Ang Dedikasyon kag ang Kahilwayan sa Pagpili
“Tungod sa sina nga kahilwayan ginhilway kita ni Cristo.”—GALACIA 5:1.
1. Sa ano maaplikar ang Hebreo kag Griegong mga tinaga nga ginbadbad nga “dedikasyon,” “inagurasyon,” ukon “konsagrasyon”?
ANG mga manunulat sang Biblia naggamit sing pila ka Hebreo kag Griegong tinaga sa pagpaalinton sing ideya nga ginhamulag, ukon ginpain, para sa isa ka sagrado nga katuyuan. Sa Hiligaynon nga mga Biblia ining mga tinaga ginbadbad subong “dedikasyon,” “inagurasyon,” ukon “konsagrasyon.” Kon kaisa ining mga tinaga ginagamit may kaangtanan sa mga tinukod—kinaandan na sa templo sang Dios sa dumaan nga Jerusalem kag sa pagsimba nga ginhimo didto. Talagsa lang ginagamit ining mga tinaga may kaangtanan sa sekular nga mga butang.
Dedikasyon sa “Dios sang Israel”
2. Ngaa si Jehova makatarunganon nga matawag nga “Dios sang Israel”?
2 Sang 1513 B.C.E., ginhilway sang Dios ang mga Israelinhon gikan sa kahiulipnan sa Egipto. Wala madugay pagkatapos sadto, ginpain niya sila subong ang iya pinasahi nga katawhan, nga nagapakigkatipan upod sa ila. Ginsilingan sila: “Karon kon magtuman kamo sing matutom sang akon tingog kag sa pagkamatuod magsunod sang akon katipan, nian kamo mangin akon pinasahi nga pagkabutang gikan sa tunga sang tanan nga katawhan, bangod ang bug-os nga duta akon.” (Exodo 19:5; Salmo 135:4) Bangod ang mga Israelinhon nangin pinasahi nga pagkabutang niya, si Jehova nagakaigo tawgon nga “ang Dios sang Israel.”—Josue 24:23.
3. Ngaa wala magpakita sing pagpasulabi si Jehova sa pagpili sa Israel subong katawhan niya?
3 Sa paghimo sa mga Israelinhon subong ang iya gindedikar nga katawhan, si Jehova walay pinasulabi, kay mahigugmaon man sia nga nagaulikid sa mga di-Israelinhon. Ginsugo niya ang iya katawhan: “Kon ang isa ka dumuluong magpuyo upod sa inyo subong isa ka dumuluong sa inyo duta, indi ninyo sia paghimuan sing kalainan. Ang dumuluong nga nagapuyo subong isa ka dumuluong upod sa inyo dapat mangin subong sang tumandok sa tunga ninyo; kag higugmaon mo sia subong sang imo kaugalingon, kay nangin dumuluong nga mga pumuluyo kamo sa duta sang Egipto. Ako si Jehova nga inyo Dios.” (Levitico 19:33, 34) Mga siglo sang ulihi, ang pagtamod sang Dios labi nga nagdulot kay apostol Pedro, nga nagbaton: “Kay nahantop ko sa pagkamatuod nga ang Dios walay ginapasulabi, kundi sa kada pungsod ang tawo nga nagakahadlok sa iya kag nagahimo sing matarong kalahamut-an sa iya.”—Binuhatan 10:34, 35.
4. Ano ang mga kondisyon sang kaangtanan sang Dios kag sang Israel, kag nasunod bala ini sang mga Israelinhon?
4 Talupangda man nga ang ila pagkanadedikar nga katawhan sang Dios may kondisyon. Kon matutom nga sundon lamang nila ang tingog sang Dios kag tumanon ang iya katipan nga sila mangin “pinasahi nga pagkabutang” niya. Sing makapasubo, wala matuman sang mga Israelinhon ini nga mga sugo. Sang ginsikway nila ang Mesias nga ginpadala sang Dios sadtong nahaunang siglo C.E., nadula nila ang ila pinasahi nga kahimtangan. Si Jehova indi na “ang Dios sang Israel.” Kag ang kinaugali nga mga Israelinhon indi na ang nadedikar nga katawhan sang Dios.—Ipaanggid ang Mateo 23:23.
