Kon ang Pag-antos Wala Na
ANG pag-antos indi bahin sang orihinal nga katuyuan sang Dios para sa tawhanon nga pamilya. Wala niya ini gintuyo, ukon naluyagan niya ini. ‘Kon amo,’ ipamangkot mo, ‘paano ini nagsugod, kag ngaa gintugutan ini sang Dios nga magpadayon tubtob karon?’—Ipaanggid ang Santiago 1:13.
Ang sabat makita sa pinakadumaan nga rekord sa maragtas sang tawo, ang Biblia, ilabi na sa tulun-an sang Genesis. Ini nagasiling nga ginsunod sang aton nahaunang mga ginikanan, nga sanday Adan kag Eva, si Satanas nga Yawa sa iya pagrebelde batok sa Dios. Ang ila ginhimo nagpautwas sing pangunang mga hulusayon nga nagsalakay sa pinakasadsaran sang bug-os uniberso nga kasuguan kag kahim-ong. Sang gin-angkon nila ang kinamatarong nga mamat-od kon ano ang maayo kag kon ano ang malain para sa ila kaugalingon, ginhangkat nila ang pagkasoberano sang Dios. Ginpangduhaduhaan nila ang iya kinamatarong sa paggahom kag mangin ang nagaisahanon nga hukom sang “maayo kag malain.”—Genesis 2:15-17; 3:1-5.
Ngaa Wala Gilayon Ginpatuman ang Iya Kabubut-on?
‘Ngaa, nian, wala gilayon ginpatuman sang Dios ang iya kabubut-on?’ mahimo ipamangkot mo. Para sa madamo, daw tuman lamang ini ka simple nga butang. ‘Ang Dios may gahom. Dapat niya ini gingamit sa paglaglag sa mga rebelde,’ siling nila. (Salmo 147:5) Apang pamangkuta ang imo kaugalingon sini, ‘Walay pangalag-ag bala ako nga nagaugyon sa tanan nga nagagamit sing superyor nga gahom sa pagpatuman sang ila kabubut-on? Indi bala nga duna ako nga nagabatyag sing pagpamatok kon ang isa ka diktador nagagamit sing mga death squad sa paghapay sa iya mga kaaway?’ Ang kalabanan nga tawo indi maluyag sini nga butang.
‘A,’ isiling mo, ‘apang kon gamiton sang Dios ina nga gahom, wala sing isa nga makapangduhaduha sa iya mga ginahimo.’ Nakapat-od ka bala? Indi bala nga ginapangduhaduhaan sang mga tawo ang paggamit sang Dios sa gahom? Ginapangduhaduhaan nila kon ngaa wala niya ini ginagamit kon kaisa, subong sa pagtugot niya sa kalautan. Kag ginapangduhaduhaan nila kon ngaa ginagamit niya ini sa iban nga tion. Bisan ang matutom nga si Abraham nagpalibog sa paggamit sang Dios sing gahom batok sa Iya mga kaaway. Hinumduma sang namat-od ang Dios nga laglagon ang Sodoma. Sayop nga nagkahangawa si Abraham nga basi mapatay ang maayo nga mga tawo kaupod sang mga malain. Sia nagtu-aw: “Indi gid mahunahuna sa imo nga himuon mo ang subong sini nga patyon ang matarong nga tawo upod sa isa nga malauton.” (Genesis 18:25) Bisan ang may husto sing panghunahuna nga mga tawo kaangay ni Abraham nagakinahanglan sing pasalig nga ang bug-os nga gahom indi pagaabusuhan.
Sa pagkamatuod, mahimo kuntani nga ginlaglag gilayon sang Dios sanday Adan, Eva, kag Satanas. Apang hunahunaa lamang kon ano ang epekto sina sa iban pa nga mga anghel ukon sa palaabuton nga mga tinuga, nga makahibalo sa ulihi sang mga ginhimo niya. Indi ayhan nga pirme nila pangduhaduhaan ang pagkamatarong sang paggahom sang Dios? Indi ayhan ini magapadayag sa Dios sa panumbungon nga sia, sa katunayan, isa ka sahi sang totalitaryan nga manugpigos, subong sang paglaragway sa iya ni Nietzsche, isa ka Dios nga nagapatay sing mapintas kay bisan sin-o nga nagapamatok sa iya?
Ngaa Indi Pahimuon ang mga Tawo sing Husto?
‘Indi bala mahimo nga pahimuon na lang sang Dios ang mga tawo sing husto?’ mahimo ipamangkot sang iban. Ti, binagbinaga man ini. Sa bug-os nga maragtas, gintinguhaan sang mga gobierno nga ipasunod sa mga tawo ang ila panghunahuna. Ginhimo sang pila ka gobierno ukon indibiduwal nga mga gumalahom ang nanuhaytuhay nga porma sang pagkontrol sa hunahuna, ayhan nagagamit sing droga ukon pagbusbos, nagakuha sa ila mga biktima sang dalayawon nga dulot sang hilway nga pagbuot. Wala bala naton ginapakabahandi ang mangin hilway nga mga ahente sa moral, bisan pa nga ina nga dulot mahimo nga abusuhan? Tugot bala kita nga kuhaon ina sang bisan anong panikasog sang gobierno ukon sang gumalahom?
