Cristianong mga Saksi nga May Langitnon nga Pagkabanwahanon
“Kon para sa aton, ang aton pagkabanwahanon didto sa mga langit.”—FILIPOS 3:20.
1. Ano ang makadalayaw nga katuyuan ni Jehova para sa pila ka mga tawo?
ANG dutan-on nga mga indibiduwal magagahom subong mga hari kag saserdote sa langit, bisan gani sa mga manugtunda. (1 Corinto 6:2, 3; Bugna 20:6) Daw indi mapatihan ina nga kamatuoran! Apang, gintuyo ini ni Jehova, kag pagatumanon niya ini paagi sa iya bugtong nga Anak, si Jesucristo. Ngaa himuon ina sang aton Manunuga? Kag ano dapat ang mangin epekto sang pagkahibalo sini sa isa ka Cristiano karon? Tan-awon naton kon paano ginasabat sang Biblia ining mga pamangkot.
2. Anong bag-o nga butang ang ginpahibalo ni Juan Bautista nga pagahimuon ni Jesus, kag may kahilabtanan sa ano ining bag-o nga butang?
2 Sang ginahanda sadto ni Juan Bautista ang dalanon para kay Jesus, ginpahibalo niya nga si Jesus magahimo sing isa ka bag-o nga butang. Ang rekord nagasiling: “Nagwali [si Juan] nga nagasiling: ‘May magasunod sa akon nga gamhanan pa sa akon; nga indi ako takus sa pagduko kag paghubad sing higot sang iya sandalyas. Ako nagabawtismo sa inyo sa tubig, apang sia magabawtismo sa inyo sa balaan nga espiritu.’ ” (Marcos 1:7, 8) Antes sadto nga tion, wala pa sing isa nga nabawtismuhan sa balaan nga espiritu. Isa ini anay ka bag-ong kahimusan nga nagadalahig sa balaan nga espiritu, kag may kahilabtanan sa igapahibalo nga katuyuan ni Jehova sa paghanda sa mga tawo para sa langitnon nga paggahom.
“Natawo Liwat”
3. Anong bag-o nga mga butang tuhoy sa Ginharian sang langit ang ginpaathag ni Jesus kay Nicodemo?
3 Sa isa ka tago nga pagkitaay upod sa isa ka prominente nga Fariseo, dugang nga ginpahibalo ni Jesus ang tuhoy sa sining katuyuan sang Dios. Ang Fariseo, si Nicodemo, nagkadto kay Jesus sang kagab-ihon, kag ginsilingan sia ni Jesus: “Kon ang isa indi matawo liwat, indi sia makakita sang ginharian sang Dios.” (Juan 3:3) Si Nicodemo, subong isa ka Fariseo pat-od nga nakatuon sing Hebreong Kasulatan, busa may ihibalo tuhoy sa dakung kamatuoran sang Ginharian sang Dios. Gintagna sang tulun-an ni Daniel nga ang Ginharian ihatag sa “isa nga kaangay sa anak sang tawo” kag sa “katawhan sang mga balaan sang Labing Mataas.” (Daniel 7:13, 14, 27) Ang Ginharian “magadugmok kag magalaglag” sa tanan iban nga ginharian kag magagahom ini sa walay katubtuban. (Daniel 2:44) Mahimo gid nga ginhunahuna ni Nicodemo nga matuman ining mga tagna sa Judiyong pungsod; apang nagsiling si Jesus nga agod makita ang Ginharian, ang isa kinahanglan nga matawo liwat. Wala makahangop si Nicodemo, gani nagsiling si Jesus: “Kon ang isa indi matawo sa tubig kag sa espiritu, indi sia makasulod sa ginharian sang Dios.”—Juan 3:5.
