Ginailog Mo Bala ang Aton Walay Nadampigan nga Dios?

WALAY NADAMPIGAN​—⁠diin ini masapwan? May Isa nga wala gid sing ginadampigan, hilway sa pagpasulabi, paboritismo, kag diskriminasyon. Sia amo si Jehova nga Dios, ang Manunuga sang katawhan. Apang, nahanungod sa mga tawo, ang ika-19 nga siglo nga Ingles nga manunulat nga si ­Charles Lamb nagsulat sing tampad: “Ako, sa maathag nga paghambal, puno sing mga pagpasulabi​—⁠nga nahuman sang mga luyag kag mga indi luyag.”

Kon tuhoy sa pagkawalay nadampigan, ang mga kaangtanan sang tawo nakulangan gid sini. Madamong siglo na ang nakaligad ang maalamon nga si Hari Solomon sang Israel nagsiling nga “gingamhan sang tawo ang tawo sa iya kahalitan.” (Manugwali 8:9) Ang pagdumot sa rasa, pungsudnon nga mga binangig, kag mga away sang pamilya padayon nga nagadugang. Gani, matinuuron gid bala ang magpati nga, sa ila kaugalingon, makapaluntad ang tawo sing walay nadampigan nga katilingban?

Ang mahunahunaon nga panikasog kinahanglan agod punggan ang aton mga panimuot kag dulaon sa aton kaugalingon ang bisan anong nanggamot sing madalom nga mga pagpasulabi. (Efeso 4:​22-24) Sa walay hinalung-ong mahimo nga may mga panimuot kita nga ginporma sang aton sosyal kag edukasyunal nga palibot kag nanggamot sa ginhalinan sang aton pamilya, rasa, kag pungsod. Ining daw mahugmay nga mga huyog masami nga nanggamot sing madalom kag nagapasanyog sing mga panimuot nga nagadul-ong sa pagkamaynadampigan. Ang taga-Scotland nga hurado kag editor nga si Lord Francis ­Jeffrey nagbaton pa gani: “Wala sing butang nga makalikaw sa paghisayod sang tawo sing mas madugay sangsa pagkananggamot sing madalom sang iya mga pagpasulabi.”

Si Lena⁠a isa ka tawo nga nagabaton nga ang mahunahunaon nga pagpanikasog kinahanglan agod mabatuan ang huyog nga magmangin may nadampigan. Ang pag-utod sa mga balatyagon sang pagkamaynadampigan sa aton kaugalingon, siling niya, “nagakinahanglan sing daku nga panikasog bangod isa gid ka makusog nga impluwensia kon paano kita ginpadaku.” Ginabaton man ni Lena nga kinahanglan ang dalayon nga mga pahanumdom.

Ang Rekord Tuhoy sa Pagkawalay Nadampigan ni Jehova

Si Jehova isa ka himpit nga halimbawa sang pagkawalay nadampigan. Kutob sa nagabukas nga mga pahina sang Biblia, mabasa naton kon paano niya ginpakita ang iya pagkawalay nadampigan sa iya mga pagpakig-angot sa katawhan. Madamo kita sing matun-an gikan sining maayo gid nga mga halimbawa kag mga pahanumdom.

Nagpakita si Jehova sing pagkawalay nadampigan sa pagmaniobra sang mga hitabo agod mawali sang Judiyong si apostol Pedro ang maayong balita kay Cornelio kag sa iban pa nga mga Gentil sang 36 C.⁠E. Sadto nga tion, si Pedro nagsiling: “Ang Dios walay ginadampigan, kundi nga sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.”​—⁠Binuhatan 10:​34, 35.

Sa tanan niya nga pagpakig-angot sa tawhanon nga pamilya, dalayon nga ginpakita ni Jehova ang iya pagkawalay nadampigan. Si Cristo Jesus nagsiling tuhoy sa iya Amay: “Nagapasubang sia sang iya adlaw sa mga malauton kag sa mga maayo kag nagapaulan sa mga matarong kag sa mga dimatarong.” (Mateo 5:45) Dugang nga nagadayaw kay Jehova subong isa ka walay ginadampigan nga Dios, si Pedro nagpamatuod: “Mabinatason sia sa inyo bangod indi niya luyag nga ang bisan sin-o malaglag kundi maluyag nga ang tanan makadangat sa paghinulsol.”​—⁠2 Pedro 3:9.

