Ang Cristianong Pagtuo Pagatilawan

“Ang pagtuo wala ginapanag-iyahan sang tanan nga tawo.”​—⁠2 TESALONICA 3:⁠2.

1. Paano ginpakita sang maragtas nga indi tanan may matuod nga pagtuo?

SA BUG-OS nga maragtas, may mga lalaki, babayi, kag kabataan nga may matuod nga pagtuo. Ang adhetibo nga “matuod” nagakaigo bangod minilyon pa ang nagpakita sing isa ka sahi sang pagtuo nga nangin sobra ka mapinatihon, nga nagapati gilayon bisan wala sing nagakaigo nga sadsaran ukon rason. Ini nga pagtuo masunson nga nagalakip sa butig nga mga dios ukon mga porma sang pagsimba nga wala nahisuno sa Labing Gamhanan, si Jehova, kag sa iya ginpahayag nga Pulong. Busa si apostol Pablo nagsulat: “Ang pagtuo wala ginapanag-iyahan sang tanan nga tawo.”​—⁠2 Tesalonica 3:⁠2.

2. Ngaa importante nga usisaon naton ang aton mismo pagtuo?

² Apang ang pinamulong ni Pablo nagapahangop nga sang una ang pila may matuod nga pagtuo kag, ginapakita sini nga sa karon ang pila may matuod man nga pagtuo. Ang kalabanan nga bumalasa sini nga magasin maluyag nga makatigayon kag mag-uswag sa sining matuod nga pagtuo​—⁠pagtuo nga nahisuno sa sibu nga ihibalo sang diosnon nga kamatuoran. (Juan 18:​37; Hebreo 11:6) Amo man bala ini sa inyo? Kon amo kinahanglan nga batunon ninyo kag handaan ang katunayan nga ang inyo pagtuo pagatilawan. Ngaa masiling ina?

3, 4. Ngaa magdangop kita kay Jesus kon tuhoy sa mga pagtilaw sang pagtuo?

³ Dapat naton batunon nga si Jesucristo importante gid sa aton pagtuo. Sa pagkamatuod, ang Biblia nagapatuhoy sa iya subong ang Manughimpit sang aton pagtuo. Bangod ina sa ginsiling kag ginhimo ni Jesus, ilabi na sa kon paano niya gintuman ang tagna. Ginpapag-on niya ang sadsaran nga sa sini matukod sang mga tawo ang matuod nga pagtuo. (Hebreo 12:​2; Bugna 1:​1, 2) Apang, mabasa naton nga si Jesus ‘gintilawan sa tanan nga butang kaangay naton, apang wala sing sala.’ (Hebreo 4:15) Huo, ang pagtuo ni Jesus gintilawan. Wala nagapalas-ay sa aton ukon nagatuga sing pangalag-ag, dapat ina maglugpay sa aton.

⁴ Paagi sa pag-agom sing dakung mga pagtilaw bisan tubtob sa kamatayon sa usok, si Jesus ‘nakatuon sing pagkamatinumanon.’ (Hebreo 5:8) Ginpamatud-an niya nga ang mga tawo mahimo magkabuhi suno sa matuod nga pagtuo walay sapayan sang bisan anong mga pagtilaw nga mahimo mahanabo sa ila. Importante gid ini kon hunahunaon naton ang ginsiling ni Jesus tuhoy sa iya mga sumulunod: “Dumduma ang pulong nga ginsiling ko sa inyo, Ang ulipon indi daku pa sa iya agalon.” (Juan 15:20) Sa katunayan, nahanungod sa iya mga sumulunod sa aton tion, si Jesus nagtagna: “Mangin sentro kamo sang pagdumot sang tanan nga pungsod tungod sa akon ngalan.”​—⁠Mateo 24:⁠9.

5. Paano ginapakita sang Kasulatan nga magaatubang kita sing mga pagtilaw?

⁵ Sang maaga nga bahin sini nga siglo, ang paghukom ginsugdan sa balay sang Dios. Ang Kasulatan nagtagna: “Kay amo ini ang gintalana nga tion nga ang paghukom magasugod sa balay sang Dios. Karon kon ini magasugod anay sa aton, ano bala ang mangin katapusan sang mga wala magtuman sa maayong balita sang Dios? ‘Kag kon ang matarong nga tawo maluwas nga may kabudlayan, diin magapahayag ang didiosnon nga tawo kag ang makasasala?’ ”​—⁠1 Pedro 4:​17, 18.

