Magpakaisog Kamo Samtang Nagahilapit ang Kaluwasan
“‘Ako nagaupod sa imo,’ siling ni Jehova, ‘sa pagluwas sa imo.’”—JEREMIAS 1: 19.
1, 2. Ngaa nagakinahanglan ang tawhanon nga pamilya sing kaluwasan?
KALUWASAN! Daw ano ka makalugpay nga tinaga! Ang maluwas nagakahulugan nga masalbar, mahilway gikan sa isa ka malain, dimakalilipay nga kahimtangan. Nagalakip ini sa ideya nga ang isa gindala sa isa ka mas maayo, mas makalilipay nga kahimtangan.
2 Kinahanglanon gid sang tawhanon nga pamilya ina nga kaluwasan sa sining tion! Ang katawhan bisan diin ginabug-atan kag ginapaluya sang mabudlay nga mga problema—sa pangabuhi, sa katilingban, sa panglawas, sa hunahuna, kag sa balatyagon. Ang kalabanan indi kontento kag napaslawan sa nagakatabo sa kalibutan kag nagahandum nga magbag-o ini para sa kaayuhan.—Isaias 60:2; Mateo 9:36.
“Makahalanguyos nga mga Tion nga Mabudlay Pakigbagayan”
3, 4. Ngaa labi pa nga kinahanglanon karon ang kaluwasan?
3 Sanglit ining ika-20 nga siglo nakaeksperiensia sing pag-antos nga labaw sa bisan anong tion, labi pa nga kinahanglanon karon ang kaluwasan. Sa karon, kapin sa isa ka bilyon ka tawo ang nagakabuhi sa daku nga kaimulon, kag mga 25 milyones ang ginadugang sa sini kada tuig. Mga 13 milyones ka kabataan ang nagakapatay kada tuig bangod sa malnutrisyon ukon iban pa nga kabangdanan may kaangtanan sa kaimulon—kapin sa 35,000 kada adlaw! Kag minilyon sang may edad nga mga tawo ang ahat nga nagakapatay bangod sa nanuhaytuhay nga balatian.—Lucas 21:11; Bugna 6:8.
4 Ang mga inaway kag mga kagamo sa tunga sang mga banwahanon ginabangdan sang daku nga pag-antos. Ang libro nga Death by Government nagasiling nga ang mga inaway, pagbinangig sang mga tribo kag mga relihion, kag ang pagpamatay sang mga panguluhan sa ila mismo mga banwahanon “nagpatay sing kapin sa 203 milyones ka tawo sini nga siglo.” Nagsiling pa ini: “Ang aktuwal nga kadamuon sang napatay mahimo nga halos 360 milyones ka tawo. Daw subong bala nga ang aton espesyi ginahapay sang Itom nga Kalalat-an karon. Kag sa pagkamatuod ginahapay ini, indi sang kalalat-an sang kagaw, kundi sang kalalat-an sang Gahom.” Ang manunulat nga si Richard Harwood nagsiling: “Ang pag-ilinaway sang mga barbaro sang nagligad nga mga siglo diutay lamang kon ipaanggid.”—Mateo 24:6, 7; Bugna 6:4.
5, 6. Ngaa makapahuol gid ang aton tion?
