Ang Tanan Bala nga Relihion Nagapahamuot sa Dios?
Nagahunahuna ka bala nga ang tanan nga relihion nagapahamuot sa Dios? Ayhan ang porma sang pagsimba nga pamilyar sa imo nagapalig-on sang maayo nga paggawi, sa dimagkubos sa pila ka kasangkaron. Apang tuman na bala ina sa pagpahamuot sa Dios?
ANG iban nagasiling, ‘Basta mangin sinsero ka lang sa imo pagsimba, mahamuot na ang Dios. May maayo sa tanan nga relihion.’ Halimbawa, ginbaton sang Bahai nga Pagtuluuhan ining pagtamod tubtob sa punto nga ang siam ka pangunang mga relihion sa kalibutan nalakip sa doktrina sini. Nagapati ining relihioso nga grupo nga ining tanan nga relihion naghalin sa Dios kag mga bayhon sang isa ka kamatuoran. Paano ini nangin amo sini?
Isa pa, may rason ikaw sa pagpamangkot kon paano mapahamut-an sang isa ka relihion ang Dios samtang ginasugo sini ang iya mga katapo nga magbutang sing nerve gas sa publiko nga mga duog, lakip ang posibilidad nga madamong tawo ang mapatay. Panumbungon ina batok sa isa ka relihioso nga grupo sa Hapon. Ukon nahamuot bala ang Dios sa isa ka relihion nga nagapahikog sa iya mga katapo? Pila ka tuig na ang nakaligad, natabo ina sa mga sumulunod sang relihiosong lider nga si Jim Jones.
Nagahinumdom sang nagligad nga mga tion, mahimo kita mamangkot, Mapahamut-an bala sang mga relihion ang Dios kon ginapasilabo sini ang inaway, subong sa bahin sang Katluan ka Tuig nga Inaway, nga gin-away halin sang 1618 tubtob sang 1648? Suno sa The Universal History of the World, yadtong relihioso nga inaway sa ulot sang mga Katoliko kag mga Protestante amo ang “isa sang pinakamalubha nga inaway sa maragtas sang Europa.”
Ang relihiosong mga Krusada halin sang ika-11 tubtob ika-13 nga siglo nagresulta man sa makasiligni nga pagpatulo sing dugo. Sa nahaunang Krusada, halimbawa, ginpamatay sing mapintas sang ginatawag nga Cristianong mga krusado ang Muslim kag Judiyong mga pumuluyo sang Jerusalem.
Binagbinaga, man, ang natabo sa tion sang Inkisisyon, nga nagsugod sang ika-13 nga siglo kag naglawig sing mga 600 ka tuig. Linibo ang ginsakit kag ginsunog tubtob sa kamatayon sa mando sang relihiosong mga lider. Sa iya libro nga Vicars of Christ—The Dark Side of the Papacy, si Peter de Rosa nagasiling: “Sa ngalan sang papa, [ang mga inkisidor] amo ang may salabton sa labing mabangis kag mapintas nga pagsalakay sa tawhanon nga kaligdong sa maragtas sang [tawhanon nga] rasa.” Nahanungod sa Dominikano nga inkisidor nga si Torquemada sang Espanya, si De Rosa nagasiling: “Gintangdo sang 1483, naggahom sia sing mapiguson sa sulod sang napulog-lima ka tuig. Ang kadamuon sang iya mga biktima kapin sa 114,000 kag 10,220 sa ila ang ginsunog.”
Sa pagkamatuod, indi lamang ang mga relihion sang Cristiandad ang nakasala sa dugo. Sa iya libro nga Pensées, ang Pranses nga pilosopo nga si Blaise Pascal nagsiling: “Ang mga tawo wala nagahimo sing kalainan sing bug-os kag malipayon subong sang kon ginahimo nila ini bangod sang relihiosong pagtuo.”
Makilala sa Ila mga Bunga
Gikan sa pagtamod sang Dios, ang pagkanahamut-an sang isa ka relihion wala napasad sa isa lamang ka butang. Agod mangin kalahamut-an ang isa ka relihion sa iya, ang mga panudlo kag mga binuhatan sini dapat nga nagahisanto sa iya nasulat nga Pulong sang kamatuoran, ang Biblia. (Salmo 119:160; Juan 17:17) Ang bunga sang pagsimba nga nahamut-an sang Dios dapat nga nagahisanto sa mga talaksan ni Jehova nga Dios.
