Malipayon ang mga Nagapabilin nga Nagamata!

“Yari karon! Nagakari ako subong sang makawat. Malipayon ang isa nga nagamata kag nagatipig sang iya mga panapton.”​​—⁠BUGNA 16:15.

1. Sanglit malapit na ang adlaw ni Jehova, ano ang mapaabot naton?

ANG dakung adlaw ni Jehova malapit na, kag nagakahulugan ina sing inaway! Sa palanan-awon, nakakita si apostol Juan sing kaangay paka “nga mga ekspresyon nga inspirado sang mga demonyo” nga nagakadto sa tanan nga “hari,” ukon mga manuggahom, sang duta. Agod himuon ang ano? Ti, “agod tipunon sila sing tingob sa inaway sang dakung adlaw sang Dios nga Labing Gamhanan”! Si Juan nagdugang: “Nagtipon sila sing tingob sa isa ka duog nga gintawag sa Hebreo Har-Magedon.”​—⁠Bugna 16:​13-16.

2. Sin-o si Gog sang Magog, kag ano ang matabo kon salakayon niya ang katawhan ni Jehova?

² Sa indi madugay, pahulagon ni Jehova ang politikal nga elemento sining sistema agod laglagon ang Babilonia nga Daku, ang bug-os kalibutan nga emperyo sang butig nga relihion. (Bugna 17:​1-5, 15-17) Nian pangunahan ni Gog sang Magog, si Satanas nga Yawa nga gintagbong sa duta, ang iya hubon kag salakayon sing bug-os-kusog ang mahidaiton, daw wala sing mahimo nga katawhan ni Jehova. (Ezequiel 38:​1-12) Apang magahulag ang Dios agod luwason ang iya katawhan. Amo ini ang panugod sang “daku kag makakulugmat nga adlaw ni Jehova.”​—⁠Joel 2:​31; Ezequiel 38:​18-20.

3. Paano mo ilaragway ang mga hitabo nga gintagna sa Ezequiel 38:​21-23?

³ Huo, luwason ni Jehova ang iya katawhan kag laglagon ang tanan nga bahin sang sistema ni Satanas kon makadangat na kita sa kahimtangan sang kalibutan nga ginatawag Har-Magedon, ukon Armagedon. Basaha ang matagnaon nga mga pinamulong sa Ezequiel 38:​21-23, kag handurawa ang danyag. Gamiton ni Jehova ang iya gahom agod magbundak ang mabaskog nga ulan, makahalapay nga ulan sang niebe, nagasagirit nga kalayo, makamamatay nga mga piste. May pagsalangisag bisan diin samtang nagasalasala ang hubon ni Gog, nga nagailinaway sing silahanon. Ang bisan sin-o nga makalampuwas nga mga kaaway sang Dios nga Labing Gamhanan mapatay samtang ginagamit ni Jehova ang iya gamhanan nga paagi agod luwason ang iya mga alagad. Kon matapos na ang gintagna nga “dakung kapipit-an,” wala sing mabilin sa didiosnon nga sistema ni Satanas. (Mateo 24:21) Apang bisan sa ila pagtagumatayon, mahibaluan sang mga malauton kon sin-o ang balasulon sa ila kalamidad. Ang aton madinalag-on nga Dios magasiling mismo: “Kag makilala nila nga ako si Jehova.” Ining pinasahi nga mga hitabo mahanabo sa aton mga adlaw, sa tion sang presensia ni Jesus.

Nagakari Subong sang Makawat

4. Sa anong paagi laglagon ni Jesus ining malauton nga sistema sang mga butang?

⁴ Ang ginhimaya nga si Ginuong Jesucristo nagsiling: “Yari karon! nagakari ako subong sang makawat.” Ang kaangay makawat nga pagkari mangin sa hinali, sa wala ginapaabot nga tion, kon ang kalabanan nga tawo nagakatulog. Sa pag-abot ni Jesus subong sang makawat agod laglagon ining malauton nga sistema, luwason niya yadtong matuod nga nagamata. Ginsilingan niya si Juan: “Malipayon ang isa nga nagamata kag nagatipig sang iya mga panapton, agod nga indi sia maglakat nga hublas kag mahuy-an sa atubangan sang mga tawo.” (Bugna 16:15) Ano ang ginapahangop sining mga pinamulong? Kag paano kita makapabilin nga nagamata sa espirituwal?

