Nahamuot ang Dios kay Noe—Ngaa Dapat Naton ini Talupangdon?

MADUMDUMAN pa sang kalabanan sa aton ang mga tion sang nabatian naton ang importante nga balita. Madumduman pa naton ang mga detalye​—kon nagaano kita kag kon ano ang aton reaksion sa sina nga balita. Pat-od nga wala gid nalipatan ni Noe ang tion nga nabaton niya ang balita gikan kay Jehova nga Dios, ang Soberano sa uniberso. May mas importante pa bala sa sina nga balita? Nagsiling si Jehova nga laglagon gid niya ang “tanan nga unud.” Ginsugo si Noe nga magtukod sing daku nga arka agod maluwas sia, ang iya pamilya, kag ang tagsa ka sahi sang sapat.​—Genesis 6:9-21.

Ano ang reaksion ni Noe? Nalipay bala sia sang nabatian niya ini nga balita, ukon nagreklamo sia? Paano niya ginsugid ini nga balita sa iya asawa kag pamilya? Wala ini ginsugid sang Biblia. Ang ginsugid lamang sini sa aton amo: “Ginhimo ini ni Noe; sono sa tanan nga ginsogo sang Dios sa iya, amo ang ginhimo niya.”​—Genesis 6:22.

Pat-od nga amo ini ang importante nga punto, kay ginpaathag sini nga bersikulo kon ngaa ginkahamut-an sang Dios si Noe. Handa si Noe nga tumanon ang tanan nga ginsugo sa iya sang Dios. (Genesis 6:8) Ano pa ang rason nga ginkahamut-an sang Dios si Noe? Importante gid ang sabat sa sini bangod kaangay ni Noe luyag naton nga kahamut-an kag luwason sang Dios kon tinluan niya liwat ang duta gikan sa mga malauton. Gani, binagbinagon anay naton kon ano ang kahimtangan sang adlaw ni Noe antes sang Anaw.

Nanaug sa Duta ang mga Demonyo

Nagkabuhi si Noe sa maaga nga bahin sang kasaysayan sang tawo. Natawo sia mga isa ka libo ka tuig pagkatapos gintuga ang una nga tawo. Ang mga tawo sa sina nga tion wala nagapuyo sa mga kueba. Indi man sila mga bulbulon ukon manol nga mga tinuga nga nagadala sing mga balakol kaangay sang ginahanduraw sang madamo. May mga kagamitan na nga human sa salsalon kag saway sa sina nga tion, kag mahimo nga naggamit sini si Noe sa pagtukod sing arka. May mga instrumento man sa musika. Nagapangasawa ang mga tawo, may mga pamilya, nagapanguma, kag may mga kasapatan. Nagabaligya kag nagabakal sila sing mga pagkabutang. Sa sini nga bahin, ang ila kahimtangan sadto pareho gid sa aton subong.​—Genesis 4:20-22; Lucas 17:26-28.

Apang, may mga kinatuhayan man sa iban nga kahimtangan. Ang isa sini amo nga mas malawig ang kabuhi sang mga tawo sang una. Normal lang sadto nga mabuhi ang mga tawo sing kapin sa 800 anyos. Si Noe nagkabuhi sing 950 anyos; si Adan, 930 anyos; kag si Metusela, ang lolo ni Noe, 969 anyos.a​—Genesis 5:5, 27; 9:29.

Ang isa pa ka kinatuhayan amo ang ginlaragway sa Genesis 6:1, 2, nga nagasiling: “Sang nagsugud pagbuad ang mga tawo sa kadaygan sang duta, kag natawo sa ila ang mga anak nga babayi, ang lalaki nga mga anak sang Dios nakakita sang babayi nga mga anak sang mga tawo nga maayoayo sila; kag nagpangasawa sila sang tanan nga ila napilian.” Ining “lalaki nga mga anak sang Dios,” mga anghel gikan sa langit nga nagpakatawo kag nagpuyo upod sa mga tawo. Wala sila ginsugo sang Dios nga magpuyo sa duta kag wala man sila nagkadto sa duta para sa kaayuhan sang mga tawo. Sa baylo, ‘ginbayaan nila ang ila nagakaigo nga puluy-an’ sa langit agod makigsekso sa matahom nga mga babayi sa duta. Nangin mga demonyo sila.​—Judas 6.

Nangin makahalalit ang impluwensia sa mga tawo sining rebelyuso, maulag, gamhanan kag maalam nga mga demonyo. Ginkontrol kag gindominahan nila ang katilingban sang mga tawo. Tuhay sila sa lider sang mga kriminal nga wala nagapakilala kag nagapanghikot sing likom. Sa baylo, hayag ang ila makahuluya nga pagrebelde batok sa kahimusan sang Dios.

