Kaimon—Diutayan Lang Magguba sang Akon Kabuhi

NANGIN maimon ako sang nagpakasal ako sa akon ikaduha nga bana, nga si Mark.a Dapat namon nga duha atipanon ang pila ka manak kag pakig-angutan ang amon anay mga tiayon. Ang kahimtangan indi maagwanta kon kaisa. Sa tion nga may dipaghangpanay sa pamilya, daw wala ako ginasupurtahan ni Mark. Nagsugod ako sa pagbatyag nga ginahigugma gihapon niya ang iya anay nga asawa. Sa baylo nga punggan ang akon kaimon, gintugutan ko ini nga kontrolon ang akon kabuhi. Indi maayo ang akon pamatyag sa tion nga yara ang asawa anay ni Mark.

Pirme ko ginapanilagan si Mark, ginabantayan pa gani kon diin sia nagatulok. Ginahatagan ko sing kahulugan ang iya mga pagpasiplat sang butang nga wala gani niya ginahunahuna. Kon kaisa hayag ko sia nga ginasumbong nga ginahigugma gihapon niya ang iya anay nga asawa. Sang isa ka okasyon naakig gid sia bangod sini nga nagtindog sia kag ginbiyaan ang isa ka Cristianong asambleya. Nagbatyag ako nga nakasala kay Jehova. Ginpalisod ko ang pangabuhi sang akon pamilya bangod naapektuhan man sang ulihi ang akon mga anak. Naugot ako sa akon kaugalingon bangod sang ginahimo ko, apang bisan ano man ang akon himuon, indi ko gid mapunggan ang akon kaimon.

Sa baylo nga buligan ako, si Mark nagsugod sa pagbalos. Kon sukmatan ko sia, ginasinggitan niya ako, “Nagapangimon ka lang.” Daw ginahungod pa gani niya nga paimunon ako. Ayhan naghunahuna sia nga magapauntat ini sang akon pagpangimon, apang labi pa ini nga naglala. Nagsugod sia sa pagtulok sa iban nga mga babayi, nagakomento kon daw ano sa ila katahom. Labi pa ini nga nagpabatyag sa akon nga kubos kag wala maluyagi. Naglab-ot ini sa punto diin ang isa pa ka balatyagon​—⁠ang dumot⁠—​nagtuhaw. Sa sina nga punto, nagamuhan gid ako nga ang luyag ko na lamang amo ang mapahilayo sa iya kag sa iya pamilya.

Sang ang Biblia nagasiling nga “ang kahisa amo ang pagkagabuk sang mga tul-an,” eksakto gid ini. (Hulubaton 14:30) Ang akon panglawas naapektuhan na karon. Gin-ulser ako sa tiyan nga madugay mag-ayo. Padayon ko nga ginpalisod ang akon kabuhi paagi sa pagduhaduha sa tanan nga ginahimo ni Mark. Ginabaliskad ko ang iya mga bulsa, kag kon makakita ako sing mga numero sang telepono, ginatelepunuhan ko ini agod tan-awon kon sin-o ang magasabat. Sa alibutod sang akon tagipusuon nahuya gid ako sa akon kaugalingon, nagahibi ako bangod sang kahuya kay Jehova. Apang indi ko mapunggan ang akon kaugalingon. Ako mismo ang akon pinakamalala nga kaaway.

Ang akon espirituwalidad nag-antos tubtob sa punto nga indi na ako makapangamuyo. Ginahigugma ko si Jehova kag luyag ko gid himuon kon ano ang husto. Nahibaluan ko ang tanan nga mga kasulatan may kaangtanan sa mga bana kag mga asawa, apang wala ko ini mapadapat. Sa nahaunang tion sa akon kabuhi, indi ko na luyag mabuhi, walay sapayan sang katunayan nga may maayong mga kabataan ako.

