Ginharian sang Dios—Nahangpan Mo Bala Ini?
“Kag ang ginasab-ug sa maayong duta, amo ini sia ang nagapamati sang pulong kag nagahangop sini.”—MATEO 13:23.
1. Ano ang pila ka kinaandan nga mga pagpati tuhoy sa ‘ginharian sang mga langit’?
IMO bala ‘nahangpan’ kon ano ang Ginharian sang Dios? Nanuhaytuhay ang mga paghangop tuhoy sa ‘ginharian sang mga langit’ sa sulod sang mga siglo. Ang kinaandan nga pagpati sa tunga sang pila ka katapo sang iglesia karon amo nga ang Ginharian isa ka butang nga ginapasulod sang Dios sa tagipusuon sang tawo sa tion nga makombertir sia. Ang iban nagapati nga isa ini ka duog nga ginakadtuan sang maayo nga mga tawo pagkatapos sang kamatayon agod matigayon ang dayon nga kalipay. Ang iban pa nagapati nga gintugyan sang Dios sa mga tawo ang pagtukod sing Ginharian sa duta paagi sa pagpatudok sing Cristianong mga panudlo kag mga buhat sa mga hilikuton sang katilingban kag sang panguluhan.
2. Paano ginapaathag sang Biblia ang Ginharian sang Dios, kag ano ang pagahimuon sini?
2 Apang, maathag nga ginapakita sang Biblia nga ang Ginharian sang Dios indi isa ka institusyon sa duta. Indi man ini isa ka kahimtangan sang tagipusuon ukon paghimo nga Cristiano sa tawhanon nga katilingban. Matuod, ang husto nga paghangop kon ano ining Ginharian magadul-ong sa daku nga mga pagbag-o sa kabuhi sadtong nagatuo sa sini. Apang ang Ginharian mismo isa ka gintukod sang Dios nga langitnon nga panguluhan nga magapatuman sang kabubut-on sang Dios, magadula sa mga epekto sang sala kag kamatayon kag magapasag-uli sa matarong nga mga kahimtangan sa duta. Ini nga Ginharian nagagahom na sa mga langit, kag sa indi madugay “dugmukon sini kag tapuson ang tanan sining [tawhanon] nga mga ginharian, kag ini magapadayon sa walay katubtuban.”—Daniel 2:44; Bugna 11:15; 12:10.
3. Sang ginsugdan ni Jesus ang iya ministeryo, ano ang nabuksan para sa katawhan?
3 Ang istoryador nga si H. G. Wells nagsulat: “Ining doktrina sang Ginharian sang Langit, nga amo anay ang pangunang panudlo ni Jesus, nga may tuman ka diutay nga bahin sa Cristianong mga kredo, amo gid ang pinakamaimpluwensia nga doktrina nga nagpapagsik kag nagpabag-o sa panghunahuna sang tawo.” Kutob gid sa ginsuguran, ang tema sang ministeryo ni Jesus amo: “Hinulsol kamo, kay ang ginharian sang mga langit malapit na.” (Mateo 4:17) Diri sia sa duta subong hinaplas nga Hari, kag sing makalilipay gid, nabuksan na karon ang dalanon para sa katawhan indi lamang sa pag-ambit sa mga pagpakamaayo sinang Ginharian kundi subong man ang mangin kaupod nga manuggahom kag mga saserdote ni Jesus sa sinang Ginharian!—Lucas 22:28-30; Bugna 1:6; 5:10.
4. Sang una nga siglo, ano ang reaksion sang kadam-an sa “maayong balita sang ginharian,” nga nagdul-ong sa anong paghukom?
4 Walay sapayan nga madamo ang nakabati sa makapapagsik nga “maayong balita sang ginharian,” diutay lamang ang nagpati. Isa ka rason sini bangod ‘gintakpan sang mga lider sang relihion ang ginharian sang mga langit sa mga tawo.’ ‘Ginkuha [nila] ang yabi sang ihibalo’ paagi sa ila sayop nga mga panudlo. Bangod ginsikway sang kalabanan nga tawo si Jesus subong ang Mesias kag ang hinaplas nga Hari sang Ginharian sang Dios, si Jesus nagsiling sa ila: “Ang ginharian sang Dios kuhaon sa inyo kag ihatag sa pungsod nga makapatubas sing mga bunga sini.”—Mateo 4:23; 21:43; 23:13; Lucas 11:52.
