Isa ka Manggaranon kag Maalam nga Hari
Nagapati ka bala nga mapahalipay ikaw sing manggad? Kon may maghatag sa imo sing daku nga kantidad, indi ka bala malipay? Ayhan malipay gid ikaw. Mahimo gid nga makapamensar ikaw kon paano ini gastuhon.
ANG matuod, madamo sing mabakal nga makapasulhay kag makapahalipay sa kabuhi. Ang kuwarta mahimo man mangin “isa ka pangamlig” batok sa wala ginapaabot nga mga problema, subong sang balatian ukon pagkawalaytrabaho.—Manugwali 7:12.
Apang ano ang kaangtanan sang kuwarta kag kalipay? Nagapati ka bala, subong sang pagpati sang madamo, nga ang kalipay resulta sang manggad? Mahimo mabudlay pangitaon ang mga sabat sa sini nga mga pamangkot bangod ang kuwarta madali matakus, ukon maisip, apang indi ang kalipay. Indi mo mabutang sa timbangan ang kalipay kag takson ini.
Subong man, ang iban nga manggaranon daw malipayon, samtang miserable naman ang iban. Matuod man ini sa mga pigado. Apang, ang kalabanan nga tawo—bisan yadtong manggaranon na—nagapati nga ang dugang pa nga kuwarta makahatag sa ila sing daku nga kalipay.
Ang isa ka tawo nga nagsulat tuhoy sa sinang mga butang amo si Hari Solomon sang dumaan nga Israel. Isa sia sa pinakamanggaranon nga tawo nga nagkabuhi. Mabasa mo ang paglaragway sa iya daku nga manggad sa kapitulo 10 sang Unang Hari nga tulun-an sa Biblia. Talupangda, halimbawa, ang ginasiling sang bersikulo 14: “Ang kabug-aton sang bulawan nga nag-abot kay Solomon sa isa ka tuig anom ka gatos kag kan-uman kag anom ka talanton nga bulawan.” Katumbas ina sa 25 ka tonelada nga bulawan. Sa karon ina nga kadamuon sang bulawan nagabili sing kapin sa $200,000,000, U.S.!
Apang, indi lamang manggaranon si Solomon; ginhatagan sia sang Dios sing kaalam. Ang Biblia nagasugid: “Si Hari Solomon naglabaw sa tanan nga hari sa duta sa manggad kag sa kaalam. Kag ang tanan nga katawhan sa duta nagtinguha nga magpakigkita kay Solomon agod makapamati sang iya kaalam nga ginbutang sang Dios sa iya tagipusuon.” (1 Hari 10:23, 24) Makabenepisyo man kita sa kaalam ni Solomon, sanglit ang iya mga sinulatan nangin bahin sang rekord sang Biblia. Tan-awon naton ang iya ginasiling tuhoy sa kaangtanan sang manggad kag kalipay.
[Picture Credit Line sa pahina 3]
Halin sa Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart