Malapit Na ang Mahimayaon nga Kahilwayan Para sa mga Anak sang Dios
“Ang tinuga ginpasakop sa pagkawalay pulos . . . pasad sa paglaum nga ang tinuga man mismo hilwayon gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.”—ROMA 8:20, 21.
1. Paano ginlarawan ang halad ni Jesus sa Adlaw sang Katumbasan?
GINHATAG ni Jehova ang iya bugtong nga Anak subong halad nga gawad nga nagbukas sang dalan padulong sa langitnon nga kabuhi para sa 144,000 ka tawo kag sa dayon dutan-on nga mga paglaum para sa nabilin nga bahin sang katawhan. (1 Juan 2:1, 2) Subong sang ginpatalupangod sa naunang artikulo, ang halad ni Jesus para sa ginpanganak sang espiritu nga mga Cristiano ginlarawan sang ang mataas nga saserdote sang Israel naghalad sing baka nga lalaki subong halad-tungod-sa-sala para sa iya kaugalingon, sa iya panimalay, kag sa tribo ni Levi sa tuigan nga Adlaw sang Katumbasan. Sadto man nga adlaw, naghalad sia sing kanding subong halad-tungod-sa-sala para sa tanan iban pa nga mga Israelinhon, subong man nga ang halad ni Cristo magabenepisyo sa katawhan sa kabilugan. Ang kanding nga buhi malaragwayon nga nagpas-an sang kabilugan nga mga sala sang katawhan sang nagligad nga tuig, nga gintabog sa kahanayakan.a—Levitico 16:7-15, 20-22, 26.
2, 3. Ano ang kahulugan sang pinamulong ni Pablo nga narekord sa Roma 8:20, 21?
2 Sa tapos mabalay ang paglaum sang katawhan nga mangin langitnon nga “mga anak sang Dios,” si apostol Pablo nagsiling: “Ang malangkagon nga pagpaabot sang tinuga nagahulat sang pagpahayag sang mga anak sang Dios. Kay ang tinuga ginpasakop sa pagkawalay pulos, indi paagi sa iya kaugalingon nga kabubut-on kundi paagi sa iya nga nagpasakop sini, pasad sa paglaum, nga ang tinuga man mismo hilwayon gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.” (Roma 8:14, 17, 19-21) Ano ang kahulugan sini nga pinamulong?
3 Sang ang aton katigulangan nga si Adan gintuga subong himpit nga tawo, sia “anak [ukon, bata] sang Dios.” (Lucas 3:38) Bangod sang pagpakasala, sia ‘naulipon sa kaduluntan’ kag ginliton ini nga kahimtangan sa tawhanon nga rasa. (Roma 5:12) Gintugutan sang Dios ang mga tawo nga mabun-ag nga nagaatubang sing “pagkawalay pulos” bangod sang ila napanubli nga pagkadihimpit, apang ginhatagan niya sila sing paglaum paagi sa “binhi,” si Jesucristo. (Genesis 3:15; 22:18; Galacia 3:16) Ginatudlo sang Bugna 21:1-4 ang tion nga ang ‘kamatayon, kasubo, paghibi, kag kasakit wala na.’ Sanglit isa ini ka saad sa “katawhan,” nagapasalig ini sa aton nga ang bag-ong dutan-on nga katilingban sang katawhan nga nagakabuhi sa idalom sang pagginahom sang Ginharian magaagom sing pagpasag-uli sang hunahuna kag lawas sa bug-os nga kapagros kag sing kabuhi nga walay katapusan subong dutan-on nga “mga anak sang Dios.” Sa Isa ka Libo ka Tuig nga Paggahom ni Cristo, ang matinumanon nga katawhan ‘pagahilwayon gikan sa pagkaulipon sa kaduluntan.’ Sa tapos mapamatud-an ang katutom kay Jehova sa katapusan nga pagtilaw, hilwayon sila sing dayon gikan sa napanubli nga sala kag kamatayon. (Bugna 20:7-10) Nian ang mga didto sa duta ‘makatigayon sing mahimayaon nga kahilwayan sang mga anak sang Dios.’
Nagasiling Sila “Kari!”