Ang mga gulang sa Cristianong kongregasyon daku gid nga pangpalig-on kag ginhimo nila ang ila bug-os nga masarangan agod buligan ako. Apang kon hinambitan nila ang tuhoy sa akon pagpangimon, ginapanghiwala ko ini bangod sang kahuya, indi luyag mag-ako nga may amo ako sina nga problema.

Sang ulihi, naglain ang akon panglawas tubtob sa punto nga dapat ako magpaospital agod operahan. Samtang sa ospital, narealisar ko nga indi mahimo magpadayon sing amo sini ang kabuhi. Namat-od kami ni Mark nga magbulagay sing tatlo ka bulan agod usisaon ang amon kahimtangan nga wala sing pagpakig-angot sa isa kag isa. Sa sulod sini nga tion may makalilipay nga butang nga natabo. Nagguwa sa magasin nga Awake! ang isa ka artikulo nga natig-uluhan sing “Help for ­Adult Chil­dren of Al­co­holics.”b

Man, ang akon iloy isa ka alkoholiko. Bisan pa wala ako ginsakit sa pisikal, ang akon mga ginikanan wala gid magpakita sing pisikal nga pagpalangga sa isa kag isa ukon sa akon. Indi ko madumduman nga ginhakos ako sang akon iloy ukon ginsingganan nga ginapalangga niya ako. Gani nagdaku ako nga wala gid makahibalo kon paano maghigugma ukon, sing amo man ka importante, kon paano higugmaon.

Pirme ako ginasugiran sang akon iloy nahanungod sang pagpangerida sang akon amay kag nga indi gid niya sia masaligan. Gani sa banta ko nagdaku ako nga wala nagasalig sa mga lalaki. Bangod sang pagpadaku sa akon, pirme ako nagabatyag nga kubos sa iban, ilabi na sa iban nga mga babayi. Ang pagbasa sadto nga artikulo sa Awake! nagbulig sa akon nga mahangpan ang pagkaimportante sining mga butang. Sa nahaunang tion, nahangpan ko ang gamot nga mga kabangdanan sang akon problema sa kaimon.

Ginpakita ko ang artikulo sang Awake! sa akon bana, si Mark, kag nagbulig man ini sa iya nga mahangpan ako sing labi. Sang ulihi nasarangan namon nga sundon ang laygay sang Biblia sa mga mag-asawa nga nagahunahuna sa pagbulagay. Nag-uliay kami. (1 Corinto 7:​10, 11) Karon ang amon pag-asawahay mas maayo na sangsa nagligad. Ginahimo namon ang kalabanan nga butang sing magkaupod, ilabi na kon nadalahig ang Cristianong mga hilikuton. Si Mark nagapakita sing labi pa nga kahanuklog. Halos kada adlaw ginasingganan niya ako kon daw ano gid ka daku ang iya paghigugma sa akon, kag karon nagapati gid ako sa sini.

Sa tion nga mahibaluan ko nga makigsu­gilanon kami sa asawa anay ni Mark, nagapangayo ako sing kusog kay Jehova sa panga­muyo, nagapangabay sa iya nga buligan niya ako sa paggawi sa isa ka hamtong nga Cristianong paagi. Kag epektibo ini. Bisan ang akon kaakig sa iya nagabuhin. Wala na ako nagahunahuna sing negatibo nga mga butang ukon ginatugutan ang akon imahinasyon nga dimapunggan.

Nagabatyag gihapon ako sing dinagakaigo nga pagpangimon. Ang himpit lamang nga kabuhi sa bag-ong kalibutan sang Dios ang magadula sini sing bug-os sa akon. Sa karon, natun-an ko nga punggan ang pagpangimon, sa baylo nga tugutan ini nga magkontrol sa akon. Huo, diutayan lang maguba sang kaimon ang akon kabuhi, apang salamat kay Jehova kag sa iya organisasyon, nangin mas malipayon ako karon, kag ang akon panglawas nagbalik sa normal. Sa liwat may mabakod ako nga kaangtanan sa akon Dios, si Jehova.​—⁠Gin-amot.

[Mga footnote]