5. Paano ginpakita sadtong kalabanan sang nakabati sa mga ilustrasyon ni Jesus nga wala sila makabati nga may paghangop?
5 Sang nagatudlo sa isa ka daku nga kadam-an sa isa ka okasyon, si Jesus, suno sa iya kinabatasan, naggamit sang isa ka serye sang mga ilustrasyon agod tilawan ang kadam-an kag agod painon yadtong hapaw lamang ang interes sa Ginharian. Ang una nga ilustrasyon may kaangtanan sa isa ka manugsab-ug nga nagsab-ug sang binhi sa apat ka sahi sang duta. Ang unang tatlo ka sahi indi maayo nga tamnan, apang ang isa nga naulihi “maayo nga duta” nga nagpatubas sing maayo nga bunga. Ang malip-ot nga ilustrasyon ginhinakpan sa isa ka sugo: “Ang may mga idulungog magpamati sia.” (Mateo 13:1-9) Nabatian sia sang kalabanan sang mga nagtambong, apang wala sila “magpamati.” Wala sila maghulag, wala sing matuod nga interes sa paghibalo kon paano ang ginsab-ug nga binhi sa idalom sang nanuhaytuhay nga mga kahimtangan kaangay sang Ginharian sang mga langit. Nagbalik sila sa ila matag-adlaw nga pagsinalayo, ayhan naghunahuna nga ang mga ilustrasyon ni Jesus maayo lamang nga mga sugilanon nga may mga tema tuhoy sa moral. Daw ano ka bugana nga paghangop kag daw ano kadaku nga mga pribilehiyo kag mga kahigayunan ang ila nawasi bangod matig-a ang ila mga tagipusuon!
6. Ngaa ang paghangop sa “balaan nga mga tinago sang ginharian” ginhatag lamang sa mga disipulo ni Jesus?
6 Ginsilingan ni Jesus ang iya mga disipulo: “Sa inyo nahatag ang paghibalo sang mga tinago sang ginharian sang mga langit, apang sa ila wala nahatag.” Ginakutlo si Isaias, nagdugang sia: “ ‘Kay ang tagipusuon sining katawhan ginkibulan, kag ang ila mga idulungog halos makabati, kag ginpiyong nila ang ila mga mata, basi makahantop sila sa ila mga mata kag makabati sa ila mga idulungog, kag makahangop sa ila tagipusuon kag magliso agod nga ayuhon ko sila.’ Apang, bulahan ang inyo mga mata kay makakita sila, kag ang inyo mga idulungog kay nagapamati sila.”—Mateo 13:10-16; Marcos 4:11-13.
“Paghangop” sa Ginharian
7. Ngaa importante nga ‘mahangpan’ ang Ginharian?
7 Gintudlo ni Jesus ang problema. May kahilabtanan ini sa “paghangop” sing mensahe sang Ginharian. Sa iya mga disipulo nagsiling sia sing pribado: “Busa pamatii ninyo ang paanggid nahanungod sa manugsab-ug. Kon bisan sin-o ang nagapamati sang pulong nahanungod sa ginharian kag indi niya paghangpon, nagaabot ang malaut kag nagaagaw sang ginsab-ug sa iya tagipusuon.” Ginpaathag niya nga ang apat ka sahi sang duta nagrepresentar sa nanuhaytuhay nga mga kahimtangan sang tagipusuon diin “ang pulong sang ginharian” mahimo nga ginsab-ug.—Mateo 13:18-23; Lucas 8:9-15.
