Ang Cristianong Kongregasyon—Isa ka Tuburan sang Makapalig-on nga Bulig

SI Popi, isa ka babayi nga mga beintehon ang edad, nasubuan gid sa mabudlay nga kahimtangan sa ila pamilya bangod wala sia sing bukas nga komunikasyon sa iya mga ginikanan.a Sa tapos makatuad sa isa ka Cristianong gulang kag sa iya asawa, sia nagsulat sa ila: “Madamo gid nga salamat sa paghinguyang ninyo sing tion agod makapakighambal sa akon. Wala lang ninyo mahibaluan kon daw ano ka importante sa akon nga kamo nagaulikid. Nagapasalamat ako kay Jehova nga ginhatagan niya ako sing mga tawo nga akon masaligan kag mahambal.”

Si Toula, isa ka babayi nga bag-o lang nabalo nga may duha ka pamatan-on nga kabataan, nakasapo sang iya kaugalingon nga wala sing maaputan bangod sang makatulublag nga problema sa emosyon kag mga kabudlayan sa pinansial. Regular nga nakabaton sia kag ang iya kabataan sing makapalig-on nga mga pagduaw sang isa ka Cristianong mag-asawa gikan sa kongregasyon. Sa tapos niya malandas ang amo nga kahimtangan, ginpadal-an niya sila sing isa ka kard, nga nagasiling: “Ginadumdom ko kamo pirme sa akon pangamuyo. Nadumduman ko ang madamo nga tion nga ginbuligan ninyo ako kag ginsakdag.”

Nagabatyag ka bala kon kaisa nga “ginabug-atan” sang nagadugang nga mga pag-ipit sining kalibutan? (Mateo 11:28) Ang inyo bala kabuhi gintap-ingan sang masakit nga mga eksperiensia bangod sang “tion kag wala ginapaabot nga hitabo”? (Manugwali 9:11) Kon amo wala ka nagaisahanon. Apang kasubong sang nasapwan na sang linibo nga nahul-an, ikaw man makatigayon sing mapuslanon nga bulig gikan sa Cristianong kongregasyon sang mga Saksi ni Jehova. Sang unang siglo C.E., nasapwan ni apostol Pablo nga ang pila ka masigkatumuluo nangin “makapalig-on nga bulig” sa iya. (Colosas 4:10, 11) Makaeksperiensia man ikaw sing subong sina.

Pagsakdag kag Bulig

Sa Cristianong Griegong Kasulatan, ang tinaga nga “kongregasyon” ginbadbad gikan sa Griego nga termino nga ek·kle·siʹa, nga nagakahulugan sing isa ka grupo sang katawhan nga gintipon. Nalakip sa sining tinaga amo ang mga ideya tuhoy sa paghiusa kag pagbinuligay.

Ang Cristianong kongregasyon nagasakdag sang kamatuoran sang Pulong sang Dios kag nagabantala sing maayong balita sang iya Ginharian. (1 Timoteo 3:15; 1 Pedro 2:9) Apang, nagaaman man ang kongregasyon sing espirituwal nga pagsakdag kag bulig sa mga katapo sini. Sa sulod sini, masapwan sang isa ang isa ka grupo sang mahigugmaon, nagakabalaka, kag matinatapon nga mga abyan, nga handa kag luyag magbulig kag magpaumpaw sa iban sa tion sang kahuol.—2 Corinto 7:5-7.

Ang mga sumilimba ni Jehova nakasapo sing dalangpan kag kalig-unan sa iya kongregasyon. Ginapakita sang salmista nga nakaeksperiensia sia sing kalipay kag nakabatyag sing kalig-unan sa tunga sang nagatipon nga katawhan sang Dios. (Salmo 27:4, 5; 55:14; 122:1) Sa karon man, ang Cristianong kongregasyon isa ka asosasyon sang mga masigkatumuluo nga nagapabaskog kag nagapalig-on sa isa kag isa.—Hulubaton 13:20; Roma 1:11, 12.

Ginatudluan ang mga katapo sang kongregasyon nga ‘magbuhat sing maayo ayon sa tanan, apang labi na gid sa mga may labot sa [ila] sa pagtuo.’ (Galacia 6:10) Ang napasad sa Biblia nga edukasyon nga ila nabaton nagapahulag sa ila nga ipakita ang utudnon nga gugma kag mapinalanggaon nga gugma sa isa kag isa. (Roma 12:10; 1 Pedro 3:8) Ginapahulag ang espirituwal nga mga kauturan nga lalaki kag babayi sa kongregasyon nga mangin malulo, mahidaiton, kag magpakita sing mapinalanggaon nga kaawa. (Efeso 4:3) Sa baylo nga mangin sumilimba lamang, nagapakita sila sing mahigugmaon nga kabalaka sa iban.—Santiago 1:27.