Natilawan nga Pagtuo​—⁠Ngaa?

6. Ngaa ang natilawan nga pagtuo hamili?

⁶ Sa isa ka kahulugan, ang pagtuo nga wala matilawi wala sing napamatud-an nga bili, kag ang kalidad sini nagapabilin nga wala mahibalui. Mahimo nimo ini mapaanggid sa isa ka tseke nga wala pa mapabayluhan. Ayhan nakabaton ikaw sing tseke tungod sa imo gintrabaho, sa mga butang nga imo ginhatag, ukon subong isa ka regalo. Ang tseke mahimo nga daw matuod, apang ini bala? Makuha gid bala nimo ang kantidad nga nasulat sa sini? Sa kaanggid, ang aton pagtuo dapat nga indi pakunokuno ukon pag-angkon lamang. Dapat ini tilawan agod mapamatud-an ang kahulugan kag matuod nga kalidad sini. Kon ang aton pagtuo ginatilawan, mahimo naton masapwan nga ini malig-on kag hamili. Mahimo man ipakita sang pagtilaw ang mga bahin nga ang aton pagtuo nagakinahanglan sing pagputli ukon pagpabakod.

7, 8. Diin nagahalin ang mga pagtilaw sa aton pagtuo?

⁷ Ang Dios nagatugot nga ang paghingabot kag iban pa nga mga pagtilaw sang pagtuo mahanabo sa aton. Aton mabasa: “Kon ginatilawan, wala sing isa ang magsiling: ‘Ginatilawan ako sang Dios.’ Kay sa malaut nga butang ang Dios indi matilawan ukon sia mismo magatilaw kay bisan sin-o.” (Santiago 1:13) Sin-o ukon ano ang may salabton sa sinang mga pagtilaw? Ini amo si Satanas, ang kalibutan, kag ang aton dihimpit nga unod.

⁸ Mahimo naton batunon nga si Satanas may makusog nga impluwensia sa kalibutan, sa panghunahuna kag mga dalanon sini. (1 Juan 5:19) Kag ayhan nahibaluan naton nga sia ang nagasugyot sang paghingabot batok sa mga Cristiano. (Bugna 12:17) Apang kumbinsido man bala kita nga si Satanas nagatinguha sa pagpatalang sa aton paagi sa pagganyat sa aton dihimpit nga unod, sa pagsulay sa aton paagi sa kalibutanon nga mga pagbuyok, sa paglaum nga masulay kita, magalapas sa Dios, kag mangin dikahalamut-an kay Jehova? Sa pagkamatuod, ang mga paagi ni Satanas indi dapat makapakibot sa aton, kay nagagamit sia sing amo gihapon nga mga taktika sang gintinguhaan niya nga sulayon si Jesus.​—⁠Mateo 4:​1-11.

9. Paano kita makabenepisyo gikan sa mga halimbawa sang pagtuo?

⁹ Paagi sa iya Pulong kag Cristianong kongregasyon, si Jehova nagahatag sa aton sing matuod nga mga halimbawa sang pagtuo nga mailog naton. Si Pablo naglaygay: “Nahiusa nga mag-ilog kamo sa akon, mga kauturan, kag ituon ang inyo mata sa mga nagalakat sa paagi nga suno sa halimbawa ninyo sa amon.” (Filipos 3:17) Subong isa sang hinaplas nga mga alagad sang Dios sang nahaunang siglo, si Pablo nanguna sa paghimo sing mga buhat sang pagtuo walay sapayan sang dakung mga pagtilaw nga naagihan niya. Tubtob sa katapusan sang ika-20 nga siglo, wala kita makulangan sing kaanggid nga mga halimbawa sang pagtuo. Ang ginasiling sang Hebreo 13:7 maaplikar karon nga may subong nga kabug-aton sang ginsulat ini anay ni Pablo: “Dumduma ang mga nagapanguna sa inyo, nga nagpamulong sang pulong sang Dios sa inyo, kag samtang ginapamalandungan ninyo ang resulta sang ila paggawi iluga ang ila pagtuo.”