8. Ano ang nagpugong sa “binhi” nga ginsab-ug sa unang tatlo ka sahi sang duta sa pagpatubas sing mga bunga?
8 Ang “binhi” maayo sa tagsa ka kaso, apang ang bunga depende sa kahimtangan sang duta. Kon ang duta sang tagipusuon kaangay sa masako, gutok nga dalanon, nga ginpatig-a sang madamong dimakasulatanhon nga hilikuton, mahapos para sa isa nga nagapamati sa mensahe sang Ginharian nga mangatarungan, nagasiling nga wala na sing tion para sa Ginharian. Ang ginpabay-an nga binhi madali maagaw antes ini magtubo. Apang kamusta kon ang binhi ginsab-ug sa tagipusuon nga nagalarawan sa batuhon nga duta? Ang binhi mahimo nga magtubo, apang mabudlayan sa pagpangalapkap ang mga gamot agod mabuhi kag magmalig-on ini. Ang paglaum nga mangin matinumanon nga alagad sang Dios, ilabi na sa kainit sang paghingabot, mahimo magdala sing daku gid nga hangkat, kag ang isa mahimo nga masandad. Kag sa liwat, kon ang duta sang tagipusuon puno sing tulad-tunok nga mga paghimud-os ukon sing materialistiko nga paghandum sing manggad, ang maniwang nga tanom sang ginharian mahimo nga mapuot. Sa sining tatlo ka tipiko nga kahimtangan sa kabuhi, wala sing bunga sang Ginharian ang mahimo mapatubas.
9. Ngaa ang binhi nga ginsab-ug sa maayong duta nakapatubas sing maayong mga bunga?
9 Apang, kamusta ang binhi sang Ginharian nga ginsab-ug sa maayo nga duta? Si Jesus nagasabat: “Kag ang ginsab-ug sa maayong duta, amo ini sia ang nagapamati sang pulong kag nagahangop sini, sa pagkamatuod sia nagapamunga kag nagapatubas, ang iban isa ka gatos ka pilo, ang iban kan-uman, kag ang iban katluan.” (Mateo 13:23) Paagi sa “paghangop” sa Ginharian, magapatubas sila sing mga bunga suno sa ila indibiduwal nga mga kahimtangan.
Ang Responsabilidad Nagaupod sa Paghangop
10. (a) Paano ginpakita ni Jesus nga ang “paghangop” sa Ginharian nagadala sing mga pagpakamaayo kag responsabilidad? (b) Ang sugo bala ni Jesus nga maghimo sing mga disipulo naaplikar lamang sa unang-siglo nga mga disipulo?
10 Pagkatapos mahatag ang dugang nga anom ka ilustrasyon agod ipaathag ang madamo nga bahin sang Ginharian, ginpamangkot ni Jesus ang iya mga disipulo: “Nahangpan bala ninyo ining tanan?” Sang magsabat sila sing “huo,” sia nagsiling: “Busa, ang tagsa ka escriba nga nangin gintutun-an sa ginharian sang langit kaangay sang isa ka amay sang panimalay nga nagakuha sa iya bahandi sing mga butang nga bag-o kag daan.” Ang mga panudlo kag paghanas nga ginhatag ni Jesus magahimo sa iya mga disipulo nga mga hamtong nga Cristiano nga makakuha sa ila ‘bahandian’ sang wala nagakaubos nga suplay sang buganang espirituwal nga pagkaon. Ang kalabanan sini may kaangtanan sa Ginharian sang Dios. Ginpaathag ni Jesus nga ang “paghangop” sa Ginharian magadala indi lamang sing mga pagpakamaayo kundi subong man sing responsabilidad. Sia nagsugo: “Busa lakat kamo kag himuon nga mga gintutun-an ang tanan nga kapungsuran . . . nga nagatudlo sa ila sa pagtuman sang tanan nga ginsugo ko sa inyo. Kag yari karon! Ako kaupod ninyo sa gihapon, tubtob sa katapusan sang sistema sang mga butang.”—Mateo 13:51, 52; 28:19, 20.