Pagdedikar sang “Israel sang Dios”
5, 6. (a) Ano ang buot silingon ni Jesus sa iya matagnaon nga mga pulong nga narekord sa Mateo 21:42, 43? (b) San-o kag paano nagluntad ang “Israel sang Dios”?
5 Nagakahulugan bala ini nga wala na karon sing nadedikar nga katawhan si Jehova? Indi. Nagabalikwat sa salmista, si Jesucristo nagtagna: “Wala gid bala ninyo mabasahi sa mga Kasulatan, ‘Ang bato nga ginsikway sang mga manunukod amo ang ginhimo nga pangulo nga batong pamag-ang. Naghalin ini kay Jehova, kag makatilingala ini sa aton mga mata’? Amo ini kon ngaa nagasiling ako sa inyo, Ang ginharian sang Dios kuhaon sa inyo kag ihatag sa pungsod nga nagapatubas sang mga bunga sini.”—Mateo 21:42, 43.
6 Ang “pungsod nga nagapatubas sang mga bunga sini” amo ang Cristianong kongregasyon. Sadtong yari sia sa duta, nagpili si Jesus sang nahaunang palaabuton nga mga katapo sini. Apang sang adlaw sang Pentecostes 33 C.E., si Jehova nga Dios mismo ang nagpatok sang Cristianong kongregasyon paagi sa pagpasagahay sa iya balaan nga espiritu sa nahaunang mga katapo sini, nga nagadamo sing mga 120. (Binuhatan 1:15; 2:1-4) Subong sang ginsulat sang ulihi ni apostol Pedro, ining bag-o sadto naporma nga kongregasyon nangin “pinili nga kaliwatan, harianon nga pagkasaserdote, balaan nga pungsod, katawhan nga pinasahi nga ginapanag-iyahan.” Pinili tungod sa ano? Nga dapat nila ‘ipahayag sing lapnag ang pagkahalangdon sang isa nga nagtawag sa ila gikan sa kadudulman pakadto sa iya makatilingala nga kapawa.’ (1 Pedro 2:9) Ang mga sumulunod ni Cristo, nga ginhaplasan sang espiritu sang Dios, isa na karon ka nadedikar nga pungsod, “ang Israel sang Dios.”—Galacia 6:16.
7. Ano ang agumon sang mga katapo sang Israel sang Dios, kag busa ano ang ginsugo sa ila nga likawan?
7 Bisan nga ang mga katapo sang balaan nga pungsod “katawhan nga pinasahi nga ginapanag-iyahan,” indi sila dapat ulipunon. Sa kabaliskaran, magaagom sila sing daku pa nga kahilwayan sangsa gin-agom anay sang nadedikar nga pungsod sang kinaugali nga Israel. Si Jesus nangako sa palaabuton nga mga katapo sining bag-ong pungsod: “Mahibaluan ninyo ang kamatuoran, kag ang kamatuoran magahilway sa inyo.” (Juan 8:32) Ginpakita ni apostol Pablo nga ang mga Cristiano ginhilway gikan sa mga sugo sang katipan sang Kasuguan. Nahanungod sini ginlaygayan niya ang mga masigkatumuluo sa Galacia: “Tungod sini nga kahilwayan ginhilway kita ni Cristo. Busa magtindog kamo sing malig-on, kag indi kamo magpagota liwat sa kahiulipnan.”—Galacia 5:1.
8. Sa anong kaangtanan ang Cristianong kahimusan nagahatag sa mga indibiduwal sing labi pa nga kahilwayan sangsa naeksperiensiahan sa idalom sang katipan sang Kasuguan?
8 Indi kaangay sang dumaan nga Israel, tubtob karon nga adlaw ang Israel sang Dios matutom nga nagasunod sa mga ginapatuman sang pagkanadedikar sini. Indi ini dapat makapakibot bangod ang mga katapo sini kinabubut-on nga namat-od sa pagtuman. Samtang ang mga katapo sang kinaugali nga Israel nadedikar bangod sang pagkabun-ag, ang mga katapo sang Israel nadedikar bangod sang pagpili. Busa ang Cristianong kahimusan tuhay sa katipan sang Judiyong Kasuguan, nga nagasugo sa mga indibiduwal nga magdedikar nga wala nagahatag sa ila sing kahilwayan sa pagpili.
