Ang mga Mensahero sang Diosnon nga Paghidait Nagatipon
“NAPALIG-ON kami sang kada distrito nga kombension nga natambungan namon,” siling sang isa ka Cristianong gulang halin sa Estados Unidos. “Apang, ang karon nga tuig indi gid malaragway. Nagapauli kami kada adlaw nga nagapalibog kon paano labawan sang masunod nga adlaw ang amon mga ginapaabot, kag wala kami mapaslawan!”
Kon nakatambong ka sa isa sang “Mga Mensahero sang Diosnon nga Paghidait” nga Distrito nga mga Kombension, pat-od gid nga magaugyon ka sa sining makunyagon nga delegado. Ang tagsa ka adlaw sang kombension nasentro sa isa ka tuhay nga bahin sang hilikuton nga ginahimo sang mga Saksi ni Jehova subong mga mensahero sang Dios. Repasuhon naton ang tatlo-ka-adlaw nga programa.
“Daw Ano Katahom . . . sang Isa nga Nagabantala sing Paghidait”
Amo ini ang tema sang nahaunang adlaw sang kombension. Pasad ini sa Isaias 52:7. Sa sining mabudlay nga mga tion, madamo ang nagaalagad kay Jehova sa idalom sang makahalangkat nga mga kahimtangan. Ang pamulongpulong nga “Pagpamati Gikan sa Makugi nga mga Manugbantala sang Paghidait” naglakip sing mga interbyu sa pila sining mga matutom. Ang pagpamati sa ila personal nga mga eksperiensia makapalig-on gid, kag sa amo ang mga kombensionista ginpasalig nga pabakuron man sila ni Jehova, nagahatag pa gani sing “gahom nga labaw sa kinaandan” agod buligan sila nga makabatas.—2 Corinto 4:7.
Ang mga ginapatuman ni Jehova indi makapabug-at. (1 Juan 5:3) Gin-athag ini sa katapusan nga pamulongpulong sa programa sang aga, nga ang talipuspusan amo ang pagpaguwa sa 32-pahina nga brosyur nga natig-uluhan sing Ano ang Ginapatuman sang Dios sa Aton? Ining may matahom sing laragway nga bag-ong bulig sa pagtuon walay duhaduha nga may importante nga papel sa pagbulig sa madamo pa nga makatuon nahanungod sa mga katuyuan sang Dios. Ang mga komento tuhoy sa paggamit sa sining bag-ong publikasyon masapwan sa katapusan nga artikulo nga tulun-an sa sining magasin kag sa pahina 16 kag 17.
Ginpadaku sang pamulongpulong nga “Pagbatas sa Hilikuton nga Maayo” nga nakahibalo gid si Jehova sang aton mga pagtilaw. Ang pagbatas nagakahulugan nga malig-on kita sa aton panindugan kag wala nagakadulaan sing paglaum. Ginhatag ni Jehova sa aton ang iya Pulong, ang iya espiritu, kag ang iya organisasyon agod buligan kita. Kinahanglan ang pagbatas agod magbantala, apang ang pagbantala nagabulig sa aton sa pagbatas, kay ginahuptan sini nga buhi ang aton pagtuo. Bangod tuman na kalapit sa inangan, indi naton dapat pagtugutan ang mga problema nga magapaluya sang aton kakugi, kay ang mga nagabatas tubtob sa katapusan amo lamang ang maluwas.—Mateo 24:13.
Ang keynote address, “Ang Aton Katungdanan Subong mga Mensahero sang Diosnon nga Paghidait,” nagpatalupangod sang paghilway sa Judiyong mga tinapok gikan sa Babilonia kag sang pagpasag-uli sang putli nga pagsimba sa Jerusalem sang 537 B.C.E. Ining hitabo, paathag sang humalambal, isa lamang ka pagsid-ing sa kon ano ang himuon sang Ginharian sang Dios sa dili madugay sa bug-os kalibutan nga kasangkaron. (Salmo 72:7; Isaias 9:7) Ang aton karon nga hilikuton amo ang ibantala ang maayong balita nahanungod sini nga Ginharian kag ang pagkabuhi nahisuno sina nga mensahe. Ang gugma sa Dios kag sa isigkatawo dapat magpahulag sa aton nga magpadayon sa sining hilikuton sing walay langan.—Binuhatan 5:42.
