Pagkabuhi Suno sa Kasuguan ni Cristo

“Padayon nga magdinalhanay kamo sang inyo mga lulan, kag sa amo matuman ninyo ang kasuguan ni Cristo.”​—⁠GALACIA 6:⁠2.

1. Ngaa sarang masiling nga ang kasuguan ni Cristo isa ka mabaskog nga kusog para sa kaayuhan karon?

SA Rwanda, ginrisgo sang Hutu kag Tutsi nga mga Saksi ni Jehova ang ila kabuhi agod amligan ang isa kag isa sa ila gikan sa pagpatyanay sang duha ka rasa nga natabo kasan-o lang sa sadto nga pungsod. Ang mga Saksi ni Jehova sa Kobe, Japan, nga namatyan sing suod nga mga paryente sa isa ka makahalapay nga linog nagbatyag sing daku gid nga kasubo. Apang, naghulag sila gilayon agod salbaron ang iban pa nga mga biktima. Huo, ginapakita sang makalilipay nga mga halimbawa gikan sa bilog nga kalibutan nga ang kasuguan ni Cristo epektibo gid karon. Isa ini ka mabaskog nga puwersa para sa kaayuhan.

2. Paano wala mahangpan sang Cristiandad ang katuyuan sang kasuguan ni Cristo, kag paano naton matuman ina nga kasuguan?

² Sa amo man nga tion, ang tagna sa Biblia tuhoy sa sining makahalanguyos nga “katapusan nga mga adlaw” nagakatuman. Madamo ang may “diosnon nga dagway” apang ‘nagapanghiwala sang gahom sini.’ (2 Timoteo 3:​1, 5) Labi na sa Cristiandad, ang relihion masami nga isa lamang ka pormalidad, wala sa tagipusuon. Amo bala sina bangod mabudlay gid sundon ang kasuguan ni Cristo? Indi. Indi kita paghatagan ni Jesus sing kasuguan nga indi masunod. Wala lamang mahangpan sang Cristiandad ang katuyuan sina nga kasuguan. Napaslawan sia nga sundon ining inspirado nga mga pulong: “Padayon nga magdinalhanay kamo sang inyo mga lulan, kag sa amo matuman ninyo ang kasuguan ni Cristo.” (Galacia 6:⁠2) ‘Ginatuman [naton] ang kasuguan ni Cristo’ paagi sa pagdalhanay sang aton mga lulan, indi paagi sa pag-ilog sa mga Fariseo kag indi makatarunganon nga pagpabug-at pa sa mga lulan sang aton kauturan.

3. (a) Ano ang pila sang mga sugo sa kasuguan ni Cristo? (b) Ngaa sayop ang maghinakop nga ang Cristianong kongregasyon indi dapat maghimo sing mga pagsulundan luwas sa direkta nga mga sugo ni Cristo?

³ Ang kasuguan ni Cristo nagalakip sang tanan nga sugo ni Cristo Jesus​—⁠kon bala tuhoy sa pagbantala kag pagpanudlo, paghupot sa mata nga putli kag simple lamang, pagpanikasog nga huptan ang paghidait upod sa aton isigkatawo, ukon pagdula sang dimatinlo nga butang gikan sa kongregasyon. (Mateo 5:​27-30; 18:​15-17; 28:​19, 20; Bugna 2:​14-16) Sa pagkamatuod, obligado ang mga Cristiano nga tumanon ang tanan nga sugo sa Biblia nga gintuyo para sa mga sumulunod ni Cristo. Kag may dugang pa. Ang organisasyon ni Jehova, subong man ang indibiduwal nga mga kongregasyon, dapat maghimo sing kinahanglanon nga mga pagsulundan kag mga pamaagi agod mahuptan ang kahim-ong. (1 Corinto 14:​33, 40) Ang mga Cristiano indi makatipon kon wala sila sing pagsulundan sa kon san-o, kon diin, kag kon paano hiwaton ina nga mga miting! (Hebreo 10:​24, 25) Ang pagkooperar sa rasonable nga mga panuytoy nga ginpahamtang sang mga ginhatagan sing awtoridad sa sulod sang organisasyon isa man ka bahin sang pagtuman sa kasuguan ni Cristo.​—⁠Hebreo 13:⁠17.

