Si Jehova Isa ka Dios nga May Mahigugmaon nga Kaayo sa Akon
PANUGIRON NI JOHN ANDRONIKOS
Tuig 1956. Siam ka adlaw lamang sa tapos sang akon kasal, yari ako nga nagatindog sa atubangan sang korte sang apelasyon sa Komotiní, naaminhan nga Gresya. Nagalaum ako nga ang 12 ka bulan nga sentensia bangod sang akon pagbantala sing Ginharian sang Dios anulahon. Ang desisyon sang korte sang apelasyon—anom ka bulan nga pagkabilanggo—nagrumpag sadto nga paglaum kag nangin pamuno sang malawig nga serye sang mga kasaba. Apang, sa sini tanan, si Jehova isa gid ka Dios sang mahigugmaon nga kaayo para sa akon.
SANG natawo ako sang Oktubre 1, 1931, ang akon pamilya nagapuyo sa siudad sang Kaválla, ang Neapolis sang Macedonia nga ginduaw anay ni Pablo sadtong iya ikaduha nga paglakbay subong misyonero. Si Nanay nangin isa ka Saksi ni Jehova sang lima ka tuig ang akon edad, kag bisan halos indi sia makahibalo magbasa kag magsulat, ginhimo niya ang iya tanan nga masarangan agod ipatudok sa akon ang gugma sa Dios kag ang kahadlok sa iya. Ang akon amay konserbatibo kaayo nga tawo nga matig-a nga nagapanguyapot sa tradisyon sang Griego nga Ortodokso. Indi sia interesado sa kamatuoran sang Biblia kag nagpamatok sa akon iloy, sa masami sing masingki.
Busa, nagdaku ako sa isa ka nabahinbahin nga panimalay, diin ginsakit kag ginmaltrato ni Tatay si Nanay kag ginbiyaan pa gani kami. Sugod sa akon pagkabata, ginadala kami sang akon manghod nga babayi ni Nanay sa Cristianong mga miting. Apang, sang nag-15 ako, ang mga handum nga pinamatan-on kag ang espiritu sang pagkaindependiente nagpahilayo sa akon gikan sa mga Saksi ni Jehova. Walay sapayan, ang akon matutom nga iloy nagpanikasog gid, kag nagpatulo sing madamo nga luha sa panikasog niya nga buligan ako.
Bangod sang kaimulon kag sang akon malaut nga pagkabuhi, nagmasakit ako sing grabe kag naghigda sing kapin sa tatlo ka bulan. Amo sadto nga tion nga ang tuman ka mapainubuson nga utod nga lalaki, nga nagbulig sa akon iloy nga makatuon sing kamatuoran, nakahantop nga may sinsero ako nga gugma sa Dios. Nabatyagan niya nga mabuligan ako nga makapasag-uli sa espirituwal. Ang iban nagsiling sa iya: “Ginauyangan mo lang ang imo tion sa pagbulig kay John; indi na sia mangin interesado pa liwat sa espirituwal nga mga butang.” Apang ang pagpailob sini nga utod kag ang iya pagbatas sa pagbulig sa akon nagbunga. Sang Agosto 15, 1952, sa edad nga 21, ginsimbuluhan ko ang akon dedikasyon kay Jehova paagi sa pagpabawtismo sa tubig.
Bag-ong Kasal kag sa Prisuhan
Tatlo ka tuig sang ulihi nakilala ko si Martha, isa ka mahunahunaon-sa-espirituwal nga utod nga babayi nga may tumalagsahon nga mga kinaiya, kag sang ulihi nagnobyahanay kami. Isa ka adlaw nakibot gid ako sang ginsilingan ako ni Martha: “Karon nga adlaw nagaplano ako nga magbantala sa pamalay. Luyag mo bala mag-upod sa akon?” Tubtob sadto nga tion wala pa ako makapakigbahin sa sini nga sahi sang hilikuton, kay nagabantala ako pirme sing di-pormal. Sadto nga tion ang pagbantala nga hilikuton sa Gresya ginadumilian, kag dapat namon himuon ang amon pagbantala nga hilikuton sing patago. May madamo nga pagdakop, mga kaso sa korte, kag tuman kabug-at nga pamatbat sa pagkabilanggo subong resulta. Apang, indi ko maindian ang akon nobya!
