Maghulat sing Mapailubon

BANGOD sang linabutaw nga pagsinggit sing sulitsulit sang manugbantay sing “Lobo!” bisan wala naman, wala na sia sang ulihi pagsapaka sang mangayo sia sing tabang bisan sang may lobo na. Sa karon, madamo man ang wala nagasapak nga malapit na ang adlaw ni Jehova bangod madamong paandam na ang ila nabatian nga indi gali matuod. Ang katunayan mismo nga tuman kadamo ang wala makahantop kon diin nga paandam ang matuod kag kon ano ang dapat pamatian ginahingalitan sang dakung kaaway sang Dios, si Satanas, inang butig nga “anghel sang kapawa.”​—⁠2 Corinto 11:⁠14.

Ang espiritu sang pagkanaayawan sa kaugalingon makatalagam bisan sa mga nagaalagad kay Jehova sa malawig nga tion. Ngaa? Binagbinaga ang paandam ni apostol Pedro sang unang siglo.

Maghunahuna sing Maathag

Ang ikaduhang inspirado nga sulat ni Pedro isa ka pahanumdom sa dumaan nga mga Cristiano, kag subong man sa aton. “Mga hinigugma,” sulat niya, “ini karon amo ang ikaduhang sulat nga ginasulat ko sa inyo, nga sa sini, subong sang akon nahauna nga sulat, ginapukaw ko ang inyo maathag nga ikasarang sa paghunahuna paagi sa isa ka pahanumdom.” (2 Pedro 3:1) Ano ang rason ni Pedro sa pagkabalaka sing subong sini? Ginapatalupangod ni Pedro ang presensia sang mga mayubiton nga bangod sang ila pagyubit, ginapaluya nila ang kinahanglanon nga pagbatyag sing pagkahilingagawon may kaangtanan sa tion nga sa sini nagakabuhi ang mga alagad sang Dios. Karon na ang tion sa pag-andam nga malimbungan sang mga nagauliga. Busa ginalaygayan ni Pedro ang iya mga bumalasa nga ‘dumdumon ang mga pulong nga ginhambal anay sang balaan nga mga manalagna.’ (2 Pedro 3:​2; Binuhatan 3:​22, 23) Ano ang ginsiling sang mga manalagna?

Madamong beses nga ginpatalupangod sang matutom nga mga alagad sang Dios kon paano gintapos sang mga paghukom sang Dios ang kalautan. Ginapahanumdom ni Pedro ang iya mga bumalasa tuhoy sa Anaw sang adlaw ni Noe nga gingamit sang Dios subong isa ka paagi sang pagpasilabot sang ang duta napun-an sing kalainan. Gintapos sadtong masulog nga Anaw ang kalibutan sadto nga tion. Apang gin-amligan sang Dios si Noe kag ang iya panimalay sa arka lakip ang tiglawas nga buhi nga mga tinuga “sang tanan nga sahi sang unod.” Ang mga leyenda sa bug-os nga uniberso nagapamatuod sa pagkamaminatud-on sang rekord sang Biblia.⁠a​—⁠Genesis 6:​19; 2 Pedro 3:​5, 6.

Ginatawag ni Pedro yadtong pagpasilabot sang Dios nga ‘isa ka katunayan nga wala pagsapaka’ sang iban nga mga tawo. Nalimbungan sila sang ulihi sang mga mayubiton sadto nga adlaw nga magpulupatawhay. Apang, indi gid naton dapat pagkalimtan ang nahimo na ni Jehova. Si Pedro nagasiling sa aton: “Paagi sa amo man nga pulong ang mga langit kag ang duta nga amo karon nga ginatigana sa kalayo kag ginatipigan nga sa adlaw sang paghukom kag sang kalaglagan sang mga tawo nga didiosnon.” (2 Pedro 3:7) Huo, ang pagpasilabot sang Dios mahanabo liwat.

Ang Dios Indi Mahinay

Milenyo na nga tion ang nagligad. Ngaa naghulat ang Dios sing tuman kadugay sa paglubad sang mga problema sang katawhan? Sa liwat, si Pedro nagpatalupangod sang isa pa ka katunayan. Sia nagasiling: “Indi ninyo pagkalimtan ining isa ka katunayan, mga hinigugma, nga ang isa ka adlaw kay Jehova subong sang isa ka libo ka tuig kag ang isa ka libo ka tuig subong sang isa ka adlaw.” (2 Pedro 3:8) Ang pagtamod ni Jehova sa tion tuhay sa aton. Para sa dayon nga Dios, ang tion kutob sang pagtuga kay Adan tubtob karon wala pa gani isa ka semana. Apang ano man ang aton pagtamod sa tion, ang tagsa ka milenyo kag ang tagsa ka adlaw nga nagaligad labi nga nagahilapit sa aton sa katumanan sang katuyuan ni Jehova.