5. Ano anay ang kahimusan sa templo sang yari pa si Jesus sa duta?

⁵ Sa kinaandan, ang isa ka bantay wala ginahublasan kon matulugan sia samtang nagabantay. Apang natabo ina sa templo sa Jerusalem sang diri pa si Jesus sa duta kag may mga grupo sang mga saserdote kag mga Levinhon nga nagaalagad sa templo sa Jerusalem. Natabo ini sadtong ika-11 nga siglo B.⁠C.⁠E. sang gin-organisar ni Hari David ang ginatos ka saserdote kag ang ila linibo ka kabulig nga mga Levinhon sang Israel sa isa ka organisasyon nga ginahuman sang 24 ka bahin. (1 Cronica 24:​1-18) Ang tagsa ka bahin nga ginahuman sang kapin isa ka libo ka hanas nga mga trabahador nagabuslanay sa pagserbisyo sa templo mga duha ka beses kada tuig sa sulod sang isa ka semana sa tagsa ka tion. Apang, sa tion sang Kapiestahan sang mga Payagpayag, ang tanan nga 24 ka bahin nagatrabaho. Kinahanglanon man ang dugang nga bulig sa tion sang mga kapiestahan sang Paskuwa.

6. Ano ang ginapatuhuyan ni Jesus sang magsiling sia, “Malipayon ang isa nga nagapabilin nga nagamata kag nagatipig sang iya panapton”?

⁶ Sang magsiling si Jesus: “Malipayon ang isa nga nagamata kag nagatipig sang iya mga panapton,” mahimo nga ginpatuhuyan niya ang mga pamaagi nga nadalahig sa hilikuton nga pagbantay sa templo. Ang Judiyong Mishnah nagasiling: “Padayon nga ginbantayan sang mga saserdote ang tatlo ka duog sa Templo: ang Hulot ni Abtinas, ang Hulot sang Kalayo, kag ang Hulot sang Tagipusuon; kag ang mga Levinhon sa beinte-uno ka duog: lima sa lima sang mga gawang sang Bukid sang Templo, apat sa apat ka pamusod sini sa sulod, lima sa lima ka gawang sang Luwang sang Templo, apat sa apat ka pamusod sini sa guwa, kag isa sa Hulot sang mga Halad, kag isa sa Hulot sang Kumbong, kag isa sa likod sang duog sang Pakiluuyan [sa guwa sang pader sa likod nayon sang Labing Balaan]. Ang opisyal sang Bukid sang Templo nagalibot sa tagsa ka bantay nga may nagasiga nga mga sulo sa atubangan niya, kag kon ang bisan sin-o nga bantay nga indi magtindog kag magsiling sa iya, ‘O opisyal sang Bukid sang Templo, ang paghidait yara sa imo!’ kag kon matukiban nga nagakatulog sia, hanuton niya sia sang iya baston, kag may awtoridad sia nga sunugon ang iya panapton.”​—⁠The Mishnah, Middoth (“Measurements”), 1, parapo 1-2, ginbadbad ni Herbert Danby.

7. Ngaa ang mga saserdote kag mga Levinhon nga nagabantay sa templo dapat magpabilin nga nagamata?

⁷ Ang madamo nga Levinhon kag mga saserdote sang nagaalagad nga mga bahin nagapabilin nga nagamata sa bug-os nga gab-i agod magbantay kag upangan ang bisan sin-o nga dimatinlo sa pagsulod sa mga luwang sang templo. Sanglit ang “opisyal sang Bukid sang Templo,” ukon “ang kapitan sang templo,” nagalibot sa 24 tanan ka estasyon sa tion sang pagbantay kon gab-i, ang tagsa ka bantay dapat magpabilin nga nagamata sa iya puwesto kon indi niya luyag madakpan.​—⁠Binuhatan 4:⁠1.

