Ang Gilead Nagapadala sing mga Misyonero “Tubtob sa Ukbong sang Duta”

SA SULOD sang kapin na sa tunga ka siglo karon, ang Watchtower Bible School of Gilead nagapadala sing mga misyonero. Sang Septiembre 11, 1999, naggradwar ang ika-107 nga klase sang Gilead. May yara ini 48 ka estudyante gikan sa 11 ka pungsod, kag gintangdo sila nga mag-alagad sa 24 ka nanuhaytuhay nga kadutaan. Magabuylog sila sa linibo ka iban pa nga misyonero, nga nagtungod sing importante nga papel sa pagtuman sang katapusan nga pinamulong ni Jesus antes magkayab sa langit. Gintagna niya nga ang iya mga disipulo “mangin mga saksi [niya] . . . tubtob sa ukbong sang duta.”—Binuhatan 1:8.

Ang programa sang gradwasyon, nga ginhiwat sa Watchtower Educational Center sa Patterson, New York, nangin isa gid ka daku nga okasyon sa matahom nga palibot. Nalipay gid ang naggradwar nga mga estudyante sa pagtambong sang ila mga paryente, suod nga mga abyan, kag mga bisita. Lakip ang mga nagpamati kag nagtan-aw paagi sa audio kag video nga mga koneksion sa Brooklyn kag Wallkill nga mga opisina, may kabug-usan nga tumalambong nga 4,992.

Mag-alagad kay Jehova kag sa Isigkatawo sing Matutom

“Sin-o ang Dampig kay Jehova?” Amo yadto ang tema sang nagabukas nga pamulongpulong ni Carey Barber, isa ka katapo sang Nagadumala nga Hubon kag tsirman sang programa sa gradwasyon. Ginpaathag niya nga amo ini anay ang problema nga gin-atubang sang mga Israelinhon sang panahon ni Moises. Ginpahanumdom ang naggradwar nga mga estudyante kag ang mga tumalambong nga madamo sang mga Israelinhon ang napatay sa kahanayakan bangod wala sila magpabilin nga matutom dampig kay Jehova. Sa tapos mabiktima sang idolatriya, “naglingkod [sila] sa pagkaon kag sa pag-inom. Nian nagtindog sila sa paglipaylipay.” (Exodo 32:1-29) Ginpaandaman ni Jesus ang mga Cristiano sing amo man nga katalagman: “Hatagi sing igtalupangod ang inyo kaugalingon nga ang inyo mga tagipusuon indi gid mabug-atan sang sobra nga pagkaon kag lakas nga pag-inom kag mga kabalaka sa kabuhi, kag yadto nga adlaw magaabot sa inyo sing hinali.”—Lucas 21:34-36.

Ang masunod nga humalambal, si Gene Smalley, sang Departamento sa Pagsulat, nagpamangkot sa naggradwar nga mga estudyante: “Kamo Bala Mangin Paregoriko?” Ginpaathag niya nga ang Griegong tinaga nga pa·re·go·riʹa gingamit sa Ingles subong ang ngalan sang isa ka gintimpla nga bulong nga nagapahaganhagan sang sakit. Apang, gingamit ni Pablo ining Griegong tinaga sa Colosas 4:11 sa paglaragway sa iya mga masigkamanugpangabudlay. Sa New World Translation, ining tinaga ginbadbad nga “nagapabakod nga bulig.”

Sa ila mga teritoryo ang naggradwar nga mga misyonero mahimo mangin modernong-adlaw nga mga paregoriko sing praktikal gid sa paagi nga mangin isa ka mapainubuson nga nagapabakod nga bulig sa lokal nga mga kauturan kag paagi sa pagpabanaag sing mabuligon kag mahigugmaon nga espiritu sa pagpakig-upod sa mga masigkamisyonero.

Masunod nga nagpamulongpulong si Daniel Sydlik, isa ka katapo sang Nagadumala nga Hubon, sa tema nga “Pagkabuhi Suno sa Bulawanon nga Pagsulundan.” Ginpaathag niya nga ang halangdon nga prinsipio nga ginpahamtang ni Jesus sa Mateo 7:12, nga “ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila,” nagalakip sang paghimo sing positibo nga mga butang para sa iban, indi lamang paglikaw sa paghimo sing halit.

