Mga Pamatan-on—“Padayon Ninyo nga Panikasugi ang Inyo Kaugalingon nga Kaluwasan”
“Subong nga matinumanon kamo pirme . . . , padayon ninyo nga panikasugi ang inyo kaugalingon nga kaluwasan nga may kahadlok kag pagkurog.”—FIL. 2:12.
1. Ngaa dapat magpabawtismo? (Tan-awa ang piktyur sa umpisa sini nga artikulo.)
KADA tuig, linibo ka estudyante sang Biblia ang ginabawtismuhan. Madamo sa ila ang pamatan-on—mga tin-edyer ukon mas bata pa. Mahimo nga nagdaku sila sa pamilya nga Saksi. Isa ka bala sa ila? Kon amo, maayo ang imo ginhimo. Dapat magpabawtismo ang isa ka Cristiano kay isa ini sa mga kinahanglanon para maluwas sia.—Mat. 28:19, 20; 1 Ped. 3:21.
2. Ngaa indi ka dapat mahadlok nga magdedikar kay Jehova?
2 Madamo nga pagpakamaayo ang nagahulat sa nagpabawtismo, pero may mga responsibilidad man sia. Sa ano nga paagi? Sa adlaw nga ginbawtismuhan ka, nagsabat ka sing huo sa pamangkot nga, “Pasad sa halad ni Jesucristo, naghinulsol ka na bala sa imo mga sala kag nagdedikar sang imo kaugalingon kay Jehova sa paghimo sang iya kabubut-on?” Ang imo pagpabawtismo nagasimbulo sang imo dedikasyon. Serioso mo ini nga promisa kay Jehova nga higugmaon sia kag unahon ang iya kabubut-on. Serioso ini nga obligasyon. Dapat bala nga hinulsulan mo ini? Indi. Indi sala nga si Jehova amo ang magatuytoy sa imo. Ang mga wala makakilala kay Jehova bahin sang kalibutan ni Satanas. Indi gusto sang Yawa nga maluwas ka. Ang matuod, malipay sia kon madula mo ang kabuhi nga dayon kaupod niya kay ginsikway mo ang paggahom ni Jehova.
3. Ano nga mga pagpakamaayo ang natigayon mo kay nagdedikar ka kay Jehova?
3 Hunahunaa kon ano nga mga pagpakamaayo ang natigayon mo sang nagdedikar ka kag nagpabawtismo. Ginhatag mo ang imo kabuhi kay Jehova, amo nga makasiling ka nga may daku nga pagsalig: “Si Jehova yara sa akon tupad; indi ako mahadlok. Ano ang mahimo sang tawo sa akon?” (Sal. 118:6) Wala na sing mas daku nga pribilehiyo sangsa magdampig sa Dios kag kahamut-an ka niya.
RESPONSIBILIDAD SANG KADA ISA
4, 5. (a) Ngaa masiling naton nga ang pagdedikar responsibilidad sang kada isa? (b) Ano nga mga kabudlayan ang ginaatubang sang tanan?
4 Bangod nabawtismuhan ka na nga Cristiano, ang imo kaangtanan kay Jehova wala nagadepende sa imo mga ginikanan. Ikaw na subong ang responsable sa imo kaluwasan, bisan nga nagapuyo ka pa gihapon upod sa imo mga ginikanan. Ngaa nga dapat mo ini dumdumon? Bangod indi mo mahibaluan kon ano nga mga problema ang imo pagaatubangon. Halimbawa, kon nabawtismuhan ka antes magtin-edyer, mahimo makaeksperiensia ka sang mga problema sang paghinupang. Ang isa ka pamatan-on nga babayi nagsiling: “Mahimo nga indi maglain ang buot sang isa ka bata kon indi sia makakaon sang keyk sa eskwelahan kon may birthday kay Saksi ni Jehova sia. Pero magabaskog ang balatyagon niya nga makig-sex pagligad sang pila ka tuig, gani dapat kumbinsido gid sia nga ang pagsunod pirme sa mga kasuguan ni Jehova amo ang pinakamaayo nga himuon.”
5 Siempre, indi lang ang mga pamatan-on ang makaeksperiensia sang mga kabudlayan. Bisan gani ang mga may edad na nga nabawtismuhan mahimo makaeksperiensia sing wala ginapaabot nga mga pagtilaw sa ila pagtuo. Mahimo maghalin ini sa ila pag-asawahay, panglawas, ukon trabaho. Bisan ano man ang aton edad, tanan kita makaatubang sing mga problema nga magatilaw sang aton katutom kay Jehova.—Sant. 1:12-14.
