“Magpadayon sa Pagbantay”—Nag-abot Na ang Oras sang Paghukom!
Ang impormasyon sa sining artikulo nga tulun-an napasad sa brosyur nga Magpadayon sa Pagbantay! nga ginpagua sa distrito nga kombension nga ginhiwat sa bug-os nga kalibutan sang tuig 2004/05.
“Magpadayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo.”—MATEO 24:42.
1, 2. Sa ano ginpaanggid ni Jesus ang iya pagkari?
ANO ang himuon mo kon nahibaluan mo nga may kawatan sa inyo lugar kag may nakawatan na sia nga mga balay? Dapat ka magpadayon sa pagbantay agod maamligan mo ang imo mga hinigugma kag mga pagkabutang. Kay man, wala nagapadala sing sulat ang kawatan kon san-o sia mangawat. Sa baylo, nagaabot sia nga indi mamutikan kag wala ginapaabot.
2 Pila ka beses nga gingamit ni Jesus ang pamaagi sang kawatan subong ilustrasyon. (Lucas 10:30; Juan 10:10) Tuhoy sa mga butang nga matabo sa tion sang katapusan kag antes sang iya pag-abot agod maghukom, naghatag si Jesus sining paandam: “Busa, magpadayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo. Apang hibalua ninyo ang isa ka butang, nga kon ang tagbalay nakasayod kon sa ano nga hugna sang pagbantay magaabot ang kawatan, magapabilin sia kuntani nga nagamata kag indi magatugot nga kawatan ang iya balay.” (Mateo 24:42, 43) Busa, ginpaanggid ni Jesus ang iya pagkari sa pag-abot sang kawatan—wala ginapaabot.
3, 4. (a) Ano ang nadalahig sa pagpamati sa paandam ni Jesus tuhoy sa iya pag-abot? (b) Ano nga mga pamangkot ang nagautwas?
3 Nagakabagay gid ang ilustrasyon, kay wala mahibaluan ang eksakto nga petsa sang pag-abot ni Jesus. Sa una nga bahin sini gihapon nga tagna, si Jesus nagsiling: “May kaangtanan sa sinang adlaw kag oras wala sing nakahibalo, bisan pa ang mga anghel sang mga langit bisan pa ang Anak, kundi ang Amay lamang.” (Mateo 24:36) Busa, ginpalig-on ni Jesus ang iya mga tagpalamati: ‘Pamatud-i ninyo ang inyo kaugalingon nga handa.’ (Mateo 24:44) Ang mga nagapamati sa paandam ni Jesus mangin handa kag nagagawi sing nagakaigo, kon san-o man sia maabot subong gintangdo ni Jehova nga Manuglaglag.
4 Ang pila ka importante nga mga pamangkot nagautwas: Nagapaandam lamang bala si Jesus sa mga di-tumuluo, ukon dapat man bala ‘magpadayon sa pagbantay’ ang matuod nga mga Cristiano? Ngaa hilingagawon gid nga ‘magpadayon sa pagbantay,’ kag paano naton ini mahimo?
Para kay Sin-o ang Paandam?
5. Paano naton nahibaluan nga ang paandam nga “magpadayon kamo sa pagbantay” naaplikar sa matuod nga mga Cristiano?
5 Matuod gid nga ang pag-abot sang Ginuo mangin subong sang kawatan para sa mga di-tumuluo, nga wala nagasapak sa paandam tuhoy sa nagahilapit nga kalaglagan. (2 Pedro 3:3-7) Mangin subong man bala ini sa matuod nga mga Cristiano? Nagsulat si apostol Pablo sa mga masigkatumuluo: “Kamo gid nakahibalo nga ang adlaw ni Jehova magaabot subong sang makawat sa kagab-ihon.” (1 Tesalonica 5:2) Wala gid kita nagaduhaduha nga ang “adlaw ni Jehova magaabot.” Apang, nagakahulugan bala ini nga indi na kita magpadayon sa pagbantay? Talupangda nga ginsiling ini ni Jesus sa iya mga disipulo: “Sa oras nga wala ninyo ginahunahuna, magaabot ang Anak sang tawo.” (Mateo 24:44) Antes sini, sang nagapalig-on sa iya mga disipulo nga padayon nga pangitaon ang Ginharian, si Jesus nagpaandam: “Maghanda man kamo, kay sa oras nga wala ninyo ginahunahuna magaabot ang Anak sang tawo.” (Lucas 12:31, 40) Indi bala nga ginahunahuna gid ni Jesus ang iya mga sumulunod sang nagpaandam sia: “Magpadayon kamo sa pagbantay”?