Agod mahimo ini sing madinalag-on, tatlo ka butang ang kinahanglanon: makakita nga mata, mahinuklugon nga tagipusuon, kag mabuligon nga kamot. Sa pagsumaryo, sia nagsiling: “Kon mabatyagan naton ang handum sa pagbulig, dapat kita magbulig sa gilayon. Dapat kita manikasog sing dugang pa nga himuon sa iban ang luyag naton nga himuon nila sa aton.” Ilabi na nga matuod ini sa mga misyonero nga magakadto sa iban nga kadutaan agod magbulig sa mga tawo nga himuon ang matuod nga Cristianismo.

Ang mga Instruktor Naghatag sing Mahigugmaon nga mga Pahanumdom

Ginpalig-on sang instruktor sang Gilead nga si Karl Adams ang naggradwar nga mga misyonero nga “Magpadayon sa Pagtubo.” Sa ano nga bahin? Una, sa ihibalo kag sa ikasarang sa paggamit sini sing maayo. Sa Gilead, natun-an sang mga estudyante kon paano magpanalawsaw agod makuha ang impormasyon kag danyag sa likod sang mga kasaysayan sa Biblia. Ginpalig-on sila nga binagbinagon kon paano ang tagsa ka hitabo dapat mag-apektar sang ila kabuhi. Ginpalig-on sila nga padayon nga himuon ini.

“Ikaduha, padayon nga magtubo sa gugma. Ang gugma isa ka butang nga, kon ginaatipan, nagatubo. Kon ginapabay-an, mahimo ini mapatay,” siling ni Utod Adams. (Filipos 1:9) Karon, subong mga misyonero, kinahanglan magtubo sila sa gugma sa idalom sang nanuhaytuhay nga kahimtangan. Kag ikatlo: “Padayon kamo sa pagtubo sa di-bagay nga kaayo kag ihibalo sang aton Ginuo kag Manluluwas nga si Jesucristo.” (2 Pedro 3:18) “Amo ini ang dalayawon nga kaayo nga ginpakita ni Jehova paagi sa iya Anak,” siling sang humalambal. “Samtang nagatubo kita sa apresasyon sa sinang di-bagay nga kaayo, ang aton kalipay nagadugang sa paghimo sang kabubut-on sang Dios kag sa pagtuman sang gintangdo niya sa aton nga himuon.”

Ang isa pa ka instruktor sa Gilead, si Mark Noumair, nagpamulongpulong sa tema nga “Batuna Ini Upod ang Gugma kag Masarangan Mo Ini.” Sia naglaygay: “Tun-i nga batunon ang mabudlay nga mga kahimtangan sa kabuhi sang misyonero upod ang gugma, kag masarangan mo ini. Ginadisiplina lamang ni Jehova ang mga ginahigugma niya. Bisan pa ginabatyag mo nga ang pila ka laygay daw indi nagakaigo, may pinilian, ukon di-makatarunganon, ang gugma kay Jehova kag ang imo kaangtanan sa iya magabulig sa imo nga batunon ini.”

Ginpatalupangod ni Utod Noumair nga ang misyonero nga pag-alagad nagalakip sing madamo nga katungdanan. “Apang ang katungdanan nga wala sing gugma magahimo sa imo nga di-kontento. Kon wala sing gugma, ang imo katungdanan sa puluy-an—subong sang pagluto, pagpamalaklon, paghugas sing prutas, pag-init sing tubig—mahimo mangin makatalaka gid. Dapat ka magdulog kag magpamangkot sang imo kaugalingon, ‘Ngaa ginahimo ko ini?’ Ti, kon silingan mo ang imo kaugalingon, ‘Ang akon mga panikasog nagabulig sa kapagros kag kalipay sang akon mga masigkamisyonero,’ nian indi ini mabudlay himuon.” Sa pagsumaryo, sia naglaygay: “Kon bala pagbaton ini sa disiplina, pagtuman sang imo mga tulumanon sa pagmisyonero, ukon paghusay sa mga di-paghangpanay, ang paghimo sini upod ang gugma magabulig sa imo nga mabatas ang imo asaynment. ‘Ang gugma wala gid nagakapaslawi.’”—1 Corinto 13:8.

Masunod, ang instruktor sa Gilead nga si Wallace Liverance ang nangin tsirman sang liwat nga pag-arte sang pila ka makalilipay nga mga inagihan sang mga estudyante samtang nagapanghikot upod sa lokal nga mga kongregasyon. Dugang pa sa pagpamalaybalay, gingamit nila ang paghanas sa ila nga mangin misyonero sa pagpangita sa mga tawo sa mga paradahan sang bus, mga lalabhan, mga estasyon sang tren, kag sa iban pa nga lugar.

