Mga Pamangkot Gikan sa mga Bumalasa

Ginapakita sang mga report sa pila ka tuig nga ang kadamuon sang nagapakig-ambit sa mga emblema sa Memoryal nagdamo diutay. Nagapanugda bala ini nga madamong bag-uhan ang ginhaplasan sing balaan nga espiritu?

May rason gid sa pagpati nga ang kadamuon sang 144,000 sang hinaplas nga mga Cristiano madugay na nakompleto.

Sa Binuhatan 2:​1-4, mabasa naton nahanungod sa mga nahauna sinang limitado nga grupo: “Karon samtang ang adlaw sang kapiestahan sang Pentecostes nagapadayon nagtipon sila tanan sa isa ka duog, kag sa hinali nag-abot ang hagunos gikan sa langit subong sang mamadlus nga hangin nga naghuyup, kag nagpuno sang bug-os nga balay diin sila naglingkod. Kag nagpakita sa ila ang mga dila nga daw kalayo kag napanagtag, kag nagtungtong ang isa sa tagsatagsa sa ila, kag napuno sila tanan sang balaan nga espiritu kag nagsugod sa pagpamulong sa lainlain nga mga hambal, suno sa paghambal nga ginhatag sa ila sang espiritu.”

Pagkatapos sina, si Jehova nagpili sang iban pa, kag ginhaplasan niya sila sang iya balaan nga ­espiritu. Linibo ang gindugang sa nahaunang mga tinuig sang Cristianismo. Sa pagsaulog sang Memoryal sa panahon naton, masunson nga ginapatalupangod sang humalambal ang mga pinamulong ni Pablo sa Roma 8:​15-17, nga nagahinambit nga ang mga hinaplas ‘nakabaton sang espiritu sang pag-ayop subong mga anak.’ Si Pablo nagdugang nga ang balaan nga espiritu nga nabaton nila ‘nagasaksi upod sa ila espiritu, nga mga anak sila sang Dios, mga masigkamanunubli ni Cristo.’ Ang tunay nga nakatigayon sining paghaplas sang espiritu pat-od gid nga nakahibalo sini. Indi lamang ini isa ka paghandum ukon pagpakita sang isa ka emosyonal ukon di-realistiko nga pagtamod sa ila kaugalingon.

Nahangpan naton nga ining langitnon nga pagtawag nagpadayon sa sulod sang mga siglo, walay sapayan nga sadtong ginatawag nga Edad Media, may mga tion nga tuman lamang ka diutay ang kadamuon sang mga hinaplas.⁠a Bangod sang pagtukod liwat sang Cristianismo sang talipuspusan sang katapusan nga siglo, madamo pa ang gintawag kag ginpili. Apang daw subong bala nga sang tunga-tunga sang dekada 1930, ang bug-os nga kadamuon sang 144,000 nakompleto na. Amo sina nga nagsugod sa paglutaw ang isa ka grupo sang mainunungon nga mga Cristiano nga may dutan-on nga paglaum. Gintawag sila ni Jesus nga “iban nga mga karnero,” nga nahiusa sa pagsimba upod sa mga hinaplas subong isa ka nahamut-an nga panong.​—⁠Juan 10:​14-16.

Ang mga katunayan sang nagligad nga mga dekada nagapakita sang pagkompleto sa pagtawag sa mga hinaplas kag sang pagpakamaayo ni Jehova sa nagadamo nga “dakung kadam-an,” nga nagalaum nga makalampuwas sa “dakung kapipit-an.” (Bugna 7:​9, 14) Halimbawa, sa pagsaulog sang Memoryal sang 1935, nga gintambungan sang 63,146, ang nakigbahin sa mga emblema bilang pamatuod sang ila pangangkon subong mga hinaplas nagdamo sing 52,465. Katluan ka tuig sang ulihi, ukon sang 1965, ang nagtambong 1,933,089, samtang ang nakigbahin nag-usmod sa 11,550. Katluan pa ka tuig sang ulihi, sang 1995 ang tumalambong naglumpat sa 13,147,201, apang 8,645 lamang ang nakigbahin sa tinapay kag alak. (1 Corinto 11:​23-26) Sing maathag, samtang nagaligad ang mga dekada, ang kadamuon sadtong nagapangangkon subong nagkalabilin nagbuhin sing daku​—⁠mga 52,400 sang 1935; 11,500 sang 1965; 8,600 sang 1995. Apang, yadtong may dutan-on nga paglaum ginpakamaayo, kag ang ila kadamuon nagdugang sing bu­gana.

Ang labing ulihi ginbalhag nga report amo ang para sa tuig 1995, kag ginapakita sini nga 28 pa ang dugang nga nakigbahin sangsa ginsundan nga tuig walay sapayan nga ang ratio sang mga nakigbahin sa mga nagtambong nagnubo. Nabinagbinag ang tanan, indi kita dapat matublag sang katunayan nga dugang pa ang namat-od nga makigbahin sa mga emblema. Sa sulod sang mga tinuig ang pila, bisan ang mga bag-ong bawtismado, hinali nga nagsugod sa pagpakigbahin. Sa madamo nga hitabo, pagligad sang pila ka tion nahangpan nila nga sala gali ini. Ginbaton sang iban nga nakigbahin sila subong isa ka emosyonal nga reaksion sa ayhan kahuol sa lawas ukon hunahuna. Apang nahangpan nila sang ulihi nga wala gid man sila gintawag sa langitnon nga kabuhi. Nangayo sila sing maluluy-on nga paghangop sang Dios. Kag nagapadayon sila sa pag-alagad sa iya subong maayo, mainunungon nga mga Cristiano, nga nagalaum nga magkabuhi sa walay katapusan sa duta.

Ang bisan sin-o sa aton indi dapat mabalaka kon ang isa ka tawo magasugod sa pagpakigbahin sa mga emblema ukon magauntat sa paghimo sini. Indi kita ang makasugid kon bala ang isa aktuwal nga ginhaplasan sang balaan nga espiritu kag gintawag sa langitnon nga kabuhi ukon wala. Panumduma ang malig-on nga pasalig ni Jesus: “Ako maayong manugbantay, kag kilala ko ang akon mga karnero.” Gani, kilala man ni Jehova kon sin-o ang ginpili niya subong espirituwal nga mga anak. May rason gid sa pagpati nga ang kadamuon sang mga hinaplas padayon nga magausmod kay nagatigulang sila kag ang di-mapaktan nga mga hitabo nagakutol sang ila dutan-on nga pagkabuhi. Apang, subong nga ining tunay nga mga hinaplas nagamatutom tubtob sa kamatayon, nga nagalaum nga matigayon ang purungpurong sang kabuhi, ang iban nga mga karnero, nga nagbunak sang ila mga panapton sa dugo sang Kordero, nagalaum man nga makalampuwas sa nagapakari nga dakung kapipit-an.​—⁠2 Timoteo 4:​6-8; Bugna 2:⁠10.

[Footnote]