Mapuslanon Bala Gihapon ang “Daan nga Testamento”?
SANG 1786, isa ka Pranses nga manugbulong ang nagbalhag sing libro nga Traité d’anatomie et de physiologie (Isa ka Pagtuon Tuhoy sa Anatomiya kag Pisiolohiya). Ginkabig ini sadto subong ang labing sibu nga libro tuhoy sa anatomiya sang lawas. Malaka na lang ini nga libro karon, kag kasan-o lang ang isa ka kopya sini ginbaligya sa bili nga mga 27,000 dolyares. Apang, pila lamang ka pasyente karon ang magapabulong sa doktor nga nagasalig gihapon sa madugay na nga panalawsaw sa sini nga libro tuhoy sa medisina. Bisan pa nga sang una ini nga libro sibu gid kag mapuslanon, mahimo nga wala na ini sing mabulig sa isa ka pasyente karon.
Amo man sini ang pagtamod sang madamo tuhoy sa ginatawag nga Daan nga Testamento. Ginaapresyar nila ang rekord sini tuhoy sa maragtas sang Israel kag ginadayaw ang matahom nga mga binalaybay sini. Apang, nagaduhaduha sila kon bala dapat gihapon sundon ang panuytoy nga kapin na sa 2,400 ka tuig ang kadugayon. Ang ihibalo sa siensia, negosyo, kag bisan gani ang pagkabuhi sang pamilya karon tuhay gid sa panahon nga ginsulat ang Biblia. Si Philip Yancey, nga editor anay sang Christianity Today, nagsulat sa iya libro nga The Bible Jesus Read: “Indi na ini maintiendihan, kag kon maintiendihan gid man, ang ginasiling sini nagapaakig sa mga tawo karon. Bangod sini kag sa iban pa nga mga rason, ang Daan nga Testamento, nga tres-kuartos sang bug-os nga Biblia, masami nga wala ginabasa.” Ini nga opinyon indi na bag-o.
Napatay si apostol Juan sang mga 100 C.E. kag pagligad sang mga 50 ka tuig, isa ka lamharon nga manggaranon nga si Marcion ang nagpahayag nga dapat isikway sang mga Cristiano ang Daan nga Testamento. Suno sa Ingles nga istoryador nga si Robin Lane Fox, nagpangatarungan si Marcion nga ang “‘Dios’ sa Daan nga Testamento isa ka ‘mapintas nga barbaro’ nga nagsakdag sa mga tulisan kag mga terorista kaangay ni Hari David sang Israel. Sa pihak nga bahin, si Cristo amo ang mas mataas nga Dios nga tuhay gid sa (Dios sa Daan nga Testamento).” Si Fox nagsulat nga ini nga mga pagpati “gintawag nga ‘Marcionismo’ kag madamo ang nangin tumuluo sini, ilabi na sa mga nagahambal sing Syriac sa Sidlangan, tubtob sang ikap-at nga siglo.” Ginapatihan gihapon sang iban ini nga mga panudlo. Subong resulta, pagligad sang kapin sa 1,600 ka tuig, sulat ni Philip Yancey, “ang mga Cristiano kag ang moderno nga katilingban halos wala na sing nahibaluan sa Daan nga Testamento.”
Ginbuslan na bala ang Daan nga Testamento sing Bag-o nga Testamento? Paano maghisanto ang aton paghangop sa “GINOO sang mga kasoldadosan” sa Daan nga Testamento sa “Dios sang gugma kag paghidait” sa Bag-o nga Testamento? (Isaias 13:13; 2 Corinto 13:11) Mapuslanon bala gihapon sa imo karon ang Daan nga Testamento?