4. Para sa mga natawo gikan sa balaan nga espiritu, paano nagbag-o ang ila kaangtanan kay Jehova?
4 Si Juan Bautista naghambal tuhoy sa bawtismo sa balaan nga espiritu. Ti, si Jesus nagadugang nga ang indibiduwal dapat nga matawo gikan sa balaan nga espiritu agod makasulod sia sa Ginharian sang Dios. Paagi sining pinasahi nga pagkatawo, ang dihimpit nga mga lalaki kag babayi makasulod sa pinasahi gid nga kaangtanan upod kay Jehova nga Dios. Sila nangin iya gin-adoptar nga mga anak. Aton mabasa: “Sa tanan nga nagbaton sa iya, [kay Jesus], ginhatagan sila niya sing awtoridad nga mangin-anak sang Dios, bangod nagtuo sila sa iya ngalan; kag natawo sila, indi sa dugo ukon sa kabubut-on sang unod ukon sa kabubut-on sang tawo, kundi sang Dios.”—Juan 1:12, 13; Roma 8:15.
Mga Anak sang Dios
5. San-o ang matutom nga mga disipulo ginbawtismuhan sang balaan nga espiritu, kag anong kaanggid nga mga pagpanghikot sang balaan nga espiritu ang natabo sa amo man nga tion?
5 Sang nakighambal si Jesus kay Nicodemo, nahaplasan na sia sang balaan nga espiritu, ginhaplasan sia para sa iya palaabuton nga pagkahari sa Ginharian sang Dios, kag dayag nga ginkilala sang Dios si Jesus subong Iya Anak. (Mateo 3:16, 17) Si Jehova nakatigayon pa sing dugang espirituwal nga mga anak sang Pentecostes 33 C.E. Ang matutom nga mga disipulo nga nagtipon sa naibabaw nga hulot sa Jerusalem ginbawtismuhan sing balaan nga espiritu. Sa amo man nga tion, natawo sila liwat gikan sa balaan nga espiritu agod mangin espirituwal nga mga anak sang Dios. (Binuhatan 2:2-4, 38; Roma 8:15) Dugang pa, ginhaplasan sila sang balaan nga espiritu para sa isa ka palaabuton langitnon nga palanublion, kag ginpat-inan sila sang balaan nga espiritu subong isa ka tanda sang pagkamaminatud-on sinang langitnon nga paglaum.—2 Corinto 1:21, 22.
6. Ano ang katuyuan ni Jehova tuhoy sa langitnon nga Ginharian, kag ngaa nagakaigo nga may bahin sa sini ang mga tawo?
6 Sila amo ang unang dihimpit nga mga tawo nga ginpili sang Dios sa pagsulod sa Ginharian. Buot silingon, pagkatapos sang ila kamatayon kag pagkabanhaw, mangin bahin sila sang langitnon nga Ginharian nga organisasyon nga magagahom sa ibabaw sang katawhan kag mga anghel. Tuyo ni Jehova nga pakabalaanon ang iya daku nga ngalan kag ibindikar ang iya pagkasoberano sa tanan nga tinuga paagi sining Ginharian. (Mateo 6:9, 10; Juan 12:28) Nagakaigo gid nga may bahin ang mga tawo sa sinang Ginharian! Gingamit ni Satanas ang mga tawo sang ginpautwas niya ang iya una nga hangkat batok sa pagkasoberano ni Jehova didto sa hardin sang Eden, gani buot ni Jehova nga makigbahin karon ang mga tawo sa pagsabat sina nga hangkat. (Genesis 3:1-6; Juan 8:44) Nagsulat si apostol Pedro sa mga indibiduwal nga ginpili sa paggahom sa sinang Ginharian: “Dayawon ang Dios kag Amay sang aton Ginuong Jesucristo, kay bangod sang iya dakung kaluoy natawo kita liwat sa paglaum nga buhi paagi sa pagkabanhaw ni Jesucristo, sa panublion nga dimadinulunton kag walay dagta kag nagapadayon. Natigana ini sa langit para sa inyo.”—1 Pedro 1:3, 4.
