Magpatawad sing Tinagipusuon
“Sa amo man nga paagi ang akon langitnon nga Amay magapakig-angot man sa inyo kon indi kamo magpatawad sing tinagipusuon, ang kada isa sang iya utod.”—MATEO 18:35.
1, 2. (a) Paano ginpakita sang isa ka kilala nga makasasala ang iya apresasyon kay Jesus? (b) Ano nga punto ang ginhatag ni Jesus bilang sabat?
AYHAN malain sia nga babayi, isa nga indi mo mapaabot nga maabtan sa puluy-an sang isa ka tawo nga relihioso. Kon may nakibot nga makita sia didto, ang ginhimo niya labi pa nga makapakibot. Ginpalapitan niya ang isa ka tawo nga may pinakamataas nga moral kag ginpakita ang iya apresasyon sa iya mga binuhatan, ginhugasan ang mga tiil sang tawo sang iya mga luha kag ginpahiran ini sang iya buhok.
2 Wala gintabog sadto nga tawo, si Jesus, ini nga babayi, “nga kilala sa siudad subong makasasala.” Apang, si Simon nga Fariseo, nga tag-iya sang balay, nabalaka nga makasasala sia. Nagsabat si Jesus paagi sa pagsugid tuhoy sa duha ka tawo nga may utang sa isa ka manugpautang. Ang isa nakautang sing daku—mga duha ka tuig nga suweldo sang isa ka mamumugon. Ang isa naman nakautang sing ikapulo nga bahin sina nga kantidad—kubos sa tatlo ka bulan nga suweldo. Sang ang duha indi makabayad, “hilway sila nga ginpatawad” sang gin-utangan nila. Sing maathag, may daku gid nga rason nga mangin mahigugmaon ang isa nga ginpatawad sang iya daku nga utang. Sa tapos mapahisanto sa mainayuhon nga buhat sang babayi, ginsugpon ni Jesus ang prinsipio: “Sia nga ginpatawad sing diutay, nagahigugma sing diutay.” Nian ginsilingan niya ang babayi: “Ang imo mga sala ginpatawad na.”—Lucas 7:36-48.
3. Ano ang dapat naton binagbinagon tuhoy sa aton kaugalingon?
3 Pamangkuta ang imo kaugalingon, ‘Kon ako yadto nga babayi ukon kon yadto ako sa amo nga kahimtangan kag ginpakitaan ako sing kaluoy, mangin matigdas bala ako nian nga indi pagpatawaron ang iban?’ Ayhan magasabat ka, ‘Aba indi!’ Walay sapayan sina, nagapati gid bala ikaw nga may huyog ka sa pagpatawad? Amo gid bala sina ang imo kinaugali? Masunson mo bala ina ginahimo sa gilayon, kag malaragway ka bala sang iban subong mapinatawaron? Tan-awon naton kon ngaa dapat ini hatagan sang tagsatagsa sa aton sing prangka kag mapinamalandungon nga igtalupangod.
Ang Pagpatawad Ginkinahanglan—Kag Ginpakita sa Aton
4. Ano nga katunayan ang dapat naton batunon tuhoy sa aton kaugalingon?
4 Subong sang nahibaluan gid nimo, indi ikaw himpit. Kon pamangkuton, batunon mo pa gani ini, ayhan nagahinumdom sang mga pinamulong nga makita sa 1 Juan 1:8: “Kon magsiling kita: ‘Wala kita sing sala,’ ginadayaan naton ang aton kaugalingon kag ang kamatuoran wala sa aton.” (Roma 3:23; 5:12) Para sa iban, ang pagkamakasasala mahimo nga nadayag paagi sa daku, makakilibang nga mga sala. Apang bisan pa wala mo mahibalui nga nakasala ka sing amo sini, madamo gid nga beses kag paagi nga wala mo masunod ang mga talaksan sang Dios—nga nakasala ka. Indi bala amo sina?