Ang Eksperiensiado nga mga Misyonero Naghatag Sing mga Pasalig

Kon ang bag-o nga mga misyonero nagakadto sa iban nga pungsod, may dapat bala kabalak-an? Masarangan bala nila ang mga hangkat sa teritoryo sa iban nga pungsod? Ano ang ginahimo sang mga sanga talatapan agod buligan ining mga bag-o nag-abot nga mangin madinalag-on? Agod masabat ini kag ang iban pa nga mga pamangkot, gin-interbyu ni Steven Lett, sang Departamento sa Pag-alagad, kag ni David Splane, sang Departamento sa Pagsulat, ang mga kauturan nga lalaki nga nag-eskwela sina nga tion sa branch school sa Watchtower Educational Center. Ang gin-interbyu nga mga kauturan nagaalagad sa mga komite sang sanga sa Espanya, Hong Kong, Liberia, Benin, Madagascar, Brazil, kag Japan.

Ining eksperiensiado nga mga alagad ni Jehova, madamo sa ila ang nag-alagad subong misyonero sa sulod sang mga dekada, nagpasalig sa naggradwar nga mga estudyante subong man sa ila mga ginikanan kag mga paryente nga nagtambong. Pasad sa ila mismo personal nga eksperiensia kag sang mga masigkamisyonero, ginpakita nila nga ang mga problema kag mga kabalaka sarang maatubang sing madinalag-on. Ang problema nga ila ginaatubang mahimo nga mabug-at, “apang sarang ini malubad, kag ang Sosiedad nagabulig sa amon,” siling ni Raimo Kuokkanen, isa ka misyonero sa Madagascar. “Wala namon ginpili ang teritoryo, ginbaton namon ini,” siling ni Östen Gustavsson, nagaalagad karon sa Brazil. “Gani namat-od kami nga himuon ang amon bug-os nga masarangan agod magpabilin sa sini.” Si James Linton, nga nagaalagad sa Japan, nagsiling nga ang nakabulig sa iya amo ang “presensia sang mga kauturan nga nagaalagad na sa misyonero nga hilikuton.” Ang misyonero nga pag-alagad isa ka makalilipay kag makaalayaw nga paagi sa pag-alagad kay Jehova kag sa pag-atipan sa iya mga karnero.

Paglikaw sa Kalalat-an nga Nagapatay sa Espirituwalidad

Si Theodore Jaracz, isa ka katapo sang Nagadumala nga Hubon, nga gradwado mismo sang ikapito nga klase sang Gilead sang 1946, naghatag sang katapusan nga pamulongpulong, sa tema nga “Ang Hangkat sa Pagpabilin nga Buhi sa Espirituwal.” Ginakilala anay ang grabe nga pagpamintas nga nagakatabo sa nanuhaytuhay nga bahin sang kalibutan, ginpatalupangod niya nga ang matuod, grabe pa nga mga kalamidad ang nagakatabo sa katawhan.

Nagapatuhoy sa Salmo 91, ginpakilala ni Utod Jaracz ang “pamiste” kag “kalaglagan” nga nagpabalatian kag nagpatay sa espirituwal sang minilyon sa palibot naton. Gingamit sang Yawa kag sang iya malaut nga sistema ang tulad-piste nga mga propaganda, pasad sa intelektuwalismo kag materyalismo, sa pagpaluya kag sa pagpatay sang espirituwalidad, apang si Jehova nagapasalig sa aton nga ining kalalat-an indi magapalapit kay “bisan sin-o nga nagapuyo sa tago nga duog sang Labing Mataas.”—Salmo 91:1-7.