7. Anong pinasahi nga kaangtanan upod kay Jesus ang natigayon sadtong ginbawtismuhan sang balaan nga espiritu?
7 Subong gin-adoptar nga mga anak sang Dios, ining pinili nga mga Cristiano nangin mga kauturan ni Jesucristo. (Roma 8:16, 17; 9:4, 26; Hebreo 2:11) Sanglit napamatud-an si Jesus subong ang ginsaad nga Binhi kay Abraham, ining hinaplas sang espiritu nga mga Cristiano amo ang kaupod, ukon kabulig, nga bahin sina nga Binhi, nga magahatag sing pagpakamaayo sa matinuuhon nga katawhan. (Genesis 22:17, 18; Galacia 3:16, 26, 29) Anong pagpakamaayo? Ang kahigayunan nga matubos gikan sa sala kag mapasag-uli sa Dios kag sa pag-alagad sa iya karon kag tubtob sa walay katubtuban. (Mateo 4:23; 20:28; Juan 3:16, 36; 1 Juan 2:1, 2) Ginatuytuyan sang hinaplas nga mga Cristiano sa duta ang mga matarong sing tagipusuon sa sini nga padya paagi sa pagpanaksi tuhoy sa ila espirituwal nga utod nga si Jesucristo kag sa ila ginkilala nga Amay, si Jehova nga Dios.—Binuhatan 1:8; Hebreo 13:15.
8. Ano ang “pagpahayag” sang ginbun-ag sang espiritu nga mga anak sang Dios?
8 Ang Biblia nagahambal tuhoy sa “pagpahayag” sining ginbun-ag sang espiritu nga mga anak sang Dios. (Roma 8:19) Nagasulod sa Ginharian subong kaupod nga mga hari ni Jesus, magapakigbahin sila sa paglaglag sa sistema sang mga butang sang kalibutan ni Satanas. Pagkatapos, sa sulod sang isa ka libo ka tuig, magabulig sila sa pagdala sing mga benepisyo sang halad nga gawad sa katawhan kag busa pakataason ang tawhanon nga kaliwatan sa kahimpitan nga nadula ni Adan. (2 Tesalonica 1:8-10; Bugna 2:26, 27; 20:6; 22:1, 2) Ang pagpahayag sa ila nagalakip sining tanan. Amo ini ang may kalangkag nga ginahulat sang matinuuhon tawhanon nga mga tinuga.
9. Paano ginapatuhuyan sang Biblia ang bug-os kalibutan nga hubon sang hinaplas nga mga Cristiano?
9 Ang hubon sang hinaplas nga mga Cristiano sa bug-os nga duta amo “ang kongregasyon sang panganay nga nalista na sa langit.” (Hebreo 12:23) Sila ang una nga makabenepisyo sa halad nga gawad ni Jesus. Sila man ang “lawas ni Cristo,” nga nagapakita sang ila suod nga kaangtanan sa isa kag isa kag kay Jesus. (1 Corinto 12:27) Si Pablo nagsulat: “Subong nga ang lawas isa apang may madamo nga bahin, kag ang tanan nga bahin sina nga lawas, bisan madamo sila, isa ka lawas, amo man si Cristo. Kay sa pagkamatuod paagi sa isa ka espiritu ginbawtismuhan kita tanan sa isa ka lawas, mga Judiyo man ukon mga Griego, mga ulipon man ukon hilway, kag ginpainom kita tanan sa isa ka espiritu.”—1 Corinto 12:12, 13; Roma 12:5; Efeso 1:22, 23; 3:6.
“Ang Israel sang Dios”
10, 11. Sang unang siglo, ngaa kinahanglanon ang bag-ong Israel, kag sin-o ang nagahuman sa sining bag-o nga pungsod?
10 Sa sulod sing kapin sa 1,500 ka tuig antes sang pag-abot ni Jesus subong ang ginsaad nga Mesias, ang undanon nga pungsod sang Israel amo ang pinasahi nga katawhan ni Jehova. Walay sapayan sing padayon nga pahanumdom, ang pungsod sa kabilugan napamatud-an nga dimatutom. Sang pag-abot ni Jesus, ginsikway sia sang pungsod. (Juan 1:11) Busa, ginsilingan ni Jesus ang Judiyong relihiosong mga lider: “Ang ginharian sang Dios kuhaon sa inyo kag ihatag sa pungsod nga makapatubas sing mga bunga sini.” (Mateo 21:43) Ang pagkilala sinang “pungsod nga nagapatubas [sang] mga bunga [sang Ginharian]” importante para sa kaluwasan.
