Pinasahi Nga Mga Piesta Sa Maragtas Sang Israel

“Sa makatlo sa isa ka tuig magaatubang ang tanan mo nga lalaki kay Jehova nga imo Dios sa duog nga pilion niya . . . , kag wala sing bisan sin-o ang mag-atubang kay Jehova nga wala sing dala.”​—⁠DEUTERONOMIO 16:⁠16.

1. Ano ang masiling nahanungod sa mga piesta sang panahon sang Biblia?

ANO ang imo madumduman kon hunahunaon mo ang piesta? Ang pila ka piesta sang dumaan nga mga tion nagpakita sing pagpatuyang kag imoralidad. Amo man ang pila ka piesta karon. Apang tuhay ang mga piesta nga ginsambit sa Kasuguan sang Dios para sa Israel. Bisan pa makalilipay yadto nga mga okasyon, malaragway man yadto subong “balaan nga mga kombension.”​—⁠Levitico 23:⁠2.

2. (a) Ano ang ginpatuman sa Israelinhon nga mga lalaki makatlo kada tuig? (b) Suno sa Deuteronomio 16:​16, ano ang kahulugan sang tinaga nga “piesta”?

² Ang matutom nga Israelinhon nga mga lalaki​—⁠nga masami ginaupdan sang ila pamilya​—⁠nakabatyag sing makapapagsik nga kalipay sa paglakbay padulong sa Jerusalem, ‘ang duog nga ginpili ni Jehova,’ kag maalwan sila nga nag-amot sa tatlo ka piesta. (Deuteronomio 16:16) Ang libro nga Old Testament Word Studies nagapaathag sang Hebreong tinaga nga ginbadbad “piesta” sa Deuteronomio 16:​16 subong isa ka “okasyon sang daku nga pagpangalipay . . . diin ang pila ka talalupangdon nga pagpakita sang Dios sing pabor ginsaulog nga may pagdulot sing mga halad kag pagsinalusalo.”⁠a

Ang Balor sang Daku nga mga Piesta

3. Anong mga pagpakamaayo ang ginapahanumdom sang tatlo ka tuigan nga piesta?

³ Sanglit isa sila ka katilingban nga ang pangabuhi amo ang panguma, ang mga Israelinhon nagasandig sa pagpakamaayo sang Dios sa porma sang ulan. Ang tatlo ka daku nga piesta nga ginasambit sa Kasuguan Mosaiko nagadungan sa tig-alani sing sebada sa maaga nga bahin sang tigpamulak, sa tig-alani sing trigo sa talipuspusan nga bahin sang tigpamulak, kag sa iban pa nga mga tig-alani sa talipuspusan sang tig-ilinit. Mga okasyon yadto para sa daku nga pagkalipay kag pagpasalamat sa Manug-aman sing siklo sang ulan kag sa Magbubuhat sing mabungahon nga duta. Apang kapin pa ang nadalahig sa mga piesta.​—⁠Deuteronomio 11:​11-14.

4. Anong maragtason nga okasyon ang ginsaulog sang una nga piesta?

⁴ Ang una nga piesta ginahiwat sa una nga bulan sang dumaan nga kalendaryo sang Biblia, halin sa Nisan 15 tubtob sa 21, nga sa aton tion katumbas sa talipuspusan sang Marso ukon sa maaga nga bahin sang Abril. Ginatawag ini nga Piesta sang mga Tinapay nga Walay Tapay, kag bangod ginahiwat ini pagkatapos gid sang Paskua sang Nisan 14, ginatawag man ini nga “piesta sang paskua.” (Lucas 2:​41; Levitico 23:​5, 6) Ining piesta nagapahanumdom sa Israel sang ila kaluwasan gikan sa kapipit-an sa Egipto, amo kon ngaa ang mga tinapay nga walay tapay ginatawag nga “tinapay sang kapipit-an.” (Deuteronomio 16:3) Nagapahanumdom ini sa ila nga ang ila pagpalagyo gikan sa Egipto dalidali gid amo kon ngaa wala na sing tion nga butangan sing tapay ang ila linamas kag hulaton ini nga magkumbo. (Exodo 12:34) Sa tion sining piesta dapat nga wala sing tinapay nga may tapay ang makit-an sa sulod sang balay sang mga Israelinhon. Ang bisan sin-o nga nagasaulog, lakip ang dumuluong nga pumuluyo, nga magkaon sing tinapay nga may tapay silutan gid sing kamatayon.​—⁠Exodo 12:⁠19.