5. Tungod sa ano kita dapat magpasalamat sa Dios?
5 Gani, ang imo kahimtangan mahimo nga kaangay sang ginlaragway ni apostol Pablo: “Bisan pa patay kamo sa inyo mga paglapas kag sa indi sirkunsidado nga kahimtangan sang inyo unod, ang Dios nagbuhi sa inyo kaupod niya [ni Jesus]. Mainayuhon nga ginpatawad niya kita sa aton tanan nga paglapas.” (Colosas 2:13; Efeso 2:1-3) Talupangda ang dinalan nga “ginpatawad niya kita sa aton tanan nga paglapas.” Madamo ang ginalakip sina. Ang tagsatagsa sa aton may nagakaigo nga rason sa pagpakitluoy kaangay kay David: “Tungod sa imo ngalan, O Jehova, patawaron mo ang akon kasaypanan, kay ini mabug-at.”—Salmo 25:11.
6. Ano ang aton mapat-od may kaangtanan kay Jehova kag sa pagpatawad?
6 Paano mo—ukon ni bisan sin-o sa aton—mabaton ang kapatawaran? Ang yabi amo nga si Jehova nga Dios nahuyog sa pagpatawad. Amo ina ang kinaugali sang iya personalidad. (Exodo 34:6,7; Salmo 86:5) Sing halangpunon, ginapaabot sang Dios nga magdangop kita sa iya sa pangamuyo kag magpangayo sing pasaylo sa iya, magpangabay nga patawaron niya kita. (2 Cronica 6:21; Salmo 103:3, 10, 14) Kag naghimo sia sing legal nga kahimusan agod mahatag ina nga kapatawaran—ang halad nga gawad ni Jesus.—Roma 3:24; 1 Pedro 1:18, 19; 1 Juan 4:9, 14.
7. Sa anong paagi dapat mo ilugon si Jehova?
7 Dapat mo makita sa kahanda sang Dios sa pagpatawad ang huwaran sa kon paano mo dapat tamdon ang iban nga mga tawo. Ginpatalupangod ini ni Pablo, nga nagsulat: “Mangin malulo sa isa kag isa, mainawaon sing malum-ok, hilway nga nagapinatawaray sa isa kag isa subong nga ang Dios man paagi kay Cristo hilway nga nagpatawad sa inyo.” (Efeso 4:32) Wala sing duhaduha nga ang punto ni Pablo nagalakip sang pagtuon naton sa halimbawa sang Dios, kay ang masunod nga bersikulo nagapadayon: “Busa, mangin mga manug-ilog kamo sang Dios, subong nga mga anak nga hinigugma.” (Efeso 5:1) Nakita mo bala ang kaangtanan? Si Jehova nga Dios nagpatawad sa imo, gani—si Pablo mabaskog nga nangatarungan—dapat mo Sia ilugon kag mangin ‘mainawaon sing malum-ok, hilway nga nagapatawad’ sa iban. Apang pamangkuta ang imo kaugalingon, ‘Ginahimo ko bala ina? Kon indi ini ang akon kinaugali, ginapanikasugan ko bala ini, ginatinguhaan gid nga ilugon ang Dios sa pagkamapinatawaron?’
Dapat Kita Manikasog nga Magmapinatawaron
8. Ano ang dapat naton kilalahon tuhoy sa mga katapo sang aton kongregasyon?
8 Maayo hunahunaon nga sa Cristianong kongregasyon, may pila ka okasyon nga dapat naton ipakita ang diosnon nga dalanon sang pagpatawad. Tuhay ang katunayan. Matuod, ang aton Cristianong mga kauturan nga lalaki kag babayi nagapanikasog nga sundon ang huwaran ni Jesus sa gugma. (Juan 13:35; 15:12, 13; Galacia 6:2) Madugay na sila nagpangabudlay, kag nagapangabudlay gihapon, nga talikdan ang panghunahuha, panghambal, kag panghulag nga kinaandan sa sining malauton nga kalibutan. Luyag gid nila ipakita ang bag-ong personalidad. (Colosas 3:9,10) Apang, indi naton mapasapayanan ang katunayan nga ang tugob-globo nga kongregasyon, kag ang tagsa ka lokal nga kongregasyon, ginatapuan sang di-himpit nga mga tawo. Sa kabug-usan, mas maayo gid sila sangsa kon ano anay sila, apang indi gihapon sila himpit.
9, 10. Ngaa indi kita dapat makibot kon mag-utwas ang mga problema sa ulot sang mga kauturan?