Ang talalupangdon nga bahin sa programa sang Biernes amo ang simposium nga “Mag-andam sa Natago nga mga Siod sang Kalingawan.” Ang mga musika, sine, video, programa sa telebisyon, hampang sa video, libro, magasin, kag komiks karon masunson nagapakita sing yawan-on nga panghunahuna. Busa, dapat naton ‘kangil-aran ang malaut’ kag ‘pangapyutan ang maayo.’ (Roma 12:9) Huo, dapat naton kangil-aran ang malaw-ay nga kalingawan kag likawan ini, samtang ginahunahuna naton ang mga butang nga putli, balaan, kag dalayawon. (Filipos 4:8) Ang mga publikasyon kag mga kagamitan sa panalawsaw nga gin-aman sang organisasyon ni Jehova nagapapagsik sang aton hunahuna sing makapalig-on nga mga panghunahuna kag nagahanas sa aton sa pagkilala sang husto gikan sa sala. (Hebreo 5:14) Dapat kita manguyapot sa sining mga aman subong sang pagpanguyapot naton sa isa ka balsa sa mabalod nga dagat.
Ang masunod amo ang pamulongpulong nga “Sumpunga ang Yawa—Indi Pagtuguti nga May Kaagaw.” Antes gid lamang sila makasulod sa Ginsaad nga Duta, linibo ka Israelinhon ang nasiod sa imoralidad. Wala pagtuguti ni Finehas nga may kaagaw sa matuod nga pagsimba. Nagpanghikot sia sing mapinamat-uron batok sa mga nagahimo sing sala, kag ang iya eksklusibo nga debosyon nagpahamuot kay Jehova. (Numeros 25:1-13) Ang tulumuron ni Satanas amo ang paghimo sa kada isa sa aton nga indi nagakabagay nga makasulod sa bag-ong kalibutan sang Dios. Busa kaangay ni Finehas, dapat naton pamatukan ang mga panikasog sang Yawa nga dagtaan kita. Minyo man ukon indi, dapat kita ‘magpalagyo sa pakighilawas.’—1 Corinto 6:18.
Ang “Matutom nga Pagsakdag sa Integridad sang Pulong sang Dios” amo ang nagatakop nga pamulongpulong sa nahaunang adlaw sang kombension. Ginaislan ukon ginalaktawan sang madamong manugbadbad ang mga bahin sang Kasulatan. Halimbawa, agod lugpayan ang mga sumalakdag sing mga kinamatarong sang kababayin-an, ginpatuhuyan sang mga manugbadbad sang The New Testament and Psalms: An Inclusive Version ang Dios, indi subong Amay, kundi subong Amay-Iloy kag si Jesus subong “ang Isa nga Tawo” sa baylo nga “Anak sang tawo.” Sa kabaliskaran, matutom gid nga ginasunod sang New World Translation ang teksto sa orihinal nga pinulungan sa bagay nga gin-athag sini sa aton hunahuna ang madamong Makasulatanhon nga butang. Halimbawa, ang humalambal nagsiling: “Ang sibu nga pagbadbad sa New World Translation amo ang nangin sadsaran sa pag-organisar naton liwat sa mga kongregasyon paagi sa pagtangdo sing mga hubon sang mga gulang, nga nahisanto sing mas suod sa sulundan nga ginpatok sang nahaunang-siglo nga Cristianong kongregasyon.” Ginapakita naton ang aton pagkamainunungon sa Pulong sang Dios paagi sa pagbasa sini adlaw-adlaw kag paagi sa pag-aplikar sang laygay sini. Ang humalambal nagsiling man: “Ginapakita naton nga matutom kita nga mga sumalakdag sang Pulong sang Dios paagi sa makugi nga pagbantala sini sa iban kag paagi sa paggamit sini sing mahalungon samtang nagatudlo kita sa iban, wala nagatinguha nga ipauyon ini sa aton mga ideya paagi sa pagpatiko ukon sa pagdugangdugang sa kon ano ang ginasiling sini.”