11 Ang bag-o nga pungsod amo ang hinaplas nga Cristianong kongregasyon, nga nabun-ag sadtong Pentecostes 33 C.E. Ang unang mga katapo sini amo ang Judiyong mga disipulo ni Jesus nga nagbaton sa iya subong ila langitnon nga Hari. (Binuhatan 2:5, 32-36) Apang, mga katapo sila sang bag-o nga pungsod sang Dios, indi bangod sang ila kaliwatan subong mga Judiyo, kundi pasad sa pagtuo kay Jesus. Busa, pinasahi gid ining bag-ong Israel sang Dios—isa ka espirituwal nga pungsod. Sang ginsikway sang kalabanan nga mga Judiyo si Jesus, ang pangagda nga mangin bahin sang bag-o nga pungsod ginpalab-ot sa mga Samariahanon kag sang ulihi sa mga Gentil. Ang bag-o nga pungsod gintawag “ang Israel sang Dios.”—Galacia 6:16.
12, 13. Paano nangin maathag nga ang bag-ong Israel indi lamang isa ka sekta sang Judaismo?
12 Sa dumaan nga Israel, kon ang mga di-Judiyo mangin mga proselita, dapat sila magpasakop sa Mosaikong Kasuguan, kag dapat simbuluhan ini sang mga lalaki paagi sa pagpasirkunsidar. (Exodo 12:48, 49) Ginhunahuna sang pila ka Judiyong mga Cristiano nga dapat man ini ipatuman sa mga di-Judiyo sa Israel sang Dios. Apang, tuhay ang ginahunahuna ni Jehova. Gintuytuyan sang balaan nga espiritu si apostol Pedro padulong sa balay sang Gentil nga si Cornelio. Sang ginbaton ni Cornelio kag sang iya pamilya ang ginbantala ni Pedro, nabaton nila ang balaan nga espiritu—bisan wala pa sila mabawtismuhan sa tubig. Maathag nga ginpakita sini nga ginbaton ni Jehova ining mga Gentil subong mga katapo sang Israel sang Dios nga wala nagasugo nga magpasakop sila sa Mosaikong Kasuguan.—Binuhatan 10:21-48.
13 Ginbudlayan sa pagbaton sini ang pila ka tumuluo, sa amo ginhambalan ini sang ulihi sang mga apostoles kag mga gulang sa Jerusalem. Ginpamatian sadtong may awtoridad nga hubon ang panugiron kon paano ang balaan nga espiritu nangin aktibo sa di-Judiyo nga mga tumuluo. Ginpakita sang pagpanalawsaw sa Biblia nga katumanan ini sang inspirado nga tagna. (Isaias 55:5; Amos 9:11, 12) Nahimo ang husto nga desisyon: Ang di-Judiyo nga mga Cristiano indi na kinahanglan nga magpasakop sa Mosaikong Kasuguan. (Binuhatan 15:1, 6-29) Busa, ang espirituwal nga Israel isa matuod ka bag-o nga pungsod kag indi lamang isa ka sekta sang Judaismo.
14. Ano ang ginapahangop sang pagtawag ni Santiago sa Cristianong kongregasyon nga “ang napulog duha ka tribo nga nag-alaplaag”?
14 Nahisuno sa sini, sang ginsulatan ang hinaplas nga mga Cristiano sang unang siglo, ginpatuhoy ni disipulo Santiago ang iya sulat “sa napulog duha ka tribo nga nag-alaplaag.” (Santiago 1:1; Bugna 7:3-8) Sa pagkamatuod, ang mga banwahanon sang bag-ong Israel wala gintangdo sa espisipiko nga mga tribo. Wala sing pagbinahinbahin padulong sa 12 ka magkatuhay nga tribo sa espirituwal nga Israel subong amo anay sa undanon nga Israel. Walay sapayan, ginpakita sang inspirado nga pulong ni Santiago nga sa pagtamod ni Jehova ginbuslan na sing lubos sang Israel sang Dios ang 12 ka tribo sang undanon nga Israel. Kon ang isa ka kinaugali nga Israelita mangin bahin sang bag-o nga pungsod, ang iya undanon nga kaliwatan—bisan kon halin pa sia sa tribo ni Juda ukon ni Levi—wala sing kabilinggan.—Galacia 3:28; Filipos 3:5, 6.
Isa ka Bag-o nga Katipan
15, 16. (a) Paano ginatamod ni Jehova ang di-Judiyo nga mga katapo sang Israel sang Dios? (b) Sa anong legal nga sadsaran natukod ang bag-o nga Israel?
