Mga Manuggahom sa Espirituhanon nga Duog

SIN-O ang nagagahom sa kalibutan? May yara bala pila ka sahi sang labaw sa tawo nga pagdumala? Ukon ginpabay-an bala sang Dios ang mga tawo sa pag-atipan sa ila kaugalingon? Sa pagpangita sing mga sabat sa sining mga pamangkot, binagbinagon anay naton ang isa ka hitabo nga natabo sang panahon sang dutan-on nga pagministeryo ni Jesucristo.

Wala madugay pagkatapos sang iya bawtismo, si Jesus ginsulay sang isa ka dikitaon nga espiritu nga tinuga nga ginatawag si Satanas nga Yawa. Nagahinambit sang isa sa mga pagsulay, ang Biblia nagasiling: “Gindala sang Yawa [si Jesus] sa isa ka bukid nga dikinaandan kataas, kag ginpakita sa iya ang tanan nga ginharian sa kalibutan kag ang ila himaya.” (Mateo 4:⁠8) Nian ginsilingan ni Satanas si Jesus: “Ihatag ko sa imo ang tanan nga awtoridad kag ang himaya nila, kay natugyan ini sa akon, kag sa bisan kay sin-o nga buot ko ihatag ini. Busa, kon ikaw maghimo sing isa ka buhat sang pagsimba sa atubangan ko, mangin imo ini tanan.”​—⁠Lucas 4:​6, 7.

Si Satanas nagpangangkon nga may awtoridad sa ibabaw sang tanan nga mga ginharian, ukon mga gobierno, sining kalibutan. Ginpanghiwala bala ni Jesus ining pangangkon? Wala. Sa katunayan, ginpamatud-an niya ini sa isa pa ka okasyon sang gintawag niya si Satanas subong “ang manuggahom sang kalibutan.”​—⁠Juan 14:⁠30.

Suno sa Biblia, si Satanas isa ka malaut nga anghel nga nagapanag-iya sing daku nga gahom. Ginabuylog sang Cristianong si apostol Pablo si Satanas sa “malauton nga espirituhanon nga mga kabon” kag nagalaragway sa ila subong “mga manuggahom sang kalibutan sining kadudulman.” (Efeso 6:​11, 12) Dugang pa, si apostol Juan nagsiling nga “ang bug-os nga kalibutan yara sa gahom sang malauton.” (1 Juan 5:19) Ang tulun-an sang Bugna sa Biblia nagasiling nga si Satanas “nagadaya sang bug-os napuy-an nga duta.” (Bugna 12:⁠9) Sa simbuliko nga mga tinaga, ginalaragway man sang Bugna si Satanas subong isa ka dragon nga nagahatag sa politikal nga sistema sang kalibutan sang “iya gahom kag sang iya trono kag dakung awtoridad.”​—⁠Bugna 13:⁠2.

Ang mga hitabo sa kalibutan nagapamatuod man nga may malaut nga gahom nga nagapanghikot, nga nagamaniobra sang mga tawo sa ila kahalitan. Tungod sa anong iban pa nga rason nga ang mga gobierno sang tawo napaslawan sa pagpasanyog sing paghidait? Ano pa ang rason nga ang mga tawo nagadinumtanay kag nagapinatyanay? Hinadlukan sa pagpamatay kag kamatayon sa inaway sibil, ang isa ka nakasaksi nagsiling: “Indi ko mahibaluan kon paano ini natabo. Kapin ini sa dumot. Isa ka malaut nga espiritu ang nagagamit sining mga tawo sa paglaglag sa isa kag isa.”

Isa ka Matuod nga Persona nga Nagapamatok sa Dios

Karon, madamo ang wala nagapati kay Satanas nga Yawa. Apang, indi lamang sia prinsipio sang malaut sa katawhan, subong sang pagpati sang iban. Ginapakita sang Biblia kag sang mga hitabo sa kalibutan nga isa sia ka matuod nga persona. Dugang pa, si Satanas nagapamatok gid kay Jehova nga Dios. Sa pagkamatuod, si Satanas indi tupong sa Dios. Sanglit si Jehova amo ang gamhanan gid nga Manunuga, sia ang makatarunganon nga Manuggahom sa ibabaw sang tanan nga tinuga.​—⁠Bugna 4:⁠11.