“Ang kolon nga ginabantayan indi gid magabukal” amo ang isa ka hambalanon nga nagapanugda nga ang basta lamang paghulat sa isa ka hitabo daw nagapaisol sini. Apang, si Pedro nagarekomendar nga ‘hulaton kag huptan sing suod sa hunahuna ang presensia sang adlaw ni Jehova.’ (2 Pedro 3:12) Paano naton mapalambo ang panimuot sa hunahuna nga nagahupot sa aton nga alisto sa paghilapit sang pagpasilabot sang Dios?

Ang Imo Ginahimo Mas Importante Sangsa Imo Ginahambal

Ginapatalupangod ni Pedro ang mga buhat kag ginahimo. Ginapatuhuyan niya ang “balaan nga paggawi” subong man ang “mga buhat sang diosnon nga debosyon.” (2 Pedro 3:11) Ano ang nalakip sa sini?

Ang matuod nga alagad sang Dios nagapanghikot sa paagi nga nagapahamuot sa Iya. Ang pagtuo sining matuod nga sumilimba makita sa iya paggawi. Nagapakilala ini sa iya nga tuhay sa mga nagahambal lamang nga may pagtuo sa Dios kag sa iya mga saad. Ayhan nakita mo nga ang publiko nga ministeryo sang mga Saksi ni Jehova nagahimo sa ila nga tuhay. Nagaduaw sila sa inyo puluy-an agod ipatalupangod ang mga saad sang Dios nga ginbalay sa Biblia. Apang nagapanaksi man sila sa ila mga paglaum kag mga pagtuluuhan bisan diin man nga masugilanon nila ang mga tawo.

Ang Saksi nga masako sa pagpahayag sang iya pagtuo sa iban nagapalig-on kag nagapabakod sang iya pagtuluuhan. Ang mga tinaga labi nga nagapadulot sang impresyon kag sa amo man nga tion nagahatag sing nasulod nga kalipay kag pagkakontento. Kon ginabantala naton ang maayong balita sang Ginharian sang Dios, ginapahamut-an man naton si Jehova. Nakahibalo kita nga ‘indi sia dimatarong nga malimot sang aton binuhatan kag sang gugma nga ginpakita naton tungod sa iya ngalan,’ subong sang ginsiling sang kaupod nga apostol ni Pedro nga si Pablo.​—⁠Hebreo 6:​10; Roma 10:​9, 10.

Ano ang resulta sining daku nga interes nga mapalapnag ang maayong balita sang Ginharian sa katapusan nga mga adlaw sining karon malauton nga sistema? Ginatos ka libo sang bunayag-sing-tagipusuon nga katawhan ang nagatuon kon paano makatigayon sing suod nga kaangtanan kay Jehova, makapanginpulos gikan sa iya dibagay nga kaayo kag makasapo sing matuod nga kalipay sa paglaum nga kabuhi nga dayon sa paraiso nga duta.

Nakahibalo nga Daan

Bisan nga nahibaluan naton gikan sa Biblia nga si Jehova nga Dios magapasilabot sa iya natalana nga tion, dapat naton pamatian ang dugang nga paandam nga ginahatag ni Pedro. Nakahibalo nga daan sini, mag-andam kamo agod indi kamo nila mapahilayo paagi sa sayop sang mga tawo nga nagapamatok sa kasuguan kag madula ang inyo kaugalingon nga pagkalig-on.”​—⁠2 Pedro 3:⁠17.

Si Jehova nakahibalo gid nga daan nga ang pila nga kulang sing mabakod nga pagtuo mahimo nga maluyahan sing buot bangod sang daw pagpalantang sang pagpasilabot sang Dios. Nakahibalo man sia nga ang impluwensia sang mga tawo nga didiosnon mahimo nga magapalain sa iya matuod nga mga alagad, ukon, sa magkubos, magapaluya sang ila pagtuo nga ang pagpakabalaan sa ngalan sang Dios malapit na. Makapasubo gid kon madula ang pagkalig-on sa sining katapusan nga mga adlaw!

