Naluwas, Indi Paagi sa mga Buhat Lamang, Kundi sa Di-bagay nga Kaayo
“Ginluwas kamo paagi sa pagtuo . . . Indi ini bangod sa mga buhat, agod nga wala sing tawo ang may sadsaran sa pagpabugal.”—EFESO 2:8, 9.
1. Paano tuhay ang mga Cristiano sa mga tawo sa kabug-usan may kaangtanan sa personal nga mga hinimuan, kag ngaa?
GINAPABUGAL sang mga tawo karon ang ila mga hinimuan, kag ginapahambog dayon nila ini. Tuhay ang mga Cristiano. Nagalikaw sila nga padakuon gid ang ila mga hinimuan, bisan yadtong may kaangtanan sa matuod nga pagsimba. Samtang nagakalipay sila sa nahimuan sang katawhan ni Jehova sa kabug-usan, wala nila ginapadaku ang ila bahin sa sini. Nahibaluan nila nga sa pag-alagad kay Jehova, mas importante ang husto nga mga motibo sangsa mga hinimuan. Ang bisan sin-o nga hatagan sa ulihi sang dulot nga kabuhi nga dayon makatigayon sini, indi suno sa personal nga mga hinimuan, kundi paagi sa pagtuo kag di-bagay nga kaayo sang Dios.—Lucas 17:10; Juan 3:16.
2, 3. Ano ang ginapabugal ni Pablo, kag ngaa?
2 Nahibaluan gid ni apostol Pablo ini nga kamatuoran. Pagkatapos nga makapangamuyo sing tatlo ka beses agod maumpawan gikan sa “ungon sa unod,” sia nakabaton sang sabat ni Jehova: “Ang akon di-bagay nga kaayo tuman na para sa imo; kay ang akon gahom ginahimpit sa kaluyahon.” Mapainubuson nga nagbaton sang desisyon ni Jehova, si Pablo nagsiling: “Gani, sa labing daku nga kalipay magapabugal ako sa akon mga kaluyahon, agod ang gahom ni Cristo magapabilin kaangay sang isa ka tolda sa ibabaw ko.” Ang mapainubuson nga panimuot ni Pablo amo ang isa nga dapat naton ilugon.—2 Corinto 12:7-9.
3 Bisan pa nga maayo gid nga Cristiano si Pablo, nahibaluan niya nga ang iya mga hinimuan indi bangod sang iya kaugalingon nga mga abilidad. Mapainubuson sia nga nagsiling: “Sa akon, isa ka tawo nga labing kubos gid sa tanan nga balaan, ginhatag ining di-bagay nga kaayo, agod mabantala ko sa mga pungsod ang maayong balita tuhoy sa di-matungkad nga kamanggaran ni Cristo.” (Efeso 3:8) Wala sing pagpabugal sa sining mga pinamulong. “Ginasumpong sang Dios ang mga matinaastaason, apang nagahatag sia sing di-bagay nga kaayo sa mga mapainubuson.” (Santiago 4:6; 1 Pedro 5:5) Ginasunod bala naton ang halimbawa ni Pablo, mapainubuson nga nagakabig sang aton kaugalingon nga mas manubo sangsa labing kubos sa aton mga kauturan?
“Ginakabig ang Iban nga Labaw”
4. Ngaa nga mabudlayan kita kon kaisa nga kabigon ang iban nga labaw sa aton?
4 Si apostol Pablo naglaygay sa mga Cristiano: “[Manghikot] nga wala nagahimo sing bisan ano bangod sang huyog nga makigbais ukon bangod sang egotismo, kundi upod ang mapainubuson nga hunahuna nga ginakabig ang iban nga labaw sa inyo.” (Filipos 2:3) Mahimo nga isa ini ka hangkat, ilabi na kon may palangakuan kita. Ayhan ang nagapabudlay sa aton amo ang impluwensia, sa isa ka kasangkaron, sang espiritu sang paindisanay nga lapnag sa kalibutan karon. Mahimo nga gintudluan kita samtang bata pa nga magpaindis-indis upod sa aton mga utod sa puluy-an ukon sa aton mga klasmeyt sa eskwelahan. Mahimo nga pirme kita ginapalig-on nga magtigayon sing dungog subong bantog nga atleta sa eskwelahan ukon nagapanguna nga estudyante. Sa pagkamatuod, ang paghimo sang aton labing masarangan sa bisan ano nga butang dalayawon. Apang ginahimo ini sang mga Cristiano, indi agod magpakitakita, kundi agod makabenepisyo sing bug-os sa hilikuton kag ayhan makabenepisyo man ang iban. Apang, ang pagtinguha nga manguna pirme mahimo nga makatalagam. Paano?