Sa iya Sermon sa Bukid, ginpakita ni Jesucristo nga may mga manalagna nga magapangangkon sing butig nga nagatiglawas sa Dios. Si Jesus nagsiling: “Magbantay kamo sa dimatuod nga mga manalagna nga nagapalapit sa inyo nga nagapanapot sang panapton sang karnero, apang sa sulod manunukob nga mga lobo sila. Sa ila mga bunga makilala ninyo sila. Ang mga tawo wala nagatipon sing ubas gikan sa mga talungon ukon sing mga igos gikan sa mga ragiwriw, indi bala? Subong man ang tagsa ka maayong kahoy nagapamunga sing maayong bunga, apang ang dunot nga kahoy nagapamunga sing walay pulos nga bunga; ang maayong kahoy indi makapamunga sing walay pulos nga bunga, ukon ang dunot nga kahoy makapamunga sing maayong bunga. Ang tagsa ka kahoy nga wala nagapamunga sing maayong bunga ginapulod kag ginadap-ong sa kalayo. Tunay, nian, sa ila mga bunga makilala ninyo sila.” (Mateo 7:15-20) Ginapakita sining mga pulong nga dapat kita magbantay sa espirituwal. Ayhan magahunahuna kita nga ang isa ka relihiosong lider ukon grupo kalahamut-an sa Dios kag kay Cristo, apang mahimo kita magsala.
Kinahanglan ang Mag-andam
Bisan pa nga ang isa ka relihion nagaangkon nga ginakahamut-an sang Dios kag ang mga ministro sini nagabasa sing mga kasulatan gikan sa Biblia, wala ina nagakahulugan nga isa ini ka porma sang pagsimba nga kalahamut-an sa Dios. Ayhan makahimo pa gani sing makatalandog nga mga butang ang mga lider sini nga daw nagapakita nga ang Dios nagapanghikot paagi sa ila. Walay sapayan sina, ang relihion mahimo gihapon mangin butig, wala nagapatubas sing bunga nga kalahamut-an sa Dios. Ang nagabuhat sing salamangka nga mga saserdote sang Egipto sang panahon ni Moises nakahimo sing makatalandog nga mga butang, apang wala gid mahamuot ang Dios sa ila.—Exodo 7:8-22.
Kaangay man sang nagligad, madamong relihion karon ang nagapasanyog sing tawhanon nga mga ideya kag mga pilosopiya tigaylo nga sakdagon ang ginapahayag sang Dios nga kamatuoran. Nagakaigo labi na, nian, amo ang paandam sang Biblia: “Magbantay: basi may isa nga magatangab sa inyo subong natukob niya paagi sa pilosopiya kag walay unod nga daya suno sa tradisyon sang mga tawo, suno sa nahauna gid nga mga butang sang kalibutan kag indi suno kay Cristo.”—Colosas 2:8.
Pagkatapos mahambalan ang nahanungod sa maayo kag malain nga bunga, si Jesus nagsiling: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang mga langit, kundi ang isa nga nagahimo sang kabubut-on sang akon Amay nga yara sa mga langit. Madamo ang magasiling sa akon sa sina nga adlaw, ‘Ginuo, Ginuo, wala bala kami magpanagna sa imo ngalan, kag magsubol sing mga demonyo sa imo ngalan, kag maghimo sing madamong gamhanan nga buhat sa imo ngalan?’ Apang nian pahayagan ko sila: Wala gid ako makakilala sa inyo! Palayo kamo sa akon, kamo nga mga magbubuhat sing pagkamalinapason.”—Mateo 7:21-23.
Usisaa ang Bunga
Sing maathag, nian, ang bunga sang isa ka relihion kinahanglan tan-awon antes maghinakop nga kalahamut-an ini sa Dios. Pananglitan, nadalahig bala sa politika ang relihion? Nian talupangda ining mga pulong, nga narekord sa Santiago 4:4: “Ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” Dugang pa, si Jesus nagsiling tuhoy sa iya matuod nga mga sumulunod: “Indi sila bahin sang kalibutan, subong nga ako indi bahin sang kalibutan.” (Juan 17:16) Ang relihion nga maayo sa mga mata sang Dios wala nadalahig sa politika sining kalibutan, nga “yara sa gahom sang isa nga malauton,” ang dikitaon nga espirituhanon nga tinuga nga si Satanas nga Yawa. (1 Juan 5:19) Sa baylo, ang relihion nga ginakahamut-an sang Dios mainunungon nga nagasakdag sang iya Ginharian sa idalom ni Jesucristo kag nagawali sang maayong balita nahanungod sinang langitnon nga gobierno.—Marcos 13:10.