6. Ngaa dapat kita ‘magpadayon sa pagbantay’?
6 Ngaa dapat kita ‘magpadayon sa pagbantay’ kag “maghanda”? Si Jesus nagpaathag: “May duha ka tawo sa latagon: ang isa kuhaon kag ang isa bayaan; duha ka babayi magagaling sa galingan: ang isa kuhaon kag ang isa bayaan.” (Mateo 24:40, 41) Ang “kuhaon,” ukon luwason, sa tion nga laglagon ang di-diosnon nga kalibutan amo ang mga nakahanda. Ang iban “bayaan” nga malaglag bangod sang ila makagod nga pagkabuhi. Mahimo nga lakip sa sini ang mga indibiduwal nga nakahangop na sang kamatuoran apang wala magpadayon sa pagbantay.
7. Sanglit wala naton nahibaluan kon san-o magaabot ang katapusan, ano ang mahimo naton?
7 Ang aton indi pagkahibalo sang eksakto nga adlaw nga malaglag ining daan nga sistema nagahatag sa aton sing kahigayunan sa pagpamatuod nga putli ang aton motibo sa pag-alagad sa Dios. Paano? Mahimo nga daw madugay pa mag-abot ang katapusan. Makapasubo nga gintugutan sang pila ka Cristiano nga nagabatyag sing subong sini nga magbugnaw ang ila pag-alagad kay Jehova. Apang, paagi sa aton dedikasyon, nagpresentar kita kay Jehova nga alagdon naton sia nga wala sing kondisyon. Ang mga nakakilala kay Jehova nakahisayod nga ang hingagaw lamang nga pagpakita sing kakugi indi magapahamuot sa iya. Makita niya ang kahimtangan sang aton tagipusuon.—1 Samuel 16:7.
8. Paano ang gugma kay Jehova nagapahulag sa aton nga magpadayon sa pagbantay?
8 Bangod ginahigugma naton si Jehova, ang aton daku gid nga kalipay amo ang paghimo sang iya kabubut-on. (Salmo 40:8; Mateo 26:39) Kag luyag naton mag-alagad kay Jehova tubtob sa walay katubtuban. Ina nga paglaum hamili gid gihapon bisan pa dapat naton hulaton ini sing madugaydugay pa sangsa aton ginapaabot. Labaw sa tanan, padayon kita nga nagabantay bangod nalangkag kita kon ano ang mangin kahulugan sang adlaw ni Jehova para sa katumanan sang iya katuyuan. Ang aton hanuot nga handum nga pahamut-an ang Dios nagapahulag sa aton nga iaplikar ang laygay sang iya Pulong kag unahon ang iya Ginharian sa aton kabuhi. (Mateo 6:33; 1 Juan 5:3) Binagbinagon naton kon paano ang padayon nga pagbantay dapat mag-impluwensia sa mga desisyon nga aton ginahimo kag sa aton paagi sang pagkabuhi kada adlaw.
Sa Diin Nagapadulong ang Imo Kabuhi?
9. Ngaa hilingagawon gid nga hibaluon sang mga tawo ang kahulugan sang aton tion?
9 Nahibaluan sang madamo nga tawo karon nga ang mabug-at nga mga problema kag makakulugmat nga mga hitabo nangin kinaandan na, kag ayhan wala sila nalipay sa lakat sang ila kabuhi. Apang, nahangpan gid bala nila kon ano ang matuod nga kahulugan sang mga kahimtangan sang kalibutan? Narealisar bala nila nga nagakabuhi kita sa “katapusan sang sistema sang mga butang”? (Mateo 24:3) Narealisar bala nila nga ang makagod, masingki, kag di-diosnon nga mga panimuot karon nagapamatuod nga yari na kita sa “katapusan nga mga adlaw”? (2 Timoteo 3:1-5) Hilingagawon gid nga hibaluon nila ang kahulugan sini tanan kag binagbinagon kon sa diin nagapadulong ang ila kabuhi.