6. (a) Ano ang buot silingon nga wala sing kondisyon ang imo dedikasyon kay Jehova? (b) Ano ang matun-an mo sa Filipos 4:11-13?
6 Para makapabilin ka nga matutom, dapat mo dumdumon nga ang imo promisa kay Jehova wala sing kondisyon. Buot silingon nga ginsilingan mo ang Soberano sang uniberso nga magapadayon ka sa pag-alagad sa iya bisan pa nga mag-untat ang imo mga abyan ukon mga ginikanan. (Sal. 27:10) Bisan ano man ang sitwasyon, mangayo pirme sang bulig ni Jehova para matuman mo ang imo promisa sa iya.—Basaha ang Filipos 4:11-13.
7. Ano ang buot silingon nga panikasugan mo ang imo kaugalingon nga kaluwasan nga “may kahadlok kag pagkurog”?
7 Gusto ni Jehova nga mangin abyan ka niya. Pero dapat ka manikasog para indi madula ang inyo pag-abyanay kag matigayon mo ang kaluwasan. Bisan ang Filipos 2:12 nagasiling: “Padayon ninyo nga panikasugi ang inyo kaugalingon nga kaluwasan nga may kahadlok kag pagkurog.” Ginapakita sini nga teksto nga dapat mo hunahunaon sing maayo kon paano ka makapabilin nga suod kay Jehova kag mangin matutom sa iya bisan may mga kabudlayan. Indi kita dapat magsalig sa aton kaugalingon. Dumduma nga bisan ang pila nga madugay na nga alagad sang Dios wala makapabilin nga matutom. Gani, ano ang imo himuon para mapanikasugan mo ang imo kaugalingon nga kaluwasan?
IMPORTANTE ANG PAGTUON SANG BIBLIA
8. Paano magtuon sing personal, kag ngaa importante ini?
8 Para mangin abyan ni Jehova, dapat mamati kita sa iya kag makighambal sa iya. Ang personal nga pagtuon amo ang panguna nga paagi nga makapamati kita kay Jehova. Lakip sa sini ang pagtigayon sing ihibalo paagi sa pagbasa kag pagpamalandong sa Pulong sang Dios kag sa mga publikasyon nga base sa Biblia. Samtang ginahimo mo ini, dapat mo dumdumon nga ang pagtuon sa Biblia indi lang basta nga magkuha sing ihibalo. Indi ini pagsaulo lang sang impormasyon para makapasar ka sa eksam sa eskwelahan. Ang maayo nga pagtuon pareho sang paglakbay diin mahibaluan mo ang bag-o nga mga bahin sang personalidad ni Jehova. Magabulig ini sa imo nga mangin suod sa Dios, kag mangin suod man sia sa imo.—Sant. 4:8.
Maayo bala ang imo pagpakig-istorya kay Jehova? (Tan-awa ang parapo 8-11)
9. Ano nga mga galamiton ang nakabulig sa imo para sa imo personal nga pagtuon?
9 Ang organisasyon ni Jehova may mga galamiton para buligan ka sa pagtuon. Halimbawa, ang “Para sa Pagtuon sang Biblia” nga masapwan sa “Tin-edyer” nga seksion sang jw.org/hil makabulig sa imo nga matun-an ang praktikal nga mga leksion sa mga hitabo sa Biblia. Sa jw.org/hil man, may mga giya sa pagtuon nga “Ano Gid ang Ginatudlo sang Biblia?” para buligan ka nga mangin mabakod ang imo pagtuo parte sa imo mga ginapatihan. Buligan ka sini nga mapaathag ang imo mga ginapatihan sa iban. May pila pa ka panugda parte sa pagtuon sa artikulo nga “Pamangkot sang mga Pamatan-on . . . Ano ang Himuon Ko Para Manamian Ako sa Pagbasa sing Biblia?” sa Abril 2009 nga Magmata! Importante gid ang pagtuon kag pagpamalandong sa pagpanikasog mo nga matigayon ang imo kaugalingon nga kaluwasan.—Basaha ang Salmo 119:105.
IMPORTANTE ANG PANGAMUYO
10. Ngaa importante sa nabawtismuhan nga Cristiano ang pangamuyo?
10 Kon nagatuon kita sing personal, nagapamati kita kay Jehova, kag kon nagapangamuyo kita, nagapakighambal kita sa iya. Indi dapat pagtamdon sang isa ka Cristiano ang pangamuyo bilang rutina lang ukon ‘anting-anting’ para mangin madinalag-on sa isa ka hilikuton. Ang pangamuyo pagpakighambal gid sa aton Manunuga. Gusto ni Jehova nga mamati sa imo. (Basaha ang Filipos 4:6.) Gani kon nagakabalaka ka, ang Biblia nagasiling nga “itugyan ang imo lulan kay Jehova.” (Sal. 55:22) Nagapati ka bala sini? Minilyon ka kauturan ang makasiling sa imo nga nakabulig gid ini sa ila. Makabulig man ini sa imo!
