Pangitaa ang Matuod nga Manggad

1, 2. Sa sini nga sistema sang mga butang, ngaa indi madula ang kaimulon?

BANGOD sang sistema sang ekonomiya subong, nagaantos ang mga tawo kag wala sing pag-alalangay. Nabudlayan sa pagpangita sing trabaho ang mga pamatan-on. Madamo ang nagsaylo sa manggaranon nga mga pungsod bisan pa delikado ini. Pero bisan sa sini nga mga pungsod, madamo gihapon sing imol. Nagamanggaranon pa gid ang mga manggaranon pero nagaimol na gid ang mga imol. Base sa nagligad lang nga pagbulubanta, ang manggad sang pinakamanggaranon nga isa ka porsiento sang populasyon sa bilog nga kalibutan pareho na sa manggad sang tanan nga 99 porsiento. Indi pa ini sigurado, pero ang sigurado gid amo nga binilyon subong ang imol katama, samtang ang iban nagasululobra ang manggad nga makalab-ot sa pila pa ka henerasyon sang ila pamilya. Nahibaluan ni Jesus ining masubo nga kahimtangan sang nagsiling sia: “Ang mga imol kaupod ninyo pirme.” (Mar. 14:7) Ngaa amo sini?

² Nahibaluan ni Jesus nga ang Ginharian sang Dios lang ang makapabag-o sang sistema sang ekonomiya subong. Nalakip sa kalibutan ni Satanas ang pulitika, relihion, kag ang makagod nga komersio, nga ginarepresentar sang “mga negosyante” nga ginsambit sa Bugna 18:3. Bug-os nga makabulag sa pulitika kag butig nga relihion ang katawhan sang Dios, pero ang kalabanan sa ila indi makabulag sing bug-os sa komersio nga bahin sang kalibutan ni Satanas.

3. Ano nga mga pamangkot ang binagbinagon naton?

³ Bilang mga Cristiano, dapat naton usisaon kon ano ang aton pagtamod sa komersio sang kalibutan paagi sa pagpamangkot: ‘Paano ko magamit ang akon materyal nga mga butang para ipakita ang akon katutom sa Dios? Ano ang himuon ko para indi ko masentro ang akon kabuhi sa komersio sang kalibutan? Ano nga mga eksperiensia ang nagapamatuod nga ang katawhan sang Dios bug-os nga nagasalig sa iya bisan sa mabudlay nga kahimtangan?’

ANG ILUSTRASYON PARTE SA INDI MATARONG NGA TULUGYANAN

4, 5. (a) Ano ang kahimtangan sang tulugyanan sa ilustrasyon ni Jesus? (b) Ano ang ginlaygay ni Jesus sa iya mga sumulunod?

⁴ Basaha ang Lucas 16:1-9. Makapahunahuna sa aton ang ilustrasyon ni Jesus parte sa indi matarong nga tulugyanan. Sang ginsumbong ang tulugyanan nga ginausikan niya ang pagkabutang sang iya agalon, “maalamon” sia nga ‘nagpakig-abyan’ sa mga makabulig sa iya kon pahalinon na sia.a Wala ginpalig-on ni Jesus ang iya mga disipulo nga mangin indi matarong para lang mabuhi sa sini nga kalibutan. Ginsiling niya nga amo ini ang ginahimo sang “mga anak sini nga sistema sang mga butang,” pero gingamit niya ini nga ilustrasyon para magtudlo sang importante nga leksion.

⁵ Nahibaluan ni Jesus nga pareho sa tulugyanan nga ara sa mabudlay nga kahimtangan, ang kalabanan sa iya mga sumulunod dapat mangita sing palangabuhian sa sining kalibutan nga may pinasulabi. Gani ginlaygayan niya sila: “Magpakig-abyan kamo paagi sa manggad sining indi matarong nga kalibutan agod kon maubos ini, batunon nila [ni Jehova kag ni Jesus] kamo sa mga balay nga wala sing katapusan.” Ano ang matun-an naton sa sini nga laygay ni Jesus?

6. Ngaa masiling naton nga ang komersio indi bahin sang katuyuan sang Dios?

⁶ Maathag nga ginapakita sang Biblia nga ang komersio indi bahin sang katuyuan sang Dios. Bugana nga ginhatag ni Jehova ang mga kinahanglanon nanday Adan kag Eva sa Eden. (Gen. 2:15, 16) Sang ulihi, sang nagpanghikot ang balaan nga espiritu sa kongregasyon sang mga hinaplas sang unang siglo, “wala sing bisan isa sa ila ang nagkabig nga ang iya mga pagkabutang iya gid lang, kundi nagpaambitay sila sang ila tanan nga butang.” (Binu. 4:32) Gintagna ni Isaias nga maabot ang tion nga maayawan na ang tanan nga tawo sa patubas sang duta. (Isa. 25:6-9; 65:21, 22) Samtang wala pa ina, dapat mangin “maalamon” ang mga sumulunod ni Jesus sa pagpangita sing palangabuhian, nga nagagamit sang “manggad sining indi matarong nga kalibutan,” pero ginatinguhaan man nila nga mapahamut-an ang Dios.