‘Ang Paghidait sang Dios Nagalabaw sa Tanan nga Panghunahuna’
Ining tema, pasad sa Filipos 4:7, nagahisanto sa ikaduha nga adlaw sang kombension. Ang kalabanan nga impormasyon nga ginhatag naghinun-anon nahanungod sa nagakaigo nga pagtamod sa ministeryo, pamilya, dedikasyon, kag iban pa nga bahin sang adlaw-adlaw nga pagkabuhi sang isa.
Pagkatapos sang paghinun-anon sang teksto sa adlaw, ginhatag ang isa ka simposium nga natig-uluhan “Mga Mensahero nga Nagadala sang Maayong Balita sang Paghidait.” Ang aton mensahe amo ang tuhoy sa paghidait, kag dapat ini ihatag sa mahidaiton nga paagi. (Efeso 6:15) Ang aton tulumuron amo ang pagdaug sa mga tagipusuon, indi sa mga argumento. Ang paghanas kag ang mga publikasyon nga nabaton naton gikan sa organisasyon ni Jehova nagabulig sa aton nga mahimo gid ina. Indi naton dapat pagtugutan nga maluyahan kita sing buot bangod sang pagpasapayan ukon di-pagsapak. Sa baylo, padayon naton nga ‘himuon ang aton bug-os nga masarangan,’ nga may mapagros nga rutina sang personal nga pagtuon, pagtambong sa mga miting, kag pagpakigbahin sa pagbantala nga hilikuton. (2 Timoteo 2:15) Indi dapat pasapayanan amo ang paghimo sing maayo sa iban, labi na sa mga may kaangtanan sa aton sa pagtuo. (Galacia 6:10) Sa pagkamatuod, ang paghimo sang aton bug-os nga masarangan wala nagakahulugan sing paglapyo sang aton kaugalingon. Kon ano ang masarangan nga himuon sang kada isa suno sa iya kaugalingon nga ikasarang kag kahimtangan kalahamut-an kay Jehova.
Ginahatag sang katawhan sang Dios ang ila tion, enerhiya, kag manggad sa pagpauswag sang mga interes sang Ginharian. Ginpakita sang pamulongpulong nga “Malipayon nga Paghatag sa Sulod sang Organisasyon ni Jehova” nga bangod madamo pa nga katulad-karnero ang nagapamati sa mensahe sang Ginharian, kinahanglan ang dugang nga kasangkapan, mga duog-tilipunan, kag mga pasilidad sang sanga. Ang aton mga amot nagabulig sa organisasyon nga may magamit ini para sa kon ano man ang kinahanglan agod mahimo ang bug-os kalibutan nga pagbantala nga hilikuton. Ang maalwan nga paghatag nagapadungog man kay Jehova kag nagahatag sing kalipay sa nagahatag. Busa, subong mga Cristiano indi naton dapat patumbayaan ining importante nga bahin sang aton pagsimba.—2 Corinto 8:1-7.
Naghinakop sa sesyon sang aga amo ang pamulongpulong sa bawtismo—ang talalupangdon nga bahin pirme sa dalagku nga pagtinipon sang mga Saksi ni Jehova. Daw ano nga kalipay nga makita ang mga bag-ong dedikado nga nagasunod sa tikang ni Jesus paagi sa pagpabawtismo sa tubig! (Mateo 3:13-17) Ang tanan nga naghimo sining tikang gintudluan sa ginhalinan sang labing daku nga kaalam—ang Biblia. Dugang pa, nasapwan nila ang tunay nga katuyuan sa kabuhi, kag ginpakamaayo sila sing paghidait nga nagagikan sa paghibalo nga ginahimo nila ang husto.—Manugwali 12:13.
