Ang Organisasyon ni Jehova Nagasakdag sa Imo Ministeryo
“Nakita ko ang isa naman ka anghel nga nagalupad sa tunga sang langit, kag sia may maayong balita nga dayon nga ibantala subong makalilipay nga balita.”—BUGNA 14:6.
1. Paano gintilawan ang mga Saksi ni Jehova, kag ngaa nakalampuwas sila?
NGAA importante gid nga kilalahon ang papel sang langitnon nga organisasyon ni Jehova sa pagsakdag sa Cristianong ministeryo? Nahimo bala sang mga Saksi ni Jehova ang pagbantala sing maayong balita sang Ginharian sang Dios sa isa ka dimainabyanon nga kalibutan kon wala ang pagsakdag sang langitnon nga mga kasuldadusan ni Jehova? Nahimo sang mga Saksi ina nga pagbantala sa tion sang isa ka siglo sang sobra nga nasyonalismo, totalitaryan nga mga sistema politika, mga inaway kalibutanon, kag iban pa nga mga kabudlayan. Kon wala ang bulig ni Jehova, nalampuwasan ayhan sang mga Saksi ang mga pag-ihig-ihig, inhustisya, kag sa masami masingki nga paghingabot batok sa ila?—Salmo 34:7.
Paglampuwas Walay Sapayan sang Pagpamatok sa Bug-os nga Kalibutan
2. Ano ang pagkaanggid sang matuod nga mga Cristiano sang unang siglo kag sang karon?
2 Sa sining ika-20 nga siglo, ang mga kaaway, ang relihion kag politika, nagpautwas sing tanan nga balagbag, legal kag indi legal, agod punggan ukon padulugon ang hilikuton ni Jehova. Ang Cristianong kauturan nga mga lalaki kag mga babayi ginhingabot, ginpakalain, gintamay, kag ginpasipalahan—madamo sa ila ginpatay—sa masami sa idalom sang pagsutsot sang mga klero sang Babilonia nga Daku. Subong sang ginsiling anay sa unang mga Cristiano, sarang man masiling nga “nahanungod sining sekta nahibaluan namon nga bisan diin ginapakalain ini.” Subong nga ang Judiyong mga klero sang panahon ni Cristo nanikasog sing tuman nga punggan ang iya ministeryo, ang mga klero kag mga apostata man, upod sa ila politikal nga mga kahagugma, nagtinguha nga pauntaton ang dakung edukasyunal nga hilikuton sa pagpanaksi sang katawhan ni Jehova.—Binuhatan 28:22; Mateo 26:59, 65-67.
3. Ano ang matun-an naton gikan sa integridad ni Henryka Żur?
3 Binagbinaga subong halimbawa ang natabo sa Poland sang Marso 1, 1946. Si Henryka Żur, 15-anyos nga lin-ay nga Saksi malapit sa Chelm, nag-upod sa isa pa ka Saksi, isa ka utod nga lalaki, agod magduaw sa interesado nga mga tawo sa isa ka malapit nga minuro. Gindakop sila sang mga katapo sang isa ka Katoliko nga grupo sang mga soldado nga gintawag Narodowe Siły Zbrojne (National Armed Forces). Ang utod nga lalaki ginbakol sing tuman apang wala sia mapatay. Indi subong sini ang natabo kay Henryka. Wala kaluoy nga gintormento sia sa sulod sang madamo nga inoras samtang ginatinguhaan nila nga piliton sia nga manguros. Ang isa sang mga nagtormento sa iya nagsiling: “Indi bale kon ano ang imo ginatuuhan, basta manguros ka lang. Kay kon indi may bala nga nagahulat sa imo!” Nagluya bala ang iya integridad? Wala. Ginguyod sia sang relihioso nga mga talawan padulong sa malapit nga kagulangan kag gintiro. Sa gihapon, nagdaug sia! Wala nila mabungkag ang iya integridad.a—Roma 8:35-39.