5 Luwas sa makapahuol nga mga kahimtangan sining karon nga tinuig amo ang daku nga pagdugang sang masingki nga krimen, imoralidad, kag pagkalusod sang pamilya. Ang anay Sekretaryo sa Edukasyon sang Estados Unidos nga si William Bennett nagsiling nga sa sulod sang 30 ka tuig ang populasyon sa Estados Unidos nagdugang sing 41 porsiento, apang ang masingki nga krimen nagdugang sing 560 porsiento, ang pagkabun-ag sang bastardo nga kabataan 400 porsiento, mga diborsio 300 porsiento, kag ang paghikog sang mga tin-edyer 200 porsiento. Ang propesor sa Princeton University nga si John DiIulio, Jr., nagpaandam tuhoy sa pagdamo sang lamharon nga “dakung manunukob,” nga “nagapamatay, nagapanakit, nagapanglugos, nagapangawat kag nagatuga sing daku nga mga kagamo sa komunidad. Wala nila ginakahadlukan ang kahuy-anan nga maaresto, ang kasakit nga mabilanggo, ukon ang sukmat sang konsiensia.” Sa sina nga pungsod, ang pagpatay amo karon ang ikaduha nga kabangdanan sang kamatayon sa tunga sang mga nagaedad sing 15 kag 19 anyos. Kag dugang pa nga kabataan nga kubos sa kuatro anyos ang nagakapatay bangod sa pag-abuso sa baylo sang balatian.
6 Indi lamang sa isa ka pungsod nagakatabo ining krimen kag kasingki. Amo man sini ang ginareport sang halos tanan nga pungsod. Ang nagapalala sini amo ang paggamit sing ilegal nga droga nga nagapalain sa minilyon. Ang Sydney Morning Herald sang Australia nagsiling: “Ang pagnegosyo sing droga sa tunga sang mga pungsod nangin amo ang ikaduha sa pinakamadahog nga negosyo sang kalibutan masunod sa pagbaligya sing armas.” Ang isa pa ka kabangdanan amo ang kasingki kag imoralidad nga kinaandan karon sa telebisyon. Sa madamo nga pungsod, sa tion nga magdisiotso anyos ang isa ka bata, nakatan-aw na sia sing linibo ka masingki nga buhat kag dimaisip nga imoral nga mga buhat. Malain gid ina nga impluwensia, kay ang aton personalidad ginadihon sang regular nga ginapakaon naton sa aton hunahuna.—Roma 12:2; Efeso 5:3, 4.
7. Paano gintagna sang Biblia ang malain nga mga kahimtangan karon?
7 Sibu nga gintagna sang Biblia ining makakulugmat nga huyog sang mga hitabo sa aton siglo. Nagsiling ini nga may matabo nga bug-os-kalibutan nga mga inaway, epidemia nga mga balatian, kakulang sing kalan-on, kag pagdugang sang pagkamalinapason. (Mateo 24:7-12; Lucas 21:10, 11) Kag kon binagbinagon naton ang tagna nga narekord sa 2 Timoteo 3:1-5, kaangay ini sang pagpamati sa mga balita kada adlaw. Ginapakilala sini ang aton dag-on subong “ang katapusan nga mga adlaw” kag ginalaragway ang katawhan subong ‘mga mahigugmaon sang kaugalingon, mga mahigugmaon sang kuwarta, mga malalison sa mga ginikanan, mga dimatutom, mga wala sing kinaugali nga gugma, mga wala sing pagpugong sa kaugalingon, mga mabangis, mga nagahabok sa pagpadayaw, mga mahigugmaon sa kinasadya sa baylo sang sa Dios.’ Amo gid sini ang kalibutan karon. Subong sang ginbaton ni William Bennet: “Kadamo gid sing palatandaan nga ang . . . sibilisasyon garok na.” Ginasiling nga ang sibilisasyon natapos sang matabo ang unang inaway kalibutanon.
8. Ngaa ginpahanabo sang Dios ang Anaw sang adlaw ni Noe, kag ano ang kaangtanan sini sa aton adlaw?
8 Mas malain karon ang kahimtangan kon ipaanggid sa adlaw ni Noe antes sang Anaw, sang “ang duta napun-an sing kasingki.” Sadto, ang katawhan sa kabilugan wala maghinulsol sa ila malaut nga mga dalanon. Sa amo, ang Dios nagsiling: “Ang duta napun-an sing kasingki paagi sa ila; kag yari karon laglagon ko sila upod sang duta.” Gintapos sang Dilubyo yadtong masingki nga kalibutan.—Genesis 6:11, 13; 7:17-24.