9 Sa Biblia, ang Dios mahalungon nga nagasugid sa aton nga makapaabot kita sing pagkadi-himpit sa kongregasyon, sa tunga sang aton mga kauturan nga lalaki kag babayi. Binagbinaga, halimbawa, ang pinamulong ni Pablo nga narekord sa Colosas 3:13: “Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang bisan sin-o man may rason sa pagreklamo batok sa iban. Subong nga si Jehova hilway nga nagpatawad sa inyo, amo man ang himuon ninyo.”
10 Sing talalupangdon, ang Biblia nagapahanumdom diri sa aton sang kaangtanan sang pagpatawad sang Dios sa aton kag sang aton obligasyon kag kinahanglanon nga magmapinatawaron sa iban. Ngaa mabudlay ini? Bangod ginbaton ni Pablo nga ang isa mahimo nga “may rason sa pagreklamo batok sa iban.” Nahibaluan niya nga ini nga mga rason magaluntad. Mahimo nga nagluntad ini anay sang unang siglo, bisan sa tunga sang Cristianong “mga balaan,” nga ‘may paglaum nga natigana para sa ila sa mga langit.’ (Colosas 1:2,5) Gani mahanduraw bala naton nga mangin tuhay ini sa karon samtang ang kalabanan nga matuod nga mga Cristiano wala sing pamatuod sang balaan nga espiritu nga sila “mga pinili sang Dios, balaan kag hinigugma”? (Colosas 3:12) Gani, indi kita dapat maghinakop nga may daku gid nga sayop kon sa aton kongregasyon may mga rason sa pagreklamo—nasaklaw nga mga balatyagon bangod sang matuod ukon ginhunahuna nga mga kasaypanan.
11. Sa ano kita ginpaandaman ni disipulo Santiago?
11 Ang pinamulong ni Santiago, nga utod ni Jesus sa iloy, nagapakita man nga mapaabot gid naton nga sa pulupanag-on makasumalang kita sing mga sitwasyon nga kinahanglan naton nga patawaron ang aton mga kauturan. “Sin-o ang maalam kag mahinangpanon sa tunga ninyo? Ipakita niya gikan sa iya maayo nga paggawi ang iya mga binuhatan nga may kalulo sang kaalam. Apang kon kamo may mapait nga kahisa kag huyog nga makigbais sa inyo mga tagipusuon, indi kamo magpabugal kag magbinutig batok sa kamatuoran.” (Santiago 3:13,14) “Mapait nga kahisa kag huyog nga makigbais” sa mga tagipusuon sang matuod nga mga Cristiano? Huo, maathag nga ginapahangop sang pinamulong ni Santiago nga nag-utwas ini anay sa unang-siglo nga kongregasyon kag magautwas man ini sa karon.
12. Ano nga problema ang nag-utwas sa dumaan nga kongregasyon sang Filipos?
12 Ang isa ka matuod nga halimbawa nagahilabot sa duha ka hinaplas nga Cristiano nga may maayo nga reputasyon tungod sang ila mga panikasog kaupod ni Pablo. Mahimo nga madumduman mo ang tuhoy kanday Eudias kag Sintique, nga mga katapo sang kongregasyon sa Filipos. Bisan pa wala ginalaragway sing tul-id ang natabo, ginapakita sang Filipos 4:2,3 nga may pila ka problema sa tunga nila. Nagsugod bala ini bangod sa di-mapatugsilingon kag di-mainayuhon nga komento, ayhan ginhangop nga pagpakahuya sang isa ka himata, ukon pamatuod sang mapaindis-indison nga kahisa? Ano man ini, nangin malubha ini amo nga nabalitaan ni Pablo ang tuhoy sini didto sa Roma. Ayhan wala na magbugnuhanay ang duha ka espirituwal nga mag-utod, nga nagresulta sa paglikaw nila sa isa kag isa sa mga miting ukon sa pagkomento sing indi maayo tuhoy sa isa sa ila mga abyan.
