“Ang Templo” kag “ang Pangulo” Karon

“Tuhoy sa pangulo sa tunga nila, kon magsulod sila, magasulod sia; kag kon magguwa sila, magaguwa sia.”—EZEQUIEL 46:10.

1, 2. Anong importante nga kamatuoran ang nagabulig sa aton nga mahangpan ang madamo nga kahulugan sang palanan-awon ni Ezequiel tuhoy sa templo?

ANG pila ka dumaan nga mga rabbi anay indi kontento sing bug-os sa tulun-an sang Ezequiel. Suno sa Talmud, ginhunahuna pa gani sang iban sa ila nga indi pag-ilakip ang tulun-an sa kanon sang Balaan nga Kasulatan. Ginbudlayan gid sila sa paghangop sa palanan-awon tuhoy sa templo kag ginkabig nila ini nga indi mahangpan sang tawo. Ang iban nga mga iskolar sa Biblia ginligban sa palanan-awon ni Ezequiel tuhoy sa templo ni Jehova. Kamusta naman kita?

² Kutob sang ginpasag-uli ang putli nga pagsimba, ginpakamaayo ni Jehova ang iya katawhan sing madamo nga silak sang espirituwal nga kasanagan, lakip ang paghangop kon ano ang espirituwal nga templo sang Dios—ang tulad-templo nga kahimusan ni Jehova para sa putli nga pagsimba.a Ining importante nga kamatuoran nagabulig sa aton nga mahangpan ang kahulugan sang palanan-awon ni Ezequiel tuhoy sa templo. Binagbinagon naton sing maayo ang apat ka bahin sining palanan-awon—ang templo, ang mga saserdote, ang pangulo, kag ang duta. Ano ang kahulugan sining mga butang karon?

Ang Templo kag Ikaw

3. Ano ang natun-an naton tuhoy sa mataas nga kisame kag sa mga tinigib sa dingding sa alagyan padulong sa templo?

³ Handurawa nga ginalibot naton ining templo sa palanan-awon. Nakalab-ot kita kag nagsaka sa pito ka halintang pakadto sa isa sang daku nga mga gawang. Sa sulod sining alagyan, nagtangla kita kag nahayanghag. Kapin sa 30 metros ang kataason sang kisame! Busa ginpahanumdom kita nga ang mga talaksan sang pagsulod sa kahimusan ni Jehova sa pagsimba tuman kataas. Ang mga silak sang kasanag halin sa mga bintana nagapasanag sa mga tinigib nga mga palma sa dingding, nga gingamit sang Kasulatan sa paglaragway sang pagkamatarong. (Salmo 92:12; Ezequiel 40:14, 16, 22) Ining sagrado nga duog para sa sadtong matarong sa moral kag sa espirituwal. Nahisuno sina, luyag naton magpabilin nga matarong agod mangin kalahamut-an ang aton pagsimba kay Jehova.—Salmo 11:7.

4. Sin-o ang wala ginpasulod sa templo, kag ano ang ginatudlo sini sa aton?

⁴ Sa magtimbang nga kilid sang alagyan, may yara tatlo ka hulot sang mga bantay. Pasudlon bala kita sang mga bantay? Ginsilingan ni Jehova si Ezequiel nga walay dumuluong nga “dituli sa tagipusuon” ang mahimo makasulod. (Ezequiel 40:10; 44:9) Ano ang buot silingon sina? Ginabaton sang Dios subong mga sumilimba yadtong nagahigugma lamang sa iya mga kasuguan kag nagaaplikar sini. (Jeremias 4:4; Roma 2:29) Ginaabiabi niya ining mga tawo sa iya espirituwal nga tolda, ang iya balay sang pagsimba. (Salmo 15:1-5) Kutob sang ginpasag-uli ang putli nga pagsimba sang 1919, ang dutan-on nga organisasyon ni Jehova padayon nga nagapaathag kag nagasakdag sang iya mga kasuguan sa moral. Yadtong hungod nga wala nagtuman wala na gin-abiabi sa pagpakig-upod sa iya katawhan. Sa karon, ang pasad sa Biblia nga buhat sang pagsikway sa dimahinulsulon nga mga makasasala nagahupot sa aton pagsimba nga matinlo kag putli.—1 Corinto 5:13.