Ang isa bala ka relihion kalahamut-an sa Dios kon ginasakdag sini ang civil disobedience (indi pagsunod sa sugo sang gobierno subong isa ka dimasingki nga paagi agod matigayon ang ginapangayo gikan sa gobierno)? Ang sabat maathag kon sundon naton ang laygay ni apostol Pablo: “Padayon sila nga pahanumduma nga magpasakop kag mangin matinumanon sa mga panguluhan kag sa mga awtoridad subong mga gumalahom, nga mangin handa para sa tagsa ka maayong buhat.” (Tito 3:1) Sa pagkamatuod, ginpakita ni Jesus nga ang iya mga sumulunod dapat “magbayad kay Cesar sang mga butang ni Cesar, apang sa Dios sang mga butang sang Dios.”—Marcos 12:17.
Halimbawa ginapalig-on sang isa ka relihion ang pagpakigbahin sa mga inaway sang mga pungsod. Ang 1 Pedro 3:11 nagalaygay sa aton sa “paghimo kon ano ang maayo” kag sa “pagpangita sang paghidait kag sa pagsunod sini.” Paano mapahamut-an sang isa ka relihion ang Dios kon ang mga katapo sini nakahanda sa pagpatay sa ila mga masigkasumilimba sa iban nga pungsod sa inaway? Ang mga katapo sang relihion nga ginakahamut-an sang Dios nagapabanaag sang iya pangunang kinaiya—ang gugma. Kag si Jesus nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Ina nga gugma tuhay gid sa masingki nga pagdumot nga ginapalig-on sa mga inaway sang mga pungsod.
Ginabag-o sang matuod nga relihion ang mga tawo nga mahuyugon sa inaway nga mangin mga mahigugmaon sang paghidait. Gintagna ini sa sining mga pulong: “Salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.” (Isaias 2:4) Sa baylo nga magpaguwa sing mga pulong sang pagdumot, ang mga nagabuhat sing matuod nga pagsimba nagatuman sa sugo: “Higugmaa ang imo isigkatawo subong sang imo kaugalingon.”—Mateo 22:39.
Ang mga nagabuhat sing matuod nga relihion nagapanikasog sa pagkabuhi suno sa mataas nga mga talaksan ni Jehova nga Dios, nagadumili sa paghimo sang imoral nga mga estilo sang pagkabuhi. Ang Pulong sang Dios nagasiling: “Ano! Wala bala kamo makahibalo nga ang dimatarong nga mga tawo indi makapanubli sang ginharian sang Dios. Indi kamo magtalang. Bisan ang mga makihilawason, ukon mga sumilimba sa idolo, ukon mga makihilahion, ukon mga lalaki nga ginahuptan para sa dikinaugali nga mga katuyuan, ukon mga makawat, ukon mga tawo nga mahamkunon, ukon mga palahubog, ukon mga mapasipalahon, ukon mga nagapangilkil indi makapanubli sang ginharian sang Dios. Apang amo sina anay ang pila sa inyo. Apang ginhugasan na kamo sing matinlo, apang ginpakabalaan na kamo, apang ginpahayag na kamo nga matarong sa ngalan sang aton Ginuong Jesucristo kag sa espiritu sang aton Dios.”—1 Corinto 6:9-11.
Tion Para sa Mapinamat-uron nga Pagpanghikot
Kinahanglan mahantop ang kinatuhayan sa ulot sang dimatuod nga pagsimba kag matuod nga relihion. Sa tulun-an sang Bugna sa Biblia, ang bug-os kalibutan nga emperyo sang butig nga relihion nakilal-an subong ang “Babilonia nga Daku,” ang isa ka simbuliko nga babayi nga makihilawason nga “sa iya nakighilawas ang mga hari sa duta.” Nakasala sia sa dugo kag nagauyat sing bulawan nga tagayan nga “puno sing makangilil-ad nga mga butang kag sing dimatinlo nga mga butang sang iya pagpakighilawas.” (Bugna 17:1-6) Wala gid sing butang nga kalahamut-an sa Dios nahanungod sa iya.
Tion ini para sa mapinamat-uron nga pagpanghikot. Sa sinsero nga mga tawo nga yara pa sa Babilonia nga Daku, ang aton mahigugmaon nga Manunuga nagapadala sining panawagan: “Guwa ka sa iya, katawhan ko, kon indi mo luyag makaambit sa iya sa mga sala niya, kag kon indi mo luyag makabaton sing bahin sa iya mga kalalat-an.“—Bugna 18:4.