4. Ano ang kahulugan sang “pagkuha sang tubig sang kabuhi nga walay bayad”?
4 Daw ano katahom nga paglaum ang ginpahamtang sa atubangan sang katawhan! Indi katingalahan nga ang ginpanganak sang espiritu nga mga Cristiano nga yari pa sa duta makugi nga nagapanguna sa pagsugid sa iban nahanungod sini! Subong mangin bahin sang “nobya” sang ginhimaya nga Kordero, si Jesucristo, ang hinaplas nga nagkalabilin nadalahig sa katumanan sining matagnaon nga mga pulong: “Ang espiritu kag ang nobya padayon nga nagasiling: ‘Kari!’ Kag ang bisan sin-o nga nagapamati magsiling: ‘Kari!’ Kag ang bisan sin-o nga ginauhaw magkari; ang bisan sin-o nga maluyag sa pagkuha sing tubig sang kabuhi nga walay bayad.” (Bugna 21:2, 9; 22:1, 2, 17) Indi, ang mga benepisyo sang halad nga gawad ni Jesus indi lamang limitado sa 144,00 ka hinaplas. Ang espiritu sang Dios padayon nga nagapanghikot sa mga nagkalabilin sang nobya nga klase sa duta sa pagsiling “Kari.” Ang bisan sin-o nga nagapamati nga ginauhaw sa katarungan ginaagda sa pagsiling “Kari,” nga nagabenepisyo mismo sa bugana nga aman ni Jehova para sa kaluwasan.
5. Kay sin-o nalipay ang mga Saksi ni Jehova nga yara sila sa tunga nila?
5 Ang mga Saksi ni Jehova nagatuo sa aman sang Dios para sa kabuhi paagi kay Jesucristo. (Binuhatan 4:12) Nalipay sila nga yara sa tunga nila ang mga bunayag sing tagipusuon nga maluyag sa pagtuon sang mga katuyuan sang Dios kag sa paghimo sang iya kabubut-on. Ang ila mga Kingdom Hall bukas sa tanan nga maluyag sa ‘pagkari kag sa pagkuha sing tubig sang kabuhi nga walay bayad’ sa sining “panahon sang katapusan.”—Daniel 12:4.
Mga Pagbalhin sa Pagligad sang Tion
6. Paano nagpanghikot ang espiritu sang Dios sa mga alagad ni Jehova sa lainlain nga tion?
6 Ang Dios may tion sa pagtuman sang iya mga katuyuan, kag nagaapektar ini sang iya pagpakig-angot sa katawhan. (Manugwali 3:1; Binuhatan 1:7) Walay sapayan nga ang espiritu sang Dios nag-abot sa iya mga alagad sang panahon antes sang Cristianismo, wala sila ginpanganak subong iya espirituwal nga mga anak. Apang, sugod kay Jesus, nag-abot ang tion ni Jehova nga gamiton ang balaan nga espiritu agod ipanganak ang dedikadong mga lalaki kag babayi sa langitnon nga palanublion. Kag kamusta karon? Ang amo gihapon nga espiritu nagapanghikot sa “iban nga mga karnero” ni Jesus, apang wala ini nagapukaw sa ila sing paglaum kag handum para sa langitnon nga kabuhi. (Juan 10:16) Bangod may hatag-Dios nga paglaum nga magkabuhi sing dayon sa paraiso nga duta, malipayon nila nga ginasuportahan ang hinaplas nga nagkalabilin sa paghatag sing panaksi sa sining panahon sang pagliton halin sa daan nga kalibutan padulong sa matarong nga bag-ong kalibutan sang Dios.—2 Pedro 3:5-13.
7. Sa anong hilikuton sa pag-ani interesado ang mga Estudyante sang Biblia, apang ano ang nahibal-an nila tuhoy sa paraiso?