5. Anong pribilehiyo ang mahimo ginapahanumdom sang ikaduha nga piesta, kag sin-o ang ginalakip sa pagkinalipay?

⁵ Ang ikaduha nga piesta ginahiwat pito ka semana (49 ka adlaw) pagkatapos sang Nisan 16 kag nagatupa sa ika-6 nga adlaw sang ikatlo nga bulan, sa Sivan, nga katumbas sa aton tion sa ulihi nga bahin sang Mayo. (Levitico 23:​15, 16) Ginatawag ini nga Piesta sang mga Semana (sang adlaw ni Jesus, ginatawag man ini nga Pentecostes, nagakahulugan “Ikakalim-an” sa Griego), kag natabo ini malapit sa amo man nga tion sang tuig nga ang Israel nagsulod sa Kasuguan nga katipan sa Bukid sang Sinai. (Exodo 19:​1, 2) Sa tion sining piesta mahimo gid nga ginapamalandong sang matutom nga mga Israelinhon ang ila pribilehiyo nga ginpain sila subong isa ka balaan nga pungsod sang Dios. Bangod pinasahi sila nga katawhan sang Dios, dapat nila tumanon ang Kasuguan sang Dios subong sang sugo nga magpakita sing mahigugmaon nga pag-ulikid sa mga ginapit-an agod nga sila man magkalipay sa piesta.​—⁠Levitico 23:​22; Deuteronomio 16:​10-12.

6. Ano nga eksperiensia ang ginpahanumdom sang ikatlo nga piesta sa katawhan sang Dios?

⁶ Ang katapusan sa tatlo ka daku tuigan nga mga piesta ginatawag nga Piesta sang Ani, ukon Piesta sang mga Kayangkayang. Ginahiwat ini sa ikapito nga bulan, sa Tisri, ukon Etanim, halin sa ika-15 tubtob sa ika-21 nga adlaw, katumbas sa aton tion sa maaga nga bahin sang Oktubre. (Levitico 23:34) Sa sulod sining tion, ang katawhan sang Dios nagatener sa guwa sang ila puluy-an ukon sa ila mga atop sa temporaryo nga mga balay-balay (mga kayangkayang) nga himo sa mga sanga kag mga dahon sang mga kahoy. Nagapahanumdom ini sa ila sang ila 40 ka tuig nga paglakbay gikan sa Egipto padulong sa Ginsaad nga Duta, sang ang pungsod dapat magtuon sa pagsandig sa Dios para sa ila matag-adlaw nga mga kinahanglanon.​—⁠Levitico 23:​42, 43; Deuteronomio 8:​15, 16.

7. Paano kita nagabenepisyo gikan sa pagrepaso sa kapiestahan nga ginsaulog sa dumaan nga Israel?

⁷ Repasuhon naton ang pila ka piesta nga nangin pinasahi sa maragtas sang dumaan nga katawhan sang Dios. Dapat ini magpalig-on sa aton karon, kay ginaagda man kita nga magtipon sing regular kada semana kag makatlo kada tuig sa dalagku nga mga asambleya kag mga kombension.​—⁠Hebreo 10:​24, 25.

Mga Piesta sa Tion sang Davidiko nga mga Hari

8. (a) Anong maragtason nga selebrasyon ang ginsaulog sang mga adlaw ni Hari Solomon? (b) Anong dakung talipuspusan sang antitipiko nga Piesta sang mga Kayangkayang ang aton mapaabot?

