Posible gid Bala ang Kabuhi nga Walay Katapusan?

“Manunudlo, anong maayo ang dapat ko himuon agod matigayon ko ang kabuhi nga walay katapusan?”—MATEO 19:16.

1. Ano ang masiling tuhoy sa kalawigon sang kabuhi sang tawo?

GIN-INSPEKSION anay ni Hari Jerjes I sang Persia, nakilal-an sa Biblia nga si Asuero, ang iya mga soldado antes makig-away sang tuig 480 B.C.⁠E. (Ester 1:1, 2) Suno sa Griegong istoryador nga si Herodotus, nakahibi ang hari samtang ginainspeksion niya ang iya tinawo. Ngaa? “Nasubuan gid ako,” siling ni Jerjes, “kon hunahunaon ko ang malip-ot nga kabuhi sang tawo. Kay sa sini tanan nga tawo, wala sing isa nga mabilin nga buhi isa ka gatos ka tuig sugod karon.” Ayhan natalupangdan man ninyo nga ang kabuhi makapasubo nga malip-ot lamang kag wala sing isa ang luyag nga magtigulang, magmasakit, kag mapatay. Ti, kon mahimo lamang kuntani nga mabuhi kita nga mapagros kag malipayon!—Job 14:1, 2.

2. Ano ang ginalauman sang madamo, kag ngaa?

² Sing makawiwili, ang The New York Times Magazine sang Septiembre 28, 1997, nagbalhag sing artikulo nga “Luyag Nila Mabuhi.” Ginbalikwat sini ang isa ka manugpanalawsaw nga nagsiling: “Nagapati gid ako nga kita ang una nga kaliwatan nga magakabuhi sing dayon”! Ayhan kamo man nagapati nga posible ang kabuhi nga walay katapusan. Nagapati kamo sa sini bangod ang Biblia nagasaad nga mahimo kita mabuhi sing dayon diri sa duta. (Salmo 37:29; Bugna 21:3, 4) Apang, ang iban nga mga tawo nagapati nga ang kabuhi nga walay katapusan posible bangod sang mga rason nga wala sa Biblia. Ang pagbinagbinag sa pila sini nga mga rason magabulig sa aton nga mahangpan nga ang kabuhi nga walay katapusan posible gid.

Gindesinyo Agod Mabuhi sing Dayon

3, 4. (a) Ngaa nagapati ang iban nga dapat kita mabuhi sing dayon? (b) Ano ang ginsiling ni David tuhoy sa paghimo sa iya?

³ Ang isa ka rason nga madamo ang nagapati nga ang tawo dapat mabuhi sing dayon amo ang makatilingala nga pagtuga sa aton. Halimbawa, milagruso gid kon paano kita nagtubo sa sulod sang taguangkan sang aton iloy. Ang isa ka nagapanguna nga awtoridad tuhoy sa pagtigulang nagsulat: “Sa tapos mahimo ang mga milagro nga nagakatabo halin sa pagpanamkon sa aton tubtob sa pagkabun-ag kag dayon tubtob sa seksuwal nga paghamtong kag pag-adulto, ang kinaugali nagapakamaayo nga indi maghimo sing daw mas simple nga paagi nga magapadulog sang pagtigulang kag sa amo mahuptan yadto nga mga milagro sing dayon.” Huo, sa pagbinagbinag sang milagruso nga paghimo sa aton, ang pamangkot nagapabilin, Ngaa nagakapatay kita?

⁴ Milenyo na ang nagligad ginpamalandungan sang manunulat sang Biblia nga si David ini mismo nga mga milagro, bisan nga indi gid niya makita ang sulod sang taguangkan subong sang mga sientipiko sa karon. Ginpamalandungan ni David ang paghimo mismo sa iya sang, suno sa ginsulat niya, ‘ginputos sia sa taguangkan sang iya iloy.’ Sadto nga tion, siling niya, ‘ang iya mga batobato ginhimo.’ Ginsugid man niya ang paghimo sa iya “mga tul-an” nga, suno sa ginsiling niya, “Ginhimo ako sing tago.” Nian naghambal si David tuhoy sa “akon sibudbod” kag nagsiling may kaangtanan sa sina nga sibudbod sa sulod sang taguangkan sang iya iloy: “Ang tanan nga bahin sini ginsulat.”—Salmo 139:13-16.