MAALAMON NGA PAGGAMIT SANG MATERYAL NGA MANGGAD

7. Ano ang ginlaygay sa aton sa Lucas 16:10-13?

⁷ Basaha ang Lucas 16:10-13. Ang tulugyanan sa ilustrasyon ni Jesus nakig-abyan para sa iya kaayuhan. Ginlaygayan ni Jesus ang iya mga sumulunod nga makig-abyan kay Jehova kag sa iya, pero himuon nila ini indi para lang sa ila kaayuhan. Sa mga bersikulo pagkatapos sang ilustrasyon, mabasa ang kaangtanan sang paggamit sang “manggad sining indi matarong nga kalibutan” sa katutom sa Dios. Ginpadaku ni Jesus nga puede kita mangin “matutom” depende sa kon paano naton ginagamit ini nga manggad. Paano?

8, 9. Maghatag sing mga halimbawa sang nagpakita sang katutom sa ila paggamit sang materyal nga mga butang.

⁸ Mapakita naton ang katutom sa paggamit sang aton materyal nga mga butang paagi sa paghatag sing donasyon para sa bug-os kalibutan nga pagbantala nga gintagna ni Jesus. (Mat. 24:14) May gamay nga alkansiya ang isa ka bata sa India kag ginahulugan niya ini sing sensilyo, pati na ang inugbakal niya kuntani sang hampanganan. Sang napuno ang iya alkansiya, ginhatag niya ang kuarta para gamiton sa pagbantala. Ang isa ka utod sa India nga may kalubihan naghatag sang madamo nga lubi sa remote translation office sang Malayalam nga lenguahe. Bangod kinahanglan nila magbakal sing lubi, ginpamensar niya nga mas makabulig sia kon lubi ang iya ihatag sangsa kuarta. Maalamon ini. Pirme man nagahatag ang mga kauturan sa Greece sing olive oil, keso, kag iban pa nga pagkaon para sa pamilya Bethel.

⁹ Isa ka utod nga taga-Sri Lanka, nga nagsaylo sa iban nga pungsod, ang nagpagamit sang iya propiedad para sa mga miting kag asembleya kag para may istaran ang mga nagaalagad sing bug-os tion. Nagsakripisyo ini nga utod sa pinansial para mabuligan ang imol nga mga manugbantala. Sa isa ka pungsod nga ginadumilian ang pagbantala, ginapagamit sang mga kauturan ang ila balay para gamiton nga Kingdom Hall, gani may ara sing tilipunan ang madamo nga payunir kag iban pa nga pigado kag indi sila mabug-atan sa pinansial.

10. Ano nga mga pagpakamaayo ang mabaton naton kon maalwan kita?

¹⁰ Ginpakita sini nga mga halimbawa nga ang katawhan sang Dios “matutom sa gamay nga butang,” paagi sa paggamit sang ila materyal nga manggad, nga mas manubo ang balor sangsa espirituwal nga manggad. (Luc. 16:10) Ano ang ginbatyag sini nga mga abyan ni Jehova parte sa ila ginsakripisyo? Nahibaluan nila nga kon maalwan sila, matigayon nila ang “matuod nga manggad.” (Luc. 16:11) Ang isa ka utod nga pirme nagaamot para sa hilikuton sang Ginharian nagsugid sang nabaton niya nga pagpakamaayo: “Sugod sang nangin maalwan ako sa paghatag sing materyal, amat-amat nga nabatyagan ko ang pagbag-o sa akon kaugalingon. Nakita ko nga kon mas maalwan ako sa materyal, labi ako nga nangin maalwan sa akon panimuot sa iban. Mas madali ko mapatawad ang iban, nangin mas mapinasensiahon ako sa ila, kag mahapos ko batunon ang mga kapaslawan kag laygay.” Madamo ang nakabenepisyo sa espirituwal bangod maalwan sila.—Sal. 112:5; Hulu. 22:9.

11. (a) Ngaa “maalamon” ang maalwan nga paghatag? (b) Ngaa masiling nga may pag-alalangay sang pondo sa katawhan sang Dios? (Tan-awa ang piktyur sa umpisa sini nga artikulo.)