7 Ginsugdan sang Dios ‘nga dalhon ang madamong anak sa himaya’ paagi sa pagpasagahay sang balaan nga espiritu sang Pentecostes 33 C.E., kag maathag nga nagtalana sia sing tion sa pagkompleto sa espirituwal nga “Israel sang Dios” nga may kabug-usan nga 144,000. (Hebreo 2:10; Galacia 6:16; Bugna 7:1-8) Sugod sang 1879, ang hilikuton sa pag-ani nga nagadalahig sa hinaplas nga mga Cristiano masunson nga ginahinambitan sa sining magasin. Apang nakahibalo man ang mga Estudyante sang Biblia (ginatawag karon nga mga Saksi ni Jehova) nga ang Kasulatan nagahatag sing paglaum nga kabuhi nga dayon sa paraiso nga duta. Halimbawa, ang Hulyo 1883 nga guwa sang Watch Tower nagsiling: “Kon matukod ni Jesus ang iya ginharian, malaglag ang malaut, kbp., ining duta mangin paraiso, . . . kag ang tanan nga yara sa ila mga lulubngan magasulod sa sini. Kag paagi sa pagtuman sa mga kasuguan sini mahimo sila magkabuhi sing dayon sa sini.” Samtang nagalipas ang tion, ang pag-ani sa mga hinaplas nagdiutay, kag sing amat-amat ang mga indibiduwal nga wala sing langitnon nga paglaum gin-ani pasulod sa organisasyon ni Jehova. Sa sina man nga tion, ginhatagan sang Dios ang iya hinaplas nga mga alagad, ang natawo liwat nga mga Cristiano, sing tumalagsahon nga paghangop.—Daniel 12:3; Filipos 2:15; Bugna 14:15, 16.
8. Paano napalambo ang paghangop sa dutan-on nga paglaum sang maaga nga bahin sang dekada 1930?
8 Labi na sugod sang 1931 nga yadtong may dutan-on nga paglaum nakig-upod sa Cristianong kongregasyon. Sadto nga tuig, ginpaathag ni Jehova sa nagkalabilin sang ginpanganak sang espiritu nga mga Cristiano nga ang Ezequiel kapitulo 9 nagapatuhoy sa sining dutan-on nga klase, nga natandaan nga makalampuwas pasulod sa bag-ong kalibutan sang Dios. Sang 1932 nahangpan sing maathag nga ining karon nga mga karnero ginlaragway sang kaupod ni Jehu nga si Jonadab (Jehonadab). (2 Hari 10:15-17) Sang 1934 ginpaathag nga ang “mga Jonadab” dapat “magkonsagrar,” ukon magdedikar, sang ila kaugalingon sa Dios. Sang 1935 ang “dakung panong,” ukon “dakung kadam-an”—ginhunahuna anay nga isa ka segundaryo nga espirituwal nga klase nga mangin “mga kaupdanan” sang nobya ni Cristo sa langit—nakilal-an subong iban nga mga karnero nga may dutan-on nga paglaum. (Bugna 7:4-15; 21:2, 9; Salmo 45:14, 15) Kag labi na sugod sang 1935 nga ang mga hinaplas nanguna sa pagpangita sa matarong nga katawhan nga nalangkag sa pagkabuhi sing dayon sa isa ka paraiso nga duta.
9. Pagkatapos sang 1935, ngaa nag-untat ang iban nga mga Cristiano sa pagpakigbahin sa mga emblema sang Panihapon sang Ginuo?
9 Pagkatapos sang 1935 ang pila ka Cristiano nga nagapakigbahin sa tinapay kag alak sa Panihapon sang Ginuo nag-untat sa pagpakigbahin. Ngaa? Bangod narealisar nila nga ang ila paglaum dutan-on gali, indi langitnon. Ang isa ka babayi nga nabawtismuhan sang 1930 nagsiling: “Bisan nga [ang pagpakigbahin] ginakabig anay subong nagakaigo, ilabi na para sa makugi nga bug-os tion nga mga ministro, wala gid ako makumbinse nga may langitnon ako nga paglaum. Nian, sang 1935, gin-athag sa amon nga ginatipon ang dakung kadam-an nga may paglaum nga magkabuhi sing dayon sa duta. Madamo sa amon ang nalipay nga mahangpan nga bahin gali kami sinang dakung kadam-an, kag nag-untat kami sa pagpakigbahin sa mga emblema.” Bisan ang Cristianong mga publikasyon nagbag-o sing kaundan. Walay sapayan nga sang nagligad nga mga tuig, yadto nga mga publikasyon gindesinyo labi na para sa ginpanganak sang espiritu nga mga sumulunod ni Jesus, sugod sang 1935 Ang Lalantawan kag ang iban nga mga literatura sang ‘matutom nga ulipon’ nag-aman sing espirituwal nga pagkaon nga nagakabagay sa mga kinahanglanon sang mga hinaplas kag sang ila mga kaupdanan nga may dutan-on nga paglaum.—Mateo 24:45-47.