“Ang hangkat,” siling ni Utod Jaracz, “amo ang pagpabilin nga mapagros sa pagtuo, ang pagpabilin sa duog nga may kalig-unan. Indi kita mangin kaangay sa mga manugyubit nga ‘wala sing espirituwalidad.’ Amo ini ang problema sa karon. Isa ini nga ginaatubang naton tanan sa organisasyon. Maatubang man ninyo ini sa inyo teritoryo sa pagmisyonero.” (Judas 18,19) Apang ginsilingan ang naggradwar nga mga misyonero nga sarang nila mahuptan ang espirituwalidad sing madinalag-on sa ila mga teritoryo. Ginpalig-on sila nga binagbinagon, halimbawa, kon paano nagabatas ang aton mga kauturan sa Rusya, sa Asia, kag sa mga kadutaan sa Aprika—walay sapayan sang mga pagdumili, mabaskog nga pagpamatok, pagyubit, ateistiko nga mga propaganda, kag sayop nga mga panumbungon. Kag, sa madamo nga kahimtangan, ginadugang ang pisikal nga mga problema, nga resulta sang etniko nga mga binangig kag kakulang sang mga kinahanglanon.

Kon may pagluya sa espirituwalidad, “kinahanglan nga hibaluon ang kabangdanan sang problema kag dayon lubaron ini, nga nagagamit sang laygay sang Pulong sang Dios.” Ginhatag ang mga halimbawa sa Biblia. Ginpalig-on sadto si Josue nga basahon ang iya kopya sang Kasuguan sa mahinay nga tingog adlaw-adlaw. (Josue 1:⁠8) Sang nasapwan ang tulun-an sang Kasuguan sang panahon ni Josias, ginpakamaayo ni Jehova ang matutom nga pag-aplikar sa mga instruksion sini. (2 Hari 23:2,3) Nahibaluan ni Timoteo ang balaan nga mga sinulatan kutob sa iya pagkalapsag. (2 Timoteo 3:14,15) Ang mga taga-Berea indi lamang maayo nga mga tagpalamati; ginkabig sila nga “dungganon sing panghunahuna” bangod gin-usisa nila ang kasulatan adlaw-adlaw. (Binuhatan 17:10,11) Kag si Jesucristo amo ang labing maayo nga huwaran sang isa nga nakahibalo kag naggamit sing Pulong sang Dios.—Mateo 4:1-11.

Sa paghinakop, mahigugmaon nga ginlaygayan ni Utod Jaracz ang bag-ong mga misyonero: “Handa na kamo karon sa pagtuman sang inyo asaynment sa pagmisyonero. Kag magakadto kamo sa iban nga pungsod, sing literal gid, sa madamo nanuhaytuhay nga bahin sang duta. Kon maatubang naton ang hangkat sa pagpabilin nga buhi sa espirituwal, nian indi gid naton pagtugutan ang bisan ano nga butang nga magsablag sa aton sa pagtuman sang ginpamat-od naton nga himuon. Magabantala kamo nga may kakugi, magapahulag sa iban nga ilugon ang inyo pagtuo, kag magapangamuyo kami upod sa inyo nga ang inyo mga ginatudluan, buhion ni Jehova subong sa aton. Kag sa amo, madamo pa ang makapalagyo sa espirituwal nga kalamidad nga nagakatabo karon sa bug-os nga kalibutan. Magabuylog sila sa aton sa nagadugang nga kadamuon sa paghimo sang kabubut-on ni Jehova. Kag kabay nga pakamaayuhon kamo ni Jehova sa sinang katuyuan.”

Sa tapos mabasa sang tsirman ang mga panamyaw gikan sa madamo nga pungsod sa bug-os nga kalibutan, tion na agod ipanagtag sa manuggradwar nga mga estudyante ang ila diploma. Dayon ginsundan ini sang pagbasa sa isa ka mahigugmaon nga sulat sang apresasyon nga ginsulat sang mga estudyante. Mapinasalamaton gid sila kay Jehova kag sa iya organisasyon bangod sang nabaton nila nga pinasahi nga paghanas kag sang ila mga asaynment subong mga misyonero nga magakadto “tubtob sa ukbong sang duta”!—Binuhatan 1:8.

[Kahon sa pahina 29]

Estadistika sang Klase

Kadamuon sang pungsod nga gintiglawas: 11

Kadamuon sang pungsod nga ginpadalhan: 24

Kadamuon sang mga estudyante: 48

Kadamuon sang mag-asawa: 24

Promedyo nga edad: 34

Promedyo nga tinuig sa kamatuoran: 17

Promedyo nga tinuig sa bug-os tion nga ministeryo: 12

[Laragway sa pahina 26]

Ika-107 nga Naggradwar nga Klase sang Watchtower Bible School of Gilead

Sa listahan sa ubos, ang mga raya nanumeruhan halin sa atubangan pa likod, kag ang mga ngalan nalista halin sa wala pa tuo sa tagsa ka raya.

 1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.