Ibayaw ang Mainunungon nga mga Kamot sa Pangamuyo
“Luyag ko nga sa tagsa ka duog ang mga lalaki magpadayon sa pagpangamuyo, nga ginabayaw ang mainunungon nga mga kamot, nga nahamulag sa kaakig kag mga binais.”—1 TIMOTEO 2:8.
1, 2. (a) Paano ang 1 Timoteo 2:8 maaplikar sa pangamuyo may kaangtanan sa katawhan ni Jehova? (b) Ano karon ang binagbinagon naton?
SI Jehova nagapaabot nga ang iya katawhan magmainunungon sa iya kag sa isa kag isa. Gin-angot ni apostol Pablo ang pagkamainunungon sa pangamuyo sang nagsulat sia: “Luyag ko nga sa tagsa ka duog ang mga lalaki magpadayon sa pagpangamuyo, nga ginabayaw ang mainunungon nga mga kamot, nga nahamulag sa kaakig kag mga binais.” (1 Timoteo 2:8) Maathag nga ginpatuhuyan ni Pablo ang dayag nga pagpangamuyo “sa tagsa ka duog” diin nagtipon sing tingob ang mga Cristiano. Sin-o ang nagtiglawas sa katawhan sang Dios sa pangamuyo sa mga miting sang kongregasyon? Ang balaan, matarong, matinahuron lamang nga mga lalaki nga nagatuman sing mahalungon sang tanan nga Makasulatanhon nga katungdanan sa Dios. (Manugwali 12:13, 14) Dapat sila nga matinlo sa espirituwal kag sa moral kag wala duhaduha nga debotado kay Jehova nga Dios.
2 Ang mga gulang sang kongregasyon ilabi na nga ‘nagabayaw sing mainunungon nga mga kamot sa pangamuyo.’ Ang ila tinagipusuon nga mga pangamuyo paagi kay Jesucristo nagapakita sing pag-unong sa Dios kag nagabulig sa ila sa paglikaw sa mga binais kag mga pagsilabo sa kaakig. Sa pagkamatuod, ang bisan sin-o nga lalaki nga may pribilehiyo sa pagtiglawas sa Cristianong kongregasyon sa dayag nga pangamuyo dapat nga hilway sa kasingkal, malain nga buot, kag pagkadimainunungon kay Jehova kag sa iya organisasyon. (Santiago 1:19, 20) Ano ang dugang pa nga mga sulundan sa Biblia para sa mga may pribilehiyo sa pagtiglawas sa iban sa dayag nga pangamuyo? Kag ano ang pila ka Makasulatanhon nga mga prinsipio nga dapat naton iaplikar sa aton pribado kag pangpamilya nga mga pangamuyo?
Hunahunaa sing Abanse ang Pangamuyo
3, 4. (a) Ngaa mapuslanon nga hunahunaon sing una ang dayag nga pangamuyo? (b) Ano ang ginapakita sang Kasulatan nahanungod sa kalawigon sang mga pangamuyo?
3 Kon ginpangabay kita sa pagpangamuyo sing dayag, ayhan mahunahuna naton sing abanse ang aton pangamuyo. Magabulig ini sa aton nga matuptupan ang nagakaigo importante nga mga butang nga wala nagakinahanglan sing malawig kag wala sing pasingadtuan nga pangamuyo. Sa pagkamatuod, ang aton pribado nga mga pangamuyo sarang man mapabutyag sing mabaskog. Mahimo ini may lainlain nga kalawigon. Si Jesus nangamuyo sa bug-os nga gab-i antes niya ginpili ang iya 12 ka apostoles. Apang, sang ginsugdan niya ang Memoryal sang iya kamatayon, ang iya mga pangamuyo para sa tinapay kag alak malip-ot lamang. (Marcos 14:22-24; Lucas 6:12-16) Kag nakahibalo kita nga bisan ang malip-ot nga mga pangamuyo ni Jesus kalahamut-an sing bug-os sa Dios.
