Si Jehova Nagahatag sing Kusog sa Isa nga Ginalapyo
“Ang mga nagalaum kay Jehova makatigayon liwat sing kusog. Magatimbuok sila nga may mga pakpak subong sang mga agila.”—ISAIAS 40:31.
1, 2. Ano ang ginahatag ni Jehova sa mga nagasalig sa iya, kag ano karon ang binagbinagon naton?
ANG mga agila isa sang labing makusog nga mga pispis sa kalangitan. Makasurip ini paidalom halin sa daku nga kataason nga wala ginakapaykapay ang ila mga pakpak. Upod ang mga pakpak nga mahimo kapin sa duha ka metros ang kalaparon, “ang Hari sang mga Pispis,” ang golden eagle, “isa sang labing makadalayaw sa tanan nga mga agila; nagapaibabaw sa mga pukatod kag mga kapatagan, nagalupadlupad [ini] sa sulod sang mga inoras sa ibabaw sang kabukiran, dayon nagabalulon paibabaw tubtob mangin subong ini sang isa ka maitom nga butang sa kahawaan.”—The Audubon Society Encyclopedia of North American Birds.
2 Ginahunahuna ang mga ikasarang sa paglupad sang agila, si Isaias nagsulat: “[Si Jehova] nagahatag sing kusog sa isa nga ginalapyo; kag sa isa nga wala sing dinamiko nga kusog ginapabugana niya ang kusog. Ang mga bata nga lalaki pagalapyuon kag magluya, kag ang mga pamatan-on nga lalaki mapukan gid, apang ang mga nagalaum kay Jehova makatigayon liwat sing kusog. Magatimbuok sila nga may mga pakpak subong sang mga agila. Magadalagan sila kag indi magluya; magalakat sila kag indi paglapyuon.” (Isaias 40:29-31) Daw ano ka makalipay mahibaluan nga si Jehova nagahatag sa mga nagasalig sa iya sing kusog sa pagpadayon, nga subong bala nagasangkap sa ila sing daw walay kalapyo nga mga pakpak sang nagatimbuok nga agila! Binagbinaga karon, ang pila sang mga aman nga nahimo niya agod hatagan sing kusog ang isa nga ginalapyo.
Ang Gahom sang Pangamuyo
3, 4. (a) Ano ang ginpalig-on ni Jesus nga himuon sang iya mga disipulo? (b) Ano ang mahimo paabuton naton nga himuon ni Jehova sa pagsabat sa aton mga pangamuyo?
3 Ginpalig-on ni Jesus ang iya mga disipulo nga “mangamuyo pirme kag indi mag-untat.” (Lucas 18:1) Mabuligan gid bala kita nga makatigayon liwat sing kusog kag malikawan ang pagkataka kon ang mga pag-ipit sang kabuhi daw indi na masarangan kon ibubo naton ang aton tagipusuon kay Jehova? Huo, apang may pila ka butang nga dapat naton tandaan.
4 Dapat kita mangin realistiko sa kon ano ang ginapaabot naton nga himuon ni Jehova sa pagsabat sa aton mga pangamuyo. Ang isa ka Cristiano nga ginpung-awan sing daku nagsiling sang ulihi: “Subong sa iban pa nga mga balatian, wala nagahimo si Jehova sing mga milagro karon. Apang ginabuligan niya kita sa paglandas kag sa pag-ayo tubtob sa kasangkaron nga masarangan naton sa sining sistema.” Sa pagpaathag kon ngaa nakabulig ang iya mga pangamuyo, nagdugang pa sia: “Makapalapit ako sa balaan nga espiritu ni Jehova sa sulod sang 24 ka oras kada adlaw.” Sa amo, wala kita ginatamingan ni Jehova gikan sa mga pag-ipit sang kabuhi nga makapaluya sa aton, apang ‘nagahatag [sia] sing balaan nga espiritu sa mga nagapangayo sa iya!’ (Lucas 11:13; Salmo 88:1-3) Ina nga espiritu makahimo sa aton nga katupong sang bisan anong pagtilaw ukon pag-ipit nga mahimo maatubang naton. (1 Corinto 10:13) Kon kinahanglanon, makasangkap ini sa aton sing “gahom labaw sa kinaugali” agod magbatas tubtob dulaon sang Ginharian sang Dios ang tanan makapahuol nga mga palaligban sa bag-ong kalibutan nga tuman na kalapit.—2 Corinto 4:7.
