Edukasyon—Gamita Ini sa Pagdayaw kay Jehova
“Sia nga nagapamulong gikan sa iya kaugalingon nagapangita sang iya kaugalingon nga himaya; apang sia nga nagapangita sang himaya sang nagpadala sa iya, ining isa matuod.”—JUAN 7:18.
1. San-o kag paano nagsugod ang proseso sang edukasyon?
ANG edukasyon madugay na nga nagsugod. Ang proseso sang edukasyon nagsugod sang gintuga sang Dakung Edukador kag Instruktor, si Jehova nga Dios, ang iya panganay nga Anak. (Isaias 30:20; Colosas 1:15) Yari ang Isa nga makatuon sing direkta gikan sa Dakung Edukador! Sa sulod sang dimaisip nga mga milenio nga pagpakig-upod sing suod sa Amay, yadtong Anak—nga nakilala subong nga si Jesucristo—nakabaton sing hamili nga edukasyon nahanungod sa mga kinaiya, mga binuhatan, kag mga katuyuan ni Jehova nga Dios. Sang ulihi, subong isa ka tawo sa duta, si Jesus nakasiling: “Wala ako nagahimo sing bisan ano sa akon kaugalingon nga pagbulut-an; kundi suno sa gintudlo sa akon sang Amay ginpamulong ko ining mga butang.”—Juan 8:28.
2-4. (a) Suno sa Juan kapitulo 7, ano ang mga kahimtangan nga nagapalibot sa pagtambong ni Jesus sa Piesta sang mga Kayangkayang sang 32 C.E.? (b) Ngaa naligban ang mga Judiyo sa ikasarang ni Jesus sa pagtudlo?
2 Paano gingamit ni Jesus ang nabaton niya nga edukasyon? Sa sulod sang iya tatlo ka tuig kag tunga nga ministeryo sa duta, walay kakapoy nga ginsugid niya sa iban kon ano ang iya natun-an. Apang, ginhimo niya ini agod tumanon ang isa ka pangunang katuyuan. Kag ano ina? Usisaon naton ang pinamulong ni Jesus sa Juan kapitulo 7, diin ginpaathag niya ang ginhalinan kag katuyuan sang iya panudlo.
3 Binagbinaga ang kahimtangan. Tigragas sadto sang 32 C.E., halos tatlo ka tuig pagkatapos ginbawtismuhan si Jesus. Ang mga Judiyo nagtipon sa Jerusalem para sa Piesta sang mga Kayangkayang. Madamong hambalanon nahanungod kay Jesus ang naglagaw sa sulod sang nahaunang pila ka adlaw sang piesta. Sang nagahinunga na ang piesta, si Jesus nagkadto sa templo kag nagsugod sa pagpanudlo. (Juan 7:2, 10-14) Kaangay sang pirme niya nga ginahimo, ginpamatud-an niya ang iya kaugalingon subong isa ka dakung Manunudlo.—Mateo 13:54; Lucas 4:22.
4 Ang bersikulo 15 sang Juan kapitulo 7 nagasiling: “Gani ang mga Judiyo natingala, nga nagasiling: ‘Paano bala ining tawo may ihibalo sa mga letra, samtang wala sia makatuon sa mga eskwelahan?’ ” Nahangpan bala ninyo kon ngaa ginligban sila? Si Jesus wala makaeskwela sa bisan anong rabinikong mga eskwelahan, gani wala sia sing tinun-an—ukon suno sa opinyon nila! Apang, makita kag mabasa dayon ni Jesus ang mga bahin sa Sagradong mga Sinulatan. (Lucas 4:16-21) Aba, gintudluan pa gani sila sining panday gikan sa Galilea sang Kasuguan ni Moises! (Juan 7:19-23) Paano ini nangin posible?
5, 6. (a) Paano ginpaathag ni Jesus ang ginhalinan sang iya panudlo? (b) Sa anong paagi gingamit ni Jesus ang iya edukasyon?