4. Ano ang nagatiklod nga kusog sang putli nga pagsimba?

⁴ Walay sapayan, wala ginatugutan sang matuod nga mga Cristiano nga ang ila pagsimba mangin walay pulos nga kasuguan. Wala sila nagaalagad kay Jehova bangod lamang amo sina ang ginapahimo sa ila sang pila ka indibiduwal ukon organisasyon. Sa baylo, ang puwersa nga nagapahulag sa ila sa pagsimba amo ang gugma. Si Pablo nagsulat: “Ang gugma ni Cristo nagatiklod sa amon.” (2 Corinto 5:​14, foot­note) Ginsugo ni Jesus ang iya mga sumulunod nga maghigugmaanay sila. (Juan 15:​12, 13) Ang nagasakripisyo-sang-kaugalingon nga gugma amo ang sadsaran sang kasuguan ni Cristo, kag ginatiklod sini ukon ginapahulag ang matuod nga mga Cristiano bisan diin, sa pamilya kag sa kongregasyon. Tan-awon naton kon paano.

Sa Pamilya

5. (a) Paano matuman sang mga ginikanan ang kasuguan ni Cristo sa puluy-an? (b) Ano ang ginakinahanglan sang mga bata gikan sa ila mga ginikanan, kag anong mga balagbag ang dapat malandas sang pila ka ginikanan agod mahatag ini?

⁵ Si apostol Pablo nagsulat: “Mga bana, padayon nga higugmaa ang inyo mga asawa, subong nga si Cristo man naghigugma sa kongregasyon kag nagtugyan sang iya kaugalingon para sa sini.” (Efeso 5:25) Kon ginailog sang bana si Cristo kag mahigugmaon sia kag mahinangpanon sa iya asawa, ginatuman niya ang isa ka importante nga bahin sang kasuguan ni Cristo. Dugang pa, si Jesus dayag nga nagpakita sing gugma sa mga bata, ginkugos sila, nagapandong sang iya mga kamot sa ila, kag ginpakamaayo sila. (Marcos 10:16) Ang mga ginikanan nga nagatuman sang kasuguan ni Cristo nagapakita man sing gugma sa ila kabataan. Matuod, may mga ginikanan nga nabudlayan sa pag-ilog sang huwaran ni Jesus sa sining bahin. Ang iban kinaugali nga indi makahibalo magpakita sang ila gugma. Mga ginikanan, indi pagtuguti nga punggan kamo sina sa pagpakita sa inyo kabataan sang gugma nga ginabatyag ninyo para sa ila! Indi tuman na nga mahibaluan ninyo nga ginahigugma ninyo ang inyo kabataan. Dapat man nila mahibaluan ini. Kag indi nila mahibaluan ini luwas kon mangita kamo sing mga paagi nga ipakita ang inyo gugma.​—⁠Ipaanggid ang Marcos 1:⁠11.

6. (a) Nagakinahanglan bala ang kabataan sing mga pagsulundan gikan sa mga ginikanan, kag ngaa subong sina ang imo sabat? (b) Anong sadsaran nga rason para sa mga pagsulundan sa sulod sang panimalay ang dapat mahangpan sang kabataan? (c) Anong mga katalagman ang malikawan kon ginasunod ang kasuguan ni Cristo sa sulod sang panimalay?