Napangasawa ko si Martha sang 1956. Amo sadto, mga siam ka adlaw sa tapos sang amon kasal, nga ginpamatbatan ako sing anom ka bulan nga pagkabilanggo sang korte sang apelasyon sa Komotiní. Nagpahanumdom ini sa akon sang pamangkot nga ginpakiana ko anay sa isa ka Cristianong utod nga babayi, nga abyan sang akon iloy: “Paano ko ayhan mapakita nga isa ako ka matuod nga Saksi ni Jehova? Wala gid ako sing kahigayunan nga pamatud-an ang akon pagtuo.” Sang ginduaw ako sini nga utod sa prisuhan, ginpahanumdom niya sa akon yadto nga pamangkot kag nagsiling: “Karon mapakita mo na kon daw ano ang imo paghigugma kay Jehova. Amo ini ang imo teritoryo.”
Sang nahibaluan ko nga ang akon abogado nagtinguha nga makatipon sing inugpiansa, ginsilingan ko sia nga luyag ko tapuson ang akon sentensia. Daku gid ang akon kalipay nga pagkatapos sang anom ka bulan nga pagkabilanggo duha sang akon kaupod nga bilanggo ang nagbaton sa kamatuoran! Sa masunod nga pila ka tuig, madamo nga beses ako nga nakasaba bangod sang maayong balita.
Mga Pagpili nga Wala Gid Namon Ginhinulsulan
Sang 1959, duha ka tuig sa tapos ako mahilway, nagaalagad ako subong alagad sang kongregasyon, ukon nagadumala nga manugtatap, kag gin-imbitar ako sa pag-eskwela sa Kingdom Ministry School, isa ka kurso sa paghanas sa mga gulang sang kongregasyon. Apang, sa amo man nga tion, gintanyagan ako sing isa ka permanente nga posisyon sa ospital sang gobierno, isa ka trabaho nga makahatag sa akon kag sa akon pamilya sing kasiguruhan sa pinansial sa bug-os nga kabuhi. Ano ang akon pilion? Nagatrabaho na ako sing temporaryo sa ospital sa sulod sang tatlo ka bulan, kag naluyagan gid sang direktor ang akon pagtrabaho, apang sang nag-abot ang imbitasyon sa eskwelahan, wala sia magtugot nga magbakasyon anay ako bisan nga wala sing suweldo. Sa tapos sang isa ka mapinangamuyuon nga pagbinagbinag sa problema, nagpamat-od ako nga unahon ang mga intereses sang Ginharian kag wala ginbaton ang ginatanyag nga trabaho.—Mateo 6:33.
Sa amo man nga tion, ang mga manugtatap sa distrito kag sirkito nagduaw sa amon kongregasyon. Dapat namon hiwaton ang amon mga miting sing patago sa pribado nga mga balay bangod sang mabaskog nga pagpamatok sang Griegong Ortodokso nga mga klero kag sang mga awtoridad. Sa tapos sang isa sang mga miting, ginpalapitan ako sang manugtatap sa distrito kag ginpamangkot kon nahunahuna ko na nga magsulod sa bug-os tion nga pag-alagad. Ang iya panugyan nagtandog sang akon tagipusuon bangod amo gid man sini ang akon handum sugod sang nabawtismuhan ako. Nagsabat ako: “Luyag ko gid.” Apang, may dugang na ako nga responsabilidad sa pagpadaku sing isa ka bata nga babayi. Ang utod nagsiling sa akon: “Magsalig ka kay Jehova, kag buligan ka niya nga matuman ang imo mga plano.” Busa, nga wala nagapatumbaya sang akon responsabilidad sa pamilya, kami sang akon asawa nagpasibu sang amon mga kahimtangan, amo nga sang Disiembre 1960, nagsugod ako sa pag-alagad subong espesyal payunir sa nasidlangan nga Macedonia—isa sang lima lamang ka espesyal nga payunir sa pungsod.
Sa tapos mag-alagad subong espesyal payunir sing isa ka tuig, gin-agda ako sang sanga talatapan sa Atenas nga mag-alagad subong isa ka nagalakbay nga manugtatap. Sang magpauli ako gikan sa isa ka bulan nga paghanas sa sini nga sahi sang pag-alagad, kag samtang nagasugid pa sang akon eksperiensia kay Martha, ang direktor sang isa ka daku nga minahan sa manganese nagduaw kag nag-agda sa akon nga mangin manedyer sang departamento sa pag-ulay, nagtanyag sa akon sing daku-sing-suweldo nga kontrata sa sulod sang lima ka tuig, matahom nga balay, kag salakyan. Ginhatagan niya ako sing duha ka adlaw sa pagpamat-od. Sa liwat, nga wala gid sing pangalag-ag, nangamuyo ako kay Jehova: “Yari ako, ipadala ako.” (Isaias 6:8) Ugyon gid ang akon asawa. Nagasalig sa Dios, nagsugod kami sa nagalakbay nga hilikuton, kag wala gid kami ginpalugaw-an ni Jehova bangod sang iya mahigugmaon nga kaayo.