Ang nagahisanto nga laygay ginhatag sa pamulongpulong nga “Tuguti ang Paghantop sa Pag-amlig sa Imo.” Ang paghantop tuman ka importante kon tuhoy sa mga transaksion sa negosyo. Indi kita dapat magnegosyo sa sulod sang Kingdom Hall, ukon maghingalit sa aton mga masigka-Cristiano para sa pinansial nga daug. (Ipaanggid ang Juan 2:15, 16.) Kinahanglan man ang paghantop kon nagapuhunan sa isa ka negosyo ukon kon nagahulam ukon nagapahulam sing kuwarta. “Ang kapierdihan sa mga negosyo sa tunga sang mga Cristiano nagdul-ong sa kapaslawan kag sa pagkadula pa gani sang espirituwalidad sang pila nga nagsulod sing padasudaso sa makatalagam nga mga padugi agod makakuwarta sing madasig,” siling sang humalambal. Bisan pa nga indi malain para sa mga Cristiano ang magsosyohanay, ang paghalong maalamon gid. Kag kon ginahimo ang kasugtanan sa negosyo sa tunga sang duha ka partido, ang mga kasugtanan dapat pirme isulat.
Ang talaksan sang Dios para sa mga lalaki kag mga babayi ginhinun-anunan sa pamulongpulong nga “Gintuga Sila nga Lalaki kag Babayi.” Ang papel sang mga sekso ginpatiko sa bug-os nga maragtas. “Ginahangop sing sayop sang madamo ang pagkalalaki subong mapintas nga pagdumala, pagkamaisog, ukon pagkamadaugdaugon,” siling sang humalambal. “Sa pila ka kultura malaka, makahuluya pa gani, para sa isa ka lalaki nga maghibi sa publiko ukon bisan sa pribado. Apang, ginasugid sang Juan 11:35 nga sa tunga sang kadam-an sa guwa sang lulubngan ni Lazaro, ‘si Jesus naghibi.’ ” Kamusta ang mga babayi? Ang pagkababayi masunson nga ginapaanggid sa pisikal nga katahom. Apang ang humalambal namangkot: “Kon ang isa ka babayi matahom apang indi makatarunganon kag palabais, mamulayon, ukon bugalon, matahom gid bala sia, tunay nga babayi?” (Ipaanggid ang Hulubaton 11:22; 31:26.) Sa ila hambal, paggawi, kag pamustura, ginapanikasugan sang Cristianong mga lalaki kag mga babayi nga sundon ang mga talaksan sang Biblia. Ang humalambal nagsiling: “Ang lalaki nga nagapakita sing mga bunga sang espiritu mahapos tahuron, kag ang babayi nga nagahimo sini mahapos higugmaon.”—Galacia 5:22, 23.
Ang masunod amo ang simposium nga “Ang Dios sang Paghidait Nagaulikid sa Imo.” Madamong Cristiano ang may pinansial nga mga kabalaka. Walay sapayan, si Jehova nagasaad: “Indi ko ikaw nga mas-a pagbayaan ukon pagpatumbayaan ko ikaw.” (Hebreo 13:5) Walay sapayan sang mga kabudlayan sa pangabuhi, madamo ang nagpakita sing pagsalig sa sining saad paagi sa pagsulod sa auxiliary ukon regular payunir nga pag-alagad. Ang iban nga indi karon makapayunir nagauna sang mga interes sang Ginharian paagi sa paghimulos sang tanan nga kahigayunan agod makapanaksi. (Mateo 6:33) Ining tanan nga panikasog takus dayawon! Ang organisasyon ni Jehova nag-aman sing madamong publikasyon agod tabangan kita sa aton ministeryo kag agod buligan kita sa pag-atubang sa aton mga problema. Kon ginapabilihan naton ang espirituwal nga mga aman ni Jehova, bulahanon niya kita sing paghidait sa sining magarot sing pangabuhi nga mga tion.—Salmo 29:11.