10. Paano mahimo tal-usan ang isa ka dimatutom nga hinaplas?
10 Halimbawa ang isa ka hinaplas nangin dimatutom. May magatal-us bala? Ginpakita ini ni Pablo sa iya paghinun-anon sa simbuliko nga kahoy nga olibo. (Roma 11:11-32) Kon ang isa nga ginpanganak sang espiritu kinahanglan nga tal-usan, ayhan ihatag sang Dios ang langitnon nga pagtawag sa isa nga ang pagtuo nangin huwaran sa paghimo sing sagrado nga pag-alagad sa iya sa madamong tinuig.—Ipaanggid ang Lucas 22:28, 29; 1 Pedro 1:6, 7.
Madamong Rason sa Pagpasalamat
11. Walay sapayan sang kinaugali sang aton paglaum, ano ang ginapasalig sa aton sang Santiago 1:17?
11 Diin man kita mag-alagad kay Jehova sing matutom, paayawan niya ang aton mga kinahanglanon kag matarong nga mga handum. (Salmo 145:16; Lucas 1:67-74) Bisan man may langitnon gid kita nga paglaum ukon dutan-on, may yara kita madamong maayo nga rason agod pasalamatan ang Dios. Pirme sia nagahimo sing mga butang nga sa ikaayo gid sang mga ginahigugma niya. Si disipulo Santiago nagsiling nga “ang tagsa ka maayong dulot kag tagsa ka himpit nga regalo nagagikan sa hitaas, kay nagapanaug ini gikan sa Amay sang langitnon nga mga kapawa,” si Jehova nga Dios. (Santiago 1:17) Talupangdon naton ang pila sining mga dulot kag mga pagpakamaayo.
12. Ngaa makasiling kita nga ginhatagan ni Jehova ang tagsatagsa sang iya matutom nga mga alagad sing makalilipay nga paglaum?
12 Si Jehova naghatag sa tagsatagsa sang iya matutom nga mga alagad sing makalilipay nga paglaum. Gintawag niya ang iban sa langitnon nga kabuhi. Sa iya mga saksi antes sang panahon sang Cristianismo, ginhatag ni Jehova ang matahom nga paglaum sang pagkabanhaw padulong sa kabuhi nga walay katapusan sa duta. Halimbawa, si Abraham nagtuo sa pagkabanhaw kag naghulat “sa siudad nga may matuod nga mga sadsaran”—ang langitnon nga Ginharian nga sa idalom sini banhawon sia sa dutan-on nga kabuhi. (Hebreo 11:10, 17-19) Sa liwat, sa sining panahon sang katapusan, ang Dios nagahatag sa minilyon sing paglaum nga magkabuhi sa walay katapusan sa paraiso nga duta. (Lucas 23:43; Juan 17:3) Sa pagkamatuod, ang bisan sin-o nga ginhatagan ni Jehova sining matahom nga paglaum dapat gid magpasalamat sing tudok tungod sini.
13. Paano nagpanghikot ang balaan nga espiritu sang Dios sa iya katawhan?
13 Ginahatag ni Jehova ang iya balaan nga espiritu subong dulot sa iya katawhan. Ang mga Cristiano nga ginhatagan sing langitnon nga kabuhi ginhaplasan sing balaan nga espiritu. (1 Juan 2:20; 5:1-4, 18) Apang, ang mga alagad sang Dios nga may dutan-on nga paglaum ginabuligan kag ginatuytuyan sang espiritu. Lakip sa ila amo si Moises, nga may espiritu ni Jehova, subong sang 70 ka lalaki nga gintangduan sa pagbulig sa iya. (Numeros 11:24, 25) Sa idalom sang impluwensia sang balaan nga espiritu, si Bezalel nangin sampaton nga manugsalsal may kaangtanan sa tabernakulo sang Israel. (Exodo 31:1-11) Sanday Gideon, Jefte, Samson, David, Elias, Eliseo, kag iban pa may espiritu sang Dios. Walay sapayan nga ining mga indibiduwal sang una nga panahon indi gid pagadalhon sa langitnon nga himaya, gintuytuyan kag ginbuligan sila sang balaan nga espiritu, kaangay sa iban nga mga karnero ni Jesus karon. Gani, nian, ang pagpanag-iya sing espiritu sang Dios wala nagakahulugan nga may langitnon na kita nga pagtawag. Apang, ang espiritu ni Jehova nagahatag sing panuytoy, nagabulig sa aton sa pagbantala kag sa pagtuman sang iban pa hatag-Dios nga mga hilikuton, nagahatag sa aton sing kusog nga labaw sa kinaandan, kag nagapatubas sa aton sang bunga sini nga gugma, kalipay, paghidait, pagkamabinatason, kalulo, kaayo, pagtuo, kalum-ok, kag pagpugong sa kaugalingon. (Juan 16:13; Binuhatan 1:8; 2 Corinto 4:7-10; Galacia 5:22, 23) Indi bala kita dapat magpasalamat tungod sining maalwan nga mga dulot halin sa Dios?
