Ngaa Magmapasalamaton?

BANGOD naoperahan sa taludtod, napilitan si Harley nga islan ang iya palangitan-an subong isa ka makinista nga mangin isa ka klerk sa opisina. Sang ginpamangkot kon ano ang ginbatyag niya tuhoy sini nga pagbag-o, si Harley nagsiling: “Nahidlaw ako sa trabaho sa makinarya. Apang, sing tampad, mas malipayon ako karon sa akon obra sangsa nagligad.”

Nagahatag sing rason kon ngaa malipayon sia, si Harley nagsiling: “Ini amo ang panimuot sang mga kaupdanan ko sa obra. Indi kaangay sa nagligad ko nga ginaubrahan, ang akon karon superbisor kag mga kaupdanan nagapasalamat sa ginahimo ko, kag nagahatag sila gilayon sing komendasyon. Amo ini ang daku nga kinatuhayan.” Nagabatyag nga mapuslanon kag kinahanglanon, si Harley isa ka malipayon nga mamumugon na karon.

Ang mga komendasyon ukon pagpasalamat, kon nagakabagay, tunay nga makalilipay. Sa pihak nga bahin, ang epekto sang pagkawalay kabalaslan, mangin subong ka makapulung-aw sa ginsiling ni Shakespeare: “Maghuyop, maghuyop, ikaw nga hangin sa tigtulugnaw, indi ikaw tuman ka mapintas subong sa pagkawalay kabalaslan sang tawo.” Sing makapasubo, madamo ang ginpakitaan sini nga kapintas.

Magbantay Batok sa Pagkawalay Kabalaslan

Sa kalibutan karon ang hanuot nga mga ekspresyon sang pagpasalamat talagsa na lamang. Isa ka manunulat, halimbawa, ang namangkot: “Kon ang nobya may tion sa pagsulat sing mga direksion sa 200 ka imbitasyon sa kasal, ngaa wala sia sing tion sa pagsulat sing thank-you note sa 163 ka regalo?” Sa masami bisan ang simple nga tinaga nga “salamat” wala na ginabungat. Ang pagkamapasalamaton dugang kag dugang nga ginabuslan sing ako anay nga panimuot. Ini nga kahimtangan isa sang nagapakilala nga tanda sang katapusan nga mga adlaw. Si apostol Pablo nagpaandam: “Dapat ninyo mahibaluan nga sa katapusan nga mga adlaw ang mga tion mapuno sing katalagman. Ang mga tawo mangin maiyaiyahon . . . Indi gid sila mapasalamaton.”​—⁠2 Timoteo 3:​1, 2, Phillips.

Sa iban nga mga hitabo, ang pagkamapasalamaton ginabuslan sing pagpanginto. Ang mga tinaga sang pagpasalamat ginabungat sing tinagipusuon nga wala ginahunahuna ang personal nga kaayuhan. Apang, ang pagpanginto, nga sa masami indi hanuot kag indi matuod, mahimo nga naggikan sa natago nga motibo nga mahatagan sing promosyon ukon makatigayon sing pila ka personal nga mga bentaha. (Judas 16) Luwas nga ginalimbungan ang ginainto, ining matahom nga hambal isa gid ka bunga sang pagkabugalon kag pagkamatinaastaason. Sin-o bala, nian, ang maluyag nga mangin biktima sang dihanuot nga pagpang-into? Apang ang matuod nga pagkamapasalamaton tunay nga makaparepresko.

Ang isa nga nagapabutyag sing pasalamat nagapanginpulos sa sini. Ang kalipay nga nabatyagan niya bangod sang tinagipusuon nga pagkamapasalamaton nagadugang sa iya kalipay kag kalinong. (Ipaanggid ang Hulubaton 15:​13, 15.) Kag subong isa ka positibo nga kinaiya, ang pagkamapasalamaton nagaamlig sa iya gikan sa negatibo nga mga kinaiya subong sang kaakig, kahisa, kag kaugot.

“Ipakita ang Inyo Kaugalingon nga Mapasalamaton”

Ang Biblia nagalaygay sa aton nga palambuon ang espiritu sang pagkamapasalamaton. Si Pablo nagsulat: “May kaangtanan sa tanan nga butang magpasalamat kamo. Kay amo ini ang kabubut-on sang Dios nga nahiusa kay Cristo Jesus tungod sa inyo.” (1 Tesalonica 5:18) Kag si Pablo naglaygay sa mga taga-Colosas: “Pagahuma ang paghidait ni Cristo sa inyo mga tagipusuon . . . Kag ipakita ang inyo kaugalingon nga mapasalamaton.” (Colosas 3:15) Madamong salmo ang nagaunod sing mga ekspresyon sang pagpasalamat, nagapakita nga ang tinagipusuon nga pagpasalamat isa ka diosnon nga kinaiya. (Salmo 27:​4; 75:1) Sing maathag, si Jehova nga Dios nahamuot kon magpakita kita sing pagkamapasalamaton sa adlaw-adlaw nga pagkabuhi.

Apang ano nga mga butang sa sining dimapasalamaton nga kalibutan ang nagapabudlay sa aton nga mapalambo ang espiritu sang pagkamapasalamaton? Paano naton mapakita ang pagkamapasalamaton sa adlaw-adlaw nga pagkabuhi? Ining mga pamangkot pagahinun-anunan sa masunod nga artikulo.