Sa talipuspusan sang katapusan nga pamulongpulong sa adlaw, “Himud-usi ang Diosnon nga Paghidait sa Pagkabuhi sang Pamilya,” ang mga kombensionista nalipay nga makabaton sing bag-ong libro nga Ang Sekreto sang Kalipay sa Pamilya. “Tun-i sing makugi ining libro sing personal ukon subong mga pamilya,” laygay sang humalambal. “Panikasugi sing hanuot nga iaplikar ang pasad-sa-Biblia nga laygay sini, kag makapat-od kamo nga magadugang ang paghidait kag kalipay sang inyo pamilya.”
“Sundon ang Pagkaisa . . . sang Nagahiusa nga Higot sang Paghidait”
Pasad sa Efeso 4:3, amo ini ang nagakaigo nga tema para sa katapusan nga adlaw sang kombension. Ang mga Saksi ni Jehova, nga naghalin sa tanan nga kapungsuran sa kalibutan, gintudluan sang Dios. Busa, ginahigugma nila ang paghidait. Ginasunod nila ang halimbawa ni Jesus kag ginapanikasugan nga “sundon ang pagkaisa sang espiritu kag sang nagahiusa nga higot sang paghidait.”
Ang paghidait nga lapnag sa organisasyon sang Dios ginpadaku sa simposium nga “Pagkilala sa Husto nga Sahi sang mga Mensahero.” May yara anay butig nga mga manalagna sa dumaan nga Israel. Apang, ang matuod nga mga mensahero sang Dios—subong sang mga manalagna nga sanday Isaias, Ezequiel, kag Jeremias—nagtagna sing sibu sang pagkapukan sang Jerusalem, sang panag-on sang pagtapok, kag sang ulihi nga paghilway sa katawhan sang Dios. Ang kaanggid nga kahimtangan nagaluntad man karon. May madamong butig nga manalagna sa politika kag butig nga relihion. Apang, si Jehova nagbangon sing mga Saksi niya sa pagwali sang iya katuyuan may kaangtanan sa sining sistema sang mga butang. Labi na sang 1919, ang mga alagad ni Jehova gingamit sa pagwali sing mensahe sang Dios. Tuhay gid sila sa butig nga mga mensahero sang Cristiandad! Kabay nga himuon naton sing makugi ang aton bahin sa sining hilikuton tubtob magasiling si Jehova nga ini natapos na.
Ang pamulongpulong nga “Pamatii kag Tumana ang Pulong sang Dios” nagpadaku nga ang mga Kasulatan amo ang labing daku nga ginhalinan sang panuytoy, lugpay, kag paglaum. (Isaias 30:20, 21; Roma 15:4) Ang kalibutan karon nangin labi ka matinuguton. Gani, bangod sini, labi pa karon nga kinahanglan naton nga pamatian ang laygay gikan sa Pulong kag organisasyon sang Dios. Nahibaluan ni Jehova ang aton mga kaluyahon, kag maathag niya nga ginbalay sa iya Pulong ang dalanon nga makabulig sa aton. Ang pagkahibalo nga si Jehova nagasakdag sa aton nagahatag sa aton sing pagsalig nga mag-uswag sa bisan anong butang nga ginapangabay niya sa aton.