13. Paano ginhusay nanday Eudias kag Sintique ang ila problema, nagahatag sa aton sing ano nga leksion?
13 Daw pamilyar bala ang bisan diin sini, kaangay sang natabo sa ulot sang pila ka katapo sang inyo kongregasyon ukon sang butang nga natabo sa imo? Ina nga sahi sang problema mahimo nga nagaluntad bisan karon sa isa ka kasangkaron. Ano ang aton himuon? Sa natabo sang nagligad, ginlaygayan ni Pablo yadtong duha ka dedikado nga utod nga babayi nga “mag-isa sing panghunahuna sa Ginuo.” Ayhan nagpasugot sila nga hambalan ini, athagon ang natabo, nagpabutyag sing kahanda sa pagpatawad, kag dayon nag-ilog gid sang mapinatawaron nga panimuot ni Jehova. Wala na sing iban pa nga hunahunaon kundi nga sanday Eudias kag Sintique nagmadinalag-on, kag sarang man kita magmadinalag-on. Ining mapinatawaron nga panimuot sarang karon maaplikar sing madinalag-on.
Makighidait—Magpatawad
14. Ngaa masunson nga posible kag labing maayo nga paligaron na lamang ang personal nga di-paghangpanay?
14 Ano gid ang kinahanglan sa pagpatawad kon may problema ka sa iban nga Cristiano? Sing tampad, wala sing isa ka simple nga paagi, apang ang Biblia nagahatag sing mabinuligon nga mga halimbawa kag maminatud-on nga laygay. Ang sadsaran nga ginarekomendar—bisan indi mahapos batunon kag himuon—amo ang kalimtan na lang ang natabo, paligaron ini. Sa masami kon may problema, subong sang natabo kanday Eudias kag Sintique, ang kada isa nagapati nga ang isa ang may sala ukon amo gid ang salaon. Gani sa sitwasyon subong sina, mahimo ikaw maghunahuna nga ang iban nga Cristiano amo gid ang salaon ukon nakahimo sing daku nga halit. Walay sapayan sina, mahimo mo na lang bala kalimtan ang natabo paagi sa pagpatawad? Dapat mo mahangpan nga kon, kag mahimo nga ini gid kon, ang iban nga Cristiano amo gid ukon amo ang bug-os nga salaon, yara gid ikaw sa posisyon nga paligaron na lang ang natabo subong napatawad kag tapos na.
15, 16. (a) Paano ginlaragway ni Miqueas si Jehova? (b) Ano ang buot silingon sang Dios sa ‘pagpaligad sa mga paglapas’?
15 Indi naton pagkalimtan ang Dios subong aton halimbawa sa pagpatawad. (Efeso 4:32–5:1) Tuhoy sa Iya huwaran sa pagpaligad sang mga kasaypanan, si manalagna Miqueas nagsulat: “Sin-o bala nga Dios ang kaangay sa imo, ang isa nga nagapatawad sang sayop kag nagapaligad sang paglapas sang nabilin sang iya panublion? Wala sia nagahupot sing dayon sang iya kaakig, kay nahamuot sia sa mahigugmaon nga kaayo.”—Miqueas 7:18.
16 Paagi sa paglaragway kay Jehova subong isa nga “nagapaligad sang paglapas,” ang Biblia wala nagasiling nga wala sia sing ikasarang sa pagdumdom sa mga kasaypanan, subong bala nga daw may amnesya. Binagbinaga ang mga halimbawa nanday Samson kag David, nga lunsay nakahimo sing mabug-at nga mga sala. Nadumduman sang Dios yadto nga mga sala madugay pa sang ulihi; bisan gani kita nakahibalo sang pila sang ila mga sala bangod ginpasulat ini ni Jehova sa Biblia. Apang, ang aton mapinatawaron nga Dios nagpakita sing kaluoy sa duha, nagpahamtang sa ila sa atubangan naton subong mga halimbawa sang pagtuo nga dapat ilugon.—Hebreo 11:32; 12:1.
17. (a) Ano nga paagi ang makabulig sa aton nga paligaron ang mga kasaypanan, ukon mga pagyubit, sang iban? (b) Kon panikasugan naton nga himuon ina, paano naton mailog si Jehova? (Tan-awa ang footnote.)
