Mga Pamangkot Gikan sa mga Bumalasa
Suno sa Galacia 6:8, “ang nagasab-ug sa iya kaugalingon nga unod magaani sing kaduluntan gikan sa unod, apang ang nagasab-ug sa espiritu magaani sing kabuhi nga walay katapusan gikan sa espiritu.” Ano ang kahulugan sang “espiritu,” kag sa amo paano kita makaani sing kabuhi?
Ang Hebreo kag Griegong mga termino nga ginbadbad nga “espiritu” may nanuhaytuhay nga mga kahulugan, subong sang: (1) aktibo nga kusog sang Dios, (2) puwersa sang kabuhi sa mga tawo ukon mga sapat, (3) nagatiklod nga puwersa sa hunahuna sang tawo, kag (4) espiritu nga persona, ukon anghel. Ang nahauna sa sini—ang aktibo nga kusog sang Dios—amo ang kahulugan nga masapwan naton sa Galacia 6:8.
Bilang impormasyon, talupangda ang Galacia 3:2, diin makita naton ang una nga paggamit sang “espiritu” sa tulun-an sang Galacia. Ginpamangkot ni Pablo ang mga Cristiano: “Nabaton bala ninyo ang espiritu paagi sa mga buhat sang kasuguan ukon paagi sa pagpamati nga may pagtuo?” Nian, sa Galacia 3:5, gin-angot niya inang “espiritu” sa paghimo sing gamhanan nga mga buhat. Gani ang “espiritu” nga ginpatuhuyan niya amo ang balaan nga espiritu, ang dikitaon nga aktibo nga kusog sang Dios.
Sang ulihi, sa Galacia 5:16, ginpaanggid ni Pablo ang espiritu kag unod. Aton mabasa: “Nagasiling ako, Padayon nga maglakat sa espiritu kag indi gid kamo makahimo sing undanon nga kailigbon.” Paagi sa “undanon nga kailigbon” ginapatuhuyan niya ang makasasala tawhanon nga unod. Busa, sa Galacia 5:19-23, ginlista niya ang “mga buhat sang unod” kon ipaanggid sa “bunga sang espiritu.”
Hanti, sa Galacia 6:8, ang tawo nga “nagasab-ug sa iya kaugalingon nga unod” amo ang isa nga nagatugot sang iya kaugalingon nga tuytuyan sang makasasala tawhanon nga mga kailigbon, nagapatuyang sa “mga buhat sang unod.” Mahimo niya maeksperiensiahan ang malaut nga mga epekto sina nga buhat, kag kon indi sia magbalhin, indi gid sia makatigayon sing kabuhi sa Ginharian sang Dios ukon sa idalom sini.—1 Corinto 6:9, 10.
Subong debotado nga mga Cristiano dapat naton handumon nga ‘magsab-ug sa espiritu sang Dios.’ Nagadalahig ina sang pagkabuhi sa paagi nga nagapahanugot sa balaan nga espiritu sa pagpanghikot sing hilway sa aton kabuhi, nagabulig sa aton sa pagpadayag sang bunga sini. Dapat naton ina dumdumon kon nagapamat-od kita kon ano ang basahon ukon kon anong mga programa sa telebisyon ang tan-awon. Nagasab-ug kita sa espiritu samtang nagapamati kita sa mga miting sa kongregasyon kag nagatinguha nga iaplikar ang laygay sang gintangdo sang espiritu nga mga gulang.—Binuhatan 20:28.
Sing makawiwili, ang Galacia 6:8 nagahinakop paagi sa pagpasalig nga samtang nagasab-ug kita nahisanto sa balaan nga epsiritu, yara kita sa kahimtangan nga “magaani sing kabuhi nga walay katapusan gikan sa espiritu.” Huo, pasad sa gawad ni Cristo, ang Dios magahatag sing walay katapusan nga kabuhi paagi sa pagpanghikot sang balaan nga espiritu.—Mateo 19:29; 25:46; Juan 3:14-16; Roma 2:6, 7; Efeso 1:7.