Kon luyag mo magbuhat sing relihion nga nagapahamuot sa Dios, ngaa indi pangilalahon sing maayo pa ang mga Saksi ni Jehova? Ginalista sang kaupod nga tsart ang pila sang ila mga pagtuluuhan, upod ang Makasulatanhon nga mga rason para sini. Tan-awa ang imo Biblia agod makita kon bala ang mga pagtuluuhan sang mga Saksi nahisuno sa Pulong sang Dios. Mangusisa agod hibaluon kon bala ang ila relihion nagapatubas sang sahi sang bunga nga ginapaabot mo sa matuod nga pagsimba. Kon makita mo ini nga amo sini, nasalapuan mo ang relihion nga nagapahamuot sa Dios.
[Kahon sa pahina 5]
KON ANO ANG GINATUUHAN SANG MGA SAKSI NI JEHOVA
PAGTULUUHAN SADSARAN SA BIBLIA
Ang ngalan sang Dios amo si Jehova Exodo 6:3; Salmo 83:18
Ang Biblia amo ang Pulong sang Dios Juan 17:17; 2 Timoteo 3:16, 17
Si Jesucristo amo ang Anak sang Dios Mateo 3:16, 17; Juan 14:28
Ang tawo wala magtuhaw kundi gintuga Genesis 1:27; 2:7
Ang tawo nagakapatay bangod sang Roma 5:12
sala sang nahaunang tawo Ang kalag wala na nagaluntad Manugwali 9:5, 10;
kon mapatay Ezequiel 18:4
Ang impierno amo ang kinaandan nga Job 14:13; Bugna 20:13,
lulubngan sang tawo King James Version
Ang pagkabanhaw amo ang paglaum Juan 5:28, 29; 11:25;
para sa mga minatay Binuhatan 24:15
Ginhatag ni Cristo ang iya dutan-on Mateo 20:28; 1 Pedro 2:24;
nga kabuhi subong gawad para sa 1 Juan 2:1, 2
matinumanon nga mga tawo
Ang pangamuyo dapat lamang ipatuhoy Mateo 6:9;
kay Jehova paagi kay Cristo Juan 14:6, 13,14
Ang kasuguan sang Biblia nahanungod 1 Corinto 6:9, 10
sa moral dapat tumanon
Ang mga imahen indi dapat gamiton Exodo 20:4-6; 1 Corinto 10:14
sa pagsimba
Ang espiritismo dapat likawan Deuteronomio 18:10-12; Galacia 5:19-21
Ang dugo indi dapat ipasulod sa lawas Genesis 9:3, 4; Binuhatan 15:28, 29
Ang matuod nga mga sumulunod ni Jesus Juan 15:19; 17:16; nahamulag sa kalibutan Santiago 1:27; 4:4
Ang mga Cristiano nagapanaksi, Isaias 43:10-12;
nagawali sang maayong balita Mateo 24:14; 28:19, 20
Ang bawtismo paagi sa bug-os nga Marcos 1:9, 10;
pagtum-oy sa tubig nagasimbulo Juan 3:22;
sa dedikasyon sa Dios Binuhatan 19:4, 5
Ang relihiosong mga titulo Job 32:21, 22;
dimakasulatanhon Mateo 23:8-12
Nagakabuhi kita sa Daniel 12:4; Mateo 24:3-14; “tion sang katapusan” 2 Timoteo 3:1-5
Ang presensia ni Cristo dikitaon Mateo 24:3; Juan 14:19; 1 Pedro 3:18
Si Satanas amo ang dikitaon nga Juan 12:31; 1 Juan 5:19
gumalahom sining kalibutan
Laglagon sang Dios ining malauton Daniel 2:44;
nga sistema sang mga butang Bugna 16:14, 16; 18:1-8
Ang Ginharian sang Dios magagahom Isaias 9:6, 7;
sa duta sa idalom ni Cristo Daniel 7:13, 14;
sa pagkamatarong Mateo 6:10
Ang “diutay nga panong” magagahom Lucas 12:32;
sa langit kaupod ni Cristo Bugna 14:1-4; 20:4
Ang iban nga ginakahamut-an sang Lucas 23:43; Juan 3:16; Dios magabaton sing kabuhi nga Bugna 21:1-4
dayon sa paraiso nga duta
[Retrato sa pahina 4]
Linibo ang ginpatay sang panahon sang mga Inkisisyon
[Retrato sa pahina 6]
Ang mga Krusada nagresulta sa makasiligni nga pagpatulo sing dugo
[Retrato sa pahina 7]
Ang matuod nga relihion makilala sa iya maayo nga bunga
[Credit Line sang retrato sa pahina 2]
Cover: Garo Nalbandian