8. Ano ang malaragwayon nga panapton sang Cristiano?

⁸ Ang hinaplas nga mga Cristiano kag ang ila kaupod nga mga alagad kinahanglan magpabilin nga nagamata sa espirituwal kag tipigan ang ila malaragwayon nga panapton. Amo ini ang dayag nga mga pamatuod sang pagtangdo sa aton sa ministeryo sa espirituwal nga templo ni Jehova. Subong pagkilala sa sini, yari sa aton ang balaan nga espiritu, ukon aktibo nga kusog sang Dios, agod buligan kita nga himuon ang aton mga katungdanan kag tumanon ang aton mga pribilehiyo subong mga manugbantala sang Ginharian. Ang pagpabaya sa aton katungdanan subong mga ministro sang Dios magabutang sa aton sa katalagman nga madakpan ni Jesucristo, ang Kapitan sang dakung espirituwal nga templo. Kon nagatulog kita sa espirituwal sa sina nga tion, pagahublasan kita sa malaragwayon nga paagi kag sunugon ang aton simboliko nga panapton. Gani paano kita makapabilin nga nagamata sa espirituwal?

Kon Paano Kita Makapabilin nga Nagamata

9. Ngaa ang pagtuon sang Biblia sa bulig sang Cristianong mga publikasyon importante?

⁹ Ang maukod nga pagtuon sa Kasulatan upod sa bulig sang Cristianong mga publikasyon makapapagsik sa espirituwal nga pagmata. Ina nga sahi sang pagtuon magasangkap sa aton sa ministeryo, makabulig sa aton nga maatubang ang mga problema, kag magatudlo sa aton sang dalanon padulong sa dayon nga kalipay. (Hulubaton 8:​34, 35; Santiago 1:​5-8) Ang aton pagtuon dapat maid-id kag progresibo. (Hebreo 5:​14​–6:3) Ang regular nga pagkaon sing maayo nga pagkaon makabulig sa aton nga makapabilin nga nagamata kag alisto. Makaupang ini sa katamaron nga mahimo isa ka tanda sang malnutrisyon. Wala sing rason nga makulangan kita sing pagkaon ukon tuyhon sa espirituwal, kay ang Dios nagaaman sing bugana espirituwal nga pagkaon paagi sa hinaplas nga “matutom kag mainandamon nga ulipon.” (Mateo 24:​45-47) Ang regular nga pagkaon sing espirituwal nga pagkaon paagi sa personal kag pangpamilya nga pagtuon isa ka paagi nga makapabilin nga nagamata kag “mapagros sa pagtuo.”​—⁠Tito 1:⁠13.

10. Paano ang Cristianong mga miting, mga asambleya, kag mga kombension nagabulig sa aton nga makapabilin nga nagamata?

¹⁰ Ang Cristianong mga miting, mga asambleya, kag mga kombension nagabulig sa aton nga makapabilin nga nagamata sa espirituwal. Nagahatag ini sing pagpalig-on kag mga kahigayunan agod ‘pahulagon ang iban sa gugma kag maayong mga buhat.’ Dapat gid kita magtipon sing regular samtang “ginatan-aw [naton] nga nagapalapit na ang adlaw.” Malapit na gid karon ina nga adlaw. Amo ini ang “adlaw ni Jehova,” nga ibindikar niya ang iya pagkasoberano. Kon importante gid ina nga adlaw sa aton​—⁠kag dapat gid nga amo sina​—⁠indi naton ‘pagpatumbayaan ang pagtipon sing tingob.’​—⁠Hebreo 10:​24, 25; 2 Pedro 3:⁠10.

11. Ngaa masiling nga ang Cristianong ministeryo importante sa espirituwal nga pagmata?

¹¹ Ang bug-os tagipusuon nga pagpakigbahin sa Cristianong ministeryo importante sa espirituwal nga pagmata. Ang regular kag makugi nga pagpakigbahin sa pagbantala sing maayong balita nagahupot sa aton nga alisto. Ang aton ministeryo nagahatag sa aton sing madamong kahigayunan nga masugilanon ang mga tawo tuhoy sa Pulong sang Dios, sa iya Ginharian, kag sa iya mga katuyuan. Makaalayaw ang magpanaksi sa pamalaybalay, pagduaw liwat, kag pagdumala sing pagtuon sa Biblia sa puluy-an sa mga publikasyon subong sang Ang Ihibalo nga Nagadul-ong sa Kabuhi nga Walay Katapusan. Mapamatud-an sang mga gulang sa dumaan nga Efeso nga gintudluan sila ni Pablo sa “publiko kag sa pamalaybalay.” (Binuhatan 20:​20, 21) Huo, ang pila ka matutom nga mga Saksi ni Jehova may malala nga mga problema sa panglawas nga nagaupang sa ila ministeryo, apang nagapangita sila sing mga paagi agod sugiran ang iban tuhoy kay Jehova kag sa iya pagkahari kag nakatigayon sila sing daku nga kalipay sa paghimo sini.​—⁠Salmo 145:​10-14.