5. Kon indi makontrol, sa ano nagapadulong ang nagapaindis-indis nga panimuot?
5 Kon indi makontrol, ang isa ka nagapaindis-indis ukon mahamkunon nga panimuot mahimo magapahulag sa isa nga mangin walay pagtahod kag bugalon. Mahimo nga mahisa sia sa mga ikasarang kag mga pribilehiyo sang iban. Ang Hulubaton 28:22 nagasiling: “Ang tawo nga may mahisaon nga mata nagatinguha nga makatigayon sing malahalon nga mga butang, apang wala sia makahibalo nga magaabot sa iya ang kapigaduhon.” Mahimo gani nga makahason nga tinguhaan niya ang mga katungdanan nga indi bagay sa iya. Agod pakamatarungon ang iya mga buhat, mahimo magasugod sia sa pagkumod kag pagpakalain sa iban—mga huyog nga dapat isikway sang mga Cristiano. (Santiago 3:14-16) Posible gid nga mapalambo niya ang ako-anay nga panimuot.
6. Paano nagpaandam ang Biblia tuhoy sa panimuot sang pagpaindisanay?
6 Busa ang Biblia nagapalig-on sa mga Cristiano: “Indi kita magmangin bugalon, nga nagasulsol sang pagpaindisanay, nga nagahinisaay.” (Galacia 5:26) Si apostol Juan nagahambal tuhoy sa masigka-Cristiano nga nangin biktima sa sini nga sahi sang panimuot. “May ginsulat ako sa kongregasyon,” siling ni Juan, “apang si Diotrefes, nga naluyag magtigayon sing nahauna nga lugar sa tunga nila, wala magbaton sing bisan ano nga butang halin sa amon nga may pagtahod. Amo ina kon ngaa, kon magkari ako, dumdumon ko ang iya mga buhat nga padayon niya nga ginahimo, nga nagawakal sing malain nga mga pulong tuhoy sa amon.” Makapasubo gid sa isa ka Cristiano nga mahulog sa sini nga kahimtangan!—3 Juan 9, 10.
7. Ano ang luyag nga likawan sang isa ka Cristiano sa pagpaindisanay sa duog sang trabaho karon?
7 Sa pagkamatuod, indi realistiko nga maghunahuna nga ang isa ka Cristiano makalikaw gid sa tanan nga pagpaindisanay. Halimbawa, mahimo nga sa iya sekular nga trabaho dapat sia magpaindis sa iban ukon sa mga negosyo nga kapareho niya sang mga produkto ukon mga serbisyo. Apang, bisan sa sina nga mga kahimtangan, luyag sang isa ka Cristiano nga ipakita ang espiritu sang pagtahod, gugma, kag konsiderasyon sa iya pagnegosyo. Isikway niya ang di-legal ukon di-Cristiano nga mga buhat kag likawan nga makilal-an nga walay kaluoy kag maiyaiyahon. Indi sia dapat magbatyag nga ang pagkanumero uno pirme—sa bisan ano nga ginahimo niya—amo ang labing importante nga butang sa kabuhi. Kon amo sini ang iya himuon sa sekular nga mga panikasog, daw ano pa gid nga dapat niya ini himuon sa iya pagsimba!
“Indi sa Pagpaanggid sa Iban”
8, 9. (a) Ngaa wala sing rason nga magpaindisanay ang Cristianong mga gulang? (b) Ngaa maaplikar ang 1 Pedro 4:10 sa tanan nga alagad sang Dios?