10. Ano ang aton partikular nga mga halimbawa sang pagtuo sa sining ulihi nga mga tion?

¹⁰ Yadto nga laygay labi na nga may bug-at kon binagbinagon naton ang resulta sang paggawi sang hinaplas nga nagkalabilin. Mapamalandungan naton ang ila halimbawa kag mailog ang ila pagtuo. May matuod sila nga pagtuo nga ginputli paagi sa mga pagtilaw. Upod ang diutay nga ginsuguran sadtong katuigan 1870, ang isa ka bug-os kalibutan nga Cristianong paghiliutod nagluntad. Bangod sang pagtuo kag pagbatas sang mga hinaplas sugod sadto, kapin sa lima ka milyon kag tunga ka Saksi ni Jehova ang nagabantala karon kag nagatudlo tuhoy sa Ginharian sang Dios. Ang tugob-globo karon nga kongregasyon sang makugi nga matuod nga mga sumilimba isa ka kitaon nga pamatuod sang natilawan nga pagtuo.​—⁠Tito 2:⁠14.

Ang Pagtuo nga Natilawan Tuhoy sa 1914

11. Paano ang 1914 importante para kanday C. T. Russell kag sa iya mga kaupdanan?

¹¹ Mga tinuig antes nagdabdab ang nahaunang inaway kalibutanon, ang hinaplas nga nagkalabilin nagbantala nga ang 1914 isa ka importante nga petsa sa tagna sang Biblia. Apang, ang pila sang ila mga ginapaabot indi nagakaigo, kag ang ila pagtamod sa kon ano ang mahanabo indi tanan husto. Halimbawa, nakita ni C. T. Russell, nahaunang presidente sang Watch Tower Society, kag sang iya mga kaupdanan nga ang masangkad nga hilikuton sa pagbantala kinahanglanon. Ini mabasa: “Inang ebanghelyo sang ginharian ibantala sa bug-os nga kalibutan subong panaksi sa tanan nga kapungsuran; kag ugaling magaabot ang katapusan.” (Mateo 24:​14, King James Version) Apang, paano ina himuon sang ila diutay lamang nga grupo?

12. Ano ang reaksion sang isa sang mga kaupdanan ni Russell sa kamatuoran sang Biblia?

¹² Binagbinaga kon paano ini nakaapektar kay A. H. Macmillan, nga kaupod ni Russell. Nabun-ag sa Canada, wala pa 20 anyos si Macmillan sang nakakuha sia sing libro ni Russell nga The Plan of the Ages (1886). (Ini nga libro, nga gintawag man nga The Divine Plan of the Ages, nangin Tomo 1 sang napanagtag sing lapnag nga set sang Studies in the Scriptures. Gintudlo sang Tomo 2, The Time Is at Hand [1889], ang 1914 subong ang katapusan sang “mga tion sang mga Gentil.” [Lucas 21:​24, KJ]) Sadto mismo nga gab-i nga ginsugdan ni Macmillan ang pagbasa, naghunahuna sia: “Aba, amo ini ang kamatuoran!” Sang tig-ilinit sang 1900, nakilala niya si Russell sa isa ka kombension sang mga Estudyante sang Biblia, ang pagkakilala sadto sa mga Saksi ni Jehova. Wala madugay si Macmillan nabawtismuhan kag nangabudlay kaupod ni Brother Russell sa ulong-talatapan sang Sosiedad sa New York.

13. Anong problema ang nakita ni Macmillan kag sang iban may kaangtanan sa katumanan sang Mateo 24:⁠14?

¹³ Pasad sa ila pagbasa sa Biblia, gintudlo sang hinaplas nga mga Cristiano ang 1914 subong importante nga tion sa katuyuan sang Dios. Apang si Macmillan kag ang iban pa nagpalibog kon paano himuon ang pagbantala sa mga pungsod nga gintagna sa Mateo 24:​14 sa malip-ot na lang nga tion. Nagsiling sia sang ulihi: “Madumduman ko nga masunson namon anay ini ginhambalan ni Brother Russell, kag magasiling sia, ‘Ti, utod, diri mismo sa New York may mas madamo kita nga Judiyo sangsa didto sa Jerusalem. May mas madamo kita diri nga Irish sangsa didto sa Dublin. Kag may mas madamo kita nga Italyano sangsa didto sa Roma. Karon kon bantalaan naton sila diri, paglab-ot ina sa kalibutan paagi sa mensahe.’ Apang daw wala kami sadto makontento. Gani nahunahuna namon ang ‘Photo-Drama.’ ”

