Ginhimo Nila ang Kabubut-on ni Jehova

Ginpili ni Maria “ang Maayo nga Bahin”

ANG panahon ni Jesus, ang Judiyong mga babayi nalatiran sang rabiniko nga mga tradisyon. Busa, wala sila ginapatuon sang Kasuguan. Ang matuod, ang isa ka opinyon nga ginbalikwat sa Mishnah nagsiling: “Kon ang bisan sin-o nga tawo magtudlo sa iya anak nga babayi sang Kasuguan daw subong bala nga gintudluan niya sia sing kaulag.”—Sotah 3:4.

Subong resulta, madamong babayi sa Judea sang unang siglo ang indi edukado. “Wala sing pamatuod nga antes sang ministeryo ni Jesus ginpahanugutan ang Judiyong mga babayi nga mangin disipulo sang daku nga manunudlo, kag wala gid ginpahanugutan nga maglakbay upod sadto nga manunudlo, ukon magtudlo kay bisan sin-o luwas sa kabataan,” siling sang The Anchor Bible Dictionary. Bilang dugang pa nga pagpakanubo sa mga babayi, nagpatuman pa gani sing kasuguan ang relihiosong mga lider nga indi dapat makighambal ang isa ka lalaki sa isa ka babayi sa publiko!

Ginsikway ni Jesus yadtong didiosnon nga mga panimuot. Gintudluan niya ang mga babayi subong man ang mga lalaki, kag makita ang mga lalaki kag babayi sa tunga sang iya mga sumulunod. (Lucas 8:1-3) Isa ka bes, gin-agda si Jesus nga mangin bisita nanday Marta kag Maria. (Lucas 10:38) Ining duha ka babayi mga utod ni Lazaro, kag ining tatlo mga disipulo kag mahirop nga mga abyan ni Jesus. (Juan 11:5) Mahimo nga kilala ini nga pamilya, kay madamo ang nagduaw agod lugpayan sanday Marta kag Maria sang napatay si Lazaro. Kon ano man, ang natabo sa ila puluy-an sang nangin bisita si Jesus didto nag-aman sing mapuslanon nga leksion indi lamang para sa ila kundi para sa aton man.

Pagtuon sa Tiilan ni Jesus

Walay duhaduha nga nalangkag sanday Marta kag Maria sa pag-aman kay Jesus sing espesyal nga pagkaon, kag ayhan suno gid ini sa ila ikasarang sa pangabuhi. (Ipaanggid ang Juan 12:​1-3.) Apang, sang nag-abot ang ila bisita, si Maria “naglingkod sa tiilan sang Ginuo kag padayon nga nagapamati sa iya pulong.” (Lucas 10:39) Wala sing tradisyon sang tawo ang makapugong kay Jesus agod tudluan ang sinsero nga babayi nga luyag gid magtuon! Mahanduraw naton si Maria nga nagalingkod sa atubangan ni Jesus, subong sang isa ka estudyante nga maukod nga nagapamati sa panudlo sang iya Agalon.—Ipaanggid ang Deuteronomio 33:​3; Binuhatan 22:3.

Indi kaangay ni Maria, si Marta “natublag sa pag-atipan sa madamong hilikuton.” Sa paghanda sing espesyal nga pagkaon, masako gid sia sa iya mahago nga mga hilikuton. Sang ulihi, naugot si Marta nga ginpabay-an lang sia sa paghimo sang tanan nga buluhaton samtang ang iya utod nagalingkod sa tiilan ni Jesus! Gani gin-awat ni Marta ang mga pulong ni Jesus kay Maria, ayhan sing maparas, nga nagasiling: “Ginuo, wala ka bala sing kabalaka nga ginbayaan ako sang akon utod nga nagaisahanon sa pag-atipan sang mga butang? Busa, silinga sia nga magbulig sa akon.”—Lucas 10:40.

Wala gid man sing malain sa ginpangabay ni Marta. Aba, mabudlay ang maghanda sing pagkaon para sa isa ka grupo, kag indi ini abagahon sang isa lang ka tawo. Apang, bangod sa iya ginsiling, nakita ni Jesus ang kahigayunan nga magtudlo sing isa ka mapuslanon nga leksion. “Marta, Marta,” nagsiling sia, “nabalaka kag natublag ka nahanungod sa madamong butang. Apang, pila lamang ka butang ang kinahanglan, ukon isa lang gani. Sa iya bahin, ginpili ni Maria ang maayo nga bahin, kag indi ini pagakuhaon gikan sa iya.”—Lucas 10:41,42.

Wala ginsiling ni Jesus nga indi interesado si Marta sa espirituwal nga mga butang. Sa kabaliskaran, kilala sia ni Jesus subong isa ka babayi nga may hanuot nga diosnon nga debosyon.a Walay duhaduha nga amo ina ang nagtiklod sa iya, una sa tanan, nga agdahon si Jesus sa iya puluy-an. Apang, sa iya malulo nga pagbadlong, ginpakita ni Jesus nga nawasi ni Marta, paagi sa iya mabinalak-on nga pag-atipan sa pagkaon, ang tumalagsahon nga kahigayunan nga makabaton sing personal nga instruksion gikan sa Anak sang Dios.

Matuod, ang kultura sadto nga tion mahimo nagsakdag sa pagtamod nga ang balor sang isa ka babayi mapamatud-an paagi sa iya kasangkol sa mga hilikuton sa balay. Apang ginpakita sang mga pulong ni Jesus nga ang mga babayi, kaangay sang mga lalaki, mahimo makalingkod sa tiilan sang Anak sang Dios kag makabaton sang mga pinamulong sang kabuhi! (Juan 4:7-15; Binuhatan 5:14) Bangod sini, mas maayo kuntani nga naghanda si Marta sing pila lang ka putahe—ukon bisan isa na lang—agod may higayon sia nga maglingkod sa tiilan sang Agalon kag magtuon sa iya.—Ipaanggid ang Mateo 6:25.

Leksion Para sa Aton

Sa karon, yadtong mga nagasabat sa pangagda ni Jesus sa “pagkuha sing tubig sang kabuhi nga walay bayad” lunsay mga babayi kag mga lalaki. (Bugna 22:17) Ginpahulag sang gugma, ang iban—kaangay gid ni Marta—nagahimo sang ila bug-os nga masarangan sa pag-atipan sa mga kinahanglanon sang mga masigkatumuluo. Mabinuligon sila kag maabtik sa paghulag, kag nagasaad si Jehova nga padyaan ang ila mga pinangabudlayan bangod sang gugma. (Hebreo 6:10; 13:16) Ayhan ang iban mas kaangay ni Maria. Hipuson sila kag mapamalandungon. Ang ila kalangkag sa pagpamalandong sa Pulong sang Dios nagabulig sa ila nga magpabilin nga nakapanggamot sing malig-on sa pagtuo.—Efeso 3:17-19.

Ining duha ka sahi sang indibiduwal nagapuno sa importante nga kinahanglanon sa Cristianong kongregasyon. Apang sa ulihi, ang tanan dapat ‘magpili sang maayo nga bahin’ paagi sa pagpadaku una sa espirituwal nga mga butang. Paagi sa pagpat-od sa mas importante nga mga butang, matigayon naton ang kahamuot kag pagpakamaayo ni Jehova.—Filipos 1:9-11.

[Footnote]