⁸ Ang isa ka maragtason nga selebrasyon sa tion sang Piesta sang mga Kayangkayang natabo sa tion sang mahamungayaon nga paggahom ni Hari Solomon, ang anak ni David. “Ang tama kadaku nga kongregasyon” nagtipon gikan sa mga ukbong sang Ginsaad nga Duta para sa Piesta sang mga Kayangkayang kag sang pagdedikar sa templo. (2 Cronica 7:8) Sang matapos ini, ginpapauli ni Hari Solomon ang mga nakigsaulog, nga “nagpakamaayo sa hari kag nagpauli sa ila mga layanglayang, nga malipayon kag masinadyahon sa tagipusuon tungod sang tanan nga pagkaayo nga ginpakita ni Jehova kay David nga iya alagad kag sa Israel nga iya katawhan.” (1 Hari 8:66) Isa gid yadto ka pinasahi nga piesta. Sa karon, ginapaabot sang mga alagad sang Dios ang dakung talipuspusan sang antitipiko nga Piesta sang mga Kayangkayang sa katapusan sang Isa ka Libo ka Tuig nga Paghari sang Daku Pa nga Solomon, si Jesucristo. (Bugna 20:​3, 7-10, 14, 15) Sa amo nga tion, ang mga tawo nga nagapuyo sa tanan nga pamusod sang duta, lakip ang mga binanhaw kag mga nakalampuwas sa Armagedon, mahiusa sa malipayon nga pagsimba kay Jehova nga Dios.​—⁠Zacarias 14:⁠16.

9-11. (a) Ngaa nangin pinasahi ang piesta nga ginsaulog sang mga adlaw ni Hari Ezequias? (b) Anong huwaran ang ginpahamtang sang madamo gikan sa naaminhan nga napulo ka tribo nga ginharian, kag ano ang ginapahanumdom sini sa aton karon?

⁹ Ang masunod talalupangdon nga piesta nga narekord sa Biblia ginsaulog sa tapos sang paggahom sang malaut nga si Hari Ahas, nga nagpasira sa templo kag nagdala sang ginharian sang Juda sa apostasya. Ang nagbulos kay Ahas amo ang maayo nga si Hari Ezequias. Sa una nga tuig sang iya paghari, sa edad nga 25, ginsugdan ni Ezequias ang isa ka daku nga programa sang pagpasag-uli kag reporma. Ginpabuksan niya sa gilayon ang templo kag ginpakay-o ini. Nian, nagpadala ang hari sing mga sulat sa mga Israelinhon nga nagapuyo sa indi mainabyanon nga napulo ka tribo nga ginharian sang Israel sa aminhan, nga nagaagda sa ila sa pagkari kag saulugon ang Paskua kag ang Piesta sang mga Tinapay nga Walay Tapay. Madamo ang nag-alabot, walay sapayan sang pagyaguta sang ila mga isigkatawo.​—⁠2 Cronica 30:​1, 10, 11, 18.

¹⁰ Nagmadinalag-on bala yadto nga piesta? Ang Biblia nagasugid: “Gani ang mga anak sang Israel nga didto sa Jerusalem naghiwat sing piesta sang mga tinapay nga walay tapay sing pito ka adlaw sa daku nga kasadya; kag ang mga Levinhon kag ang mga saserdote nagdayaw kay Jehova sa adlaw-adlaw upod sa matunog nga mga instrumento.” (2 Cronica 30:21) Daw ano kaayo nga huwaran ang ginpakita sadtong mga Israelinhon para sa katawhan sang Dios karon, madamo sa ila nagabatas sing pagpamatok kag nagalakbay sing malayo nga distansia agod makatambong sa mga kombension!

¹¹ Halimbawa, binagbinaga ang tatlo ka “Diosnon nga Debosyon” nga Distrito nga Kombension nga ginhiwat sa Poland sang 1989. Lakip sa 166,518 nga nagtambong amo ang daku nga mga grupo gikan sa anay Unyon Sobyet kag iban pa nga mga pungsod sa Sidlangan nga Europa diin ang hilikuton sang mga Saksi ni Jehova ginadumilian sadtong tion. “Para sa iban nga nagtambong sa sining mga kombension,” report sang libro nga Jehovah’s Witnesses​—⁠Proclaimers of God’s Kingdom, “amo yadto ang una gid nga tion nga sila nakatambong sa isa ka daku nga pagtinipon sang kapin sa 15 ukon 20 ka katawhan ni Jehova. Ang ila tagipusuon puno gid sing apresasyon samtang ginatan-aw nila ang linibo sa istadyum, nagapangamuyo upod sa ila, kag nagaamba upod sa ila sing pagdayaw kay Jehova.”b​—⁠Pahina 279.