5. (a) Agod mangin epektibo ang aton mga pangamuyo, anong duha ka butang ang kinahanglanon? (b) Paano kita mahimo mangamuyo kon nagapakig-away kita batok sa isa ka kaluyahon sang unod? (c) Ano ang ipakita kay Jehova sang aton padayon kag espesipiko nga mga pangamuyo?
5 Apang, agod mangin epektibo ang aton mga pangamuyo, dapat kita magpadayon, kag dapat kita mangin espesipiko. (Roma 12:12) Halimbawa, kon lapyuon ka kon kaisa bangod nagapakig-away ikaw batok sa isa ka kaluyahon sang unod, sa pagsugod sang tagsa ka adlaw, mangamuyo kay Jehova nga buligan ikaw nga malikawan ang pagpadaug sa sinang espesipiko nga kaluyahon sa sulod sang adlaw. Mangamuyo sing amo gihapon sa bug-os nga adlaw kag antes magtulog kada gab-i. Kon mapaslawan ikaw, mangayo sing kapatawaran kay Jehova, apang sugiri man sia kon ano ang nagdul-ong sa pagbalik sang imo kaluyahon kag kon ano ang mahimo mo agod malikawan yadto nga mga kahimtangan sa palaabuton. Ipakita sinang padayon kag espesipiko nga mga pangamuyo sa “Manugpamati sang pangamuyo” ang pagkasinsero sang imo handum nga magdaug sa pagpakig-away.—Salmo 65:2; Lucas 11:5-13.
6. Ngaa mahimo nagakaigo nga mapaabot naton si Jehova nga pamatian ang aton mga pangamuyo bisan pa kon ginabatyag naton nga indi kita takus mangamuyo?
6 Apang, kon kaisa, ang mga ginlapyo mahimo magbatyag nga indi sila takus mangamuyo. Ang isa ka Cristianong babayi nga nagbatyag sing subong sini nagsiling sang ulihi: “Isa ini ka makatalagam gid nga panghunahuna bangod nagakahulugan ini nga ginahukman naton ang aton kaugalingon, apang wala kita sing kinamatarong sa sini.” Sa pagkamatuod, “ang Dios gid amo ang Hukom.” (Salmo 50:6) Ginapasalig kita sang Biblia nga bisan pa ang “aton tagipusuon nagatagudili sa aton . . . , ang Dios daku pa sa aton mga tagipusuon kag nakahibalo sang tanan nga butang.” (1 Juan 3:20) Daw ano ka makalipay mahibaluan nga kon ginahukman naton ang aton kaugalingon subong indi takus mangamuyo, indi subong sini si Jehova sa aton! “Nahibaluan [niya] ang tanan nga butang” nahanungod sa aton, lakip ang mga kahimtangan sa aton kabuhi nga mahimo nagpabatyag sa aton nga indi takus. (Salmo 103:10-14) Ang iya kaluoy kag madalom nga paghangop nagapahulag sa iya nga pamatian ang mga pangamuyo gikan sa “buong kag nadugmok nga tagipusuon.” (Salmo 51:17) Paano niya mapangindian nga pamatian ang aton mga pagpangayo sing bulig kon sia mismo nagapakamalaut sa “bisan sin-o nga nagapabungol sa nagareklamo nga singgit sang imol”?—Hulubaton 21:13.