14. Antes sang 1914, anong tumalagsahon nga proyekto ang ginhimo?

¹⁴ Isa gid ka bag-o nga hinimuan ang “Photo-Drama of Creation”! Gintingob sini ang pelikula kag de-kolor nga mga slide, nga nagadungan sing eksakto sa mga pamulongpulong sa Biblia kag musika sa mga plaka. Sang 1913, ang Watch Tower nagsiling tuhoy sa isa ka kombension sa Arkansas, E.⁠U.⁠A.: “Ginhisugtan sang tanan nga nag-abot na ang tion para sa paggamit sing mga pelikula sa pagtudlo sing mga kamatuoran sang Biblia. . . . Ginpaathag [ni Russell] nga tatlo ka tuig niya nga ginpangabudlayan ini mismo nga plano kag karon may halos nahanda na nga linibo ka matahom nga mga laragway, nga pat-od gid nga magaganyat sa dakung mga kadam-an kag magabantala sang Ebanghelyo, kag magabulig sa publiko nga magtuo liwat sa Dios.”

15. Ano ang mga resulta sang “Photo-Drama”?

¹⁵ Amo gid sina ang nahimo sang “Photo-Drama” sang una ini nga ginpasalida sang Enero 1914. Ang masunod amo ang mga report gikan sa The Watch Tower sang 1914:

Abril 1: “Ang isa ka ministro, pagkatapos makatan-aw sang duha ka bahin, nagsiling, ‘Tunga pa lang sang PHOTO-DRAMA OF CREATION ang akon natan-aw, apang mas madamo na ang akon natun-an gikan sini tuhoy sa Biblia sangsa natun-an ko sa akon tatlo ka tuig nga kurso sa teolohiko nga seminaryo.’ Ang isa ka Judiyo, pagkatapos makatan-aw sini, nagkomento, ‘Nagpauli ako nga mas maayo nga Judiyo sangsa pagsulod ko.’ Ang pila ka Katolikong pari kag madre nagtan-aw sang DRAMA kag nagpabutyag sing daku nga apresasyon. . . . Napulog-duha pa lamang ka DRAMA ang natapos . . . Apang nalab-ot na namon kag ginakadtuan pa ang katluan kag isa ka siudad . . . Kapin sa katluan-kag-lima ka libo kada adlaw ang nakatan-aw, nakabati, nakadayaw, nakahunahuna kag napakamaayo.”

Hunyo 15: “Ang mga laragway nagbulig sa akon nga mangin mas makugi sa pagpalapnag sa Kamatuoran, kag labi nga nagpabakod sang akon gugma sa Langitnon nga Amay kag sa amon pinalangga nga Magulang nga Utod nga si Jesus. Adlaw-adlaw ako nga nagapangamuyo nga pakamaayuhon sing bugana sang Dios ang PHOTO-DRAMA OF CREATION kag ang tanan nga nagapakigbahin sa pagpasalida sini . . . Ako ang inyo alagad sa Iya, F. W. KNOCHE.​—⁠Iowa.”

Hulyo 15: “Nalipay kami sa pagsugid kon daw ano kaayo nga impresyon ang ginbilin sang mga pelikula sa sining siudad, kag nagasalig kami nga ining panaksi sa kalibutan ginagamit man sa pagtipon sa madamo nga magahatag sing pamatuod subong mga hiyas nga ginpili mismo sang Ginuo. Kilala namon ang pila ka hanuot nga mga estudyante sang Biblia nga nagapakig-upod na sa Klase diri subong resulta sang pagpasalida sa Photo-Drama. . . . Ang inyo utod sa Ginuo, EMMA L. BRICKER.”

Nobiembre 15: “Napat-od namon nga malipay kamo sa pagpamati sa matahom nga panaksi nga ginahatag paagi sa PHOTO-DRAMA OF CREATION sa The London Opera House, Kingsway. Ang pag-ubay sang Ginuo nakita gid sa tanan nga detalye sining eksibisyon nga nagpahalipay sing daku sa mga kauturan . . . Ang amon tumalambong ginahuman sang tanan nga klase kag sahi sang tawo; nakita namon ang madamo nga klero nga nagtan-aw. Ang isa ka bikaryo . . . nangayo sing mga tiket agod makakadto kag makatan-aw sila liwat sang iya asawa. Ang Rektor sang Church of England pila ka beses nga nagtan-aw sang DRAMA, kag . . . gin-upod ang madamo niya nga abyan agod matan-aw ini. Duha man ka obispo ang nagtan-aw, kag pila ka titulado nga mga tawo.”