Pag-alagad sa Maayo kag Mabudlay nga Kahimtangan
Walay sapayan sang mga problema sa ekonomiya, nagpadayon kami kag gin-amanan ni Jehova sing mga kinahanglanon. Sang primero, nagaduaw ako sa mga kongregasyon nga sakay sang isa ka diutay nga motorsiklo, nga nagalakbay sing tubtob 500 kilometros. Madamo nga tion nga nabudlayan ako, kag naaksidente sing pila ka beses. Sang nagapauli gikan sa isa ka kongregasyon sang isa ka tigtulugnaw, nagatabok ako sa nagadaludo nga suba sang napatay ang motor, kag nabasa ako tubtob sa tuhod. Nian naplatan sing goma ang motorsiklo. Ang isa ka nag-agi nga may bomba nagbulig sa akon, kag nakaabot ako sa pinakamalapit nga minuro diin ginkay-o ko ang goma. Nakapauli gid man ako sang mga alas tres sa kaagahon, nga nagakusog sa katugnaw kag kapoy kaayo.
Sang isa ka okasyon, samtang nagalakbay sa lainlain nga mga kongregasyon, nadanlog ang akon motorsiklo kag nagtupa sa akon tuhod. Subong resulta, nagisi ang akon delargo kag nabulit sing dugo. Wala na ako sing iban pa nga delargo, busa sadto nga gab-i namulongpulong ako nga nagasuksok sang delargo sang isa ka utod, nga halog sa akon. Apang, wala sing kabudlayan nga makapatahaw sa akon handum nga alagaron si Jehova kag ang pinalangga nga mga kauturan.
Sa isa pa ka aksidente, nasamad ako sing grabe, nabali ang akon kamot kag naungab ang akon panampad. Amo sadto nga nagduaw ang akon manghod nga babayi, nga indi Saksi, nga nagapuyo sa Estados Unidos. Daw ano nga paumpaw sang ginbuligan niya ako nga makabakal sing salakyan! Sang nabalitaan sang mga kauturan sa sanga sang Atenas ang tuhoy sa akon pagkaaksidente, ginpadalhan nila ako sing makapalig-on nga sulat, kag lakip sa iban nga butang naglakip ini sang mga pulong sa Roma 8:28, nga nagasiling sa bahin: “Ginahimo sang Dios nga magkooperar sing tingob ang iya mga hilikuton para sa kaayuhan sadtong nagahigugma sa Dios.” Sa liwat kag liwat, ini nga pasalig nagmatuod gid sa akon kabuhi!
Isa ka Makalilipay nga Sorpresa
Sang 1963, nagapangabudlay ako upod sa isa ka espesyal payunir sa isa ka diutay nga minuro diin ang mga tawo indi interesado. Namat-od kami nga magbulagay, ang kada isa nagapangabudlay sa isa ka bahin sang dalan. Sa isa ka balay, wala gid lang madugay nga nagapanuktok ako sa ganhaan sang hinali nga ginbutong ako pasulod sang isa ka babayi kag ginsirhan kag ginkandaduhan ang ganhaan. Natingala ako, nagapalibog kon ano ang nagakatabo. Wala madugay, maabtik man niya nga ginpasulod ang espesyal payunir sa iya balay. Nian ang babayi nagsiling sa amon: “Hipos kamo! Indi maggiho!” Pagligad sang pila ka tion, nakabati kami sing akig nga mga tingog sa guwa. Ginapangita kami sang mga tawo. Sang mag-untat na ang kinagual, ang babayi nagsiling sa amon: “Ginhimo ko ini agod amligan kamo. Ginatahod ko kamo bangod nagapati ako nga matuod kamo nga mga Cristiano.” Ginpasalamatan namon sia sing hugot kag naghalin, nagbilin sa iya sing madamo nga literatura.
Katorse ka tuig sang ulihi, samtang nagatambong sa isa ka distrito nga kombension sa Gresya, ang isa ka babayi nagpalapit sa akon kag nagsiling: “Utod, nadumduman mo pa bala ako? Ako ang babayi nga nagtago sa inyo gikan sa mga manugpamatok sang nagkadto kamo sa amon minuro agod magpanaksi.” Nagsaylo sia sa Alemanya, nagtuon sang Biblia, kag nakig-upod sa katawhan ni Jehova. Karon, ang iya bug-os nga pamilya yara sa kamatuoran.
