Ginasabat sang Biblia ang Importante nga mga Pamangkot sa Aton Panahon

MAPUSLANON bala ang Biblia karon? Agod mangin huo ang sabat, dapat gid hatagan sining dumaan nga libro ang mga bumalasa sini sing giya sa mga topiko nga makawiwili kag mapuslanon karon. Nagahatag bala ang Biblia sing mapuslanon nga laygay sa mga topiko nga importante gid sa kalibutan karon?

Binagbinagon naton ang duha ka isyu karon. Sa paghimo sini, usisaon naton ang ginasiling sang Biblia tuhoy sining mga butang.

Ngaa Ginatugutan sang Dios ang Pag-antos?

Bangod sang mga kahimtangan sa kalibutan karon, ang isa sa labing kinaandan nga mga pamangkot amo: Ngaa ginatugutan sang Dios ang inosente nga mga tawo nga mag-antos? Nagakabagay ini ipamangkot sanglit kapin kag kapin nga mga tawo ang apektado sang masingki nga krimen, kagarukan, pagpapas sa isa ka rasa, personal nga trahedya, kag iban pa.

Halimbawa, sang Hunyo 1998 ang express nga tren nagbunggo sa taytay sa naaminhan nga Alemanya, nga nagpatay sa kapin sa isa ka gatos ka pasahero. Bisan ang eksperiensiado nga mga mediko kag mga bombero nga nag-atipan sa mga nasamaran kag sa mga patay nahanusbo sa mga bangkay. Ang obispo sang Evangelical Church namangkot: “Mahal nga Dios, Ngaa dapat pa ini matabo?” Ang obispo mismo wala makasabat.

Ginapakita sang eksperiensia nga kon ang inosente nga mga tawo mag-antos sing malaut nga indi makatigayon sing paathag tuhoy sa kabangdanan, nagasakit ang ila buot kon kaisa. Diri sini makabulig ang Biblia, bangod ginapaathag sini kon ngaa napaidalom ang inosente nga mga tawo sa kalautan kag pag-antos. Sang gintuga ni Jehova nga Dios ang duta kag ang tanan nga butang sa sini, wala niya gintuyo nga gamuhon ang katawhan sang kalautan kag pag-antos. Paano kita makapat-od? Bangod sang matapos ang iya pagpanuga, “nakita sang Dios ang tanan nga butang nga ginhimo niya kag, yari karon! tama gid ini kaayo.” (Genesis 1:31) Pamangkuta ang imo kaugalingon, ‘Kon makakita ako sing isa ka butang nga malaut, isiling ko bala nga “tama gid ini kaayo”?’ Indi gid! Amo man, sang nagsiling ang Dios nga ang tanan nga butang ‘tama gid kaayo,’ wala anay sing agi sang kalautan ang duta. Gani san-o kag paano nagsugod ang kalautan?

Wala madugay sa tapos matuga ang aton unang mga ginikanan, sanday Adan kag Eva, ang isa ka gamhanan espiritu nga tinuga nagpalapit sa babayi kag naghangkat sa pagkamaminatud-on ni Jehova kag sa pagkamatarong sang iya pagkasoberano. (Genesis 3:1-5) Ining tinuga, si Satanas nga Yawa, nagsiling sang ulihi nga ang mga tawo indi kuno magpabilin nga matutom sa Dios sa idalom sang kapiutan. (Job 2:1-5) Paano naghulag si Jehova sa sini nga kahimtangan? Gintugutan niya nga magligad ang tion agod mangin maathag nga ang mga tawo indi makatuytoy sing madinalag-on sang ila mga tikang nga hilway sa iya. (Jeremias 10:23) Kon maghikot ang mga tinuga batok sa mga kasuguan kag mga prinsipio sang Dios, ang resulta amo ang sala, nga nagadul-ong sa makahalalit nga mga kahimtangan. (Manugwali 8:9; 1 Juan 3:4) Apang, walay sapayan sining mabudlay nga mga kahimtangan, nahibaluan ni Jehova nga ang iban nga mga tawo magapabilin nga matutom sa iya.

Kutob sadtong masubo nga pagrebelde sa Eden, mga 6,000 ka tuig na ang nagligad. Madugay pa bala ini? Ginlaglag na kuntani ni Jehova si Satanas kag ang iya mga sumalakdag mga siglo sang una. Apang indi bala mas maayo nga maghulat tubtob madula ang tanan mahunahuna nga duhaduha tuhoy sa kinamatarong sang pagkasoberano ni Jehova kag sang katutom sang mga tawo sa iya? Indi bala matuod sa karon hudisyal nga mga sistema nga nagakinahanglan sing tinuig ang isa ka kaso sa hukmanan agod mapamatud-an kon sin-o ang husto kag kon sin-o ang sala?