Indi Makaluwas ang Tawo
9, 10. Ngaa indi kita dapat maglaum sa tawo para sa kaluwasan?
9 Makaluwas bala sa aton ang mga panikasog sang tawo gikan sa sining malain nga mga kahimtangan? Ang Pulong sang Dios nagasabat: “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan.” “Wala sa tawo nga nagalakat bisan ang pagtuytoy sa iya tikang.” (Salmo 146:3; Jeremias 10:23) Ang linibo ka tuig nga maragtas nagapamatuod sa sining mga kamatuoran. Gintilawan sang tawo ang tanan nga politikal, ekonomiko, kag sosyal nga sistema nga mahunahuna, apang naglain pa ang mga kahimtangan. Kon may solusyon ang tawo, kuntani kitaon na ini karon. Sa baylo, ang katunayan amo nga “ang tawo naggahom sa tawo sa iya kasamaran.”—Manugwali 8:9; Hulubaton 29:2; Jeremias 17:5, 6.
10 Sang nagligad nga pila ka tuig lamang, ang anay manuglaygay para sa kasiguruhan sang pungsod sang Estados Unidos nga si Zbigniew Brzezinski nagsiling: “Ang indi malikawan nga konklusion sang bunayag nga pag-usisa sa mga huyog sa bug-os nga kalibutan amo nga ang kagamo sa katilingban, kagumon sa politika, krisis sa pangabuhi, kag ang inaway sa tunga sang mga pungsod mahimo gid nga magalapnag pa.” Nagdugang pa sia: “Ang katalagman nga nagaatubang sa katawhan [amo ang] bug-os kalibutan nga kagamo.” Kapin pa nga mapatihan karon ini nga opinyon sa mga kahimtangan sa kalibutan. Nagkomento tuhoy sa sining dag-on sang nagdugang nga kasingki, ang isa ka editoryal sa Register sang New Haven, Connecticut nagsiling: “Daw indi na naton makontrol ang kahimtangan.” Indi, indi makontrol ang pagkalusod sining kalibutan, kay ang tagna nahanungod sining “katapusan nga mga adlaw” nagsiling man: “Ang malaut nga mga tawo kag mga malimbong magalain kag magalain pa, nga nagadaya kag ginadayaan.”—2 Timoteo 3:13.
11. Ngaa indi mabaliskad sang tawo ang nagalain nga mga kahimtangan?
11 Indi mabaliskad sang tawo ining mga huyog bangod si Satanas amo “ang dios sining sistema sang mga butang.” (2 Corinto 4:4) Huo, “ang bug-os nga kalibutan yara sa gahom sang isa ka malauton.” (1 Juan 5:19; tan-awa man ang Juan 14:30.) Ang Biblia husto nga nagasiling tuhoy sa aton adlaw: “Kailo sa duta kag sa dagat, kay ang Yawa nagpanaug sa inyo, nga may daku nga kaakig, bangod nahibaluan niya nga may malip-ot lamang sia nga tion.” (Bugna 12:12) Nahibaluan si Satanas nga ang iya paggahom kag ang iya kalibutan malapit na matapos, gani kaangay sia sang “nagangurob nga leon, nga nagapangita sing tulukbon.”—1 Pedro 5:8.
Malapit Na ang Kaluwasan—Para kay Sin-o?
12. Para kay sin-o nagahilapit ang kaluwasan?
12 Ang nagabudlay pa nga mga kahimtangan sa duta talalupangdon nga ebidensia nga ang isa ka daku nga pagbag-o—sa pagkamatuod, isa ka daku nga kaluwasan—malapit na gid! Para kay sin-o? Ang kaluwasan nagahilapit para sa mga nagapamati sa mga paandam kag nagahimo sing nagakaigo nga buhat. Ginapakita sang 1 Juan 2:17 ang dapat himuon: “Ang kalibutan [sistema sang mga butang ni Satanas] nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”—Tan-awa man ang 2 Pedro 3:10-13.