10. Ano ang dapat naton himuon agod mapat-od nga padayon kita nga nagabantay?
10 Kamusta naman kita? Kada adlaw dapat kita maghimo sing desisyon tuhoy sa aton trabaho, panglawas, pamilya, kag pagsimba. Nahibaluan naton kon ano ang ginasiling sang Biblia, kag nagatinguha kita nga iaplikar ini. Busa, dapat naton pamangkuton ang aton mga kaugalingon: ‘Ginatugutan ko bala ang mga problema sa kabuhi nga magtublag sa akon? Nagapaimpluwensia bala ako sa pilosopiya kag panghunahuna sang kalibutan?’ (Lucas 21:34-36; Colosas 2:8) Dapat naton padayon nga pamatud-an nga nagasalig kita kay Jehova sa aton bug-os nga tagipusuon kag wala nagasandig sa aton kaugalingon nga paghangop. (Hulubaton 3:5) Sa sining paagi, padayon kita nga “makapanguyapot sing hugot sa matuod nga kabuhi”—ang dayon nga kabuhi sa bag-ong kalibutan sang Dios.—1 Timoteo 6:12, 19.
11-13. Ano ang matun-an naton gikan sa mga halimbawa sang kon ano ang natabo (a) sang mga adlaw ni Noe? (b) sang mga adlaw ni Lot?
11 Ang Biblia nagaunod sing madamo nga nagapaandam nga mga halimbawa nga makabulig sa aton nga magpadayon sa pagbantay. Binagbinaga ang natabo sang adlaw ni Noe. Ginpat-od sang Dios nga mahatag ang paandam sing abanse. Apang, luwas kay Noe kag sa iya panimalay, wala magsapak ang mga tawo. (2 Pedro 2:5) Tuhoy sini, si Jesus nagsiling: “Subong sang mga adlaw ni Noe, amo man ang presensia sang Anak sang tawo. Kay subong nila sadtong mga adlaw sa wala pa ang anaw, nga nagakaon kag nagainom, ang mga lalaki nagapangasawa kag ang mga babayi ginahatag sa pag-asawahay, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila nga tanan, amo man ang presensia sang Anak sang tawo.” (Mateo 24:37-39) Ano ang matun-an naton sa sini? Kon ginatugutan naton ang adlaw-adlaw nga rutina—bisan ang normal nga mga hilikuton sang kabuhi—nga mag-upang sa espirituwal nga mga hilikuton nga ginapauna sa aton sang Dios, dapat naton binagbinagon sing serioso ang aton kahimtangan.—Roma 14:17.
12 Hunahunaa man ang nahanungod sa mga adlaw ni Lot. Ang siudad sang Sodoma, nga ginpuy-an ni Lot kag sang iya pamilya, bugana sa materyal apang tuman ka imoral. Ginpadala ni Jehova ang iya mga anghel agod laglagon ang Sodoma. Ginkumbinsi sang mga anghel si Lot kag ang iya pamilya nga maggua sa Sodoma kag indi magbalikid. Sa pagpalig-on sang mga anghel, ginbiyaan nila matuod ang siudad. Apang mahimo gid nga daw indi mabayaan sang asawa ni Lot ang iya balay sa Sodoma. Amo kon ngaa malalison nga nagbalikid sia kag bangod sini nagbayad sia sang iya kabuhi. (Genesis 19:15-26) Sing matagnaon, si Jesus nagpaandam sa aton: “Dumduma ang asawa ni Lot.” Ginapamatian bala naton ini nga paandam?—Lucas 17:32.
13 Ang mga nagpamati sa mga paandam sang Dios naluwas. Amo sini ang natabo kay Noe kag sa iya pamilya kag kay Lot kag sa iya mga anak nga babayi. (2 Pedro 2:9) Samtang ginatandaan naton ang paandam sa sining mga halimbawa, mapalig-on man kita sang mensahe sang kaluwasan nga masapwan sa sadtong mga paandam para sa mga nagahigugma sa pagkamatarong. Makalaum gid kita nga matuman ang saad sang Dios nga “bag-ong mga langit kag bag-ong duta” nga sa sini “magapuyo ang pagkamatarong.”—2 Pedro 3:13.
‘Nag-abot Na ang Oras sang Paghukom’!
14, 15. (a) Ano ang nalakip sa “oras” sang paghukom? (b) Ano ang nadalahig sa ‘pagkahadlok sa Dios kag paghatag sa iya sing himaya’?