5. Anong mga milagro ang nadalahig sa pagtubo naton sa taguangkan?

⁵ Sing maathag, wala sing literal nasulat nga blueprint sang ginhimo si David sa sulod sang taguangkan sang iya iloy. Apang sa pagpamalandong ni David sa paghimo sa iya “mga batobato,” sa iya “mga tul-an,” kag sa iya iban pa nga mga bahin sang lawas, para sa iya, daw ginhimo ini suno sa plano—nga ang tanan, kon sa aton pa, “ginsulat.” Ang pertilisado nga itlog sa taguangkan sang iya iloy daw subong bala nga may isa ka daku nga hulot nga puno sing mga libro nga may detalyado nga mga instruksion sa kon paano himuon ang isa ka lapsag kag ining masibod nga mga instruksion ginpasa sa tagsa nahuman nga selula. Busa, ang Science World nga magasin nagagamit sing paanggid tuhoy sa ‘kada selula sa nagatubo nga sibudbod nga may kompleto nga aparador sang mga blueprint.’

6. Ano ang pamatuod nga kita, subong sang ginsulat ni David, “ginhimo sing makatilingala”?

⁶ Nahunahuna mo na bala ang tuhoy sa milagruso nga pagpanghikot sang aton lawas? Ang biologo nga si Jared Diamond nagsiling: “Ginaislan naton ang mga selula nga nagaputos sang aton tinai sing makaisa sa kada pagligad sang pila ka adlaw, ang mga selula sang aton barukan sa kada ikaduha nga bulan, kag ang mga selula sang aton pula nga dugo sa kada ikap-at nga bulan.” Naghinakop sia: “Ginaguba kita kag ginakay-o sang kinaugali sa kada adlaw.” Ano gid ang buot silingon sini? Ang buot silingon sini amo nga bisan pila man ang edad naton—8 man, 80, ukon bisan 800—ang aton pisikal nga lawas nagapabilin nga batan-on. Ang isa ka sientipiko nagbulubanta anay: “Sa sulod sang isa ka tuig mga 98 porsiento sang aton atomo karon ang islan sing iban pa nga mga atomo nga ginakuha naton sa hangin, sa pagkaon, kag sa ilimnon.” Sa pagkamatuod, subong sang pagdayaw ni David, “ginhimo [kita] sing makatilingala.”—Salmo 139:14.

7. Pasad sa desinyo sang aton pisikal nga lawas, ano ang ginhinakop sang iban?

⁷ Pasad sa desinyo sang aton pisikal nga lawas, ang isa ka awtoridad tuhoy sa pagtigulang nagsiling: “Indi mahangpan kon ngaa nagatigulang kita.” Gani dapat gid kita kuntani mabuhi sing dayon. Kag amo sini kon ngaa ginatinguhaan sang tawo nga matigayon ini nga tulumuron paagi sa ila teknolohiya. Wala pa lang madugay, si Dr. Alvin Silverstein nagsulat sing masinaligon sa iya libro nga Conquest of Death: “Tukibon naton kon ano ang kabuhi. Mahangpan naton . . . kon paano nagatigulang ang tawo.” Kag ano ang resulta? Sia naglaum: “Wala na sing ‘tigulang’ nga mga tawo, kay ang ihibalo nga magadula sa kamatayon magadala man sing dayon nga pagkapamatan-on.” Bangod sang modernong pag-usisa sang siensia sa paghimo sa tawo, daw imposible bala ang kabuhi nga walay katapusan? May isa pa ka mas makusog nga rason sa pagpati nga posible ang kabuhi nga walay katapusan.

Ang Handum nga Mabuhi sing Dayon

8, 9. Anong kinaugali nga handum ang ginalauman sang mga tawo sa bug-os nga maragtas?

