Pagbulig sa Iban sa Pagpadungog sa Aton Magbubuhat
1 Kaangay bala sa salmista ang aton balatyagon sang nagsiling sia: “O Jehova, . . . sa imo yara ang tuburan sang kabuhi?” (Sal. 36:5, 9) Paano naton mabuligan ang iban sa paghatag sing kadungganan sa aton Manunuga? Paagi sa pagtanyag sang Life—How Did It Get Here? By Evolution or by Creation? sa Hunyo. Ini nga libro nagahatag sing malig-on nga ebidensia sa pagluntad sang Dios kag maathag nga nagapakita kon ngaa indi matuod ang ebolusyon.
2 Yari ang isa ka simple kag direkta nga presentasyon.
Pagkatapos matamyaw ang tagbalay, ipakita ang laragway sa pahina 6 kag mamangkot:
◼ “Paano bala nagsugod ang kabuhi sa sining duta? Ang iban nagasiling nga ini aksidente lamang. Ang Biblia nagahatag sang tanan nga kadayawan sa Dios. Ano sa banta mo? [Pasabta sia.] Ini nga libro nagahatag sing mga sabat nga nahisanto sing bug-os sa Biblia kag sa sientipikong mga katunayan. Luyag ko nga matigayon mo ini agod marepaso mo ang tanan nga ebidensia kag makapamat-od ka para sa imo kaugalingon.”
3 Sa tapos mapakilala ang kaugalingon, ayhan makasiling kamo:
◼ “Sa sining sientipiko nga kalibutan, praktikal bala ang magpati sa pagpanuga, ukon nagahunahuna ka bala nga nagluntad kita diri sing natabuan lamang? [Pasabta sia.] Talupangda ang pangatarungan sang Biblia sa sini nga butang. [Basaha ang Hebreo 3:4.] Wala ka bala nagaugyon nga ang tagsa ka tinukod may manunukod? Gani, mahimo bala nga magluntad lamang ang uniberso sing kinaugalingon?” Ipakita ang ilustrasyon sa pahina 114 sang Creation nga libro, kag nian sambita ang detalye sa parapo 2 sa pahina 115. Kon kuhaon sang tagbalay ang libro, sugiri sia nga sa imo masunod nga pagduaw hambalan ninyo ang pamangkot, Ano ang palaabuton sang tawo kag sang duta?
4 Ukon pagkatapos matamyaw ang tagbalay, ayhan masiling kamo:
◼ “Ano sa banta mo ang hitsura sang aton nahaunang mga katigulangan? [Pasabta sia.] Kaangay bala sining ‘amo-nga-tawo’ ang ila hitsura? [Buksi ang pahina 83 sang Creation nga libro.] Talupangda ang ginasiling sang Biblia sa Binuhatan 17:26. [Basaha.] Gani, sa ano ginpasad ang mga drowing sa ‘amo-nga-tawo’? Ipatalupangod ang kapsion sa ubos sang drowing sa pahina 89.
5 Ang isa pa ka pagpalapit mahimo nga amo ang pagtudlo sa panghapin sang “Creation” nga libro kag magsiling:
◼ “Ginapamangkot namon karon ang amon mga kaingod, Nagluntad bala diri ang tawo sa kalalangan sang ebolusyon ukon sa kalalangan sang pagpanuga? Ano sa banta mo? [Pasabta sia.] Bisan nga madamo sa mataas sing tinun-an nga mga tawo ang nagapati sa ebolusyon, talupangda ang ginsiling sang isa ka anay astronawt. [Ipakita ang p. 122, par. 4.] Dapat naton usisaon sing personal ang ebidensia agod makita kon diin ang dapat naton patihan—ang ebolusyon ukon ang pagpanuga.”
6 Handom mo bala nga buligan ang iban sa pagtuon sang kamatuoran nahanungod sa aton Manunuga kag sa iya mahigugmaon nga katuyuan? Ang Creation nga libro makabulig sa imo sa sini. Ginapadunggan sini ang aton Daku nga Manunuga paagi sa pagsugid sang iya makatilingala nga katuyuan nga pakamaayuhon ang katawhan paagi sa Ginharian ni Cristo.