Ang Kainit sang Paghiliutod
7. (a) Ano ang isa pa ka aman nga nahimo ni Jehova agod buligan kita nga makatigayon liwat sing kusog? (b) Mahimo nga makapalig-on sa aton ang paghibalo sa ano nahanungod sa aton paghiliutod?
7 Ang isa pa ka aman nga ginahimo ni Jehova agod buligan kita nga makatigayon liwat sing kusog amo ang aton Cristianong paghiliutod. Daw ano ka hamili nga pribilehiyo nga mangin bahin sang isa ka bug-os kalibutan nga pamilya sang mga utod nga lalaki kag babayi! (1 Pedro 2:17) Kon ang mga pag-ipit sang kabuhi magpaluya sa aton, ang kainit sang aton paghiliutod makabulig sa aton nga makatigayon liwat sing kusog. Sa anong paagi? Ang paghibalo nga wala kita nagaisahanon sa pag-atubang sa makapahuol nga mga hangkat makapalig-on na mismo. Walay duhaduha nga sa tunga sang aton mga utod nga lalaki kag babayi may yara pila nga nakaatubang sing kaanggid nga mga pag-ipit ukon mga pagtilaw kag nakaeksperiensia sing mga balatyagon nga subong gid sang sa aton. (1 Pedro 5:9) Makapasalig mahibaluan nga ang aton ginaantos indi dikinaandan kag ang aton mga ginabatyag indi tumalagsahon.
8. (a) Anong mga halimbawa ang nagapakita kon paano kita mahimo makasapo sing ginakinahanglan gid nga bulig kag paglipay sa aton paghiliutod? (b) Sa anong paagi personal ikaw nga nabuligan ukon ginlipay sang “isa ka matuod nga kaupod”?
8 Sa kainit sang paghiliutod makasapo kita sing ‘matuod nga mga kaupod’ nga, kon ginasit-an kita, makahatag sing ginakinahanglan gid nga bulig kag paglipay. (Hulubaton 17:17) Sa masami, ang kinahanglan lamang amo ang pila ka malulo nga mga pulong ukon mapasunairon nga mga buhat. Ang isa ka Cristiano nga nagpakig-away batok sa pagbatyag nga walay pulos naghinumdom: “May mga abyan nga nagsugid sa akon sing positibo nga mga butang tuhoy sa akon kaugalingon agod buligan ako nga malandas ang akon negatibo nga mga panghunahuna.” (Hulubaton 15:23) Sa tapos napatay ang iya anak nga pamatan-on nga babayi, nabudlayan sang primero ang isa ka utod nga babayi sa pag-amba sing mga ambahanon sang Ginharian sa mga miting sa kongregasyon, labi na ang mga ambahanon nga nagasambit sing pagkabanhaw. “Isa ka bes,” hinumdom niya, “nakita ako sang isa ka utod nga babayi sa pihak nga raya nga nagahibi. Nagpalapit sia, gin-agbayan ako, kag gin-amba ang nabilin nga bahin sang ambahanon upod sa akon. Nagbatyag ako sing daku gid nga gugma sa kauturan nga lalaki kag babayi kag malipayon gid nga nagkadto kami sa mga miting, kay nahangpan namon nga didto kami makasapo sing bulig, didto sa Kingdom Hall.”
9, 10. (a) Paano kita makaamot sa kainit sang aton paghiliutod? (b) Sin-o labi na ang nagakinahanglan sing mapuslanon nga pagpakig-upod? (c) Ano ang mahimo naton agod buligan ang mga nagakinahanglan sing pagpalig-on?