5. (a) Ano ang kaanggid sa ulot sang palanan-awon ni Ezequiel kag sang palanan-awon ni Juan nga narekord sa Bugna 7:9-15? (b) Sa palanan-awon ni Ezequiel, sin-o ang ginalaragway sang 12 ka tribo nga nagasimba sa naguwa nga luwang?

⁵ Ang alagyan bukas padulong sa naguwa nga luwang diin nagasimba kag nagadayaw ang mga tawo kay Jehova. Ginapahanumdom sini sa aton ang palanan-awon ni apostol Juan tuhoy sa “dakung kadam-an” nga nagasimba kay Jehova “sa adlaw kag gab-i sa iya templo.” Ang mga palma ginalaragway sa sining duha ka palanan-awon. Sa palanan-awon ni Ezequiel nadekorar ini sa mga dingding sang alagyan. Sa palanan-awon ni Juan ang mga sumilimba may mga paklang sang palma sa ila mga kamot, nga nagasimbulo sang ila kalipay sa pagdayaw kay Jehova kag pag-abiabi kay Jesus subong ila Hari. (Bugna 7:9-15) Sa konteksto sang palanan-awon ni Ezequiel, ang 12 ka tribo sang Israel nagalaragway sa “iban nga mga karnero.” (Juan 10:16; ipaanggid ang Lucas 22:28-30.) Isa ka man bala sa sadtong malipayon nga nagadayaw kay Jehova paagi sa pagbantala sang iya Ginharian?

6. Ano ang katuyuan sang mga hulot kalan-an sa naguwa nga luwang, kag anong pribilehiyo ang mahimo nga ginapahanumdom sini sa iban nga mga karnero?

⁶ Samtang ginalibot naton ang naguwa nga luwang, makit-an naton ang 30 ka hulot-kalan-an diin nagaambit ang mga tawo sa ila boluntaryo nga mga dulot. (Ezequiel 40:17) Sa karon, ang mga katapo sang iban nga mga karnero wala nagadulot sing mga halad nga sapat, apang wala sila nagakadto nga wala sing dala sa espirituwal nga templo. (Ipaanggid ang Exodo 23:15.) Si apostol Pablo nagsulat: “Paagi kay [Jesus] magdulot kita pirme sa Dios sing halad sang pagdayaw, nga amo, ang bunga sang aton mga bibig nga nagapahayag sang iya ngalan. Dugang pa, dili malimot sa paghimo sing maayo kag sa pagpaambit sing mga butang sa iban, kay sa amo nga mga halad nahamuot gid ang Dios.” (Hebreo 13:15, 16; Oseas 14:2) Isa gid ka daku nga pribilehiyo ang magdulot kay Jehova sing amo nga sahi sang mga halad.—Hulubaton 3:9, 27.

7. Ano ang ginapasalig sa aton sang pagtakus sa templo?

⁷ Si Ezequiel nagatan-aw samtang ginatakus sang anghel ining templo sa palanan-awon. (Ezequiel 40:3) Sing kaanggid, si apostol Juan ginsugo: “Tindog ka kag taksa ang templo sang Dios kag ang halaran kag ang mga nagasimba didto.” (Bugna 11:1) Ano ang kahulugan sining pagtakus? Sa sining duha ka kahimtangan isa ini ka garantiya, isa ka tanda nga wala sing makapugong kay Jehova sa pagtuman sang iya mga katuyuan tuhoy sa putli nga pagsimba. Sing kaanggid karon, makasalig kita nga wala sing bisan ano—bisan ang mapintas pa nga pagpamatok sang gamhanan nga mga gobierno—ang makapugong sa pagpasag-uli sang putli nga pagsimba.