4 Pananglitan may pribilehiyo kita nga itiglawas ang pamilya sa pangamuyo antes sang pagkaon. Ini nga pangamuyo mahimo nga malip-ot lamang—apang ang bisan ano man nga ginasiling dapat maglakip sing pagpasalamat para sa pagkaon. Kon nagapangamuyo kita sing dayag sa umpisa ukon pagkatapos sang Cristianong miting, indi kinahanglan nga magdulot kita sing malawig nga pangamuyo nga nagatuptop sing madamo nga punto. Ginmulay ni Jesus ang mga escriba nga ‘sa pamalibad naghimo sing malawig nga mga pangamuyo.’ (Lucas 20:46, 47) Indi gid luyag sang diosnon nga tawo nga himuon ina. Apang, kon kaisa, ang malawiglawig nga pangamuyo sa publiko mahimo nga nagakaigo. Halimbawa, dapat hunahunaon sing una sang isa ka gulang nga ginpili sa paghatag sing katapusan nga pangamuyo sa asambleya ang tuhoy sini kag mahimo sambiton ang pila ka punto. Apang, bisan ini nga pangamuyo indi dapat mangin sobra kalawig.
Magpalapit sa Dios sing Matinahuron
5. (a) Ano ang dapat naton dumdumon kon nagapangamuyo sing dayag? (b) Ngaa dapat magpangamuyo sa isa ka dungganon kag matinahuron nga paagi?
5 Kon nagapangamuyo sing dayag dapat naton dumdumon nga wala kita nagapakighambal sa mga tawo. Sa baylo, makasasala kita nga mga tinuga nga nagapakitluoy sa Soberanong Ginuo nga Jehova. (Salmo 8:3-5, 9; 73:28) Busa dapat kita magpakita sing matinahuron nga kahadlok nga indi sia mahamuot sa kon ano ang aton ginasiling kag kon paano naton ini ginapabutyag. (Hulubaton 1:7) Si salmista David nag-amba: “Tuhoy sa akon, sa kabugana sang imo mahigugmaon nga kaayo magasulod ako sa imo balay, magayaub ako sa imo balaan nga templo sa kahadlok sa imo.” (Salmo 5:7) Kon may amo kita sina nga panimuot, paano naton ipabutyag ang aton kaugalingon kon ginpangabay sa pagpangamuyo sing dayag sa miting sang mga Saksi ni Jehova? Ti, kon nagapakighambal kita sa isa ka tawhanon nga hari, mahimo nga himuon naton ini sing matinahuron kag sing may pagkadungganon. Indi bala dapat nga ang aton mga pangamuyo mangin labi pa ka dungganon kag matinahuron, kay nagapangamuyo kita kay Jehova, ang “Hari sang walay katubtuban”? (Bugna 15:3) Gani kon nagapangamuyo dapat naton likawan ang mga pinamulong subong sang, “Maayo nga aga, Jehova,” “Ginapadala namon sa imo ang amon gugma,” ukon “Paalam na.” Ginapakita sang Kasulatan nga ang bugtong nga Anak sang Dios, si Jesucristo, wala makighambal sa iya langitnon nga Amay sa sina nga paagi.
6. Ano ang dapat naton dumdumon kon ‘nagapalapit sa trono sang dibagay nga kaayo’?
6 Si Pablo nagsiling: “Magpalapit kita nga may kahilwayan sa paghambal sa trono sang dibagay nga kaayo.” (Hebreo 4:16) Makapalapit kita kay Jehova nga may “kahilwayan sa paghambal” walay sapayan sang aton makasasala nga kahimtangan bangod sang aton pagtuo sa halad nga gawad ni Jesucristo. (Binuhatan 10:42, 43; 20:20, 21) Apang, ining “kahilwayan sa paghambal” wala nagakahulugan nga nagapakighambal kita sing dipormal sa Dios; ukon mahambal naton ang dimatinahuron nga mga butang sa iya. Agod ang aton dayag nga mga pangamuyo mangin kalahamut-an kay Jehova, dapat ini idulot nga may nagakaigo nga pagtahod kag dignidad, kag indi nagakaigo nga gamiton ini sa paghatag sing mga pahibalo, sa paglaygay sa mga indibiduwal, ukon sa pagsabdong sa isa ka tumalambong.