9, 10. (a) Paano ginpakita ni Jeremias nga may yara pagbalhin may kaangtanan sa dedikasyon? (b) Ngaa makasiling ka nga indi tanan nga dedikadong Cristiano sa karon mga katapo sang Israel sang Dios?
9 Si manalagna Jeremias nagtagna sing pagbalhin may kaangtanan sa dedikasyon sang nagsulat sia: “ ‘Yari karon! Nagaabot ang mga adlaw,’ siling ni Jehova, ‘kag magahimo ako sing bag-ong katipan upod sa panimalay sang Israel kag upod sa panimalay sang Juda; indi suno sa katipan nga ginhimo ko upod sa ila mga ginikanan sang adlaw nga gintuytuyan ko sila sa kamot sa pagpaguwa sa ila gikan sa duta sang Egipto, “ang akon katipan nga ginlalis nila, bisan ako bana nila,” siling ni Jehova.’ ‘Kay amo ini ang katipan nga himuon ko upod sa panimalay sang Israel sa tapos sadtong adlaw,’ siling ni Jehova. ‘Ibutang ko ang akon kasuguan sa sulod nila, kag isulat ko ini sa ila tagipusuon. Kag ako mangin ila Dios, kag sila mangin akon katawhan.’ ”—Jeremias 31:31-33.
10 Bangod ang kasuguan sang Dios yara “sa sulod nila,” nasulat, kon sa aton pa, “sa ila tagipusuon,” ang mga katapo sang Israel sang Dios ginapahulag sa pagkabuhi suno sa ila dedikasyon. Ang ila motibo mas makusog sangsa kinaugali nga mga Israelinhon, nga gindedikar paagi sa pagkabun-ag, indi paagi sa pagpili. Sa karon, ang makusog nga motibo sa paghimo sang kabubut-on sang Dios, subong sang ginpakita sang Israel sang Dios, nabatyagan sang kapin sa lima ka milyon ka masigkasumilimba sa bug-os nga kalibutan. Gindedikar man nila ang ila kabuhi kay Jehova nga Dios agod himuon ang iya kabubut-on. Bisan nga ining mga indibiduwal wala sing paglaum nga magkabuhi sa langit kaangay sa mga nagahuman sa Israel sang Dios, nagakasadya sila sa paglaum nga magkabuhi sing dayon sa duta sa idalom sang paggahom sang langitnon nga Ginharian sang Dios. Ginapakita nila ang apresasyon sa espirituwal nga Israel paagi sa aktibo nga pagsuportar sa nabilin sini nga pila ka katapo sa pagtuman sa ila hilikuton nga ‘ipahayag sing lapnag ang pagkahalangdon sang isa nga nagtawag sa [ila] gikan sa kadudulman pakadto sa iya makatilingala nga kapawa.’
Maalamon nga Paggamit sa Hatag-Dios nga Kahilwayan
11. Upod sa anong ikasarang nga ang tawo gintuga, kag paano ini dapat gamiton?
11 Gintuga sang Dios ang mga tawo agod pakabahandion ang kahilwayan. Ginhatagan niya sila sing ikasarang sa pagbuot. Gingamit sang nahaunang mag-asawa ang ila kahilwayan sa pagpili. Apang, dimaalamon kag dimahigugmaon nila nga ginpili ang nagdul-ong sing kapahamakan sa ila kag sa ila mga anak. Walay sapayan sina, maathag sini nga ginapakita nga wala gid ginapilit ni Jehova ang intelihente nga mga tinuga sa pagpili sing dalanon nga supak sa ila nasulod nga mga motibo ukon mga handum. Kag bangod “ginahigugma sang Dios ang masadya nga nagahatag,” ang pagdedikar nga kalahamut-an sa iya amo lamang ang isa nga napasad sa gugma, isa nga ginhimo sing kinabubut-on nga may kasadya, isa nga napatok sa kahilwayan sang pagpili. (2 Corinto 9:7) Ang bisan ano iban pa nga sahi indi kalahamut-an.