5 Subong sang mabasa naton sa mga Juan 7 bersikulo 16 kag 17, si Jesus nagpaathag: “Ang akon ginatudlo indi akon, kundi iya sang nagpadala sa akon. Kon ang bisan sin-o buot maghimo sang Iya kabubut-on, makahibalo sia may kaangtanan sa pagpanudlo kon bala gikan ini sa Dios ukon nagpamulong ako sa akon kaugalingon.” Luyag nila mahibal-an kon sin-o ang nagtudlo kay Jesus, kag ginsugiran niya sila sing maathag nga ang iya tinun-an naghalin sa Dios!—Juan 12:49; 14:10.
6 Paano gingamit ni Jesus ang iya tinun-an? Subong sang ginarekord sa Juan 7:18, si Jesus nagsiling: “Sia nga nagapamulong gikan sa iya kaugalingon nagapangita sang iya kaugalingon nga himaya; apang sia nga nagapangita sang himaya niya nga nagpadala sa iya, ining isa matuod, kag wala sing dimatarong sa iya.” Nagakaigo gid nga gingamit ni Jesus ang iya tinun-an agod himayaon si Jehova, “ang Isa nga himpit sa ihibalo”!—Job 37:16.
7, 8. (a) Paano dapat gamiton ang edukasyon? (b) Ano ang apat ka sadsaran nga mga tulumuron sang isa ka timbang nga edukasyon?
7 Sa amo nakatuon kita sing hamili nga leksion gikan kay Jesus—ang edukasyon dapat gamiton, indi agod himayaon ang aton kaugalingon, kundi agod hatagan sing kadayawan si Jehova. Isa gid ini ka maayong paagi sa paggamit sang edukasyon. Apang, paano mo magamit ang edukasyon sa paghatag sing kadayawan kay Jehova?
8 Ang pagtudlo nagakahulugan sang “paghanas paagi sa pormal nga pagtuon kag ginabantayan nga pamatasan ilabi na sa isa ka ikasarang, palangitan-an, ukon propesyon.” Binagbinagon naton karon ang apat ka sadsaran nga mga tulumuron sang balanse nga edukasyon kag kon paano ang kada isa sini sarang magamit sa pagdayaw kay Jehova. Ang balanse nga edukasyon dapat magbulig sa aton (1) sa pagbasa sing maayo, (2) sa pagsulat sing maathag, (3) sa pagtubo sa hunahuna kag moral, kag (4) sa pagtigayon sing praktikal nga paghanas nga kinahanglanon sa adlaw-adlaw nga pagkabuhi.
Pagtuon sa Pagbasa sing Maayo
9. Ngaa importante nga mangin maayo magbasa?
9 Ang una nga ginlista amo ang pagtuon sa pagbasa sing maayo. Ngaa importante katama nga mangin isa nga maayo magbasa? Ang The World Book Encyclopedia nagapaathag: “Ang pagbasa . . . kinahanglanon sa pagtuon kag isa sang labing importante nga mga ikasarang sa adlaw-adlaw nga pagkabuhi. . . . Ang sampaton nga mga bumalasa nagaamot sa pagtuga sing isa ka mabuganaon, mapatubason nga katilingban. Sa amo man nga tion, nagaagom sila sing mas makalilipay, mas makaalayaw nga pagkabuhi.”
10. Paano ang pagbasa sa Pulong sang Dios nagabulig sa aton sa pagtigayon sing mas makalilipay, mas makalaayaw nga pagkabuhi?
