Kaluwasan—Kon Ano Gid ang Kahulugan Sini

‘LUWAS ka na bala?’ Sa masami, ang mga nagapamangkot sini nagapati nga luwas na sila bangod ila ‘ginbaton si Jesus subong ila personal nga Manluluwas.’ Apang nagapati ang iban nga may yara lainlain nga dalan padulong sa kaluwasan kag tubtob nga ‘si Jesus yara sa imo tagipusuon,’ indi importante kon ano ang imo ginapatihan ukon kon ano pa gani ang imo relihion.

Ang Biblia nagasiling nga kabubut-on sang Dios nga “ang tanan nga sahi sang tawo maluwas.” (1 Timoteo 2:​3, 4) Busa ang kaluwasan matigayon sang tanan nga magabaton sini. Apang ano gid bala ang kahulugan sang maluwas? Isa gid bala ini ka butang nga nagakatabo sa imo nga may diutay lamang ukon nga wala gid sing pagpanikasog sa imo bahin?

Ang tinaga nga “kaluwasan” nagakahulugan sing “kahilwayan gikan sa katalagman ukon kalaglagan.” Busa ang matuod nga kaluwasan indi lamang isa ka malinong nga kahimtangan sa hunahuna. Nagakahulugan ini sing paglampuwas gikan sa kalaglagan sining karon nga sistema sang mga butang kag sa ulihi gikan sa kamatayon mismo! Apang sin-o ang luwason sang Dios? Bilang sabat, usisaon naton ang gintudlo ni Jesucristo tuhoy sini. Mahimo nga makibot ka sa mga resulta sang aton pag-usisa.

Kaluwasan​—⁠Masapwan Bala sa Tanan nga Relihion?

Sang isa ka okasyon, si Jesus nakigsugilanon sa isa ka Samaritana. Walay sapayan nga indi sia isa ka Judiyo, husto gid ang iya pagpati nga ang Mesias magakari subong “sia nga ginatawag Cristo.” (Juan 4:25) Ina bala nga pagpati bastante na agod maluwas sia? Indi, kay si Jesus masidla nga nagsiling sa babayi: “Kamo nagasimba sang wala ninyo mahibalui.” Nakahibalo si Jesus nga agod maluwas ining babayi, dapat niya bag-uhon ang iya paagi sang pagsimba. Busa si Jesus nagpaathag: “Walay sapayan, ang takna nagaabot, kag karon amo na, nga ang matuod nga mga sumilimba magasimba sa Amay sa espiritu kag kamatuoran, kay, sa pagkamatuod, ang Amay nagapangita sing subong nga magasimba sa iya.”​—⁠Juan 4:​22, 23.

Ang isa pa ka okasyon nga ginsugid ni Jesus ang iya pagtamod tuhoy sa kaluwasan nagadalahig sa mga Fariseo, isa ka prominente nga relihiosong sekta sang Judaismo. Ang mga Fariseo nagtukod sing isa ka sistema sang pagsimba kag nagpati nga may kahamuot ini sang Dios. Apang pamatii ang pinamulong ni Jesus sa mga Fariseo: “Mga salimpapaw! Husto gid si Isaias sang nagtagna sia nahanungod sa inyo: ‘Ining katawhan nagapadungog sa akon paagi sa ila mga bibig, apang ang ila tagipusuon malayo sa akon. Nagasimba sila sa akon sa walay pulos; ang ila mga panudlo mga pagsulundan lamang nga gintudlo sang mga tawo.’ ”​—⁠Mateo 15:​7-9, New International Version.