Ginhanda sini ang hunahuna sang tumalambong sa nagsunod nga drama nga ang mga may bahin nagapanapot suno sa pamayo sadto nga panahon. Natig-uluhan ini nga “Ngaa Dapat Tahuron ang Teokratikong mga Kahimusan?” Nagagamit sang sugilanon ni Gideon sa Biblia subong sadsaran, ginpadaku sing tudok sining presentasyon ang makusog nga leksion—dapat naton sundon ang mga instruksion sang Dios kag indi pag-ibulos ang aton kaugalingon nga panghunahuna ukon tinguhaan nga ipahigad ang teokratikong laygay.
Ang diskurso publiko amo ang tuhoy sa topiko nga “Matuod nga Paghidait sa Ulihi!—Gikan Diin?” Ang paghidait nga ginsaad sang Dios nagalabaw sa bisan ano nga sarang mahanduraw sining kalibutan. “Ang matuod nga paghidait nagakahulugan sing paghidait kada adlaw,” siling sang humalambal. “Ang paghidait sang Dios nagakahulugan sing isa ka kalibutan nga wala sing balatian, kasakit, kasubo, kag kamatayon.” Ang Biblia nagasugid sa aton nga “ginapatunong [ni Jehova] ang mga inaway tubtob sa ukbong sang duta.” (Salmo 46:9) Paano niya ini himuon? Paagi sa pagdula sa manugsugyot sang inaway, si Satanas nga Yawa. (Bugna 20:1-3) Magabukas ini sang dalan para ang mga mahagop ‘magapanag-iya sang duta kag magakalipay sa kabuganaan sang paghidait.’—Salmo 37:11.
Pagkatapos sang sumaryo sa artikulo nga tulun-an sa Lalantawan para sa semana, ang katapusan nga pamulongpulong para sa kombension ginhatag. Natig-uluhan sing “Pag-abante Subong mga Mensahero sang Diosnon nga Paghidait,” ining makapulukaw nga diskurso nagpadaku nga ang aton pagbantala nga hilikuton pinasahi kag hilingagawon. Indi karon ang tion sa pagpahunayhunay, pagligoy, ukon pagbalik sa sayop nga mga ideya. Ginsangkapan kita sang aton kinahanglanon—ang mensahe sang Dios, ang iya balaan nga espiritu, kag ang madamong aman gikan sa iya mahigugmaon nga teokratikong organisasyon. Busa, subong mga alagad ni Jehova, kabay nga magaabante kita subong mga mensahero sang diosnon nga paghidait!
[Kahon/Mga piktyur sa pahina 9]
Isa ka Mahigugmaon nga Aman Para sa mga Pamilya
Ang mga nagtambong sa ikaduhang adlaw sang “Mga Mensahero sang Diosnon nga Paghidait” nga Distrito nga Kombension nalipay sa pagbaton sa bag-ong publikasyon nga natig-uluhan sing Ang Sekreto sang Kalipay sa Pamilya. Ini nga libro nagaunod sing Makasulatanhon nga impormasyon nga makabulig sa tanan nga pamilya nga nagahigugma sa Dios.
Ang isa ka gulang nga taga-Connecticut, E.U.A., nagakomento: “Sang Hunyo 15, nabaton namon ang amon Kalipay sa Pamilya nga libro. Sang Hunyo 16, katunga na sini ang nabasa ko. Sang ika-17, ginhimo namon ang amon nahaunang pangpamilya nga pagtuon sa sini, kag napalig-on gid kami! Sadto man nga adlaw, natapos ko ang pagbasa sa libro. Ining matahom nga publikasyon pat-od gid nga pakamahalon sang tanan nga may yari sini. Ang bunayag kag sibu-sa-tion nga impormasyon sang libro nagahatag sing dugang nga pamatuod nga ‘ang matutom kag mainandamon nga ulipon’ nagahatag sing ‘pagkaon sa nagakaigo nga tion’ kag nakahibalo gid sang aton mga kinahanglanon sa sining mabudlay nga mga tion.”—Mateo 24:45-47.
[Kapsion sa pahina 7]
Luyag mahibaluan sang bata kag tigulang ang ginapatuman sang Dios