Magpangamuyo nga May Mapainubuson nga Espiritu
7. Paano ginpakita ni Solomon ang pagkamapainubuson sang nangamuyo sa dedikasyon sang templo ni Jehova?
7 Nagapangamuyo man kita sing dayag ukon sing pribado, ang importante nga prinsipio sa Kasulatan nga pirme dumdumon amo nga dapat kita magpakita sing mapainubuson nga panimuot sa aton mga pangamuyo. (2 Cronica 7:13, 14) Ginpakita ni Hari Solomon ang pagkamapainubuson sa iya dayag nga pangamuyo sang gindedikar ang templo ni Jehova sa Jerusalem. Bag-o lang natapos ni Solomon ang isa sang pinakamatahom nga mga tinukod sa duta. Apang, mapainubuson sia nga nangamuyo: “Matuod gid bala nga ang Dios magapuyo sa duta? Yari karon! Ang mga langit, huo, ang langit sang mga langit indi makaigo sa imo; daw ano pa gid ka diutay, nian, ining balay nga akon ginpatindog!”—1 Hari 8:27.
8. Ano ang pila ka paagi nga ang pagkamapainubuson makita sa dayag nga pangamuyo?
8 Kaangay ni Solomon, dapat kita magmapainubuson kon nagatiglawas sa iban sa dayag nga pangamuyo. Bisan pa nga dapat naton likawan ang pagpakunokuno nga balaan, ang pagkamapainubuson sarang mapakita paagi sa aton tono sang tingog. Ang mapainubuson nga mga pangamuyo indi pakitakita lamang ukon pakunokuno lamang. Ginapatalupangod sini, indi ang nagapangamuyo, kundi ang Isa nga ginapangamuyuan. (Mateo 6:5) Ang pagkamapainubuson mapakita man paagi sa kon ano ang aton ginasiling sa pangamuyo. Kon nagapangamuyo kita sing mapainubuson, indi kita magadikta sa Dios nga himuon ang mga bagay sa aton paagi. Sa baylo, magapakitluoy kita kay Jehova sa pagpanghikot sa paagi nga nagahisanto sa iya sagrado nga kabubut-on. Ginpakita sang salmista ang nagakaigo nga panimuot sang nagpangabay sia: “O Jehova, luwasa kami, palihug! O Jehova, hatagi kami sing kadalag-an, palihug!”—Salmo 118:25; Lucas 18:9-14.
Magpangamuyo sing Tinagipusuon
9. Anong maayo nga laygay nga ginhatag ni Jesus ang makita sa Mateo 6:7, kag paano ini maaplikar?
9 Agod ang aton dayag ukon pribado nga mga pangamuyo mangin kalahamut-an kay Jehova, dapat ini maggikan sa tagipusuon. Sa amo, indi lamang naton sulitsuliton ang isa ka pangamuyo nga wala ginahunahuna kon ano ang aton ginahambal. Sa iya Sermon sa Bukid, si Jesus naglaygay: “Kon ikaw mangamuyo, indi pagsulitsulita ang amo gihapon nga butang, subong sa ginahimo sang katawhan sang mga pungsod, kay naghunahuna sila [sing sayop] nga pamatian sila tungod sa paggamit nila sing madamong tinaga.” Sa iban nga hambal, si Jesus nagsiling: “Indi maglamada; indi maghambal sing wala pulos nga mga pagsulitsulit.”—Mateo 6:7; footnote.
10. Ngaa nagakaigo nga ipangamuyo ang isa ka butang sing kapin sa makaisa lamang?
10 Sa pagkamatuod, ayhan kinahanglan naton nga ipangamuyo sing sulitsulit ang isa ka butang. Indi ina sala kay si Jesus naglaygay: “Padayon sa pagpangayo, kag ihatag ini sa inyo; padayon sa pagpangita, kag inyo makita; padayon sa pagpanuktok, kag buksan ini sa inyo.” (Mateo 7:7) Ayhan ginakinahanglan ang bag-o nga Kingdom Hall bangod ginapauswag ni Jehova ang lokal nga hilikuton sa pagbantala. (Isaias 60:22) Nagakaigo nga pirme sambiton ini nga kinahanglanon kon nagapangamuyo sing pribado ukon kon nagadulot sing dayag nga mga pangamuyo sa mga miting sang katawhan ni Jehova. Ang paghimo sini wala nagakahulugan nga ‘nagahambal kita sing wala pulos nga mga pagsulitsulit.’