Disiembre 1: Nagapasalamat gid kami sang akon asawa sa amon Langitnon nga Amay tungod sa daku kag hamili nga pagpakamaayo nga nag-abot sa amon paagi sa imo. Bangod sa imo matahom nga PHOTO-DRAMA, nakita kag nabaton namon ang Kamatuoran . . . May yara kami sang imo anom ka tomo sang STUDIES IN THE SCRIPTURES. Daku gid ini nga bulig.”

Reaksion sa mga Pagtilaw Sadto

16. Ngaa ang 1914 naghatag sing pagtilaw sa pagtuo?

¹⁶ Apang, kamusta naman sang natukiban sang hanuot kag debotado nga mga Cristiano nga ang ila mga ginapaabot nga makaupod ang Ginuo sang 1914 wala matuman? Yadtong mga hinaplas nakaeksperiensia sing mabudlay gid nga tion. Ang The Watch Tower sang Nobiembre 1, 1914, nagsiling: “Tandaan naton nga yara kita sa dag-on sang pagtilaw.” Tuhoy sini, ang Jehovah’s Witnesses​—⁠Proclaimers of God’s Kingdom (1993) nagsiling: “Ang mga tuig halin sang 1914 tubtob 1918, sa pagkamatuod, isa ka ‘dag-on sang pagtilaw’ para sa mga Estudyante sang Biblia.” Putlion ayhan nila ang ila pagtuo kag bag-uhon ang ila panghunahuna agod mahimo nila ang daku pa nga hilikuton?

17. Ano ang reaksion sang matutom nga mga hinaplas sa ila pagpabilin sa duta paglipas sang 1914?

¹⁷ Ang The Watch Tower sang Septiembre 1, 1916, nagsiling: “Naghunahuna kami anay nga ang hilikuton sa Pag-ani sa pagtipon sa Kongregasyon [ang hinaplas] matuman sa wala pa ang katapusan sang Panahon sang mga Gentil; apang wala ini ginasiling sing espesipiko sang Biblia . . . . Nahanusbo bala kami nga ang hilikuton sa Pag-ani nagapadayon? . . . Ang amon karon panimuot, mahal nga mga kauturan, amo ang daku gid nga pagpasalamat sa Dios, ang dugang nga pagpabalor sa matahom nga Kamatuoran nga ginhatag Niya sa amon ang pribilehiyo nga makita kag makilala, kag ang dugang pa nga kakugi sa pagbulig nga mahibaluan sang iban ina nga Kamatuoran.” Ang ila pagtuo gintilawan, apang gin-atubang nila yadto nga pagtuo kag nangin madinalag-on. Apang kita nga mga Cristiano dapat mangin alisto nga ang mga pagtilaw sang pagtuo mahimo nga madamo kag nanuhaytuhay.

18, 19. Anong iban pa nga mga pagtilaw sang pagtuo ang natabo sa katawhan sang Dios wala madugay nga napatay si Brother Russell?

¹⁸ Halimbawa, ang isa pa ka sahi sang pagtilaw nag-abot sa nagkalabilin wala madugay nga napatay si Brother Charles T. Russell. Isa yadto ka pagtilaw sa ila pagkamainunungon kag pagtuo. Sin-o ang ‘matutom nga ulipon’ sang Mateo 24:​45? Ang iban nagpati nga ini amo si Brother Russell mismo, kag nag-untat sila sa pagpakigkooperar sa bag-ong mga kahimusan sang organisasyon. Kon sia gid man ang ulipon, ano ang himuon sang mga kauturan karon nga napatay na sia? Magasunod bala sila sa bag-ong tinangdo nga indibiduwal, ukon tion na bala karon nga kilalahon nga ginagamit ni Jehova, indi lamang ang isa ka tawo, kundi ang isa ka bug-os nga grupo sang mga Cristiano subong instrumento, ukon ulipon nga klase?