Kamusta naman ang madamong relihiosong grupo karon nga nagapangangkon nga nagatuo kay Cristo? Ginasakdag bala ni Jesus sila tanan subong kalahamut-an nga mga paagi sa pagtigayon sing kaluwasan? Indi kinahanglan nga magpulupalagpat kita nahanungod sini, kay si Jesus maathag nga nagsiling: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang mga langit, kundi ang isa nga nagahimo sang kabubut-on sang akon Amay nga yara sa mga langit. Madamo ang magasiling sa akon sadtong adlaw, ‘Ginuo, Ginuo, wala bala kami magpanagna sa imo ngalan, kag sa imo ngalan magsubol sang mga demonyo, kag sa imo ngalan maghimo sing madamo nga buhat nga gamhanan?’ Kag nian pahayagan ko sila: Wala gid ako makakilala sa inyo! Palayo sa akon, kamo nga mga manugbuhat sang kalautan.”​—⁠Mateo 7:​21-23.

Ang Sibu nga Ihibalo Tuhoy kay Jesus Kinahanglanon sa Kaluwasan

Ining mga pinamulong ni Jesus nagapahunahuna sing serioso. Ginapakita sini nga madamong debotado nga tawo ang napaslawan sa ‘paghimo sang kabubut-on sang Amay.’ Paano, nian, ang isa makatigayon sing matuod nga kaluwasan? Ang 1 Timoteo 2:​3, 4 nagasabat: “Kabubut-on [sang Dios] nga ang tanan nga tawo maluwas kag makadangat sa sibu nga ihibalo sang kamatuoran.”​—⁠Ipaanggid ang Colosas 1:​9, 10.

Ini nga ihibalo importante gid sa pagtigayon sing kaluwasan. Sang ginpamangkot sang isa ka Romanong bantay sa bilangguan si apostol Pablo kag ang iya kaupod, nga si Silas, “Ano bala ang dapat ko himuon agod maluwas?” nagsabat sila: “Magtuo kay Ginuong Jesus kag maluwas ka, ikaw kag ang imo panimalay.” (Binuhatan 16:​30, 31) Nagakahulugan bala ina nga ang dapat lamang nga himuon sang bantay sang bilangguan kag sang iya pamilya amo ang tigayunon ini nga balatyagon sa ila tagipusuon? Indi, kay una, indi sila mahimo ‘makatuo kay Ginuong Jesus’ kon wala sila sing pila ka paghangop kon sin-o si Jesus, kon ano ang ginhimo niya, kag kon ano ang gintudlo niya.

Halimbawa, gintudlo ni Jesus ang pagtukod sa isa ka langitnon nga panguluhan​—⁠“ang ginharian sang Dios.” (Lucas 4:43) Nagpahamtang man sia sing mga prinsipio tuhoy sa Cristianong moralidad kag paggawi. (Mateo, kapitulo 5-7) Ginpaathag niya ang panindugan nga dapat himuon sang iya mga disipulo kon tuhoy sa politika. (Juan 15:19) Ginpatok niya ang tugob-globo nga programa sang pagtudlo kag ginsugo ang iya mga sumulunod nga makigbahin sa sini. (Mateo 24:​14; Binuhatan 1:8) Huo, ang ‘pagtuo kay Jesus’ nagkahulugan sing paghangop sa madamong butang! Indi katingalahan, nian, nga “ginhambal [nanday Pablo kag Silas] ang pulong ni Jehova sa [bantay sang bilangguan] kag sa tanan nga yara sa iya panimalay” antes ining bag-ong mga tumuluo ginbawtismuhan.​—⁠Binuhatan 16:​32, 33.

Ang Sibu nga Ihibalo Tuhoy sa Dios Kinahanglanon Man

Ang kinahanglanon nga bahin sang pagtuo gid kay Jesus nagalakip sang pagsimba sa Dios nga ginasimba mismo ni Jesus. Si Jesus nangamuyo: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—⁠Juan 17:⁠3.