9 Sa pagkamatuod, ang tagsatagsa sa aton may salabton sa pag-amot sa kainit sang Cristianong paghiliutod. Sa amo, dapat “magdaku” ang aton tagipusuon agod ilakip ang tanan naton nga kauturan nga lalaki kag babayi. (2 Corinto 6:13) Daw ano kasubo batyagon sang mga nagluya nga ang gugma sang paghiliutod nagbugnaw sa ila! Apang, may pila ka Cristiano nga nagreport nga nagabatyag sila sing kasubo kag wala ginasapak. Ang isa ka utod nga babayi nga may bana nga nagapamatok sa kamatuoran nakitluoy: “Sin-o ang wala nagahandum kag nagakinahanglan sing makapalig-on nga mga pagpakig-abyan, pagpabakod, kag mahigugmaon nga pagpakig-upod? Pahanumduma palihug ang amon kauturan nga lalaki kag babayi nga ginakinahanglan namon sila!” Huo, ang mga utod labi na nga may mga kahimtangan sa kabuhi nga nagapaluya sa ila—sila nga may ditumuluo nga mga bana, nagaisahanon nga mga ginikanan, may nagalukmatlukmat nga mga problema sa panglawas, mga tigulang, kag iban pa—nagakinahanglan sing mapuslanon nga pagpakig-upod. Dapat bala pahanumdumon ang pila sa aton sini?
10 Ano ang mahimo naton agod makabulig? Pasangkaron naton ang ginapakitaan naton sing gugma. Kon nagapakita sing pagkamaabiabihon, indi naton pagkalipatan ang mga nagakinahanglan sing pagpalig-on. (Lucas 14:12-14; Hebreo 13:2) Sa baylo haumhaumon nga ang ila kahimtangan nagapugong sa ila sa pagbaton, ngaa indi sila agdahon na lang? Dayon padesisyuna sila. Bisan pa kon indi nila mabaton ang pangagda, walay duhaduha nga mapalig-on sila sa paghibalo nga ginadumdom sila sang iban. Mahimo nga amo gid ini ang ginakinahanglan nila agod makatigayon liwat sing kusog.
11. Sa anong paagi ang mga nagaluya mahimo nga nagakinahanglan sing bulig?
11 Ang mga nagaluya mahimo nga nagakinahanglan sing bulig sa iban pa nga mga paagi. Ang isa ka nagaisahanon nga iloy, halimbawa, mahimo nga nagakinahanglan sing isa ka hamtong nga utod nga lalaki nga magpakita sing interes sa iya wala sing amay nga bata nga lalaki. (Santiago 1:27) Ang isa ka utod nga lalaki ukon babayi nga may mabug-at nga problema sa panglawas mahimo nga nagakinahanglan sing bulig sa pagpamalaklon ukon sa mga buluhaton sa sulod sang balay. Ang isa ka tigulang mahimo nga nagakalangkag sing kaupod ukon nagakinahanglan sing bulig sa pagguwa sa latagon. Kon ini nga bulig padayon nga ginakinahanglan, isa ini ka matuod nga ‘pagtilaw sa pagkabunayag sang aton gugma.’ (2 Corinto 8:8) Sa baylo nga magpalayo sa mga imol bangod sang tion kag panikasog nga nadalahig, kabay nga makapasar kita sa pagtilaw sa Cristianong gugma paagi sa pagkamahinangpanon kag pagkamahinuklugon sa mga pagkinahanglan sang iban.