14 Samtang padayon kita nga nagabantay, ano ang mapaabot naton? Ang tulun-an sang Bugna nagasugid kon paano ang katuyuan sang Dios matuman sing amat-amat. Ang pagpanghikot sa kon ano ang ginasiling sini importante kon luyag naton nga makahanda. Maathag nga ginalaragway sang tagna ang mga hitabo nga mahanabo sa “adlaw sang Ginuo,” nga nagsugod sang si Cristo naglingkod sa trono sa langit sang 1914. (Bugna 1:10) Ginapatalupangod sa aton sang Bugna ang isa ka anghel nga gintugyanan sing “walay katapusan nga maayong balita nga ibantala.” Nagapahayag sia sa mabaskog nga tingog: “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom.” (Bugna 14:6, 7) Ining “oras” sang paghukom isa ka malip-ot nga tion; nagalakip ini sang pagpahibalo kag paghukom nga ginalaragway sining tagna. Nagakabuhi na kita karon sa sining tion.
15 Apang karon, antes maghinakop ang oras sang paghukom, ginapalig-on kita: “Kahadluki ninyo ang Dios kag hatagi sia sing himaya.” Ano ang nalakip sa sini? Ang nagakaigo nga kahadlok sa Dios dapat magpahulag sa aton nga talikdan ang kalautan. (Hulubaton 8:13) Kon ginapadunggan naton ang Dios, magapamati kita sa iya nga may tudok nga pagtahod. Indi naton pagpatumbayaan ang regular nga pagbasa sang iya Pulong, ang Biblia, bangod sang aton kasakuon. Indi naton pagpakadiutayon ang iya laygay nga magtambong sa Cristianong mga miting. (Hebreo 10:24, 25) Pakabahandion naton ang pribilehiyo nga magbantala sing makugi sang maayong balita sang Mesianikong Ginharian sang Dios. Magasalig kita kay Jehova sa tanan nga tion kag sa aton bug-os nga tagipusuon. (Salmo 62:8) Bangod ginakilala naton si Jehova nga amo ang Soberano sa Uniberso, padunggan naton sia paagi sa kinabubut-on nga pagpasakop sa iya subong Soberano sang aton kabuhi. Nagakahadlok gid bala ikaw sa Dios kag nagahatag sa iya sing himaya sa sini tanan nga mga paagi?
16. Ngaa masiling naton nga natuman na ang paghukom sa Babilonia nga Daku nga nasulat sa Bugna 14:8?
16 Ginalaragway sang Bugna kapitulo 14 kon ano pa nga mga butang ang mahanabo sa oras sang paghukom. Una nga ginhinambitan ang Babilonia nga Daku, ang bug-os kalibutan nga emperyo sang butig nga relihion: “Ang ikaduha na man nga anghel nagsunod, nga nagasiling: ‘Napukan sia! Ang Babilonia nga Daku napukan!’” (Bugna 14:8) Huo, gikan sa pagtamod sang Dios, napukan na ang Babilonia nga Daku. Sang 1919 ang hinaplas nga mga alagad ni Jehova ginhilway gikan sa pagkaulipon sang Babiloniko nga mga panudlo kag mga buhat, nga naghugakom sa mga katawhan kag mga pungsod sa sulod sang milenyo. (Bugna 17:1, 15) Mahugod nila karon ang ila kaugalingon sa pagpasanyog sang matuod nga pagsimba. Ang maayong balita sang Ginharian sang Dios ginabantala sugod sadto sa bug-os nga kalibutan.—Mateo 24:14.
17. Ano ang nadalahig sa paggua sa Babilonia nga Daku?
17 Indi lamang amo sini ang paghukom sang Dios sa Babilonia nga Daku. Ang iya bug-os nga kalaglagan magaabot sa indi madugay. (Bugna 18:21) Busa, makatarunganon gid nga ang Biblia nagalaygay sa mga tawo bisan diin: “Gua ka sa iya [Babilonia nga Daku] . . . kon indi ninyo luyag makaambit sa iya mga sala.” (Bugna 18:4, 5) Paano kita makagua sa Babilonia nga Daku? Indi lang kay magauntat kita sa pagpakig-angot sa butig nga relihion. Ang Babilonianhon nga impluwensia makita sa madamong popular nga mga selebrasyon kag mga kustombre, sa matinuguton nga panimuot sang kalibutan sa sekso, sa pagsakdag sa nagapopular nga kalingawan nga may espiritismo, kag iban pa. Agod padayon nga makabantay, importante nga sa aton buhat kag sa handum sang aton tagipusuon, magpakita kita sing ebidensia nga nahamulag kita sa Babilonia nga Daku sa tanan nga paagi.