10 Kon ang pagbasa kinaandan na nga nagabulig sa aton sa pag-agom sing “mas makalilipay, mas makaalayaw nga pagkabuhi,” nian ang pagbasa sa Pulong sang Dios mangin mas mapuslanon gid! Ang subong sina nga pagbasa nagabukas sang aton hunahuna kag tagipusuon sa mga panghunahuna kag mga katuyuan ni Jehova, kag ang maathag nga paghangop sa sini importante gid katama sa aton kabuhi. Dugang pa, “ang pulong sang Dios buhi kag gamhanan,” siling sang Hebreo 4:12. Samtang ginabasa naton ang Pulong sang Dios kag ginapamalandungan ini, labi kita nga nagasuod sa Awtor sini, kag ginapahulag kita sa paghimo sing mga pagbalhin sa aton kabuhi agod mangin mas kalahamut-an sa iya. (Galacia 5:22, 23; Efeso 4:22-24) Nagatulod man ini sa aton nga ipaambit sa iban ang hamiling mga kamatuoran nga nabasa naton. Ini tanan nagahatag sing kadayawan sa Dakung Edukador, si Jehova nga Dios. Pat-od gid nga isa ini ka maayong paagi sa paggamit sang aton ikasarang sa pagbasa!
11. Ano ang dapat nga ilakip sa isa ka timbang nga programa sang personal nga pagtuon?
11 Bata man ukon tigulang, dapat kita magtuon sa pagbasa sing maayo, kay ang pagbasa importante nga bahin sang aton Cristianong kabuhi. Luwas sa regular nga pagbasa sang Pulong sang Dios, ang timbang nga programa sang personal nga pagtuon dapat man maglakip sang pagbinagbinag sa teksto sang Biblia gikan sa Pag-usisa sa Kasulatan sa Adlaw-adlaw, pagbasa sang Ang Lalantawan kag Magmata!, kag paghanda para sa Cristianong mga miting. Kag kamusta naman ang Cristianong ministeryo? Sing maathag, ang pagbantala sing dayag, pagduaw liwat sa mga interesado, kag pagdumala sing mga pagtuon sa Biblia bahin tanan sang maayo nga ikasarang sa pagbasa.
Pagtuon sa Pagsulat sing Maathag
12. (a) Ngaa importante nga magtuon sa pagsulat sing maathag? (b) Ano ang labing importante nga pagsulat nga nahimo?
12 Ang ikaduhang katuyuan amo nga ang timbang nga edukasyon dapat magbulig sa aton sa pagtuon sa pagsulat sing maathag. Ang pagsulat wala lamang nagapaalinton sa iban sang aton mga pulong kag mga ideya kundi ini nagaamlig man sini. Madamo, madamong siglo na ang nakaligad, mga 40 ka Judiyong mga lalaki ang nagsulat sa papiro ukon panit nga sululatan sang mga pinamulong nga nangin ang inspirado nga mga Kasulatan. (2 Timoteo 3:16) Amo gid ini ang pinakaimportante nga pagsulat nga nahimo! Walay duhaduha nga gintuytuyan ni Jehova ang pagkopya kag liwat nga pagkopya sadtong sagradong mga pinamulong sa sulod sang mga siglo, agod makalab-ot ini sa aton sa masaligan nga porma. Wala bala kita nagapasalamat nga ginpasulat ni Jehova ang iya pinamulong, sa baylo nga magsalig sa ginpaalinton nga minitlang nga mga pulong?—Ipaanggid ang Exodo 34:27, 28.
13. Ano ang nagapakita nga ang mga Israelinhon makahibalo magsulat?
13 Sang una nga panahon, ang pinasahi lamang nga mga klase, subong sang mga escriba sa Mesopotamia kag Egipto, ang makahibalo magbasa kag magsulat. Kabaliskaran sa mga pungsod, sa Israel ang tanan ginpalig-on sa pagtuon sa pagbasa kag pagsulat. Ang sugo sang Deuteronomio 6:8, 9 sa mga Israelinhon nga magsulat sa mga bakalan sang ila mga balay, walay sapayan nga malaragwayon, nagapakita nga makahibalo sila magsulat. Sang magagmay pa, ang mga kabataan gintudluan sa pagsulat. Ang Gezer Calendar, ang isa sang pinakadumaan nga halimbawa sang dumaan nga Hebreong pagsulat, ginhunahuna sang iban nga mga eskolar subong isa ka ehersisyo sa pagsaulo sang nagaeskwela nga bata nga lalaki.