4. Paano nagtinguha ang politikal kag relihioso nga mga grupo nga punggan ang hilikuton sa pagbantala sang Ginharian?
4 Sa sulod sang kapin sa isa ka gatos ka tuig, ang modernong-adlaw nga mga alagad sang Dios ginapintasan kag wala ginatahod. Bangod ang mga Saksi ni Jehova indi bahin, kag indi luyag mangin bahin sang nagapanguna nga mga relihion ni Satanas, ginatamod sila subong nagakadapat lamang nga biktima sang indi makatarunganon nga kritiko ukon panatiko nga kaaway. Mapintas nga ginsalakay sila sang politikal nga mga grupo. Madamo nga mga Saksi ang nangin martir bangod sang ila pagtuo. Bisan gani ang ginatawag nga mga demokrasya nagtinguha nga balabagan ang pagbantala sing maayong balita. Bisan sang 1917 pa, ang mga klero sa Canada kag Estados Unidos amo ang nagsutsot sing mga akusasyon nga ang mga Bible Students, subong amo anay ang pagkakilala sa mga Saksi, nagplano nga pukanon ang gobierno. Ang mga opisyal sang Watch Tower Society ginbilanggo sa sayop nga panumbungon, apang naabsuwelto sila sang ulihi.—Bugna 11:7-9; 12:17.
5. Anong mga pulong ang nagpalig-on sa mga alagad ni Jehova?
5 Gingamit ni Satanas ang tanan nga paagi nga mahimo niya agod padulugon ang pagpanaksi nga hilikuton sang kauturan ni Cristo kag sang ila matutom nga mga kaupod. Apang, subong ginapakita sang madamo gid nga mga eksperiensia, ang mga peligro, mga pamahog, pisikal nga kasingki, mga bilangguan, mga kampo konsentrasyon, ukon bisan gani ang kamatayon wala makapahipos sa mga Saksi ni Jehova. Kag amo sini ang natabo sa bug-os nga maragtas. Sa liwat kag liwat, nangin pagpalig-on ang mga pulong ni Eliseo: “Dili ka magkahadlok, kay ang mga nagaupod sa aton madamo pa sa mga nagaupod sa ila.” Ang isa ka rason amo nga mas laban ang matutom nga mga anghel sangsa mga demonyo sang Yawa!—2 Hari 6:16; Binuhatan 5:27-32, 41, 42.
Ginapakamaayo ni Jehova ang Makugi nga Pagbantala
6, 7. (a) Ano nga mga panikasog ang ginhimo anay sa pagbantala sing maayong balita? (b) Anong mapuslanon nga pagbag-o ang natabo sugod sang 1943?
6 Sa sulod sang ika-20 nga siglo, gingamit sang mga Saksi ni Jehova ang madamo nga kauswagan sa teknolohiya agod pasangkaron kag padasigon ang dakung hilikuton sa pagpanaksi antes mag-abot ang katapusan. Sadto sang 1914, ginsakdag ni Pastor Russell, una nga presidente sang Watch Tower Bible and Tract Society, ang paggamit anay sing mga slide kag mga sine, nga ginpasigo sa napasad-sa-Biblia nga komentaryo nga narekord sa mga plaka sang ponograpo, sa walo ka oras nga palaguwaon tuhoy sa Biblia nga gintawag “The Photo-Drama of Creation.” Nagdayaw ang mga nakalantaw sini sa madamo nga pungsod sadtong tion. Sang ulihi, sang katuigan 1930 kag 1940, nagbantog ang mga Saksi sa ila pamalaybalay nga pagbantala nga nagagamit sing gamay nga mga ponograpo, kag ginapatokar ang narekord nga mga pamulongpulong sa Biblia ni J. F. Rutherford, ang ikaduha nga presidente sang Sosiedad.
7 Sang 1943 ginhimo ang isa ka maisugon nga tikang sa idalom sang pagdumala ni Nathan H. Knorr, ang ikatlo nga presidente sang Sosiedad, sang gindesisyunan nga magtukod sing eskwelahan para sa mga ministro sa tanan nga kongregasyon. Hanason ang mga Saksi sa pagbantala kag pagpanudlo sa mga balay nga wala nagagamit sing mga plaka sa ponograpo. Sugod sadto, may iban pa nga mga eskwelahan nga gin-organisar agod maghanas sing mga misyonero, bug-os tion nga payunir nga mga ministro, mga gulang sa kongregasyon, kag responsable nga mga manugtatap sa mga sanga sang Watch Tower Society. Ano ang nangin resulta?
8. Paano ang mga Saksi nagpakita sing dakung pagtuo sang 1943?
8 Sadto sang 1943, sa tion sang Inaway Kalibutanon II, 129,000 lamang ang mga Saksi nga aktibo sa 54 ka kadutaan. Apang, may pagtuo sila kag determinasyon nga ang Mateo 24:14 matuman antes mag-abot ang katapusan. Kumbinsido sila nga ipabantala anay ni Jehova ang importante nagapaandam nga mensahe antes ang paagisod nga mga hitabo magadala sining malaut nga sistema sang mga butang sa katapusan. (Mateo 24:21; Bugna 16:16; 19:11-16, 19-21; 20:1-3) Ginpadyaan bala ang ila mga panikasog?