13, 14. Paano ginpadaku ni Jesus ang kinahanglanon nga magmata sa gihapon?
13 Gintagna ni Jesus nga ang malaut nga katilingban karon malapit na laglagon sa tion sang kagamo nga “ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21) Amo kon ngaa sia nagpaandam: “Hatagi sing igtalupangod ang inyo kaugalingon nga ang inyo mga tagipusuon indi gid mabug-atan sang sobra nga pagkaon kag lakas nga pag-inom kag mga kabalaka sa kabuhi, kag yadtong adlaw magaabot sa inyo sing hinali subong sang siod. Kay magaabot ini sa tanan nga nagapuyo sa nawong sang bug-os nga duta. Magmata, nian, nga nagaampo sa tanan nga tion agod nga magmadinalag-on kamo sa paglikaw sa sining mga butang nga mahanabo.”—Lucas 21:34-36.
14 Ang mga ‘nagahatag sing igtalupangod’ kag ‘nagamata’ magahibalo sa kabubut-on sang Dios kag himuon ini. (Hulubaton 2:1-5; Roma 12:2) Amo ini sila ang ‘magamadinalag-on sa paglikaw’ sa kalaglagan nga malapit na pahanabuon batok sa sistema ni Satanas. Kag makasalig sila sing bug-os nga luwason sila.—Salmo 34:15; Hulubaton 10:28-30.
Ang Panguna nga Manluluwas
15, 16. Sin-o ang panguna nga Manluluwas, kag ngaa mapat-od naton nga ang iya mga paghukom mangin matarong?
15 Sa pagluwas sa mga alagad sang Dios, dapat dulaon si Satanas kag ang iya bug-os kalibutan nga sistema sang mga butang. Kinahanglan ang labaw pa sa tawo nga gahom agod mahimo ini. Ina nga gahom magagikan kay Jehova nga Dios, ang Supremo nga Soberano, ang labing gamhanan nga Manunuga sang makapulunaw nga uniberso. Sia ang panguna nga Manluluwas: “Ako—ako si Jehova, kag luwas sa akon wala sing manluluwas.”—Isaias 43:11; Hulubaton 18:10.
16 Yara kay Jehova ang bug-os nga kadakuon sang gahom, kaalam, katarungan, kag gugma. (Salmo 147:5; Hulubaton 2:6; Isaias 61:8; 1 Juan 4:8) Gani kon maghukom na sia, mapat-od naton nga ang iya buhaton mangin matarong. Si Abraham namangkot anay: “Indi bala maghimo sing matarong ang Hukom sang bug-os nga duta?” (Genesis 18:24-33) Si Pablo nagtuaw; “May pagkadimatarong bala sa Dios? Kabay nga indi ina matabo bisan san-o!” (Roma 9:14) Si Juan nagsulat: “Huo, Jehova nga Dios, nga Labing Gamhanan, matuod kag matarong ang imo mga paghukom.”—Bugna 16:7.
17. Paano ang mga alagad ni Jehova sang una nagpabutyag sing pagsalig sa iya mga saad?
17 Kon manaad si Jehova sing kaluwasan, himuon gid niya ini. Si Josue nagsiling: “Wala gid sing saad nga napaslawan sa tanan nga maayong saad nga ginhimo ni Jehova.” (Josue 21:45) Si Solomon nagsiling: “Wala sing isa ka pulong nga napaslawan sa tanan niya nga maayong saad nga iya ginsaad.” (1 Hari 8:56) Si apostol Pablo nagsiling nga si Abraham “wala magduhaduha sing dimatinuuhon, . . . kay kumbinsido sia sing bug-os nga ang ginsaad [sang Dios] masarangan man niya himuon.” Si Sara man ‘nag-isip nga matutom [ang Dios] nga nagsaad.’—Roma 4:20, 21; Hebreo 11:11.