Sadtong panahon sang iya ministeryo sa duta, pirme ginpatuhoy sang Anak sang Dios ang igtalupangod sa iya Amay kag indi sa iya kaugalingon. Wala gid sia magpangangkon subong ang Dios nga Labing Gamhanan. (Juan 12:​49, 50) Sa madamong okasyon gin-athag ni Jesus ang iya posisyon sa kahimusan sang Dios paagi sa pagsiling nga kubos sia sa iya Amay. (Lucas 22:​41, 42; Juan 5:19) Aba, si Jesus nagsiling: “Ang Amay daku pa sa akon.” (Juan 14:28) Gintudluan ka bala sang imo relihion sang matuod nga kaangtanan sa ulot sang Dios kag ni Cristo? Ukon ginpapati ka bala nga si Jesus mismo amo ang Dios nga Labing Gamhanan? Ang imo kaluwasan nagasandig sa pagtigayon sing husto nga paghangop.

Sa Pangamuyo sang Ginuo, ginlaygayan ni Jesus ang iya mga disipulo sa pagpangamuyo: “Pakabalaanon ang imo ngalan.” (Mateo 6:9) Wala ginpakilala sang kalabanan nga badbad sang Biblia ang ngalan sang Dios, nga nagabadbad sini nga “Ginuo.” Apang sa dumaan nga mga kopya sang “Daan nga Testamento,” ang ngalan sang Dios makita sing kapin sa anom ka libo ka beses! Busa ang Salmo 83:​18 mabasa: “Agod makilala sang katawhan nga ikaw, nga ang iya ngalan amo si Jehova, ikaw lamang amo ang Labing Mataas sa bug-os nga duta.” Gintudluan ka bala nga gamiton ang ngalan sang Dios, nga si Jehova? Kon wala, ang imo kaluwasan yara sa katalagman, kay “ang tanan nga nagatawag sa ngalan ni Jehova maluwas”!​—⁠Binuhatan 2:​21; ipaanggid ang Joel 2:⁠32.

Sa Espiritu kag Kamatuoran

Ginpatuhoy man ni Jesucristo ang igtalupangod sa Pulong sang Dios, ang Biblia. Sang ginpaathag ang pagtamod sang Dios tuhoy sa pila ka butang, masunson sia nga nagasiling: “Ini nasulat.” (Mateo 4:​4, 7, 10; 11:​10; 21:13) Sang gab-i antes sia mapatay, si Jesus nangamuyo nahanungod sa iya mga disipulo: “Pakabalaana sila paagi sa kamatuoran; ang imo pulong amo ang kamatuoran.”​—⁠Juan 17:⁠17.

Busa ang pagtigayon sing paghangop sa mga panudlo sang Pulong sang Dios, ang Biblia, isa pa ka kinahanglanon para sa kaluwasan. (2 Timoteo 3:16) Ang Biblia lamang ang nagasabat sa mga pamangkot subong sang: Ano ang kahulugan sang kabuhi? Ngaa gintugutan sang Dios ang kalautan nga magpadayon sing tuman kalawig? Ano ang nagakatabo sa tawo kon mapatay sia? Ginapaantos gid bala sang Dios ang katawhan sa kalayuhon nga impierno? Ano ang katuyuan sang Dios para sa duta?⁠a Ang isa indi sarang makasimba sing nagakaigo sa Dios kon wala sia sing husto nga paghangop sa sining mga pamangkot, kay si Jesus nagsiling: “Ang matuod nga mga sumilimba magasimba sa Amay sa espiritu kag kamatuoran.”​—⁠Juan 4:⁠23.

Ang Pagtuo Nagapahulag sa Pagpanghikot

Ang kaluwasan indi lamang pagtigayon sing impormasyon. Sa isa ka mabinatunon nga tagipusuon, ang sibu nga ihibalo sa Dios nagapatubas sing pagtuo. (Roma 10:​10, 17; Hebreo 11:6) Ina nga pagtuo nagapahulag sa isa sa pagpanghikot. Halimbawa, ang Biblia nagalaygay: “Busa, hinulsol kamo, kag magliso agod mapanas ang inyo mga sala, kag mag-abot ang mga panag-on sang pagpaumpaw gikan sa atubangan ni Jehova.”​—⁠Binuhatan 3:⁠19.