11. Ngaa dapat ka magpasalamat pirme kay Jehova?
11 Pero ang pangamuyo indi lang pagpangayo sing bulig kay Jehova. Ang Biblia nagasiling: “Ipakita nga mapinasalamaton kamo.” (Col. 3:15) Kon kaisa bangod sa grabe naton nga kabalaka sa aton mga problema, indi na naton matalupangdan ang nabaton naton nga mga pagpakamaayo. Maghunahuna sing bisan tatlo lang ka butang kada adlaw nga dapat ka magpasalamat. Mangamuyo dayon kag pasalamati si Jehova sining mga pagpakamaayo. Si Abigail, nga isa ka tin-edyer kag nabawtismuhan sang 12 anyos sia, nagsiling: “Sa banta ko si Jehova ang aton dapat pasalamatan sangsa kay bisan sin-o sa uniberso. Kon may kahigayunan kita, dapat pasalamatan naton sia sa mga dulot nga ginhatag niya sa aton. May maayo nga pahanumdom ako nga nabatian: Kon halimbawa madula ang mga butang nga wala naton mapasalamatan kay Jehova subong, ano ayhan ang mabilin sa aton buas?”a
ANG BENTAHA SANG EKSPERIENSIA
12, 13. Ngaa importante nga dumdumon mo nga nakaeksperiensia ka mismo sang kaayo ni Jehova?
12 Si Hari David, nga nakabatas sadto sang madamo kag mabudlay nga mga kahimtangan, nag-amba: “Tilawi ninyo kag tan-awa nga si Jehova maayo; malipayon ang tawo nga nagadangop sa iya.” (Sal. 34:8) Ginapakita sini nga bersikulo nga maayo gid kon kita mismo ang makaeksperiensia sini. Kon ginabasa mo ang Biblia kag ang aton mga publikasyon kag kon nagatambong ka sa Cristianong mga miting, makabati ka sing makapalig-on nga mga eksperiensia kon paano ginbuligan sang Dios ang iban nga makapabilin nga matutom. Pero samtang nagabakod pa gid ang imo kaangtanan kay Jehova, dapat makita mo kon paano ka niya ginabuligan. Paano ka nakaeksperiensia sang kaayo ni Jehova?
13 May isa ka pinasahi nga paagi nga ang tanan nga Cristiano nakaeksperiensia sang kaayo ni Jehova. Ini amo ang pag-agda niya sa aton nga mangin suod sa iya kag sa iya Anak. Si Jesus nagsiling: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” (Juan 6:44) Nabatyagan mo bala nga isa ka sa ginapatuhuyan sini nga teksto? Ang isa ka pamatan-on basi magsiling, ‘Si Jehova ang nagbuyok sa akon mga ginikanan, kag nagsunod lang ako.’ Pero sang nagdedikar ka kay Jehova kag nagpabawtismo, maathag nga may pinasahi ka na nga kaangtanan sa iya. Nakilala ka na gid niya. Ang Biblia nagapasalig sa aton: “Kon ang isa nagahigugma sa Dios, kilala niya sia.” (1 Cor. 8:3) Tinguhai pirme nga apresyahon ang imo papel sa organisasyon ni Jehova.
14, 15. Paano ang ministeryo makabulig sa imo nga makatigayon sing mabakod nga pagtuo?
14 Ang isa pa ka paagi nga matilawan mo ang kaayo ni Jehova amo kon sakdagon ka niya nga ipaambit sa iban ang imo ginapatihan. Mahimo mo ini sa ministeryo kag sa eskwelahan. Ang iban nabudlayan nga bantalaan ang ila mga kaeskwela. Mahimo naintiendihan mo kon ngaa. Indi mo mahibaluan kon ano ang ila reaksion. Mas mabudlay pa gid kon ang sugiran mo sang imo mga ginapatihan daku nga grupo sangsa isugid mo ini sa kada isa sa ila. Ano ang makabulig sa imo?
15 Una, binagbinaga kon ngaa kumbinsido ka sa imo mga ginapatihan. Sarang mo magamit ang mga giya sa pagtuon nga makita sa jw.org/hil. Gindesinyo ini nga buligan ka para mapamalandungan mo kon ano ang imo ginapatihan, ngaa ginapatihan mo ini, kag kon paano mo mapaathag ang imo mga pagpati sa iban. Kon kumbinsido ka gid kag nakahanda sing maayo, luyag mo nga magpanaksi parte kay Jehova.—Jer. 20:8, 9.