⁸ Natalupangdan mo bala nga ang mabuhi sing dayon isa ka kinaugali nga handum sang tawo? Ang isa ka doktor nagsulat sa isa ka Aleman nga balasahon: “Ang damgo nga matigayon ang kabuhi nga walay katapusan mahimo nga subong kadugay na sa katawhan.” Sa paglaragway sang pagpati sang pila ka dumaan nga mga Europeanhon, ang The New Encyclopædia Britannica nagasiling: “Ang takus nga mga tawo magakabuhi sing dayon sa isa ka nagabadlak nga tinukod nga napunihan sing bulawan.” Kag, abaw, nagpakabudlay gid ang tawo agod lamang matuman ang ila ginahandum nga kabuhi nga walay katapusan!

⁹ Ang The Encyclopedia Americana nagasiling nga sa China sang nagligad nga kapin sa 2,000 ka tuig, “ang mga emperador kag ang [kinaandan nga] mga tawo, sa pagpanguna sang Taoista nga mga pari, nagpabaya sa pagtrabaho agod lamang pangitaon ang elixir sang kabuhi”—ang ginatawag nga tuburan sang pagkapamatan-on. Sa pagkamatuod, sa bug-os nga maragtas, nagpati ang mga tawo nga paagi sa pag-inom sing sarisari nga tinimpla ukon paagi sa pag-inom pa gani sing pinasahi nga mga tubig, magapabilin sila nga batan-on.

10. Ano ang panikasog sa karon agod matigayon ang malawig nga kabuhi?

¹⁰ Talalupangdon man nga panikasog ang ginahimo karon agod matuman ang duna nga handum sang tawo nga matigayon ang kabuhi nga walay katapusan. Ang isa ka talalupangdon nga halimbawa amo ang ginabuhat karon nga pagsulod sa freezer sa bangkay sang may balatian nga tawo. Ginahimo ini sa paglaum nga mapasag-uli ang kabuhi sa pila ka adlaw kon matukiban na ang bulong sa balatian. Ang sumalakdag sini nga buhat, nga ginatawag mga cryonic, nagsulat: “Kon magmatuod ang amon ginalauman kag matukiban namon kon paano bulngon ukon kay-uhon ang tanan nga halit—lakip ang kaluyahon bangod sang pagtigulang—nian ang mga ‘patay’ karon mabuhi sing dayon sa palaabuton.”

11. Ngaa handum sang tawo nga mabuhi sing dayon?

¹¹ Ngaa, mahimo ipamangkot mo, nagtudok gid sa aton panghunahuna ini nga handum sa kabuhi nga walay katapusan? Bangod bala ini kay “ginpatudok [sang Dios] ang walay katubtuban sa hunahuna sang tawo”? (Manugwali 3:​11, Revised Standard Version) Takus ini binagbinagon sing serioso! Hunahunaa lamang: Ngaa may duna kita nga handum nga mabuhi sing dayon​—⁠sa walay katubtuban—kon indi katuyuan sang aton Manunuga nga matuman ini nga handum? Kag mahigugmaon bala sia kon gintuga niya kita nga nagahandum sing kabuhi nga walay katapusan kag pagkatapos indi kita pagtugutan nga matuman ina nga handum?—Salmo 145:16.

Kay Sin-o Kita Dapat Magsalig?

12. Ano ang pagsalig sang iban, apang nagapati bala kamo nga ini masaligan?

¹² Diin, ukon sa ano, kita dapat magsalig agod makatigayon kita sing kabuhi nga walay katapusan? Sa teknolohiya bala sang tawo sa ika-20 ukon ika-21 nga siglo? Ang artikulo sang The New York Times Magazine nga “Luyag Nila Mabuhi” naghambal tuhoy sa “dios: ang teknolohiya” kag tuhoy sa “mga kakunyag sa mahimo sang teknolohiya.” Ginsiling nga ang isa ka manugpanalawsaw “nagasalig gid . . . nga ang pamaagi sa pagpauswag sa pisikal nga lawas sang tawo matukiban sa sibu nga tion agod luwason [kita] paagi sa pagpugong sang pagtigulang, kag ayhan ­magbalik sa pagkalamharon.” Apang, ang mga ­panikasog sang mga tawo napamatud-an gid nga indi masaligan sa pagtapna sang pagtigulang ukon sa pagdula sang kamatayon.