¹¹ May isa pa ka rason kon ngaa “maalamon” ang paggamit sang materyal nga mga butang para sa hilikuton sang Ginharian. Paagi sa sini, makabulig kita sa iban. Ang mga indi makaalagad sing bug-os tion ukon indi makaboluntaryo sa iban nga pungsod malipay nga ang ila ginaamot nagabulig sa pag-alagad sang iban. (Hulu. 19:17) Bangod sang boluntaryo nga mga amot, makapadala sing mga literatura kag mabuligan ang pagbantala sa mga teritoryo nga imol katama pero madamo ang nagabaton sang kamatuoran. Sa malawig nga tion, sa mga pungsod pareho sang Congo, Madagascar, kag Rwanda, dapat anay magpili ang mga kauturan kon bala mabakal sila sing pagkaon para sa ila pamilya ukon mabakal sila sing Biblia, kay kon kaisa ang bili sini katumbas na sang sueldo sa isa ka semana ukon sa isa ka bulan. Subong, bangod sang mga amot kag sang “pag-alalangay” sang pondo, gingastuhan sang organisasyon ni Jehova ang pag-translate sang Biblia kag paghatag sini sa kada miembro sang pamilya kag sa mga nagatuon sang Biblia. (Basaha ang 2 Corinto 8:13-15.) Gani puede na mangin abyan ni Jehova ang nagahatag kag ang nagabaton.

INDI PAG-ISENTRO ANG IMO KABUHI SA “NEGOSYO”

12. Paano ginpakita ni Abraham nga nagsalig sia sa Dios?

¹² Makapakig-abyan man kita kay Jehova kon indi naton pag-isentro ang aton kabuhi sa komersio kag kon pangitaon naton ang “matuod nga manggad.” Amo ini ang ginhimo ni Abraham sang una bangod sang iya pagtuo. Nagtuman sia kay Jehova kag ginbiyaan ang manggaranon nga siudad sang Ur kag nag-istar sa mga tolda bangod gusto niya mangin abyan ni Jehova. (Heb. 11:8-10) Nagsalig gid sia sa Dios nga amo ang ginahalinan sang matuod nga manggad, kag indi sa materyal nga mga butang. (Gen. 14:22, 23) Ginpalig-on ni Jesus ini nga sahi sang pagtuo sang ginsilingan niya ang isa ka manggaranon nga pamatan-on: “Kon luyag mo mangin himpit, lakat ka kag ibaligya ang imo mga pagkabutang kag ihatag ang kuarta sa mga imol, kag makatigayon ka sing bahandi sa langit; kag kari ka, mangin sumulunod ko.” (Mat. 19:21) Ini nga pamatan-on wala sing pagtuo nga pareho kay Abraham, pero may pila nga nagsalig sing bug-os sa Dios.

13. (a) Ano ang ginsiling ni Pablo kay Timoteo? (b) Paano naton masunod ang laygay ni Pablo?

¹³ May mabakod nga pagtuo si Timoteo. Gintawag sia ni Pablo nga “isa ka maayo nga soldado ni Cristo Jesus,” kag ginsilingan sia: “Wala sing soldado nga nadalahig sa negosyo sang kabuhi, agod matigayon niya ang kahamuot sang isa nga naglista sa iya subong soldado.” (2 Tim. 2:3, 4) Ang mga sumulunod ni Jesus subong, lakip ang sobra isa ka milyon nga nagaalagad sing bug-os tion, nagasunod sa laygay ni Pablo sa ila bug-os nga masarangan. Ginatinguhaan nila nga indi masulay sa mga ginatanyag sang kalibutan kay ginadumdom nila ini nga prinsipio: “Ang nagautang ulipon sang nagapautang.” (Hulu. 22:7) Gusto ni Satanas nga ubuson naton ang aton tion kag kusog sa pagpaulipon sa komersio sang iya kalibutan. May mga desisyon nga mahimo bangdan nga malubong sa utang ang isa. Ang iban nagapangutang para makabakal sang balay ukon salakyan, mag-eskwela, ukon magpakasal. Mapakita naton nga maalamon kita kon pasimplehon naton ang aton kabuhi, likawan ang pagpangutang, kag magkinot, para mangin hilway kita sa pag-alagad sa Dios sa baylo nga mangin ulipon sang komersio.—1 Tim. 6:10.

14. Ano dapat ang determinado naton nga himuon? Maghatag sing mga halimbawa.

¹⁴ Para mangin simple ang aton kabuhi, dapat naton unahon ang Ginharian. Halimbawa, isa ka mag-asawa ang may daku nga negosyo. Pero gusto nila mag-alagad liwat sing bug-os tion, gani ginbaligya nila ang ila negosyo, pumpboat, kag iban pa nga pagkabutang. Dayon nagboluntaryo sila sa konstruksion sang ulong talatapan sa Warwick, New York. Isa gid ini ka pagpakamaayo kay nakaalagad ini nga brother kag ang iya asawa sa Bethel upod sa ila bata nga babayi kag umagad, kag sa pila ka semana nakaupod man nila ang mga ginikanan sang brother nga nagaboluntaryo sa konstruksion sa Warwick. Isa ka utod nga babayi nga payunir sa Colorado, U.S.A., ang part-time nga nagaobra sa bangko. Nanamian gid sa iya obra ang iya amo, gani ginhatagan sia sing full-time nga trabaho kag tatlo ka pilo ang iya mangin sueldo. Pero wala niya ginbaton ini nga trabaho kay kuhaon sini ang iya tion para sa ministeryo. Pila lang ini ka halimbawa sang madamo nga ginsakripisyo sang mga alagad ni Jehova. Kon determinado kita nga unahon ang Ginharian, ginapakita sini nga ginapabaloran naton ang aton pagpakig-abyan sa Dios kag ang espirituwal nga manggad sa baylo sang materyal nga mga butang.