16. Ano ang makabulig sa imo nga indi mahadlok sa pagsugid sang imo mga ginapatihan?
16 Bisan nakahanda ka sing maayo, mahimo nga ginakulbaan ka gihapon sa pagsugid sang imo mga ginapatihan. Ang 18 anyos nga utod nga babayi nga nabawtismuhan sang 13 pa lang sia, nagsiling, “Nahibaluan ko ang akon ginapatihan, pero kon kaisa nabudlayan ako nga isugid ini.” Ano ang iya ginhimo? “Gintinguhaan ko nga mangin mainabyanon,” siling niya. “Ginaistorya sang akon mga klasmeyt ang ila ginahimo. Dapat amo man sini ang akon himuon. Kon mag-istorya ako, nagasiling ako pareho sang, ‘May gintudluan ako sang Biblia kahapon, kag . . . ’ Ginapadayon ko dayon ang akon istorya. Bisan pa nga ang ginaistoryahan indi parte sa Biblia, kon kaisa ang iban gusto mahibaluan kon ano ang ginahimo ko kon nagatudlo sang Biblia. Kon kaisa nagapamangkot sila parte sa sini. Nahapusan na ako sa paghimo sini kay pirme ko ini nga ginahimo. Nalipay gid ako kon makapanaksi ako!”
17. Ano pa ang makabulig sa imo para makabantala ka sa iban?
17 Kon respetuhon mo ang iban kag ipakita mo nga nabalaka ka sa ila, mahimo nga amo man sini ang ila himuon sa imo. “Nahadlok ako nga kon ilakip ko sa ginaistoryahan ang Biblia, tamdon ako sang mga tawo nga panatiko.” Amo sini ang ginsiling ni Olivia, nga 17 anyos kag ginbawtismuhan antes magtin-edyer. Pero, ginbag-o niya ang iya panghunahuna. Sa baylo nga panumdumon ang iya ginakahadlukan, nagsiling sia: “Madamo nga pamatan-on ang wala sing nahibaluan parte sa mga Saksi ni Jehova. Kami lang ang Saksi nga ila nakilala. Gani importante gid kon paano namon sila ginapakig-angutan. Ano abi kon mahuluy-on kami ukon nabudlayan sa pagsugid sang amon mga ginapatihan, ukon nahadlok kami kon magsugid kami sa ila? Masiling sila nga wala kami nalipay nga mangin Saksi. Basi insultuhon pa nila kami kay daw wala kami sing kompiansa. Pero kon mangin kalmado kami kag serioso sa pagsugid sa ila sang amon ginapatihan, nga daw bahin lang ini sang paghambalanay, mahimo nga respetuhon nila kami.”
PADAYON NGA PANIKASUGI ANG IMO KAUGALINGON NGA KALUWASAN
18. Ano ang dapat mo himuon sa pagpanikasog mo sang imo kaugalingon nga kaluwasan?
18 Suno sa nabinagbinag na, nangin maathag nga ang pagpanikasog para sa imo kaugalingon nga kaluwasan isa ka serioso nga responsibilidad. Para mahimo ini, dapat mo basahon ang Pulong sang Dios kag pamalandungan ini, mangamuyo kay Jehova, kag binagbinagon sing maayo kon paano ka ginpakamaayo ni Jehova. Ang paghimo sini tanan magapabakod sang imo pagsalig sa imo pribilehiyo nga mangin abyan ni Jehova. Mapahulag ka man nga isugid sa iban ang imo mga ginapatihan.—Basaha ang Salmo 73:28.
19. Ngaa may pulos gid ang imo pagpanikasog para sa imo kaluwasan?
19 Si Jesus nagsiling: “Kon ang bisan sin-o luyag magsunod sa akon, ipanghiwala niya ang iya kaugalingon kag pas-anon ang iya usok sang pag-antos kag padayon nga magsunod sa akon.” (Mat. 16:24) Huo, sa pagsunod kay Jesus, dapat ang tagsa ka Cristiano magdedikar sang iya kaugalingon kay Jehova kag magpabawtismo. Pero pamuno pa lang ini sang makalilipay nga pagkabuhi subong, kag magaresulta ini sang kabuhi nga dayon sa bag-ong kalibutan sang Dios. Gani padayon gid nga panikasugi ang imo kaugalingon nga kaluwasan!
a Para sa dugang nga mga panugda, tan-awa ang “Pamangkot sang mga Pamatan-on—Ngaa Dapat Ako Mangamuyo?” kag ang upod sini nga worksheet sa jw.org/hil.