Ang Dios wala magtuga sing malauton nga tinuga nga magapamatok sa iya. Sa baylo, ang isa sang angheliko nga “mga anak sang Dios” nagpalambo sing makagod nga handum nga agawon para sa iya kaugalingon ang pagsimba nga matarong nga natungod kay Jehova. (Job 38:7; Santiago 1:​14, 15) Ini nga handum nagdul-ong sa iya nga sugdan ang dalanon sang pagrebelde batok sa Dios. Paagi sa pagrebelde, ginhimo sining espiritu nga tinuga ang iya kaugalingon nga Satanas (nagakahulugan sing “mabinatuon”) kag Yawa (nagakahulugan sing “manugpasipala”). Bangod sining tanan, ayhan magapalibog ka kon ngaa gintugutan si Satanas nga maggahom sa kalibutan.

Kon Ngaa Gintugutan si Satanas nga Maggahom

Nadumduman mo bala kon ano ang ginsiling ni Satanas kay Jesus tuhoy sa paggahom sa ibabaw sang duta? “Ihatag ko sa imo ining awtoridad . . . kay natugyan ini sa akon,” siling ni Satanas. (Lucas 4:⁠6) Inang pinamulong nagapakita nga si Satanas nga Yawa may awtoridad lamang sa pahanugot sang Dios. Apang ngaa ginatugutan sang Dios si Satanas?

Ang sabat sa sinang pamangkot nagaangot sa mga hitabo sa hardin sang Eden, diin ginsugdan ni Satanas ang iya karera subong manuggahom sang kalibutan. Didto ginpahangop ni Satanas nga ang Dios naggahom sa malain nga paagi sa kalalangan sang pagdingot sing butang nga maayo gikan sa nahaunang lalaki kag babayi, nga sanday Adan kag Eva. Suno kay Satanas, kon kaunon nila ang bunga nga ginadumilian sang Dios, mahilway kuno sila. Si Adan kag si Eva mangin hilway kag independiente kuno kay Jehova. Mangin kaangay kuno sila sa Dios!​—⁠Genesis 2:​16, 17; 3:​1-5.

Paagi sa sini nga pagbinutig kag sa pagsulay kay Eva kag sa paghaylo kay Adan paagi kay Eva nga lapason ang kasuguan sang Dios, ginpaidalom ni Satanas ang nahaunang tawhanon nga mag-asawa sa iya pagpangulo kag pagkontrol. Busa ang Yawa nangin dios nila, isa nga nagapamatok kay Jehova. Apang, sa baylo sang kahilwayan, naeksperiensiahan nanday Adan kag Eva ang pagkaulipon kay Satanas, sa sala, kag sa kamatayon.​—⁠Roma 6:16; Hebreo 2:​14, 15.

Nahisanto sa iya himpit nga katarungan, puwede na kuntani dayon patyon ni Jehova si Satanas kag ang iya duha ka bag-ong sumulunod. (Deuteronomio 32:⁠4) Apang, nadalahig ang moral nga hulusayon. Ginhangkat ni Satanas ang pagkamatarong sang paagi ni Jehova sa paggahom. Sa iya kaalam, gintugutan sang Dios ang tion sa pagligad agod pamatud-an nga ang kahilwayan gikan sa iya nagadala sing kalisdanan. Gintugutan ni Jehova ang mga rebelde nga magpadayon sa pagkabuhi sa makadali, nagtugot kay Adan kag Eva sa pagpanganak.​—⁠Genesis 3:​14-19.

Bisan pa ang kalabanan nga mga kaanakan ni Adan wala magpasakop sa pagginahom ni Jehova, ginpakita sang pagpakig-angot sang Dios sa Iya mga sumilimba ang pagkasuperyor sang iya pagginahom. Ang nagakaigo nga pagkilala sa awtoridad ni Jehova nagadala sing kalipay kag matuod nga kalig-unan. Sa pihak nga bahin, kapiutan kag walay kalig-unan ang resulta sang pagginahom sang tawo sa idalom sang impluwensia ni Satanas. Huo, “gingamhan sang tawo ang tawo sa iya kasamaran.” (Manugwali 8:⁠9) Ang mga tawo wala makasapo sing matuod nga kalig-unan kag mapinadayunon nga kalipay sa idalom sang pagginahom sang tawo sa sining kalibutan nga yara sa gahom ni Satanas. Apang, may rason gid sa pagpati nga may maayo nga palaabuton nga magaabot.

