Ang Ila Kapawa Wala Mapalong
SADTONG panahon sang Biblia may matutom nga mga Saksi ni Jehova nga nakaeksperiensia sing mga pag-upang kag mga kabudlayan. Nag-atubang sila sing pagpamatok kag mga kabang-awan. Walay sapayan, wala sila mag-untat bangod sang pagluya sing buot. Sa katunayan, ang ila kapawa wala mapalong.
Halimbawa, si manalagna Jeremias ginsugo nga mangin manalagna sang Dios sa apostata nga pungsod sang Juda. Ginpalanog niya ang paandam nahanungod sa nagapakari nga kalaglagan sang Jerusalem. (Jeremias 1:11-19) Subong resulta, si Jeremias madamong beses nga nag-atubang sa iya mga kasimanwa, nga nagtamod sa iya subong isa ka manughaya sang kapahamakan.
Ang saserdote nga si Pasur, ang pangunang komisyonado sa panimalay sang Dios, nagbunal anay kay Jeremias bangod sang iya ginpanagna kag ginbutang sia sa mga pandug. Bangod sining upang, si Jeremias nagsiling: “Nangin kaladlawan ako sa bug-os nga adlaw; ang tagsatagsa nagauligyat sa akon. Kay sa masunson nga nagapamulong ako, nagasinggit ako. Nagasinggit ako sing kasingki kag kalaglagan. Bangod nga ang pulong ni Jehova nangin kahuluy-an sa akon kag yuyubitan sa bug-os nga adlaw.” Nangluya gid ang manalagna tubtob sa punto nga nakasiling sia: “Indi na gid ako maghinambit sa iya [si Jehova], kag indi ako magpamulong pa sa iya ngalan.”—Jeremias 20:1, 2, 7-9.
Apang, si Jeremias wala magpadaug sa pagluya sing buot. Nagapamulong sang “pulong ni Jehova,” sia nagsiling: “Yara sa akon tagipusuon ang subong sang kalayo nga nagadabdab nga natakpan sa akon mga tulan; kag ginalapyo ako sa pagbatas, kag indi ako makapugong.” (Jeremias 20:8, 9) Ginpahulag sing lakas sa pagpamulong sang mga pahibalo sang Dios, si Jeremias ginsakdag sang balaan nga espiritu kag gintuman ang iya hilikuton.
May madamong rason man si apostol Pablo nga maluyahan sing buot, kon nagpadaug sia sa sini. Nagbatas sia sing kinaugali nga mga kapahamakan, pagkalunod sang barko, paghingabot, kag pagbunal. Dugang pa, ‘ginpaligban niya sa adlaw-adlaw ang mga kabalaka sang tanan nga iglesia.’ (2 Corinto 11:23-28) Huo, dapat atubangon ni Pablo ang mga problema sa adlaw-adlaw, ginapaligban ang bag-ong mga kongregasyon nga ginbuligan niya nga matukod. Dugang pa, indi sia himpit kag dapat batason ang “ungon sa unod,” ayhan ang mapigaw nga panan-aw. (2 Corinto 12:7; Roma 7:15; Galacia 4:15) Ginlibak pa gani sang iban si Pablo, kag nakalab-ot ini sa iya.—2 Corinto 10:10.
Walay sapayan, wala magtugot si Pablo nga madaug sia sang mga kaluyahon. Indi, indi sia isa ka superman. (2 Corinto 11:29, 30) Ano ang padayon nga nagpadabdab sang iya ‘nasulod nga kalayo’? Una, may masinakdagon sia nga mga kaupdanan, ang iban nag-upod pa sa iya sa Roma diin ginbilanggo sia sa balay. (Binuhatan 28:14-16) Ikaduha, gintamod sang apostol ang iya kahimtangan sa timbang nga paagi. Ang mga nagahingabot kag nagapamatok sa iya amo ang sayop, indi si Pablo. Sang nagahingapos na ang iya pagkabuhi sa duta, ginbinagbinag niya ang iya ministeryo sa positibo nga paagi kag nagsiling: “Kutob karon natigana sa akon ang purungpurong sang pagkamatarong, nga ihatag sa akon sang Ginuo, ang hukom nga matarong, subong padya.”—2 Timoteo 4:8.
Labaw sa tanan, si Pablo tayuyon nga nagpalapit kay Jehova nga Dios sa pangamuyo, kag ‘ang Ginuo nagtindog malapit sa iya kag naghatag sing gahom sa iya.’ (2 Timoteo 4:17) “Sa tanan nga butang,” siling ni Pablo, “may kusog ako bangod sa iya nga nagahatag sing gahom sa akon.” (Filipos 4:13) Ang komunikasyon sa Dios kag sa mga masigka-Cristiano, lakip ang positibo nga pagbinagbinag sa iya ministeryo, nagbulig kay Pablo sa pagpadayon sa pag-alagad kay Jehova.
Ang Dios nagbugna kay Pablo sa pagsulat: “Indi kita maglapyo sa paghimo sang kon ano ang maayo, kay sa gintalana nga tion magaani kita kon indi kita maglapyo.” (Galacia 6:7-9) Magaani sing ano? Sing kabuhi nga walay katapusan. Gani, nian, mangin kaangay kamo ni Jeremias, ni Pablo, kag sang madamong iban pa matutom nga mga saksi ni Jehova nga ginsambit sa Kasulatan. Huo, mangin kaangay sa ila, kag indi magpadaug sa pagluya sing buot. Indi pagpalunga ang imo kapawa.—Ipaanggid ang Mateo 5:14-16.
[Mga retrato sa pahina 25]
Wala pagpalunga ni Pablo kag ni Jeremias ang ila kapawa