8. Sin-o ang nagasulod sa mga gawang padulong sa nasulod nga luwang, kag ano ang ginapahanumdom sa aton sini nga mga gawang?

⁸ Samtang nagatabok kita sa naguwa nga luwang, makit-an naton ang tatlo ka gawang padulong sa nasulod nga luwang; nagakubay ang nasulod nga mga gawang kag pareho kadaku sang naguwa nga mga gawang. (Ezequiel 40:6, 20, 23, 24, 27) Mga saserdote lamang ang makasulod sa nasulod nga luwang. Ang nasulod nga mga gawang nagapahanumdom sa aton nga dapat sundon sang mga hinaplas ang mga talaksan kag mga kasuguan sang Dios apang amo man sini nga mga talaksan kag mga kasuguan ang nagatuytoy sa tanan matuod nga Cristiano. Apang ano ang hilikuton sang mga saserdote, kag ano ang kahulugan sini sa karon?

Matutom nga Pagkasaserdote

9, 10. Paano ang “harianon nga pagkasaserdote,” subong ginalandong sang saserdotenhon nga klase sa palanan-awon ni Ezequiel, nagaaman sing espirituwal nga panudlo?

⁹ Sa wala pa ang Cristianong panahon, ang mga saserdote nagapangabudlay sing lakas sa templo. Ang pag-ihaw sa ginahalad nga mga sapat, paghalad sini sa halaran, kag pag-alagad sa mga masigkasaserdote kag sa mga tawo mabug-at gid nga trabaho. Apang may iban pa sila importante nga hilikuton. Si Jehova nagsugo tuhoy sa mga saserdote: “Tudluan nila ang akon katawhan sang kinatuhayan sang balaan kag dibalaan nga butang; kag dapat nila ipahibalo sa ila ang kinatuhayan sang dimatinlo kag sang matinlo.”—Ezequiel 44:23; Malaquias 2:7.

¹⁰ Ginaapresyar bala ninyo ang lakas nga pagpangabudlay kag ang mapainubuson nga pag-alagad sang mga hinaplas subong isa ka hubon, “harianon nga pagkasaserdote,” para sa putli nga pagsimba? (1 Pedro 2:9) Kaangay sadtong dumaan Levinhon nga mga saserdote, ginapangunahan nila ang espirituwal nga pagpanudlo, ginabuligan ang mga tawo nga mahangpan kon ano ang matinlo kag kalahamut-an sa mga mata sang Dios kag kon ano ang indi. (Mateo 24:45) Ina nga panudlo, paagi sa pasad-sa-Biblia nga mga publikasyon kag sa Cristianong mga miting kag mga kombension, nakabulig sa minilyon nga makapanumbalik sa Dios.—2 Corinto 5:20.

11. (a) Paano ginpadaku sang palanan-awon ni Ezequiel ang importansia sang katinlo sa bahin sang mga saserdote? (b) Sa katapusan nga mga adlaw, paano gintinluan ang mga hinaplas sa espirituwal nga kahulugan?

¹¹ Apang, kapin pa sa pagtudlo sa iban nga magmatinlo ang dapat himuon sang mga saserdote; dapat man sila magmatinlo. Sa amo, nakit-an ni Ezequiel ang pag-ulay sa mga saserdote sang Israel. (Ezequiel 44:10-16) Sing kaanggid, ginapakita sang maragtas nga sang 1918, si Jehova naglingkod “subong manug-ulay” sa iya espirituwal nga templo, gin-usisa ang hinaplas nga saserdotenhon nga klase. (Malaquias 3:1-5) Yadtong ginakabig nga matinlo sa espirituwal ukon naghinulsol gikan sa idolatriya anay gintugutan nga magpadayon sa pribilehiyo nga mag-alagad sa iya espirituwal nga templo. Sa gihapon, kaangay sa tanan, ang indibiduwal nga mga hinaplas mahimo mangin dimatinlo—sa espirituwal kag sa moral. (Ezequiel 44:22, 25-27) Dapat sila mangabudlay sing lakas agod makapabilin nga “walay dagta gikan sa kalibutan.”—Santiago 1:27; ipaanggid ang Marcos 7:20-23.