14, 15. Ano ang pila ka mapuslanon kag maayong mga paagi sa paggamit sang ikasarang sa pagsulat?
14 Apang paano naton magamit sa mapuslanon kag maayong paagi ang ikasarang sa pagsulat? Pat-od gid nga paagi sa pagkuha sing mga nota sa mga Cristianong miting, mga asambleya, kag mga kombension. Ang isa ka sulat, bisan nga ginsulat “sa pila ka tinaga,” makahatag sing pagpalig-on sa isa nga nagamasakit ukon makapabutyag sing pasalamat sa isa ka espirituwal nga utod nga lalaki ukon babayi nga malulo ukon maabiabihon sa aton. (1 Pedro 5:12) Kon may namatyan sang isa ka hinigugma sa kongregasyon, ang malip-ot nga sulat ukon kard ‘makapamulong sing makalulugpay’ sa sina nga tawo para sa aton. (1 Tesalonica 5:14) Ang isa ka Cristianong utod nga babayi nga ang iya iloy napatay bangod sang kanser nagpaathag: “Ang isa ka abyan nagpadala sa akon sing matahom nga sulat. Nakabulig gid yadto bangod liwat-liwat ko ini nga ginbasa.”
15 Ang labing maayo gid nga paagi sa paggamit sang ikasarang sa pagsulat amo ang paghatag sing kadayawan kay Jehova sa kalalangan sang pagsulat agod makapanaksi sa Ginharian. Kon kaisa ayhan kinahanglan sulatan ang bag-ong mga interesado nga nagapuyo sa maligwin katama nga mga lugar. Ayhan umalagi nga mabudlay para sa imo ang magpamalaybalay bangod sang imo pagmasakit. Ayhan mapaalinton mo sa sulat ang kinaandan nga mahambal mo sing personal.
16, 17. (a) Anong eksperiensia ang nagapakita sang balor sang pagsulat sa paghatag sing panaksi sa Ginharian? (b) May masugid ka bala nga kaanggid nga eksperiensia?
16 Binagbinaga ang isa ka eksperiensia. Madamong tinuig na ang nakaligad, isa ka Saksi ang nagpanaksi sa sulat tuhoy sa Ginharian sa balo sang isa ka tawo nga ang iya pagkapatay ginpahibalo sa lokal nga pamantalaan. Wala ini ginsabat. Nian, sang Nobiembre 1994, pagligad sang mga 21 ka tuig, nakabaton ang Saksi sing sulat gikan sa anak nga babayi sang balo. Ang anak nagsulat:
17 “Sang Abril 1973, ginsulatan mo ang akon iloy agod lugpayan sia sang mapatay ang akon amay. Siam ka tuig pa lang ako sadto. Nagtuon gid man sa Biblia ang akon iloy, apang tubtob karon indi pa sia isa ka alagad ni Jehova. Walay sapayan, ang iya pagtuon nagdul-ong sa akon pagpakig-upod sa kamatuoran. Sang 1988, nagsugod ako sa pagtuon sa Biblia—pagligad sang 15 ka tuig nga nabaton ang imo sulat. Sang Marso 9, 1990, ginbawtismuhan ako. Nagapasalamat gid ako tungod sang imo sulat sang madamong tinuig na nga nakaligad kag nalipay gid ako sa pagpahibalo sa imo nga yadtong mga binhi nga gintanom mo nagtubo, sa bulig ni Jehova. Ginpatago sa akon sang akon iloy ang imo sulat, kag luyag ko ikaw makilala. Ginalauman ko nga ining sulat makalab-ot sa imo.” Ang sulat sang anak nga babayi, nga naglakip sang iya direksion kag numero sang telepono, nakalab-ot matuod sa Saksi nga nagsulat madamong tinuig na ang nagligad. Handurawa ang kakibot sang lamharon nga babayi sang nakabaton sia sing tawag sa telepono gikan sa Saksi—nga nagasulat gihapon agod ipaambit ang paglaum sang Ginharian sa iban!