Busa, sa sulod sang kongregasyon, masapwan sang mga ginahul-an ang mahinuklugon nga espiritu sang daw pamilya nga kahimtangan. (Marcos 10:29, 30) Ang pagbatyag nga nangin bahin sang isa ka suod kag mahigugmaon nga grupo nagapalig-on sa ila. (Salmo 133:1-3) Paagi sa kongregasyon, “ang matutom kag mainandamon nga ulipon” nagaaman sing makapabaskog “nga pagkaon sa nagakaigo nga tion.”—Mateo 24:45.

Bulig Gikan sa Mahigugmaon nga mga Manugtatap

Ang mga katapo sang Cristianong kongregasyon makapaabot nga ila masapwan sa sulod sini ang mahigugmaon, mahinangpanon, kag kalipikado nga mga manugbantay nga nagaaman sing espirituwal nga bulig kag pagpalig-on. Ang mga manugbantay nga may amo sina nga mga kinaiya kaangay sang “palalipdan sa hangin kag palanaguan sa unos.” (Isaias 32:1, 2) Ang gintangdo sang espiritu nga mga gulang, ukon mga manugtatap, nagaatipan sang tulad karnero nga katawhan sang Dios, nagapalig-on sang may balatian kag napung-awan, kag nagatinguha nga ipasag-uli ang mga nakasala.—Salmo 100:3; 1 Pedro 5:2, 3.

Sa pagkamatuod, ang hubon sang mga gulang sa kongregasyon indi talapuanan sang propesyonal nga mga terapista ukon mga manugbulong, nga makapaayo sang mga problema sa pisikal ukon mental nga ginaatubang sang mga masigkatumuluo. Sa sining sistema sang mga butang, ang may balatian “nagakinahanglan [gihapon] sing manugbulong.” (Lucas 5:31) Walay sapayan, ining mga manugbantay makabulig sa sadtong may problema sa espirituwal. (Santiago 5:14, 15) Kon posible, ang mga gulang nagahimos man sing iban nga bulig.—Santiago 2:15, 16.

Sin-o ang sa likod sinang mahigugmaon nga kahimusan? Si Jehova nga Dios mismo! Si manalagna Ezequiel nagalaragway kay Jehova nga nagasiling: “Pangitaon ko ang akon mga karnero kag atipanon ini. . . . Luwason ko sila sa mga duog kon diin man sila ginlapta . . . Pahalbon ko ang akon mga karnero, kag palukuhon ko sila.” Nagakabalaka man ang Dios sa mga masakiton kag maluya nga karnero.—Ezequiel 34:11, 12, 15, 16.

Matuod nga Bulig sa Nagakaigo nga Tion

Matigayon gid bala ang matuod nga bulig gikan sa Cristianong kongregasyon? Huo, kag ang masunod nga mga halimbawa nagailustrar sang nagkalainlain nga mga kahimtangan nga sa diin ang kongregasyon makabulig gid.

◆ Pagkapatay sang hinigugma. Ang bana ni Ana napatay bangod sang malala nga balatian. “Sugod sadto, nakabaton ako sing mainit nga gugma gikan sa Cristianong paghiliutod,” siling niya. “Bangod sang tayuyon malulo nga mga pulong sang pagsakdag kag pagpalig-on gikan sa akon mga masigkatumuluo, lakip na ang tinagipusuon nga mga hakos, nagpadayon sa pagpitik ang akon tagipusuon sa baylo nga maguba ini, kag nagapasalamat ako kay Jehova. Ang ila gugma nagpabatyag sa akon nga ginsakdag gid, ginpalig-on kag gin-ulikdan.” Mahimo nga ikaw man may masakit nga eksperiensia bangod sang pagkapatay sang hinigugma. Sa sina nga mga tion, ang mga katapo sang kongregasyon makahatag sing ginakinahanglan gid nga paumpaw kag emosyonal nga pagsakdag.