12. Ngaa dapat naton apresyahon ang hilikuton sang mga hinaplas?

¹² Ang tagsatagsa sa aton mahimo mamangkot, ‘Ginaapresyar ko bala ang huwaran sang mga hinaplas sa sulod sang madamo nga tinuig sang ila matutom nga pag-alagad? Ginailog ko bala ang ila pagtuo?’ Maayo nga dumdumon sang mga katapo sang dakung kadam-an nga indi tubtob san-o makaupod nila ang mga hinaplas diri sa duta. Tuhoy sa mga saserdote sa palanan-awon ni Ezequiel, si Jehova nagsiling: “Indi ninyo sila paghatagan sing pagkabutang [nga duta] sa Israel: Ako ang ila pagkabutang.” (Ezequiel 44:28) Sing kaanggid, ang mga hinaplas wala sing dayon nga duog sa duta. May langitnon sila nga palanublion, kag ginakabig sang mga katapo sang dakung kadam-an nga isa ka pribilehiyo nga sakdagon kag palig-unon sila samtang yari pa sila sa duta.—Mateo 25:34-40; 1 Pedro 1:3, 4.

Ang Pangulo—Sin-o Sia?

13, 14. (a) Ngaa ang pangulo dapat nga katapo sang iban nga mga karnero? (b) Sin-o ang ginalarawan sang pangulo?

¹³ Karon nagautwas ang talalupangdon nga pamangkot. Sin-o, kon amo, ang ginalaragway sang pangulo? Sanglit ginapatuhuyan sia subong isa ka indibiduwal kag isa ka grupo, masiling naton nga ginalaragway niya ang isa ka klase sang mga tawo. (Ezequiel 44:3; 45:8, 9) Apang sin-o? Sing pat-od indi ang mga hinaplas. Sa palanan-awon, nagapanghikot sia sing suod sa mga saserdote, apang indi sia isa sa ila. Indi kaangay sa saserdotenhon nga klase, ginhatagan sia sing palanublion sa duta kag sa amo may dutan-on nga paglaum, indi sa langit. (Ezequiel 48:21) Dugang pa, ang Ezequiel 46:10 nagasiling: “Tuhoy sa pangulo sa tunga nila, kon sila [ang disaserdotenhon nga mga tribo] magsulod [sa naguwa nga luwang sang templo], magasulod sia sa tunga nila; kag kon sila magguwa, magaguwa sia.” Wala sia nagasulod sa nasulod nga luwang kundi nagasimba sa naguwa nga luwang, nagasulod kag nagaguwa sa templo upod sa mga tawo. Ginapamatud-an sining mga butang nga ang pangulo nga klase kaupod sang dakung kadam-an sang iban nga mga karnero.

¹⁴ Sing maathag, ang pangulo may responsabilidad sa tunga sang katawhan sang Dios. Sa naguwa nga luwang, nagalingkod sia sa portico sang Gawang sa Sidlangan. (Ezequiel 44:2, 3) Ginapahangop sini ang isa ka katungdanan sang pagdumala, kaangay sa tigulang nga mga lalaki sa Israel nga nagalingkod anay sa gawang sang siudad kag nagahukom. (Rut 4:1-12; Hulubaton 22:22) Sin-o sa iban nga mga karnero ang nagauyat sing mga palangakuan sang pagdumala karon? Ang mga gulang nga may dutan-on nga paglaum nga gintangdo sang balaan nga espiritu. (Binuhatan 20:28) Sa amo ang pangulo nga klase ginahanda karon agod mag-alagad sa ulihi sa administratibo nga paagi sa bag-ong kalibutan.

15. (a) Paano ang palanan-awon ni Ezequiel nagapaathag sa kaangtanan sa ulot sang mga gulang nga katapo sang dakung kadam-an kag sang hinaplas saserdotenhon nga klase? (b) Anong pagpanguna ang ginahimo sang hinaplas nga mga gulang sa dutan-on nga organisasyon sang Dios?