Pagtubo sa Hunahuna, Moral, kag Espirituwal
18. Sang panahon sang Biblia, paano ginaatipan sang mga ginikanan ang edukasyon sa hunahuna kag moral sang ila mga kabataan?
18 Ang ikatlo nga katuyuan amo nga ang timbang nga edukasyon dapat magbulig sa aton sa pagtubo sa hunahuna kag moral. Sang panahon sang Biblia ang pagtudlo sa mga kabataan sa hunahuna kag moral ginakabig anay nga isa sang pangunang mga katungdanan sang mga ginikanan. Ang mga kabataan wala lamang gintudluan sa pagbasa kag pagsulat kundi, sing labi pa ka importante, gintudluan sila sa Kasuguan sang Dios, nga nagadalahig sang tanan nila nga mga hilikuton sa kabuhi. Sa amo, ang edukasyon naglakip sang pagtudlo nahanungod sa ila relihiosong mga obligasyon kag sa mga prinsipio nga nagatuytoy sang pag-asawahay, mga kaangtanan sa pamilya, kag seksuwal nga moralidad, subong man sang ila mga obligasyon sa ila isigkatawo. Yadto nga edukasyon nagbulig sa ila sa pagtubo indi lamang sa hunahuna kag moral kundi sa espirituwal man.—Deuteronomio 6:4-9, 20, 21; 11:18-21.
19. Diin kita makasapo sing edukasyon nga nagapakita sa aton sang labing maayo nga mga kabilihanan sa moral nga pagasundon kag nga nagabulig sa aton sa pagtubo sa espirituwal?
19 Kamusta naman karon? Ang maayong sekular nga edukasyon importante. Nagabulig ini sa aton sa pagtubo sa hunahuna. Apang diin naton masapwan ang edukasyon nga magapakita sa aton sang labing maayong mga prinsipio sa moral nga magatuytoy sa aton kag magabulig sa aton sa pagtubo sa espirituwal? Sa sulod sang Cristianong kongregasyon, mahibaluan naton ang isa ka programa sang teokratikong edukasyon nga indi matigayon bisan diin man sa duta. Paagi sa aton personal nga pagtuon sa Biblia kag sa pasad-sa-Biblia nga mga publikasyon, subong man sa mga panudlo nga ginahatag sa mga miting sa kongregasyon, mga asambleya, kag mga kombension, sarang naton mabaton ining hamili, nagapadayon nga edukasyon—ang balaan nga edukasyon—nga wala sing bayad. Ano ang ginatudlo sini sa aton?
20. Ano ang ginatudlo sa aton sang balaan nga edukasyon, kag ano ang mga resulta sini?
20 Sang magsugod kita sa pagtuon sa Biblia, natun-an naton ang sadsaran nga mga panudlo sang Kasulatan, ‘ang pangunang mga doktrina.’ (Hebreo 6:1) Samtang nagapadayon kita, nagakuha kita sing “matig-a nga pagkaon”—nga amo, ang mas madalom nga mga kamatuoran. (Hebreo 5:14) Apang, kapin pa sa sina, natun-an naton ang diosnon nga mga prinsipio nga nagatudlo sa aton kon paano magkabuhi suno sa luyag sang Dios. Halimbawa, natun-an naton nga likawan ang mga pamatasan kag mga buhat nga ‘nagadagta sang unod’ kag tahuron ang awtoridad kag ang lawas kag propiedad sang iban. (2 Corinto 7:1; Tito 3:1, 2; Hebreo 13:4) Dugang pa, nahangpan naton ang importansia sang pagkabunayag kag pagkamapisan sa aton hilikuton kag ang kabilihanan sang pagkabuhi suno sa mga sugo sang Biblia tuhoy sa seksuwal nga moralidad. (1 Corinto 6:9, 10; Efeso 4:28) Samtang nagauswag kita sa pag-aplikar sining mga prinsipio sa aton kabuhi, nagatubo kita sa espirituwal, kag ang aton kaangtanan sa Dios nagadalom. Dugang pa, ang aton diosnon nga pagginawi nagahimo sa aton nga maayong mga banwahanon, bisan diin man kita nagapuyo. Kag mahimo ini magapahulag sa iban nga himayaon ang Ginhalinan sang balaan nga edukasyon—si Jehova nga Dios.—1 Pedro 2:12.