13. Paano ginapakita sang paghimo sa aton utok nga gintuyo kita nga mabuhi sing dayon?

¹³ Nagakahulugan bala ini nga wala na sing dalan padulong sa kabuhi nga walay katapusan? Indi! May yara dalan! Ang makatilingala kag walay latid nga ikasarang sang aton utok sa pagtuon dapat magkumbinsi sa aton sa sini. Ang biologo sa molekula nga si James Watson nagtawag sa aton utok subong amo “ang pinakamasibod nga butang nga natukiban naton sa aton uniberso.” Kag ang neurologo nga si Richard Restak nagsiling: “Wala sing bisan ano sa uniberso nga nakilal-an naton ang makaanggid sa sini.” Ngaa may utok kita nga makatipon kag makatuon sing walay latid nga impormasyon kag may lawas nga gindesinyo nga magkabuhi sing dayon kon wala kita gintuyo nga mabuhi sa walay katapusan?

14. (a) Ano nga konklusion tuhoy sa kabuhi sang tawo ang ginatudlo sang mga manunulat sang Biblia? (b) Ngaa dapat kita magsalig sa Dios kag indi sa tawo?

¹⁴ Ano, nian, ang lamang rasonable kag pasad sa kamatuoran nga konklusion nga mahinakop naton? Indi bala nga gindesinyo kita kag gintuga sang labing gamhanan kag intelihente nga Manunuga agod mahimo kita mabuhi sing dayon? (Job 10:8; Salmo 36:9; 100:3; Malaquias 2:​10; Binuhatan 17:24,25) Busa, indi bala maalamon nga sundon naton ang inspirado nga sugo sang salmista sang Biblia: “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan”? Ngaa indi kita dapat magsalig sa tawo? Bangod, suno sa ginsulat sang salmista, “ang iya espiritu nagaguwa, nagabalik sia sa iya duta; sa amo nga adlaw nagakawala ang iya mga hunahuna.” Sa pagkamatuod, walay sapayan sang posibilidad nga mabuhi sing dayon, ang mga tawo wala sing mahimo sa atubangan sang kamatayon. Ang salmista nagahinakop: “Malipayon ang isa . . . nga ang iya paglaum yara kay Jehova nga iya Dios.”—Salmo 146:3-5.

Katuyuan Gid Bala Ini sang Dios?

15. Ano ang nagapakita nga katuyuan sang Dios nga mabuhi kita sing dayon?

¹⁵ Apang mahimo mamangkot kamo, Katuyuan gid bala ni Jehova nga makaagom kita sing kabuhi nga walay katapusan? Huo! Makapila ini nga ginasaad sang iya Pulong. “Ang dulot sang Dios amo ang kabuhi nga walay katapusan,” pasalig sang Biblia sa aton. Ang alagad sang Dios nga si Juan nagsulat: “Amo ini ang ginsaad nga butang nga ginsaad [sang Dios] mismo sa aton, ang kabuhi nga walay katapusan.” Indi katingalahan nga ang isa ka pamatan-on nga lalaki namangkot kay Jesus: “Manunudlo, anong maayo ang dapat ko himuon agod matigayon ko ang kabuhi nga walay katapusan?” (Roma 6:23; 1 Juan 2:25; Mateo 19:16) Sa katunayan, si apostol Pablo nagsulat tuhoy sa “paglaum sa kabuhi nga walay katapusan nga ginsaad sang Dios, nga indi makabutig, sa wala pa ang malawig nga panahon nga nagligad.”—Tito 1:2.

16. Sa anong kahulugan mahimo ginsaad sang Dios ang kabuhi nga walay katapusan “sa wala pa ang malawig nga panahon nga nagligad”?