Nian, ano ang iban pa nga paagi luwas sa gilayon nga paggamit sang Dios sa gahom nga ipatuman ang kasuguan? Si Jehova nga Dios namat-od nga ang labing maayo sa paglubad sa pagrebelde amo ang paghatag sa mga nagasikway sa iya mga kasuguan sing umalagi nga panag-on sang pagkaindependiente gikan sa iya paggahom. Magahatag ini sa tawhanon nga pamilya, halin kanday Adan kag Eva, sing limitado nga tion nga gamhan ang ila kaugalingon nga wala nagapasakop sa kasuguan sang Dios. Ngaa ginhimo niya ini? Bangod nakahibalo sia nga, sa ulihi, ang dimabag-o nga ebidensia matipon, magapamatuod nga ang iya paagi sa paggahom pirme husto kag matarong, bisan pa kon gamiton niya ang iya walay latid nga gahom sa pagtuman sa iya kabubut-on, kag nga ang bisan ano nga pagrebelde batok sa iya magaresulta, sa karon man ukon sa ulihi, sa kalaglagan.—Deuteronomio 32:4; Job 34:10-12; Jeremias 10:23.
Kamusta ang Tanan Inosente nga mga Biktima?
‘Samtang, kamusta ang tanan inosente nga mga biktima?’ mahimo ipamangkot mo. ‘Takus gid bala ini sa ila kasakit agod pamatud-an ang pila ka detalye sang kasuguan?’ Ti, wala gintugot sang Dios nga magaluntad ang kalainan agod lamang pamatud-an ang pila ka dimaathag nga detalye sang kasuguan. Sa kabaliskaran, gintugot niya ini agod ipatok ang pangunang kamatuoran nga sia lamang ang soberano kag nga ang pagtuman sa iya kasuguan kinahanglanon para sa dalayon nga paghidait kag kalipay sang tanan niya nga tinuga.
Ang isa ka importante nga butang nga dapat dumdumon amo nga nakahibalo ang Dios nga madula niya sing bug-os ang bisan ano man nga halit nga mahatag sini sa tawhanon nga pamilya. Nakahibalo sia nga sa ulihi, ang umalagi nga panag-on sang kasakit kag pag-antos may mapuslanon nga resulta. Hunahunaa ang iloy nga nagauyat sing hugot sa iya anak samtang ang doktor masakit nga nagatublok sing bakuna nga makahatag sing proteksion batok sa balatian nga mahimo makapatay sa bata. Wala sing iloy ang maluyag nga masakitan ang iya anak. Wala sing doktor ang maluyag nga hatagan sing kasakit ang iya pasyente. Sa sina nga tion, indi mahangpan sang bata ang rason sang kasakit, apang sa ulihi mahangpan niya kon ngaa gintugot ini.
Tunay nga Lugpay sa mga Nagaantos?
Ang iban mahimo magahunahuna nga ang ihibalo tuhoy sining mga butang diutay lamang nga kalugpayan sa mga nagaantos. Si Hans Küng nagasiling nga ang makatarunganon nga paathag sa pagluntad sang pag-antos “haluson nga makabulig sa nagaantos subong nga ang isa ka paathag tuhoy sa kemika sang pagkaon sa tawo nga gutom.” Namangkot sia: “Ang tanan bala nga maalamon nga pangatarungan makapalig-on gid sa tawo, nga halos indi na makaagwanta sang pag-antos?” Ti, ang tanan nga “maalamon nga pangatarungan” sang mga tawo nga wala nagasapak sa Pulong sang Dios, ang Biblia, wala makapalig-on sa mga nagaantos. Ining tawhanon nga pangatarungan nagdugang lamang sa problema paagi sa pagpanugda nga gintuyo sang Dios nga ang tawo mag-antos kag ang duta gindesinyo subong isa ka nalupyakan sang mga luha ukon isa ka duog nga tililawan para sa mga magakabuhi sa ulihi sa langit. Daw ano nga pasipala!
Apang, ang Biblia mismo nagahatag sing matuod nga lugpay. Wala lamang ini nagahatag sing dalayon nga paathag para sa pagluntad sang mga pag-antos kundi nagapalig-on man sing pagsalig sa pat-od nga saad sang Dios nga dulaon niya ang tanan nga halit nga tuga sining umalagi nga pagtugot sa pag-antos.
Ang “Pagpasag-uli sang Tanan nga Butang”
Sa dili madugay ipasag-uli sang Dios ang mga butang sa paagi nga gintuyo niya antes magrebelde ang nahaunang tawhanon nga mga tinuga. Ang gintalana niya nga tion para sa independiente nga paggahom sang tawo halos matapos na. Nagakabuhi kita sa tion nga ipadala niya “si Jesus, nga dapat ibilin sang langit sa sulod sini tubtob sa tion sang pagpasag-uli sang tanan nga butang nga ginpamulong sang Dios paagi sa baba sang iya balaan nga mga manalagna sang dumaan nga tion.”—Binuhatan 3:20, 21.