¹⁵ Apang, kamusta ang kaangtanan karon sa ulot sang hinaplas saserdotenhon nga klase kag sinang gulang nga mga lalaki nga, subong bahin sang dakung kadam-an, nagaalagad sa mga katungdanan sang pagdumala? Ginapakita sang palanan-awon ni Ezequiel nga ang mga gulang nga mga katapo sang dakung kadam-an may masinakdagon kag kubos nga katungdanan, samtang ang mga hinaplas amo ang nagapanguna sa espirituwal. Paano? Dumduma, ang mga saserdote sa palanan-awon ginhatagan sing responsabilidad nga tudluan ang mga tawo tuhoy sa espirituwal nga mga butang. Ginsugo man sila nga magpanghikot subong mga hukom sa legal nga mga kaso. Dugang pa, ang mga Levinhon gintangduan sing “mga katungdanan sa pagdumala” sa mga gawang sang templo. (Ezequiel 44:11, 23, 24) Sing maathag, ang pangulo dapat magpasakop sing mapainubuson sa espirituwal nga mga pag-alagad kag pagpanguna sang mga saserdote. Nagakaigo, nian, nga sa moderno nga tion ang hinaplas nagapanguna sa putli nga pagsimba. Halimbawa, ang mga katapo sang Nagadumala nga Hubon sang mga Saksi ni Jehova ginpili sa tunga nila. Inang matutom hinaplas nga mga gulang nagahanas sa nagadamo nga pangulo nga klase sa sulod na sang mga dekada, ginahanda ang mga katapo sini nga klase para sa adlaw nga gamiton nila ang ila bug-os nga awtoridad sa nagapakari nga bag-ong kalibutan sang Dios.

16. Suno sa Isaias 32:1, 2, paano dapat manghikot ang tanan nga mga gulang?

¹⁶ Ano nga sahi sang mga manugtatap ining palaabuton nga mga katapo, nga nalinya para sa mas daku nga mga responsabilidad subong ang pangulo nga klase? Ang tagna sa Isaias 32:1, 2 nagasiling: “Yari karon! Ang isa ka hari magahari sa pagkamatarong; kag tuhoy sa mga prinsipe, magagahom sila subong mga prinsipe para gid sa katarungan. Kag ang tagsa mangin subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga lamgod.” Ini nga tagna nagakatuman karon samtang ang Cristianong mga gulang—hinaplas kag iban nga karnero—nagapanghikot sa pag-amlig sa panong gikan sa ‘mga bagyo’ kaangay sang paghingabot kag pagluya sang buot.

17. Paano dapat tamdon sang Cristianong mga manugbantay ang ila kaugalingon, kag paano sila dapat tamdon sang panong?

¹⁷ Ang mga tinaga nga “prinsipe” kag “pangulo,” nga magkaanggid sing kahulugan sa Hebreo, wala gingamit subong mga titulo agod bayawon ang mga tawo. Sa baylo, ginalaragway sini ang responsabilidad nga ginapaabot nga abagahon sining mga tawo sa pag-atipan sa mga karnero sang Dios. Si Jehova matigdas nga nagapaandam: “Tuman na kamo, O mga pangulo sang Israel! Kuhaa ang kasingki kag pang-agaw, kag hikuta ang katarungan kag pagkamatarong.” (Ezequiel 45:9) Maayo nga sundon sang tanan nga gulang karon ina nga laygay sing tinagipusuon. (1 Pedro 5:2, 3) Ang panong, subong resulta, nagakilala nga gin-aman ni Jesus ining mga manugbantay subong “mga dulot nga mga tawo.” (Efeso 4:8) Ang ila mga kalipikasyon napasad sa inspirado nga Pulong sang Dios. (1 Timoteo 3:1-7; Tito 1:5-9) Sa amo ginasunod sang mga Cristiano ang pagtuytoy sang mga gulang.—Hebreo 13:7.