11. Sang pag-abot sang 1914, anong mga hitabo may kaangtanan sa Ginharian ang natabo?
11 Subong sang ginsaad, padayon nga gin-updan ni Jesus ang iya matuod nga mga disipulo sa sulod sang mga siglo tubtob karon nga adlaw. Sa sining katapusan nga mga adlaw, padayon nga ginhatagan niya sila sing paghangop, kag ginhatagan man niya sila sing responsabilidad para sa nagadugang nga kasanag sang kamatuoran. (Lucas 19:11-15, 26) Sang 1914, ang mga hitabo tuhoy sa Ginharian nagsugod nga matuman sing madasig kag sing dramatiko. Sadto nga tuig, wala lamang “mabun-ag” ang madugay na ginalauman nga Ginharian kundi nagsugod ang “konklusyon sang sistema sang mga butang.” (Bugna 11:15; 12:5, 10; Daniel 7:13, 14, 27) Bangod nahangpan sang matuod nga mga Cristiano ang kahulugan sang karon nga mga hitabo, ginhimo nila ang pinakadaku nga kampanya sang pagbantala kag pagpanudlo sang Ginharian sa bug-os nga maragtas. Gintagna ini ni Jesus, nga nagasiling: “Ining maayong balita sang Ginharian ibantala sa bug-os napuy-an nga duta subong saksi sa tanan nga kapungsugran; kag ugaling magaabot ang katapusan.”—Mateo 24:14.
12. (a) Ano ang nangin resulta sang masangkad modernong-adlaw nga pagpanaksi sang Ginharian? (b) Sa sining maduhaduhaon nga kalibutan, ano ang katalagman para sa mga Cristiano?
12 Ining masangkad nga pagpanaksi sang Ginharian nagdangat sa kapin sa 230 ka kadutaan. Kapin na sa lima ka milyon ka matuod nga disipulo ang nagapakigbahin sa sining hilikuton, kag ang iban padayon pa nga ginatipon. Apang kon ipaanggid naton ang kadamuon sang mga disipulo sa 5.6 bilyones ka tawo, maathag nga subong sang mga adlaw ni Jesus, ang kalabanan sang katawhan wala ‘makahangop’ sa Ginharian. Madamo, subong sang gintagna, ang nagayaguta nga nagasiling: “Diin na ang iya ginsaad nga presensia?” (2 Pedro 3:3, 4) Ang katalagman para sa aton subong mga Cristiano amo nga mahimo maapektuhan sing amat-amat sang dimasinapakon, maduhaduhaon, materyalistiko nga panimuot sining mga tawo ang aton pagtamod sa mga pribilehiyo sang Ginharian. Ginapalibutan sang mga tawo sining kalibutan, madali naton mailog ang pila sang ila mga panimuot kag mga buhat. Daw ano ka importante nga ‘mahangpan’ naton ang Ginharian sang Dios kag manguyapot sa sini!
Pag-usisa sa Aton Kaugalingon May Kaangtanan sa Ginharian
13. Kon tuhoy sa sugo nga ibantala ang maayong balita sang Ginharian, paano naton matilawan kon bala padayon kita nga ‘nagapamati’ nga may paghangop?
13 Si Jesus nagasiling tuhoy sa tion sang tig-alani diin nagakabuhi kita: “Magapadala ang Anak sang tawo sang iya mga manugtunda, kag kuhaon nila sa iya ginharian ang tanan nga butang nga nagapasandad kag ang nagahimo sing kalautan . . . Nian ang mga matarong magasidlak subong sang adlaw sa ginharian sang ila Amay. Ang may mga idulungog, magpamati sia.” (Mateo 13:41, 43) Padayon mo bala nga ‘ginapamatian’ sing masinulundon ang sugo nga ibantala ang Ginharian kag maghimo sing mga disipulo? Dumduma, “ang ginsab-ug sa maayong duta” ‘namati sa pulong kag naghangop sini’ kag nagpatubas sing maayong mga bunga.—Mateo 13:23.