Ang Gahom sang Pulong sang Dios
12. Paano ang Pulong sang Dios nagabulig sa aton nga makatigayon liwat sing kusog?
12 Ang isa ka tawo nga nagauntat sa pagkaon madulaan sa indi madugay sang iya kusog, ukon gahom. Sing nagakahisuno, ang isa ka paagi nga si Jehova nagahatag sa aton sing kusog sa pagpadayon amo ang pagpat-od nga ginapakaon kita sing maayo sa espirituwal. (Isaias 65:13, 14) Anong espirituwal nga pagkaon ang iya naaman? Labaw sa tanan, amo ang iya Pulong, ang Biblia. (Mateo 4:4; ipaanggid ang Hebreo 4:12.) Paano ini makabulig sa aton sa pagtigayon liwat sing kusog? Kon ang mga pag-ipit kag mga problema nga aton ginaatubang magsugod sa pag-ubos sang aton kusog, makakuha kita sing kusog gikan sa pagbasa nahanungod sa mga balatyagon kag pagpanikasog sang matutom nga mga lalaki kag mga babayi sang panahon sang Biblia. Bisan pa talalupangdon nga mga huwaran sang integridad, mga tawo sila nga “may mga balatyagon kaangay naton.” (Santiago 5:17; Binuhatan 14:15) Nag-atubang sila sing mga pagtilaw kag mga pag-ipit kaanggid sa aton. Binagbinaga ang pila ka halimbawa.
13. Anong Makasulatanhon nga mga halimbawa ang nagapakita nga ang matutom nga mga lalaki kag mga babayi sang panahon sang Biblia may mga balatyagon kag mga eksperiensia nga kaanggid gid sa aton?
13 Ginkasubo sing daku sang patriarka nga si Abraham ang kamatayon sang iya asawa bisan pa may pagtuo sia sa pagkabanhaw. (Genesis 23:2; ipaanggid ang Hebreo 11:8-10, 17-19.) Ang mahinulsulon nga si David nagbatyag nga ang iya mga sala naghimo sa iya nga ditakus sa pag-alagad kay Jehova. (Salmo 51:11) Si Moises nagbatyag nga disangkol. (Exodo 4:10) Si Epafrodito ginpung-awan sang mahibaluan niya nga ang isa ka malala nga balatian naglatid sang iya mahimo sa “hilikuton sang Ginuo.” (Filipos 2:25-30) Si Pablo nakig-away batok sa makasasala nga unod. (Roma 7:21-25) Sanday Eudias kag Sintique, duha ka hinaplas nga utod nga babayi sa kongregasyon sa Filipos, mahimo gid nga wala magsahuay. (Filipos 1:1; 4:2, 3) Daw ano ka makapalig-on mahibaluan nga ining mga matutom may mga balatyagon kag mga eksperiensia kaangay naton, apang wala sila mag-untat! Kag wala man sila pagbiyai ni Jehova.
14. (a) Anong instrumento ang ginagamit ni Jehova sa pagbulig sa aton sa pagkuha sing kusog gikan sa iya Pulong? (b) Ngaa ang Lalantawan kag Magmata! nga mga magasin nagadala sing mga artikulo tuhoy sa mga hulusayon sa katilingban, pamilya, kag emosyon?
14 Agod buligan kita sa pagkuha sing kusog gikan sa iya Pulong, ginagamit ni Jehova ang matutom kag mainandamon nga ulipon nga klase sa paghatag sa aton sing dalayon nga “pagkaon sa nagakaigo nga tion.” (Mateo 24:45) Madugay na ginagamit sang matutom nga ulipon ang Lalantawan kag Magmata! nga mga magasin sa pagpangapin sa kamatuoran sang Biblia kag sa pagbantala sing Ginharian sang Dios subong amo lamang ang paglaum sang tawo. Labi na sang nagligad nga pila ka dekada, ining mga balasahon nagdala sing sibu sa tion Makasulatanhon nga mga artikulo tuhoy sa mga hangkat sa katilingban, sa pamilya, kag sa emosyon nga ginasumalang bisan gani sang pila sa katawhan sang Dios. Para sa anong katuyuan ginbalhag ining impormasyon? Sa pagkamatuod agod buligan ang mga nagaeksperiensia sining mga hangkat sa pagkuha sing kusog kag pagpalig-on gikan sa Pulong sang Dios. Apang ining mga artikulo nagabulig sa aton tanan nga mahangpan sing maathag pa kon ano ang mahimo ginaantos sang pila sang aton kauturan nga lalaki kag babayi. Sa amo ginasangkapan kita sing maayo pa sa pagpamati sa mga pulong ni Pablo: “Lugpayi ang ginapung-awan nga mga kalag, sakdaga ang mga maluya, mangin mainantuson sa tanan.”—1 Tesalonica 5:14.