18. Ngaa makasalig ang mga alagad ni Jehova karon nga luwason sila?
18 Indi kaangay sang tawo, si Jehova bug-os nga masaligan, matutom sa iya pulong. “Si Jehova sang kasuldadusan nagsumpa, nga nagasiling ‘Sa pagkamatuod suno sa akon ginpainuino, amo ini ang dapat mahanabo; kag suno sa akon gintuyo, amo gid sina ang matuman.’ ” (Isaias 14:24) Gani kon ang Biblia nagasiling nga “si Jehova makahibalo magluwas sang mga tawo nga may diosnon nga debosyon gikan sa pagtilaw, apang sa pagtigana sang dimatarong nga mga tawo para sa adlaw sang paghukom agod pagautdon,” makasalig kita sing bug-os nga mahanabo ini. (2 Pedro 2:9) Bisan pa kon may katalagman nga malaglag sa kamot sang gamhanan nga mga kaaway, ang mga alagad ni Jehova nagapakaisog bangod sang iya panindugan, nga ginpakita sa iya ginsaad anay sa isa sang iya mga manalagna: “Sila pat-od nga magapakig-away sa imo, apang indi sila makadaug sa imo, kay ‘ako nagaupod sa imo,’ siling ni Jehova, ‘sa pagluwas sa imo.’ ”—Jeremias 1:19; Salmo 33:18, 19; Tito 1:2.
Mga Pagluwas sang Una
19. Paano ginluwas ni Jehova si Lot, kag ano ang kaanggid sini sa aton tion?
19 Mapalig-on kita sing daku kon isaysay naton ang pila sang mga pagluwas anay ni Jehova. Halimbawa, Si Lot “nabalaka sing daku” sa kalautan sang Sodoma kag Gomorra. Apang ginpamatian ni Jehova “ang singgit sang pagreklamo” batok sa sadtong mga siudad. Sa husto nga tion, nagpadala sia sing mga mensahero agod paguwaon si Lot kag ang iya pamilya gikan sa sadtong duog sa gilayon. Ang resulta? ‘Ginluwas [ni Jehova] ang matarong nga si Lot,’ apang ‘gin-abo ang siudad sang Sodoma kag sang Gomorra.’ (2 Pedro 2:6-8; Genesis 18:20, 21) Ginapamatian man karon ni Jehova ang singgit sang pagreklamo batok sa daku nga kalautan sining kalibutan. Kon matapos na sang iya mga mensahero karon ang ila hilingagawon nga pagpanaksi sa kasangkaron nga luyag niya, magahikot sia batok sa sining kalibutan kag luwason niya ang iya mga alagad subong sang ginhimo niya kay Lot.—Mateo 24:14.
20. Ilaragway ang pagluwas ni Jehova sa dumaan nga Israel gikan sa Egipto.
20 Minilyon nga katawhan sang Dios ang naulipon anay sa dumaan nga Egipto. Si Jehova nagsiling tuhoy sa ila: “Nabatian ko ang ila pagtuaw . . . Nahibaluan ko gid ang kasakit nga ila ginaantos. Kag magapanaug ako sa pagluwas sa ila.” (Exodo 3:7, 8) Apang, sa tapos mapalakat ang katawhan sang Dios, nagbag-o ang hunahuna ni Paraon kag ginlagas niya sila upod sa iya gamhanan nga hangaway. Daw nakibon ang mga Israelinhon sa Dagat nga Mapula. Apang si Moises nagsiling: “Dili kamo magkahadlok. Magtindog kamo sing malig-on kag tan-awa ang pagluwas ni Jehova, nga himuon niya para sa inyo karon.” (Exodo 14:8-14) Gintunga ni Jehova ang Dagat nga Mapula, kag nakapalagyo ang mga Israelinhon. Ginlagas sila sang hangaway ni Paraon, apang gingamit ni Jehova ang iya gahom amo kon ngaa “ang dagat nagtabon sa ila; natugdang sila subong sang tingga sa gamhanan nga mga tubig.” Pagkatapos sadto, naghugyaw si Moises sa isa ka ambahanon kay Jehova: “Sin-o ang kaangay mo, nga nagapamatuod sa imo kaugalingon nga gamhanan sa pagkabalaan? Ang Isa nga dapat kahadlukan paagi sa mga ambahanon sang pagdayaw, ang Isa nga nagahimo sing mga kalatingalahan.”—Exodo 15:4-12, 19.