15 Sa pagtamod ni Jehova, ang di-Israelinhon nga mga katapo sining bag-o nga pungsod bug-os gid nga espirituwal nga mga Judiyo! Si apostol Pablo nagpaathag: “Indi sia isa ka Judiyo nga amo sa guwa lamang, ukon sing sirkunsisyon nga amo sa guwa kag sa unod. Apang sia isa ka Judiyo nga sa sulod, kag ang iya sirkunsisyon amo ang sa tagipusuon paagi sa espiritu, kag indi paagi sa sinulat nga kasuguan. Ang pagdayaw sa iya indi gikan sa mga tawo, kundi sa Dios.” (Roma 2:28, 29) Madamo nga Gentil ang nagbaton sang pangagda nga mangin bahin sang Israel sang Dios, kag ini nga hitabo nagtuman sa tagna sang Biblia. Halimbawa, si manalagna Oseas nagsulat: “Kaluuyan ko ang wala makaagom sing kaluoy, kag isiling ko sa mga indi akon katawhan, ‘Ikaw katawhan ko’; kag sila magasiling: ‘Ikaw Dios ko.’ ”—Oseas 2:23; Roma 11:25, 26.
16 Kon ang espirituwal nga Israel wala napaidalom sa Mosaikong Kasuguan nga katipan, sa ano nga sadsaran nangin bahin sila sang bag-o nga pungsod? Si Jehova naghimo sang isa ka bag-ong katipan paagi kay Jesus upod sining espirituwal nga pungsod. (Hebreo 9:15) Sang ginsugdan ni Jesus ang Memoryal sang iya kamatayon, sang Nisan 14, 33 C.E., ginpasa niya ang tinapay kag alak sa 11 ka matutom nga apostoles kag nagsiling nga ang alak nagasimbulo sa “dugo sang katipan.” (Mateo 26:28; Jeremias 31:31-34) Subong sang ginasugid sa rekord ni Lucas, si Jesus nagsiling nga ang tagayan sang alak nagsimbulo sa “bag-ong katipan.” (Lucas 22:20) Bilang katumanan sang mga pinamulong ni Jesus, sang ang balaan nga espiritu ginbubo sang Pentecostes kag nabun-ag ang Israel sang Dios, ang Ginharian ginkuha gikan sa undanon nga Israel kag ginhatag sa bag-o, espirituwal nga pungsod. Sa baylo sang undanon nga Israel, ining bag-o nga pungsod amo na karon ang alagad ni Jehova, nga ginahuman sang iya mga Saksi.—Isaias 43:10, 11.
“Ang Bag-ong Jerusalem”
17, 18. Ano nga paglaragway ang ginhatag sa tulun-an sang Bugna tuhoy sa himaya nga nagahulat sa hinaplas nga mga Cristiano?
17 Daw ano nga himaya ang nagahulat sa mga may pribilehiyo sa langitnon nga panawagan! Kag daw ano ka makalilipay matun-an ang dalayawon nga mga butang nga nagahulat sa ila! Ang tulun-an sang Bugna nagahatag sa aton sing makahalawathawat nga pagtan-aw sa ila langitnon nga palanublion. Halimbawa, ang Bugna 4:4, aton mabasa: “Sa palibot sang trono [ni Jehova] may duha ka pulo kag apat ka trono, kag sa mga trono nagalingkod ang duha ka pulo kag apat ka tigulang nga napanaptan sing mga panapton nga maputi, kag sa ila mga ulo may mga purongpurong nga bulawan.” Ining 24 ka tigulang amo ang hinaplas nga mga Cristiano, nga ginbanhaw kag karon nagauyat sang langitnon nga posisyon nga ginsaad sa ila ni Jehova. Ang ila mga korona kag mga trono nagapahanumdom sa aton sang ila pagkaharianon. Hunahunaa man ang ila makadalayaw nga pribilehiyo sang pag-alagad sa palibot sang trono ni Jehova!