Huo, ang kaluwasan nagalakip man sang pagpahisuno sang kaugalingon sa mga talaksan sang Dios tuhoy sa pagginawi kag moralidad. Sa idalom sang nagapabag-o nga impluwensia sang Pulong sang Dios, ang madugay na nga mga batasan sang pagbutig kag pagdaya ginabuslan sang pagkabunayag kag pagkamaminatud-on. (Tito 2:10) Ang imoral nga mga buhat, subong sang homoseksuwalidad, panghilahi, kag pakighilawas ginasikway kag ginabuslan sing putli nga moral nga paggawi. (1 Corinto 6:​9-11) Indi lamang ini isa ka temporaryo nga paglihi pasad sa emosyon kundi isa ka permanente nga pagbalhin nga resulta sang mahalungon nga pagtuon kag pag-aplikar sa Pulong sang Dios.​—⁠Efeso 4:​22-24.

Sa ulihi, ang gugma kag apresasyon sa Dios nagapahulag sa bunayag-sing-tagipusuon nga tawo nga maghimo sing bug-os nga dedikasyon sa Dios kag simbuluhan ini paagi sa bawtismo sa tubig. (Mateo 28:​19, 20; Roma 12:1) Ang bawtismado nga mga Cristiano naluwas sa mga mata sang Dios. (1 Pedro 3:21) Sa nagapakari nga paglaglag sa sining malauton nga kalibutan, ang Dios magaluwas sa ila sing bug-os paagi sa pag-amlig sa ila sa sinang kapipit-an.​—⁠Bugna 7:​9, 14.

Kon Ano ang Mahimo nga Kahulugan sang Kaluwasan sa Imo

Maathag gikan sa sining malip-ot nga pagbinagbinag nga ang pagtigayon sing kaluwasan nagadalahig sing kapin pa sa ‘pagbutang kay Ginuong Jesus sa imo tagipusuon.’ Nagakahulugan ini sang pagkuha sing sibu nga ihibalo tuhoy kay Jehova nga Dios kag kay Jesucristo kag sang paghimo sing kinahanglanon nga mga pagbag-o sa kabuhi sang isa. Daw mabudlay ini himuon, apang ang mga Saksi ni Jehova handa sa pagbulig sa imo sa sining panikasog. Paagi sa walay bayad nga pagtuon sang Biblia sa puluy-an, mabuligan nila kamo sa paglakat sa banas padulong sa matuod nga kaluwasan.⁠b

Bangod tuman na kalapit ang nagapakari nga adlaw sang paghukom sang Dios, labi gid ka hilingagawon sangsa nagligad nga himuon ini! Karon na ang tion nga tumanon ang pinamulong sang manalagna: “Sa wala pa mag-abot sa inyo ang adlaw sang kaakig ni Jehova, pangitaa ninyo si Jehova, kamo tanan nga mahagop sang duta, nga naghimo sang Iya kaugalingon nga hudisyal nga desisyon. Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.”​—⁠Sofonias 2:​2, 3.

[Mga footnote]

[Kahon sa pahina 6]

Ang Kaluwasan Resulta Sang...

◻ Pagtigayon sing sibu nga ihibalo tuhoy sa Dios kag kay Jesus.​—⁠Juan 17:⁠3.

◻ Pagpakita sing pagtuo.​—⁠Roma 10:​17; Hebreo 11:⁠6.

◻ Paghinulsol kag pagliso.​—⁠Binuhatan 3:​19; Efeso 4:​22-24.

◻ Dedikasyon kag bawtismo.​—⁠Mateo 16:​24; 28:​19, 20.

◻ Padayon nga paghimo sing dayag nga pagpahayag.​—⁠Mateo 24:​14; Roma 10:⁠10.

[Kapsion sa pahina 7]

Ang pagtuon sa Biblia, pag-aplikar sa natun-an, pagdedikar, kag pagpabawtismo amo ang mga tikang nga nagadul-ong sa kaluwasan