Ngaa Nagaalagad Ka sa Dios?

Ang isa ka mahinadlukon-sa-Dios nga hari naghatag anay sini nga laygay sa iya anak: “Kilalahon mo ang Dios sang imo amay kag alagda sia nga may bug-os nga tagipusuon kag may malipayon nga kalag.” (1 Cronica 28:9) Sing maathag, luyag ni Jehova nga ang iya mga alagad nagaalagad sa iya nga may mapinasalamaton kag mainapresyahon nga tagipusuon.

SUBONG mga Saksi ni Jehova, ginabaton naton gilayon nga ang aton tagipusuon napun-an sing pagpasalamat sang ang mga saad sang Biblia una nga ginpaathag sa aton. Kada adlaw, natun-an naton ang bag-o nga butang nahanungod sa mga katuyuan sang Dios. Sa labi nga pagtuon naton tuhoy kay Jehova, labi nga nagabaskog ang aton handum nga alagdon sia nga “may bug-os nga tagipusuon kag may malipayon nga kalag.”

Madamo nga nangin mga Saksi ni Jehova ang padayon nga nagaalagad kay Jehova nga may walay latid nga kalipay sa ila bug-os nga kabuhi. Walay sapayan sini, ang pila ka Cristiano may maayo nga panugod, apang sang ulihi, ginkalimtan nila ang mabaskog nga mga rason nga nagpahulag sa aton nga mag-alagad sa Dios. Natabo na bala ini sa imo? Kon amo, indi maluyahan sing buot. Ang nadula nga kalipay mahimo mapabalik liwat. Paano?

Binagbinaga ang Imo mga Pagpakamaayo

Una, pamalandungi ang adlaw-adlaw nga mga pagpakamaayo nga nabaton mo sa Dios. Hunahunaa ang maayong mga dulot ni Jehova: ang iya nanuhaytuhay nga mga binuhatan sang pagpanuga—nga puwede sa tanan bisan ano man ang tindog ukon kahimtangan sa kabuhi—ang iya kinaugali nga mga aman nga pagkaon kag ilimnon, ang maayong panglawas nga ginaagom mo, ang imo ihibalo sang kamatuoran sang Biblia, kag labaw sa tanan, ang dulot sang iya Anak. Ang iya kamatayon naghanda sing dalan agod maalagad mo ang Dios nga may matinlo nga konsiensia. (Juan 3:16; Santiago 1:17) Sa labi nga pagpamalandong mo sa pagkaayo sang Dios, labi pa nga nagatubo ang imo apresasyon sa iya. Nian ang imo tagipusuon magapahulag sa imo nga alagaron sia bangod sang pagpasalamat para sa tanan nga ginhimo niya. Walay duhaduha nga mabatyagan mo liwat ang ginbatyag sang salmista nga nagsulat: “Madamo nga butang ang imo nahimo, O Jehova nga akon Dios, bisan ang imo makatilingala nga mga binuhatan kag ang imo mga hunahuna sa amon; wala sing bisan sin-o nga mapaanggid sa imo. . . . Mas madamo ini sangsa akon sarang masugid.”—Salmo 40:5.

Ining mga pulong ginsulat ni David, isa ka tawo nga indi hilway sa mga problema ang iya kabuhi. Subong isa ka pamatan-on, ginhinguyang ni David ang madamo niya nga tion sa pagpalagyo bangod ginpangita sia ni Hari Saul kag sang iya mga tinawo agod patyon sia. (1 Samuel 23:7, 8, 19-23) May personal man nga mga kaluyahon nga dapat batuan si David. Ginpatalupangod niya ini sa ika-40 nga Salmo: “Ginlibutan ako sing mga kalamidad tubtob nga di-maisip na ini. Naabtan ako sang akon mga kasaypanan nga labi pa sa sarang ko makita; nangin mas madamo pa ini sa mga buhok sa akon ulo.” (Salmo 40:12) Huo, may mga problema si David, apang wala sia bug-os nga nadaug sini. Walay sapayan sang iya mga problema, nagkonsentrar sia sa mga pamaagi diin ginpakamaayo sia ni Jehova, kag nasapwan niya nga yadtong mga pagpakamaayo labaw pa sa iya mga problema.

Kon daw ginalamon ka sang imo personal nga mga problema ukon sang pagbatyag nga di-takus, maayo nga magdulog anay kag binagbinagon ang imo mga pagpakamaayo, subong sang ginhimo ni David. Walay duhaduha, ang apresasyon sa sina nga mga pagpakamaayo magapahulag sa imo nga idedikar ang imo kaugalingon kay Jehova; ina nga mga panghunahuna makabulig man sa imo nga mapapagsik liwat ang nadula nga kalipay kag makabulig sa imo nga maalagad ang Dios nga may mapinasalamaton nga tagipusuon.

