Mahinatagon Ka Bala?

NAPANILAGAN mo bala nga may kapin pa sa isa ka motibo nga nagatiklod sa mga tawo sa paghatag? Ang regalo mahimo nga isa ka pagpakita sing gugma, sing kaalwan, sing pagpasalamat. Apang wala mo bala matalupangdan nga ang regalo mahimo man nga bangod sa handum sang tawo nga pagatamdon sia nga may kahamuot? Ukon mahimo ini ginhatag bangod napilitan lamang ukon bangod ang nagahatag may ginahulat nga balus.

Ang regalo mahimo nga isa ka pinutos nga ginhigtan sing matahom nga laso. Apang indi bala nga ang isa ka matahom nga regalo mahimo man nga mangin isa ka pungpong nga bulak, isa ka putahe nga pagkaon, ukon isa ka malulo nga buhat? Sa katunayan, ang mga regalo nga ginapabaloran gid sing daku masunson nga nagadalahig sang paghatag sa kaugalingon.

May Isa Bala nga ang Iya Kahamuot Ginatinguhaan Mo?

Ang paghatag sing regalo sa isa nga luyag mo pahamut-an kinaandan na. Sa pila ka kadutaan ang pamatan-on nga nagatinguha nga matigayon ang kahamuot sang iya ginapangaluyagan nga mangin nobya mahimo nga magadala sing bulak sa iya. Apang ang maalamon nga babayi wala lamang nagatan-aw sa regalo. Ginabinagbinag niya kon bala ang tinutuyo sa likod sang regalo sang pamatan-on mahigugmaon nga magahimo man sa iya nga isa ka maayong bana. Ina nga regalo, kon nagapabanaag sing diosnon nga espiritu, mahimo magdul-ong sa daku nga kalipay lunsay sa nagahatag kag sa nagabaton.

Ang Biblia nagasugid sa aton sang isa ka okasyon nga si Abigail, nga asawa ni Nabal, dalidali nga naghanda sing maalwan nga dulot para kay David, nga ginakilala niya subong ang isa nga ginpili sang Dios nga mangin palaabuton nga hari sang Israel. Nagtinguha man sia nga matigayon ang kahamuot. Ginsikway sang iya bana si David kag ginyaguta ang mga tinawo ni David. Ginapangunahan ang isa ka hubon sang mga 400 ka armado nga kalalakin-an, si David naghanda sa paglaglag kay Nabal kag sa iya panimalay. Si Abigail nagpasilabot, dalidali nga nagpadala kay David sing maalwan nga dulot nga mga suplay sang pagkaon para sa iya mga tinawo. Nagsunod man sia, kag sa tapos mapainubuson nga nakapangayo sing pasaylo tungod sa ginhimo sang iya bana, naghatag sia sing pamatuod sang daku nga paghantop sang nangatarungan sia kay David.

Ang iya tinutuyo dungganon, kag ang resulta maayo. Ginbaton ni David ang iya dulot kag ginsilingan sia: “Taklad ka sa paghidait sa imo balay. Tan-awa, ginpamatian ko ang imo tingog kag ginbaton ang imo kaugalingon.” Sang ulihi, sang napatay si Nabal, ginpangabay pa ni David nga pangasaw-on si Abigail, kag malipayon niya ini nga ginbaton.​—⁠1 Samuel 25:​13-42.

Apang, sa pila ka hitabo, ang kahamuot nga mahimo ginatinguhaan sang isa nga matigayon mahimo nga nagalakip sang pagpakita sing pagkamaynadampigan, sang pagpatiku pa gani sang katarungan. Sa sina nga hitabo, ang dulot isa ka paghamham. Nagahunahuna ang nagahatag nga makabenepisyo sia, apang ginakuhaan niya ang iya kaugalingon sing kalinong sa hunahuna. Yara pirme ang katalagman nga mahibaluan ini sang iban, nga magapanabat sia sa ginhimo niya. Bisan pa nga ang ginhandum nga kahamuot ginahatag, mahimo masapwan sang isa nga nagtinguha nga matigayon ini nga may reputasyon na sia karon sang isa nga ang iya mga motibo ginapangduhaduhaan. Nagapakita sing diosnon nga kaalam, ang Biblia nagapaandam batok sa subong sina nga mga regalo.​—⁠Deuteronomio 16:19; Manugwali 7:⁠7.

Ang Regalo Naghalin Bala sa Kinabubut-on nga Tagipusuon?

Wala sing pangduhaduha sa sini​—⁠ang paghatag sa isa nga ginahigugma mo bangod luyag mo ini himuon nagadala sing daku pa nga kalipay sangsa paghatag bangod ginpilit ka lang sang iban nga dapat ka maghatag.