◆ Balatian. Si Arthur, nga isa ka nagalakbay nga manugtatap gikan sa Poland, regular nga nagaduaw sa mga kongregasyon sang Sentral nga Asia agod palig-unon sila sa espirituwal. Sa isa sang iya mga pagduaw, nagmasakit sia sing grabe kag nakaeksperiensia sing serioso nga mga komplikasyon. “Luyag ko kamo sugiran kon paano ang mga kauturan sa [isa ka siudad sang Kazakhstan] nag-atipan sa akon,” hinumdom ni Arthur upod ang daku nga apresasyon. “Ang mga kauturan nga lalaki kag babayi, nga ang iban sa ila indi ko kilala—kag bisan ang mga interesado—naghatag sing kuwarta, pagkaon, kag bulong. . . . Kag ginhimo nila ini nga may daku nga kalipay.

“Hunahunaa kon ano ang akon ginabatyag sang nakabaton ako sing isa ka sobre nga may kuwarta kag sang masunod nga sulat: ‘Pinalangga nga Utod, nagapadala ako sa imo sing mainit nga panamyaw. Ginhatagan ako ni Nanay sing kuwarta agod ibakal sing sorbete, apang namat-od ako nga ihatag ini sa imo agod ibakal sing bulong. Palihug magpaayo ka sa indi madugay. Kinahanglan kita ni Jehova sa malawig nga tion. Kabay nga mag-ayo gid ikaw. Kag sugiri pa gid kami sing dugang, makatudlo nga mga istorya. Vova [bata nga lalaki].’ ” Huo, subong ginapakita sa sini nga kaso, ang bata kag tigulang sa kongregasyon makapalig-on sa tion sang balatian.—Filipos 2:25-29.

◆ Kapung-aw. Handum gid ni Teri nga mag-alagad subong payunir, ukon bug-os tion nga manugbantala sang Ginharian. Apang bangod sang mga kabudlayan, nag-untat sia sa pagpayunir. “Nagbatyag gid ako sing daku nga kasal-anan sa pagtinguha nga mag-alagad sa sini nga kahimtangan apang wala gani maisahan ka tuig,” siling niya. Sayop nga nagpati si Teri nga ang kahamuot ni Jehova nasandig lamang sa kadamuon sang iya pag-alagad sa iya. (Ipaanggid ang Marcos 12:41-44.) Bangod napung-awan gid, ginpain niya ang iya kaugalingon. Apang nag-abot dayon ang makapaumpaw nga bulig gikan sa kongregasyon.

Si Teri naghinumdom: “Ang isa ka mas magulang nga payunir nga babayi kinabubut-on nga nagbulig sa akon kag namati sa akon sang ginpabutyag ko sa iya ang akon balatyagon. Paghalin ko sa iya puluy-an, daw nahaw-asan ako. Sugod sadto, ining utod nga payunir upod sa iya bana, nga isa ka gulang sa kongregasyon, nagahatag sa akon sing hamili nga bulig. Ginatawgan nila ako kada adlaw agod kamustahon. . . . Ginapaupod nila ako kon kaisa sa ila pangpamilya nga pagtuon, nga nagpatudok sa akon sang pagkaimportante sang pagkasuod sang pamilya.”

Indi tumalagsahon nga ang madamo—bisan ang dedikado nga mga Cristiano—nga mapung-awan, magluya, kag masubuan. Daw ano kita ka mapinasalamaton nga ang mahigugmaon, dimakagod nga bulig matigayon sa kongregasyon sang Dios!—1 Tesalonica 5:14.

◆ Mga kalamidad kag mga aksidente. Ibutang ang imo kaugalingon sa isa ka pamilya nga may apat ka katapo nga nadulaan sang tanan nila nga pagkabutang sang masunog ang ila balay. Wala magdugay natigayon nila ang ginatawag nila nga “isa ka makapalig-on nga eksperiensia nga magatandog sa amon tubtob san-o kag magapatudok sa amon sang matuod nga gugma sa tunga sang katawhan ni Jehova.” Sila nagpaathag: “Nakabaton kami dayon sing tuman kadamo nga sinsero nga mga tawag sang pagsuporta kag pag-unong gikan sa amon mga kauturan sa espirituwal. Wala untat ang pagtunog sang telepono. Makapahulag gid ang matuod nga kabalaka kag gugma sang tanan nga nakahibi kami sa pagpasalamat.”