Bangod sang pagkaimportante sang mga hulusayon nga nagaatubang kay Jehova kag sa katawhan—ang bug-os uniberso nga pagkasoberano kag ang katutom sang mga tawo—maalamon gid ang Dios sa pagtugot nga magligad ang tion! Karon makita naton sing maathag kon ano ang nagakatabo kon pasapayanan sang mga tawo ang mga kasuguan sang Dios kag magkinaugalingon. Ang resulta amo ang lapnag nga kalautan. Kag amo sina kon ngaa tuman kadamo sang inosente nga mga tawo ang nagaantos karon.

Apang, makalilipay nga ginapakita sang Pulong sang Dios nga indi magapadayon tubtob san-o ang kalautan. Sa pagkamatuod, tapuson sa dili madugay ni Jehova ang kalautan kag ang mga nagahimo sini. “Kon tuhoy sa mga malauton,” siling sang Hulubaton 2:22, “utdon sila gikan sa duta; kag tuhoy sa mga maluib, gabuton sila gikan sa sini.” Sa pihak nga bahin, ang mga matutom sa Dios makapaabot sa tion, nga karon malapit na, nga “wala na sing kamatayon, ukon kalisod ukon paghibi ukon kasakit pa.”—Bugna 21:4.

Gani, maathag nga ginapaathag sang Biblia kon ngaa nagaantos ang mga inosente. Ginapasalig man kita sini nga matapos na sa dili madugay ang kalautan kag pag-antos. Apang, samtang nagaagom kita sang mga kabudlayan sa kabuhi karon, kinahanglan naton ang sabat sa isa pa ka importante nga pamangkot.

Ano ang Katuyuan sang Kabuhi?

Ayhan labi na gid karon sangsa bisan ano iban pa nga tion sa maragtas sang katawhan nga ang mga tawo nagatinguha sa paghibalo kon ano ang kahulugan sang kabuhi. Madamo ang nagapamangkot sa ila kaugalingon, ‘Ngaa nagakabuhi ako? Paano ko masapwan ang kahulugan sa akon kabuhi?’ Nagapamangkot sila sini bangod sang nanuhaytuhay nga mga kahimtangan.

Ang kabuhi sang isa mahimo maguba sang isa ka personal nga trahedya. Halimbawa, sang maaga nga bahin sang 1998 isa ka 12-anyos nga bata nga babayi nga nagaistar sa Bavaria, Alemanya, ang ginkidnap kag ginpatay. Isa ka tuig sang ulihi, ginbaton sang iya iloy nga ginhinguyang niya ang tagsa ka adlaw sa pagpangita sing katuyuan sa kabuhi—nga sa walay pulos. Ang pila ka pamatan-on nagapalibog tuhoy sa kahulugan sang kabuhi. Nagapangita sila sing kalig-unan, kaayawan, kag pagbatyag nga ginabaton, nga nagdul-ong lamang sa pagkawalay paglaum sa lapnag nga pagkasalimpapaw kag kagarukan. Nagakabuhi ang iban nga mga indibiduwal nga karera ang importante sa ila, apang natukiban nila nga ang gahom, kabantugan, kag mga pagkabutang wala nagapaayaw sang nasulod nga handum nga masapwan ang rason sa ila pagluntad.

Bisan ano man ang kabangdanan nga makapamangkot ang isa ka tawo tuhoy sa katuyuan sang kabuhi, nagakinahanglan ini nga pamangkot sing serioso kag makaalayaw nga sabat. Sa liwat, makabulig gid ang Biblia. Ginapakilala sini si Jehova subong Dios sang katuyuan, ang isa nga may maayo nga mga rason sa tanan nga iya ginahimo. Mamangkot kami, Magapatindog bala ikaw sing balay nga wala sing rason? Mahimo nga indi, bangod ang pagpatindog sing balay nagakinahanglan sing daku nga puhunan nga kuwarta kag magalawig sing binulan ukon tinuig. Magapatindog ka sing balay agod puy-an mo ukon sang iban. Ang amo man nga pangatarungan maaplikar kay Jehova. Wala sia nagpangabudlay sa pagtuga sa duta kag sa buhi nga mga butang sa sini nga wala sing rason, sing katuyuan. (Ipaanggid ang Hebreo 3:4.) Ano ang iya katuyuan para sa duta?

Ang tagna ni Isaias nagapakilala kay Jehova subong “ang matuod nga Dios, ang Manughuman sang duta kag ang Magbubuhat sini.” Sa pagkamatuod, sia “ang Isa nga nagpalig-on [sang duta], nga wala magtuga sini nga wala sing pulos, nga naghuman sini agod puy-an.” (Isaias 45:18) Huo, kutob pa sang gintuga ang duta, tuyo na ni Jehova nga puy-an ini. Ang Salmo 115:16 nagasiling: “Nahanungod sa mga langit, ang mga langit iya ni Jehova, apang ginhatag niya ang duta sa mga anak sang mga tawo.” Busa ginapakita sang Biblia nga gintuga ni Jehova ang duta agod puy-an sang matinumanon nga mga tawo, nga magaatipan sini.—Genesis 1:27,28.