8 Ang panimuot sang mga Cristiano sa ila pagsimba ginlaragway sa sining inspirado nga mga pinamulong: “Pamatud-an sang kada isa kon ano ang iya kaugalingon nga binuhatan, kag nian ang rason niya sa pagpabugal mangin sa iya kaugalingon lamang, kag indi sa pagpaanggid sa iban.” (Galacia 6:4) Bangod nahibaluan sang mga gulang sa kongregasyon nga wala sila nagapaindisanay, nagakooperar sila kag nagapanghikot sing suod subong isa ka hubon. Nagakalipay sila sa maamot sang kada isa para sa kaayuhan sang kongregasyon. Sa amo malikawan nila ang magamo nga pagpaindisanay kag makapahamtang sing maayong halimbawa sa iban nga katapo sang kongregasyon tuhoy sa paghiusa.
9 Bangod sang pangidaron, eksperiensia, ukon natural nga mga ikasarang, ang pila ka gulang mahimo mas talunsay sangsa iban, ukon mas maalam sila. Subong resulta, ang mga gulang may nanuhaytuhay nga palangakuan sa organisasyon ni Jehova. Sa baylo nga magpaanggid, ginadumdom nila ang laygay: “Suno sa dulot nga nabaton sang tagsatagsa, gamita ini sa pag-alagad sa isa kag isa subong maayong mga tulugyanan sang di-bagay nga kaayo sang Dios nga ginpakita sa lainlain nga paagi.” (1 Pedro 4:10) Ang matuod, ini nga teksto naaplikar sa tanan nga alagad ni Jehova, kay ang tanan sa pila ka kasangkaron nakabaton sing dulot nga sibu nga ihibalo kag ang tanan nakatigayon sing pribilehiyo nga makigbahin sa Cristianong ministeryo.
10. Sa ano lamang nga paagi nga kahamut-an ni Jehova ang aton sagrado nga pag-alagad?
10 Mahamut-an lamang ni Jehova ang aton sagrado nga pag-alagad kon ginahimo naton ini bangod sang gugma kag debosyon, indi bangod luyag naton nga maglabaw sa iban. Busa importante nga may balanse kita nga pagtamod sa aton hilikuton nga nagasakdag sa matuod nga pagsimba. Samtang wala sing isa ang makahukom sing sibu sang motibo sang iban, si Jehova “nagatulok sa tagipusuon.” (Hulubaton 24:12; 1 Samuel 16:7) Sa amo, maayo nga pamangkuton naton sa pulupanag-on ang aton kaugalingon, ‘Ano ang akon motibo sa pag-alagad kay Jehova?’—Salmo 24:3, 4; Mateo 5:8.
Nagakaigo nga Pagtamod sa Aton Hilikuton
11. Ano nga mga pamangkot tuhoy sa aton pagministeryo ang binagbinagon sing rasonable?
11 Kon ang motibo amo gid ang importante agod matigayon naton ang kahamuot ni Jehova, sa anong kasangkaron nian nga dapat mabalaka kita tuhoy sa aton mga buhat sang pagtuo? Tubtob ginahimo naton ang aton ministeryo upod ang husto nga motibo, importante bala nga may rekord kita sang aton nahimuan ukon kon daw ano ini kasangkad? Rasonable ini nga mga pamangkot, bangod indi naton luyag nga tumbasan sang estadistika ang mga buhat sang pagtuo ukon tugutan nga ang maayong report amo ang kabalak-an gid naton sa aton Cristianong ministeryo.
12, 13. (a) Ano ang pila ka rason kon ngaa nagahupot kita sing rekord sa aton pag-alagad sa latagon? (b) Ano ang aton mga rason sa pagkalipay kon nagatan-aw sa kabug-usan nga report sang aton pagbantala?