Makabulig ang mga Miting sa Kongregasyon

Dugang pa sa pagpamalandong sing isahanon sang pagkaayo ni Jehova, dapat kita makig-upod sa mga masigka-Cristiano. Makapalig-on nga makigtipon sing regular upod sa mga lalaki, mga babayi, kag mga pamatan-on nga nagahigugma sa Dios kag determinado sa pag-alagad sa iya. Ang halimbawa nila makapahulag sa aton sa bug-os kalag nga hilikuton sa pag-alagad kay Jehova. Ang aton pagtambong sa Kingdom Hall makapalig-on man sa ila.

Matuod, kon magpauli kita pagkatapos sang makakalapoy nga adlaw sang pagtrabaho ukon kon maluyahan kita sing buot bangod sang pila ka problema ukon kaluyahon, mahimo nga indi mahapos hunahunaon ang tuhoy sa pagtambong sa isa ka miting sa Kingdom Hall. Sa mga tion subong sini, dapat kita mangin estrikto sa aton kaugalingon, ‘ginasakit ang aton lawas,’ kon sa aton pa, agod matuman naton and sugo nga magtipon upod sa mga masigka-Cristiano.—1 Corinto 9:26, 27; Hebreo 10:23-25.

Kon nangin kinahanglanon ina, dapat bala kita maghinakop nga wala gid naton ginahigugma si Jehova? Indi gid. Ang hamtong nga mga Cristiano anay nga ang ila gugma sa Dios indi maduhaduhaan dapat magpanikasog sing lakas sa paghimo sang kabubut-on sang Dios. (Lucas 13:24) Si apostol Pablo isa sang subong sina nga mga Cristiano. Ginpabutyag niya sing tampad ang iya balatyagon sa sining paagi: “Nakahibalo ako nga sa akon, kon sayuron, sa akon unod, walay nagapuyo nga maayo; kay ang ikasarang sa paghandum yari sa akon, apang ang ikasarang sa paghimo sing maayo wala. Kay ang maayo nga luyag ko wala ko ginahimo, apang ang malain nga indi ko luyag amo ang ginahimo ko.” (Roma 7:18, 19) Kag sia nagsiling sa mga taga-Corinto: “Karon, kon ginawali ko ang maayong balita, indi ini rason agod magpabugal ako, kay ang kinahanglanon gintugyan sa akon. . . . Kon ginahimo ko ini sing kinabubut-on, may padya ako; apang kon ginahimo ko ini sing supak sa akon kabubut-on, walay sapayan ginsalig sa akon ang pagkatulugyanan.”—1 Corinto 9:16, 17.

Kaangay sang madamo sa aton, may makasasala nga mga huyog si Pablo nga nagapugong sa iya handum sa paghimo sing husto. Apang, nagpakig-away sia sing lakas batok sining mga huyog, kag sa kalabanan nga tion, nagmadinalag-on sia. Siempre pa, wala ini mahimo ni Pablo sa iya kaugalingon lamang nga kusog. Sia nagsulat: “Sa tanan nga butang may kusog ako bangod sa iya nga naghatag sing gahom sa akon.” (Filipos 4:13) Si Jehova, ang isa nga naghatag sing kusog kay Pablo, magapabakod man sa imo sa paghimo sing husto kon mangayo ka sing bulig sa iya. (Filipos 4:6, 7) Gani, “makig-away sing lakas para sa pagtuo,” kag si Jehova magapakamaayo sa imo.—Judas 3.

Indi kinahanglan nga makig-away ka sing isahanon. Sa mga kongregasyon sang mga Saksi ni Jehova, ang hamtong nga Cristianong mga gulang, nga nagapadayon mismo sa ‘pagpakig-away para sa pagtuo,’ handa sa pagbulig sa imo. Kon mangayo ka sing bulig sa gulang, magatinguha sila nga “maghambal sing malugpayon” sa imo. (1 Tesalonica 5:14) Ang iya tulumuron amo ang magpanghikot “subong sang palalipdan sa hangin kag palanaguan sa unos.”—Isaias 32:2.

“Ang Dios gugma,” kag gusto niya nga ang iya mga alagad mag-alagad sa iya bangod sang gugma. (1 Juan 4:8) Kon ang imo gugma sa Dios kinahanglan nga pukawon liwat, maghimo sing nagakaigo nga mga tikang, subong sa ginbalay sa ibabaw. Malipay ka nga ginhimo mo ini.