Mga Gulang nga “Palalipdan sa Hangin”
15. Ano ang gintagna ni Isaias nahanungod sa mga nagaalagad subong mga gulang, kag anong salabton ang ginapatuman sini sa ila?
15 May gin-aman pa si Jehova agod buligan kita kon ginalapyo kita—ang mga gulang sa kongregasyon. Tuhoy sa ila si manalagna Isaias nagsulat: “Ang tagsatagsa dapat mangin subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.” (Isaias 32:1, 2) Ang mga gulang, kon amo, may yara salabton nga tumanon ang gintagna ni Jehova tuhoy sa ila. “Dapat” sila mangin tuburan sang paglipay kag kaumpawan sa iban kag mangin handa nga “magpadayon sa pagdala sang mga lulan [ukon, “magamo nga mga butang”; sing literal, “mabug-at nga mga butang”] sang isa kag isa.” (Galacia 6:2, footnote) Paano nila mahimo ini?
16. Ano ang mahimo sang mga gulang agod buligan ang isa nga nagabatyag nga indi takus mangamuyo?
16 Subong nasambit na, kon kaisa mahimo batyagon sang isa ka tawo nga nagluya nga indi sia takus mangamuyo. Ano ang mahimo sang mga gulang? Makapangamuyo sila upod kag para sa sina nga tawo. (Santiago 5:14) Ang pagpangabay lamang kay Jehova, sa palamatin-an sang isa nga nagluya, nga buligan sia sa paghangop nga ginahigugma gid sia ni Jehova kag sang iban makalipay gid. Ang pagpamati sa hugot kag tinagipusuon nga pangamuyo sang isa ka gulang mahimo nga makabulig sa pagpabakod sang pagsalig sang isa ka ginasit-an nga tawo. Mahimo mabuligan sia sa pagpangatarungan nga kon ang mga gulang gani nagasalig nga sabton ni Jehova ang mga pangamuyo para sa iya, nian makasalig man sia sa sini.
17. Ngaa ang mga gulang dapat mangin mahinuklugon nga mga manugpalamati?
17 “Ang tagsa ka tawo magmadagmit sa pagpamati, magmahinay sa paghambal,” siling sang Santiago 1:19. Agod mabuligan ang mga nagaluya nga makatigayon liwat sing kusog, dapat man mangin mahinuklugon nga mga manugpalamati ang mga gulang. Sa iban nga mga kaso ang mga katapo sang kongregasyon mahimo nga nagapakig-away batok sa mga problema ukon mga pag-ipit nga indi malubad sa sining sistema sang mga butang. Ang mahimo ginakinahanglan nila, kon amo, indi ang solusyon agod “malubad” ang ila problema kundi ang makapakighambal lamang sa isa ka maayong manugpamati—isa ka tawo nga indi magasugid sa ila kon ano ang dapat nila batyagon kundi magapamati nga wala nagahukom.—Lucas 6:37; Roma 14:13.
18, 19. (a) Paano ang kadagmit sa pagpamati makabulig sa isa ka gulang nga malikawan ang pagpabug-at pa sa lulan sang isa nga nagaluya? (b) Ano ang resulta kon ang mga gulang nagapakita sing “kahanuklog”?