Ining mga anghel sang Dios nakigrelasyon sa mga babayi, kag nanganak sing kabataan nga nagdalagku nga may di-kinaandan nga kusog. Gintawag sila sa Hebreo nga “Nefilim.” Ginsugiran kita sang Biblia: “Sadtong mga adlaw ang mga gigante [“Nefilim,” NW] yara pa sa duta, kag sa tapus man sadto, sang naghiusa ang mga anak nga lalaki sang Dios sa babayi nga mga anak sang mga tawo, kag nagpanganak sila sa ila. Ini sila amo ang gamhanan nga mga lalaki nga kutub sa dumaan, mga lalaki nga bantug.” (Genesis 6:4) Makahaladlok gid ang mga Nefilim. Ang tinaga nga “Nefilim” nagakahulugan sing “Manugpukan,” ukon mga nagapukan sa iban. Mga manugpatay sila kag ang ila kapintas makita sa mga baganihan sang dumaan nga mga sugilanon.

Ang Kalisod sang mga Matarong

Ginlaragway sang Biblia nga nanggamot kag lapnag gid ang kalautan sina nga henerasyon. Nagsiling ini: “Ang pagkamalaut sang tawo daku sa duta, kag nga ang tagsa ka painoino sang mga hunahuna sang iya tagiposoon malaut [gid] sing dalayon. . . . Ang duta napun-an sing panglugus. . . . Ang tanan nga unud nagdunut sang ila dalanon sa duta.”​—Genesis 6:5, 11, 12.

Amo ini ang kahimtangan sang panahon ni Noe. Sa kabaliskaran, “si Noe tawo nga matarung” nga “naglakat upud sa Dios.” (Genesis 6:9) Indi mahapos sa matarong nga tawo ang pagpuyo sa di-matarong nga katilingban. Pat-od gid nga nagkalisod si Noe sa ginasiling kag ginahimo sang mga tawo! Mahimo nga pareho sila sing nabatyagan ni Lot, nga isa man ka matarong nga tawo nga nagkabuhi pagkatapos sang Anaw. Si Lot nga nagapuyo sa tunga sang malauton nga mga tawo sa Sodoma, “natublag gid sa pagpatuyang sa lugak nga paggawi sang mga tawo nga di-matinumanon sa kasuguan​—kay nagaantos ang matarong nga kalag sining matarong nga tawo bangod sang ila malinapason nga mga buhat, nga iya nakita kag nabatian samtang nagapuyo sia sa tunga nila adlaw-adlaw.” (2 Pedro 2:7, 8) Gani amo gid sini ang ginbatyag ni Noe.

Natublag ka bala sa malain nga mga balita ukon sa di-diosnon nga paggawi sang mga tawo sa inyo palibot? Kon amo, mahangpan mo si Noe. Handurawa lamang kon daw ano kabudlay sa iya nga batason ang di-matarong nga kalibutan sa sulod sang 600 ka tuig, kay amo ini ang iya edad pag-abot sang Anaw. Pat-od nga luyag gid niya nga madula ang kalautan!​—Genesis 7:6.

May Kaisog si Noe nga Mangin Tuhay

Si Noe “himpit sa iya mga kadungan.” (Genesis 6:9) Talupangda nga nagsiling ang Biblia nga himpit sia sa tunga sang iya mga kadungan, apang indi sa pagtamod sang iya mga kadungan. Buot silingon, himpit sia sa panulok sang Dios, apang para sa mga tawo antes sang Anaw, lain gid sia sa iban. Makasiguro gid kita nga wala sia nagbuylog sa lapnag nga mga panimuot sang una, ukon sa di-diosnon nga mga kalingawan kag mga paglipaylipay sang mga tawo sa iya tion. Handurawa kon ano ang pagtamod sang mga tawo sa iya sang gintukod niya ang arka! Mahimo gid nga ginkadlawan kag ginyaguta sia. Wala nila ginsapak ang iya ginasiling.

Dugang pa, may pagtuo gid sa Dios si Noe, kag wala niya ini gintago, amo nga nagsiling ang Biblia nga ‘isa sia ka manugbantala sang pagkamatarong.’ (2 Pedro 2:5) Wala sing duhaduha, nahibaluan na ni Noe nga may mamatok sa iya. Ang iya lolo sa tuhod nga si Enoc matarong man nga tawo kag nagtagna nga silutan sang Dios ang mga malauton. Maathag nga amo ini ang rason kon ngaa ginpamatukan si Enoc, apang wala gintugutan sang Dios nga patyon sia sang iya mga manugpamatok. (Genesis 5:18, 21-24; Hebreo 11:5; 12:1; Judas 14, 15) Bangod kay Satanas, sa mga demonyo, sa mga Nefilim, kag sa madamo nga tawo nga wala nagsapak kag nagpamatok sa iya, kinahanglan ni Noe nga magpakaisog kag magtuo sa ikasarang ni Jehova sa pag-amlig sa iya.

Ang mga nagaalagad sa Dios masami nga ginapamatukan sang mga wala nagaalagad. Ginkaugtan man gani pati si Jesucristo kag ang iya mga sumulunod. (Mateo 10:22; Juan 15:18) May kaisog si Noe sa pag-alagad sa Dios, bisan pa ang mga tawo sang una indi luyag mag-alagad. Nahangpan niya nga mas importante nga pahamut-an ang Dios sangsa pahamut-an ang mga nagapamatok sa Iya. Amo nga nahamuot ang Dios kay Noe.