12 Talupangda kon ano ang ginasiling sang libro nga Organisado sa Paghimo Sang Kabubut-on ni Jehova: “Ang una nga mga sumulunod ni Jesucristo interesado sa mga report tuhoy sa pag-uswag sang pagbantala nga hilikuton. (Marcos 6:30) Ang tulun-an nga Binuhatan sa Biblia nagasugid sa aton nga ang balaan nga espiritu ginpasagahay sa 120 ka disipulo sang Pentecostes. Sang ulihi ang kadamuon sang mga disipulo nadugangan sing 3,000 kag nian sing 5,000. . . . (Binuhatan 1:15; 2:5-11, 41, 47; 4:4; 6:7) Ini nga mga balita sang pag-uswag nagpalig-on gid sa mga disipulo!” Sa amo man nga rason, nagapanikasog ang mga Saksi ni Jehova karon nga makahupot sang sibu nga mga rekord sa ila hinimuan sa bug-os nga kalibutan bilang katumanan sang mga pinamulong ni Jesus: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Ini nga mga report nagapakita sang realistiko nga laragway sang kon ano ang nahimo na sa bug-os nga kalibutan. Ginapakita sini kon diin nagakinahanglan sing bulig kag kon ano nga sahi sang literatura kag kon daw ano kadamo ang kinahanglanon agod pauswagon ang pagbantala nga hilikuton.
13 Sa amo, ang pagreport sang aton pagbantala nga hilikuton makabulig sa aton nga matuman ang aton komisyon nga ibantala ang maayong balita sang Ginharian sing mas epektibo. Dugang pa, wala bala kita mapalig-on kon mabatian naton ang ginahimo sang aton mga kauturan sa iban nga bahin sang kalibutan? Ang balita tuhoy sa pagdugang kag pagsangkad sa bug-os nga duta nagapahalipay sa aton, nagapahulag sa aton nga manghikot sing dugang pa, kag nagapasalig sa aton sang pagpakamaayo ni Jehova. Kag daw ano ka makaalayaw mahibaluan nga ang aton report nalakip sa bug-os kalibutan nga report! Diutay ang aton report kon ikumparar sa bug-os nga kalibutan, apang natalupangdan ini ni Jehova. (Marcos 12:42, 43) Dumduma nga kon wala ang imo report, indi makompleto ang kabug-usan nga report.
14. Magluwas sa pagbantala kag pagtudlo, ano ang nalakip sa aton pagsimba kay Jehova?
14 Sa pagkamatuod, kalabanan sang ginahimo sang tagsa ka Saksi sa pagtuman sang iya katungdanan subong dedikado nga alagad ni Jehova wala malakip sa iya report. Halimbawa, ang report wala nagalakip sa regular nga pagtuon sang Biblia sing personal, pagtambong kag pagpakigbahin sa Cristianong mga miting, mga hilikuton sa kongregasyon, pagbulig sa masigkatumuluo kon kinahanglanon, pinansial nga pagsakdag sa bug-os kalibutan nga hilikuton sang Ginharian, kag iban pa. Sa amo, samtang importante ang aton report sa pag-alagad sa latagon, nga nagabulig sa aton nga mahuptan ang aton kakugi sa pagbantala kag malikawan nga maghinay, dapat huptan naton ini sa husto nga pagtamod. Indi ini dapat pagtamdon nga permiso sa espirituwal ukon pasaporte, nga nagapat-od nga kalipikado kita sa dayon nga kabuhi.
“Makugi sa Maayong mga Buhat”
15. Bisan pa nga indi kita maluwas sang mga buhat lamang, ngaa kinahanglanon ini?
15 Maathag nga bisan indi kita maluwas paagi sa mga buhat lamang, kinahanglanon ini. Amo kon ngaa nga ang mga Cristiano ginatawag nga “ang katawhan nga pinasahi nga iya, makugi sa maayong mga buhat” kag kon ngaa ginapalig-on sila nga ‘binagbinagon ang isa kag isa agod pukawon sa gugma kag sa maayong mga buhat.’ (Tito 2:14; Hebreo 10:24) Si Santiago, nga isa ka manunulat sang Biblia, prangka nga nagsiling: “Subong nga ang lawas nga wala sing espiritu patay, amo man ang pagtuo nga wala sing mga binuhatan patay.”—Santiago 2:26.
16. Ano ang mas importante sangsa mga buhat, kag sa ano kita dapat maghalong?
16 Bisan importante man ang maayong mga buhat, mas importante ang mga motibo sa paghimo sini. Busa mas maayo kon usisaon naton kon kaisa ang aton mga motibo. Apang, bangod wala sing tawo nga makahibalo sing sibu sa mga motibo sang iban, dapat mag-andam kita sa paghukom sa iban. Ginapamangkot kita, “Sin-o ka bala nga nagahukom sa alagad sa panimalay sang iban?” diin ang maathag nga sabat amo: “Sa iya kaugalingon nga agalon nagatindog ukon nagakapukan sia.” (Roma 14:4) Si Jehova, ang Agalon sang tanan, kag ang iya gintangdo nga Hukom, si Cristo Jesus, magahukom sa aton, indi pasad sa aton mga buhat lamang kundi pasad sa aton mga motibo, sa aton mga oportunidad, sa aton gugma, kag sa aton debosyon. Sanday Jehova kag Jesucristo lamang ang makahukom sing sibu kon bala nahimo naton ang ginalaygay nga himuon sang mga Cristiano, suno sa mga pinamulong ni apostol Pablo: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.”—2 Timoteo 2:15; 2 Pedro 1:10; 3:14.
17. Samtang nagatinguha nga himuon ang aton bug-os nga masarangan, ngaa dapat naton dumdumon ang Santiago 3:17?
17 Makatarunganon si Jehova sa iya mga ginapaabot sa aton. Suno sa Santiago 3:17, “ang kaalam nga gikan sa hitaas,” lakip sa iban nga butang, “makatarunganon.” Indi bala maalamon kag subong man nagakaigo, nga ilugon naton si Jehova sa sini nga bahin? Sa amo, indi kita magtinguha nga magpahamtang sing di-makatarunganon kag di-malab-ot nga mga pagpaabot sa aton kaugalingon ukon sa aton mga kauturan.
18. Ano ang mapaabot naton kon may balanse kita nga pagtamod sa aton mga buhat kag sa di-bagay nga kaayo ni Jehova?
18 Tubtob may balanse kita nga pagtamod sa aton buhat sang pagtuo kag sa di-bagay nga kaayo ni Jehova, mahuptan naton ang kalipay nga amo ang maathag nga tanda sang matuod nga mga alagad ni Jehova. (Isaias 65:13, 14) Magakasadya kita sa mga pagpakamaayo ni Jehova nga ginabubo sa iya katawhan sa kabilugan, walay sapayan kon daw ano kadamo ang aton masarangan. Nagapadayon sa “pangamuyo kag pag-ampo nga may pagpasalamat,” mangabay kita sa Dios nga buligan kita nga himuon ang aton bug-os nga masarangan. Nian, walay duhaduha, “ang paghidait sang Dios nga nagalabaw sa tanan nga panghunahuna magabantay sa [aton] tagipusuon kag sa [aton] ikasarang sa paghunahuna paagi kay Cristo Jesus.” (Filipos 4:4-7) Huo, makatigayon kita sing paumpaw kag pagpalig-on sa paghibalo nga sarang kita maluwas, indi paagi sa mga buhat lamang, kundi sa di-bagay man nga kaayo ni Jehova!
Mapaathag Mo Bala Kon Ngaa ang mga Cristiano
• wala nagapabugal tuhoy sa ila mismo mga hinimuan?
• nagalikaw sa pagpaindisanay?
• nagareport sang ila Cristianong hilikuton nga pagministeryo sa latagon?
• nagalikaw nga hukman ang masigka-Cristiano?
[Retrato sa pahina 15]
“Ang akon di-bagay nga kaayo tuman na para sa imo”
[Mga retrato sa pahina 16, 17]
Nagakalipay ang mga gulang sa ila maamot para sa kaayuhan sang kongregasyon
[Mga retrato sa pahina 18, 19]
Kon wala ang imo report, indi makompleto ang kabug-usan nga report