Sadtong panahon ni Noe, sang “ang kalautan sang tawo bugana sa duta kag ang tagsa ka huyog sang mga hunahuna sang iya tagipusuon malaut gid sa tanan nga tion,” ginsugo ni Jehova ang paglaglag sa sadtong kalibutan sang katawhan. (Genesis 6:​5-7, 11, 12) Apang, sa sugo sang Dios kag nasaksihan mismo sang iya mga katubotubo, si Noe naghimo sing arka. Samtang ginahimo nila sang iya mga anak nga lalaki ang arka, si Noe nangin isa man ka “manugbantala sang pagkamatarong.” (2 Pedro 2:5) Walay sapayan nga nakahibalo sang malauton nga huyog sa tagipusuon sadto nga kaliwatan, si Jehova wala sing ginadampigan nga nagpadala sa ila sing maathag nga mensahe. Nag-apelar sia sa ila hunahuna kag tagipusuon paagi sa pagsugo kay Noe sa paghimo sing arka kag sa pagbantala. May kahigayunan gid sila sa pagpamati, apang sa baylo “wala sila magsapak tubtob nga nag-abot ang anaw kag nagdala sa ila nga tanan.”​—⁠Mateo 24:39.

Daw ano kaayo nga halimbawa sang pagkawalay nadampigan ni Jehova! Sa sining ital-ital nga katapusan nga mga adlaw, ang mga alagad sang Dios ginapahulag sa pagwali sang maayong balita sang Ginharian nga may kaanggid nga pagkawalay nadampigan. Dugang pa, wala sila nagaisol sa pagbantala sang adlaw sang pagtimalos ni Jehova. Makita sing bug-os sang publiko, ginabantala nila ang mensahe sing walay nadampigan agod makabati ang tanan.​—⁠Isaias 61:​1, 2.

Ang saad ni Jehova sa mga patriarka nga sanday Abraham, Isaac, kag Jacob nagpamatuod nga isa sia ka walay nadampigan nga Dios. Paagi sa ila espesipiko nga kaliwatan magakari ang Isa nga gintangdo nga paagi sa iya ‘ang tanan nga pungsod sa duta magapakamaayo sang ila kaugalingon.’ (Genesis 22:​18; 26:​4; 28:14) Si Cristo Jesus amo inang Isa nga gintangdo. Paagi sa kamatayon kag pagkabanhaw ni Jesus, nag-aman si Jehova sing dalan sang kaluwasan para sa tanan matinumanon nga katawhan. Huo, ang mga kapuslanan sang halad-gawad ni Cristo matigayon sing walay nadampigan.

Sang panahon ni Moises, ang pagkawalay nadampigan ni Jehova nakita sa labing makawiwili nga paagi may kaangtanan sa mga anak nga babayi ni Zelofehad. Problema sining lima ka babayi ang nahanungod sa palanublion sang ila amay sa Ginsaad nga Duta. Bangod ini sang kinabatasan sa Israel nga ang palanublion nga duta ipasubli lamang paagi sa mga anak nga lalaki sang isa ka tawo. Apang, napatay si Zelofehad nga wala sing anak nga lalaki nga mabilinan sing palanublion. Gani gindala sang lima ka anak nga babayi ni Zelofehad ang ila pangabay para sa walay nadampigan nga pagtratar sa atubangan ni Moises, nga nagasiling: “Ngaa bala panason ang ngalan sang amon amay sa tunga sang iya panimalay bangod nga wala sia sing anak nga lalaki? Hatagi kami sing panublion sa tunga sang mga utod nga lalaki sang amon amay.” Ginpamatian ni Jehova ang ila mga pangabay kag nagsugo kay Moises: “Kon ang isa ka tawo mapatay kag wala sia sing anak nga lalaki, nian ihatag ninyo ang iya panublion sa iya anak nga babayi.”​—⁠Numeros 27:​1-11.

Daw ano gid ka mahigugmaon kag walay nadampigan nga sulundan! Agod pat-uron nga ang panublion sa tribo indi maliton sa pihak nga tribo kon mamana ang anak nga mga babayi, ginsugo sila nga mamana lamang sa “pamilya sang tribo sang ila mga amay.”​—⁠Numeros 36:​5-12.