KON MAUBOS ANG MATERYAL NGA MANGGAD

15. Ano nga manggad ang nagahatag sang daku gid nga kalipay?

¹⁵ Ang materyal nga manggad indi basihan sa pagsiling nga ginapakamaayo kita sang Dios. Ginapakamaayo ni Jehova ang “manggaranon sa maayong mga buhat.” (Basaha ang 1 Timoteo 6:17-19.) Halimbawa, sang nahibaluan ni Luciab nga kinahanglan ang dugang nga manugbantala sa Albania, nagsaylo sia didto halin sa Italya sang 1993. Wala sia sing obra, pero nagsalig gid sia kay Jehova. Nangin sagad sia sa Albanian nga lenguahe kag nabuligan niya ang sobra 60 ka indibiduwal nga magdedikar sa Dios. Indi man tanan nga katawhan sang Dios ang may pareho sini nga resulta sa ila pagbantala. Pero ang tanan nga ginahimo naton sa pagbulig sa iban para makalakat sila sa dalan padulong sa kabuhi mangin pareho sang manggad nga mapabaloran naton sing dayon.—Mat. 6:20.

16. (a) Ano ang matabo sa ulihi sa komersio sang kalibutan? (b) Bangod sini, paano naton dapat tamdon ang materyal nga manggad?

¹⁶ Nagsiling si Jesus: “Kon maubos” ang manggad sining indi matarong nga kalibutan, indi ‘basi maubos’ ini. (Luc. 16:9) Sa sining katapusan nga mga adlaw, nagakaputo na ang pila ka bangko kag mga negosyo, pero mas grabe pa ang matabo sa bilog nga kalibutan sa palaabuton. Pat-od nga madula ang tanan nga bahin sang sistema ni Satanas, ang pulitika, relihion, kag komersio. Gintagna ni Ezequiel kag ni Sofonias nga sa ulihi, mangin wala na sing pulos ang bulawan kag pilak, nga importante gid sa komersio sang kalibutan sa malawig nga tion. (Ezeq. 7:19; Sof. 1:18) Ano ayhan ang batyagon naton kon tagumatayon na kita kag narealisar naton nga ginsakripisyo naton ang matuod nga manggad kabaylo sang madamo nga “manggad sining indi matarong nga kalibutan”? Mahimo nga pareho kita sa tawo nga nagtrabaho sa bilog niya nga kabuhi para magtipon sang madamo gid nga kuarta, pero nabal-an niya sang ulihi nga peke gali ini tanan. (Hulu. 18:11) Sigurado gid nga madula ini nga manggad sa ulihi, gani indi pagwasiha ang kahigayunan nga gamiton ini sa ‘pagpakig-abyan’ sa kay Jehova kag kay Jesus. Ang tanan nga ginahimo naton para sa Ginharian ni Jehova amo ang nagapamanggad sa aton sa espirituwal.

17, 18. Ano ang palaabuton sang mga abyan sang Dios?

¹⁷ Kon mag-abot na ang Ginharian sang Dios, indi na kinahanglan mag-arkila kag mangutang, madamo na sing pagkaon, kag wala na sang balayran para sa pagpabulong. Maayawan na ang katawhan ni Jehova sa pinakamaayo nga patubas sang duta. Ang bulawan, pilak, kag malahalon nga bato gamiton sa pagpatahom, kag indi na pagtipunon para sa negosyo. Libre na ang madamo nga de-kalidad nga materyales pareho sang kahoy, bato, kag metal para gamiton sa pagpatindog sing matahom nga mga balay. Malipay ang aton mga abyan sa pagbulig sa aton, kag indi bangod sa kuarta. May pag-alalangay na sa pagtigayon sang patubas sang duta.

¹⁸ Bahin lang ini sang wala tupong nga padya sang mga nagapakig-abyan kay Jehova kag kay Jesus. Malipay gid ang mga nagasimba kay Jehova sa duta kon mabatian nila nga magsiling si Jesus: “Kari, kamo nga ginpakamaayo sang akon Amay, panublia ninyo ang Ginharian nga gin-aman sa inyo halin sang pagtukod sa kalibutan.”—Mat. 25:34.