Ang Epekto sang Mensahe ni Jesucristo

“Indi gid naton malipatan ining maalam nga tawo halin sa Capernaum kay asta subong nagapabilin gihapon sa aton hunahuna kag tagipusuon ang iya mga mensahe.”a—AUTHOR GREGG EASTERBROOK.

ANG pulong gamhanan. Ang matahom nga pinamulong makapahulag sa tagipusuon, makahatag sing paglaum, kag makapabag-o sa kabuhi. Wala na sing tawo nga mas maayo pa maghambal sangsa kay Jesucristo. Ang isa ka tawo nga nakabati sang iya popular nga Sermon sa Bukid, nagsiling sang ulihi: “Sa tapos mahambal ni Jesus ini nga pinamulong, ang kadam-an nahayanghag [ukon nagdayaw] sa iya paagi sang pagpanudlo.”—Mateo 7:28.

Asta subong, ang mga tawo sa bilog nga kalibutan pamilyar gihapon sa pinamulong ni Jesus. Binagbinaga ang pila sa sini.

“Indi kamo makapaulipon sa Dios kag sa Manggad.”—Mateo 6:24.

“Ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.”—Mateo 7:12.

“Ibayad . . . kay Cesar ang mga butang nga iya ni Cesar, apang sa Dios ang mga butang nga iya sang Dios.”—Mateo 22:21.

“May kapin nga kalipay sa paghatag sangsa pagbaton.”—Binuhatan 20:35.

Indi lamang matahom ang mga pinamulong ni Jesus kundi gamhanan man ang mensahe sini. Nagaunod ini sang kamatuoran parte sa Dios. Ginapakita sini ang matuod nga kahulugan sang kabuhi. Ginatudlo man sini nga ang Ginharian sang Dios amo lamang ang solusyon sa tanan nga pag-antos sang tawo. Samtang ginabinagbinag naton ang masunod nga mga artikulo, makita naton kon ngaa ‘asta subong, nagapabilin gihapon sa aton hunahuna kag tagipusuon ang mga mensahe ni Jesus.’

[Nota]