Ano ang himuon ni Jesucristo? Dulaon niya sa duta ang tanan nga kaaway sang Dios. (2 Tesalonica 1:6-10) Wala sing hinali nga pagpatay, subong sa ginapatuman sang tawhanon nga mga diktador. Ang madamo nga ebidensia nga nagapamatuod sang malaglagon nga mga resulta sang sayop nga paggahom sang tawo magapakita nga makatarunganon gid nga gamiton sang Dios sa ulihi ang iya walay latid nga gahom sa pagpatuman sa iya kabubut-on. (Bugna 11:17, 18) Una magakahulugan ini sing “kapipit-an” nga ang kaangay sini wala pa anay maagihan sa duta, nga kaanggid apang daku pa sa Anaw sang adlaw ni Noe. (Mateo 24:21, 29-31, 36-39) Ang mga makalampuwas sa sining “dakung kapipit-an” makaeksperiensia sing mga “dag-on sang pagrepresko” kon makita nila ang katumanan sang tanan nga saad sang Dios nga ginhatag “paagi sa baba sang iya balaan nga mga manalagna.” (Binuhatan 3:19; Bugna 7:14-17) Ano bala ang ginsaad sang Dios?
Ti, ang mga manalagna anay sang Dios nagsiling nga ang pag-antos nga tuga sang inaway kag pagpatulo sing dugo pagatapuson. Halimbawa, ang Salmo 46:9 nagasugid sa aton: “Ginapatunong niya ang mga inaway tubtob sa ukbong sang duta.” Wala na sing inosente nga mga biktima kag masinulub-on nga mga refugee, mga ginlugos, ginpiang, kag ginpatay sa mapintas nga mga inaway! Si manalagna Isaias nagasiling: “Ang pungsod indi magabayaw sing espada batok sa pungsod, kag indi na sila magtuon sing inaway.”—Isaias 2:4.
Gintagna man sang mga manalagna ang katapusan sang pag-antos nga tuga sang krimen kag inhustisya. Ang Hulubaton 2:21, 22 nagasaad nga “ang mga matadlong magapuyo sa duta” kag ang nagatuga sing kasakit kag pag-antos “gabuton sa sini.” Indi na ‘paggahuman sang tawo ang tawo sa iya kasamaran.’ (Manugwali 8:9) Ang tanan nga malauton pagadulaon sing dayon. (Salmo 37:10, 38) Ang tanan magakabuhi nga may paghidait kag kalig-unan, nga hilway sa pag-antos.—Miqueas 4:4.
Dugang pa, ang mga manalagna nagsaad man nga ang pag-antos nga tuga sang mga balatian sa pisikal kag emosyon pagatapuson. (Isaias 33:24) Si Isaias nagsaad nga ang bulag, bungol, may sablag, kag ang tanan nga may balatian kag masakit pagaayuhon. (Isaias 35:5, 6) Baliskaron pa gani sang Dios ang mga epekto sang kamatayon. Si Jesus nagtagna nga “ang tanan nga yara sa handumanan nga lulubngan makabati sang iya tingog kag magaguwa.” (Juan 5:28, 29) Sa iya palanan-awon nahanungod sa “bag-ong langit kag bag-ong duta,” si apostol Juan ginsugiran nga “pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.” (Bugna 21:1-4) Hunahunaa lamang! Wala na sing kasakit, wala na sing mga luha, wala na sing paghibi, wala na sing kamatayon—wala na sing pag-antos!
Ang bisan ano man nga mga trahedya nga natabo sa tion sa sining umalagi nga pagtugot sa kalainan pagapaumpawan. Bisan ang mga handumanan sang kasakit kag pag-antos sang tawo—nga wala gid gintuyo sang Dios—bug-os nga pagapanason. “Ang una nga mga kalisdanan ginakalipatan . . . Ang nagligad nga mga butang indi na pagdumdumon,” tagna ni Isaias. (Isaias 65:16, 17) Ang orihinal nga katuyuan sang Dios para sa isa ka himpit tawhanon nga pamilya nga nagapuyo nga may bug-os nga paghidait kag kalipay sa paraiso nga duta matuman sing bug-os. (Isaias 45:18) Ang pagsalig sa iya pagkasoberano mangin bug-os. Daw ano nga pribilehiyo ang magkabuhi sa tion nga tapuson sang Dios ang tanan nga pag-antos sang tawo, ang tion nga ipakita niya nga indi sia “mapiguson, mapakunukunuhon, manugtonto, manugpatay,” subong sa panumbungon ni Nietzsche, kundi nga pirme sia mahigugmaon, maalamon, kag makatarunganon sa pagpadapat niya sang bug-os nga gahom!
[Kapsion sa pahina 5]
Ang iban nga mga gumalahom nagkontrol sang hunahuna, nagakuha sa ila mga biktima sang hilway nga pagbuot
[Credit Line]
UPI/Bettmann
[Kapsion sa pahina 7]
Kon ang pag-antos wala na, ang tanan magakabuhi sing malipayon