¹⁹ Isa pa ka dugang nga pagtilaw ang nag-abot sa matuod nga mga Cristiano sang 1918 sang ang kalibutanon nga mga awtoridad, sa sugyot sang mga klero sang Cristiandad, ‘nagpahito sing kalainan paagi sa kasuguan’ batok sa organisasyon ni Jehova. (Salmo 94:​20, KJ) Ginlansar ang masingki nga paghingabot batok sa mga Estudyante sang Biblia sa Aminhan nga Amerika kag sa Europa. Ang putukputukan sang ginsugyot-sang-klero nga pagpamatok nag-abot sang Mayo 7, 1918, sang ang pederal sang Estados Unidos nagsugo nga dakpon si J. F. Rutherford kag ang pila niya ka suod nga kaupdanan, lakip si A. H. Macmillan. Dimakatarunganon sila nga ginsumbong sing sedisyon, kag wala ginsapak sang mga awtoridad ang sabat nila sa panumbungon nga wala sila sing sala.

20, 21. Suno sa gintagna sa Malaquias 3:​1-3, ano nga hilikuton ang ginhimo sa tunga sang mga hinaplas?

²⁰ Bisan nga wala pa sadto mahangpi, ang hilikuton sa pagputli ginhimo, suno sa ginlaragway sang Malaquias 3:​1-3: “Sin-o ang makabatas sang adlaw sang iya pagkari, kag sin-o ang isa nga makatindog kon magpahayag sia? Kay [ang mensahero sang katipan] mangin kaangay sang kalayo sang manugtunaw kag kaangay sang habol sang mga manugpamunak. Kag magalingkod sia subong sang manugtunaw kag manug-ulay sang pilak kag magaputli sang mga anak nga lalaki ni Levi; kag magaulay sa ila subong sang bulawan kag subong sang pilak, kag pat-od gid nga sila mangin katawhan nga nagadulot sing mga halad sa pagkamatarong kay Jehova.”

²¹ Samtang nagahingapos ang Inaway Kalibutanon I, ang pila ka Estudyante sang Biblia nag-atubang sing isa pa ka pagtilaw sang pagtuo​—⁠kon bala huptan nila ang bug-os nga pagkaneutral may kaangtanan sa mga hilikuton sa militar sang kalibutan. (Juan 17:​16; 18:36) Ang iban wala maghupot sing bug-os nga pagkaneutral. Gani sang 1918, si Jehova nagpadala sang “mensahero sang katipan,” si Cristo Jesus, sa Iya espirituwal nga templo nga kahimusan sa pag-ulay sa diutay nga hubon sang Iya mga sumilimba gikan sa kalibutanon nga mga kahigkuan. Ang mga nagpakita sing matuod nga pagtuo nakatuon gikan sa eksperiensia kag nag-uswag, makugi nga nagpadayon sa pagbantala.

22. Nahanungod sa mga pagtilaw sang pagtuo, ano pa ang binagbinagon?

²² Ang aton ginbinagbinag indi lamang umalagi nga pagkawili sa maragtas. May direkta ini nga kaangtanan sa espirituwal karon nga kahimtangan sang bug-os kalibutan nga kongregasyon ni Jehova. Apang binagbinagon naton sa masunod nga artikulo ang pila sa mga pagtilaw sang pagtuo nga ginaatubang sang katawhan sang Dios karon kag tan-awon kon paano naton ini mahimo malandas sing madinalag-on.

Madumduman Mo Bala?

◻ Ngaa dapat magpaabot ang katawhan ni Jehova nga ang ila pagtuo tilawan?

◻ Ano nga sahi sang mga panikasog sa pagpalapnag sang mensahe sang Biblia ang ginhimo antes sang 1914?

◻ Ano ang “Photo-Drama,” kag ano ang mga resulta sini?

◻ Paano ang mga hitabo sang 1914-18 nagtilaw sa mga hinaplas?

[Retrato sa pahina 12]

Sa pagbaylo sang siglo, ang mga tawo sa madamong kadutaan nagatuon sing Biblia sa bulig sang mga serye sang “Millennial Dawn,” nga gintawag sang ulihi nga “Studies in the Scriptures”

[Retrato sa pahina 13]

Isa ka sulat gikan kay C. T. Russell nga may introduksion para sa plaka nga sa sini sia nagsiling: “ ‘Ang Photo-Drama of Creation’ ginapasalida sang IBSA [International Bible Students Association]. Ang tulumuron sini amo ang pagtudlo sa publiko suno sa relihion kag siensia, kag bilang pagpangapin sa Biblia”

[Retrato sa pahina 15]

Si Demetrius Papageorge naglakbay sa pagpasalida sing “Photo-Drama of Creation.” Sang ulihi, ginbilanggo sia bangod sang iya Cristianong neutralidad