Praktikal nga Paghanas Para sa Adlaw-adlaw nga Pagkabuhi
21. Anong praktikal nga paghanas ang nabaton sang mga kabataan sang panahon sang Biblia?
21 Ang ikaapat nga tulumuron sang timbang nga edukasyon amo ang paghatag sa isa ka tawo sing praktikal nga paghanas nga kinahanglanon sa adlaw-adlaw nga pagkabuhi. Ang pagpanudlo sang mga ginikanan sadtong panahon sang Biblia naglakip sang praktikal nga paghanas. Ang mga kabataan nga babayi gintudluan sang mga hilikuton sa balay. Ginapakita sang katapusan nga kapitulo sang Hulubaton nga madamo ini kag nanuhaytuhay. Sa amo, ang mga kabataan nga babayi nasangkapan sa pagpulon, paglala, kag pagluto kag pag-atipan sang panimalay, pagpamalaklon kag pagpamaligya, kag mga transaksion sa duta. Ang mga bata nga lalaki masunson nga gintudluan sang sekular nga palamugnan sang ila amay, ayhan sing panguma ukon pila ka palangitan-an. Si Jesus nakatuon sa pagpamanday gikan sa iya amay-amay, nga si Jose; sa amo, wala lamang sia pagtawga nga “anak sang panday” kundi “panday” man.—Mateo 13:55; Marcos 6:3.
22, 23. (a) Para sa ano dapat ginahanda sang edukasyon ang mga kabataan? (b) Ano dapat ang mangin motibo naton sa pagpili sing dugang nga edukasyon kon mahimo nga kinahanglanon ini?
22 Sa karon, ang timbang nga edukasyon nagalakip man sang paghanda sa pag-atipan sa mga kinahanglanon sang isa ka pamilya sa pila ka adlaw. Ang pinamulong ni apostol Pablo nga masapwan sa 1 Timoteo 5:8 nagapakita nga ang pag-aman sa pamilya isa ka sagrado nga obligasyon. Sia nagsulat: “Kon ang bisan sin-o wala nagaaman para sa sadtong iya kaugalingon, kag ilabi na para sa sadtong mga katapo sang iya kaugalingon nga panimalay, ginpanghiwala niya ang pagtuo kag mas malain pa sa tawo nga wala sing pagtuo.” Ang edukasyon, nian, dapat magahanda sa mga kabataan para sa mga responsabilidad nga pagatungdan nila sa kabuhi subong man magasangkap sa ila nga mangin mapisan nga mga katapo sang komunidad.
23 Daw ano ka daku nga sekular nga edukasyon ang dapat naton himud-usan? Nagalainlain ini sa mga pungsod. Apang kon ang ginapangayo nga trabaho nagakinahanglan sing paghanas dugang sa pinakamanubo nga ginakinahanglan sang layi, nasandig sa mga ginikanan ang pagtuytoy sa ila mga kabataan sa pagdesisyon tuhoy sa dugang pa nga pagtuon ukon paghanas, nagatulutimbang sang posible nga mga benepisyo kag mga disbentaha sinang dugang nga mga pagtuon. Apang, ano ang dapat mangin motibo sang isa sa pagpili sing dugang pa nga edukasyon kon ina mahimo nga kinahanglanon? Pat-od gid nga indi ang mga manggad, kaugalingon nga himaya, ukon kadayawan. (Hulubaton 15:25; 1 Timoteo 6:17) Dumduma ang leksion nga natun-an naton gikan sa halimbawa ni Jesus—ang edukasyon dapat gamiton sa paghatag sing kadayawan kay Jehova. Kon luyag naton ang dugang pa nga edukasyon, ang aton motibo amo dapat ang handum nga buhion sing nagakaigo ang aton kaugalingon agod makaalagad kita sing bug-os kay Jehova sa Cristianong ministeryo.—Colosas 3:23, 24.
