuron sa iya mga ginapaabot.

21. Kon ang aton pag-alagad sa Dios ginapahulag sang gugma, anong maayong mga resulta ang magasunod?

²¹ Ang paghigugma kay Jehova upod ang aton bug-os nga tagipusuon, kalag, hunahuna, kag kusog “labi pa sa tanan nga dulot nga sinunog 4sing bug-os gid kag sa mga halad.” (Marcos 12:33) Kon ginapahulag kita sang gugma, nian himuon naton ang tanan nga masarangan naton sa pag-alagad sa Dios. Si Pedro nagsulat nga kon ang diosnon nga mga kinaiya, lakip ang gugma, “nagaluntad sa inyo kag nagaawas, magapugong ini sa inyo nga mangin diaktibo ukon dimabungahon may kaangtanan sa sibu nga ihibalo sa aton Ginuong Jesucristo.”​—⁠2 Pedro 1:⁠8.

[Footnote]

Sa Pagrepaso

◻ Ano ang dapat nagapahulag nga kusog sa likod sang aton pag-alagad sa Dios?

◻ Paano ang gugma ni Cristo nagatiklod sa aton nga alagaron si Jehova?

◻ Anong ginakabalak-an sang mga Fariseo ang dapat naton likawan?

◻ Ngaa dimaalamon nga ipaanggid pirme ang aton pag-alagad sa iya sang iban nga Cristiano?

[Mga retrato sa pahina 16]

Ang ikasarang, kusog, kag mga sirkunstansia sang mga indibiduwal nanuhaytuhay