Dumduma ang Pagpasalamat kag Pagdayaw
11. Paano ang Filipos 4:6, 7 maaplikar sa pribado kag dayag nga pangamuyo?
11 Madamo nga tawo ang nagapangamuyo kon may pangayuon lamang, apang ang aton gugma kay Jehova nga Dios dapat magpahulag sa aton nga pasalamatan kag dayawon sia sa pribado kag dayag nga pangamuyo. “Dili kamo magkabalaka sa bisan ano nga butang,” sulat ni Pablo, “kundi sa tagsa ka butang paagi sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magatipig sang inyo mga tagipusuon kag sang inyo mga painoino sa kalalangan ni Cristo Jesus.” (Filipos 4:6, 7) Huo, dugang sa mga pag-ampo kag mga pangabay, dapat kita magpasalamat kay Jehova tungod sa espirituwal kag materyal nga mga kabulahanan. (Hulubaton 10:22) Ang salmista nag-amba: “Magdulot sing pasalamat subong imo halad sa Dios, kag magbayad sa Labing Mataas sang imo mga panaad.” (Salmo 50:14) Kag ang mapangamuyuon nga ambahanon ni David naglakip sining makatalandog nga pinamulong: “Dayawon ko ang ngalan sang Dios nga may ambahanon, kag padakuon ko sia nga may pagdayaw.” (Salmo 69:30) Indi bala naton dapat himuon ini man sa dayag kag pribado nga pangamuyo?
12. Paano nagakatuman karon ang Salmo 100:4, 5, kag busa tungod sa ano kita makapasalamat kag makadayaw sa Dios?
12 Nahanungod sa Dios, ang salmista nag-amba: “Magsulod sa iya mga gawang nga may pagpasalamat, sa iya mga luwang nga may pagdayaw. Magpasalamat sa iya, pakamaayuhon ang iya ngalan. Kay si Jehova maayo; ang iya mahigugmaon nga kaayo tubtob sa tion nga wala pat-od, kag ang iya pagkatutom sa tanan nga kaliwatan.” (Salmo 100:4, 5) Sa karon, ang katawhan sang tanan nga pungsod nagasulod sa mga luwang sang santuaryo ni Jehova, kag tungod sini makadayaw kag makapasalamat kita sa iya. Ginapabutyag mo bala sa Dios ang imo pagpasalamat tungod sa lokal nga Kingdom Hall kag ginapakita ang imo pagpasalamat paagi sa pagtipon didto sing tayuyon upod sa mga nagahigugma sa iya? Samtang nagatipon didto, tinagipusuon bala nga ginabayaw mo ang imo tingog sa mga ambahanon sang pagdayaw kag pagpasalamat sa aton mahigugmaon nga langitnon nga Amay?
Indi Gid Magkahuya sa Pagpangamuyo
13. Anong Makasulatanhon nga halimbawa ang nagapakita nga dapat kita mag-ampo kay Jehova bisan pa nga daw ditakus kita bangod sang balatyagon nga nakasala?
13 Bisan pa nga daw indi kita takus bangod sang balatyagon nga nakasala, dapat kita magdangop sa Dios sa hanuot nga pag-ampo. Sang ang mga Judiyo nagpakasala paagi sa pagkuha sing dumuluong nga mga asawa, si Esdras nagluhod, naghumlad sang iya mainunungon nga mga palad sa Dios, kag mapainubuson nga nangamuyo: “O Dios ko, nahuya ako sa pagbayaw sang akon nawong sa imo, O Dios ko, kay ang amon kalautan nagdugang sa ibabaw sang amon ulo kag ang amon pagkamakasasala nagtaas tubtob sa mga langit. Kutob sa kaadlawan sang amon mga ginikanan nagpakasala kami sing lakas tubtob sini nga adlaw . . . Kag sa tapos sang tanan nga nag-abot sa amon tungod sang amon malaut nga mga buhat kag tungod sang amon daku nga pagpakasala—kay ikaw mismo, O amon Dios, nagpakadiutay sang amon sala, kag ginhatag mo sa amon ang mga nakapalagyo subong sini—magalalis bala kami liwat sang imo mga sugo kag magaminyo sa katawhan nga nagahimo sini nga mga kangil-aran? Indi ka bala maakig sa amon tubtob nga mapapas mo kami agod nga wala na sing mabilin ukon wala na sing makapalagyo? O Jehova nga Dios sang Israel, matarong ka, kay kami ang salin nga nabilin subong katawhan nga nakapalagyo subong sang sa sini nga adlaw. Yari kami sa atubangan nimo sa amon pagkamakasasala, kay wala sing bisan sin-o nga makatindog sa imo atubangan bangod sini.”—Esdras 9:1-15; Deuteronomio 7:3, 4.