12, 13. Sa anong mga rason dapat naton likawan ang pagpatuyang sa pagkaon kag ilimnon?

¹² Ang paglikaw sa pagpatuyang makabulig sa aton nga makapabilin nga nagamata sa espirituwal. Sang nagahambal tuhoy sa iya presensia, ginsugo ni Jesus ang iya mga apostoles: “Andam kamo sa inyo mga kaugalingon basi ang inyo mga tagipusuon mabug-atan sang patuyang kag kahulugbon kag mga paghimud-os sining kabuhi, kag yadtong adlaw magaabot sa inyo sing hinali subong siod. Kay magaabot ini sa tanan nga nagapuyo sa nawong sang bug-os nga duta.” (Lucas 21:​7, 34, 35) Ang kahakog sa pagkaon kag pagpahubog wala nahisanto sa mga prinsipio sang Biblia. (Deuteronomio 21:​18-21) Ang Hulubaton 23:​20, 21 nagasiling: “Indi magsimpon sa mga palainom sing alak, sa mga mahakog magkaon sing unod. Kay ang palahubog kag hakugan magaimol, kag ang katuyo magapapanapot sa mga tawo sing lapat.”​—⁠Hulubaton 28:⁠7

¹³ Apang, bisan kon ang sobra nga pagkaon kag pag-inom wala makalab-ot sa sina nga kahimtangan, makahimo ini sa tawo nga tuyhon, mangin matamad pa gani kag mapinatumbayaon sa paghimo sang kabubut-on sang Dios. Kinaugali lamang nga makabatyag kita sing kabalaka sa kabuhi sang pamilya, panglawas, kag iban pa. Apang, malipay kita kon unahon naton ang mga intereses sang Ginharian sa aton kabuhi kag makasalig kita nga amanan kita sang aton langitnon nga Amay. (Mateo 6:​25-34) Kon indi naton paghimuon ini, “ina nga adlaw” magaabot subong “isa ka siod” sa aton, ayhan subong isa ka natago nga tugalbong nga magadakop sa aton nga walay hinalung-ong ukon isa ka siod, subong sang mga nagaganyat kag nagadakop sa walay hinalung-ong nga mga sapat. Indi ini matabo kon nagapabilin kita nga nagamata, nakahibalo sing bug-os nga nagakabuhi kita sa “tion sang katapusan.”​—⁠Daniel 12:⁠4.

14. Ngaa dapat kita mangamuyo sing hanuot?

¹⁴ Ang hanuot nga pangamuyo isa pa ka bulig sa espirituwal nga pagmata. Sa iya daku nga tagna, si Jesus dugang nga nagsugo: “Apang, magbantay kamo sa tagsa ka tion, nga nagaampo nga makasarang kamo sa pagpalagyo sa sining tanan nga butang nga mahanabo, kag sa pagtindog sa atubangan sang Anak sang tawo.” (Lucas 21:36) Huo, ipangamuyo naton nga makapabilin kita dampig kay Jehova kag matigayon ang nahamut-an nga tindog kon si Jesus, ang Anak sang tawo, magaabot agod laglagon ining malauton nga sistema sang mga butang. Para sa aton kaayuhan kag sang aton masigkatumuluo nga aton ginapangamuyo, kinahanglan naton ‘magpabilin nga nagamata sa pangamuyo.’​—⁠Colosas 4:​2; Efeso 6:​18-20.