⁶ Sa amo man nga tion, nagakinahanglan ang kabataan sing panuytoy, nga nagakahulugan nga ang ila mga ginikanan dapat maghimo sing mga pagsulundan kag kon kaisa ipatuman ining mga pagsulundan paagi sa disiplina. (Hebreo 12:​7, 9, 11) Apang, dapat buligan gihapon ang kabataan nga mahangpan ang sadsaran nga rason sining mga pagsulundan: ginahigugma sila sang ila mga ginikanan. Kag dapat nila matun-an nga ang gugma amo ang labing maayong rason sa pagtuman nila sa ila mga ginikanan. (Efeso 6:1; Colosas 3:20; 1 Juan 5:⁠3) Ang tulumuron sang isa ka mahinantupon nga ginikanan amo ang pagtudlo sa kabataan nga gamiton ang ila “ikasarang sa pagpangatarungan” agod nga sa ulihi makahimo sila sing maayong mga desisyon. (Roma 12:1; ipaanggid ang 1 Corinto 13:11.) Sa pihak nga bahin, indi dapat mangin tuman kadamo ang mga pagsulundan ukon tuman kapintas ang disiplina. Si Pablo nagsiling: “Mga amay, dili ninyo pagpaakiga ang inyo mga anak, agod nga indi magluya ang ila buot.” (Colosas 3:21; Efeso 6:⁠4) Kon ang kasuguan ni Cristo ginatuman sa sulod sang panimalay, wala sing duog sa sini ang walay kontrol nga kaakig sa pagdisiplina ukon masakit nga mga tinaga. Sa sina nga puluy-an, ang kabataan wala nagabatyag sing peligro kundi sing kalig-unan, wala ginapabug-atan ukon ginapakanubo.​—⁠Ipaanggid ang Salmo 36:⁠7.

7. Sa anong mga paagi ang mga puluy-an Bethel nagahatag sing huwaran kon tuhoy sa paghimo sing mga pagsulundan sa sulod sang puluy-an?

⁷ Ang iban nga nakaduaw na sa mga puluy-an Bethel sa bug-os nga kalibutan nagasiling nga maayo sila nga huwaran sa pagkabalanse tuhoy sa mga pagsulundan para sa isa ka pamilya. Bisan pa mga adulto sila tanan, ining mga institusyon nagapanghikot kaangay gid sang mga pamilya.a Masibod gid ang mga palakat sa Bethel kag nagakinahanglan sing madamo nga pagsulundan​—⁠kapin sangsa kinaandan nga pamilya. Walay sapayan, ginatinguhaan sang mga gulang nga nagapanguna sa mga puluy-an Bethel, sa mga opisina, kag sa mga pagpanghikot sa pabrika nga iaplikar ang kasuguan ni Cristo. Ginatamod nila nga tulumanon nila ang indi lamang organisahon ang hilikuton kundi palambuon man ang espirituwal nga pag-uswag kag “ang kalipay ni Jehova” sa tunga sang ila mga masigkamanugpangabudlay. (Nehemias 8:10) Busa, nagatinguha sila nga himuon ang mga butang sa positibo kag makapalig-on nga paagi kag nagapanikasog nga mangin rasonable. (Efeso 4:​31, 32) Indi katingalahan nga ang mga pamilya Bethel kilala nga malipayon!

Sa Kongregasyon

8. (a) Ano dapat ang mangin tulumuron naton pirme sa kongregasyon? (b) Sa ano nga mga kahimtangan nga ang iban nangayo ukon nagtinguha sa paghimo sing mga pagsulundan?