14. Subong sang ginpakita sang kaadlawan ni Esdras, ano ang ginakinahanglan agod mabaton ang pagpatawad sang Dios?
14 Agod mabaton ang pagpatawad sang Dios, ang pagtu-ad sa iya dapat updan sing paghinulsol kag sing “mga bunga nga nagakaigo sa paghinulsol.” (Lucas 3:8; Job 42:1-6; Isaias 66:2) Sang kaadlawan ni Esdras, ang mahinulsulon nga panimuot gin-updan sing panikasog nga tadlungon ang sayop paagi sa pagsikway sa dumuluong nga mga asawa. (Esdras 10:44; ipaanggid ang 2 Corinto 7:8-13.) Kon nagapangayo kita sing patawad sa Dios tungod sa malubha nga sala, magtu-ad kita sa mapainubuson nga pangamuyo kag magpatubas sing mga bunga nga nagakaigo sa paghinulsol. Ang mahinulsulon nga espiritu kag ang handum nga tadlungon ang sayop magapahulag man sa aton nga pangayuon ang espirituwal nga bulig sang Cristianong mga gulang.—Santiago 5:13-15.
Magkuha sing Lugpay Gikan sa Pangamuyo
15. Paano ang eksperiensia ni Ana nagapakita nga makasapo kita sing lugpay sa pangamuyo?
15 Kon nagasakit ang aton tagipusuon tungod sa pila ka rason, ang pangamuyo magalugpay sa aton. (Salmo 51:17; Hulubaton 15:13) Ginhimo ini sang mainunungon nga si Ana. Nagkabuhi sia sang ang dalagku nga mga pamilya kinaandan sa Israel, apang wala sia sing anak. Ang iya bana, si Elcana, may mga anak nga lalaki kag babayi sa iya liwan nga asawa, si Penina, nga nagtamay kay Ana bangod sang iya pagkabaw-as. Si Ana nangamuyo sing hanuot kag nagsaad nga kon pakamaayuhon sia sing isa ka anak nga lalaki, ‘ihatag niya sia kay Jehova sa tanan nga inadlaw sang iya kabuhi.’ Nalugpayan bangod sang iya pangamuyo kag bangod sang mga pinamulong sang Mataas nga Saserdote nga si Eli, si Ana ‘wala na magkasubo.’ Nag-anak sia sing lalaki nga ginhingalanan niya nga Samuel. Sang ulihi, gintugyan niya sia sa pag-alagad sa santuaryo ni Jehova. (1 Samuel 1:9-28) Nagapasalamat sa kaayo sang Dios sa iya, nagdulot sia sing pangamuyo sang pagpasalamat—isa nga nagdayaw kay Jehova subong isa nga wala sing tupong. (1 Samuel 2:1-10) Kaangay ni Ana, makakuha kita sing lugpay gikan sa pangamuyo, nagasalig nga ginasabat sang Dios ang tanan nga pangabay nga nahisanto sa iya kabubut-on. Kon ginabubo naton ang aton tagipusuon sa iya, ‘indi na [kita] magakasubo,’ kay kuhaon niya ang aton lulan ukon buligan kita nga makabatas.—Salmo 55:22.
16. Subong sang ginpakita sa natabo kay Jacob, ngaa dapat kita mangamuyo kon ginahadlukan ukon nagakabalaka?
16 Kon ang isa ka kahimtangan nagatuga sing kahadlok, kasakit sa tagipusuon, ukon kabalaka, magpangayo kita sing lugpay sa Dios sa pangamuyo. (Salmo 55:1-4) Si Jacob hinadlukan sang buot sia nga magsugata sa iya mabinatukon nga utod, si Esau. Apang, si Jacob nangamuyo: “O Dios sang akon amay nga si Abraham kag Dios sang akon amay nga si Isaac, O Jehova, ikaw nga nagsiling sa akon, ‘Balik ka sa imo duta kag sa imo kahimataan kag ako magahimo sa imo sing maayo,’ indi ako takus sang kubos gid sang tanan nga mahigugmaon nga kaayo kag sang tanan nga pagkatutom nga imo ginpakita sa imo alagad, kay upod sa akon sungkod lamang nagtabok ako sa sining Jordan kag karon nagduha na ako ka kampo. Luwasa ako, ginaampo ko sa imo, gikan sa kamot sang akon utod, gikan sa kamot ni Esau, kay nahadlok ako sa iya basi mag-abot sia kag salakayon ako, ang mga iloy kaupod sang kabataan. Kag ikaw, ikaw nagsiling, ‘Wala duhaduha nga ako magahimo sa imo sing maayo kag magahimo sang imo mga kaliwatan subong sang balas sang dagat, nga indi sarang maisip bangod sang kadamuon.’” (Genesis 32:9-12) Wala pagsalakaya ni Esau si Jacob kag ang iya kaupdanan. Busa si Jehova “maayo” kay Jacob sadto nga okasyon.