24. Anong leksion nga matun-an gikan kay Jesus ang indi gid naton dapat pagkalimtan?
24 Busa, magmakugi kita sa aton mga panikasog nga matigayon ang timbang nga sekular nga edukasyon. Kabay nga himuslan naton sing bug-os ang nagauswag nga programa sang balaan nga edukasyon, nga ginaaman sa sulod sang organisasyon ni Jehova. Kag kabay nga indi gid naton pagkalimtan ang hamili nga leksion nga natun-an naton gikan kay Jesucristo, ang labing edukado nga tawo nga nagkabuhi sa sining duta—ang edukasyon dapat gamiton, indi agod himayaon ang aton kaugalingon, kundi agod hatagan sing pagdayaw ang pinakabantog nga Edukador sa tanan, si Jehova nga Dios!
Ano ang Imo Sabat?
◻ Paano gingamit ni Jesus ang iya edukasyon?
◻ Ngaa importante nga magtuon sa pagbasa sing maayo?
◻ Paano naton mahimo gamiton ang ikasarang sa pagsulat sa pagdala sing kadayawan kay Jehova?
◻ Paano kita ginabuligan sang balaan nga edukasyon sa pagtubo sa moral kag espirituwal?
◻ Anong praktikal nga paghanas ang dapat ilakip sang isa ka timbang nga edukasyon?
[Kahon sa pahina 13]
Praktikal nga Bulig Para sa mga Edukador
Sa “Malipayon nga mga Dumalayaw” nga Distrito nga mga Kombension sang 1995/96, ang Watch Tower Society nagpaguwa sing bag-ong brosyur nga natig-uluhan Jehovah’s Witnesses and Education. Ining 32-pahina, de-kolor nga brosyur ginbalhag ilabi na para sa mga edukador. Sa karon ginbadbad ini sa 58 ka hambal.
Ngaa nagbalhag sing isa ka brosyur para sa mga edukador? Agod buligan sila nga mahangpan sing mas maayo ang mga pagtuluuhan sang mga estudyante nga mga anak sang mga Saksi ni Jehova. Ano ang ginaunod sang brosyur? Sa madali mahangpan kag mabuligon nga paagi, ginapaathag sini ang aton panghunahuna tuhoy sa mga isyu subong sang dugang pa nga edukasyon, mga kaadlawan kag Paskuwa, kag pagsaludo sa bandera. Ginapasalig man sang brosyur sa mga edukador nga luyag naton nga himuslan gid sang aton mga kabataan ang ila pagtuon kag nga luyag gid naton magkooperar sa mga edukador, nagapakita sing daku nga interes sa edukasyon sang aton mga kabataan.
Paano mahimo gamiton ang Education nga brosyur? Sanglit ginhanda ini para sa mga edukador, ipaambit naton ini sa mga manunudlo, mga prinsipal, kag sa iban pa nga opisyales sang eskwelahan. Kabay nga ining bag-ong brosyur magabulig sa tanan nga mga edukador nga mahangpan ang aton mga panghunahuna kag mga pagtuluuhan kag kon ngaa may kinamatarong kita kon kaisa nga mangin tuhay. Ang mga ginikanan ginapalig-on sa paggamit sang brosyur subong sadsaran para sa personal nga pagpakigsugilanon sa mga edukador sang ila mga kabataan.
[Retrato sa pahina 10]
Sa dumaan nga Israel ang edukasyon ginpabilihan sing daku