18. Suno sa ginlaragway sa Bugna 14:9, 10, ano ang dapat gid likawan sang alisto nga mga Cristiano?
18 Sa Bugna 14:9, 10, ginalaragway ang isa pa ka aspekto sang ‘oras sang paghukom.’ Ang isa pa ka anghel nagsiling: “Kon ang bisan sin-o nagasimba sa sapat nga mapintas kag sa larawan sini, kag nagabaton sing pat-in sa iya agtang ukon sa iya kamot, sia man magainom sang alak sang kasingkal sang Dios.” Ngaa? ‘Ang sapat nga mapintas kag ang larawan sini’ nagasimbulo sa paggahom sang tawo nga wala nagakilala sa pagkasoberano ni Jehova. Ang alisto nga mga Cristiano nagahalong nga wala ginatugutan ang ila kaugalingon nga maimpluwensiahan ukon mamarkahan, sa panimuot man ukon sa buhat, subong ulipon sang mga nagadumili sa pagkilala sa supremo nga pagkasoberano sang matuod nga Dios, nga si Jehova. Nahibaluan sang mga Cristiano nga ang Ginharian sang Dios natukod na sa langit, nga magadula sa tanan nga panguluhan sang tawo, kag ini magapadayon sing dayon.—Daniel 2:44.
Indi Pagdulaa ang Imo Pagbatyag Sing Pagkahilingawon!
19, 20. (a) Samtang nagahilapit ang katapusan nga mga adlaw, ano ang mapat-od naton nga tinguhaan nga himuon ni Satanas? (b) Ano ang determinado naton nga himuon?
19 Samtang nagahilapit na ang katapusan nga mga adlaw, magabaskog pa gid ang mga pag-ipit kag mga pagsulay. Bangod nagakabuhi kita sa sining daan nga sistema kag indi kita himpit, apektado kita sang madamo nga mga butang subong sang mapigaw nga panglawas, katigulangon, pagkapatay sang hinigugma, nasaklaw nga balatyagon, kapaslawan bangod wala ginasapak ang aton mga panikasog sa pagbantala sang Pulong sang Dios, kag madamo pa. Indi gid pagkalimti nga luyag ni Satanas nga hingalitan ang mga pag-ipit nga ginaatubang naton agod pauntaton kita—mag-untat sa pagbantala sang maayong balita ukon indi na magkabuhi sa mga talaksan sang Dios. (Efeso 6:11-13) Indi ini ang tion nga wasihon naton ang pagbatyag sing pagkahilingawon tuhoy sa tion nga ginakabuhian naton!
20 Nahibaluan ni Jesus nga magaatubang kita sing daku nga pag-ipit, amo nga naglaygay sia: “Magpadayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo.” (Mateo 24:42) Busa mangin alisto kita kon sa diin na kita sa lakat sang panahon. Dapat kita magbantay batok sa mga siod ni Satanas nga magapahinay ukon magapauntat sa aton. Dapat determinado kita nga ibantala sing makugi pa ang maayong balita sang Ginharian sang Dios. Sa pagkamatuod, huptan naton ang aton pagbatyag sing pagkahilingagawon samtang ginapamatian naton ang paandam ni Jesus: “Magpadayon kamo sa pagbantay.” Kon himuon naton ini, mapadunggan naton si Jehova kag may paglaum kita nga makabaton sang iya dayon nga mga pagpakamaayo.
Paano Mo Sabton?
• Paano naton nahibaluan nga ang paandam ni Jesus nga ‘magpadayon sa pagbantay’ naaplikar sa matuod nga mga Cristiano?
• Anong nagapaandam nga mga halimbawa sa Biblia ang makabulig sa aton nga ‘magpadayon sa pagbantay’?
• Ano ang oras sang paghukom, kag ano ang ginapalig-on sa aton nga himuon antes ini matapos?
[Retrato sa pahina 23]
Ginpaanggid ni Jesus ang iya pag-abot sa pag-abot sang isa ka kawatan
[Retrato sa pahina 24]
Ang kalaglagan sang Babilonia nga Daku malapit na
[Mga retrato sa pahina 25]
Dapat mangin determinado kita nga magbantala nga may labi nga kakugi kag determinasyon