⁸ Tulumuron man naton sa kongregasyon nga magpalig-unay sa isa kag isa sing mahigugmaon. (1 Tesalonica 5:11) Gani dapat maghalong ang tanan nga Cristiano nga indi pagdugangan ang mga lulan sang iban paagi sa pilit nga pagpatuman sang ila kaugalingon nga mga ideya kon tuhoy sa personal nga desisyon sang iban. Kon kaisa, ang iban nagasulat sa Watch Tower Society nga nagapangabay sing mga pagsulundan sa mga butang subong sang kon paano nila dapat tamdon ang espisipiko nga mga pelikula, mga libro, kag bisan gani ang mga hampanganan. Apang, wala sing awtoridad ang Sosiedad nga usisaon ining mga butang kag hukman ini. Sa masami, mga butang ini nga dapat desisyunan sang tagsa ka indibiduwal ukon ulo sang pamilya, pasad sa iya gugma sa mga prinsipio sang Biblia. May huyog kon kaisa ang iban nga himuon ang mga panugda kag mga panuytoy sang Sosiedad nga mangin mga pagsulundan. Halimbawa, sa Marso 15, 1996 nga guwa sang Ang Lalantawan, may isa ka matahom nga artikulo nga nagapalig-on sa mga gulang sa paghimo sing regular nga pagduaw sa mga katapo sang kongregasyon subong mga manugbantay. Gintuyo bala ini agod maghimo sing mga pagsulundan? Wala. Bisan pa madamo nga benepisyo ang nasapwan sang mga gulang nga nagsunod sining panugda, indi masarangan sang iban nga mga gulang nga himuon ini. Sing kaanggid, ang artikulo nga “Mga Pamangkot Gikan sa mga Bumalasa” sa Abril 1, 1995 nga guwa sang Ang Lalantawan nagpaandam batok sa pagpanubo sang dignidad sang okasyon sang bawtismo paagi sa paghimo sing sobra nga mga butang subong sang magaris nga pagsinalusalo ukon mga selebrasyon. Ginpasobrahan sang iban ang pagsunod sa sining maayong laygay, kag naghimo pa gani sing pagsulundan nga ang pagpadala sing makapalig-on nga kard sa sining okasyon mangin sayop!

9. Ngaa importante nga likawan naton ang mangin sobra ka mamulayon kag mahukmanon sa isa kag isa?

⁹ Binagbinaga man, nga agod “ang himpit nga kasuguan sang kahilwayan” amo ang dapat sundon sa tunga naton, dapat naton batunon nga indi pareho ang konsiensia sang tanan nga Cristiano. (Santiago 1:25) Dapat bala kita maghimo sing hulusayon kon ang mga tawo may indibiduwal nga mga desisyon nga wala nagasumpakil sa Makasulatanhon nga mga prinsipio? Indi. Magatuga kita sing pagbinahinbahin kon himuon naton ini. (1 Corinto 1:10) Si Pablo, sang magpaandam sa aton batok sa paghukom sa isa nga masigka-Cristiano, nagsiling: “Sa iya kaugalingon nga agalon nagatindog ukon nagakapukan sia. Sa pagkamatuod, patindugon sia, kay si Jehova makapatindog sa iya.” (Roma 14:⁠4) May katalagman nga ang Dios indi mahamuot sa aton kon maghambal kita batok sa isa kag isa tuhoy sa mga butang nga dapat desisyunan sang indibiduwal nga konsiensia.​—⁠Santiago 4:​10-12.

10. Sin-o ang gintangdo nga magbantay sa kongregasyon, kag paano naton sila dapat suportahan?

¹⁰ Dapat man naton dumdumon nga ang mga gulang gintangdo sa pagbantay sa panong sang Dios. (Binuhatan 20:28) Yara sila agod magbulig. Indi kita dapat mangalag-ag sa pagpalapit sa ila agod mangayo sing laygay, kay ginatun-an nila ang Biblia kag pamilyar sila sa nabinagbinag na sa mga balasahon sang Watch Tower Society. Kon makita sang mga gulang ang paggawi nga mahimo gid magdul-ong sa paglalis sa Makasulatanhon nga mga prinsipio, walay kahadlok nga ginahatag nila ang kinahanglanon nga laygay. (Galacia 6:⁠1) Ang mga katapo sang kongregasyon nagasunod sa kasuguan ni Cristo paagi sa pagkooperar sa sining ginapakamahal nga mga manugbantay, nga nagapanguna sa tunga nila.​—⁠Hebreo 13:⁠7.