Ang Tion ni Satanas Malip-ot Na!

Ang impluwensia ni Satanas sa duta umalagi lamang. Indi na pagtugutan ni Jehova ang satanikong paggahom sing malawig pa! Sa dili madugay ang Yawa indi na magapanghikot. Ang bag-ong manuggahom magakontrol sa duta, ang matarong nga hari nga ginpili mismo sang Dios. Ina nga Hari amo si Jesucristo. Nahanungod sa paglingkod niya sa trono, ang Bugna nagasiling: “Ang ginharian sang kalibutan nangin ginharian sang aton Ginuo [si Jehova] kag sang iya Cristo.” (Bugna 11:15) Ang kronolohiya sang Biblia, lakip ang katumanan sang Makasulatanhon nga tagna, nagapamatuod nga natabo ini sang tuig 1914.​—⁠Mateo 24:​3, 6, 7.

Ginalaragway man sang Biblia kon ano ang natabo wala madugay nga naglingkod sa trono si Jesus. Ini nagasiling: “May inaway sa langit: si Miguel [si Jesucristo] kag ang iya mga anghel nakig-away sa dragon [si Satanas nga Yawa], kag ang dragon kag ang iya mga anghel nakig-away apang wala ini magdaug, kag wala na sing duog nga masapwan para sa ila sa langit. Gani gintagbong ang dakung dragon, ang orihinal nga man-ug, ang isa nga ginatawag Yawa kag Satanas, nga nagapatalang sa bug-os napuy-an nga duta; gintagbong sia sa duta, kag ang iya mga anghel gintagbong upod sa iya.”​—⁠Bugna 12:​7-9.

Ano ang resulta sang pagtabog kay Satanas sa langit? Yadtong didto sa langit nagkasadya, apang kamusta ang mga pumuluyo sang duta? “Kailo para sa duta kag para sa dagat,” siling sang Bugna 12:​12, “kay ang Yawa nagpanaug sa inyo, nga may dakung kasingkal, nakahibalo nga may malip-ot lamang sia nga tion.” Sa pagkamatuod, ang pagtabog kay Satanas sa langit nagdala sing kailo sa duta. Ang The Columbia History of the World nagasiling: “Ang daku nga kapahamakan sang Apat ka Tuig nga Inaway sang 1914-1918 . . . nagpakita sa Nakatundan nga kalibutan nga indi sini maamligan ang sibilisasyon gikan sa iya kaugalingon nga kabuangan ukon malaut nga pagsilabo. Ang kusog sang Katundan wala gid makabangon gikan sa sinang pagkadugmok.”

Indi lamang nadugmok nga espiritu ang nagatanda sa mga kailo sining kaliwatan. Si Jesus nagtagna: “Ang pungsod magatindog batok sa pungsod kag ang ginharian batok sa ginharian, kag may kakulang sing pagkaon kag mga linog sa nagakalainlain nga mga duog.” Nagtagna man sia sing mga kamatay. (Mateo 24:​7, 8; Lucas 21:11) Dugang pa, ang Biblia nagasiling nga sa “katapusan nga mga adlaw” sang sistema sang mga butang ni Satanas, madamo ang mangin “mga mahigugmaon sang ila kaugalingon, mahigugmaon sang kuwarta, . . . malalison sa mga ginikanan, . . . indi bukas sa bisan anong kasugtanan.” Ang mga tawo mangin “mahigugmaon [man] sang kalipayan sa baylo sangsa Dios.”​—⁠2 Timoteo 3:​1-5.