14. Kon may ginhatag nga instruksion, paano naton mapakita nga ‘nahangpan’ naton ang ginhatag nga laygay?
14 Kon nagatuon sing personal kag nagatambong sa Cristianong mga miting, dapat naton ‘ipahamtang ang aton tagipusuon sa paghangop.’ (Hulubaton 2:1-4) Kon ginalaygayan tuhoy sa pagginawi, pamayo, musika, kag kalingawan, dapat naton pasalupon ini sa aton mga tagipusuon kag magpahulag sa aton sa paghimo sing nagakaigo nga mga pagpasibu. Indi gid mangatarungan, magpamalibad, ukon basi mapaslawan sa pagsunod. Kon ang Ginharian matuod gid sa aton kabuhi, magakabuhi kita nahisuno sa mga talaksan sini kag makugi nga ibantala ini sa iban. Si Jesus nagsiling: “Indi ang tagsatagsa nga nagatawag sa akon, ‘Ginuo, Ginuo,’ makasulod sa ginharian sang mga langit, kundi ang nagahimo sang kabubut-on sang akon Amay nga yara sa mga langit.”—Mateo 7:21-23.
15. Ngaa importante nga ‘pangitaon anay ang ginharian kag ang pagkamatarong sang Dios’?
15 Ang huyog sang tawo amo ang magkabalaka sa kinahanglanon nga pagkaon, panapton, kag puluy-an, apang si Jesus nagsiling: “Padayon nga pangitaa anay ninyo ang ginharian kag ang iya [sang Dios] pagkamatarong, kag tanan ini nga butang idugang sa inyo.” (Mateo 6:33, 34) Sa pagpahamtang sing mga prayuridad, unaha ang Ginharian sa imo kabuhi. Hupti nga simple ang imo kabuhi, kontento sa mga kinahanglanon. Indi maalamon kon pun-on naton ang aton kabuhi sing di-importante nga mga hilikuton ukon mga pagkabutang, ayhan nagapangatarungan nga ang paghimo sini kalahamut-an, sanglit indi gid man malain ining mga butang. Walay sapayan nga mahimo matuod ina, ano ang epekto sang pagtigayon kag paggamit sinang di-importante nga mga butang sa aton eskedyul sang personal nga pagtuon, pagtambong sa Cristianong mga miting, kag pagpakigbahin sa pagbantala nga hilikuton? Si Jesus nagsiling nga ang Ginharian kaangay sa isa ka manugpatikang nga nakasapo sing isa ka ‘perlas nga malahalon [kag] naglakat sia kag gilayon nga ginbaligya ang tanan niya nga pagkabutang kag ginbakal ini.’ (Mateo 13:45, 46) Amo sina dapat ang aton balatyagon tuhoy sa Ginharian sang Dios. Dapat naton ilugon si Pablo indi si Demas, nga gintalikdan ang ministeryo “bangod ginhigugma niya ang karon nga sistema sang mga butang.”—2 Timoteo 4:10, 18; Mateo 19:23, 24; Filipos 3:7, 8, 13, 14; 1 Timoteo 6:9, 10, 17-19.
“Ang Dimatarong Indi Makapanubli sang Ginharian sang Dios”
16. Paano ang “paghangop” sa Ginharian sang Dios makabulig sa aton nga malikawan ang sayop nga pagginawi?
16 Sang gintugutan sang kongregasyon sa Corinto ang imoralidad, prangka nga nagsiling si Pablo: “Wala bala kamo makahibalo nga ang mga dimatarong indi makapanubli sang ginharian sang Dios? Dili kamo magtalang. Bisan ang makihilawason, ukon mga diwatahan, ukon mga makihilahion, ukon babayinhon, ukon mga sodomanhon, ukon mga makawat, ukon mga mahamkunon, ukon mga palahubog, ukon mapasipalahon, ukon mga malugos indi makapanubli sang ginharian sang Dios.” (1 Corinto 6:9, 10) Kon ‘nahangpan’ naton ang Ginharian sang Dios, indi naton pagdayaan ang aton kaugalingon sa paghunahuna nga tugutan ni Jehova ang pila ka porma sang imoralidad lamang kon makita niya kita nga masako sa Cristianong pag-alagad. Ang kahigkuan indi dapat sambiton sa tunga naton. (Efeso 5:3-5) Natalupangdan mo bala nga ang pila sang mahigko nga panghunahuna kag mga buhat sining kalibutan nagasugod sa pagsulod sa imo kabuhi? Dulaa ini sa gilayon! Ang Ginharian tuman ka hamili nga butang nga madula bangod lamang sang amo nga mga butang.—Marcos 9:47.