9. Anong mga katunayan ang nagapakita nga ang pagpanaksi nga hilikuton nag-uswag?
9 Sa karon, may yara sa dimagkubos 13 ka pungsod nga may kapin sa 100,000 ka aktibo nga Saksi ang tagsatagsa. Iglesia Katolika ang nagapangibabaw sa pila sining mga pungsod. Apang, tan-awa ang kahimtangan. Ang Brazil may mga 450,000 ka manugbantala sing maayong balita, kag kapin sa 1,200,000 ang nagtambong sa Memoryal sang kamatayon ni Cristo sang 1997. Ang Mexico isa pa ka halimbawa, nga may halos 500,000 ka Saksi kag kapin sa 1,600,000 ang nagsaulog sing Memoryal. Ang iban pa sang Katoliko nga mga pungsod amo ang Italya (mga 225,000 ang Saksi), Pransia (mga 125,000), Espanya (kapin sa 105,000), kag Argentina (kapin sa 115,000). Sa Estados Unidos, diin nagapangibabaw ang mga Protestante, mga Katoliko, kag Judiyong mga relihion, mga 975,000 ang mga Saksi kag kapin sa 2,000,000 ang nagtambong sa Memoryal. Sa pagkamatuod, ang dakung kadam-an nagaginuwa sa Babilonia nga Daku, ang bug-os kalibutan nga emperyo sang butig nga relihion, upod ang makalilibog nga mga panudlo sini kag nagaliso sa simple lamang kag pat-od nga mga saad sang Dios tuhoy sa “bag-ong mga langit kag bag-ong duta.”—2 Pedro 3:13; Isaias 2:3, 4; 65:17; Bugna 18:4, 5; 21:1-4.
Pagpasibu sa Kahimtangan sang mga Tawo
10. Paano nagbag-o ang mga kahimtangan sa pila ka duog?
10 Madamo sang mga nagliso kay Jehova paagi kay Cristo Jesus ang nasapwan sa pamalaybalay. (Juan 3:16; Binuhatan 20:20) Apang may iban pa nga mga metodo nga ginagamit. Nagbag-o na ang panahon, kag ang kahimtangan sang pangabuhi nagbudlay amo kon ngaa madamo nga kababayin-an karon ang nagatrabaho sa guwa sang balay. Sa masami, pila lamang ka tawo ang maabtan sa balay sa ordinaryo nga mga adlaw sang semana. Sa amo, nagpasibu ang mga Saksi ni Jehova sa kahimtangan. Kaangay ni Jesus kag sang unang mga disipulo, nagakadto sila kon diin kag kon san-o may mga tawo nga makita.—Mateo 5:1, 2; 9:35; Marcos 6:34; 10:1; Binuhatan 2:14; 17:16, 17.
11. Sa diin nagabantala karon ang mga Saksi ni Jehova, kag ano ang resulta?
11 Ang mga Saksi kinabubut-on nga nagapangita sing paagi kag mainandamon nga nagabantala sa mga tawo sa dalagku nga mga palarkingan, mga shopping mall, mga pabrika, mga opisina kag mga kumbuyahan, mga eskwelahan, mga estasyon sang pulisiya, mga gasolinahan, mga otel kag mga restawran, kag sa mga kalye. Sa kamatuoran, nagabantala sila kon diin may mga tawo nga makita. Kag kon ang mga tawo yara sa ila balay, ang mga Saksi padayon gihapon nga nagaduaw sa ila didto. Ining mapasibuon kag praktikal nga tikang nagresulta sa pagpahamtang sing mas madamo nga literatura sa Biblia. Nasapwan ang tulad-karnero nga mga tawo. Bag-o nga mga pagtuon sa Biblia ang nasugdan. Ang pinakadaku nga hilikuton sa pagtudlo sa maragtas sang tawo makugi nga ginahimo sang kapin sa lima ka milyon kag tunga ka boluntaryo nga mga ministro! Pribilehiyo mo bala nga isa ikaw sa ila?—2 Corinto 2:14-17; 3:5, 6.
Ano ang Nagapahulag sa mga Saksi ni Jehova?
12. (a) Paano ginatudluan ni Jehova ang iya katawhan? (b) Ano ang epekto sining pagtudlo?