12, 13. Paano si Timoteo nangin sulundan para sa nagakaigo nga paghanas sa bata, kag sa ano nagdul-ong ang iya halimbawa sa madamong pamatan-on?
12 Bilang bug-os nga pagkilala sa sining tulumanon, ginasakdag sang mga Saksi ni Jehova ang pagdedikar sang kaugalingon sa Dios, apang wala gid nila ginapilit ang bisan sin-o sa paghimo sing subong sina nga dedikasyon, indi bisan ang ila kaugalingon nga mga anak. Tuhay sa madamong relihion, ang mga Saksi wala nagapabunyag sa ila mga anak samtang mga lapsag pa, subong nga daw mahimo sila puwersahon sa pagdedikar nga supak sa ila kaugalingon nga pagpili. Ang Makasulatanhon nga sulundan nga dapat sundon amo ang isa nga ginsunod sang pamatan-on nga si Timoteo. Subong isa ka hamtong, ginsilingan sia ni apostol Pablo: “Magpadayon ka sa mga butang nga natun-an mo kag nahaylo nga patihan, nga nakahibalo kon kay sin-o mo natun-an ini kag kutob sa pagkalapsag nahibaluan mo ang balaan nga mga sinulatan, nga makapaalam sa imo para sa kaluwasan paagi sa pagtuo may kaangtanan kay Cristo Jesus.”—2 Timoteo 3:14, 15.
13 Talalupangdon nga nahibaluan ni Timoteo ang balaan nga mga sinulatan bangod gintudlo ini sa iya kutob sa pagkalapsag. Ginhaylo sia—wala ginpilit—sa pagtuo sa Cristianong mga panudlo sang iya iloy kag lola. (2 Timoteo 1:5) Bangod sini, nakita ni Timoteo ang kaalam nga mangin sumulunod ni Cristo kag busa personal nga nagpili sang Cristianong dedikasyon. Sa modernong tion, linibo ka pamatan-on nga lalaki kag babayi nga ang ila mga ginikanan mga Saksi ni Jehova ang nagsunod sini nga halimbawa. (Salmo 110:3) Ang iban wala. Personal ini nga pagpili.
Nagpili nga Mangin kay Sin-o Ulipon?
14. Ano ang ginasiling sa aton sang Roma 6:16 tuhoy sa bug-os nga kahilwayan?
14 Wala sing tawo ang bug-os nga hilway. Ang kahilwayan sang tanan ginalatiran sang pisikal nga mga kasuguan, subong sang kasuguan sang grabidad, nga indi mahimo lapason nga indi mahalitan. Sa espirituwal man nga kahulugan, wala sing isa ang bug-os nga hilway. Si Pablo nangatarungan: “Wala bala kamo makahibalo nga kon padayon ninyo nga ginatugyan ang inyo kaugalingon sa bisan kay sin-o subong nga mga ulipon sa pagtuman sa iya, mga ulipon kamo niya bangod ginatuman ninyo sia, bisan diin man sa sala nga nagadala sa kamatayon ukon sa pagkamatinumanon nga nagdala sa pagkamatarong?”—Roma 6:16.
15. (a) Ano ang balatyagon sang mga tawo tuhoy sa pagkaulipon, apang ano sa ulihi ang ginahimo sang kalabanan? (b) Anong nagakaigo nga mga pamangkot ang mahimo naton ipamangkot sa aton kaugalingon?