Ang dugang pa nga paghangop sa pagkawalay nadampigan ni Jehova makita sang panahon sang hukom kag sang manalagna nga si Samuel. Ginsugo sia ni Jehova nga haplasan ang bag-ong hari sang tribo ni Juda sa pamilya ni Jesse nga taga-Betlehem. Apang si Jesse may walo ka anak nga lalaki. Sin-o ang haplasan subong hari? Si Samuel nagdayaw sa hitsura ni Eliab. Apang, wala mahaylo si Jehova sa pangguwa nga hitsura. Ginsugo niya si Samuel: “Dili ka magtulok sa iya nawong ukon sa iya kataason . . . Kay si Jehova nagatan-aw indi subong sang pagtan-aw sang tawo, bangod ang tawo nagatulok sa guwa lamang nga dagway; apang tuhoy kay Jehova, nagatulok sia kon ano ang yara sa tagipusuon.” Si David, ang kinagot nga anak nga lalaki ni Jesse, amo ang napili.​—⁠1 Samuel 16:​1, 6-13.

Pagtuon Gikan sa Pagkawalay Nadampigan ni Jehova

Maayo nga ilugon sang Cristianong mga gulang si Jehova paagi sa pagtan-aw sa espirituwal nga mga kinaiya sang masigkatumuluo. Mahapos nga hukman ang isa ka indibiduwal suno sa aton kaugalingon nga mga talaksan, nagatugot nga padulmon sang aton personal nga mga balatyagon ang aton desisyon. Subong sang ginsiling sang isa ka gulang, “Ginatinguhaan ko nga pakig-angutan ang iban sa paagi nga nagapahamuot kay Jehova, indi pasad sa akon kaugalingon nahunahuna na nga daan nga mga ideya.” Daw ano ka mapuslanon para sa tanan nga alagad ni Jehova nga gamiton ang iya Pulong subong ang ila talaksan!

Ang nasambit na nga mga halimbawa sa Biblia nagabulig sa aton nga pamatukan ang madugay na nga mga balatyagon sang pagpasulabi sa rasa ukon pungsod. Paagi sa pag-ilog sa pagkawalay nadampigan ni Jehova, ginaamligan naton ang Cristianong kongregasyon gikan sa pagpasulabi, diskriminasyon, kag paboritismo.

Nahibal-an ni apostol Pedro nga “ang Dios walay nadampigan.” (Binuhatan 10:34) Ang paboritismo amo ang kaaway sang pagkawalay nadampigan kag nagasupak sa prinsipio sang gugma kag paghiusa. Si Jesus nagganyat sa mga imol, sa mga maluya, kag sa mga kubos, kag ginpamag-an niya ang ila lulan. (Mateo 11:​28-30) Tuhay gid sia sa Judiyong relihiosong mga lider, nga nagpakaginuo sa katawhan, nagpapas-an sa ila sing mabug-at nga lulan sang mga pagsulundan. (Lucas 11:​45, 46) Ang paghimo sini kag ang pagpakita sing paboritismo sa manggaranon kag mga prominente wala gid nagahisanto sa mga panudlo ni Cristo.​—⁠Santiago 2:​1-4, 9.

Karon, ang Cristianong mga gulang nagapasakop sa pagkaulo ni Cristo kag nagapakita sing pagkawalay nadampigan sa tanan nga dedikadong katawhan ni Jehova. Samtang ‘ginabantayan nila ang panong sang Dios nga ginaatipan nila,’ wala sila nagapakita sing paboritismo pasad sa tindog sa pangabuhi, mga kinatuhayan sa personalidad, ukon mga kaangtanan sa pamilya. (1 Pedro 5:2) Paagi sa pag-ilog sa walay nadampigan nga Dios kag sa pagpamati sa paandam niya batok sa mga buhat sang paboritismo, ginapasanyog sang Cristianong mga gulang ang espiritu sang pagkawalay nadampigan sa kongregasyon.

Ang Cristianong kongregasyon sang mga Saksi ni Jehova isa ka internasyonal nga paghiliutod. Amo ini ang buhi nga pamatuod nga ang walay ginapasulabi, walay ginadampigan nga katilingban mahimo mangin katunayan sa idalom sang pagtuytoy ni Jesucristo. ‘Ginsuklob [sang mga Saksi] ang bag-ong personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.’ (Efeso 4:24) Huo, nagatuon sila gikan sa himpit nga halimbawa sang walay nadampigan nga Dios, nga si Jehova, kag may paglaum nga mabuhi sing dayon sa bag-ong kalibutan nga hilway sa tanan nga pagkamaynadampigan.​—⁠2 Pedro 3:⁠13.

[Footnote]

[Retrato sa pahina 26]

Nahibal-an ni apostol Pedro nga ang Dios wala sing ginadampigan