12. Ngaa nangin pinasahi ang piesta nga ginsaulog sang paggahom ni Hari Josias?

¹² Sang mapatay si Ezequias, nagbalik liwat ang mga Judeano sa butig nga pagsimba sa idalom nanday Hari Manases kag Amon. Nian nag-abot ang paggahom sang isa pa ka maayong hari, ang pamatan-on nga si Josias, nga naghulag sing maisugon sa pagpasag-uli sang matuod nga pagsimba. Sa edad nga 25, ginpakay-o ni Josias ang templo. (2 Cronica 34:8) Samtang ginakay-o ang templo, nasapwan didto ang Kasuguan nga ginsulat ni Moises. Natandog gid si Hari Josias sang iya nabasahan sa Kasuguan sang Dios amo kon ngaa naghimo sia sing kahimusan nga basahon ini sa atubangan sang tanan nga katawhan. (2 Cronica 34:​14, 30) Nian, nahisuno sa nasulat didto, gin-organisar niya ang pagsaulog sing Paskua. Nagpakita man ang hari sing maayong huwaran paagi sa paghatag sing maalwan nga amot para sa okasyon. Subong resulta, ang Biblia nagasugid: “Wala sing paskua kaangay sadto nga nahiwat sa Israel kutob sang mga adlaw ni Samuel nga manalagna.”​—⁠2 Cronica 35:​7, 17, 18.

13. Ano ang ginapahanumdom sa aton karon sang mga piesta nga ginsaulog nanday Ezequias kag Josias?

¹³ Ang mga reporma nga ginhimo nanday Ezequias kag Josias nagaanggid sa makadalayaw nga pagpasag-uli sa matuod nga pagsimba nga natabo sa tunga sang matuod nga mga Cristiano sugod sang ginpalingkod sa trono si Jesucristo sang 1914. Subong sang natabo labi na sa mga reporma nga ginhimo ni Josias, ining modernong-adlaw nga pagpasag-uli ginpasad sa kon ano ang nasulat sa Pulong sang Dios. Kag, subong sang sa mga adlaw nanday Ezequias kag Josias, may mga asambleya kag mga kombension nga ginhiwat sa modernong-adlaw nga pagpasag-uli diin ginbinagbinag ang makakulunyag nga mga paathag tuhoy sa tagna sang Biblia kag ang sibu sa tion nga mga aplikasyon sang mga prinsipio sa Biblia. Nadugangan pa ang kalipay sa sining makatudlo nga mga okasyon bangod sang madamo nga nabawtismuhan. Kaangay sang mahinulsulon nga mga Israelinhon sang mga adlaw nanday Ezequias kag Josias, ginsikway sining mga bag-o mabawtismuhan ang malaut nga mga buhat sang Cristiandad kag ang nabilin nga bahin sang kalibutan ni Satanas. Sang 1997 kapin sa 375,000 ang nabawtismuhan bilang simbulo sang ila dedikasyon sa balaan nga Dios, si Jehova​—⁠kapin sa 1,000 kada adlaw sa promedyo.

Sa Tapos sang Pagkatapok

14. Ngaa nangin pinasahi ang piesta nga ginsaulog sang 537 B.⁠C.⁠E.?

¹⁴ Sang mapatay si Josias, nagliso liwat ang pungsod sa makapanubo nga butig nga pagsimba. Sang ulihi, sang 607 B.⁠C.⁠E., ginsilutan ni Jehova ang iya katawhan paagi sa pagdala sa Babilonianhon nga mga hangaway batok sa Jerusalem. Ang siudad kag ang templo sini nalaglag, kag nahapay ang duta. Nagsunod ang 70 ka tuig nga pagkabihag sang mga Judiyo sa Babilonia. Nian, ginpahulag liwat sang Dios ang mahinulsulon nga Judiyong mga nagkalabilin, nga nagbalik sa Ginsaad nga Duta agod ipasag-uli ang matuod nga pagsimba. Nag-abot sila sa nahapay nga siudad sang Jerusalem sang ikapito nga bulan sang tuig 537 B.⁠C.⁠E. Ang una nga ginhimo nila amo ang pagtukod sing halaran agod regular sila nga makadulot adlaw-adlaw sing mga halad nga ginasambit sa Kasuguan nga katipan. Igo gid yadto nga tion para sa isa pa ka maragtason nga selebrasyon. “Kag naghiwat sila sing piesta sang kayangkayang suno sa nasulat.”​—⁠Esdras 3:​1-4.