17 Huo, si Jehova ‘nagpaligad’a sang mga paglapas, subong sang sulitsulit nga ginpangabay ni David sa iya nga himuon. (2 Samuel 12:13; 24:10) Mailog bala naton ang Dios sa sini, subong handa nga paligaron ang mga kasakit sa balatyagon kag pagyubit nga nahimo sang aton mga masigkaalagad subong di-himpit nga mga tawo? Handurawa ang imo kaugalingon nga nagasakay sa isa ka manuglupad nga eroplano. Nagatan-aw sa guwa, nakita mo malapit sa paluparan kag hulugpaan sang eroplano ang isa ka kakilala nga mayubiton nga nagapadiwal. Nahibaluan mo nga nagamuhan sia kag mahimo nga ikaw ang ginahunahuna. Ukon mahimo nga wala gid sia nagahunahuna sa imo. Ano man ang matuod, samtang nagalibot ang eroplano sa paglupad sing mataas, naglabay kamo sa ibabaw sang babayi, nga daw pintok na lang ka diutay. Sa sulod sang isa ka oras ginatos ka milya na ang inyo kalayuon, kag ang iya makasalaklaw nga ginhimo madugay na nga malayo sa imo. Sa kaanggid, madamong beses nga magabulig ini sa aton nga magpatawad kon tinguhaan naton nga mangin kaangay ni Jehova kag maalamon nga paligaron ang pagyubit. (Hulubaton 19:11) Indi bala nga ang kasakit sa balatyagon daw indi na importante pagligad sang napulo ka tuig sugod karon ukon duha ka gatos ka tuig pasulod sa Milenyo? Ngaa indi na lang ini pagpaligaron?
18. Kon daw indi naton malimtan ang sala, ano nga laygay ang masunod naton?
18 Apang, sa talagsa nga okasyon, mahimo nga ginpangamuyo mo ang tuhoy sa problema kag gintinguhaan nga magpatawad, apang nagabatyag ka nga indi ka makapatawad. Ano nian ang himuon? Naglaygay si Jesus nga kadtuan ang nakasala kag tinguhaan nga husayon ang indi paghangpanay sing pribado agod matigayon ang paghidait. “Kon, nian, nagadala ka sang imo dulot sa halaran kag didto nadumduman mo nga ang imo utod may isa ka butang nga batok sa imo, bayai didto ang imo dulot sa atubangan sang halaran, kag maglakat ka; una makighidait ka sa imo utod, kag nian, sa pagbalik mo, ihalad ang imo dulot.”—Mateo 5:23, 24.
19. Ano nga panimuot ang dapat naton tigayunon kag ano nga panimuot ang dapat naton likawan samtang nagapanikasog kita nga makighidait sa aton utod?
19 Sing talalupangdon, si Jesus wala magsiling nga kadtuan mo ang imo utod agod hayluhon sia nga ikaw ang husto kag nga sia ang sayop. Ayhan sia ang sayop. Mahimo pa gani nga kamo nga duha ang may sayop. Ano man ang matuod, ang tulumuron indi dapat agod paakuon, pakanubuon, kon sa aton pa, ang pihak nga bahin. Kon amo sina ang imo paagi, halos pat-od gid ang kapaslawan. Ang tulumuron indi man dapat agod repasuhon ang tanan nga detalye tuhoy sa matuod ukon ginhunahuna nga sala. Kon ang matawhay nga paghambalanay sa espiritu sang Cristianong gugma nagapakita sing makapahanusbo nga indi paghangpanay subong kabangdanan sang problema, matinguhaan ninyo nga duha nga husayon ini. Apang bisan pa nga ang paghambalanay wala magresulta sa bug-os nga paghisugtanay, pirme bala ina kinahanglan? Indi bala mas maayo nga sa bisan paano nag-ugyon kamo nga duha nga luyag ninyo alagaron ang aton mapinatawaron nga Dios? Kon atubangon mo ina nga katunayan, mas mahapos para sa kada isa nga magsiling sing tinagipusuon, “Ginakasubo ko nga bangod sang aton pagkadi-himpit wala kita maghangpanay. Palihug, kalimtan na lang naton ini.”
20. Ano ang matun-an naton gikan sa halimbawa sang mga apostoles?
20 Dumduma nga ang mga apostoles nagbinais man, subong sang ang iban sa ila naghandum sing daku pa nga kadungganan. (Marcos 10:35-39; Lucas 9:46; 22:24-26) Nagtuga yadto sing kahuol, ayhan sing nasaklaw nga mga balatyagon, ukon sing daku pa nga pagyubit. Apang ginpaligad nila yadto nga mga indi paghangpanay kag nagpadayon sa pagpanghikot sing magkaupod. Ang isa sa ila nagsulat sang ulihi: “Sia nga nagahigugma sang kabuhi kag makakita sing mga adlaw nga maayo, magpugong sia sang iya dila gikan sa malain kag sang iya mga bibig gikan sa paghambal sing limbong, apang talikdan niya ang malain kag himuon ang maayo; pangitaon niya ang paghidait kag sundon ini.”—1 Pedro 3:10,11.