15 Wala maluyagi sang kalabanan nga tawo ang ideya nga ulipon sila sang iban. Apang, sa karon nga kalibutan ang matuod amo nga masunson ginatugutan sang mga tawo ang ila kaugalingon nga maniobrahon kag impluwensiahan sa tuman kadamo nga malimbungon nga paagi sa bagay nga sa ulihi napilitan na lamang sila sa paghimo sang luyag sang iban nga himuon nila. Halimbawa, ang industriya sang mga pasayod kag kalingawan nagapanikasog nga idasok ang mga tawo sa isa ka dihunan, nagahimo sing mga talaksan nga dapat nila sundon. Ang mga organisasyon sa politika kag relihion nagabuyok sa mga tawo nga sakdagon ang ila mga ideya kag mga tulumuron, indi pirme paagi sa makahalaylo nga mga argumento, kundi sa masami paagi sa pagganyat sa balatyagon nga nahiusa ukon matutom. Sanglit nagsiling si Pablo nga ‘mga ulipon kita sadtong ginatuman naton,’ maayo nga pamangkuton sang kada isa sa aton ang iya kaugalingon, ‘Kay sin-o ako ulipon? Sin-o ang may daku nga impluwensia sa akon mga desisyon kag sa akon pagkabuhi? Ang relihioso bala nga mga klerigo, mga lider sang politika, mga kapitalista, ukon mga artista? Sin-o ang akon ginatuman—ang Dios bala ukon ang mga tawo?’
16. Sa anong kahulugan ang mga Cristiano mga ulipon sang Dios, kag ano ang nagakaigo nga pagtamod tuhoy sa sina nga pag-ulipon?
16 Wala ginatamod sang mga Cristiano ang pagkamatinumanon sa Dios subong isa ka dimakatarunganon nga pagpasilabot sa personal nga kahilwayan. Kinabubut-on nila nga ginahimo ang ila kahilwayan kaangay sang ila Huwaran, si Jesucristo, nga ginapahisuno sa kabubut-on sang Dios ang personal nga mga handum kag mga prioridad. (Juan 5:30; 6:38) Ginapalambo nila ang “hunahuna ni Cristo,” nagapasakop sa iya subong Ulo sang kongregasyon. (1 Corinto 2:14-16; Colosas 1:15-18) Kaangay gid ini sa isa ka babayi nga nagapamana kag kinabubut-on nga nagakooperar sa lalaki nga ginahigugma niya. Sa katunayan, ang hubon sang hinaplas nga mga Cristiano ginapatuhuyan subong isa ka putli nga ulay nga ginkagon nga ipakasal kay Cristo.—2 Corinto 11:2; Efeso 5:23, 24; Bugna 19:7, 8.
17. Ano ang ginpili sang tanan nga Saksi ni Jehova?
17 Ang tagsa ka Saksi ni Jehova, langitnon man ukon dutan-on ang iya paglaum, naghimo sing personal nga dedikasyon sa Dios nga himuon ang iya kabubut-on kag tumanon sia subong Gumalahom. Para sa tagsa ka Saksi, ang dedikasyon isa ka personal nga pamat-od nga mangin ulipon sang Dios sa baylo nga magpabilin nga ulipon sang mga tawo. Nahisanto ini sa laygay ni apostol Pablo: “Ginbakal kamo nga may bili; untati na ninyo ang mangin ulipon sang mga tawo.”—1 Corinto 7:23.
Pagtuon sa Pagpanginpulos
18. San-o ang isa ka potensiyal nga Saksi makalipikar para sa bawtismo?
18 Antes ang isa ka tawo mahimo makalipikar nga mangin isa sang mga Saksi ni Jehova, dapat niya sundon ang Makasulatanhon nga mga kalipikasyon. Ang mga gulang nagahalong gid sa pagpat-od kon bala nahangpan sing tunay sang isa ka potensiyal nga Saksi ang kahulugan sang Cristianong dedikasyon. Luyag gid bala niya mangin isa sang mga Saksi ni Jehova? Handa bala sia sa pagkabuhi suno sa kon ano ang nalakip sa sini? Kon indi, indi sia kalipikado para sa bawtismo.