Ginaaplikar sang mga Gulang ang Kasuguan ni Cristo

11. Paano ginaaplikar sang mga gulang ang kasuguan ni Cristo sa kongregasyon?

¹¹ Luyag gid sang mga gulang nga tumanon ang kasuguan ni Cristo sa kongregasyon. Nagapanguna sila sa pagbantala sing maayong balita, nagapanudlo pasad sa Biblia agod matandog ang mga tagipusuon kag, subong mahigugmaon, malulo nga mga manugbantay, nagapakighambal sila sa “ginapung-awan nga mga kalag.” (1 Tesalonica 5:14) Ginalikawan nila ang dicristiano nga mga panimuot sa madamo gid nga relihion sang Cristiandad. Matuod, ang kalibutan karon madasig nga nagalain, kag kaangay ni Pablo, mahimo nga ang mga gulang magbatyag sing kabalaka sa panong; apang nagapabilin sila nga balanse samtang ginaatipan nila ini.​—⁠2 Corinto 11:⁠28.

12. Kon ang isa ka Cristiano magpalapit sa isa ka gulang nga nagapangayo sing bulig, ano ang mahimo sang gulang?

¹² Halimbawa, ayhan luyag pamangkuton sang isa ka Cristiano ang isa ka gulang nahanungod sa isa ka importante nga butang nga wala sing direkta nga sadsaran sa Kasulatan ukon butang nga nagakinahanglan sing pagbalanse sa nanuhaytuhay nga Cristianong mga prinsipio. Ayhan gintanyagan sia sing promosyon sa trabaho nga may mas mataas nga sweldo apang mas daku nga responsabilidad. Ukon ayhan ang isa ka ditumuluo nga amay sang isa ka pamatan-on nga Cristiano pilit nga nagapangayo sa iya anak nga lalaki sing isa ka butang nga mahimo magaapektar sa iya ministeryo. Sa subong sini nga mga kahimtangan nagalikaw ang gulang sa paghatag sing personal nga opinyon. Sa baylo, mahimo gid nga buksan niya ang Biblia kag buligan ang indibiduwal sa pagpangatarungan sa nagakaigo nga mga prinsipio. Mahimo niya gamiton ang Watch Tower Publications Index, kon matigayon ini, sa pagpangita kon ano ang ginsiling sang “matutom kag mainandamon nga ulipon” sa sining tema sa mga pahina sang Ang Lalantawan kag sa iban pa nga mga publikasyon. (Mateo 24:45) Ano, kon sa tapos sini, maghimo ang isa ka Cristiano sing desisyon nga para sa gulang daw indi maalamon? Kon ang desisyon indi direkta nga nagalapas sa mga prinsipio ukon kasuguan sa Biblia, masapwan sang Cristiano nga ginakilala sang gulang ang kinamatarong sang indibiduwal sa paghimo sang amo nga desisyon, kay nahibaluan niya nga ang “tagsa ka tawo magadala sang iya kaugalingon nga lulan.” Apang, dapat dumdumon sang Cristiano nga “kon ano ang ginsab-ug sang isa ka tawo, ini man ang iya anihon.”​—⁠Galacia 6:​5, 7.

13. Sa baylo nga maghatag sing direkta nga sabat sa mga pamangkot ukon sang ila kaugalingon nga mga opinyon, ngaa buligan sang mga gulang ang iban nga mangatarungan sa mga butang?