15. Anong hilikuton ang naghulat sa nagbalik nga nagkalabilin sang 537 B.⁠C.⁠E., kag paano nagluntad ang kaanggid nga kahimtangan sang 1919?

¹⁵ Daku nga hilikuton ang naghulat sa sining nagbalik nga mga tinapok​—⁠ang pagpatindog liwat sa templo sang Dios kag sa mga pader sang Jerusalem. Namatok sing mabaskog ang mahisaon nga mga kaingod. Sang ginapatindog ang templo, isa yadto ka “adlaw sang magamay nga mga butang.” (Zacarias 4:10) Ining kahimtangan nag-anggid sa kahimtangan sang matutom nga hinaplas nga mga Cristiano sang 1919. Sadtong indi malipatan nga tuig, ginpaguwa sila gikan sa espirituwal nga pagkabihag sa Babilonia nga Daku, ang bug-os kalibutan nga emperyo sang butig nga relihion. Pila ka libo lamang sila kag ginpamatukan sila sang kalibutan. Mapunggan ayhan sang mga kaaway sang Dios ang pag-uswag sang matuod nga pagsimba? Ang sabat sa sina nga pamangkot nagapahanumdom sang pagsaulog sing katapusan nga duha ka piesta nga narekord sa Hebreong Kasulatan.

16. Ano ang nangin talalupangdon sa piesta nga ginsaulog sang 515 B.⁠C.⁠E.?

¹⁶ Nahuman sang ulihi ang pagpatindog liwat sa templo sang bulan sang Adar 515 B.⁠C.⁠E., igo gid sa piesta sa Nisan nga tigpamulak. Ang Biblia nagasugid: “Naghiwat sila sing piesta sang mga tinapay nga walay tapay sing pito ka adlaw nga may kalipay; kay si Jehova naghimo sa ila nga malipayon, kag nagpaliso sang tagipusuon sang hari sang Asiria sa ila sa pagpalig-on sang ila mga kamot sa buluhaton sa balay sang matuod nga Dios, ang Dios sang Israel.”​—⁠Esdras 6:⁠22.

17, 18. (a) Anong pinasahi nga piesta ang ginsaulog sang 455 B.⁠C.⁠E.? (b) Paano kita yara sa isa ka kaanggid nga kahimtangan karon?

¹⁷ Pagligad sang kan-uman ka tuig, sang 455 B.⁠C.⁠E., isa pa ka pinasahi nga piesta ang ginhiwat. Ang Piesta sang mga Kayangkayang sadto nga tuig nangin tanda sang pagkahuman sang mga pader sang Jerusalem. Ang Biblia nagreport: “Ang bug-os nga pagtilipon sang mga nakabalik gikan sa kabihagan naghimo sing mga kayangkayang kag nagpuyo sa mga kayangkayang; kay kutob sa mga adlaw ni Josue nga lalaking anak ni Nun tubtob sadtong adlaw wala makahimo sing subong ang katawhan sang Israel, amo kon ngaa may tama kadaku nga kasadya.”​—⁠Nehemias 8:⁠17.

¹⁸ Daw ano ka indi malipatan nga pagpasag-uli sang matuod nga pagsimba sa Dios walay sapayan sang mabangis nga pagpamatok! Amo man ang kahimtangan karon. Walay sapayan sang mga paghingabot kag pagpamatok, ang dakung hilikuton sa pagbantala sing maayong balita sang Ginharian sang Dios nakalab-ot sa mga ukbong sang duta, kag ang mga mensahe sang paghukom sang Dios napalanog sing lapnag. (Mateo 24:14) Malapit na matapos ang hingapusan nga pagpat-in sa nagkalabilin sang 144,000 ka hinaplas. Kapin sa lima ka milyon sang ila “iban nga mga karnero” nga kaupod ang natipon gikan sa tanan nga kapungsuran sa “isa ka panong” upod sa hinaplas nga nagkalabilin. (Juan 10:​16; Bugna 7:​3, 9, 10) Daw ano ka dalayawon nga katumanan sang matagnaon nga laragway sang Piesta sang mga Kayangkayang! Kag ining dakung hilikuton sa pagtipon magapadayon tubtob sa bag-ong kalibutan nga sa amo nga tion ang binilyon nga binanhaw agdahon sa pagbuylog sa pagsaulog sing antitipiko nga Piesta sang mga Kayangkayang.​—⁠Zacarias 14:​16-19.