Wala magdugay, gin-organisar sang mga gulang ang daku nga grupo sang mga kauturan sa kongregasyon, kag sa sulod sang pila lang ka adlaw, nakatukod sila sing isa ka bag-o nga balay para sa sining pamilya. Ang isa ka kaingod nagtuaw: “Dapat makita ninyo ini! Nagatrabaho didto ang tanan nga sahi sang mga tawo—lalaki, babayi, mga itom, mga Katsila!” Maathag ini nga pamatuod sang utudnon nga gugma.—Juan 13:35.

Ang masigka-Cristiano naghatag man sa pamilya sing mga panapton, pagkaon, kag kuwarta. Ang amay nagkomento: “Natabo ini sang panahon sang Krismas diin ang tanan nagahatag sing mga dulot, apang makasiling gid kami nga wala sing isa ang nakatigayon sing isa ka matuod, sobra gid nga kaalwan kaangay sang amon nabaton.” Kag nagdugang sila: “Ang handumanan sa sunog nga natabo amat-amat na nga nagakadula kag ginabuslan sang ginapakabahandi nga handumanan sang maayong mga buhat kag maayong mga abyan. Ginapasalamatan namon ang amon mahigugmaon langitnon nga Amay, si Jehova, bangod kami may dalayawon, nahiusa nga pamilya sang mga kauturan sa duta, kag nagapasalamat gid kami nga bahin kami sini!”

Sa pagkamatuod, ina nga pagbulig indi posible, ukon indi dapat paabuton, sa tanan nga kapahamakan. Apang sa sini nga kahigayunan ginailustrar gid ang pagsakdag nga mahimo mahatag sang kongregasyon.

Kaalam Gikan sa Hitaas

Madamo ang nakasapo sing dugang nga bulig kag pagpalig-on gikan sa Cristianong kongregasyon. Ano ini? Amo ang mga publikasyon nga ginaaman sang “matutom kag mainandamon nga ulipon.” Ang nagapanguna sa sini amo ang mga balasahon nga Ang Lalantawan kag Magmata! Agod makaaman sing maalamon nga laygay kag praktikal nga instruksion, ini nga mga publikasyon nagasandig sing panguna sa kaalam sang Dios nga makita sa Biblia. (Salmo 119:105) Ang Makasulatanhon nga impormasyon ginasakdag sang responsable kag awtoritatibo nga pagpanalawsaw sa mga topiko subong sang kapung-aw sang panghunahuna, pag-ayo gikan sa pag-abuso, nagkalainlain nga mga problema sa katilingban kag ekonomiya, mga hangkat nga ginaatubang sang pamatan-on, kag mga kabudlayan nga kinaandan sa imol nga mga pungsod. Labaw sa tanan, ginapadaku sining mga publikasyon ang dalanon sang Dios subong amo ang labing maayo nga dalanon sang pagkabuhi.—Isaias 30:20, 21.

Kada tuig, ang Watch Tower Society nagabaton sing linibo ka sulat sang pagpasalamat. Halimbawa, tuhoy sa isa ka artikulo sang Magmata! nahanungod sa paghikog, ang isa ka pamatan-on nga lalaki sa Rusya nagsulat: “Bangod sang akon huyog sa kapung-aw, . . . madamo nga beses nga naghunahuna ako nga maghikog. Ini nga artikulo nagpalig-on sang akon pagpati nga buligan ako sang Dios nga atubangon ang akon mga problema. Luyag niya nga mabuhi ako. Nagapasalamat ako sa bulig nga ginhatag niya paagi sa sini nga artikulo.”

Kon ining wala nagapuas nga kabudlay sa sining kalibutan daw mabudlay gid atubangon, makapat-od ka nga may maayo nga palalipdan sa Cristianong kongregasyon. Sa pagkamatuod, kon ining kigas nga desyerto sang walay gugma nga sistema nagaubos sang imo kusog, masapwan mo ang makapapagsik nga tuburan sa organisasyon ni Jehova. Pagkatapos makaeksperiensia sina nga pagsakdag, ikaw man makapabutyag kaangay sa ginabatyag sang isa ka Cristianong babayi nga nagmadinalag-on sa pag-atubang sa grabe nga balatian sang iya bana kag nagsulat: “Bangod sang gugma kag pag-atipan nga ginpakita ninyo sa amon, nagabatyag ako nga si Jehova nagasapnay sa amon sa sini nga krisis. Nagapasalamat gid ako nga bahin ako sining makadalayaw nga organisasyon ni Jehova!”

[Footnote]

[Mga laragway sa pahina 26]

Makahatag kita sing makapalig-on nga bulig sa mga nagabalatian, namatyan, kag sa iban pa