Nahanungod sa pagtipon sing mga bulig para sa mga masigka-Cristiano nga nagakinahanglan sa materyal, si apostol Pablo naghatag sing pila ka maayong prinsipio sang diosnon nga paghatag. “Kon ang pagkahanda yara,” sulat niya, “ginakahamut-an ini suno sa yara sa tawo, indi suno sa wala sa iya.” Sia nagdugang: “Maghimo ang tagsa ka tawo suno sa gintuyo niya sa iya tagipusuon, indi nga nagaduhaduha ukon sa pagpilit, kay ang Dios nagahigugma sa manughatag nga malipayon.” (2 Corinto 8:12; 9:7) Busa, daku ang nasandig sa imo. Sa baylo nga mangutang bangod sang pagpatuyang sa paghatag sing regalo, nagagasto ka bala suno sa imo badyet? Sa baylo nga magbatyag nga napilitan lamang sa paghatag bangod sang sosyal ukon komersial nga pag-ipit, ginahimo mo bala kon ano ang ginpamat-od mo sa imo tagipusuon? Tuhoy sa unang mga Cristiano nga nagpadapat sinang diosnon nga mga prinsipio, si Pablo nagsulat: “Sa kaugalingon nila nga luyag padayon sila nga nagapangabay sa amon nga may dakung pakiluoy para sa pribilehiyo sang malulo nga paghatag kag para sa pagpakig-ambit sa ministeryo nga gintalana para sa mga balaan.”​—⁠2 Corinto 8:⁠4.

Kabaliskaran sa sina, ang Royal Bank Letter sang Nobiembre/Disiembre 1994 nagsiling nahanungod sa mga semana padulong sa Paskuwa: “Ang panag-on mahimo tan-awon subong isa ka kahimtangan sang artipisyal nga kakunyag nga ginpukaw sang mga interes sa negosyo sa pagbuyok sa mga konsumidor sa pagbakal sang mga butang nga indi nila kuntani baklon.” Kon nagapamalaklon sing utang, ang ano man nga kaayawan sa pagregalo mahimo nga matabunan sa gilayon kon ang mga utang dapat na bayaran.

Ang Imo Pangunang Ginakabalak-an​—⁠Ang Okasyon? Ukon ang Pagpakita sing Gugma?

Nasapwan mo bala nga nagaregalo ka lamang bangod ginakinahanglan ini sang mga okasyon? Kon amo, mahimo nga ginawasi mo ang daku nga kalipay nga ginahatag sang kinaugali nga paghatag.

Madamong tawo ang wala malipay sa mga resulta sang pagregalo sa espesipikong mga adlaw. Ginbaton sang isa ka iloy nga isa man ka manunulat nga nagapangibabaw ang kakagod sa iya mga anak samtang nagahilapit ang adlaw nga ginapaabot ang mga regalo. Ginbaton niya nga ang iya kaugalingon nga pagkalipay sa isa ka matahom nga regalo nabuhinan bangod lain nga butang ang ginlauman niya. Madamong report ang nagasiling nga ang mga selebrasyon nga may mga kinasadya kag bayluhanay sing mga regalo mga tion man nga may dakung emosyonal nga kapung-aw kag pag-abuso sa alkohol.

Bangod sang napanilagan nga ang pagpadaku sang paghatag sing regalo sa tion sang selebrasyon may malain kon kaisa nga epekto sa mga kabataan, ang isa ka propesor sang sikolohiya nga ginbalikwat sa The New York Times nagarekomendar: “Binagbinaga ang paghatag sing mga regalo sa iban nga mga adlaw subong isa ka paagi sang pagbuhin sa kahuol.” Sa banta mo may maayo bala ina nga epekto?

Si Tammy, isa ka 12-anyos sa isa ka panimalay nga wala nagasaulog sang Paskuwa kag mga kaadlawan, nagsulat: “Mas makalilipay makabaton sing regalo sa tion nga wala gid nimo ini ginapaabot.” Nagsiling sia nga sa baylo sang paghatag sing mga dulot sing makaisa ukon makaduha lamang sa isa ka tuig, ang iya mga ginikanan nagaregalo sa iya kag sa iya utod nga lalaki sa bug-os nga tuig. Apang may butang pa nga mas importante sa iya sangsa sadtong mga regalo. Subong sang ginsiling niya, “May malipayon gid ako katama nga pamilya.”

Ang libro nga Secrets of Strong Families nagasiling sing prangka: “Ang kalabanan sa aton nagahinguyang sang tion kag kuwarta sing pila ka beses sa isa ka tuig sa pagpili sing labing nagakaigo nga mga regalo para sa mga kaadlawan, mga anibersaryo, ukon mga selebrasyon para sa mga tawo nga ginahigugma naton. Ang labing maayo gid nga regalo sa tanan wala nagabili sing kuwarta. Kag indi na kinahanglan nga putson mo ini. Kon magpati ka, kaangay sang kalabanan nga mga tawo, nga ang imo kabuhi amo ang imo labing malahalon nga pagkabutang, nian ang pila sang imo tion amo ang labing hamili nga dulot nga mahatag mo. Ginahatag naton inang hamili nga regalo sa kadamuon sang aton tion nga ginahatag naton sa aton mga hinigugma.”

