Diin Masapwan ang Matuod nga Kalipay?
MADAMO nga tawo ang nagahunahuna nga ang kalipay sarang masapwan paagi sa pagtigayon sing materyal nga mga pagkabutang. Kamusta naman ikaw? Bisan pa nga ang materyal nga mga butang pat-od gid nga makaamot sa aton kalipay, wala sini ginapasalig ang kalipay; ukon nga ang pisikal nga mga kasulhayan nagatukod sing pagtuo ukon nagapaayaw sang espirituwal nga mga kinahanglanon.
Sa iya Sermon sa Bukid, si Jesucristo nagsiling: “Malipayon ang mga mahunahunaon sang ila espirituwal nga kinahanglanon, kay ila ang ginharian sang langit.” (Mateo 5:3) Si Jesus nagsiling man: “Mag-andam batok sa tanan nga sahi sang pagkaibog, kay bisan pa may kabuganaan ang isa ka tawo ang iya kabuhi indi resulta sang mga butang nga ginapanag-iyahan niya.”—Lucas 12:15.
Madamo ang nagapangita sing kalipay paagi sa paghimo sing imoral nga sekso kag iban pa nga “buhat sang unod.” (Galacia 5:19-21) Apang, ang pagpaduyog sa kalipayan sa sekso wala nagahatag sing matuod kag mapinadayunon nga kalipay. Sa katunayan, ang mga nagabuhat sini indi makapanubli sang Ginharian sang Dios.—1 Corinto 6:9, 10.
Ang iban nagaliso sa nasulod nga pagkatawo sa ila pagpangita sing kalipay paagi sa pagtinguha nga pabakuron ang ila pagtahod sa kaugalingon. Ang mga librarya kag mga balaligyaan sing libro puno sing mga libro nga nagabulig sa pagpauswag sa kaugalingon, apang ini nga mga publikasyon wala makahatag sa mga tawo sing mapinadayunon nga kalipay. Gani, nian, diin naton masapwan ang matuod nga kalipay?
Agod magmalipayon, dapat naton hibaluon ang aton duna nga espirituwal nga kinahanglanon. Si Jesus nagsiling: “Malipayon ang mga mahunahunaon sang ila espirituwal nga kinahanglanon.” Sa pagkamatuod, indi ini makabulig sa aton kon hangpon lamang naton ini nga kinahanglanon kag nian wala na sing ginahimo tuhoy sini. Sa pag-ilustrar: Ano ang matabo sa isa ka manugdalagan sa marathon nga pagkatapos sang palumba wala magpaayaw sa kauhaw sa tubig sang iya lawas? Indi bala nga sa dili madugay mamalhan sia sing tubig kag magaatubang sing iban pa malubha nga mga resulta? Subong man, kon indi naton pagsapakon ang pagkinahanglan naton sing espirituwal nga pagkaon, magaluya kita sa ulihi sa espirituwal. Magadul-ong ini sa pagkawasi sing kasadya kag kalipay.
Nahibaluan gid ni Jesus ang iya espirituwal nga kinahanglanon, nagtuon kag nagpamalandong sing tayuyon sa Pulong sang Dios. Makita kag mabasa niya dayon ang mga bahin sa Balaan nga Kasulatan, kag gintudluan man niya ang iban nga himuon ini. (Lucas 4:16-21; ipaanggid ang Efeso 4:20, 21.) Ginpaanggid man ni Jesus ang paghimo sa kabubut-on sang iya langitnon nga Amay sa kalan-on. Ang paghimo sa kabubut-on sang Dios naghatag sa iya sing daku nga kalipay.—Juan 4:34.
Huo, ang matuod nga kalipay indi maangkon paagi sa pagtigayon sing materyal nga mga butang; ukon nga ang kalipay resulta sang pagpaduyog sa makasasala nga unod. Ang matuod nga kalipay isa ka kahimtangan sang tagipusuon, pasad sa matuod nga pagtuo kag maayo nga kaangtanan upod kay Jehova nga Dios. Sing nagakaigo, nian, si salmista David nag-amba: “Malipayon ang mga tawo nga ang ila Dios amo si Jehova.”—Salmo 144:15b.
[Kapsion sa pahina 23]
Ang pagtuo kag maayo nga kaangtanan sa Dios magahatag sa imo sing matuod nga kalipay