21. Paano ginluwas ang katawhan ni Jehova gikan sa Ammon, Moab, kag Seir?
21 Sa isa pa ka okasyon, ang kaaway nga mga pungsod sang Ammon, Moab, kag Seir (Edom) namahog nga laglagon ang katawhan ni Jehova. Si Jehova nagsiling: “Dili kamo magkahadlok ukon magkakugmat bangod sining daku nga kadam-an [sang mga kaaway]; kay ang inaway indi inyo, kundi iya sang Dios. . . . Dili kamo kinahanglan makig-away . . . Magtindog kamo nga nagapahimunong kag tan-awa ang pagluwas ni Jehova para sa inyo.” Ginluwas ni Jehova ang iya katawhan paagi sa paggumon sa mga kaaway amo kon ngaa sila ang nagpinatyanay.—2 Cronica 20:15-23.
22. Anong milagruso nga pagluwas gikan sa Asiria ang ginhimo ni Jehova para sa Israel?
22 Sang magsalakay ang Asirianhon nga Kagamhanan sa Kalibutan batok sa Jerusalem, ginyaguta ni Hari Senaquerib si Jehova paagi sa pagsiling sa katawhan nga yara sa kuta: “Sin-o sa tunga sang tanan nga dios sining kadutaan [nga nabihag ko] ang nakaluwas sang ila pungsod gikan sa akon kamot nga luwason ni Jehova ang Jerusalem gikan sa akon kamot?” Sa mga alagad sang Dios sia nagsiling: “Dili kamo magpahaylo kay Ezequias sa pagsalig kay Jehova, nga nagasiling: ‘Sa pagkamatuod si Jehova magaluwas gid sa amon.’ ” Nian nangamuyo sing hugot si Ezequias para sa kaluwasan, “agod nga ang tanan nga ginharian sang duta makakilala nga ikaw, O Jehova, amo lamang ang Dios.” Ginlaglag ni Jehova ang 185,000 ka Asirianhon nga soldado, kag naluwas ang mga alagad sang Dios. Sang ulihi, samtang nagayaub si Senaquerib sa iya butig nga mga dios, ginpatay sia sang iya mga anak nga lalaki.—Isaias, kapitulo 36 kag 37.
23. Anong mga pamangkot ang nagakinahanglan sing sabat nahanungod sa pagluwas karon?
23 Pat-od gid nga nagaisog kita kon makita naton kon paano makatilingala nga ginluwas ni Jehova ang iya katawhan sang una. Kamusta naman karon? Sa anong makatalagam nga kahimtangan magadangat sa indi madugay ang iya matutom nga mga alagad nga magakinahanglan sang iya milagruso nga pagluwas? Ngaa naghulat pa sia tubtob karon agod luwason sila? Paano matuman ang ginsiling ni Jesus: “Kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagahilapit”? (Lucas 21:18) Kag paano maluwas ang katawhan sang Dios nga napatay na? Usisaon sang masunod nga artikulo ining mga pamangkot.
Repaso nga mga Pamangkot
◻ Ngaa kinahanglan gid ang kaluwasan?
◻ Ngaa indi kita dapat maglaum sa tawo para sa kaluwasan?
◻ Para kay sin-o nagahilapit ang kaluwasan?
◻ Ngaa masaligan naton ang pagluwas ni Jehova?
◻ Anong mga halimbawa sang pagluwas sang una ang makapalig-on?
[Kapsion sa pahina 10]
Si Abraham isa sang mga nagpakita sing bug-os nga pagsalig kay Jehova