Sang Unang Siglo C.⁠E.

19. Ano ang naghimo sang Piesta sang mga Kayangkayang sang 32 C.⁠E. nga talalupangdon?

¹⁹ Lakip sa labing talalupangdon nga pagsaulog sing mga piesta nga narekord sa Biblia walay duhaduha amo ang gintambungan sang Anak sang Dios, si Jesucristo. Halimbawa, binagbinaga ang pagtambong ni Jesus sa Piesta sang mga Kayangkayang (ukon, mga Tabernakulo) sang tuig 32 C.⁠E. Gingamit niya yadtong okasyon sa pagtudlo sing importante nga mga kamatuoran kag ginsakdag niya ang iya pagpanudlo paagi sa pagbalikwat gikan sa Hebreong Kasulatan. (Juan 7:​2, 14, 37-39) Ang regular nga bahin sining piesta amo ang kinabatasan nga pagpasiga sa apat ka daku nga kandelero sa nasulod nga luwang sang templo. Labi pa ini nga nagpasadya sa piesta nga nagpadayon tubtob sa kagab-ihon. Mahimo gid nga ginpatuhuyan ni Jesus ining daku nga mga suga sang magsiling sia: “Ako ang kapawa sang kalibutan. Sia nga nagasunod sa akon indi maglakat sa kadudulman, kundi makaangkon sing kapawa sang kabuhi.”​—⁠Juan 8:⁠12.

20. Ngaa talalupangdon ang Paskua sang 33 C.⁠E.?

²⁰ Nian nag-abot ang Paskua kag ang Piesta sang mga Tinapay nga Walay Tapay sa importante nga tuig sang 33 C.⁠E. Sadtong Adlaw sang Paskua, si Jesus ginpatay sang iya mga kaaway kag nangin ang antitipiko nga Kordero sang Paskua, nga napatay agod dulaon ang “sala sang kalibutan.” (Juan 1:​29; 1 Corinto 5:7) Pagligad sang tatlo ka adlaw, sang Nisan 16, ginbanhaw sang Dios si Jesus nga may isa ka dimamalatyon espiritu nga lawas. Nagdungan ini sa paghalad sing nahauna nga mga bunga sang inani nga sebada nga ginapatuman sang Kasuguan. Sa amo, ang ginbanhaw nga si Ginuong Jesucristo nangin “ang nahauna nga bunga sang mga nagtulog sa kamatayon.”​—⁠1 Corinto 15:⁠20.

21. Ano ang natabo sang Pentecostes sang 33 C.⁠E.?

²¹ Ang talalupangdon gid nga piesta amo ang Pentecostes sang 33 C.⁠E. Sini nga adlaw madamo nga Judiyo kag proselita ang nagtipon sa Jerusalem, lakip ang mga 120 ka disipulo ni Jesus. Samtang nagapadayon ang piesta, ginpasagahay ni Ginuong Jesucristo ang balaan nga espiritu sang Dios sa 120. (Binuhatan 1:​15; 2:​1-4, 33) Paagi sa amo, ginhaplasan sila kag nangin bag-ong pinili nga pungsod sang Dios paagi sa bag-ong katipan nga ginpatung-an ni Jesucristo. Sa tion sadto nga piesta naghalad ang Judiyong mataas nga saserdote sa Dios sing duha ka may tapay nga tinapay gikan sa nahauna nga mga bunga sang inani nga sebada. (Levitico 23:​15-17) Ining may tapay nga tinapay nagalaragway sa 144,000 ka dihimpit nga mga tawo nga ‘ginbakal ni Jesus para sa Dios’ sa pag-alagad subong “isa ka ginharian kag mga saserdote . . . sa paggahom subong mga hari sa ibabaw sang duta.” (Bugna 5:​9, 10; 14:​1, 3) Mahimo nga ginalaragway man sang duha ka tinapay nga may tapay ang katunayan nga ining langitnon nga mga manuggahom naghalin gikan sa duha ka sanga sang makasasala nga katawhan, ang mga Judiyo kag mga Gentil.