12 Ano ang ginahimo sang langitnon nga organisasyon sa sini tanan? Si Isaias nagtagna: “Ang tanan mo nga anak mangin mga tawo nga gintudluan ni Jehova, kag ang paghidait sang imo mga anak mangin bugana.” (Isaias 54:13) Ginatudluan ni Jehova ining nahiusa nga paghiliutod sa bug-os nga kalibutan paagi sa iya kitaon nga organisasyon sa duta—sa mga Kingdom Hall, sa mga kombension, kag sa mga asambleya. Paghiusa kag paghidait ang resulta. Ang mga panudlo ni Jehova nagpatubas sing isa ka tumalagsahon nga katawhan, nga gintudluan sa paghigugmaanay sa isa kag isa kag sa ila isigkatawo subong sang ila kaugalingon, indi sa pagdumot sa ila mga isigkatawo, bisan diin man sila nagapuyo sa sining wala nagapakighiusa kag nabahinbahin nga kalibutan.—Mateo 22:36-40.
13. Paano naton mapat-od nga ginatuytuyan sang mga anghel ang pagbantala nga hilikuton?
13 Ang gugma amo ang nagapahulag sa mga Saksi ni Jehova nga magpadayon sa pagbantala walay sapayan sang dipagsapak ukon paghingabot. (1 Corinto 13:1-8) Nahibaluan nila nga ang ila nagaluwas kabuhi nga hilikuton ginatuytuyan sa langit, subong sang ginasiling sang Bugna 14:6. Ano ang mensahe nga ginabantala sa idalom sang pagtuytoy sang mga anghel? “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom, kag simbaha ninyo ang Isa nga naghimo sing langit kag duta, sing dagat kag sing mga tuburan sang tubig.” Ang pagbantala sing maayong balita sang Ginharian nagahimaya sang ngalan ni Jehova. Ginaagda ang mga tawo nga himayaon ang Manunuga, ang Dios, indi ang mga tinuga kag ang dimakatarunganon nga ebolusyon. Kag ngaa hilingagawon gid ang pagbantala nga hilikuton? Bangod nag-abot na ang oras sang paghukom—paghukom batok sa Babilonia nga Daku kag sa iban pa nga bahin sang kitaon nga sistema sang mga butang ni Satanas.—Bugna 14:7; 18:8-10.
14. Sin-o ang nadalahig sa sining daku nga kampanya sa pagpanudlo?
14 Wala sing dedikado nga Cristiano ang puwera sa sining pagbantala nga hilikuton. Ang espirituwal nga mga gulang nagapanguna sa pagbantala upod sa kongregasyon. Ang nahanas nga mga payunir masako gid sa hilikuton. Ang makugi nga mga manugbantala sing mensahe sang Ginharian, bisan pa pila lamang ukon madamo nga oras ang ginahinguyang nila sa pagbantala kada bulan, nagapalapnag sing mensahe sa bug-os nga duta.—Mateo 28:19, 20; Hebreo 13:7, 17.
15. Ano ang pamatuod sang epekto sang pagbantala sang mga Saksi ni Jehova?
15 May epekto bala sa kalibutan ining tanan nga panikasog? Ang isa ka simple nga pamatuod sini amo ang makapila nga pagguwa sang mga Saksi ni Jehova sa mga programa sa TV kag sa mga kolumna sang balita. Masami nga ginapadaku sini ang aton pagkamapinadayunon kag determinasyon nga malab-ot ang tanan. Huo, ang aton kakugi kag padayon nga pagduaw sa mga tawo may daku nga epekto, bisan pa kon ang kalabanan sa ila nagasikway sa mensahe kag sa mga mensahero!
Ang Aton Kakugi nga Tapuson ang Pagpanaksi
16. Anong panimuot ang dapat ipakita karon sa malip-ot na lang nga tion nga nabilin?
16 Wala naton mahibaluan ukon indi naton dapat mahibaluan kon daw ano na lang kalip-ot nga tion ang nabilin sa sining sistema sang mga butang basta putli ang aton motibo sa pag-alagad kay Jehova. (Mateo 24:36; 1 Corinto 13:1-3) Apang nahibaluan naton nga agod mangin dayag ang gugma, gahom, kag hustisya ni Jehova, dapat “anay” ibantala ang maayong balita. (Marcos 13:10) Busa, bisan pa daw ano kadamo nga tuig na nga ginahulat naton sing malangkagon ang katapusan sining malaut, dimakatarunganon, kag masingki nga kalibutan, dapat naton tumanon sing makugi ang aton dedikasyon nahisanto sa aton kahimtangan. Ayhan tigulang na kita ukon nagabalatian, apang mahimo gihapon kita makaalagad kay Jehova sing subong kakugi sang batan-on ukon mapagros pa kita. Ayhan ang tion nga ginahinguyang naton sa ministeryo indi na subong kadamo sang una, apang pat-od gid nga mahuptan gihapon naton ang kalidad sang aton halad nga pagdayaw kay Jehova.—Hebreo 13:15.
