Ginhimo Nila ang Kabubut-on ni Jehova

Isa ka Huwaran sang Pagsakripisyo sa Kaugalingon kag Pagkamainunungon

PARA sa isa ka lamharon nga mangunguma nga si Eliseo, ang daw isa ka kinaandan nga adlaw sang pag-arado nangin isa sang labing importante nga adlaw sa iya kabuhi. Samtang nagatrabaho sia sa ulumhan, si Eliseo nakabaton sang wala ginapaabot nga bisita nga si Elias, ang nagapanguna nga manalagna sang Israel. ‘Ano ayhan ang iya kinahanglan sa akon?’ mahimo nahunahuna ni Eliseo. Indi na kinahanglan nga maghulat sia sing malawig para sa sabat. Ginhaboy ni Elias ang iya opisyal nga panapton kay Eliseo, nagapakita nga sa ulihi si Eliseo amo ang magabulos sa iya. Wala ginpasapayanan ni Eliseo ini nga pagtangdo. Sa gilayon, ginbiyaan niya ang iya ulumhan agod mangin alagad ni Elias.​—⁠1 Hari 19:​19-21.

Mga anom ka tuig sang ulihi, nag-abot ang tion nga magbiya si Elias. Ang kasaysayan sang iya paghalin gintawag nga “isa sang labing dalayawon nga sugilanon” sa Hebreo nga Kasulatan.

Si Elias Naghanda sa Paglakat

Si Elias naghandum nga maghimo sing katapusan nga pagduaw sa Bethel, Jerico, kag sa Jordan. Magalakip ini sing madamo nga milya sang paglakat, ang pila sini taklaron nga mga duog. Sa kada hut-ong sang paglakbay, ginpangabay ni Elias si Eliseo nga magpabilin. Apang si Eliseo namilit nga mag-upod sa iya agalon tubtob matapos ang ila paglakbay.​—⁠2 Hari 2:​1, 2, 4, 6.

Samtang yara sa Bethel kag sa Jerico, “ang mga anak nga lalaki sang mga manalagna” nagpalapit kay Eliseo.a “Nakahibalo ka bala nga kuhaon ni Jehova karon ang pagkaulo sang imo agalon gikan sa imo? pamangkot nila sa iya. “Huo, nahibaluan ko,” sabat niya. “Hipos kamo.”​—⁠2 Hari 2:​3, 5.

Masunod nga nagkadto sanday Elias kag Eliseo sa Suba Jordan. Sang nakaabot sila sa Jordan, si Elias naghimo sing isa ka milagro samtang ang 50 ka anak nga lalaki sang mga manalagna nagalantaw gikan sa malayo. “Ginkuha ni Elias ang iya kunop, kag ginpiod ini kag ginbunal ang mga tubig, kag naghawa ini sa pihak kag pihak, sa bagay nga nagtabok sila nga duha sa mamala nga duta.”​—⁠2 Hari 2:⁠8.

Sang nakatabok na sila, si Elias nagsiling kay Eliseo: “Pangayo ka sing himuon ko tungod sa imo antes ako kuhaon sa imo.” Nagpangabay si Eliseo sing “duha ka bahin” sang espiritu ni Elias​—⁠nga amo, ang doble nga bahin nga matigayon sing kinaandan sang panganay nga lalaki. Sa pagkamatuod, ginpadunggan ni Eliseo si Elias subong sang pagpadungog sang isa ka panganay nga anak nga lalaki sa iya amay. Dugang pa, ginhaplasan sia nga mangin salili ni Elias subong manalagna ni Jehova sa Israel. Gani ang iya pangabay indi makagod ukon dinagakaigo. Dugang pa, nakahibalo nga si Jehova lamang ang makahatag sining pangabay, si Elias mapainubuson nga nagsabat: “Nagpangabay ka sang mabudlay nga butang.” Nian sia nagdugang: “Kon makita mo ako kon kuhaon ako gikan sa imo, matabo ini sa imo sa sinang paagi; apang kon indi, indi ini matabo.”​—⁠2 Hari 2:9, 10; Deuteronomio 21:⁠17.

Maathag nga determinado gid si Eliseo nga mag-upod sa iya agalon. Nian, nagtuhaw ang “isa ka kangga nga kalayo kag ang mga kabayo nga kalayo.” Sa atubangan mismo sang nakibot nga si Eliseo, gindala si Elias sang isa ka buhawi​—⁠ginsaylo sing milagruso sa iban nga duog.b Ginpulot ni Eliseo ang opisyal nga panapton ni Elias kag naglakat pabalik sa pangpang sang Suba Jordan. Ginbunal niya ang mga tubig, nga nagasiling: “Diin bala si Jehova nga Dios ni Elias, bisan Sia?” Ang tubig naghawa, nagahatag sing maathag nga pamatuod nga si Eliseo ginasakdag sang Dios subong tal-us ni Elias.​—⁠2 Hari 2:​11-14.

Mga Leksion Para sa Aton

Sang gin-agda sa isa ka pinasahi nga pag-alagad upod kay Elias, ginbayaan dayon ni Eliseo ang iya ulumhan agod mag-alagad sa nagapanguna nga manalagna sang Israel. Maathag nga ang pila sang iya mga katungdanan kubos, kay nakilala sia subong ang isa nga “nagabubo sing tubig sa mga kamot ni Elias.”c (2 Hari 3:11) Walay sapayan, gintamod ni Eliseo ang iya hilikuton subong isa ka pribilehiyo, kag mainunungon sia nga nagpabilin sa kiliran ni Elias.

Madamo nga alagad sang Dios karon ang nagapasundayag sing kaanggid nga espiritu sa pagsakripisyo sa kaugalingon. Ang pila nagbiya sang ila “mga ulumhan,” sang ila mga palangabuhian, sa pagbantala sing maayong balita sa malayo nga mga teritoryo ukon mag-alagad subong katapo sang pamilya Bethel. Ang iban naglakbay sa iban nga kadutaan agod magtrabaho sa mga proyekto sa konstruksion sang Sosiedad. Madamo ang nagbaton sing mga trabaho nga ginakabig nga makapanubo. Apang, wala sing isa nga nagapaulipon kay Jehova ang nagahimo sing walay pulos nga pag-alagad. Ginaapresyar ni Jehova ang tanan nga nagaalagad sa iya sing kinabubut-on, kag pakamaayuhon niya ang ila nagasakripisyo sa kaugalingon nga espiritu.​—⁠Marcos 10:​29, 30.

Nagpabilin si Eliseo kay Elias tubtob sa katapusan. Namalibad sia nga biyaan ang tigulang nga manalagna. Walay duhaduha, ang suod nga relasyon nga napalambo niya upod kay Elias naghimo sinang mainunungon nga gugma nga makalilipay. Sa karon, nagapanikasog ang mga alagad sang Dios nga palig-unon ang ila relasyon upod sa Dios kag magpakigsuod sa ila mga masigkatumuluo. Ang isa ka suod nga higot sang paghiusa pagapakamaayuhon, kay ang Biblia nagasiling tuhoy kay Jehova: ‘Sa isa nga mainunungon magapanghikot ikaw sing mainunungon.’​—⁠2 Samuel 22:⁠26.

[Mga footnote]