Malip-ot Na Lang ang Tion

15. Ano ang ginahimo sang aton pag-alagad subong mga manugbantala sing pagkamatarong?

¹⁵ Samtang ginahulat naton ang dakung adlaw ni Jehova, pat-od nga luyag naton himuon ang bug-os naton nga masarangan sa pag-alagad sa iya. Kon hanuot kita nga nagapangamuyo sa iya tuhoy sini, “isa ka daku nga ganhaan padulong sa hilikuton” ang mahimo mabuksan sa aton. (1 Corinto 16:​8, 9) Sa gintalana nga tion sang Dios, si Jesus magahukom kag painon niya ang matarong nga “mga karnero” nga takus sa kabuhi nga walay katapusan gikan sa didiosnon nga “mga kanding” nga takus sa walay katapusan nga kalaglagan. (Juan 5:22) Indi kita ang magapain sa mga karnero gikan sa mga kanding. Apang ang aton pag-alagad subong mga manugbantala sing pagkamatarong karon nagahatag sa mga tawo sing kahigayunan nga pilion ang kabuhi nga nagaalagad sa Dios kag sa amo matigayon ang paglaum nga mapain sa kabuhi kon si Jesus “mag-abot sa iya himaya.” Ang malip-ot nga tion nga nabilin para sa sining sistema sang mga butang nagapadaku sang kinahanglanon para sa bug-os tagipusuon nga hilikuton samtang ginapangita naton yadtong “mga matarong para sa kabuhi nga walay katapusan.”​—⁠Mateo 25:​31-46; Binuhatan 13:⁠48.

16. Ngaa dapat kita mangin makugi nga mga manugbantala sang Ginharian?

¹⁶ Naubusan sing tion ang kalibutan sang adlaw ni Noe, kag sa indi madugay maubusan man sing tion ining sistema sang mga butang. Busa dapat kita mangin makugi nga mga manugbantala sang Ginharian. Ang aton pagbantala nga hilikuton nagauswag, kay kada tuig ginatos ka libo ang ginabawtismuhan subong simbolo sang ila pagdedikar sa Dios. Nangin bahin sila sang ginpakamaayo nga organisasyon ni Jehova​—⁠“ang iya katawhan kag ang karnero sang iya halalban.” (Salmo 100:3) Makalilipay gid ang makigbahin sa pagbantala sang Ginharian nga hilikuton nga nagahatag sing paglaum sa madamo antes sang “daku kag makakulugmat nga adlaw ni Jehova”!

17, 18. (a) Samtang nagabantala kita, anong reaksion ang mapaabot naton sa iban? (b) Ano ang pat-od nga mahanabo sa mga nagayaguta?

¹⁷ Kaangay ni Noe, ginasakdag kita kag ginaamligan sang Dios. Huo, ginyaguta sang mga tawo, sang nagmateryalisar nga mga anghel, kag sang mga Nefilim ang mensahe ni Noe, apang wala ini makapauntat sa iya. Sa karon, ginayaguta kita sang iban kon ginatudlo naton ang daku nga pamatuod nga nagakabuhi kita sa “katapusan nga mga adlaw.” (2 Timoteo 3:​1-5) Ina nga pagyaguta katumanan sang tagna sang Biblia tuhoy sa presensia ni Cristo, kay si Pedro nagsulat: “Sa katapusan nga mga adlaw ang mga mayubiton magaabot nga may pagyubit, nga nagasunod sang ila kaugalingon nga mga kailigbon kag nagasiling: ‘Diin bala ang saad sang iya presensia? Kay kutob sang pagtulog sang amon mga katigulangan sa kamatayon, ang tanan nagapadayon subong nga amo sila kutob sa ginsuguran sang pagtuga.’ ”​—⁠2 Pedro 1:​16; 3:​3, 4

¹⁸ Ang karon nga mga manugyubit mahimo maghunahuna: ‘Wala sing nagbag-o kutob sang pagpanuga. Ang kabuhi nagapadayon, ang mga tawo nagakaon, nagainom, nagaminyo, kag nagasagod sing mga pamilya. Bisan kon yari si Jesus, indi sia magahukom sa akon mga adlaw.’ Sayop gid sila! Kon indi sila mapatay sa iban nga paagi karon, ang makakulugmat nga adlaw ni Jehova amo ang magalaglag sa ila, subong nga ang kalaglagan nga gindala sang Anaw nagtapos sa malauton nga kaliwatan sang mga adlaw ni Noe.​—⁠Mateo 24:⁠34.

Dapat Gid Kita Magpabilin nga Nagamata!