17. Mag-asoy sing makapalig-on nga eksperiensia nga mahimo makabulig sa aton tanan.
17 Busa, bata man ukon tigulang, mangin makugi kita kag ipaambit sa tanan nga masugata naton ang aton positibo nga mensahe tuhoy sa bag-ong kalibutan. Ilugon naton ang mahuluy-on nga siete-anyos nga bata nga babayi sa Australia nga nag-upod sa iya iloy sa balaligyaan. Nabatian niya sa Kingdom Hall kon daw ano ka importante nga dapat magbantala ang tanan, gani nagsulod sia sing duha ka brosyur sa Biblia sa iya bag. Samtang masako ang iya iloy sa pagbilid sing mga balaklon, nadula ang bata nga babayi. Sang ginpangita sia sang iya iloy, nakita sia nga nagatanyag sing brosyur sa isa ka babayi! Nagpalapit ang iloy agod mangayo sing pasaylo kon nagsinabad man ang iya anak. Apang may kaayo nga ginbaton sang babayi ang brosyur. Sang sila na lang liwat, ginpamangkot sang iloy ang iya anak kon paano sia nakatigayon sing kaisog nga magpalapit sa isa ka dumuluong. “Nagsiling lang ako sa akon kaugalingon, Ready, Set, Go! Kag dayon naglakat ako!”
18. Paano kita makapakita sing dalayawon nga espiritu?
18 Kinahanglan naton tanan ang espiritu nga ginpakita sadtong taga-Australia nga bata nga babayi, labi na agod makapalapit kita sa mga dumuluong ukon bisan gani sa mga opisyal nga dala ang maayong balita. Ayhan nahadlok kita nga basi sikwayon kita. Indi naton dapat kalipatan ang ginsiling ni Jesus: “Indi kamo magpalibog kon paano ukon kon ano ang inyo ihambal subong pagpangapin ukon kon ano ang inyo isiling; kay ang balaan nga espiritu magatudlo sa inyo sa sina gid nga oras sing mga butang nga dapat ninyo isiling.”—Lucas 12:11, 12.
19. Paano mo ginatamod ang imo ministeryo?
19 Gani magsalig sa bulig sang espiritu sang Dios samtang nagapalapit kamo sa mga tawo sa isa ka matinahuron nga paagi nga dala ang maayong balita. Minilyon ang nagapakita sing pagsalig sa masami ditakus nga mga lalaki kag mga babayi nga yari karon kag buwas wala na. Dapat kita magsalig kay Jehova kag sa iya langitnon nga organisasyon—kay Cristo Jesus, sa balaan nga mga anghel, kag sa ginbanhaw nga hinaplas nga mga Cristiano—nga buhi sing dayon! Busa, dumduma ini: “Ang mga nagaupod sa aton madamo pa sa mga nagaupod sa ila”!—2 Hari 6:16.
[Footnote]
a Para sa dugang pa nga mga huwaran, tan-awa ang 1994 Yearbook of Jehovah’s Witnesses, pahina 217-20.
Paano Mo Sabton?
◻ Ano ang nangin papel sang langitnon nga organisasyon sang Dios sa paglampuwas sang katawhan ni Jehova?
◻ Anong politikal kag relihioso nga mga grupo ang nagsalakay sa mga Saksi ni Jehova sang ika-20 nga siglo?
◻ Paano ginpasibu sang mga Saksi ni Jehova ang ila ministeryo suno sa mga kahimtangan sang tion?
◻ Ano ang nagapahulag sa imo sa pagbantala?
[Retrato sa pahina 17]
Henryka Żur
Japan
Martinique
Estados Unidos
Kenya
Estados Unidos
Ang mga Saksi ni Jehova nagabantala kon bisan diin kag kon san-o may mga tawo nga makita
[Retrato sa pahina 20]
Sang maaga nga bahin sini nga siglo, gingamit ang mga ponograpo sa pagpalapnag sing mensahe sang Ginharian