Indi karon ang tion sa paghupot sing mga duhaduha ukon walay kapat-uran tuhoy sa kon ano ang himuon ni Jehova. (Hebreo 12:1) Sa baylo, karon na ang tion nga magtubo sa pag-apresyar kon ano ang resulta sang pagpailob ni Jehova​—⁠ang paglaum nga kaluwasan sa minilyon nga nangin bahin sang internasyonal nga dakung kadam-an kag nagapaabot nga makalampuwas sa nagapakari nga dakung kapipit-an. (Bugna 7:​9, 14) Si Pedro nagalaygay: “Padayon kamo sa pagtubo sa dibagay nga kaayo kag ihibalo sang aton Ginuo kag Manluluwas nga si Jesucristo. Sa iya ang himaya karon kag tubtob sa adlaw nga walay katubtuban.”​—⁠2 Pedro 3:⁠18.

“Hupti ang Inyo Kaugalingon sa Gugma Sang Dios”

Ang pagsako sa pagbantala sang Ginharian kag pagtambong sing tayuyon sa Cristianong mga miting para sa pagsimba kag pagtuon sa Pulong sang Dios nagahatag sa aton sing pangamlig. Gani, wala kita sing tion nga mabalaka sing tuman sa nagalain nga mga kahimtangan sa malauton nga sistema karon. Ang mga kahadlok kag mga kabalaka indi dapat mangibabaw sa kabuhi sang matuod nga mga Cristiano. (1 Corinto 15:58) Kon mas masako kita sa pag-alagad kay Jehova, mas madasig nga nagaligad ang tion.

Si Judas, nga katubotubo ni Pedro kag utod sa iloy ni Jesus, nagalaygay sa aton: “Kamo, mga hinigugma, paagi sa pagpalig-on sang inyo mga kaugalingon sa inyo labing balaan nga pagtuo, kag pangamuyo nga may balaan nga espiritu, hupti ang inyo kaugalingon sa gugma sang Dios, samtang nagahulat kamo sang kaluoy sang aton Ginuong Jesucristo nga sa kabuhi nga walay katapusan.” (Judas 20, 21) Talupangda ang importansia sang positibo nga panimuot nga ginapabakod paagi sa pagkamapinadayunon sa pangamuyo. (1 Tesalonica 5:17) Nian si Judas nagadugang: “Padayon nga magpakita sing gugma sa pila nga may mga pangduhaduha; luwasa sila paagi sa pag-agaw sa ila gikan sa kalayo. Apang padayon nga magpakita sing kaluoy sa iban, nga ginahimo ini nga may kahadlok, samtang ginadumtan ninyo bisan ang nasulod nga panapton nga nadagtaan sang unod.” (Judas 22, 23) Daw ano ka kinahanglanon nga pabakuron ang isa kag isa sa sining mabudlay nga mga tion! Kag daw ano ka importante nga indi mahulog sa pagsulay, ginagamit ining ginpalawig nga “adlaw sang kaluwasan” subong balibad para sa “lugak nga paggawi,” nga tuman ka lapnag karon sa malain sing moral nga kalibutan.​—⁠Judas 4; 2 Corinto 6:​1, 2.

Paagi sa pagsunod sa mahigugmaon nga laygay nanday Pedro, Pablo, kag Judas kag paagi sa masako kag aktibo nga pag-alagad sa Dios, sarang ninyo mahulat sing mapailubon ang pagpasilabot ni Jehova. Apang magahulat ka bala?

Indi mangalag-ag sa pagpakigsugilanon sa mga Saksi sa inyo lugar agod mabuligan ka nga mapalig-on ang imo pagtuo sa saad sang Manunuga nga kabuhi nga walay katapusan. Tun-i kon ano ang kinahanglan agod mangin kalipikado sa pagpakigbahin sa sining indi-na-maliwat nga pagpanaksi nga hilikuton sa bug-os nga globo nga matapos sa nagahilapit nga dakung kapipit-an. (Marcos 13:10) Nian makatigayon ka sing paglaum nga mabuhi sa bag-ong kalibutan sang pagkamatarong nga ginasaad ni Jehova. (2 Pedro 3:13) Pamatii ang iya mga pahanumdom! Maghulat sing mapailubon! Magmasako!

[Footnote]

[Retrato sa pahina 7]

Tun-i karon ang mga saad sang Dios nga Paraiso

[Picture Credit Line sa pahina 5]

Lobo: Kasapatan/Jim Harter/Dover Publications, Inc.; bata nga manugbantay: Kabataan: A Pictorial Archive from Nineteenth-Century Sources/Grafton/Dover Publications, Inc.