Ginbag-o bala ni Jehova ang iya katuyuan bangod sang pagrebelde nanday Adan kag Eva? Wala. Paano kita makapat-od? Ti, binagbinaga ini nga punto: Ang Biblia ginsulat linibo ka tuig sa tapos sang pagrebelde sa Eden. Kon gintalikdan sang Dios ang iya orihinal nga katuyuan, ngaa wala ina ginhinambitan sa Biblia? Ang maathag nga konklusion amo nga ang iya katuyuan para sa duta kag katawhan wala magbag-o.

Dugang pa, ang katuyuan ni Jehova wala gid nagakapaslawan. Paagi kay Isaias, ang Dios nagapasalig: “Subong nga ang ulan nagatupa, kag ang niebe, gikan sa mga langit kag wala nagabalik sa sina nga duog, luwas kon mabunyagan sini ang duta kag mapabunga kag mapasalingsing ini, kag ang binhi mahatag sa manugsab-ug kag ang kalan-on sa manugkaon, amo man ang pulong nga nagaguwa sa akon baba. Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga ginpadalhan ko sini.”—Isaias 55:10,11.

Kon Ano ang Ginapaabot sang Dios sa Aton

Maathag, kon amo, nga makasalig kita sa katumanan sang katuyuan sang Dios nga ang duta puy-an sing dayon sang matinumanon nga mga tawo. Agod malakip kita sadtong makatigayon sing pribilehiyo nga mabuhi sing permanente sa duta, dapat naton himuon ang ginsiling sang maalam nga si Hari Solomon: “Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.”—Manugwali 12:13; Juan 17:3.

Ang pagkabuhi nahisuno sa katuyuan ni Jehova sa katawhan nagakahulugan sing pagkilala sa matuod nga Dios kag pagpahisuno sa mga ginapatuman niya sa Balaan nga Kasulatan. Kon himuon naton ini karon, matigayon naton ang paglaum nga kabuhi nga walay katapusan sa isa ka paraiso nga duta, diin padayon kita nga magatuon sang bag-ong mga butang tuhoy sa Dios kag sa iya matahom nga tinuga. (Lucas 23:43) Daw ano ka makakulunyag nga palaabuton!

Madamo sa mga nagpangita sing katuyuan sa kabuhi ang nagdangop sa Biblia kag nakasapo sing daku nga kalipay karon mismo. Halimbawa, wala sing makita nga kahulugan sa kabuhi ang pamatan-on nga si Al­fred. Naugot sia sa pagpakigbahin sang relihion sa inaway, kag nasubuan sia sa pagkasalimpapaw kag kagarukan sa politika. Nagkadto si Alfred sa mga Indian sa Aminhan nga Amerika sa paglaum nga makatigayon sing kasanagan tuhoy sa katuyuan sang kabuhi, nga nagpauli lamang sa Europa nga nalugaw-an. Nadulaan sing paglaum, nagliso sia sa droga kag sa wala sing kontrol nga musika. Apang, ang tayuyon kag mahalungon nga pag-usisa sa Biblia nagbulig sang ulihi kay Alfred nga mahangpan ang matuod nga katuyuan sa kabuhi kag masapwan ang kaayawan.

Masaligan nga Kapawa sa Aton Banas

Ano, kon amo, ang mahinakop naton tuhoy sa Biblia? Mapuslanon bala ini karon? Huo, sa pagkamatuod, bangod nagatanyag ini sang panuytoy sa mga isyu karon. Ginapaathag sang Biblia nga indi ang Dios ang ginhalinan sang kalautan kag ginabuligan kita nga masapwan ang makaalayaw nga katuyuan sa kabuhi. Dugang pa, madamo ang masiling sang Biblia nahanungod sa iban pa nga mga butang nga ginakawilihan karon. Ginabinagbinag sang Pulong sang Dios ang mga topiko subong sang pag-asawahay, pagpadaku sa bata, kaangtanan sa iban nga tawo, kag paglaum sang mga patay.

Kon wala mo pa ina mahimo, palihug usisaa ang mga kaundan sang Biblia. Sa tion nga matukiban mo ang matuod nga bili sang mga panuytoy sini para sa kabuhi, mahimo nga mabatyagan mo ang nabatyagan sang salmista nga naglaum kay Jehova nga Dios para sa panuytoy kag nag-amba: “Ang imo pulong suga sa akon tiil, kag kapawa sa akon banas.”—Salmo 119:105.

[Laragway sa pahina 6]

Nahibaluan mo bala kon ngaa ginatugutan sang Dios nga mag-antos ang mga inosente?

[Laragway sa pahina 7]

Sarang mo maagom ang kabuhi nga may katuyuan