¹⁶ Ano ang buot silingon nga ang Dios nagsaad sing kabuhi nga walay katapusan “sa wala pa ang malawig nga panahon nga nagligad”? Naghunahuna ang iban nga ang buot silingon ni apostol Pablo amo nga antes gintuga ang unang mag-asawa, sanday Adan kag Eva, katuyuan na sang Dios nga ang mga tawo mabuhi sing dayon. Apang, kon ginpatuhuyan ni Pablo ang tion sa tapos gintuga ang tawo kag sang ginpamulong ni Jehova ang iya katuyuan, maathag gihapon nga ang kabubut-on sang Dios nagalakip sang kabuhi nga walay katapusan para sa mga tawo.

17. Ngaa gintabog sa hardin sang Eden sanday Adan kag Eva, kag ngaa ginpahamtang ang mga kerubin sa gawang?

¹⁷ Ang Biblia nagasiling nga sa hardin sang Eden, “si Jehova nagpatubo gikan sa duta . . . sing kahoy sang kabuhi.” Ang rason nga ginhatag kon ngaa gintabog si Adan sa hardin amo nga agod “indi niya idab-ot ang iya kamot kag magkuha man sing prutas gikan sa kahoy sang kabuhi kag magkaon kag magkabuhi”—huo, sa walay katubtuban! Sa tapos mapaguwa sa hardin sang Eden sanday Adan kag Eva, si Jehova nagpahamtang “sing mga kerubin kag sing nagaidlab nga espada nga padayon nga nagabalabad agod bantayan ang dalan padulong sa kahoy sang kabuhi.”—Genesis 2:9; 3:22-24.

18. (a) Ano kuntani ang kahulugan kanday Adan kag Eva sang pagkaon sing bunga sang kahoy sang kabuhi? (b) Ano ang ginarepresentar sang pagkaon sina nga kahoy?

¹⁸ Kon si Adan kag si Eva gintugutan nga makakaon gikan sa sadtong kahoy sang kabuhi, ano kuntani ang kahulugan sini sa ila? Aba, ang pribilehiyo nga magkabuhi sing dayon sa Paraiso! Ang isa ka iskolar sa Biblia naghaumhaum: “Mahimo gid nga ang kahoy sang kabuhi may birtud agod nga ang tawo indi mag-ugod-ugod bangod sa katigulangon, ukon magluya nga nagadangat sa kamatayon.” Nagsiling pa gani sia nga “may yara tanom sa paraiso nga makapugong sang epekto” sang pagtigulang. Apang, ang Biblia wala nagasiling nga ang kahoy sang kabuhi sa iya kaugalingon may ikasarang sa paghatag sing kabuhi. Sa baylo, ang kahoy nagrepresentar lamang sa kabuhi nga walay katapusan nga ginagarantiya sang Dios sa isa nga tugutan sa pagkaon sang bunga sini.—Bugna 2:7.

Ang Katuyuan sang Dios Wala Magbag-o

19. Ngaa napatay si Adan, kag ngaa kita, nga iya mga anak, nagakapatay man?

¹⁹ Sang makasala si Adan, nadula niya ang kinamatarong sa kabuhi nga walay katapusan para sa iya kaugalingon kag para sa tanan sang iya wala pa matawo nga mga anak sadto. (Genesis 2:17) Sang nangin makasasala sia bangod sang iya paglalis, may depekto na sia, indi himpit. Sugod sadto, daw subong bala nga ang lawas ni Adan nadesinyo na para sa kamatayon. Subong sang ginasiling sang Biblia, “ang bayad sang sala kamatayon.” (Roma 6:23) Dugang pa, daw subong bala nga ang dihimpit nga mga anak ni Adan gindesinyo man para sa kamatayon, indi para sa kabuhi nga walay katapusan. Ang Biblia nagapaathag: “Paagi sa isa ka tawo [kay Adan] nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.”—Roma 5:12.