19. Ngaa indi dapat mulayon ang isa nga namat-od nga mangin isa ka dedikado nga alagad sang Dios?
19 Apang, kon masunod sang isa ka indibiduwal ang tanan nga mga tulumanon, ngaa bala mulayon sia tungod sa boluntaryo nga pagdesisyon sing personal nga magpaimpluwensia sa Dios kag sa Iya inspirado nga Pulong? Mangin indi bala kalahamut-an kon tugutan sang isa ang iya kaugalingon nga maimpluwensiahan sang Dios sa baylo nga sang mga tawo? Ukon wala bala ini sing bisan ano nga kapuslanan? Indi amo sina ang ginahunahuna sang mga Saksi ni Jehova. Bug-os tagipusuon sila nga nagaugyon sa mga pinamulong sang Dios nga ginsulat ni Isaias: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo.”—Isaias 48:17.
20. Sa anong mga kahimtangan mahilway sang kamatuoran sang Biblia ang mga tawo?
20 Ang kamatuoran sang Biblia nagahilway sa mga tawo gikan sa pagpati sa mga doktrina sang butig nga relihion, subong sang dayon nga pag-antos sa kalayuhon nga impierno. (Manugwali 9:5, 10) Sa baylo, ginapun-an sini ang ila tagipusuon sing pagpasalamat tungod sa matuod nga paglaum para sa minatay—ang pagkabanhaw nga nangin posible pasad sa halad-gawad ni Jesucristo. (Mateo 20:28; Binuhatan 24:15; Roma 6:23) Ang kamatuoran sang Biblia nagahilway sa mga tawo gikan sa mga kapaslawan sang pagsalig sa politikal nga mga pangako nga wala nagakatuman. Sa baylo, ginapaawas sini sa kalipay ang ila tagipusuon sa pagkahibalo nga ang Ginharian ni Jehova nagagahom na sa mga langit kag magagahom sa dili madugay sa bug-os nga duta. Ang kamatuoran sang Biblia nagahilway sa mga tawo gikan sa mga buhat nga, bisan pa makagalanyat sa makasasala nga unod, wala nagapadungog sa Dios kag nagaresulta sa napaslawan nga mga relasyon, balatian, kag hilaw nga kamatayon. Sa malip-ot, mas daku ang kapuslanan sang mangin ulipon sang Dios sangsa mangin ulipon sang mga tawo. Sa katunayan, ang pagdedikar sa Dios nagahatag sing mga kapuslanan “sa sining tion . . . kag sa nagapakari nga sistema sang mga butang sing kabuhi nga walay katapusan.”—Marcos 10:29, 30.
21. Paano ginatamod sang mga Saksi ni Jehova ang dedikasyon sa Dios, kag ano ang handum nila?
21 Ang mga Saksi ni Jehova sa karon indi bahin sang isa ka nadedikar nga pungsod sugod sa pagkabun-ag kaangay sa mga Israelinhon sang una. Ang mga Saksi bahin sang kongregasyon sang dedikado nga mga Cristiano. Ang tagsa ka nabawtismuhan nga Saksi nangin amo sini bangod sang indibiduwal nga pagpadapat sa kahilwayan sa pagpili sang nagdedikar. Sa pagkamatuod, para sa mga Saksi ni Jehova, ang dedikasyon nagaresulta sa isa ka mainit personal nga kaangtanan upod sa Dios nga ginatandaan sang kinabubut-on nga pag-alagad sa iya. Ining makalilipay nga kahilwayan bug-os tagipusuon nila nga luyag huptan, nga malig-on nga nagapanguyapot sing dayon sa kahilwayan nga sa sini ginhilway sila ni Jesucristo.
Paano Mo Sabton?
◻ Ngaa ang Dios walay pinasulabi sang ginpili ang Israel nga mangin “pinasahi nga pagkabutang” niya?
◻ Ngaa makasiling ikaw nga ang Cristianong dedikasyon wala nagakahulugan sing daku nga pagkawasi sang kahilwayan?
◻ Ano ang mga kapuslanan sang pagdedikar kay Jehova nga Dios?
◻ Ngaa maayo pa nga mangin alagad ni Jehova sangsa mangin ulipon sang mga tawo?
[Retrato sa pahina 15]
Sa dumaan nga Israel, ang dedikasyon sa Dios nasandig sa pagkabun-ag
[Retrato sa pahina 16]
Ang Cristianong dedikasyon isa ka butang nga ginapili