18. Anong pila sang mga responsabilidad sang palaabuton nga pangulo nga klase karon, kag ano ang mangin responsabilidad nila sa palaabuton?

¹⁸ Sang panahon sang Biblia ang pila sang mga pangulo may daku nga awtoridad, ang iban diutay lamang. Sa karon, ang mga gulang sang dakung kadam-an may madamo nanuhaytuhay nga responsabilidad. Ang iban nagaalagad sa isa ka kongregasyon; ang iban nagaalagad sa madamo nga kongregasyon subong nagalakbay nga mga manugtatap; ang iban nagaalagad sa bug-os nga mga pungsod subong mga katapo sang Komite sang Sanga; ang iban direkta nga nagabulig sa lainlain nga mga komite sang Nagadumala nga Hubon. Sa bag-ong kalibutan, si Jesus magatangdo sing “mga prinsipe sa bug-os nga duta” agod manguna sa mga sumilimba ni Jehova sa duta. (Salmo 45:16) Pat-od nga magapili sia sing madamo sa ila gikan sa matutom nga mga gulang karon. Bangod ginapamatud-an nga takus sining mga lalaki ang ila kaugalingon karon, hatagan niya ang madamo sa ila sing daku pa nga mga pribilehiyo sa palaabuton kon ipahayag na niya ang papel sang pangulo nga klase sa bag-ong kalibutan.

Ang Duta sang Katawhan sang Dios Karon

19. Ano ang ginarepresentar sang duta sa palanan-awon ni Ezequiel?

¹⁹ Ginpaathag man sang palanan-awon ni Ezequiel ang ginpasag-uli nga duta sang Israel. Ano ang ginalaragway sini nga bahin sang palanan-awon? Ang iban nga mga tagna sang pagpasag-uli nagatagna nga ang duta, ang Israel, mangin katulad sang paraiso nga Eden. (Ezequiel 36:34, 35) Sa karon, yara kita sa ginpasag-uli nga “duta,” kag sa isa ka kahulugan, ini man, Edeniko. Sing kaanggid, masami kita nagahambal tuhoy sa aton espirituwal nga paraiso. Ginapaathag sang Ang Lalantawan ang aton “duta” subong “ang sakop nga duog sang hilikuton” sang pinili nga katawhan sang Dios.b Bisan diin man ang alagad ni Jehova, yara sia sa sinang ginpasag-uli nga duta tubtob ginasakdag niya ang matuod nga pagsimba paagi sa paglakat suno sa mga tikang ni Cristo Jesus.—1 Pedro 2:21.

20. Anong prinsipio ang matun-an naton gikan sa “balaan nga amot” sa palanan-awon ni Ezequiel, kag paano naton maaplikar ini nga prinsipio?

²⁰ Kamusta ang bahin sang duta nga gintawag “ang balaan nga amot”? Amo ini ang amot sang mga tawo subong pagsakdag sa mga saserdote kag sa siudad. Sing kaanggid, “ang tanan nga tawo sang pungsod” magaamot sing isa ka bahin sang duta para sa pangulo. Ano ang buot silingon sini karon? Sa pagkamatuod, wala ini nagakahulugan nga ang katawhan sang Dios pabug-atan sing ginaswelduhan nga klero nga klase. (2 Tesalonica 3:8) Sa baylo, ang pagsakdag sa mga gulang karon isa ka espirituwal nga pagsakdag. Nagalakip ini sa pagbulig sa hilikuton nga ginahimo karon kag pagpakita sing mabuligon, mapinasakupon nga espiritu. Apang, subong sang mga adlaw ni Ezequiel, ini nga amot ginahatag “kay Jehova,” indi kay bisan sin-o nga tawo.—Ezequiel 45:1, 7, 16.