Sa pagkamatuod, sa sining tanan nga tinuig, ginpakamaayo kami sing madamo nga “sulat sang rekomendasyon.” (2 Corinto 3:1) Madamo sang nabuligan namon nga makatigayon sing ihibalo sa kamatuoran sa Biblia ang nagaalagad na karon subong mga gulang, ministeryal nga mga alagad, kag mga payunir. Daw ano ka makalilipay nga makita ang kadamuon sang mga manugbantala sa mga sirkito nga akon gin-alagaran sadtong 1960 nga nag-uswag sa kapin sa 10,000 ka sumilimba ni Jehova! Ang tanan nga kadayawan iya sang aton Dios sang mahigugmaon nga kaayo, nga nagagamit sa aton sa iya kaugalingon nga paagi.
“Sa Higdaan sang Pagbalatian”
Sa sulod sang amon mga tinuig sa nagalakbay nga hilikuton, nangin daku gid nga kabulig si Martha, nga may malipayon pirme nga panimuot. Apang, sang 1976, nagmasakit sia sing malubha kag ginpaidalom sa masakit nga operasyon. Nangin paralisado sia nga nagagamit sing wheelchair. Paano namon nasarangan ang mga kagastuhanan kag kahuol sa emosyon? Paagi sa pagsalig liwat kay Jehova, naeksperiensiahan namon ang iya mahigugmaon kag maalwan nga bulig. Sang nagbiya ako agod mag-alagad sa Macedonia, nagdayon si Martha sa balay sang isa ka utod nga lalaki sa Atenas agod magpabulong. Ginatawgan niya ako sa telepono upod ang makapalig-on nga mga pulong: “Maayo ako. Magpadayon ka, kag kon makagihogiho na liwat ako, updan ko ikaw sa akon wheelchair.” Kag amo gid sini ang iya ginhimo. Ang amon mahigugmaon nga mga kauturan gikan sa Bethel nagpadala sa amon sing madamo makapalig-on nga mga sulat. Pirme ginpahanumdom si Martha sang mga pulong sa Salmo 41:3: “Sakdagon sia ni Jehova sa hiligdaan sang pagbalatian; bayluhan mo ang bug-os niya nga higdaan sa iya pagbalatian.”
Bangod sang serioso nga problema sa panglawas, gindesisyunan sang 1986 nga mangin nagakaigo para sa akon nga mag-alagad subong espesyal payunir sa Kaválla, diin magapuyo ako malapit sa pamilya sang amon pinalangga nga anak nga babayi. Sang nagligad nga Marso napatay ang akon pinalangga nga si Martha, nga matutom tubtob sa katapusan. Sang wala pa sia mapatay, kon pamangkuton gani sia sang mga kauturan: “Kamusta ka?” pirme sia nagasabat sing: “Bangod suod ako kay Jehova, maayo gid ako!” Kon nagahanda kami para sa mga miting ukon makabaton sing makagalanyat nga mga imbitasyon nga mag-alagad sa mga duog nga bugana ang ani, pirme anay nagasiling si Martha: “John, makadto kita kon diin daku ang kinahanglanon.” Wala gid niya madula ang iya makugi nga espiritu.
Sang nagligad nga pila ka tuig, dapat ko man atubangon ang akon daku nga problema sa panglawas. Sang Marso 1994, nasayasat nga may makatalagam-sa-kabuhi ako nga balatian sa tagipusuon, kag indi malikawan nga magpaopera. Sa liwat nabatyagan ko ang mahigugmaon nga kamot ni Jehova nga nagasakdag sa akon sa ital-tal nga tion. Indi ko gid malipatan ang pangamuyo sang isa ka manugtatap sa sirkito sa kilid sang akon higdaan sang nagguwa ako sa intensive care, subong man ang pagsaulog sang Memoryal nga gindumalahan ko didto mismo sa akon hulot sa ospital upod sa apat ka pasyente nga nagpakita sing pila ka interes sa kamatuoran.
Si Jehova Nangin Kabulig Namon
Madasig nga nagaligad ang panahon, kag ang amon lawas nagaluya, apang ang amon espiritu nagabag-o paagi sa pagtuon kag pag-alagad. (2 Corinto 4:16) Karon 39 na ka tuig sugod sang magsiling ako, “Yari ako! Ipadala ako.” Nangin makaalayaw, makalilipay, kag makapaladya gid ini nga kabuhi. Huo, kon kaisa nagabatyag ako nga “nasit-an kag imol,” apang makasiling ako upod ang pagsalig kay Jehova: “Ikaw ang akon kabulig kag Manug-aman sang akon palalagyuhan.” (Salmo 40:17) Nangin isa gid sia ka Dios nga may mahigugmaon nga kaayo sa akon.
[Laragway sa pahina 25]
Upod kay Martha sang 1956
[Laragway sa pahina 26]
Ang pantalan sa Kaválla
[Laragway sa pahina 26]
Upod kay Martha sang 1997