Sarang mo mapalab-ot ina nga paghatag luwas sa imo kaugalingon nga pamilya. Ang kinaugali nga paghatag agod paayawan ang maathag nga kinahanglanon sang iban makahatag sing pinasahi nga kaayawan. Si Jesucristo naglaygay sa aton nga ipakita inang mahigugmaon nga pag-ulikid sa imol, piang, kag bulag, nga nagadugang: “Mangin malipayon ikaw, bangod nga wala sila sing ibalus sa imo.”​—⁠Lucas 14:​12-14.

Ang Rockland Journal-News (U.S.A.) nagreport sining karon lang sang halimbawa sina nga sahi sang paghatag. Sang ang balay sang isa ka tigulang kag bulag nga babayi natumba, ginpatindugan sia sang iya mga abyan sang isa ka bag-ong balay. Nag-amot ang pila ka lokal nga kompanya, kag naghatag sing kuwarta ang isa ka ahensia sang lokal nga panguluhan. “Apang, ang labing importante,” siling sang pamantalaan, “ang 150 ukon kapin ka tawo, ang kalabanan sa ila nagatambong sa kongregasyon sang mga Saksi ni Jehova sa Hav­er­straw, nagdonar sing tion sa pagpatindog sang balay.”

Ang artikulo nagpadayon: “Sa duog nga ginpatindugan may mga tumpok sang materyales sa tupad sang mga lamesa nga buta sang pagkaon. Sa duha ka adlaw ginpatindog sang mga manugpangabudlay ang may duha ka apartment nga balay, tatlo ka panalgan kataas. . . . Ang mga Saksi ni Jehova nakilal-an bangod sang ila ikasarang sa pagpatindog sing madasig sang mga tinukod. . . . Apang, ina nga kadasigon tuhay sa pagkapermanente sang ila misyon: ang paghatag sing kapag-on sa isa ka hilikuton nga may gugma. Mahimo nga indi makita ni Ms. Blake­ly ang iya bag-ong puluy-an, apang mahikap ini sang iya mga kamot, kag mabatyagan sing tudok sang iya tagipusuon ining dimaiyaiyahon nga buhat.”

Ang Bug-os Tuig nga Espiritu sang Pagkaalwan

Yadtong tunay nga maalwan sing espiritu wala nagahulat sang pinasahi nga mga adlaw. Ang ila kabuhi wala lamang nasentro sa ila kaugalingon. Kon makabaton sila sing butang nga maayo, nagakalipay sila nga ipaambit ini sa iban. Wala ini nagakahulugan nga mga panatiko sila nga manughatag sing regalo. Wala ini nagakahulugan nga nagahatag sila tubtob sa kasangkaron nga ginadingutan ang ila pamilya. Wala ini nagakahulugan nga nagahatag sila nga wala ginahunahuna ang epekto sa nagabaton. Apang, mga tawo sila nga “nagabuhat sing paghatag,” subong sang gintudlo ni Jesus nga himuon sang iya mga disipulo.​—⁠Lucas 6:⁠38.

Alisto sila sa kahimtangan sang mga abyan kag mga kaingod nga tigulang, masakiton, ukon nagakinahanglan sing pagpalig-on. Ayhan ang ila “regalo” amo ang pagkadto kag pagbakal sa tiyangge ukon pagbulig sa hilikuton sa balay. Ayhan pagbis-ak ini sang kahoy ukon pagpala sang yelo. Ayhan isa ini ka yahong sang linuto nga pagkaon ukon isa ka oras sang pagduaw kag pagbasa sing magkaupod. Ang ila kaugalingon nga pagkabuhi mahimo nga masako apang indi tuman kasako sa pagbulig. Natun-an nila gikan sa eksperiensia nga tunay nga “mas daku ang kalipay sa paghatag sangsa pagbaton.”​—⁠Binuhatan 20:⁠35.

Sa pagkamatuod, ang pinakadakung Manughatag sa tanan, amo ang aton Manunuga, si Jehova nga Dios. Sia gid “nagahatag sa tanan nga tawo sing kabuhi kag ginhawa kag sang tanan nga butang.” (Binuhatan 17:25) Sa Biblia, nagahatag man sia sa aton sing paghangop tuhoy sa ka­tuyuan niya nga dulaon ang kalautan, balatian, kag kamatayon, kag himuon ining duta nga isa ka paraiso. (Salmo 37:​10, 11; Bugna 21:​4, 5) Sang mahibaluan ini, wala gintago sadtong maalwan sing espiritu inang maayong balita sa ila ka­ugalingon. Ang isa sang ila labing daku nga kalipayan amo ang ipaambit ini sa iban. May diosnon gid sila nga espiritu sang pagkamahinatagon. Amo bala sina ang espiritu nga ginapalambo mo?

[Mga retrato sa pahina 7]

Ang pila sang labing hamili nga mga dulot wala nagabili sing kuwarta