21. Ano ang matun-an naton gikan sa pagtunga sa duta sa palanan-awon ni Ezequiel?

²¹ Indi lamang ang pangulo ukon ang mga saserdote ang gintangduan sing duog sa sining ginpasag-uli nga duta. Ginapakita sang pagtunga sa duta nga ang tagsa sang 12 ka tribo may malig-on nga palanublion. (Ezequiel 47:13, 22, 23) Gani ang mga katapo sang dakung kadam-an indi lamang nga may duog sa espirituwal nga paraiso karon kundi makabaton man sing bahin sang duta kon makapanubli sila sing isa ka duog sa dutan-on nga sakop sang Ginharian sang Dios.

22. (a) Ano ang ginarepresentar sang siudad sa palanan-awon ni Ezequiel? (b) Ano ang matun-an naton gikan sa mga gawang sang siudad sa tanan nga bahin?

²² Sa katapusan, ano ang ginalaragway sang siudad sa palanan-awon? Indi ini isa ka langitnon nga siudad, kay yari ini sa tunga sang “nahigkuan” (dibalaan) nga duta. (Ezequiel 48:15-17) Gani mahimo gid nga dutan-on ini. Bueno, ano bala ang isa ka siudad? Wala bala ini nagapahangop sing ideya tuhoy sa mga tawo nga nagakari sing tingob subong isa ka grupo kag organisado? Huo. Sa amo, ang siudad nagasimbulo sa dutan-on nga pagdumalahan nga nagadala sing kaayuhan sa tanan nga katapo sang matarong dutan-on nga katilingban. Magapanghikot ini sing bug-os sa nagapakari nga “bag-ong duta.” (2 Pedro 3:13) Ang mga gawang sang siudad sa tanan nga kilid, isa para sa tagsa ka tribo, maathag nga nagailustrar sing pagkadayag. Sa karon, ang katawhan sang Dios wala napaidalom sa sekreto, likom nga pagdumalahan. Ang responsable nga mga kauturan dapat nga madali palapitan; ang mga prinsipio nga ila ginasunod nahibaluan sang tanan. Ang katunayan nga ang mga tawo sa tanan nga tribo nagapanguma sa duta nga nagasakdag sa siudad nagapahanumdom sa aton nga ang iban nga mga karnero nagasakdag, bisan sa materyal nga paagi, sa administratibo nga mga kahimusan nga ginapatuman sa katawhan sang Dios sa bug-os nga kalibutan.—Ezequiel 48:19, 30-34.

23. Ano ang aton pagabinagbinagon sa masunod nga artikulo?

²³ Kamusta naman, ang suba nga nagailig halin sa santuaryo sang templo? Kon ano ang ginalarawan sini karon kag sa palaabuton amo ang topiko sang aton ikatlo kag katapusan nga artikulo sa sini nga serye.

[Mga footnote]

Mga Punto sa Repaso

◻ Ano ang ginalarawan sang templo sa palanan-awon ni Ezequiel?

◻ Sin-o ang ginalarawan sang mga saserdote nga nagaalagad sa templo?

◻ Ano ang pangulo nga klase, kag ano ang pila sang mga responsabilidad sini?

◻ Ano ang duta sa palanan-awon ni Ezequiel, kag sa ano nga kahulugan gintunga ini sa napulog duha ka tribo?

◻ Ano ang ginalarawan sang siudad?

[Diagram/Mapa sa pahina 15]

Para sa kabug-usan sang teksto, tan-awa ang publikasyon)

Ang pagtunga sa duta subong ginpakita sa palanan-awon ni Ezequiel

ANG NAPULOG DUHA KA TRIBO

Ang Daku nga Dagat

Dagat sang Galilea

Suba Jordan

Mapait nga Dagat

DAN

ASER

NEFTALI

MANASES

EFRAIM

RUBEN

JUDA

ANG PANGULO

BENJAMIN

SIMEON

ISACAR

ZABULUN

GAD

[Diagram]

PAGPADAKU SA BALAAN NGA AMOT

A.“Didto Mismo si Jehova” (Jehovah-Shammah); B. mabungahon nga duta sang siudad

Bahin sang mga Levinhon

Santuaryo ni Jehova

Bahin sang mga Saserdote

B A B