17. Nahisuno sa Salmo 119:52, paano ang pangamuyo mahimo nga makahatag sa aton sing lugpay kon ginatilawan kita sing daku?
17 Sa aton mga pag-ampo, mahimo kita malugpayan paagi sa pagdumdom sa mga butang nga ginsiling sa Pulong sang Dios. Sa pinakamalawig nga salmo—isa ka matahom nga pangamuyo nga ginbutangan sing lanton—mahimo nga si Prinsipe Ezequias ang nag-amba: “Gindumdom ko ang imo hudisyal nga mga desisyon kutob sa tion nga wala sing pat-od, O Jehova, kag nakasapo ako sing lugpay para sa akon kaugalingon.” (Salmo 119:52) Sa mapainubuson nga pagpangamuyo kon ginatilawan kita sing daku, mahimo naton madumduman ang isa ka prinsipio ukon kasuguan sa Biblia nga nagabulig sa aton nga makalakat sa dalanon nga nagaresulta sa makalulugpay nga pasalig nga ginapahamut-an naton ang aton langitnon nga Amay.
Ang mga Mainunungon Nagapadayon sa Pagpangamuyo
18. Ngaa masiling nga ‘ang tagsa ka mainunungon magapangamuyo sa Dios’?
18 Ang tanan nga mainunungon kay Jehova nga Dios “magapadayon sa pagpangamuyo.” (Roma 12:12) Sa ika-32 nga Salmo, ayhan ginkomposo pagkatapos nagpakasala si David upod kay Bat-seba, ginlaragway niya ang iya kalisdanan tungod nga wala makapangayo sing patawad kag ang paumpaw nga nahatag sa iya sang paghinulsol kag pagtu-ad sa Dios. Nian si David nag-amba: “Tungod sini [bangod ang patawad ni Jehova matigayon sang tunay nga mga mahinulsulon] magpangamuyo sa imo ang kada isa nga mainunungon sa tion nga ikaw makita lamang.”—Salmo 32:6.
19. Ngaa dapat naton bayawon ang mainunungon nga mga kamot sa pangamuyo?
19 Kon ginapakabahandi naton ang aton kaangtanan kay Jehova nga Dios, magapangabay kita sang iya kaluoy paagi sa pangamuyo sa sadsaran sang halad nga gawad ni Jesus. Sa pagtuo, makapalapit kita sa trono sang dibagay nga kaayo nga may kahilwayan sa paghambal agod matigayon ang kaluoy kag ang suno-sa-tion nga bulig. (Hebreo 4:16) Apang tuman gid kadamo ang rason para sa pangamuyo! Busa ‘magpangamuyo [kita] sing wala untat’—sa masami nga may pinamulong sang tinagipusuon nga pagdayaw kag pagpasalamat sa Dios. (1 Tesalonica 5:17) Sa adlaw kag gab-i, bayawon naton ang mainunungon nga mga kamot sa pangamuyo.
Paano Mo Sabton?
◻ Ano ang kapuslanan sang paghunahuna sing una sang dayag nga pangamuyo?
◻ Ngaa dapat kita mangamuyo sa matinahuron kag dungganon nga paagi?
◻ Ano nga espiritu ang dapat naton ipakita kon nagapangamuyo?
◻ Kon nagapangamuyo, ngaa dapat naton dumdumon ang magpasalamat kag magdayaw?
◻ Paano ginapakita sang Biblia nga makakuha kita sing lugpay gikan sa pangamuyo?
[Retrato sa pahina 17]
Si Hari Solomon nagpakita sing pagkamapainubuson sa iya dayag nga pangamuyo sang gindedikar ang templo ni Jehova
[Retrato sa pahina 18]
Kaangay ni Ana, makakuha ka sing lugpay gikan sa pangamuyo