Nagsapak si Noe

Subong sang makita naton, maisugon nga nagbantala si Noe. Ano ang ila reaksion sa mensahe ni Noe? Nagsiling ang Biblia nga antes sang Anaw ang mga tawo “nagakaon kag nagainom, ang mga lalaki nagapangasawa kag ang mga babayi nagapamana, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila tanan.” Wala nila ginsapak ang paandam.​—Mateo 24:38, 39.

Nagsiling si Jesus nga amo man sini ang matabo sa aton adlaw. Kapin na sa isa ka gatos ka tuig nga ginapahibalo sang mga Saksi ni Jehova nga magapanghikot si Jehova agod tumanon ang iya ginsaad nga matarong nga bag-o nga kalibutan. Minilyon ang nagpamati kag nagtuman, apang binilyon ang wala nagasapak sa sini. “Suno sa ila luyag,” ginsikway nila ang katunayan kag importansia sang Anaw.​—2 Pedro 3:5, 13.

Apang ginsapak ini ni Noe. Nagpati sia sa ginsiling ni Jehova nga Dios. Naluwas si Noe bangod nangin matinumanon sia. Nagsulat si apostol Pablo: “Bangod sa pagtuo si Noe, sa tapos ginhatagan sing paandam sang Dios tuhoy sa mga butang nga wala pa makita, nagpakita sang diosnon nga kahadlok kag nagtukod sang arka agod maluwas ang iya panimalay.”​—Hebreo 11:7.

Isa ka Halimbawa nga Ilugon

Daku katama ang arka nga gintukod ni Noe​—mas malaba pa ini sangsa ginahampangan sing football kag pareho kataas sa tatlo ka panalgan nga bilding. Mas malaba ini sing kapin sa 30 metros sangsa sa Wyoming, ang labing daku nga de-layag nga sakayan nga human sa kahoy. Siempre pa, ang arka indi isa ka sakayan; ang importante amo nga makalutaw ini. Apang, nagakinahanglan gihapon ini sing moderno nga pamaagi sa pagtukod. Kag dapat nga balawon ini sa sulod kag sa gua. Mahimo nga kapin sa 50 ka tuig ang pagtukod sini.​—Genesis 6:14-16.

Luwas sa sini, kinahanglan nga magtipon si Noe sing isa ka tuig nga suplay sang pagkaon para sa iya pamilya kag sa mga sapat. Antes sang Anaw, kinahanglan tipunon pa ang mga sapat kag pasudlon sa arka. “Ginhimo ni Noe; sono sa tanan nga ginsogo sang Dios sa iya.” Makapaumpaw gid sang nakasulod na ang tanan sa arka kag ginsira ni Jehova ang puertahan sini!​—Genesis 6:19-21; 7:5, 16.

Nian nag-abot ang Anaw. Nag-ulan sa sulod sang 40 ka adlaw kag 40 ka gab-i. Ang tanan dapat nga magpabilin sa sulod sang arka sa bug-os nga tuig tubtob nga maghubas ang tubig. (Genesis 7:11, 12; 8:13-16) Nalaglag ang tanan nga malauton. Si Noe lamang kag ang iya pamilya ang nakalampuwas sa natinluan nga duta nga wala na sing malauton.

Nagsiling ang Biblia nga ang bug-os globo nga Anaw sa adlaw ni Noe “sulundan . . . sa mga butang nga magaabot.” Sa ano nga paagi? Aton mabasa: “Ang langit kag ang duta karon ginatigana sa kalayo kag ginatipigan tubtob sa adlaw sang paghukom kag sang paglaglag sa di-diosnon nga mga tawo.” Apang sa sini nga tion may maluwas man kaangay sang adlaw ni Noe. Mapat-od naton nga “nahibaluan ni Jehova kon paano luwason ang mga tawo nga may diosnon nga debosyon gikan sa pagtilaw.”​—2 Pedro 2:5, 6, 9; 3:7.

May diosnon nga debosyon si Noe, kag matarong sia sa tunga sang malauton nga henerasyon. Nagmatinumanon sia sing bug-os sa Dios. May kaisog sia sa paghimo sing matarong bisan pa nahibaluan niya nga pakahuy-an kag kaugtan sia sang mga tawo nga indi luyag mag-alagad sa Dios. Sa pag-ilog kay Noe sa sini nga paagi, kahamut-an man kita sang Dios kag maluwas pasulod sa bag-o nga kalibutan nga magaabot sa indi madugay.​—Salmo 37:9, 10.

[Footnote]

[Blurb sa pahina 5]

Ang kapintas sang mga Nefilim makita sa mga baganihan sang dumaan nga mga sugilanon

[Piktyur sa pahina 7]

Paagi sa pag-ilog sa pagtuo ni Noe, mahamuot sa aton ang Dios

[Credit Line sang piktyur sa pahina 5]

Alinari/​Art Resource, NY