14. Paano kita makabenepisyo gikan sa mga dulot sang Dios nga ihibalo kag kaalam?
14 Ang ihibalo kag kaalam mga dulot halin sa Dios nga sa sini dapat kita magpasalamat, langitnon ukon dutan-on man ang aton paglaum. Ang sibu nga ihibalo ni Jehova nagabulig sa aton nga ‘mapat-od ang mas importante nga mga butang’ kag ‘maglakat sing takus kay Jehova sa tuyo nga mapahamut-an sia sing bug-os.’ (Filipos 1:9-11; Colosas 1:9, 10) Ang diosnon nga kaalam isa ka pangamlig kag panuytoy sa kabuhi. (Hulubaton 4:5-7; Manugwali 7:12) Ang matuod nga ihibalo kag kaalam napasad sa Pulong sang Dios, kag ang pila ka nabilin nga mga hinaplas naganyat labi na sa ginasiling sini tuhoy sa ila langitnon nga kabuhi. Apang, ang gugma sa Pulong sang Dios kag ang maayo nga paghangop sa sini indi ang paagi sang Dios sa pagpakita nga gintawag kita sa langitnon nga kabuhi. Ang mga lalaki kaangay nanday Moises kag Daniel nagsulat pa gani sing mga bahin sang Biblia, apang pagabanhawon sila sa kabuhi sa duta. Langitnon ukon dutan-on man ang aton paglaum, kita tanan nagabaton sing espirituwal nga pagkaon paagi sa gintangdo nga “matutom kag mainandamon nga ulipon” ni Jehova. (Mateo 24:45-47) Busa nagapasalamat gid kita tanan tungod sa ihibalo nga natigayon naton!
15. Ano ang isa sang labing daku nga dulot sang Dios, kag paano mo ini ginatamod?
15 Ang isa sang labing daku nga dulot sang Dios amo ang mahigugmaon nga aman sang halad nga gawad ni Jesus, nga nakabulig sa aton langitnon ukon dutan-on man ang aton paglaum. Ginhigugma gid sang Dios ang kalibutan sang katawhan “sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Kag ang gugma ni Jesus nagpahulag sa iya nga ‘ihatag ang iya kalag nga gawad sang madamo.’ (Mateo 20:28) Subong sang ginpaathag ni apostol Juan, si Jesucristo amo “ang nagatumbas nga halad para sa aton mga sala [sadtong sa mga hinaplas], apang indi lamang para sa aton kundi para man sa bug-os nga kalibutan.” (1 Juan 2:1, 2) Gani, dapat kita tanan magpasalamat sing daku sa sining mahigugmaon nga aman para sa kaluwasan padulong sa kabuhi nga dayon.b
Matambong Ka Bala?
16. Anong talalupangdon nga hitabo ang saulugon pagkatapos nga makatunod ang adlaw sa Abril 11, 1998, kag sin-o ang dapat magtambong?