18 Mga gulang, ang inyo kadagmit sa pagpamati makabulig sa inyo nga malikawan ang dihungod nga pagpabug-at pa sa lulan nga ginadala sang isa nga nagaluya. Halimbawa, kon ang isa ka utod nga lalaki ukon babayi wala makatambong sa pila ka miting ukon naghinay sa pagministeryo sa latagon, nagakinahanglan gid bala sia sing laygay nahanungod sa paghimo sing kapin pa sa ministeryo ukon nahanungod sa pagkaregular sing kapin pa sa mga miting? Mahimo. Apang nahibaluan mo bala ang bug-os nga kahimtangan? May yara bala nagalala nga mga problema sa panglawas? Nagbag-o bala kasan-o lang ang mga salabton sa pamilya? May yara bala iban pa nga mga kahimtangan ukon mga pag-ipit nga nagapaluya sa iya? Dumduma, mahimo nga ini nga tawo ginatublag na sang iya konsiensia nga indi sia makahimo sing kapin pa.
19 Paano mo, nian, mabuligan ang utod nga lalaki ukon babayi? Antes ka maghimo sing mga konklusion kag magtanyag sing laygay, mamati! (Hulubaton 18:13) Paagi sa mahinantupon nga mga pamangkot ‘sag-uba’ ang mga balatyagon sa tagipusuon sina nga tawo. (Hulubaton 20:5) Indi pagsikwaya ining mga balatyagon—kilalaha ini. Mahimo nga kinahanglan sang isa nga nagaluya nga pasaligon liwat nga si Jehova nagaulikid sa aton kag nakahangop nga kon kaisa ang aton mga kahimtangan mahimo nga maglatid sa aton. (1 Pedro 5:7) Kon ang mga gulang nagapakita sining “kahanuklog,” ang mga nagaluya ‘makasapo sing kaumpawan para sa ila mga kalag.’ (1 Pedro 3:8; Mateo 11:28-30) Kon makasapo sila sini nga kaumpawan, indi na nila kinahanglan nga sugiran pa sa paghimo sing dugang pa; ang ila tagipusuon magapahulag sa ila sa paghimo sing tanan nga masarangan nila sing makatarunganon sa pag-alagad kay Jehova.—Ipaanggid ang 2 Corinto 8:12; 9:7.
20. Bangod tuman na kalapit ang katapusan sining malaut nga kaliwatan, dapat kita mangin determinado sa paghimo sing ano?
20 Sa pagkamatuod nagakabuhi kita sa labing masako nga tion sa bug-os nga maragtas sang tawo. Ang mga pag-ipit sang pagkabuhi sa kalibutan ni Satanas nagadugang pa samtang nagahilapit kita sa tion sang katapusan. Dumduma, kaangay sang isa ka nagapangayam nga leon, ginahulat kita sang Yawa nga magluya kag mangampo agod mahimuslan niya kita subong mahapos nga tulukbon. Makapasalamat gid kita nga si Jehova nagahatag sing kusog sa isa nga ginalapyo! Kabay nga himuslan naton sing bug-os ang mga aman nga ginahimo niya sa paghatag sa aton sing kusog sa pagpadayon, nga subong bala ginasangkapan niya kita sing makusog nga mga pakpak sang isa ka nagatimbuok nga agila. Bangod tuman na kalapit ang katapusan sining malaut nga kaliwatan, indi karon tion nga magdulog sa pagdalagan sa aton palumba para sa padya—kabuhi nga walay katapusan.—Hebreo 12:1.
Ano ang Imo Sabat?
◻ Ano ang mahimo paabuton naton nga himuon ni Jehova sa pagsabat sa aton mga pangamuyo?
◻ Sa anong mga paagi mahimo makakuha kita sing kusog gikan sa aton Cristianong paghiliutod?
◻ Paano ang Pulong sang Dios nagabulig sa aton nga makatigayon liwat sing kusog?
◻ Ano ang mahimo sang mga gulang agod mabuligan ang mga nagaluya nga makatigayon liwat sing kusog?
[Retrato sa pahina 17]
Kon nagapakita sing pagkamaabiabihon, indi naton pagkalipatan ang mga nagakinahanglan sing pagpalig-on
[Retrato sa pahina 18]
Ang mga gulang sarang makapangabay kay Jehova nga buligan ang mga nagaluya sa paghangop nga ginahigugma gid sila