20. Ano ang nagapakita nga ang mga tawo gintuyo nga magkabuhi sing dayon sa duta?

²⁰ Apang ano abi kon si Adan wala makasala? Ano abi kon wala sia maglalis sa Dios kag gintugutan sia sa pagkaon gikan sa kahoy sang kabuhi? Sa diin niya kuntani naagom ang dulot sang Dios nga kabuhi nga walay katapusan? Sa langit bala? Indi! Wala magsiling ang Dios nga si Adan dalhon sa langit. Ang hilikuton nga ginhatag sa iya yari sa duta. Ang Biblia nagapaathag nga “si Jehova nga Dios nagpatubo gikan sa duta sing tagsa ka kahoy nga maanyag sa itululok kag maayo nga kalan-on,” kag ini nagasiling: “Si Jehova nga Dios nagkuha sa tawo kag ginbutang sia sa hardin sang Eden sa pagpanguma kag pagbantay sini.” (Genesis 2:​9, 15) Sa tapos gintuga si Eva subong tiayon ni Adan, sila nga duha ginhatagan sing dugang pa nga hilikuton diri sa duta. Ang Dios nagsugo sa ila: “Magmabungahon kag magbuad kag magtugob sang duta kag magpakaagalon sa sini, kag maggahom sa kaisdaan sang dagat kag sa nagalupad nga mga tinuga sang kahanginan kag sa tagsa ka buhi nga tinuga nga nagagiho sa duta.”—Genesis 1:28.

21. Anong matahom nga paglaum ang gin-agom sang unang mag-asawa?

²¹ Hunahunaa ninyo ang matahom nga palaabuton diri sa duta nga ginbuksan sadto nga mga sugo sang Dios kay Adan kag kay Eva! Mangin himpit kag mapagros ang ila atipanon nga mga anak sa dutan-on nga Paraiso. Samtang nagadaku ang ila pinalangga nga mga anak, magabulig sila sa ila nga mangin mabungahon kag sa pagmentinar sang hardin sa Paraiso. Bangod ang tanan nga sapat nagapasakop sa ila, mangin kontento na ang tawo. Hunahunaa ninyo ang kalipay sa pagpasangkad sang hardin sang Eden tubtob nga sa ulihi ang bug-os nga duta mangin paraiso! Maluyagan bala ninyo ang kabuhi upod sa himpit nga kabataan sa subong sina katahom nga puluy-an sa duta, nga wala nagakabalaka nga magtigulang kamo kag mapatay? Tuguti ang kinaugali nga huyog sang inyo tagipusuon sa pagsabat sina nga pamangkot.

22. Ngaa makapat-od kita nga wala gin-islan sang Dios ang iya katuyuan para sa duta?

²² Apang, sang maglalis sanday Adan kag Eva kag gintabog sila sa hardin sang Eden, gin-islan bala sang Dios ang iya katuyuan para sa mga tawo nga magkabuhi sing dayon sa Paraiso sa duta? Wala! Ang paghimo sina sang Dios isa ka pagbaton sing pagkalutos tuhoy sa iya ikasarang sa pagtuman sang iya orihinal nga katuyuan. Makapat-od kita nga ginatuman sang Dios ang iya ginasaad, subong amo ang ginasiling niya: “Ang pulong nga nagaguwa sa akon baba matuman. Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga ginpadalhan ko sini.”—Isaias 55:11.

23. (a) Ano ang nagapamatuod nga katuyuan sang Dios nga ang mga nahuyog sa matarong mabuhi sing dayon sa duta? (b) Ano ang binagbinagon naton sa masunod?

²³ Maathag sa Biblia nga ang katuyuan sang Dios para sa duta wala gid magbag-o, diin ang Dios nagasaad: “Ang mga matarong magapanag-iya sang duta, kag magapuyo sila sing dayon sa sini.” Bisan si Jesucristo nagsiling sa iya Sermon sa Bukid nga ang mga malulo magapanubli sang duta. (Salmo 37:29; Mateo 5:5) Apang, paano naton matigayon ang kabuhi nga walay katapusan, kag ano ang dapat naton himuon agod maagom ina nga kabuhi? Binagbinagon ini sa masunod nga artikulo.

Paano Mo Sabton?

◻ Ngaa madamo ang nagapati nga ang kabuhi nga walay katapusan posible?

◻ Ano ang dapat magkumbinsi sa aton nga gintuyo kita nga magkabuhi sing dayon?

◻ Ano ang orihinal nga katuyuan sang Dios para sa katawhan kag sa duta?

◻ Ngaa makapat-od kita nga tumanon sang Dios ang iya orihinal nga katuyuan?