22. (a) Ngaa wala ginasaulog sang mga Cristiano ang mga piesta sang Kasuguan nga katipan? (b) Ano ang binagbinagon naton sa masunod nga artikulo?

²² Sang magpanghikot ang bag-ong katipan sang Pentecostes 33 C.⁠E., nagkahulugan ini nga ang daan nga Kasuguan nga katipan wala na sing balor sa mga mata sang Dios. (2 Corinto 3:​14; Hebreo 9:​15; 10:16) Wala ina nagakahulugan nga ang hinaplas nga mga Cristiano wala sing kasuguan. Napaidalom sila sa kasuguan sang Dios nga gintudlo ni Jesucristo kag nasulat sa ila tagipusuon. (Galacia 6:2) Busa, wala ginasaulog sang mga Cristiano ang tatlo ka tuigan nga piesta, bangod bahin ini sang daan nga Kasuguan nga katipan. (Colosas 2:​16, 17) Walay sapayan, daku ang matun-an naton gikan sa panimuot sang mga alagad sang Dios sa wala pa ang Cristianong tion tuhoy sa ila mga kapiestahan kag iban pa nga mga miting para sa pagsimba. Sa aton masunod nga artikulo, binagbinagon naton ang mga huwaran nga walay duhaduha magapahulag sa tanan nga apresyahon ang kinahanglanon nga mangin regular sa pagtambong sa Cristianong mga pagtinipon.

[Mga footnote]

Repaso nga mga Pamangkot

◻ Ano ang katuyuan sang tatlo ka daku nga piesta sang Israel?

◻ Anong pinasahi nga butang ang natabo sa mga piesta nga ginsaulog sang adlaw nanday Ezequias kag Josias?

◻ Anong pinasahi nga piesta ang ginsaulog sang 455 B.⁠C.⁠E., kag ngaa makapalig-on ini sa aton?

◻ Ano ang talalupangdon nga butang nahanungod sa Paskua kag sa Pentecostes sang 33 C.⁠E.?

[Kahon sa pahina 12]

Ang Leksion sang Piesta Para sa Aton Karon

Ang tanan nga luyag makabenepisyo sing dayon gikan sa nagatumbas-sala nga halad ni Jesus dapat magkabuhi nahisanto sa kon ano ang ginlaragway sang Piesta sang mga Tinapay nga Walay Tapay. Ining antitipiko nga piesta amo ang malipayon nga pagsaulog sang hinaplas nga mga Cristiano bangod ginluwas sila gikan sa sining malaut nga kalibutan kag ginhilway gikan sa katagudilian sang sala paagi sa gawad ni Jesus. (Galacia 1:​4; Colosas 1:​13, 14) Ang literal nga piesta nagdugay sing pito ka adlaw​—⁠isa ka numero nga ginagamit sa Biblia sa pagsimbolo sa espirituwal nga pagkakompleto. Ang kadugayon sang antitipiko nga piesta amo ang bug-os nga pagluntad sang hinaplas nga Cristianong kongregasyon sa duta kag dapat saulugon nga may “pagkasinsero kag kamatuoran.” Nagakahulugan ina nga dapat kita pirme magbantay batok sa malaragwayon nga tapay. Ang tapay ginagamit sa Biblia sa paglaragway sa malaut nga mga panudlo, pagkasalimpapaw, kag kalautan. Ang mga sumilimba ni Jehova dapat magpakita sing dumot sa sina nga tapay, wala ini ginatugutan nga halitan ang ila kabuhi kag wala ini ginatugutan nga dagtaan ang kaputli sang Cristianong kongregasyon.​—⁠1 Corinto 5:​6-8; Mateo 16:​6, 12.

[Retrato sa pahina 9]

Isa ka linaylay nga binugkos sang inani nga bag-ong sebada ang ginadulot kada tuig sa Nisan 16, ang adlaw nga si Jesus ginbanhaw

[Retrato sa pahina 10]

Mahimo nga ginpatuhuyan ni Jesus ang mga suga sa piesta sang gintawag niya ang iya kaugalingon nga “kapawa sang kalibutan”