Ang mga inaway, kamatay, kakulang sing pagkaon, linog, kag pag-usmod sang moral nga mga kabilihanan​—⁠ina tanan nga butang natabo sa dimatupungan nga kasangkaron sugod sang 1914, subong gid sang gintagna sang Biblia. Ginapakita sini nga ang naakig nga kaaway sang Dios kag sang tawo​—⁠si Satanas nga Yawa​—⁠gintabog sa langit kag dapat karon maglatid sang iya kasingkal sa duta. Apang ginapakita man sang Biblia nga si Satanas indi pagpahanugutan nga magapanghikot sing malawig pa. May “malip-ot na lamang nga tion” sia nga nabilin tubtob sa Armagedon, kon laglagon sang Dios ang sistema sang kalibutan nga kontrolado ni Satanas.

Ano nian ang mahanabo kay Satanas? Si apostol Juan nagsulat: “Nakita ko ang anghel nga nagakunsad gikan sa langit nga may yabi sang kadadalman kag dakung talikala sa iya kamot. Kag gindakop niya ang dragon, ang orihinal nga man-ug, nga amo ang Yawa kag Satanas, kag gingapos sia sing isa ka libo ka tuig. Kag gintagbong sia sa kadadalman kag gintakpan ini kag ginpat-inan sa ibabaw niya.” (Bugna 20:​1-3) Daw ano nga paumpaw para sa nagaantos nga katawhan!

Ang Kinasadya sa Idalom sang Paggahom sang Ginharian

Bangod wala na si Satanas, makontrol na sing bug-os sang Ginharian sang Dios sa idalom ni Jesucristo ang mga hilikuton sa duta. Sa baylo sang madamo nga gobierno sa duta, isa lamang ka langitnon nga gobierno ang magapabilin nga nagagahom sa ibabaw sang bug-os nga planeta. Ang inaway mangin butang sang nagligad, kag ang paghidait magaluntad bisan diin. Sa idalom sang paggahom sang Ginharian sang Dios, ang tanan magapuyo sing tingob sa mahigugmaon nga paghiliutod.​—⁠Salmo 72:​7, 8; 133:1; Daniel 2:⁠44.

Ano nga sahi sang manuggahom si Jesus? Sang yari sia sa duta, ginpakita niya ang tudok nga gugma para sa mga tawo. Mainawaon nga ginhatagan ni Jesus sing pagkaon ang mga gutom. Gin-ayo niya ang masakiton kag ginpasag-uli ang panulok sa bulag, panghambal sa apa, kag kapag-on sang batiis kag butkon sa piang. Ginbuhi pa gani liwat ni Jesus ang patay! (Mateo 15:​30-38; Marcos 1:34; Lucas 7:​11-17) Yadtong mga milagro mga pagpakita lamang sa makatilingala nga mga butang nga pagahimuon pa niya subong Hari. Daw ano ka makadalayaw ang kaangay sina kaalwan nga manuggahom!

Ang wala katapusan nga mga pagpakamaayo pagaagumon sang mga nagapasakop sa soberanya ni Jehova. Ang Kasulatan nagasaad: “Sa sina nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa sina nga tion ang piang magalumpat subong sang usa, kag ang dila sang apa magasinggit sa kalipay.” (Isaias 35:​5, 6) Nagatudlo sinang daku nga adlaw, si apostol Juan nagsulat: “Nabatian ko ang mabaskog nga tingog gikan sa trono nga nagasiling: ‘Toloka! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.’ ”​—⁠Bugna 21:​3, 4.

Ang mga kalipay nga mahatag sang paggahom ni Jehova nga Dios paagi sa iya Anak, nga si Jesucristo, magatumbas sing labi pa sa bisan anong pag-antos nga mahimo naton naeksperiensiahan sa karon nga sistema sang mga butang nga ginagamhan ni Satanas nga Yawa. Sa ginsaad nga bag-ong kalibutan sang Dios, ang mga tawo indi magapalibog, ‘Sin-o gid bala ang nagagahom?’ (2 Pedro 3:13) Ang matinumanon nga katawhan mangin malipayon kag malig-on sa dutan-on nga teritoryo sang mahigugmaon nga mga Manuggahom sa espirituhanon nga duog, nga si Jehova kag si Jesucristo. Ngaa indi batunon ang paglaum nga mangin sa tunga sang ila mga sakop?

[Retrato sa pahina 7]

Ang katawhan mangin malig-on sa dutan-on nga teritoryo sang Ginharian sang Dios

[Credit Line sang retrato sa pahina 4]

Retrato sang NASA