17. Sa anong mga paagi ang paghangop sa Ginharian sang Dios nagapadaku sing pagkamapainubuson kag nagadula sing mga kabangdanan sang pagkasandad?
17 Namangkot ang mga disipulo ni Jesus: “Sin-o gid bala ang pinakadaku sa ginharian sang mga langit?” Si Jesus nagsabat paagi sa pagdala sang isa ka bata sa tunga nila nga nagasiling: “Sa pagkamatuod nagasiling ako sa inyo, kon indi kamo magliso kag mangin kaangay sang kabataan, indi kamo nga mas-a makasulod sa ginharian sang langit. Busa, ang bisan sin-o nga magpaubos sang iya kaugalingon subong sining bata nga diutay sia amo ang labing daku sa ginharian sang langit.” (Mateo 18:1-6) Ang bugalon, ang reklamador, ang dimainulikdon, kag ang malinapason indi makasulod sa Ginharian sang Dios, ukon mangin mga sakop man sila sang Ginharian. Ang imo bala gugma para sa imo mga kauturan, ang imo pagkamapainubuson, ang imo diosnon nga kahadlok, nagapahulag sa imo nga likawan nga masandad ang iban paagi sa imo pagginawi? Ukon ginapilit mo bala ang imo “mga kinamatarong” ano man ang mangin epekto sining panimuot kag pagginawi sa iban?—Roma 14:13, 17.
18. Ano ang mangin resulta sa matinumanon nga katawhan kon pahanabuon sang Ginharian sang Dios nga matuman ang Iya kabubut-on “subong sang sa langit, amo man sa duta”?
18 Ang aton langitnon nga Amay, si Jehova magasabat sa indi madugay sa hanuot nga pangamuyo: “Magkari ang imo ginharian. Paghimuon ang imo kabubut-on, subong sang sa langit, amo man sa duta.” Sa indi madugay ang nagagahom nga Hari, si Jesucristo, magakari sa kahulugan sang paglingkod niya sa iya trono sa paghukom, sa pagpain sa mga “karnero” gikan sa mga “kanding.” Sa sinang gintangdo nga tion, “ang hari magasiling sa mga natuo niya, ‘Kari, kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sing pagtukod sang kalibutan.’ ” Ang mga kanding ‘magakadto sa dayon nga kamatayon, apang ang mga matarong sa dayon nga kabuhi.’ (Mateo 6:10; 25:31-34, 46) Dulaon sang “dakung kapipit-an” ang daan nga sistema kag ang tanan nga nagasikway sa “paghangop” sa Ginharian. Apang ang minilyon sang makalampuwas sa “dakung kapipit-an” kag ang binilyon nga pagabanhawon magapanubli sing dayon sang mga pagpakamaayo sang Ginharian sa ginpasag-uli nga dutan-on nga Paraiso. (Bugna 7:14) Ang Ginharian amo ang bag-o nga panguluhan sang duta, nga nagagahom gikan sa mga langit. Ipatuman sini sing bug-os ang katuyuan ni Jehova para sa duta kag sa katawhan, ang tanan para sa pagpakabalaan sang iya labing balaan nga ngalan. Indi bala takus sing pagpangabudlay, sing pagsakripisyo, kag sing paghulat sina nga palanublion? Amo sini dapat ang kahulugan sang “paghangop” sang Ginharian para sa aton!
Paano Mo Sabton?
◻ Ano ang Ginharian sang Dios?
◻ Ngaa wala ‘mahangpan’ sang kalabanan nga manugpalamati ni Jesus ang Ginharian?
◻ Paano ang “paghangop” sa Ginharian nagadala sing mga pagpakamaayo kag responsabilidad?
◻ Kon tuhoy sa pagbantala, ano ang nagapakita kon bala ‘nahangpan’ naton ang Ginharian?
◻ Paano naton mapakita paagi sa aton pagginawi nga ‘nahangpan’ naton ang ginhatag nga laygay?
[Retrato sa pahina 17]
‘Nahangpan’ sang mga disipulo ni Jesus ang Ginharian kag nakapatubas sing maayo nga bunga