¹³ Ngaa subong sini ang ginahimo sang isa ka eksperiensiado nga gulang? Bangod sa dimagkubos duha ka rason. Una, ginsugiran ni Pablo ang isa ka kongregasyon nga indi sia ‘ang agalon sang ila pagtuo.’ (2 Corinto 1:24) Paagi sa pagbulig sa iya utod nga mangatarungan sa Kasulatan kag maghimo sang iya kaugalingon nga desisyon, ginailog sang gulang ang panimuot ni Pablo. Ginakilala niya nga may limitasyon ang iya awtoridad, subong nga ginkilala man ni Jesus nga may limitasyon ang iya awtoridad. (Lucas 12:​13, 14; Judas 9) Sa amo man nga tion, ang mga gulang handa sa paghatag sing mabuligon, kag mabaskog pa gani nga Makasulatanhon nga laygay kon kinahanglanon. Ikaduha, ginahanas niya ang iya masigka-Cristiano. Si apostol Pablo nagsiling: “Apang ang pagkaon nga mabaskog naigo sa hamtong nga mga tawo, sa ila nga paagi sa paggamit nahanas ang ila mga ikasarang sa paghantop nga makilala ang husto kag sayop.” (Hebreo 5:14) Busa, agod maghamtong kita, dapat naton gamiton ang aton mga ikasarang sa paghantop, wala pirme nagasandig sa iban nga maghatag sa aton sing sabat. Paagi sa pagpakita sang gulang sa iya masigka-Cristiano kon paano mangatarungan sa Kasulatan, ginabuligan niya nga mag-uswag sia.

14. Paano mapakita sang mga hamtong nga nagasalig sila kay Jehova?

¹⁴ Makatuo kita nga paagi sa iya balaan nga espiritu pahulagon ni Jehova nga Dios ang tagipusuon sang matuod nga mga sumilimba. Amo kon ngaa, ginapukaw sang hamtong nga mga Cristiano ang tagipusuon sang ila kauturan, nagapakiluoy sa ila, subong sang ginhimo ni apostol Pablo. (2 Corinto 8:8; 10:1; Filemon 8, 9) Nahibaluan ni Pablo nga ang mga dimatarong lamang, indi ang mga matarong, ang nagakinahanglan sing detalyado nga kasuguan agod maggawi sila sing nagakaigo. (1 Timoteo 1:⁠9) Nagpakita sia, indi sing suspetsa ukon dipagsalig, kundi sing pagtuo sa iya kauturan. Sa isa ka kongregasyon sia nagsulat: “May pagsalig kami sa Ginuo nahanungod sa inyo.” (2 Tesalonica 3:⁠4) Daku gid ang nahimo sang pagtuo, pagsalig, kag kompiansa ni Pablo agod mapahulag yadtong mga Cristiano. Amo man sini ang tulumuron sang mga gulang kag nagalakbay nga mga manugtatap karon. Daw ano ka makapapagsik ining matutom nga mga lalaki, samtang ginabantayan nila sing mahigugmaon ang panong sang Dios!​—⁠Isaias 32:​1, 2; 1 Pedro 5:​1-3.

Nagakabuhi Ka Bala Suno sa Kasuguan ni Cristo?

15. Ano ang pila ka pakiana nga mapamangkot naton sa aton kaugalingon agod tan-awon kon bala ginaaplikar naton ang kasuguan ni Cristo sa aton kaangtanan sa aton kauturan?

¹⁵ Dapat naton tanan usisaon ang aton kaugalingon sing regular agod tan-awon kon bala nagakabuhi kita suno sa kasuguan ni Cristo kag ginasakdag ini. (2 Corinto 13:⁠5) Sa pagkamatuod, makabenepisyo kita tanan sa pagpamangkot: ‘Makapalig-on bala ako ukon palamulay? Balanse bala ako ukon wala sa lugar? Mapatugsilingon bala ako sa iban ukon ginainsister ko gid ang akon mga kinamatarong?’ Ang isa ka Cristiano wala nagadikta sa iya utod kon ano nga mga tikang ang dapat ukon indi dapat himuon kon tuhoy sa mga butang nga wala ginasambit sing espisipiko sa Biblia.​—⁠Roma 12:1; 1 Corinto 4:⁠6.