16 Ang pasalamat sa halad nga gin-aman sang Dios paagi sa iya Anak dapat magpahulag sa aton nga magtambong sa mga Kingdom Hall ukon sa iban pa nga mga lugar nga tipunan sang mga Saksi ni Jehova pagkatapos nga makatunod ang adlaw sa Abril 11, 1998, sa pagsaulog sang kamatayon ni Cristo. Sang ginsugdan niya ini nga selebrasyon kaupod sang iya matutom nga mga apostoles sadtong katapusan nga gab-i sang iya dutan-on nga kabuhi, si Jesus nagsiling: “Padayon ninyo nga himua ini sa handumanan nakon.” (Lucas 22:19, 20; Mateo 26:26-30) Ang pila ka nabilin nga mga hinaplas magapakigbahin sa walay lebadura nga tinapay, nga nagarepresentar sa walay kasal-anan nga tawhanon nga lawas, kag ang wala sing alkohol nga mapula nga alak, nga nagalarawan sa iya dugo nga gin-ula bilang halad. Ang ginpanganak lamang sang espiritu nga mga Cristiano ang dapat makigbahin bangod sila lamang ang yara sa bag-ong katipan kag sa katipan sang Ginharian kag may dimapanghiwala nga pamatuod sang balaan nga espiritu sang Dios nga may langitnon sila nga paglaum. Minilyon pa nga iban ang magatambong subong matinahuron nga mga tagpanilag nga nagapasalamat tungod sa gugma nga ginpakita sang Dios kag ni Cristo may kaangtanan sa halad ni Jesus nga nagahimo nga posible sang dayon nga kabuhi.—Roma 6:23.
17. Ano ang dapat naton dumdumon may kaangtanan sa paghaplas sing espiritu?
17 Ang nagligad nga relihiosong mga pagtuluuhan, ang kasubo tungod sa pagkapatay sang isa ka hinigugma, ang mga kabudlayan sa karon sa aton matag-adlaw nga pagkabuhi, ukon ang balatyagon nga nakabaton sing pila ka pinasahi nga pagpakamaayo halin kay Jehova mahimo magdul-ong sa iban nga haumhaumon sing sayop nga may yara sila langitnon nga paglaum. Apang dapat naton tanan dumdumon nga ang Kasulatan wala nagasugo sa aton nga makigbahin sa mga emblema sang Memoryal agod ipakita ang aton pasalamat sa halad nga gawad ni Cristo. Dugang pa, ang paghaplas sa espiritu “nasandig, indi sa isa nga maluyag ukon sa isa nga nagadalagan, kundi sa Dios,” ang Isa nga nag-anak kay Jesus subong espirituwal nga Anak kag nagdala sa 144,000 lamang ka iban pa nga mga anak sa himaya.—Roma 9:16; Isaias 64:8.
18. Para sa kalabanan nga mga nagaalagad kay Jehova karon, anong mga pagpakamaayo ang yara sa unahan?
18 Ang walay katapusan nga kabuhi sa paraiso nga duta amo ang hatag-Dios nga paglaum sang kalabanan nga katawhan nga nagaalagad kay Jehova sa sining katapusan nga mga adlaw. (2 Timoteo 3:1-5) Sa dili madugay, agumon nila ining makalilipay nga paraiso. Sa sina nga tion dumalahan sang mga prinsipe ang mga hilikuton sa duta sa idalom sang langitnon nga paggahom. (Salmo 45:16) Magaluntad ang mahidaiton nga mga kahimtangan samtang ginatuman sang mga pumuluyo sang duta ang mga kasuguan sang Dios kag ginatun-an ang dugang pa tuhoy sa mga dalanon ni Jehova. (Isaias 9:6, 7; Bugna 20:12) Madamo ang dapat himuon, sa pagpatindog sing mga puluy-an kag sa paggahom sa duta. (Isaias 65:17-25) Kag hunahunaa ang malipayon nga mga paghiusa liwat sang mga pamilya samtang ang mga patay mabuhi liwat! (Juan 5:28, 29) Pagkatapos sang katapusan nga pagtilaw, ang tanan nga kalautan madula. (Bugna 20:7-10) Pagkatapos sina, ang duta mapun-an sing dayon sang himpit nga mga tawo nga ‘ginhilway gikan sa pagkaulipon sa kaduluntan kag may mahimayaon nga kahilwayan sang mga anak sang Dios.’
[Mga footnote]
a Tan-awa ang Insight on the Scriptures, Tomo 1, pahina 225-6.
Paano Mo Sabton?
◻ Ano ang kahulugan sang “pagkuha sing tubig sang kabuhi nga walay bayad”?
◻ Langitnon ukon dutan-on man ang aton paglaum, ano ang aton mga rason agod magpasalamat sa Dios?
◻ Anong tuigan nga selebrasyon ang dapat naton tanan tambungan?
◻ Para sa kalabanan nga katawhan ni Jehova, ano ang yara sa palaabuton?
[Retrato sa pahina 18]
Minilyon ang ‘nagakuha sing tubig sang kabuhi nga walay bayad.’ Isa ka bala sa ila?