19. Paano naton tamdon ang paghimo-disipulo nga mga hilikuton?

¹⁹ Kon nakadedikar kita kay Jehova, kabay nga indi kita pagtuyhon paagi sa dinagakaigo nga pangatarungan. Tion ini sa pagpabilin nga nagamata, sa pagtuo sa tagna sang Dios, kag sa pagtuman sang aton komisyon nga “paghimo sing mga disipulo sang mga tawo sa tanan nga kapungsuran.” (Mateo 28:​19, 20) Samtang ginahulat sining sistema sang mga butang ang iya katapusan, wala na kita sing daku pa nga pribilehiyo sangsa alagaron si Jehova nga Dios sa idalom sang pagpamuno ni Jesucristo kag makigbahin sa bug-os kalibutan nga hilikuton sang pagbantala “sining maayong balita sang ginharian” antes magaabot ang katapusan.​—⁠Mateo 24:​14; Marcos 13:⁠10.

20. Anong halimbawa ang ginpahamtang nanday Caleb kag Josue, kag ano ang ginapakita sang ila dalanon para sa aton?

²⁰ Ang pila sang katawhan ni Jehova nagaalagad na sa iya sa sulod sang mga dekada, ayhan sa bug-os nga kabuhi. Kag bisan kon karon lang naton mabaton ang matuod nga pagsimba, kabay mangin kaangay kita sang Israelinhon nga si Caleb, nga “nagsunod sing bug-os kay Jehova.” (Deuteronomio 1:​34-36) Handa sila ni Josue sa pagsulod sa Ginsaad nga Duta pagkatapos nga naluwas ang mga Israelinhon sa pagkabihag sang Egipto. Apang ang may edad na nga mga Israelinhon sa kabilugan, nakulangan sing pagtuo kag nagpabilin sa kahanayakan sa sulod sang 40 ka tuig, diin napatay sila. Nabatas nanday Caleb kag Josue ang mga kabudlayan upod sa ila sadtong mga tion, apang sang ulihi ining duha ka lalaki nakasulod sa ginsaad nga duta. (Numeros 14:​30-34; Josue 14:​6-15) Kon aton ‘sundon sing bug-os si Jehova’ kag magpabilin nga nagamata sa espirituwal, matigayon naton ang kalipay sa pagsulod sa ginsaad sang Dios nga bag-ong kalibutan.

21. Ano ang maeksperiensiahan naton kon magpabilin kita nga nagamata sa espirituwal?

²¹ Maathag nga ginapamatud-an sang mga ebidensia nga nagakabuhi kita sa tion sang katapusan kag nga malapit na ang dakung adlaw ni Jehova. Indi ini ang tion nga magpatuyotuyo kag magmapinatumbayaon sa paghimo sang kabubut-on sang Dios. Pakamaayuhon lamang kita kon magpabilin kita nga nagamata sa espirituwal kag padayon nga ginasuksok ang aton mga panapton nga nagapakilala sa aton subong Cristianong mga ministro kag mga alagad ni Jehova. Kabay mangin determinado kita nga “magpabilin nga nagamata, nagatindog sing malig-on sa pagtuo, magpakalalaki, magpakabakod.” (1 Corinto 16:13) Subong mga alagad ni Jehova, kabay nga magmalig-on kita tanan kag maisugon. Nian malakip kita sa sadtong nakahanda kon mag-abot ang dakung adlaw ni Jehova, matutom nga nagaalagad upod sa hubon sadtong malipayon nga nagapabilin nga nagamata.

Paano Mo Sabton?

◻ Ano ang kahulugan sang aton malaragwayon nga panapton, kag paano naton ini matipigan?

◻ Ano ang pila ka paagi nga makapabilin nga nagamata sa espirituwal?

◻ Ngaa paabuton naton nga may magayaguta, kag paano naton sila tamdon?

◻ Paano naton tamdon ang paghimo sing disipulo nga hilikuton sa sining katapusan nga mga adlaw?

[Blurb sa pahina 16]

Ang mga Cristiano may balaan nga espiritu sang Dios agod buligan sila sa pagpabilin nga nagamata kag himuon ang ila mga katungdanan

[Kapsion sa pahina 15]

Determinado ka bala nga magpabilin nga nagamata sa espirituwal kag matipigan ang imo panapton?