16. Paano naton mabuligan ang mga may negatibo nga mga pagtamod sa ila kaugalingon, sa amo ginatuman ang isa ka importante nga bahin sang kasuguan ni Cristo?

¹⁶ Sa sining makahalanguyos nga mga tion, importante nga pangitaon naton ang mga paagi nga makapalig-unay kita sa isa kag isa. (Hebreo 10:​24, 25; ipaanggid ang Mateo 7:​1-5.) Kon ginatulok naton ang aton kauturan nga lalaki kag babayi, indi bala mas importante ang ila maayong mga kinaiya sangsa ila mga kaluyahon? Para kay Jehova, ang tagsatagsa hamili. Sing dimakalilipay, indi tanan nagabatyag sing subong sina, bisan tuhoy sa ila kaugalingon. Madamo ang may huyog nga tan-awon ang ila lamang personal nga mga kasaypanan kag mga dikahimpitan. Agod mapalig-on ini sila​—⁠kag ang iban pa​—⁠sarang bala naton mahambal ang isa ukon duha ka tawo sa kada tion nga may miting, ginapahibalo sila kon ngaa ginapabaloran naton ang ila pagtambong kag ang importante nga butang nga ginahimo nila sa kongregasyon? Daw ano nga kalipay nga pamag-anon ang ila lulan sa sining paagi kag sa amo matuman naton ang kasuguan ni Cristo!​—⁠Galacia 6:⁠2.

Epektibo ang Kasuguan ni Cristo!

17. Sa anong nanuhaytuhay nga paagi makita mo nga epektibo ang kasuguan ni Cristo sa inyo kongregasyon?

¹⁷ Epektibo ang kasuguan ni Cristo sa sulod sang Cristianong kongregasyon. Makita naton ini sa adlaw-adlaw​—⁠kon ang mga masigka-Saksi malangkagon nga nagapaambit sing maayong balita, kon ginalipay nila kag ginapalig-on ang isa kag isa, kon nagapanikasog sila sa pag-alagad kay Jehova walay sapayan sang mabudlay gid nga mga problema, kon ang mga ginikanan nagatinguha gid nga padakuon ang ila kabataan sa paghigugma kay Jehova upod ang malipayon nga tagipusuon, kon ang mga manugtatap nagatudlo sang Pulong sang Dios sing mahigugmaon kag mapagsik, ginapadabdab ang kakugi sang panong sa pag-alagad kay Jehova sing dayon. (Mateo 28:​19, 20; 1 Tesalonica 5:​11, 14) Kon subong mga indibiduwal iaplikar naton ang kasuguan ni Cristo sa aton mismo kabuhi, pat-od gid nga magakalipay ang tagipusuon ni Jehova! (Hulubaton 23:15) Luyag niya nga ang tanan nga nagahigugma sa iya himpit nga kasuguan magkabuhi sing dayon. Sa nagapakari nga Paraiso, makita naton ang tion nga ang katawhan himpit na, isa ka tion nga wala sing mga nagalapas sa kasuguan, kag isa ka tion nga makontrol na ang tagsa ka huyog sang aton tagipusuon. Daw ano ini katahom nga padya sa pagkabuhi suno sa kasuguan ni Cristo!

[Footnote]

Ano sa Banta Ninyo?

◻ Ngaa wala mahangpan sang Cristiandad ang katuyuan sang kasuguan ni Cristo?

◻ Paano naton maaplikar ang kasuguan ni Cristo sa pamilya?

◻ Agod maaplikar naton ang kasuguan ni Cristo sa kongregasyon, ano ang dapat naton likawan, kag ano ang dapat naton himuon?

◻ Paano matuman sang mga gulang ang kasuguan ni Cristo sa ila mga pagpakig-angot sa kongregasyon?

[Retrato sa pahina 23]

Ang inyo bata nagakinahanglan gid sing gugma

[Retrato sa pahina 24]

Daw ano ka makapapagsik ang aton mahigugmaon nga mga manugbantay!