21. Anong maalamon nga laygay ang ginhatag ni Jesus tuhoy sa pagpatawad?
21 Nakita naton kaina ang isa ka bahin sang siklo: Ang Dios nagapatawad sang madamo nga kasal-anan nga nahimo naton sang nagligad, gani dapat naton sia ilugon kag patawaron ang aton mga kauturan. (Salmo 103:12; Isaias 43:25) Apang may isa pa ka bahin ini nga siklo. Sa tapos mahatag ang huwaran nga pangamuyo, si Jesus nagsiling: “Kon patawaron ninyo ang mga tawo sang ila mga paglapas, ang inyo langitnon nga Amay magapatawad man sa inyo.” Pagligad sang kapin sa isa ka tuig, ginpatuhuyan niya ini liwat, nagatudlo sa iya mga disipulo sa pagpangamuyo: “Patawara kami sang mga sala namon, kay nagapatawad man kami sa tagsatagsa nga nakautang sa amon.” (Mateo 6:12,14; Lucas 11:4) Nian, mga pila lamang ka adlaw sa wala pa sia mapatay, si Jesus nagdugang: “Kon nagatindog kamo nga nagapangamuyo, patawara ninyo ang bisan ano man nga yara sa inyo batok kay bisan sin-o; agod nga ang inyo Amay nga yara sa mga langit magapatawad man sa inyo sang inyo mga paglapas.”—Marcos 11:25.
22, 23. Paano maapektuhan sang aton kahanda sa pagpatawad ang aton palaabuton?
22 Huo, ang aton mga paglaum para padayon nga batunon ang pagpatawad sang Dios nasandig sing daku sa aton kahanda sa pagpatawad sa aton mga kauturan. Kon may personal nga problema nga mag-utwas sa ulot sang mga Cristiano, pamangkuta ang imo kaugalingon, ‘Indi bala mas importante nga matigayon ang pagpatawad sang Dios sangsa pamatud-an ko nga ang isa ka utod nga lalaki ukon babayi nagsayop sa diutay nga butang, sa indi gid importante nga sala, ukon sa pagpakita sing tawhanon nga pagkadi-himpit?’ Nahibaluan mo ang sabat.
23 Apang, ano abi kon ang problema mas mabug-at sangsa diutay lamang personal nga sala ukon problema? Kag san-o naaplikar ang laygay ni Jesus nga narekord sa Mateo 18:15-18? Binagbinagon naton sa masunod ini nga mga pamangkot.
[Footnote]
a Ang isa ka iskolar nagasiling nga ang Hebreong pagpaanggid nga gingamit sa Miqueas 7:18 “ginkuha gikan sa ginhimo sang isa ka manlalakbay nga nagalabay nga wala nagatan-aw sa butang nga indi niya luyag hatagan sing igtalupangod. Ang ideya nga ginapaalinton indi, nga ang Dios wala nagatan-aw sa sala, ukon ginakabig niya ini subong diutay lamang ukon indi importante, kundi wala niya ini ginatandaan sa partikular nga mga hitabo sa tuyo nga magsilot; nga sia wala nagasilot, kundi nagapatawad.”—Hukom 3:26; 1 Samuel 16:8.
Madumduman Mo Bala?
◻ Paano si Jehova nagahatag sa aton sing huwaran nga sundon tuhoy sa pagpatawad?
◻ Ano ang dapat naton dumdumon tuhoy sa mga yara sa kongregasyon?
◻ Sa kalabanan nga hitabo, ano ang dapat naton himuon tuhoy sa mga kasakit sa balatyagon ukon mga pagyubit?
◻ Kon kinahanglan, ano ang himuon naton agod makighidait sa aton utod?
[Laragway sa pahina 15]
Kon matabo ang indi paghangpanay sa isa ka Cristiano, tinguhai nga paligaron ini; sa pagligad sang tion ang problema amat-amat nga indi na importante