18 Sa Bugna 14:1, may makita pa kita tuhoy sa ila: “Nagtulok ako, kag yari karon! ang Cordero nagatindog sa Bukid nga Sion, kag kaupod niya ang isa ka gatos kag kap-atan kag apat ka libo nga may ila sang iya ngalan kag sang ngalan sang iya Amay nga nasulat sa ila mga agtang.” Makita naton diri ang limitado nga kadamuon sang mga hinaplas—144,000. Makita ang ila harianon nga posisyon bangod nagatindog sila upod sa gintangdo nga Hari ni Jehova, “ang Cordero,” si Jesus. Kag yara sila sa langitnon nga Bukid nga Sion. Ang dutan-on nga Bukid nga Sion amo anay ang nahamtangan sang Jerusalem, ang harianon nga siudad sang Israel. Ang langitnon nga Bukid nga Sion nagarepresentar sa mataas nga posisyon ni Jesus kag sang iya kaupod nga mga manunubli, nga nagahuman sa langitnon nga Jerusalem.—2 Cronica 5:2; Salmo 2:6.
19, 20. (a) Anong langitnon nga organisasyon mangin bahin ang hinaplas nga mga Cristiano? (b) Sa anong panag-on sang tion ginpili ni Jehova yadtong ila pagkabanwahanon mangin didto sa langit?
19 Nahisanto sa sini, ang hinaplas sa ila langitnon nga himaya ginasambit man subong ang “Bag-ong Jerusalem.” (Bugna 21:2) Ang dutan-on nga Jerusalem amo anay “ang siudad sang dakung Hari” kag amo man ang duog nga nahamtangan sang templo. (Mateo 5:35) Ang langitnon nga Bag-ong Jerusalem amo ang harianon nga Ginharian nga organisasyon nga paagi sini ang dakung Soberano, si Jehova, kag ang iya gintangdo nga Hari, si Jesus, nagagahom karon diin ang saserdotenhon nga pag-alagad ginahimo subong bugana nga mga pagpakamaayo nga nagailig gikan sa trono ni Jehova para sa ikaayo sang katawhan. (Bugna 21:10, 11; 22:1-5) Sa isa pa ka palanan-awon nabatian ni Juan ang matutom, ginbanhaw, hinaplas nga mga Cristiano nga ginapatuhuyan subong ‘ang asawa sang Cordero.’ Daw ano ka makapapagsik nga ginalaragway sini ang ila pagkasuod kay Jesus kag ang ila kinabubut-on nga pagpasakop sa iya! Handurawa ang kalipay sa langit kon mabaton sang pinakaulihi sa ila ang iya langitnon nga padya. Karon, sa katapusan, sarang na mahiwat “ang kasal sang Cordero”! Nian makompleto na inang harianon langitnon nga organisasyon.—Bugna 19:6-8.
20 Huo, makadalayaw nga mga pagpakamaayo ang nagahulat sa sadtong ginsilingan ni apostol Pablo: “Para sa aton, ang aton pagkabanwahanon didto sa mga langit.” (Filipos 3:20) Sa halos duha na ka libo ka tuig, si Jehova nagapili sang iya espirituwal nga mga anak kag nagahanda sa ila para sa isa ka langitnon nga palanublion. Suno sa tanan nga katunayan, ining hilikuton sang pagpili kag paghanda halos tapos na. Apang madamo pa ang magasunod, subong sang ginpakita kay Juan sa iya palanan-awon nga narekord sa Bugna kapitulo 7. Busa, isa pa ka grupo sang mga Cristiano ang dapat naton talupangdon, kag binagbinagon naton ini sa masunod nga artikulo.
Madumduman Mo Bala?
◻ Ano ang lainlain nga mga pagpanghikot sang espiritu sa mga may langitnon nga palanublion?
◻ Anong suod nga kaangtanan ang natigayon sang mga hinaplas upod kay Jehova? kay Jesus?
◻ Paano ginlaragway ang kongregasyon sang hinaplas nga mga Cristiano sa Biblia?
◻ Sa anong legal nga sadsaran napasad ang Israel sang Dios?
◻ Anong langitnon nga mga pribilehiyo ang nagahulat sa hinaplas nga mga Cristiano?
[Mga retrato sa pahina 10]
Sa sulod sang halos duha ka libo ka tuig, ginpili ni Jehova yadtong magagahom sa langitnon nga Ginharian